ᑕᕐᖁᑎ ᐆᒻᒪᖁᑎᓕᕆᔩᑦ

ᖃᓄᐃᑦᑑᓂᖓ

ᑕᕐᖁᑎ ᐆᒻᒪᖁᑎᓕᕆᔩᑦ ᐊᑑᑎᓚᐅᕐᓯᒪᖕᖏᓯᐊᕐᑑᑎᓪᓗᒍ ᐊᑑᑎᔭᐅᒋᐊᓚᐅᔪᖅ ᒪᕐᕉᓄᑦ ᒪᑭᑉᐸᓕᐊᒐᓱᐊᕐᓂᒥᒃ ᐱᓇᓱᐊᕐᑕᖃᓪᓚᕆᓲᓐᓄᒃ ᓄᓇᕕᒻᒥ – ᐃᓚᒌᓴᒃᑯᑦ ᐊᒻᒪᓗ ᒪᑭᕝᕕᒃ. 100%-ᒥᒃ ᓇᒻᒥᓂᕆᔭᐅᓂᐊᕐᑎᓗᒍ ᐃᓄᓐᓄᑦ.

ᐃᓄᓕᒫᓄᑦ ᑐᓴᕐᑕᐅᑎᑕᐅᒋᐊᖕᖓᓚᐅᔪᖅ ᕕᕗᐊᕆ 21, 2017-ᖑᑎᓪᓗᒍ ᐃᕗᔨᕕᒻᒥ, ᓄᓇᕕᒻᒥ.

ᑕᕐᖁᑎᐅᑉ ᑐᕌᒐᕆᓂᐊᕐᑕᖏᑦ ᒪᑯᐊ:

• ᐃᓄᐃᑦ ᐊᐅᓚᑦᓯᒍᓐᓇᕕᖃᕐᑎᓗᒋᑦ ᐊᑯᓃᕐᑐᒥᒃ ᐆᒻᒪᖁᑎᓕᕆᓂᕐᒥᒃ ᓄᓇᕕᒻᒥ ᐱᓇᓱᐊᕐᑕᐅᖃᑦᑕᓂᐊᕐᑐᓗ ᐊᕙᑎᒥᒃ ᓱᒃᑯᐃᒍᓇᐅᑎᑦᑌᓕᓗᒋᑦ ᐊᑐᓂᑦ ᓄᓇᓖᑦ ᑭᖕᖑᒪᒋᔭᖏᓐᓂᒃ ᐱᑦᔪᔨᒍᑎᐅᑦᓯᐊᓗᑎᒃ.

• ᐃᓄᐃᑦ ᐱᓇᓱᒐᑦᓴᑖᕐᓂᐊᑎᓪᓗᒋᑦ ᒪᑭᑉᐸᓕᐊᒐᓱᐊᕐᓂᓗ ᓄᓇᕕᒻᒥ ᑫᓪᓗᐊᕈᑎᐅᓗᓂ ᓄᓇᕕᒻᒥ ᑮᓇᐅᔭᓕᐅᕋᓱᐊᕈᑎᐅᔪᑦ ᐊᐅᓪᓛᖃᕐᑎᑕᐅᑦᑌᓕᑦᓯᐊᓗᑎᒃ.

• ᓄᓇᒥᒃ ᑎᒍᒥᐊᕐᑏᑦ ᑯᐊᐯᓪᓗ ᓄᓇᓕᒻᒥ ᐱᓇᓱᐊᖃᑎᐅᑦᓯᐊᖃᑦᑕᓛᕐᑎᓗᒋᑦ ᑖᒃᑯᐊ ᐱᓇᓱᐊᕐᑕᐅᓂᖏᓐᓂ.

• ᖃᐅᔨᒪᓂᕐᑖᓯᐊᕐᓗᑎᒃ ᑐᖕᖓᕕᖃᑦᓯᐊᑐᓂᒃ ᐃᓄᐃᓪᓗ ᖃᐅᔨᒪᔪᒻᒪᕆᖕᖑᖃᑎᐅᓗᑎᒃ ᐆᒻᒪᖁᑎᓕᕆᓂᕐᒥ ᐱᑦᓴᖑᕆᐊᓪᓚᒍᓐᓇᑐᓂᒃ.

ᑕᕐᖁᑎ ᐆᒻᒪᖁᑎᐅᑦᓴᐅᓗᑎᒃ ᐱᑦᓴᖑᕆᐊᓪᓚᒍᓐᓇᑐᓂᒃ ᐱᓇᓱᐊᕐᑕᖃᓛᕐᑐᖅ ᐃᒣᑦᑐᓂᒃ:

• ᓄᓇᓕᒻᒥ ᐆᒻᒪᖁᑎᓕᕆᓂᖅ ᓄᓇᓂ ᐊᕕᑦᑐᓯᒪᔪ ᐊᑕᐅᓯᕐᒥ ᒪᕐᕉᓂᓗ, ᐊᒻᒪᓗ ᐊᓯᖏᓐᓂᒃ ᐱᓇᓱᐊᕐᑕᐅᔪᓂᒃ ᐆᒻᒪᖁᑎᑦᓴᓕᕆᓂᕐᒨᓕᖓᔪᓂᒃ ᓄᓇᓕᒻᒧᑦ. ᑖᒃᑯᐊ ᐱᓇᓱᐊᖃᑎᒌᒍᑎᐅᖃᑦᑕᓛᕐᑐᑦ ᓄᓇᓕᒻᒧᑦ ᓄᓇᒥᒃ ᑎᒍᒥᐊᕐᑏᑦ ᑯᐊᐯᓪᓗ ᐱᓇᓱᐊᖃᐅᑎᐅᕕᒋᒍᓐᓇᖃᑦᑕᓛᕐᑕᖏᑦ.

