ᑐᑭᖓ: ᓄᓇᖓ ᐊᐅᐸᓗᑦᑕᐅᓂᑯᖓᓄᑦ
ᐃᓄᑦᑕᖏᑦ: 174
ᐊᐅᐸᓗᒃ ᓄᓇᕕᐅᑉ ᓄᓇᓕᖏᓐᓂᑦ ᒥᑭᓂᕐᐸᐅᓱᓂ ᑲᖏᕐᓲᓂᖓᑕ ᓯᕿᓂᖓᓂ ᐃᓂᖃᕐᑐᖅ ᐅᖓᕙᐅᑉ ᐊᑐᐊᕐᓂᖓᑕ ᓯᑦᔭᖓᓂᑦᓱᓂ. ᑖᓐᓇ 150-ᓂᒃ ᐅᖓᓯᓐᓂᖃᕐᑐᖅ ᑰᑦᔪᐊᑉ ᑕᕐᕋᖓᓂᑦ ᐊᒻᒪᓗ 80-ᓂᒃ ᑭᓚᒦᑕᓂᒃ ᐅᖓᓯᓐᓂᖃᕐᓱᓂ ᑲᖏᕐᓲᑉ ᓯᕿᓂᖓᓂᑦ. ᑖᓐᓇ ᓄᓇᓕᐅᔪᖅ ᓴᓇᔭᐅᓯᒪᔪᖅ ᑕᕆᐅᕐᒥᒃ ᖃᓂᑕᖃᓂᕐᐸᐅᓱᓂ 45 ᒦᑕᓂᒃ ᓱᖅᑳᑎᕈᑎᓂᒃ ᐳᕐᑐᓂᓕᒻᒦᓱᓂ ᑕᕆᐅᑉ ᓇᓛᓂᑦ. ᑕᒪᑦᓱᒪᐅᑉ ᓄᓇᖓ ᒪᓂᕂᓐᓇᒐᓚᐅᕗᖅ ᐱᐅᔫᓂᖃᕐᓱᓂᓗ ᐱᓱᕋᔭᕐᕕᐅᑐᐊᕈᓂ. ᑖᓐᓇ ᓄᓇᓕᐅᔪᖅ ᑕᑯᓐᓇᐅᔮᕐᕕᐅᒍᓐᓇᑐᖅ ᐅᖓᕙᐅᑉ ᐃᒪᖓᓂᒃ. ᐊᐅᐸᓗᒻᒥᒃ ᐊᑦᓯᑕᐅᒪᓚᕿᔪᖅ ᓄᓇᖓ ᐊᐅᐸᓗᑦᑕᐅᖃᑦᑕᓲᖑᒻᒪᑦ. ᑕᒪᑦᓱᒪᐅᑉ ᓄᓇᖓ ᑕᕐᕋᖓᓃᑦᑐᖅ ᑕᒪᑦᓱᒧᖓ ᓛᐸᑐᐊᕐᒥᑦ ᐱᔪᕐᒥᑦ ᑭᑭᐊᑦᓴᔭᕐᑕᓕᒻᒥᒃ ᓂᑭᓕᓴ-ᒥᒃ. ᐅᔭᕋᓐᓂᐊᑏᑦ ᐱᓇᓱᐊᕐᓯᒪᒻᒥᔪᑦ ᑕᒫᓂ ᓄᓇᖓᓂ 1950 ᐊᕐᕌᒍᖏᓐᓃᑎᓪᓗᒋᑦ.
