ᓄᓇᕕᒻᒥ ᐃᓄᐃᑦ ᐃᓗᕐᖁᓯᖓ ᐃᓅᒍᓯᖏᓪᓗ ᑐᖕᖓᕕᖃᓪᓚᕆᕐᖁ ᓄᓇᒥᒃ. ᓄᓇᕕᒻᒥ ᓄᓇᓕᖏᑦ ᑎᒥᐅᔪᐃᓗ ᑕᑯᓐᓇᖃᑦᑕᖁᑦ ᐊᑑᑎᑦᓱᑎᓗ ᓯᓚᐅᑉ ᐊᓯᑦᔨᓂᖓᓄᑦ ᓱᕐᕋᑕᐅᒍᑎᓂᑦ ᓯᕗᓪᓕᐸᐅᑦᓱᑎᑦ ᓇᓗᓀᕐᓯᓯᐊᕈᓐᓇᓱᑎᓗ ᓱᓇᓂᑦ ᑭᖕᖒᒪᑦᓯᒪᖔᑕ ᑖᒃᑯᓄᖓ ᐊᓯᑦᔨᓂᕐᓄᓕᖓᔪᓂᑦ ᓴᐳᑦᒥᒍᑎᐅᓂᐊᕐᑐᓂᑦ ᐊᑦᑕᓀᑦᑐᒥᒋᐊᖃᕐᓂᖏᓐᓂᒃ ᖃᓄᐃᖕᖏᓯᐊᕆᐊᖃᕐᓂᖏᓐᓂᓗ ᓄᓇᕕᒻᒥᐅ. ᓱᑲᑦᑐᒥᒃ ᐊᓯᑦᔨᒪᕆᓐᓂᖓᓗ ᑐᑭᓕᒃ ᓈᓚᑦᑕᐅᒋᐊᖃᕐᓂᖏᑦ ᖃᓄᕐᑐᕈᑎᖃᕐᓗᑎᓗ ᓯᓚᐅᑉ ᐊᓯᑦᔨᓂᖓᓄᑦ ᓯᕗᓪᓕᐅᔭᐅᖁᔭᐅᔪᓂᑦ ᓄᓇᕕᒻᒥᐅᓄᑦ ᐅᐃᒪᓇᕐᓂᓴᐅᒋᐊᓪᓚᖁᖅ.
ᓄᓇᕕᐅᑉ ᓯᓚᖓᑕ ᐊᓯᑦᔨᓂᖓᓄᑦ ᐋᕐᕿᒋᐊᕈᑏᑦ ᖃᓄᐃᓗᕈᑎᑦᓴᓕᐊᖑᔪᑦ (ᖃᓄᐃᓗᕈᑎᑦᓴᓕᐊᖑᔪᑦ) ᓄᐃᑕᐅᒪᕗᑦ ᓄᓇᕕᒻᒥᐅᓄᑦ ᓄᓇᕕᒻᒥᓗ ᑎᒥᐅᔪᓄᑦ.
ᐱᓇᓱᒋᐊᖕᖓᓯᓐᓂᖁᑦ 2019ᒥ ᓄᓇᓕᓕᒫᓂ ᐱᓇᓱᖃᑎᒌᑦᑐᐃᑦ ᐱᕙᓪᓕᐊᑎᑦᓯᓯᑎᓪᓗᒋᑦ ᑐᑭᓯᒪᖃᑎᒌᒐᓱᓐᓂᒧᑦ ᓯᓚᐅᑉ ᐊᓯᑦᔨᓂᖓᑕ ᓱᕐᕋᑕᐅᒍᑎᖏᓐᓂᑦ ᓇᓗᓀᕐᓯᒐᓱᓯᑦᓱᑎᓗ ᐋᕐᕿᒋᐊᕈᑎᐅᑐᐃᓐᓇᕆᐊᓕᓐᓂᑦ ᖃᓄᐃᓗᕈᑎᑦᓴᓂᑦ. ᑖᓐᓇ ᑲᑎᒪᓂᐊᕈᓯᕕᓂᖅ ᐱᒋᐊᕐᕕᐅᓯᓐᓂᖁᖅ ᑕᒪᑦᓱᒧᖓ ᐱᓇᓱᑦᑕᐅᔪᒧᑦ ᐊᕐᖁᓯᐅᕈᑎᐅᑦᓱᓂ ᐱᕙᓪᓕᐊᑕᐅᓂᑦᓴᖓᓂᒃ ᖃᓄᐃᓗᕈᑎᑦᓴᓕᐊᖑᔪᖅ. 2019ᒥ ᓄᓇᕕᒻᒥ ᓯᓚᐅᑉ ᐊᓯᑦᔨᓂᖓᓄᑦ ᑲᑎᒪᓂᐊᕈᓯᕐᒥ ᑐᓴᕐᑎᓯᒍᑎᓕᐊᕕᓂᖅ ᐊᑐᐃᓐᓇᐅᔪᖅ ᑕᒡᒐᓂ.
