Winter

ᑯᐯᒃᒥ ᓂᕈᐊᕐᓃᑦ ᐊᑑᑎᔭᐅᓚᐅᔪᕗᑦ ᐆᒃᑐᐱᕆ 3, 2022-ᖑᑎᓪᓗᒍ. ᑯᐯᒃ ᑲᕙᒪᒃᑯᑦ ᐊᖓᔪᕐᖄᖓᑦ François Legault/ᕙᕋᓐᓱᐊ ᓗᑰ ᓂᕈᐊᕐᑕᐅᓕᕐᕿᓚᐅᔪᔪᖅ ᐅᖃᕐᕕᒪᕆᒻᒥ 90-ᓂᒃ ᐃᑦᓯᕙᐅᑕᑕᕐᓱᑎ Coalition Avenir Québec ᑲᕙᒪᐅᓚᖓᑦᓱᑎᒃ. Liberals ᑐᖓᓕᖕᖑᓚᐅᔪᔪᑦ ᐅᖃᕐᕕᒪᕆᒻᒥ ᐃᑦᓯᕙᐅᑕᑕᕐᓱᑎᒃ 21-ᓂᒃ ᑲᕙᒪᓇᓱᑦᑎᐅᔪᑦ ᐱᖓᔪᐃᑖᕐᓱᑎᒃ Québec Solidaire-ᑯᓂᒃ ᐃᑦᓯᕙᐅᑕᑕᕐᑎᓗᒋᑦ 11-ᓂᒃ Parti Québécois-ᑯᓪᓗ ᐱᖓᓱᓂᒃ ᐃᑦᓯᕙᐅᑕᕐᑕᑐᑦ.

ᐅᖓᕙᒥ, Denis Lamothe/ᑎᐊᓂ ᓚᒻᒫᑦ ᓂᕈᐊᕐᑕᐅᒋᐊᓕᕐᕿᓚᐅᔪᔪᖅ ᓂᕈᐊᕐᑕᐅᓱᓂ ,132-ᓄᑦ. ᐊᓪᓓᑦ ᑯᔩᑦ ᓂᕈᐊᕋᑦᓴᖁᑎᖓᓐᓂᒃ Maïtée Labreque-Saganash/ᒣᑦᓰ ᓚᑉᕆᐊᒃ-ᓵᑲᓐᓈᔅ ᑐᖓᓕᐅᑎᓪᓗᒍ ᓂᕈᐊᕐᑕᐅᓱᓂ 2,092-ᓄᑦ (Quebec Solidaire)-ᑯᑦ. ᑐᓄ ᓇᐹᕐᑐᖅ, ᑰᒃᔪᐊᒥᐅᖅ, ᐱᖓᔪᒋᔭᐅᓚᐅᔪᔪᖅ Liberals-ᑯᓐᓂ ᑭᒡᒐᑐᕐᓱᓂ ᓂᕈᐊᕐᑕᐅᓱᓂ 1,571-ᓄᑦ, Christine Moore/ᑭᕆᔅᑏᓐ ᒨᐅ ᓂᕈᐊᕐᑕᐅᑎᓪᓗᒍ 1,084-ᓄᑦ ᑭᒡᒐᑐᕐᓱᓂ PQ-ᑯᓂᒃ ᐊᒻᒪᓗ Nancy Lalancette/ᓈᓐᓯ ᓚᓛᓐᓯᐊᑦ ᓂᕈᐊᕐᑕᐅᑎᓪᓗᒍ 756-ᓄᑦ ᑭᒡᒐᑐᕐᓱᓂ Conservatives-ᓂᒃ.

