ᑐᑭᖓ: ᑎᐸᖃᕐᓱᓂ ᐳᕕᕐᓂᐊᓂᕐᒥᒃ
ᐃᓄᑦᑕᖏᑦ: 1457
ᐃᓂᖃᕐᓱᓂ 4 ᑭᓚᒦᑕᓂᒃ ᐳᕕᕐᓂᑑᑉ ᑲᖏᕐᓱᖓᓂᑦ, ᑰᓪᓚᕆᖓᑕ ᓯᑦᔭᖓᓂ ᑕᕐᕋᖓᓃᑦᓱᓂ, ᑖᓐᓇ ᐃᓄᐃᑦ ᓄᓇᓕᖓ ᐊᕙᓗᐊᔭᐅᒪᔪᖅ ᒪᓂᕋᕐᑐᒧᑦ. ᑕᒫᓂ ᑭᓯᑦᓴᐅᖏᑦᑐᓂᒃ ᑕᓯᕐᑕᖃᕐᑐᖅ ᑰᖃᕐᓱᓂᓗ, ᐆᒪᔪᖃᑦᓯᐊᑐᒻᒪᕆᐅᑦᓱᓂᓗ ᐱᐅᔪᒻᒪᕆᓐᓂᓗ ᐅᑭᐅᕐᑕᑑᑉ ᐱᕈᕐᑐᔭᖏᓐᓂᒃ ᐱᕈᕐᓯᐊᖏᓐᓂᓗ. ᐳᕕᕐᓂᑐᒥᐅᑦ ᑕᑯᓐᓈᓂᖃᓲᖑᒻᒥᔪᖅ ᐊᕐᕌᒍᑕᒫᑦ ᑕᓯᐅᔭᐅᑉ ᑐᑦᑐᖏᑦ ᐃᖏᕐᕋᓂᖃᓕᑐᐊᕐᒪᑕ.
ᐊᒥᓱᒐᓚᓐᓂᒃ ᐅᓪᓗᓂᒃ ᐅᑭᐊᑦᓴᑕᒫᑦ, ᑕᐅᓴᓐᑎᒦᑦᑐᐃᑦ ᑐᑦᑐᐃᑦ, ᐃᑎᒐᖏᑦ ᑐᓪᓕᕋᕐᓱᑎᒃ ᑕᖏᐅᔭᒥᒃ ᖁᐊᖑᓯᒪᔪᒥᒃ, ᑎᑭᕝᕕᖃᓲᑦ ᐳᕕᕐᓂᑑᑉ ᑰᖓᓄᑦ ᐃᑳᕐᓱᑎᒃ ᐳᐃᑦᔪᓱᑎᒃ.
ᒪᕐᕉᓂᒃ ᑐᑭᓯᒪᓇᕐᑐᖃᕐᑐᖅ ᑖᑦᓱᒧᖓ ᓄᓇᓕᒻᒧᑦ ᐊᑦᓰᒍᑎᐅᓯᒪᔪᓂᒃ. ᓯᕗᓪᓕᐹᒥᒃ ᐅᓂᒃᑲᐅᓯᖃᕐᑐᖅ ᑌᑦᓱᒪᓂᐊᓗᒃ ᐊᒥᓱᒻᒪᕇᑦ ᐊᕐᕌᒍᐃᑦ ᓯᕗᓂᐊᒍᑦ ᑐᑦᑐᐃᑦ ᐃᖏᕐᕋᓱᑎᒃ ᑰᒃᑯᑦ ᐃᑳᕋᓱᐊᓚᐅᕐᓱᑎᒃ ᓴᕐᕙᐅᓚᐅᕐᑐᕕᓂᑦ ᐃᒫᕐᓱᑎᓪᓗ. ᑖᒃᑯᐊ ᑎᒥᕕᓂᖏᑦ, ᓯᑦᔭᑦᔨᔪᕕᓃᑦ ᐳᕕᕐᐸᓕᐊᓯᑦᓱᑎᓪᓗ ᐃᒍᓇᕐᓂᐊᓯᑦᓱᑎᒃ. ᐊᓯᐊᓂᒃ ᑐᑭᓯᒪᐅᑎᖃᕐᒥᔪᖅ ᐅᓂᒃᑲᐅᓯᖃᕐᑐᒥᒃ ᖃᓄᖅ ᑭᓇᓕᒫᒃᑯᑦ ᑕᒫᓂ ᓄᓇᖃᕐᑐᑦ ᐊᑕᐅᓯᐊᕋᓗᐊᕐᓱᑎᒃ ᐱᔭᐅᓚᐅᕐᑐᕕᓂᐅᒋᐊᖏᑦ ᐊᓐᓂᐊᒧᑦ.
