ᒪᑭᕝᕕᒃ ᐁᑉᐯᖃᕐᓱᓂ ᑲᑎᕕᒃ ᓄᓇᓕᓕᒫᑦ ᑲᕙᒪᖓᑕ ᓴᓇᔩᑦ ᐱᑦᔪᔨᕕᖓᓂᒃ ᑲᑎᖕᖓᓯᓚᐅᔪᕗᖅ ᑯᐯᒃᒥ ᓴᓇᓂᕐᓄᑦ ᐱᓇᓱᒐᖃᕐᕕᖁᑕᐅᔪᒥ, ᐱᓇᓱᑦᑏᑦ ᑲᑐᑦᔨᖃᑎᒌᓐᓂᖏᓐᓄᑦ ᐃᓚᐅᔪᒃ, ᐱᓇᓱᑦᑎᑕᓲᑦ ᑲᑐᑦᔨᖃᑎᒌᓐᓂᖏᓐᓂᒃ ᐊᒻᒪᓗ ᓄᓇᖃᕐᖃᓯᒪᔪᓪᓗ ᐃᓄᑐᐃᓐᓀᓗ ᐊᔪᖀᒋᐊᕐᓂᓄᑦ ᑲᑎᖕᖓᔨᖁᑎᖏᓐᓂᒃ ᐅᖃᖃᑎᒌᖃᑎᒋᒍᒪᑦᓱᒋᑦ ᖃᓄᐃᓘᕈᑎᑦᓴᓯᐅᕈᑎᖏᓐᓂᒃ ᑯᐯᒃᒥ ᓴᓇᓂᕐᓄᑦ ᐱᓇᓱᒐᖃᕐᕕᖁᑕᐅᔫᑉ ᐋᕐᕿᓱᐃᒐᓱᒍᑎᒋᑦᓱᒋᑦ ᐱᔪᓐᓇᓯᒍᑎᑦᓴᖏᓐᓂᒃ ᓄᓇᕕᒻᒥᐅᓗ ᐊᒻᒪᓗ ᓄᓇᖃᕐᖃᓯᒪᔪᑦ ᐱᓇᓱᒐᖃᕐᐸᑐᑦ ᓴᓇᔨᐅᓂᕐᓂᒃ. ᓴᓇᔩᑦ ᐱᓇᓱᑦᑕᖏᑦ ᐃᓕᖓᔪᑦ ᓄᓇᕕᒻᒥᐅᓄᑦ ᓴᓇᔪᓂ ᐃᓕᓐᓂᐊᖏᓐᓇᓱᑎᓪᓗ ᐊᑭᓕᕐᑐᑕᐅᓂᑭᑦᑐᓱᑎᒃ ᐱᓇᓱᑉᐸᑐᓄᑦ ᐊᒻᒪᓗ ᓴᓇᔨᐅᓂᕐᒥᒃ ᐃᓕᓯᒪᑦᓯᐊᓱᑎᒃ ᓴᓇᓂᕐᓂᒃ ᐱᓇᓱᑉᐸᑐᓄᑦ ᐃᓕᖓᔪᓂᒃ ᓯᕗᓂᖃᕈᑎᖃᕋᒥᒃ ᓄᐃᑦᓯᒍᑦᔨᒐᔭᕐᓗᒋᑦ ᐊᑦᑕᓀᑦᑐᓯᐊᓂᒃ ᐊᒻᒪᓗ ᐃᒻᒥᓂᕿᒍᓐᓇᐅᑎᑦᓯᐊᓂᒃ ᓄᓇᓕᓕᒫᓂ ᓴᓇᓂᕐᓂᒃ ᓴᓇᔨᐅᖃᑦᑕᕋᔭᕐᑐᓂᒃ ᐋᕐᕿᓱᕐᑕᐅᒪᒍᑎᖃᕐᓗᑎᒃ ᓇᓪᓕᐊᓂ ᓴᓇᖃᑕᐅᓂᐊᓕᕐᒪᖔᕐᒥᒃ ᐱᒋᐅᕐᓴᔭᐅᒍᑎᓂᓪᓗ ᐱᑦᔪᔭᐅᒍᑎᖃᕐᓗᑎᒃ. ᑖᓐᓇ ᑲᑎᖕᖓᓂᖅ ᐊᑑᑎᔭᐅᓚᐅᔪᔪᖅ ᒪᓐᑐᔨᐊᒥ ᓅᕕᒻᐱᕆ 3-ᖑᑎᓪᓗᒍ.
