10/07/2022
ᐊᓪᓚᑕᖏᑦ Emilie Reny-Nolin/ᐃᒥᓕ ᕆᓂ-ᓅᓕᓐ, MiraNor’s-ᑯᑦ ᐊᑕᐅᑦᓯᑯᕐᑎᓯᔨᖓᑦ ᐊᑦᔨᖑᐊᕐᑕᕕᐅᓯᒪᔪᑦ ᒫᑯᓯ ᐋᓇᖃᑕᒃ, Milad Fakhari/ᒣᓛᑦ ᕙᒃᖃᕆ, Jasmin Raymond/ᔮᔅᒥᓐ ᕆᒨ, ᐊᒻᒪᓗ Richard Martel/ᕆᑦᓱᑦ ᒪᕐᑎᐋᓪ ᒫᑯᓯ ᐋᓇᖃᑕᒃ, ᑲᒪᔨᒻᒪᕆᒃ ᐋᕐᕿᕕᒃ ᓄᓇᒥᒃ ᑎᒍᒥᐊᕐᑎᑯᓐᓂ, ᐱᓇᓱᖃᑎᖃᓚᐅᔪᕗᖅ […]
ᐊᓪᓚᑕᖏᑦ Emilie Reny-Nolin/ᐃᒥᓕ ᕆᓂ-ᓅᓕᓐ, MiraNor’s-ᑯᑦ ᐊᑕᐅᑦᓯᑯᕐᑎᓯᔨᖓᑦ ᐊᑦᔨᖑᐊᕐᑕᕕᐅᓯᒪᔪᑦ ᒫᑯᓯ ᐋᓇᖃᑕᒃ, Milad Fakhari/ᒣᓛᑦ ᕙᒃᖃᕆ, Jasmin Raymond/ᔮᔅᒥᓐ ᕆᒨ, ᐊᒻᒪᓗ Richard Martel/ᕆᑦᓱᑦ ᒪᕐᑎᐋᓪ
ᒫᑯᓯ ᐋᓇᖃᑕᒃ, ᑲᒪᔨᒻᒪᕆᒃ ᐋᕐᕿᕕᒃ ᓄᓇᒥᒃ ᑎᒍᒥᐊᕐᑎᑯᓐᓂ, ᐱᓇᓱᖃᑎᖃᓚᐅᔪᕗᖅ MiraNor-ᑯᑦ ᐱᓇᓱᖃᑎᒌᑦᑐᖁᑎᖏᓐᓂᒃ ᐋᕐᕿᓱᐃᖃᑎᒋᑦᓱᒋᑦ ᓄᓇᑐᐃᓐᓇᒥ ᐱᓇᓱᑦᑕᐅᓂᖃᓛᕐᑐᓂᒃ ᖃᐅᔨᓴᕈᑎᐅᓗᑎᒃ ᐃᖃᓗᑉᐲᑦ ᓄᓇᖏᑕ ᐊᕙᑎᖏᓐᓂᒃ, ᐃᖃᓗᑉᐲᑦ ᐱᒻᒪᕆᐊᓗᓂᖃᕐᒪᑕ ᑕᓯᐅᔭᕐᒥᐅᓄᑦ. ᑖᒃᑯᐊ ᐱᓇᓱᒍᑎᐅᔪᑦ ᓯᕗᓂᖃᕈᑎᐅᕗᑦ ᑐᑭᓯᒪᑦᓯᐊᓂᕐᓴᐅᒍᑎᑕᕐᓂᓴᓂᒃ ᐃᒪᐅᑉ ᓄᓇᐅᑉ ᐃᑭᐊᖓᓂᑦ ᐱᔫᑉ ᓇᒧᑦ ᑯᓱᖑᓂᖓᓂᒃ ᖃᒪᓂᐊᓘᑉ ᑯᖓᓄᑦ ᑰᑦᓱᓂ.
ᐃᒪᖅ ᓄᓇᐅᑉ ᐃᑭᐊᖓᓂᑦ ᐱᔪᖅ ᓱᒐᒥ ᐃᖃᓗᑉᐱᓄᑦ ᐱᒻᒪᕆᐅᒍᑎᖃᕐᐸ?
