ᐱᐅᓯᕆᔭᐅᓯᒪᔪᓄᑦ – ᔦᒥᔅᐯᒥᓗ ᑯᐯᒃ ᑕᕐᕋᖓᓂᓗ ᐊᖏᖃᑎᒌᓐᓂᖓᑦ
ᐅᑯᐊ ᔦᒥᔅᐯᒥᓗ ᑯᐯᒃ ᑕᕐᕋᖓᓂᓗ ᐊᖏᖃᑎᒌᓐᓂᖓᑦ (ᐊᖏᖃᑎᒌᓐᓂᖓᑦ) ᐊᑎᓕᐅᕐᑕᐅᓚᐅᕐᓯᒪᕗᑦ ᓅᕕᒻᐱᕆ 11, 1975-ᒥ. ᑖᒃᑯᐊ ᓯᕗᓪᓕᐸᐅᑦᓱᑎᒃ ᓄᓇᑖᕋᓱᐊᕐᓂᒧᑦ ᐊᖏᖃᑎᒌᒍᑎᐅᓯᒪᔪᑦ ᑲᓇᑕᒥ, ᓄᐃᑦᓯᒍᑕᐅᑦᓱᑎᒃ ᓄᑖᓂᒃ ᐅᓪᓗᓂᒃ ᓄᓇᑖᕋᓱᐊᕐᓂᓕᕆᓂᕐᒧᑦ.
1971-ᒥ, ᑯᐯᒃᑯᑦ ᑲᕙᒪᖓᑦ ᑐᓴᕐᑎᓯᓚᐅᕐᓯᒪᕗᖅ “100 ᐅᑭᐅᑦ ᐃᓗᐊᓂ ᐱᓇᓱᐊᕐᑕᐅᒪᕆᓐᓂᐊᑐᒥᒃ” – ᔦᒥᔅᐯᒥ ᑰᓐᓂᒃ ᐃᑯᒪᓕᐅᕈᑎᓕᐅᕐᓂᒥᒃ. ᐱᓇᓱᐊᕐᑕᐅᒍᒪᓕᕐᑑᑉ ᐊᖏᓂᐊᓗᐊ ᑐᑭᖃᕐᑎᓯᓚᐅᔪᕗᖅ ᑕᒪᒃᑯᐊ ᓄᓀᑦ ᓇᔪᕐᑕᐅᖃᑦᑕᓯᒪᔪᑐᙯᑦ ᐊᑐᕐᑕᐅᓲᑐᙯᓪᓗ ᒪᙯᕝᕕᐅᓱᑎᒃ ᐃᓄᓐᓄᓗ ᐊᓪᓚᓄᓪᓗ ᐅᓗᑦᔭᐅᓛᓕᕆᐊᖏᑦ ᑕᓯᓕᐊᕆᔭᐅᔪᖃᓕᕐᐸᑦ ᑰᖏᓪᓗ ᓴᖑᑎᑎᕐᑕᐅᓕᕐᐸᑕ. ᓴᓇᒋᐊᓯᑐᐃᓐᓇᓕᓚᐅᔪᕗᑦ ᑭᓯᐊᓂᐅᒐᓗᐊᖅ ᑕᒪᒃᑯᐊ ᐱᔪᓐᓇᐅᑎᒋᔭᐅᔪᑦ ᐃᓄᓐᓄᓗ ᐊᓪᓚᓄᓪᓗ ᓄᓇᓯᒪᕕᖃᕐᑐᓄᑦ ᔦᒥᔅᐯᒥᓗ ᑯᐯᒃ ᑕᕐᕋᖓᓂᓗ ᑲᖐᒋᔭᐅᑎᓐᓇᒋᑦ.