ᓂᕈᐊᕐᓀᑦ ᐅᓪᓗᖏᑦ ᐊᑑᑎᑎᓪᓗᒋᑦ, ᑯᐯᒃ Liberal-ᑯᑦ ᓯᕗᓕᕐᑎᖓᑦ Dominique Anglade/ᑕᒻᒥᓂᒃ ᐋᖕᑲᓛᑦ ᑰᒃᔪᐊᓕᐊᓚᐅᔪᕗᖅ ᑐᓄ ᓇᐸᕐᑑᑉ ᓂᕈᐊᕐᑕᐅᑎᒐᓱᓐᓂᖓᓂᒃ ᓴᐳᑦᔨᒋᐊᕐᑐᓱᓂ. “ᐊᓕᐊᒋᑦᓴᖑᐊᓚᔪᔭᕋ ᑕᒪᓐᓇ ᐊᑑᑎᒋᐊᖓ. ᐱᓂᐊᕐᓂᓕᕆᐅᑎᓂᒃ ᑲᒪᒋᔭᖃᕆᐊᒥᒃ ᐅᕙᓐᓄᑦ ᐱᐅᓯᑐᐃᓐᓇᐅᔮᕐᒪᑦ,” ᐅᖃᕐᑐᖅ ᑐᓄ. “ᐊᐅᓚᔨᒐᒪ ᔦᐱᑎ ᓄᖕᖓᖅ ᓂᕈᐊᕐᑕᐅᑎᒐᓱᑦᑎᓗᒍ ᑖᒃᑯᓂᖓ Liberals-ᓂᒃ ᓂᕈᐊᕐᑕᐅᕕᖃᕋᓱᑦᓱᓂ ᐊᕐᕌᒍᐃᑦ 70-ᓃᑎᓪᓗᒋᑦ. ᓂᐱᖃᖃᑕᐅᒋᐊᖃᕋᑦᑕᑦ ᑯᐯᒃ ᐅᖃᕐᕕᒪᕆᖓᓂ.”

ᐅᖓᕙᒥ ᓂᕈᐊᕐᑕᐅᓯᒪᕕᒃ ᐃᓄᖁᑎᖃᕐᐳᖅ ᒥᑦᓯᑎᓐᓂ 45,000-ᓂᒃ 27,500 ᓂᕈᐊᓚᐅᔪᔪ 2022-ᒥ ᓂᕈᐊᕐᓇᖃᕐᑎᓗᒍ. ᐃᓱᒪᒋᓗᒍ ᐊᖏᓂᖓ ᓄᓇᐅᑉ 855,100-ᓂᒃ ᓯᒃᑭᑕᐅᓕᖓᔪᓂᒃ ᑭᓚᒦᑕᓂᒃ ᐊᖏᓂᓕᒃ, ᐊᑦᔨᒋᖕᖏᑕᒻᒪᕆᖏᑦ ᕿᑭᕐᑕᓂ Magdalen Islands/ᒪᒃᑕᓚᓐ ᐁᓛᓐᓯᓂ ᐃᓄᐃᑦ ᐅᓄᕐᓂᖏᑦ 12,700 ᓂᕈᐊᕈᓐᓇᑐᑦ ᐅᓄᕐᓂᖃᑎᓗᒋᑦ 10,750 ᓄᓇᖓᓗ ᐊᖏᓂᖃᕐᓱᓂ 33,923-ᓂᒃ ᓯᒃᑭᑕᐅᓕᖓᑦᓱᑎᒃ ᑭᓚᒦᑕᓂᒃ. ᑭᖑᓪᓕᖅ ᐊᕕᑦᑐᐃᒋᐊᑦᓯᐊᓂᖅ ᐊᑑᑎᔭᐅᓂᖃᓛᕐᑐᖅ 2026 ᐊᕐᕌᒍᖓᓂ ᓂᕈᐊᕐᓂᖃᓕᕐᒥᐸᑕ. ᐃᓄᓕᒫᓂᒃ ᑐᑭᓯᓂᐊᕐᕕᖃᕐᓃᑦ ᓂᕆᐅᒋᔭᐅᕗᑦ ᐊᑑᑎᔭᐅᓂᖃᓛᕐᑎᓗᒋᑦ , ᑲᔪᓯᑎᑦᓯᒍᑎᒋᔭᖏᓂ ᑯᐯᒃ ᓂᕈᐊᕐᑐᓕᕆᕕᖓᑕ ᐱᒋᐊᖕᖓᓗᑎᒃ 2023 ᐅᑭᐊᖓᓂ.

ᑐᓄ ᓇᐹᕐᑐᖅ ᐅᖃᓚᐅᔪᔪᖅ ᐃᒣᓕᑦᓱᓂ, “ᐃᓄᑐᐃᓐᓀᓗ ᐊᒻᒪᓗ ᐊᓪᓓᑦ ᑯᔩᑦ ᓇᒻᒥᓂᕐᒥᓂᒃ ᐃᓅᑦᔪᖃᕐᐳᑦ, ᑌᒃᑯᑎᑐᓇ Magdalen Islands/ᒪᒃᑕᓚᓐ ᐁᓛᓐᓯᒥᐅᑎᑐᑦ, ᐅᖃᕐᕕᒪᕆᒻᒥ ᓂᕈᐊᕐᑕᐅᓯᒪᕕᖃᕐᑐᓴᐅᒻᒥᔪᑦ ᐃᓕᖓᔪᓂᒃ ᓄᓇᕕᒻᒥᐅᓗ ᐃᔫᒥᐅᓪᓗ ᓄᓇᖁᑎᖏᓐᓄᑦ”