ᐃᖃᓗᑉᐲᑦ ᓇᔪᕐᑕᒥ ᓂᕈᒥᓐᓂᖓᓂᒃ ᓈᒻᒪᓴᑦᓯᐊᕆᐊᖃᕐᒪᑕ. ᕿᐅᔭᓇᕐᑐᒪᕆᐅᓕᕐᒪᓗ ᐅᕐᖁᔪᐊᓘᓕᕐᒪᓗᓐᓃᑦ ᓱᔪᖃᕐᓂᐅᔪᑦ ᑎᑭᐅᑎᒍᑎᐅᓱᖑᕗᑦ ᓂᕈᒥᑦᑐᐊᓗᒻᒧᓗᓐᓃᑦ ᓂᓪᓕᓇᕐᑐᑲᓪᓚᒧᓪᓗᓃᑦ ᐃᒪᕐᒧᑦ, ᑕᒪᑐᒧᖓ ᐊᐅᓚᑕᐅᑦᓱᑎᒃ ᐃᖃᓗᑉᐲᑦ ᑰᖕᒥ ᑰᑦᑕᐅᔪᒦᓐᓂᓴᐅᓱᖑᕗᑦ. ᑎᑭᐅᑎᓯᒪᓲᑦ ᐃᒪᐅᑉ ᐱᑭᐊᓚᕕᖓᓄᑦ, ᑌᔭᐅᓂᖃᓱᓄᑦ ᓈᒻᒪᑐᒥᒃ ᓂᓪᓕᓇᕐᓂᓕᒻᒥᒃ ᓇᔪᒐᕐᓂᒃ, ᑌᒣᓱᖑᕗᓪᓗ ᐱᑦᔪᑎᖃᕐᓱᑎᒃ ᐃᒪᐅᑉ ᓂᓪᓕᓇᕐᓂᖓᓂ ᓈᒻᒪᒋᓂᕐᓴᖃᕋᒥᒃ ᐊᓐᓇᐅᒪᓇᓱᓐᓂᒥᓄᑦ. ᑌᒪᓕ ᐃᒪᖅ ᓄᓇᐅᑉ ᐃᑭᐊᖓᓂᑦ ᑰᑦᑐᖅ ᓯᓚᒧᑦ ᐊᐅᓚᑕᐅᖕᖏᓂᕐᓴᐅᒪᑦ ᐊᒻᒪᓗ ᓯᕿᓐᓂᔮᕐᑕᐅᒐᓂ, ᓂᕈᒥᓐᓂᖓ ᓂᓪᓚᓱᓐᓂᖓᓗ ᑌᒫᑦᓭᓇᕐᓂᓴᐅᖏᓐᓇᓱᖑᕗᑦ ᐊᕐᕌᒍᓕᒫᒥ.
ᑌᒪᓗᑦᑕᐅᖅ ᐃᒪᐅᑉ ᓂᕈᒥᓐᓂᖓᓗ ᓂᓪᓚᓱᓐᓂᖓᓗ ᑰᓐᓂ ᐊᓯᑦᔨᑕᕐᓂᓴᐅᕙᓪᓕᐊᓂᕐᓴᐅᓚᖓᓕᕐᒪᑦ ᑯᐯᒃ ᑕᕐᕋᖓᓂ ᐱᔭᐅᓗᓂ ᓯᓚᐅᑉ ᐊᓯᑦᔨᓂᖓᓄᑦ, ᑕᒪᒃᑯᐊ ᓂᓪᓕᓇᕐᑐᑲᓪᓚᐅᓂᕐᓭᑦ ᐊᓐᓇᐅᒪᓇᓱᕝᕕᐅᒍᓐᓇᑐᑦ ᓴᕐᕿᑎᑕᐅᕙᑦᓱᑎᒃ ᐃᒪᕐᒧᑦ ᓄᓇᐅᑉ ᐃᑭᐊᓂᑦ ᑰᑦᑐᒧᑦ ᐊᓐᓇᐅᒪᕕᑦᓴᐅᒍᓇᐅᓂᕐᓴᐅᕗᑦ ᐅᑭᐅᕐᑕᑑᑉ ᐃᖃᓗᑉᐱᖏᓐᓄᑦ, ᓂᕿᑦᓴᑕᕐᕕᓴᐅᓂᕐᓴᐅᓗᑎᒃ ᑕᓯᐅᔭᕐᒥᐅᓄᑦ.