ᐃᓅᓱᑦᑑᖏᓐᓇᓱᓂ ᓵᓕ ᒍᐊᑦ ᑲᑎᕐᓱᐃᓕᓚᐅᕐᓯᒪᕗᖅ ᐃᓄᓐᓂᒃ ᓄᐃᑦᓯᖃᑕᐅᓯᑦᓱᓂ ᑯᐯᒃ ᑕᕐᕋᖓᓂ ᐃᓄᐃᑦ ᑲᑐᑦᔨᖃᑎᒌᓐᓂᖓᓂᒃ (ᑲᑐᑦᔨᖃᑎᒌᓐᓂᖓᑦ). ᑲᑐᑦᔨᖃᑎᖃᓯᑦᓱᑎᒃ ᐊᓪᓓᑦ ᑲᑐᑦᔨᖃᑎᒌᓐᓂᖓᓂᒃ ᑯᐯᒃᒥ, ᑖᒃᑯᐊ 1972-ᒥ ᑯᐯᒃᑯᑦ ᐃᕐᖃᑐᐃᔨᕐᔪᐊᖏᑎᒍᑦ ᓄᕐᖃᑎᑦᓯᖁᔨᓕᓚᐅᔪᕗᑦ ᐱᓇᓱᐊᕐᑕᐅᒐᓱᐊᓕᕐᑐᒥᒃ. ᑖᒃᑯᐊ ᐊᖏᕐᑕᐅᓴᐅᑎᒋᓚᐅᔪᒐᓗᐊᕐᓱᑎᒃ ᑭᓯᐊᓂ ᓴᖑᑎᑕᐅᑦᓴᐅᑎᒋᓚᐅᕐᓯᒪᔪᑦ. ᑭᓯᐊᓂᓕ, ᐱᕙᓪᓕᐊᔪᐃᑦ ᓄᐃᖃᑦᑕᓕᓚᐅᕐᓯᒪᔪᑦ ᐃᕐᖃᑐᐃᔨᐅᑉ ᓯᓚᑖᒍᑦ ᐃᓂᓪᓚᑕᐅᓯᓚᐅᕐᓯᒪᔪᑦ ᓄᐃᑕᐅᔪᖃᕐᓱᓂ ᔦᒥᔅᐯᒥᓗ ᑯᐯᒃ ᑕᕐᕋᖓᓂᓗ ᐊᖏᖃᑎᒌᓐᓂᖓᓂᒃ.
ᔦᒥᔅᐯᑉ ᐊᖏᖃᑎᒌᓐᓂᖓᓄᑦ ᐊᑎᓕᐅᕐᓯᒪᔪᑦ ᐃᓚᖃᕐᓯᒪᔪᑦ ᑯᐯᒃᑯᑦ ᑲᕙᒪᖓᓂᒃ, ᔦᒥᔅᐯᑉ ᐃᑯᒪᓕᕆᔨᖏᑦᑕ ᑎᒥᖁᑎᖓᓂᒃ, ᔦᒥᔅᐯᒥ ᐱᕙᓪᓕᐊᑎᑦᓯᒐᓱᐊᕐᑏᑦ ᑎᒥᖁᑎᖓᓂᒃ, ᑯᐯᒃᑯᑦ ᐃᑯᒪᓕᕆᔨᖏᓐᓂᒃ, ᐊᓪᓓᑦ ᑲᑎᒪᔨᕐᔪᐊᖏᓐᓂᒃ (ᑯᐯᒃᒥ), ᑯᐯᒃ ᑕᕐᕋᖓᓂ ᐃᓄᐃᑦ ᑲᑐᑦᔨᖃᑎᒌᓐᓂᖓᓂᒃ, ᐊᒻᒪᓗ ᑲᓇᑕᐅᑉ ᑲᕙᒪᖓᓂᒃ.
ᔦᒥᔅᐯᑉ ᐊᖏᖃᑎᒌᓐᓂᖓᑎᒍᑦ ᑮᓇᐅᔭᖃᕐᑎᓯᒍᑎᐅᓚᐅᔪᕗᑦ $225 ᒥᓕᐊᓐᑖᓚᓂᒃ ᐊᑭᓖᒍᑎᓂᒃ ᔦᒥᔅᐯᑉ ᐊᓪᓚᖏᓐᓂᒃ ᐊᒻᒪᓗ ᑯᐯᒃ ᑕᕐᕋᖓᑕ ᐃᓄᖏᓐᓂᒃ, ᐊᑭᓕᕐᑕᐅᒋᐊᖃᓚᐅᔪᓂᒃ ᑲᓇᑕᒧᓪᓗ ᑯᐯᒃᑯᓄᓪᓗ. ᐊᑭᓖᒍᑎᓄᑦ ᑮᓇᐅᔦᑦ ᑐᓂᔭᐅᓚᐅᕐᓯᒪᔪᑦ ᐊᓪᓓᑦ ᑲᑎᒪᔨᕐᔪᐊᖏᓐᓄᑦ ᐊᒻᒪᓗ ᐃᓄᓐᓅᓕᖓᔪᑦ ᒪᑭᕝᕕᑯᓄᕐᑕᐅᑎᓪᓗᒋᑦ. ᐃᓄᐃᑦ ᐱᓚᐅᕐᓯᒪᕗᑦ $90 ᒥᓕᐊᓐᑖᓚᓂᒃ.