Denis Lamothe/ᑎᐊᓂ ᓚᒻᒫᑦ ᐅᖃᓚᐅᔪᕗᖅ ᓯᕗᓂᕐᒥᓂ ᐃᑲᔪᕐᓯᓛᕈᒪᑦᓱᓂ ᓄᓇᕕᒻᒥ ᓄᓇᖁᑎᓖᑦ ᐱᔭᕇᕐᑕᐅᖁᑦᓱᒋᑦ ᓱᑲᑦᑐᒥᒃ ᖃᕆᑕᐅᔭᕈᑏᑦ ᐱᑐᑦᓯᒪᐅᑎᑕᕐᑕᐅᓂᑦᓴᖏᓐᓂᒃ, ᐱᑐᑦᑎᓯᒍᑎᑦᓴᐅᓱᑎᒃ ᐳᕕᕐᓂᑐᒥᑦ ᑲᖏᕐᓱᐊᓗᒃᔪᐊᒧᑦ, ᑰᒃᔪᐊᒥᓪᓗ ᑳᒍᐊᒍᐊᑦᓯᑲᒫᒃᒧᑦ. ᐅᖃᕐᓱᓂᓗ “ᐃᓗᓯᓕᕆᓂᕐᒥᒃ ᐱᓇᓱᒍᑏᑦ, ᐃᓕᓐᓂᐊᓂᕐᒥᒃ ᐱᓇᓱᒍᑏᑦ ᐊᒻᒪᓗ ᐃᕐᖃᑐᐃᕕᓕᕆᓂᕐᓂᒃ ᐱᓇᓱᒍᑏᑦ – ᓱᓇᓕᒫᑦ ᓱᓇᓕᒫᑦ ᖃᕆᑕᐅᔭᕈᑎᑎᒍᑦ ᓱᑲᑦᑐᒥᒃ ᐱᕙᓪᓕᐊᑎᑕᐅᓂᖃᕈᓐᓇᒪᑕ.”

ᓚᒻᒫᑦ ᐳᓖᓯᐅᓚᐅᕐᓯᒪᕗᖅ ᑯᐯᒃᑯᑦ ᐳᓖᓯᖏᓐᓂ ᑕᒪᑐᒥᖓᓗ ᐱᓇᓱᐊᕐᓯᒪᕗᖅ ᐊᕐᕌᒍᓂ 30-ᓂ. ᑰᒃᔪᐊᕌᐱᖕᒥᐅᖑᓯᒪᔪᖅ, ᐃᓄᑦᔪᐊᒥᓗ ᐊᒻᒪᓗ ᑰᒃᔪᐊᒥ ᐃᓘᓐᓇᖏᓐᓄᓗ ᓄᓇᓕᓐᓄᑦ 14-ᓄᑦ ᐊᕐᕕᑕᕐᓯᒪᑦᓱᓂ, ᐃᓚᖃᕐᒥᑎᓪᓗᒋᑦ ᐱᖓᓲᔪᕐᑐᓂᒃ ᐊᓪᓓᑦ ᑯᔩᑦ ᓄᓇᓕᖏᓐᓂᒃ. ᐅᖃᕐᑐᖅ “ᐃᓅᓕᕐᓯᒪᕗᖓ ᑭᒃᒐᑐᕐᑐᓴᐅᑦᓱᖓ ᑖᑦᓱᒥᖓ ᓂᕈᐊᕐᑕᐅᒪᕕᒻᒥᒃ.” ᐅᖃᕐᓱᓂᓗ ᖃᐅᔨᒪᓂᕐᓴᐅᓕᕆᐊᒥᒃ ᓄᓇᕕᐅᓪᓗ ᐃᔫᒥᐅᓪᓗ ᓄᓇᓕᖏᓐᓂᒃ ᖃᐅᔨᒪᔭᖃᑦᓯᐊᓂᕐᓴᕉᖅ ᓴᓂᐊᓐᓂ ᓯᕿᓂᕐᒥᐅᖑᓂᕐᓭᑦ ᓄᓇᓕᖏᓐᓂᑦ ᑕᒃᑲᓂ ᓂᕈᐊᕐᑕᐅᓯᒪᕕᒻᒥ.