ᐊᑦᔨᒋᔭᐅᖏᑑᑦᓱᓂ ᐅᓄᕐᓂᓴᓄᑦ ᓄᓇᕕᐅᑉ ᓄᓇᓕᖏᓐᓄᑦ, ᐊᐅᐸᑉ ᓄᓇᓕᖓ ᐱᕙᓪᓕᐊᑎᑕᐅᓯᒪᑦᔭᖏᑦᑐᖅ ᓂᐅᕕᕐᓂᐊᕕᐅᖃᑦᑕᓯᒪᔪᕐᓄᑦ ᑐᑦᓯᐊᕕᓕᕆᔨᓄᓪᓃᑦ. ᐱᑕᖃᑦᓯᐊᓂᑯᖓᓄᑦ ᑐᑦᑐᓂᓪᓗ, ᐃᖃᓗᓐᓂᓗ ᑕᕆᐅᑉ ᐆᒪᔪᖁᑎᖏᓐᓂᓗ, ᑖᓐᓇ ᐆᒪᔪᕐᓯᐅᕕᑐᖃᐅᓯᒪᔪᖅ. 1975-ᒥ ᑲᖏᕐᓱᒥᐅᑦ ᐃᓄᖏᑦ ᐊᓯᖏᓐᓂᓗ ᓄᓇᓕᓐᓂᑦ ᐱᓯᒪᔪᑦ ᓅᓚᐅᕐᓯᒪᔪᑦ ᑕᒪᐅᖓ ᓄᓇᒧᑦ ᓯᕗᓪᓕᕆᓯᒪᔭᖏᑦ ᒪᙯᑦᑎᐅᓯᒪᔪᑦ ᓯᕗᓪᓕᕕᓂᖏᑦ ᑲᑎᒋᐊᕐᑐᕕᒋᖃᑦᑕᑕᕕᓂᕆᒻᒪᐅᒃ ᐊᐅᓪᓛᓯᒪᕕᒋᖃᑦᑕᓱᒍᓗ. ᓯᕗᓪᓕᐹᓪᓗᑐᑦᓯᐊᒥ ᑲᓇᑕᐅᑉ ᐅᑭᐅᕐᑕᑐᖓᓂ, ᐃᓄᐃᑦ ᓇᒻᒥᓂᖅ ᐸᕐᓀᓂᑦᓱᑎᒃ ᓴᖅᑭᑎᑦᓯᓯᒪᔪᑦ ᓄᓇᓕᑦᓴᖓᑕ ᐃᓂᑦᓴᖓᓂᒃ. ᐊᐅᐸᓗᒃ ᓄᓇᓕᙳᑎᑕᐅᓯᒪᔪᖅ ᑕᕐᕋᒥᐅᑦ ᓄᓇᓕᖏᓐᓄᑦ ᐃᓚᐅᖃᑕᐅᓕᕐᓱᓂ 1981-ᖑᑎᓪᓗᒍ ᐊᒻᒪᓗ ᐅᒃᑯᐃᓯᓯᒪᑦᓱᓂ ᑯᐊᐸᖓᑕ ᓂᐅᕕᕐᓂᐊᕕᖓᓂᒃ 1980 ᐊᕐᕌᒍᖏᑦ ᐱᒋᐊᖅᑲᒥᐅᑎᓪᓗᒋᑦ. ᐊᐅᐸᓗᒻᒥᐅᑦ ᐃᓅᓯᖃᓗᐊᖑᐊᓲᖑᖏᓐᓇᑐᑦ ᐱᐅᓯᑐᖃᕐᒥᓂᒃ ᓱᓇᓱᐊᕈᑎᖃᕐᓂᓴᐅᑦᓱᑎᒃ.
ᑕᑯᒥᓇᕐᑐᖁᑎᖏᑦ
- ᑲᓇᑕᐅᑉ ᐅᑭᐅᕐᑕᑐᖓᓂ ᓯᕗᓪᓕᐸᐅᑦᓱᓂ ᓄᓇᓕᓕᐊᖑᓯᒪᔪᖅ ᐃᓄᓐᓄᑦ ᑭᓯᐊᓂ ᓴᖅᑭᑎᑕᐅᑦᓱᓂ.
- ᐊᐅᐸᓗᒃ ᐃᓂᖃᕐᑐᖅ ᐅᑦᑑᐱᕆᒥᑦ ᑏᓯᒻᐱᕆᒧᑦ ᐃᖏᕐᕋᔪᖃᓕᑐᐊᕐᒪᑦ ᑕᓯᐅᔭᐅᑉ ᑐᑦᑐᖁᑎᖏᓐᓄᑦ.
- ᐊᒥᓱᒻᒪᕇᑦ ᑐᑦᑐᐃᑦ ᑕᒫᓂ ᐅᑭᐅᕐᑐᓲᖑᒻᒥᔪᑦ.
- ᑕᕆᐅᑉ ᐆᒪᔪᖁᑎᖏᓐᓂᒃ ᑕᑯᓐᓇᐅᔮᕐᕕᐅᒍᓐᓇᑐᖅ
- ᓄᓇᓕᐊᕉᓂᕐᒥᒍᑦ, ᐃᓄᐃᑦ ᐊᐱᕆᔭᐅᑐᐃᓐᓇᕈᓐᓇᓂᕐᓴᐅᔪᑦ ᒪᓕᒍᒪᒐᔭᕐᑐᓂᒃ ᑕᑯᓂᐊᕐᑐᖃᓕᕐᐸᑦ ᓄᓇᖓᓂᒃ.