ᐃᓚᒋᔭᐅᑎᓪᓗᒍ ᐃᓂᓪᓓᒍᑎᐅᑦᓱᓂ ᓄᓇᓕᑐᙯᑦ ᓄᓇᑖᕋᓱᐊᕈᑎᖏᓐᓄᑦ ᑮᓇᐅᔭᑎᒍᓪᓗ ᐊᑭᓖᒍᑎᖃᕐᑎᓗᒍ, ᐊᖏᖃᑎᒌᒍᑏᑦ ᓇᓗᓀᕐᓯᒍᑎᐅᓚᐅᔪᕗᑦ ᓄᓇᖃᕐᖄᓯᒪᔪᐃᑦ ᐱᔪᓐᓇᐅᑎᖏᓐᓂᒃ ᓄᐃᑦᓯᒍᑎᐅᑦᓱᑎᓪᓗ ᐊᐅᓚᑦᓯᒪᕆᒍᑎᑦᓴᓂᒃ ᓯᕗᓂᑦᓴᒥ ᖃᓄᐃᓕᐅᖃᑎᒋᒍᑎᑦᓴᖏᓐᓂᒃ ᓄᓇᖃᕐᖄᓯᒪᔪᐃᑦ ᐃᓄᖁᑎᖏᓪᓗ ᓄᓇᖃᕐᖄᓯᒪᖕᖏᑐᑦᓴᔦᓪᓗ ᑕᒫᓂ ᓄᓇᒥ ᐊᒻᒪᓗ ᐊᑯᓐᓂᖏᓐᓂᒃ ᓄᓇᓖᓪᓗ, ᓄᓇᓕᓕᒫᓪᓗ ᑯᐯᒃᑯᓗ ᑲᕙᒪᑐᖃᒃᑯᓗ ᑲᕙᒪᖏᑦᑕ. ᓄᐊᑦᓯᒍᓐᓇᓂᕐᒧᑦ ᐱᔪᓐᓇᐅᑎᖃᕐᑎᑕᐅᔪᖃᓚᐅᔪᕗᖅ, ᓄᓀᓪᓗ ᐊᕕᑦᑐᓯᒪᓂᖃᕐᑎᑕᐅᓯᑦᓱᑎᒃ ᐱᕕᑦᓴᓂᒃ ᑲᒪᒍᑎᑦᓴᓄᑦ ᐊᐅᓚᑦᓯᒪᕆᐅᑎᓂᓪᓗ ᓄᐃᑕᐅᔪᖃᕐᓱᓂ. ᐃᓕᓐᓂᐊᕕᓐᓂᒃ ᓄᐃᑕᐅᔪᖃᓚᐅᔪᖏᕗᖅ, ᐊᓐᓂᐊᓂᓕᕆᓂᒃᑯᓗ ᐱᒍᑦᔨᒍᑏᑦ ᑐᖕᖓᕕᓕᐅᕐᑕᐅᒋᐊᕐᓱᑎᒃ ᓄᓇᓕᓕᒫᓄᓪᓗ ᑲᕙᒪᒋᔭᐅᓂᐊᕐᑐᑦ ᓄᐃᑕᐅᑦᓱᑎᒃ.