ᓯᕗᓂᖓᓂᓗ ᑭᖑᓂᖓᓂᓗ ᓄᓇᕕᐅᑉ ᓄᓇᖁᑎᖓ ᐃᓂᓪᓚᑕᐅᓂᖃᓚᐅᔪᕗᖅ ᑐᖕᖓᕕᖃᕐᓱᓂ ᑯᐯᒃᒥ ᓴᓇᓂᕐᓄᑦ ᐱᓇᓱᒐᖃᕐᕕᖁᑕᐅᔪᒥᒃ ᔫᓂ 2017-ᖑᑎᓪᓗᒍ, ᒪᓕᒐᖃᕐᑎᓯᒍᑎᐅᔪᑦ ᓲᓱᒋᔭᓖᑦ ᐱᓇᓱᑦᑎᑖᕐᓂᒥᓪᓗ ᓅᑲᑕᑦᑎᓯᖃᑦᑕᓂᕐᒥᓗ ᓴᓇᓂᓕᕆᕕᐅᑉ ᐱᓇᓱᑦᑎᖏᓐᓂᒃ ᐅᖃᖃᑎᒌᒍᑎᐅᖃᑦᑕᖁᑦ ᐅᖃᖃᑎᒌᒍᑎᑎᒍᓪᓗ ᑯᐯᒃᒥ ᓴᓇᓂᕐᓄᑦ ᐱᓇᓱᒐᖃᕐᕕᖁᑕᐅᔪᖅ ᐃᑉᐱᒍᓱᒐᓱᖃᑦᑕᓱᓂ ᓄᓇᕕᒻᒥᐅᓂᒃ ᐱᑦᔪᔨᒍᑎᐅᔪᑦ ᓇᐅᒃᑯᑦ ᐋᕐᕿᒋᐊᕆᐊᖃᕐᒪᖔᑕ.
2018-ᖑᑎᓪᓗᒍ, ᑯᐯᒃᒥ ᓴᓇᓂᕐᓄᑦ ᐱᓇᓱᒐᖃᕐᕕᖁᑕᐅᔪᖅ ᐱᕙᓪᓕᐊᑎᑦᓯᒍ-ᑎᖃᓯᓚᐅᔪᕗᖅ ᐱᓇᓱᖃᑎᒌᒍᑎᖃᕐᓂᓂᒃ ᑖᒃᑯᓇᓂᓗ ᐊᔪᖀᒋᐊᕐᓂᓄᑦ ᑲᑎᖕᖓᔨᑦᓭᑦ ᓴᕐᕿᑎᑕᐅᓂᖃᓚᐅᔪᕗᑦ ᐃᓚᐅᑎᑦᓯᓂᖃᓚᖓᑦᓱᑎᒃ ᓄᓇᖃᕐᖃᓯᒪᔪᓂᒃ ᐊᒻᒪᓗ ᐃᓄᑐᐃᓐᓇᓂᒃ. ᐃᓚᐅᔪᑦ ᑖᒃᑯᓄᖓ ᐊᔪᖀᒋᐊᕐᓂᓄᑦ ᑲᑎᖕᖓᔨᓄᑦ ᐃᓚᒋᔭᐅᔪᑦ ᐱᓇᓱᖃᑎᒌᒍᑎᓕᔨᓐᓄᑦ ᐅᑯᐊᖑᕗᑦ: ᐊᐸᑎᓯᒍᐃᓐ ᐱᒋᐅᕐᑕᐅᒪᒋᐊᓕᓐᓂᒃ ᐱᕙᓪᓕᐊᑎᑦᓯᔩᑦ, ᑳᓇᒍᐊᑭᒥ ᐱᓇᓱᑦᑏᑦ ᐊᓪᓚᕕᖓ, ᓄᓇᖃᕐᖄᓯᒪᔪᑦ ᐃᓄᖃᑎᒌᑦ ᐱᓇᓱᑦᑐᓕᕆᓂᕐᒥᒃ ᐱᕙᓪᓕᐊᑎᑦᓯᕕᖓᑦ ᑯᐯᒃᒥ, ᐊᑎᑲᒥᒃ ᐃᓅᖃᑎᒌᑦ ᑲᑎᖕᖓᔨᖏᑦ. ᓈᔅᑳᐲᑦ ᐃᓄᖃᑎᒌᑦ ᑲᒍᐊᒍᐊᑦᓯᑲᒫᒃᒥ ᐊᒻᒪᓗ ᓴᓇᔩᑦ ᐱᑦᔪᔨᕕᖓᑦ ᑲᑎᕕᒃ ᓄᓇᓕᓕᒫᑦ ᑲᕙᒪᖓᓂ. ᑖᒃᑯᓂᖓ ᐊᓪᓚᖁᑎᓂᒃ ᒪᑭᕝᕕᒃ ᐱᓇᓱᖃᑎᐅᕙᒻᒥᔪᖅ ᓴᓇᔩᑦᑯᓄᑦ ᐃᓄᑐᐃᓐᓇᓄᑦ ᐱᓇᓱᒐᖃᕐᕕᐅᓂᕐᒥᓄᑦ ᑭᒡᒐᑐᕐᓱᓂ ᓄᓇᕕᒻᒥᐅᓂᒃ, ᐊᒻᒪᓗ ᐱᓇᓱᑦᑎᖃᓱᖑᓂᕐᒥᓂᒃ ᑐᖕᖓᕕᖃᕐᒥᓱᓂ.
