ᐅᖓᓗᒃ
ᐱᓇᓱᒍᑎᑦᓴᓕᐊᖑᒪᔪᑦ ᖃᓄᐃᑦᑑᓂᖏᑦ
ᑲᑉᐱᐊᓇᖕᖏᓂᕐᓴᓂᒃ ᓄᓇᓕᖃᕐᓂᒥᒃ ᐱᓇᓱᒍᑎᓕᐊᖑᒪᔪᑦ, ᐃᓚᐅᑎᑦᓯᓂᖃᕐᑐᑦ ᓇᓚᐅᑦᓯᔪᒥᒃ ᐊᑦᓯᕋᐅᑎᓕᐅᕐᑕᐅᒪᔪᑦ, ᐅᖓᓗᒃ, ᓄᐃᑕᐅᒋᐊᖕᖓᓯᒪᕗᑦ ᕕᕗᐊᕆ 2007-ᒥ ᓄᐃᑕᐅᓚᕿᓯᒪᑦᓱᑎᒃ ᓴᓇᕐᕈᑎᒃ ᐊᖏᖃᑎᒌᒍᑎᓄᑦ ᑐᓂᓯᒪᔭᖏᓐᓄᑦ ᑯᐯᒃ ᑲᕙᒪᖓᑕ ᒪᑭᕝᕕᒧᓪᓗ ᑲᑎᕕᒃ ᓄᓇᓕᓕᒫᑦ ᑲᕙᒪᖓᓄᓪᓗ.
ᐅᖓᓗᒃ ᐃᓄᒃᑎᑐᑦ ᐅᖃᐅᓯᐅᕗᖅ ᑐᑭᖃᕐᓱᓂ ᓲᕐᓗ ᐊᐳᒻᒥᒃ ᐃᒡᓗᓕᓚᖓᔪᑦ ᓴᕕᐅᔭᕐᑐᐊᖏᑕ ᓯᕗᓪᓕᐹᖏᓐᓂᒃ ᑐᖕᖓᕕᐅᓚᖓᔪᓂᒃ ᐃᒡᓗᓕᐊᖑᔪᒧᑦ, ᑖᒃᑯᐊᓗ ᐃᓄᑐᐃᓐᓇᓄᑦ-ᐊᐅᓚᑕᐅᑦᓱᑎᒃ ᐱᓂᕐᓗᓂᕐᒥ ᐱᔪᖃᕐᑎᓯᑦᑌᓕᓂᕐᒥᒃ ᐱᓇᓱᒍᑎᑦᓴᓕᐊᖑᒪᑦᓱᑎᒃ. ᐅᖓᓗᒃ ᐊᐅᓚᑕᐅᔪᖅ ᒪᑭᕝᕕᒧᓪᓗ ᑲᑎᕕᒃ ᓄᓇᓕᓕᒫᑦ ᑲᕙᒪᖓᓄᓪᓗ. ᑖᒃᑯᐊ ᐱᓇᓱᒍᑏᑦ ᐊᕐᕌᒍᑕᒫᑦ ᐊᕕᖃᑎᒌᑎᑦᓯᒍᑎᖃᕐᐸᑐᑦ ᑮᓇᐅᔭᓂᒃ ᐅᓄᕐᓂᓕᓐᓂᒃ $10-ᒥᓕᐋᓐᑖᓚᓂᒃ, ᓈᒻᒪᓈᕐᑎᓯᒪᑦᓯᐊᑐᓂᒃ, ᐃᓕᖓᑦᓱᑎᒃ ᐱᓂᕐᓗᓂᕐᒥᒃ ᐱᔪᖃᕐᑎᓯᑦᑌᓕᓂᕐᒥᒃ ᐱᓇᓱᒍᑎᐅᓚᖓᓕᕐᑐᓄᑦ ᓄᓇᕕᓕᒫᒥ ᐃᓚᖓᓂᓪᓗᐊᓛᑦ ᑯᐯᒃ ᓄᓇᓕᕐᓚᖓᑕ ᐃᒡᓗᒐᓴᖁᑎᖏᓐᓂ.
ᒪᑭᕝᕕᓗ ᑲᑎᕕᒃ ᓄᓇᓕᓕᒫᑦ ᑲᕙᒪᖓᓗ ᐊᖏᕐᑎᒋᔭᐅᔫᒃ ᑮᓇᐅᔭᖃᕐᑎᑕᐅᒍᒪᔪᓂᒃ. ᑖᒃᑯᐊ ᐱᓇᓱᒍᑎᓕᐊᖑᒪᔪᑦ ᐋᕐᕿᒋᐊᕐᑕᐅᓚᐅᔪᑦ ᓴᐳᑎᔭᐅᒪᑦᓱᑎᒃ ᓯᓚᕐᔪᐊᒥ ᐱᑦᔪᔨᕕᒻᒧᑦ ᐃᓕᖓᑦᓱᓂ ᐱᓂᕐᓗᓂᕐᒥᒃ ᐱᔪᖃᕐᑎᓯᑦᑌᓕᓂᕐᒥᒃ. ᑖᒃᑯᐊ ᐱᓇᓱᒍᑏᑦ ᐱᑕᖃᕐᓕᑐᑦ ᓄᑖᓂᒃ ᒪᓕᑦᑕᐅᒋᐊᓕᓐᓂᒃ ᓯᕗᓂᑦᓴᓕᐅᕈᑎᓕᓐᓄᑦ ᐊᒻᒪᓗ ᓄᑖᓂᒃ ᒪᓕᒐᕐᑖᕆᒍᑎᐅᒪᓕᕐᓱᑎᒃ ᑐᖕᖓᕕᐅᓪᓚᕆᒋᐊᓕᓐᓂᒃ ᑮᓇᐅᔭᖃᕐᑎᑕᐅᒍᑎᑦᓴᒥᓐᓂᒃ ᐱᒐᓱᒍᑎᓕᐅᕐᑐᑦ ᑐᖕᖓᕕᒋᓪᓚᕆᒋᐊᓕᖏᓐᓂᒃ ᑮᓇᐅᔭᖃᕐᑎᑕᐅᒍᑎᑖᕐᑎᑕᐅᓂᐊᕈᑎᒃ ᒪᓕᑦᓯᐊᓯᒪᓗᒋᑦ ᐱᓚᕿᒍᑎᒋᒍᓐᓇᓂᐊᕐᑕᒥᓐᓂᒃ.