Winter

ᒥᓂ ᑯᔩ ᑐᓂᔭᐅᓚᐅᔪᕗᖅ ᓲᓱᒋᔭᐅᓂᕐᒥᒃ ᓇᓗᓀᕆᒍᑎᒥᒃ ᐊᐅᒡᒍᓯᐅᑎᓪᓗᒍ ᑐᓂᕐᕈᓯᐊᕐᑕᓱᓂ ᒪᓐᑐᔨᐊᑉ ᐃᓕᓐᓂᐊᕕᕐᔪᐊᖓᓂᑦ. ᒥᓂ ᑯᔩ ᐱᓇᓱᒐᖃᕐᑎᐅᓂᕐᒥᒃ ᓄᕐᖃᓚᐅᔪᔪᖅ ᔪᓓᖑᑎᓪᓗᒍ ᐊᕐᕌᒍᓂ ᖁᓕᐅᖕᖏᒐᕐᑐᓂ ᐳᕐᑐᓂᕐᓴᒥᒃ ᑐᑭᒧᐊᑦᑎᓯᔨᐅᓚᐅᔪᑦᓱᓂ ᓄᓇᕕᒻᒥ ᐃᓗᓯᓕᕆᓂᕐᓄᓗ ᐃᓄᓕᕆᓂᕐᓄᓗ ᐱᑦᔪᔨᕕᒻᒥ, ᑭᓯᐊᓂ ᐊᑯᓂᐅᓂᕐᓴ ᐱᓇᓱᒐᖃᕐᓯᒪᔪᖅ ᐃᓕᖓᔪᓂᒃ ᐃᓗᓯᓕᕆᓂᕐᓄᑦ, ᐃᓕᓐᓂᐊᑎᑦᓯᓂᕐᓄ ᐊᒻᒪᓗ ᐅᕕᒃᑫᑦ ᓯᕗᓂᑦᓴᖓᓐᓂᒃ.

ᑲᖏᕐᓱᒥᐅᔭᐅᑦᓱᓂ, ᒥᓂ ᑐᑭᒧᐊᑦᑎᓯᔨᐅᓯᒪᕗᖅ ᐅᖓᕙᐅᑉ ᐋᓐᓂᐊᕕᖓᓂ ᐊᕐᕌᒍᕐᓂ 1991-ᒥᑦ ᑎᑭᑦᓱᒍ 2000, ᐊᖏᖃᑎᒌᒐᓱᑦᑎᐅᓯᒪᑦᓱᓂᓗ ᐱᖓᓱᐃᓄᑦ ᐅᖃᖃᑎᒌᒍᑎᐅᖃᑦᑕᑎᓪᓗᒍ ᓴᕐᕿᑎᑕᐅᒐᓱᓐᓂᖓ ᓄᓇᕕᐅᑉ ᑲᕙᒪᑦᓴᖓ. ᒥᓂ ᑯᔩ ᑕᖃᔫᔭᓚᐅᕐᓯᒪᒐᓂ ᐃᑲᔪᕋᓱᖃᑦᑕᓚᐅᔪᒻᒥᔪᖅ ᓄᓇᕕᐅᑉ ᐅᕕᒃᑲᖏᓐᓂᒃ, ᑕᒪᖏᑎᒍᑦ ᐃᓕᓐᓂᐊᓂᒃᑯᓗ ᐊᒻᒪᓗ ᐃᓗᓯᖃᑦᓯᐊᕆᐊᖃᕐᓂᑯᓪᓗ ᐃᓱᒪᒃᑯᓗ ᖃᓄᐃᖕᖏᓯᐊᕆᐊᖃᕐᓂᑯᑦ.