• ᓄᓇᕕᒻᒥ ᐅᔭᕋᓐᓂᐊᑐᓂ ᐆᑦᑐᕋᐅᑎᒋᓗᒍ ᐅᒻᒪᖁᑎᒋᓂᐊᕐᑕᖏᓐᓂᒃ ᐱᒍᑦᔨᒍᑎᖃᕐᓗᑎᒃ.

• ᐱᓇᓱᐊᖃᑎᑦᓴᓯᐅᖃᑦᑕᓗᑎᒃ ᖃᐅᔨᒪᓪᓚᕆᑦᑐᓂᒃ ᐆᒻᒪᖁᑎᓕᕆᓂᕐᒥᒃ ᐱᓪᓗᑯᒋᐊᓕᑦᑕᖏᓐᓂᓗ.

ᑕᕐᖁᑎ ᑲᑎᖕᖓᔨᖏᑦ ᓯᑕᒪᐅᔪᕐᑑᓛᕐᑐᑦ. ᒪᑭᕝᕕᒃ ᐃᓚᒌᓴᕐᓗ ᐊᑐᓂᑦ ᐱᖓᓱᓂᒃ ᐊᑎᕐᓂᒃ ᑐᓂᔨᖃᑦᑕᓛᕐᑑᒃ (ᑎᒃᑯᐊᑕᐅᔪᓂᒃ). ᒪᕐᕈᒋᐊᓪᓛᓗ ᑲᑎᖕᖓᔩᒃ (ᓯᓚᑖᓂᑦ ᐱᓯᒪᓗᑎᒃ) ᒪᑭᕝᕕᒧᑦ ᐃᓚᒌᓴᕐᒧᓗ ᓇᓪᓕᑳᔭᐅᖃᑦᑕᓛᕐᑑᒃ ᓯᓚᑖᓂᑦ ᐱᓯᒪᔪᓂᑦ ᐱᓇᓱᐊᕐᕕᐅᔪᓂᑦ. ᑲᑎᖕᖓᔨᖏᑦ ᓯᕗᓪᓕᐹᒥ ᑕᕐᖁᑏᑦ ᑲᑎᖕᖓᓂᒻᒪᕆᖓᓂ ᓂᕈᐊᕐᑕᐅᒐᔭᕐᑐᑦ ᑖᓐᓇ ᑎᒥᖕᖑᑎᑕᐅᓯᒪᓕᕐᑎᓗᒍ.

ᒫᓐᓇᐅᑎᓪᓗᒍ 100% ᐃᑯᒪᓕᐅᕈᑏᑦ ᓄᓇᕕᒻᒥ ᐅᕐᓱᐊᓗᑦᑐᑐᑦ. ᑯᐯᒻᒥ 2030 ᐅᒻᒪᖁᑎᓕᕆᓂᕐᒧᑦ ᒪᓕᒐᖅ 40%-ᒧᑦ ᐃᑭᓪᓕᒋᐊᕆᒍᒪᓯᒪᔪᖅ ᐅᕐᓱᐊᓗᑦᑐᑐᓂᒃ ᐃᑯᒪᐅᑎᓕᐅᕈᑎᐅᓲᓂ 2030-ᒥ.

ᑕᕐᖁᑎ ᐱᑦᓴᖑᕆᐊᓪᓚᒍᓐᓇᑑᓗᑎᒃ ᐅᒻᒪᖁᑎᓕᕆᓂᕐᒥᒃ ᐱᓇᓱᐊᕈᑎᐅᒐᔭᕐᑐᓂᒃ ᐱᒐᓱᐊᕐᓂᐊᑐᖅ ᓄᓇᕕᒻᒥᐅᑦ ᐃᑲᔪᕐᓯᖃᑎᐅᒍᑎᒋᒍᓐᓇᓂᐊᕐᑕᖓᓂᒃ ᑲᓇᑕᒥ ᐳᔪᕐᓗᒥᒃ ᓄᖑᑎᑦᓯᒐᓱᐊᕐᓂᒥᒃ ᑲᓇᑕᓕᒫᒥ ᓴᓗᒪᑦᓯᐊᑐᒥᒃ ᐱᕈᕐᕕᖃᕐᓂᒧᑦ ᓯᓚᐅᓪᓗ ᐊᓯᑦᔨᐸᓪᓕᐊᓂᖓᓄᑦ ᐱᓇᐊᓱᕐᑐᓄᑦ ᐅᖃᐅᓯᐅᓚᐅᔪᓂᒃ ᑏᓯᒻᐱᕆ 9, 2016-ᖑᑎᓪᓗᒍ.