ᑕᒪᑦᓱᒪᐅᑉ ᑌᒣᓐᓂᖓᓄᑦ ᑭᓇᒥᓪᓃᑦ ᐊᒥᐊᒃᑯᑐᖃᕐᓂᖏᑦᑐᖅ ᐃᓗᕕᕐᓯᔪᑦᓴᒥᒃ ᐃᓄᕕᓂᕐᓂᒃ. ᐃᓄᕕᓃᑦ ᓱᔪᕐᐸᓕᐊᓕᑐᐊᕐᒪᑕ ᐊᓂᕐᓂᖓᑦ ᑎᑉᐸᑐᕕᓂᐅᓗᒃ. ᑕᒪᓐᓇᓕᒫᖅ ᓄᓇᐅᔪᖅ ᑭᓯᐊᓂ, ᖃᐅᔨᒪᔭᐅᒍᓯᖃᕐᒥᔪᖅ ᐊᑎᑦᓯᐊᖑᓂᕐᓴᒥᒃ ᐃᒣᑦᑐᒥᒃ ᐊᒫᒪᑦᑎᓯᕕᒃ ᑌᒣᓕᖓᔪᒥᒃ ᑐᑭᖃᕇᕐᑐᒥᒃ. ᐅᓂᒃᑲᐅᓯᑐᖃᕐᑎᒍᑦ ᑕᒪᓐᓇ ᓄᓇᐅᔪᖅ ᐊᕐᓇᓄᑦ ᐊᒫᒪᑎᑦᓯᕕᐅᓚᐅᕐᑐᕕᓂᖅ ᐱᐊᕋᕐᒥᓂᒃ ᕿᐊᖁᔨᙱᓱᑎᒃ ᐅᓚᐱᑦᓯᖁᔨᙱᑯᐊᓗᑦᓱᑎᒃ ᑐᑦᑐᐃᑦ ᐃᖏᕐᕋᓂᖏᓐᓂᒃ.
1921-ᒥ ᖃᑦᓴᓐᐯ ᑲᒻᐸᓂᒃᑯᑦ ᓂᐅᕕᕐᓂᐊᕕᓕᐅᕐᑐᕕᓃᑦ ᐳᕕᕐᓂᑐᒥ. ᐃᓄᐃᑦ ᑎᑭᖃᑦᑕᑐᕕᓃᑦ ᑕᐅᕐᓰᑲᑦᑕᕆᐊᕐᑐᓱᑎᒃ ᒥᖅᑯᓕᓐᓂᒃ ᐊᕐᕌᒍᐃᑦ ᐱᒋᐊᖅᑲᒥᐅᑎᓪᓗᒋᑦ ᓇᔫᑎᕕᖃᕐᓱᑎᒃ ᐊᑦᔨᒌᖏᑐᓂᒃ ᐊᐅᓪᓛᓯᒪᕕᒻᒥᓂᒃ ᑕᒫᓂ ᓄᓇᒥ. 1951-ᒥ ᑲᒻᐸᓂᒃᑯᑦ ᐅᒃᑯᐃᓯᓕᕐᓂᒥᔪᑦ ᓱᓇᒐᓚᖃᕐᓂᓴᒥᒃ ᓂᐅᕕᕐᓂᐊᕕᒻᒥᒃ ᐅᒃᑯᐊᓯᑦᓱᑎᒃ ᕿᑭᕐᑕᔪᐊᒦᑦᑐᒥᒃ (ᐊᑯᓕᕕᐅᑉ ᓴᓂᐊᓃᑦᑐᒥᒃ) ᑲᖏᕐᓱᕈᐊᒦᑦᑐᒥᓪᓗ. ᐃᓄᐃᑦ ᑖᕙᓂ ᓄᓇᓯᒪᕕᖃᕐᑐᕕᓃᑦ ᓱᕈᑦᓱᑎᒃ ᓄᑦᑎᕆᐊᖃᓕᕐᑐᕕᓃᑦ ᐳᕕᕐᓂᑐᒧᑦ ᐊᕐᕌᒍᕐᓂ ᑭᖑᓂᖏᓐᓂ.