ᒥᓂ ᑯᔩ 5-ᒥᓇᑦᓯᓂ ᐁᑦᑐᑕᐅᓂᖃᕐᓱᓂ ᐅᖄᓕᕋᒥ ᐃᓄᑦᑎᑐᑐᐃᓐᓇᖅ ᐅᖄᓚᐅᔪᔪᖅ ᐱᔭᕇᕈᑎᑖᕐᑐᓂᓪᓗ ᐅᐅᑦᔨᓱᓂ ᐃᒫᒃ “ᐃᓕᑦᓯ ᐅᓪᓗᒥ ᐱᔭᕇᕈᓯᕐᑕᐅᔪᓯ, ᓯᕗᓂᑦᓯᓂ ᑐᑭᑖᕐᓂᖃᕐᓂᐊᑐᐊᕈᑦᓯ ᓄᓇᓕᑦᑎᓄᑦ ᐱᓇᓱᒋᐊᕐᑐᕋᔭᕐᓂᒥᒃ, ᓇᓪᓕᑐᐃᓐᓇᖏᑎᒍᑦ ᖃᐅᔨᓴᕐᓂᑯᓪᓗᓃᑦ ᐅᕝᕙᓘᓐᓃᑦ ᐃᑲᔪᕐᓯᒋᐊᕐᑐᓂᒃᑯᑦ, ᐅᖃᐅᑎᔪᒪᕙᑦᓯ ᐃᒫᒃ: ᐱᐅᓕᑦᓯᔨᕈᑦᓴᐸᒐᓯ, ”ᐱᓇᓱᖃᑎᒋᖔᓕᕐᑎᒍᑦ. ᐃᒣᑦᑐᐃᒪᑯᐊᕐᓯᒪᒍᓐᓀᓗᑕ ᐃᓱᒪᓴᓯᐅᖃᑎᒌᖓᖃᑦᑕᓗᑕ. ᐱᓇᓱᒋᐊᕐᑐᕆᑦᓯ, ᐱᑦᔪᔨᒋᐊᕐᑐᑐᐃᓐᓇᕈᓐᓀᓗᓯ, ᑭᓯᐊᓂᓕ ᐃᓄᑐᐃᓐᓇᓂᒃ ᐱᓇᓱᖃᑎᖃᕐᓗᓯ, ᐱᓇᓱᖃᑎᒌᒍᑎᑎᒍᑦ, ᑌᒣᓕᖓᓕᕈᑦᓯ ᖃᐅᔨᒻᒪᓂᕐᑕᕆᒍᒪᔭᓯ ᑕᒐ ᐱᒋᐊᕐᕕᓕᐅᑎᓂᖃᓯᕗᖅ.”

ᐃᓕᓐᓂᐊᕕᕐᔪᐊᖅ ᐱᐅᓯᑐᖃᒃᑯᑦ ᐃᓄᓐᓂᒃ ᓱᓱᒋᔭᐅᓂᕐᒥᒃ ᓇᓗᓀᕆᓂᖃᓱᖑᕗᖅ ᐱᓇᓱᑦᑐᓂᒃ ᐃᓗᓯᓕᕆᓂᕐᓂᒃ ᐃᓄᓕᕆᓂᕐᓂᓗ, ᐃᓕᓐᓂᐊᑎᑦᓯᓂᕐᓂᒃ ᐊᒻᒪᓗ ᑲᒪᔨᒻᒪᕆᐅᓂᕐᒥᒃ ᐱᓇᓱᑦᑎᓂᒃ ᐊᒻᒪᓗ ᑲᔪᓯᐅᒐᕈᓐᓇᑐᓂᒃ ᐱᕙᓪᓕᐊᑎᑦᓯᓂᖃᕐᓱᑎᒃ ᓇᓗᓀᕆᖃᑦᑕᓂᒃᑯᑦ ᓱᓱᒋᔭᑦᓴᓯᐊᖑᔪᖁᑎᒥᓂᒃ ᐊᑑᑎᕙᑦᑕᒥᓂ ᐃᓕᓐᓂᐊᕕᕐᔪᐊᒥ ᐱᔭᕇᕈᓯᕐᓂᖃᓕᕐᒪᑦ.

ᓂᓪᓕᕈᑎᖃᕐᓱᓂ ᒥᓂᒥᒃ ᐊᓯᖏᓐᓂᓗ ᓯᑕᒪᓂᒃ ᓇᓗᓀᕐᑕᐅᒍᑎᑖᕐᒥᔪᓂᒃ ᒍᐃᒍᐃᑎᑐᑦ ᑐᓴᕋᑦᓴᓂᐅᑎᑎᒍᑦ ᑐᓴᕐᑎᓯᒍᑎᖃᕐᓱᓂ, ᐃᓕᓐᓂᐊᕕᕐᔪᐊᑉ ᐊᐅᓚᑦᓯᔨᒻᒪᕆᖓ ᑕᓂᐊᓪ ᔫᑦᕋ ᐃᒫᒃ ᐅᖃᓚᐅᔪᕗᖅ, “ᑖᒃᑯᐊ ᐊᕐᓀᑦ ᐊᖑᑏᓪᓗ , ᑐᓂᒪᓂᕐᒥᒍᑦ, ᖃᐅᔨᓴᕐᐸᓂᕐᒥᒍᑦ, ᐃᓕᓭᒍᑎᒥᒍᓪᓗ, ᐃᓅᑦᔪᓯᑦᑎᓂᒃ ᐱᑦᓴᕈᐃᒪᕗᑦ. ᓱᕐᕃᒍᓐᓇᓂᕐᒥᒍᑦ, ᑖᒃᑯᐊ ᐃᓅᓯᕐᒥᒍᑦ ᐃᓕᓐᓂᐊᕕᕐᔪᐊᖁᑎᑦᑎᓄᑦ ᑭᒡᒐᑐᕐᑎᓯᐊᕈᕐᓯᒪᕗᑦ ᐱᑕᖃᕐᐳᓗ ᐱᔪᒪᓕᕐᑎᓯᒍᓐᓇᓂᕐᒥᒃ ᓄᓇᓕᖁᑎᓕᒫᑦᑎᓂ.”