ᑖᒃᑯᐊ ᑲᑐᑦᔮᖑᑦᓱᑎᒃ ᓴᓇᓂᐅᔪᑦ ᐊᒥᓱᐃᓕᖓᔪᓂᒃ ᐊᕕᑦᑐᓯᒪᓂᓖᑦ. ᓴᓇᓃᑦ 1-ᖑᒍᑎᖓᑦ ᐊᑐᐃᓐᓇᕈᕐᑎᓂᐅᓯᒪᕗᖅ ᑕᒃᑲᓂᓗ ᑯᐯᒃᒥ ᓴᓇᓂᕐᓄᑦ ᐱᓇᓱᒐᖃᕐᕕᖁᑕᐅᔪᖅ ᐊᐅᓚᑦᔭᒋᐊᕈᑎᖃᕐᓯᒪᕗᖅ, ᑐᑭᓯᓂᕐᓂᓂᓪᓗ ᐊᑑᑎᖃᑦᑕᓱᓂ, ᑐᓴᕐᑎᓯᖃᑦᑕᓱᓂᓗ ᑯᐯᒃᒥ ᓴᓇᓂᕐᓄᑦ ᐱᓇᓱᒐᖃᕐᕕᖁᑕᐅᔫᑉ ᑲᑎᖕᖓᔨᖏᓐᓂᒃ. ᓴᓇᓃᑦ ᑐᖓᓕᒋᑦ 2-ᖏᑦ ᐱᓇᓱᒍᑎᑦᓴᓂᒃ ᐸᕐᓇᓂᐅᓚᐅᔪᔪᑦ ᑕᒃᑲᓂᓗ ᐱᓇᓱᓚᐅᔪᕗᑦ ᐊᕙᓗᓕᕐᑐᐃᓂᕐᓂᒃ, ᒪᓕᒐᖁᑎᓕᐅᕐᓂᓂᒃ ᐊᒻᒪᓗ ᒪᓕᒐᖁᑕᐅᔪᑦ ᑐᖕᖓᕕᖏᓐᓂᒃ. ᓴᓇᓃᑦ ᐱᖓᑦᓯᐅᑎᖓᑦ 3-ᖓᑦ ᑕᒐᑕᒐ ᑖᒃᑯᓇᓃᓕᕐᑐᑦ, ᐱᓇᓱᒍᑎᑦᓴᓂᒃ ᓄᐃᑎᕆᓂᐅᕗᖅ ᑕᒃᑲᓂᓗ ᐱᓇᓱᑦᑕᐅᔪᑦ ᑐᕌᖓᕗᑦ ᓯᕗᓪᓕᐅᔭᐅᒋᐊᓕᓕᕆᓂᕐᓄᑦ, ᑐᓂᔨᑲᑦᑕᓂᐅᑦᓱᑎᒃᓗ ᖃᓄᐃᓘᕆᒍᑎᑦᓴᓂᒃ ᐊᒻᒪᓗ ᑲᒪᒋᔭᖃᕐᑎᐅᕕᐅᒋᐊᓕᓐᓂᒃ, ᓴᕐᕿᑎᑦᓯᖃᑦᑕᓱᑎᒃᓗ ᐃᓗᓕᑦᓴᖏᓐᓂᓗ ᐅᓪᓗᑕᕐᑕᐅᒪᒍᑎᑦᓴᖏᓐᓂᓗ. ᑖᒃᑯᐊ ᓅᕕᒻᐱᕆᒥ ᑲᑎᖕᖓᓂᐅᓚᐅᔪᔪᑦ ᑭᖑᓂᖓᒍᑦ, ᐱᓇᓱᑦᑕᐅᔪᑦ ᑲᔪᓯᕗᑦ, ᑲᑎᖕᖃᑎᒌᓐᓂᐅᓛᕐᒥᔪᓪᓗ ᓂᕆᐅᒋᔭᐅᕗᑦ ᐅᓪᓗᓴᓕᐅᕐᑕᒪᓂᖃᕋᑕᖕᖏᑲᓗᐊᕐᓱᑎᒃ.