2020ᒥᑦ 2022ᒧᑦ, ᑕᓪᓕᒪᑦ ᐊᒥᓱᐃᖑᑦᓱᑎᑦ ᑎᒥᐅᔪᐃᑦ ᐱᓇᓱᖃᑎᒌᑦᑐᑦ ᐊᑦᔨᒋᖕᖏᑐᓂᒃ ᐱᓯᒪᔪᐃᑦ ᐱᓇᓱᓐᓂᖁᑦ ᖃᓄᐃᓗᕈᑎᑦᓴᓕᐅᕐᓱᑎᑦ ᑖᑦᓱᒥᖓ. ᓄᓇᓕᒻᒥ ᐃᓚᐅᑎᑦᓯᓂᕐᒥᒃ ᐊᑑᑎᓐᓂᕆᕗᑦ ᐊᕐᕕᑕᕐᓱᑎᑦ ᓄᓇᕕᓕᒫᒥ ᒣᒥᑦ ᑎᓯᒻᐱᕆᒧᑦ 2023ᒥ ᑐᓴᕐᑎᓯᒋᐊᕐᑐᓱᑎᑦ ᖃᓄᐃᓗᕈᑎᑦᓴᓕᐊᕕᓂᕐᒥᒃ ᓄᓇᕕᒻᒥᐅᓄᑦ ᓈᓚᒋᐊᕐᓱᑎᓗ ᐃᓱᒪᒋᔭᖏᓐᓂᑦ ᐅᓐᓂᑑᑎᓕᐊᖏᓐᓂᓗ ᐱᐅᓯᐅᒥᑎᑦᓯᒋᐊᕐᓂᒧᑦ ᖃᓄᐃᓗᕈᑎᑦᓴᓕᐊᒥᒃ. ᐊᑕᐅᑦᓯᑯᑦ, 150 ᐅᖓᑖᓂ ᖃᐅᔨᒪᔩᑦ ᖃᐅᔨᒪᔪᒻᒪᕇᓗ ᑭᒡᒐᑐᕐᑎᖏᑦ ᓄᓇᕕᒻᒥ ᑎᒥᐅᔪᓂᑦ ᐃᑲᔪᕐᓯᓂᕐᖁᑦ ᓄᐃᑦᓯᓱᑎᑦ ᖃᓄᐃᓗᕈᑎᑦᓴᓕᐊᒥᒃ 2019ᒥᑦ 2023ᒧᑦ.
ᖃᓄᐃᓗᕈᑎᑦᓴᓕᐊᕕᓂᖅ ᓇᓗᓀᕐᓯᒍᑎᐅᕗᖅ ᐊᕐᖁᑎᒋᔭᐅᓂᐊᕐᑐᒥᒃ ᖃᓄᐃᓗᕈᑎᑦᓴᐅᔪᒥᒃ ᓯᓚᐅᑉ ᐊᓯᑦᔨᓂᖓᓄᑦ ᐋᕐᕿᒋᐊᕈᑎᑦᓴᓂᑦ ᖃᓄᐃᓗᖁᓯᕐᓂᑦ ᓄᓇᖁᑎᑦᑎᓂ ᐊᒻᒪᓗ ᑐᓴᐅᒪᑎᑦᓯᓗᑎᑦ ᐊᕙᒪᒥᒃ ᓯᓚᑖᓂᓗ ᐱᓯᒪᔪᓂᑦ ᑎᒥᐅᔪᓂᑦ ᓄᓇᕕᒻᒥ ᑲᑐᑦᔨᖃᑎᒌᑦᓱᑎᑦ ᓯᕗᓪᓕᐅᔭᐅᖁᔭᖏᓐᓂᑦ ᑭᖕᖒᒪᒋᔭᖏᓐᓂᓗ. ᓄᐃᑕᐅᓐᓂᖁᖅ ᓄᓇᓖᑦ ᐱᓗᐊᕐᑐᒥ ᐃᓅᓱᑦᑐᖁᑎᕗᑦ ᐃᓅᑦᓯᐊᖏᓐᓇᓂᐊᕐᒪᑕ ᓄᓇᑦᑎᓂ ᓯᕗᓪᓕᕕᓂᕗᑦ ᑌᒣᑦᓯᒪᒻᒪᑕ.
ᐊᑦᑐᐊᕋᑦᓴᖅ