1956-ᒥ, ᑲᑕᓕᒃᑯᑦ ᑐᑦᓯᐊᕕᑦᑖᓯᓐᓂᒥᔪᑦ ᐳᕕᕐᓂᑐᒥ. ᒪᕐᕉᒃ ᐊᕐᕌᒍᐃᑦ ᐊᓂᒍᑐᐊᕐᒪᑕ ᐊᑖᑕᒃ ᐊᓐᑕᕆ ᓯᑌᓐᒪᓐ (ᐅᒥᑲᓪᓚᒃ) ᐃᓄᓐᓂᒃ ᓄᐃᑦᓯᑎᑦᓯᔪᕕᓂᐅᒻᒥᔪᖅ ᐳᕕᕐᓂᑐᒥᐅᑦ ᓴᓇᙳᐊᑎᖏᑦᑕ ᑲᑐᑦᔨᖃᑎᒌᓐᓂᖓᓂᒃ, ᑭᖑᓂᐊᒍᑦ ᐳᕕᕐᓂᑐᒥ ᑯᐊᐸᕆᔭᐅᓕᕐᓱᓂ. ᐅᓪᓗᒥ ᑕᑯᑦᓴᐅᓂᖃᕐᑎᓯᑦᓱᓂ ᓄᓇᓖᑦ ᐃᒻᒥᓂᕿᒍᓐᓇᕆᐊᖓᓂᒃ ᐃᓄᑑᑦᔨᒍᓐᓇᕆᐊᖓᓂᓪᓗ, ᑖᓐᓇ ᑯᐊᐸᐅᔪᖅ ᐊᐅᓚᑦᓯᐊᓂᕐᐸᐅᓂᖃᕐᑐᖅ ᐃᓚᒌᓴᒃᑯᑦ ᑯᐊᐸᖁᑎᖏᑦᑕ ᐊᑯᓐᓂᖏᓐᓂ ᑯᐯᒃ ᑕᕐᕋᖓᓂ.
2000 ᐊᕐᕌᒍᖏᑦ ᐱᒋᐊᓕᕐᑎᓗᒋᑦ, ᐳᕕᕐᓂᑐᖅ ᐃᖏᕐᕋᔪᓄᑦ ᐊᖅᑯᑎᒋᔭᐅᓲᖑᕗᖅ ᑕᓯᐅᔭᕐᔪᐊᒥᐅᓄᑦ. ᓄᓇᓖᑦ ᒥᕝᕕᖓᑦ ᐊᖅᑯᓵᕐᕕᒋᔭᐅᓲᖑᒻᒥᔪᖅ ᓄᓇᓕᓐᓄᑦ ᐅᐸᑦᑕᐅᓴᐅᑎᒋᒍᓐᓇᖏᑦᑐᓄᑦ. ᐳᕕᕐᓂᑐᕐᓗ ᑰᑦᔪᐊᓗ, ᓄᓇᕕᒻᒥᐅᓄᑦ ᐊᐅᓚᑦᓯᕕᐅᓲᖑᑦᓱᑎᒃ, ᑐᕂᓐᓇᑐᒥᒃ ᖃᖓᑦᑕᔫᒧᑦ ᑎᑭᑦᑕᑕᐅᓲᖑᒻᒥᔪᑦ ᖃᓪᓗᓈᓂᑦ ᐱᔪᕐᓂᒃ.
ᑕᑯᒥᓇᕐᑐᖁᑎᖏᑦ
- ᐳᕕᕐᓂᑐᒥ ᐱᙳᐊᓂᕐᔪᐊᖅ ᓇᓪᓕᐅᓂᕐᓯᐅᕈᑎᐅᑦᓱᓂ ᐱᐅᓯᑐᖃᕐᓂᒃ. ᐱᙳᐊᓂᕐᔪᐊᒥ ᐊᐳᑎᒥᒃ ᓴᓇᙳᐊᑐᐃᑦ ᑕᑯᒥᓇᕐᑐᒪᕆᐅᓲᑦ ᑕᒪᒃᑯᐊ ᐃᓄᐃᑦ ᓴᓇᓕᑐᐊᕐᒪᑕ ᓱᓇᑐᐃᓐᓇᖑᐊᓂᒃ ᐊᐳᑎᒥᒃ.
- ᑖᒧᓯ ᖁᒪᐅᑉ ᓄᐊᓯᒪᔭᖏᑦ: ᑌᑦᓱᒪᓂᑌᑦ ᓴᓇᕐᕈᑏᑦ, ᒪᙯᒍᑏᓪᓗ ᐃᖃᓗᓐᓂᐊᕈᑏᓪᓗ, ᐅᓪᓗᒥᓂᑌᓪᓗ ᐊᒻᒪᓗ ᐊᓐᓄᕌᑦ.
- ᑌᑦᓱᒪᓂᑌᑦ ᑐᓂᕐᑕᓕᕕᓃᑦ.