ᑕᒪᓐᓇ ᑐᖕᖓᕕᓕᐊᖑᓯᒪᔪᖅ ᐱᒍᑎᐅᓯᒪᓕᕐᑐᖅ ᐊᓯᖏᓐᓂᒃ ᐱᒻᒪᕆᐅᓂᖃᕐᒥᔪᓂᒃ ᐊᖏᖃᑎᒌᒍᑎᓂᒃ ᐃᓚᖃᕐᑐᓂᒃ ᐅᑯᓂᖓ ᓴᓇᕐᕈᑎᒃ ᐱᓇᓱᐊᖃᑎᒋᓐᓂᑯᑦ ᐊᖏᖃᑎᒌᒍᑎᖏᑦ ᐊᒻᒪᓗ Peasce of the Brave (the Paix de Braves), ᑕᒪᖏᒃ ᒪᑭᑕᒐᓱᐊᕐᓂᓕᕆᓂᕐᒥᒃ ᐱᕙᓪᓕᐊᑎᑦᓯᒐᓱᐊᕈᑎᐅᑎᓪᓗᒋᒃ ᐊᖏᖃᑎᒌᒍᑕᐅᑦᓱᑎᒃ ᑕᒪᒃᑯᓄᖓ ᐃᓄᓐᓄᓗ ᐊᓪᓚᓄᓪᓗ ᐱᓇᓱᐊᖃᑎᒋᑦᑐᓄᑦ ᑐᑭᑖᕆᒍᑎᐅᒍᓐᓇᓂᐊᕐᑐᓂᒃ ᐱᕙᓪᓕᖁᑎᖏᓐᓂᓗ ᐊᕕᖃᑎᒋᒍᑕᐅᓂᐊᕐᑐᓂᒃ.
40-ᓂᒃ ᐊᕐᕌᒍᕐᑐᓯᒪᓕᕐᓂᒥᓄᑦ ᓇᓪᓕᐅᓂᕐᓯᐅᒍᑎᖃᕐᓗᓂ ᔦᒥᔅᐯᑉ ᐊᖏᖃᑎᒌᓐᓂᖓᓂᒃ ᒪᑭᕝᕕᑯᑦ ᑕᑯᓐᓇᕋᑦᓴᓕᐅᕐᑕᐅᑎᑦᓯᓚᐅᔪᑦ ᓄᐃᑕᑎᑦᓯᔪᓂᒃ ᐅᓄᕐᓂᓴᕐᓂᒃ ᐊᑎᓕᐅᕆᓯᒪᔪᓂᒃ ᑌᔭᐅᒍᓯᓕᓐᓂᒃ “ᓇᐸᒍᓐᓇᖁᓪᓗᓯ: ᓂᑯᕐᕋᕈᓐᓇᓂᐊᕋᑦᓯ”. ᑖᒃᑯᐊ ᑕᑯᓐᓇᕋᑦᓴᓕᐊᖑᓯᒪᔪᓂᒃ ᐅᓂᒃᑳᑐᓕᒃ ᐊᖏᖃᑎᒌᒐᓱᐊᕐᓂᖃᕐᑎᓗᒋᑦ ᐱᐅᓯᕆᔭᐅᔪᕕᓂᕐᓂᒃ, ᐊᒻᒪᓗ ᑕᑯᓐᓇᕋᑦᓴᓯᐊᖑᑦᓱᑎᒃ ᓄᓇᕕᐅᑉ ᐅᕕᒃᑲᖏᓐᓄᑦ ᑐᑭᓯᓂᐊᕐᒪᑕ ᑕᒪᒃᑯᐊ ᓯᕗᓕᕐᓯᔩᑦ ᐅᑯᐊ ᓵᓕ ᒍᐊᑦ, ᔦᐱᑎ ᓄᖕᖓᖅ ᐊᒻᒪᓗ ᐃᓅᒍᓐᓀᓯᒪᔪᖅ ᒫᒃ ᐊ. ᑯᐊᑕ, ᐃᓚᖃᕐᓱᑎᒃ ᐃᓄᐃᑦ ᐊᖏᖃᑎᒌᒐᓱᐊᕐᑎᒋᓯᒪᔭᖏᓐᓂᒃ, ᐊᒻᒪᓗ ᓄᓇᕕᐅᑉ ᓄᓇᖁᑎᓕᒫᖓᓂᒥᐅᑦ ᖃᓄᐃᑦᑐᑰᕐᓂᒪᖔᑕ ᑌᑦᓱᒪᓂᐅᑎᓪᓗᒍ.