ᓴᓇᓃᑦ ᐱᖓᑦᓯᐅᑎᖏᑦ 3-ᖏᑦ ᐱᔭᕇᕐᑕᐅᑐᐊᕐᐸᑕ, ᓴᓇᓃᑦ ᓯᑕᒻᒥᐅᑎᖏᑦ 4-ᖏᑦ ᑲᔪᓯᑎᑕᐅᓂᖃᓛᕐᒥᔪᑦ, ᖁᕝᕙᑎᑕᐅᓂᖃᕐᓗᑎᒃᓗ ᐱᓇᓱᒍᑎᐅᔪᑦ ᓂᕆᐅᒋᔭᐅᔪᑦ ᔫᓂ 2023-ᒥ, ᓂᕆᐅᓇᖕᖏᑐᓄᑦ ᑭᖑᕙᕆᐊᕐᑎᓯᒍᑎᓄᑦ ᐊᕝᕕᐊᑕᐅᒍᓐᓀᓗᑎᒃ.
ᒪᑭᕝᕕᐅᑉ ᓴᓇᔨᖏᑦ ᐱᓇᓱᑦᑐᒪᕆᐅᖃᑦᑕᑐᑦ ᑕᒃᑲᓂ ᐅᑭᐊᒥ ᐱᔭᕇᕋᓱᑦᓱᑎᒃ ᐊᒥᓱᓂᒃ ᐃᒡᓗᓴᓂᒃ ᐱᔭᕇᕈᒪᑦᓱᒋᑦ ᖁᕕᐊᓱᕝᕕᐅᑉ ᐅᓪᓗᖏᑕ ᓯᕗᓂᖓᓂ. ᐅᓪᓗᖅ ᑏᓯᒻᐱᕆ 16 ᓇᓪᓕᐅᑎᑎᓪᓗᒍ, 86-ᓂᒃ ᐃᒡᓗᔪᐊᓂ ᐱᔭᕇᕐᓯᒪᓛᕐᑐᑦ – ᖁᕕᐊᓱᕝᕕᒧᑦ ᓈᒻᒪᓈᕐᓗᑎᒃ!
ᒪᑭᕝᕕᒃ ᕿᓂᕐᐳᖅ ᐱᓇᓱᒍᒪᑦᓯᐊᑐᓂᒃ ᐃᓄᓐᓂᒃ ᐃᓚᐅᒐᔭᕐᑐᓂᒃ ᐱᓇᓱᑦᑎᖁᑎᖏᓐᓄᑦ. ᐅᓇᒻᒥᓱᑦᑐᑦ ᐃᑲᔪᕐᓯᒐᔭᕐᓂᒥᒃ ᐃᒡᓗᓕᐅᕐᓂᓂᒃ ᐱᓇᓱᑦᑐᓂᒃ ᓄᓇᓕᒻᒥᓂ, ᓴᓇᔨᐅᓗᑎᓪᓗᓃᑦ ᐅᕝᕙᓘᓐᓃᑦ ᓴᓇᔩᑦ ᐊᓂᕐᕋᖃᕐᑎᑕᐅᒍᑎᖏᓐᓂ ᐱᓇᓱᑦᑎᐅᓂᕐᒥᒃ, ᑖᒃᑯᓂᖓ ᐱᓇᓱᒍᒪᔪᑦ ᐅᕙᑦᑎᓄᑦ ᖃᐅᔨᒋᐊᕐᑐᓴᐅᕗᑦ ᐅᕘᓇ: HRconstruction@ makivik.org