ᑕᓯᐅᔭᕐᒥᐅᑦ ᐱᓇᓱᖃᑎᒌᖃᑕᐅᔪᑦ, ᐃᓚᖃᕐᓱᑎᒃ ᖃᐅᔨᓴᕐᑎᓂᒃ ᔭᔅᒥᓐ ᕆᒨᒥᓪᓗ ᕆᓵ ᒪᕐᑎᐋᓪᒥᓪᓗ ᐊᒻᒪᓗ ᐳᕐᑐᓂᕐᐹᒥᒃ ᐃᓕᓐᓂᐊᓯᒪᒍᑎᑖᕋᓱᑦᑐᒥᒃ ᐃᓕᓐᓂᐊᑎᐅᑦᓱᓂ ᒣᓛᑦ ᕚᒃᖄᕆ ᐱᓯᒪᔪᑦ MiraNor-ᑯᑦ ᐱᓇᓱᖃᑎᒌᑦᑐᖁᑎᖏᑦ ᐃᓕᐅᕐᙯᓚᐅᔪᕗᑦ piezometers/ᓇᐅᑦᓯᑐᕈᑎᓂᒃ ᐃᓕᐅᕐᖃᓱᒋᑦ ᑰᑉ ᐃᕐᖃᖓᓄᑦ ᑰᒡᓗ ᓯᓈᓄᑦ ᐃᓕᐅᕐᖃᓚᐅᔪᔭᒥᓐᓂᒃ ᐅᐱᕐᖔᖓᓂ 2019. ᑖᒃᑯᐊ piezometers/ᓇᐅᑦᓯᑐᕈᑏᑦ ᐊᑐᕐᑕᐅᒋᐊᖃᓪᓚᕆᓚᐅᔪᔪᑦ ᓇᓗᓀᕆᒍᑎᐅᓗᑎᒃ ᖁᑦᓯᓂᕐᓴᒥᒃ ᐃᒪᐅᑉ ᐃᑭᐊᓂᑦ ᑰᒃᑐᒥᑦ ᖃᒪᓂᐊᓘᑉ ᑰᖓᓂ.
Piezometers/ᓇᐅᑦᓯᑐᕈᑏᑦ ᒪᖕᖏᖃᔭᖕᖏᑐᔭᐅᑦᓱᑎᒃ ᑭᑭᐊᖑᕗᑦ ᓱᓪᓗᓕᐅᑦᓱᑎᒃ ᐹᒥᒍᑦ/ᓇᑖᒥᒍᑦ ᓴᓂᑦᑐᒋᒃᑯᑎᖃᕐᓱᑎᒃ ᐃᒪᕐᒥᒃ ᑯᕕᑎᑦᓯᒍᑎᐅᑦᓱᑎᒃ. ᓂᕈᒥᓐᓂᒥᒃ ᑲᒪᒍᑏᑦ ᑭᖑᓪᓕᐅᓱᑎᒃ ᐃᓕᔭᐅᒪᐅᔪᒻᒥᔪᑦ ᓇᐅᑦᓯᑐᕈᑎᓅᔭᕐᑕᐅᓱᑎᒃ ᐊᓯᖏᓐᓄᓗ ᓱᓪᓗᓕᓐᓄᑦ ᓄᓇᒦᑦᑐᓄᑦ ᓄᐊᑦᓯᒍᑎᑦᓴᐅᓱᑎᒃ ᐃᒪᕐᒥᒃ ᓄᓇᐅᑉ ᐃᑭᐊᓂᑦ ᑯᕕᔪᒥᑦ ᓄᓇᐅᓪᓗ ᓯᕐᒥᖓᑕ ᓂᕈᒥᓐᓂᖓᓂᒃ ᐊᓪᓚᓯᒪᔪᓕᐅᕈᑎᐅᑦᓱᑎᒃ.
ᑕᒪᑐᒪ ᑲᒪᒋᔭᐅᓂᖓᑕ ᐊᓪᓚᖁᑎᑖᖏᑦ ᓄᐊᑕᐅᓚᐅᔪᔪᑦ ᐊᕐᕋᒎᒃ ᒪᕐᕉᒃ ᐊᓂᒍᕐᐸᓕᐊᑎᓪᓗᒋᒃ ᐱᔭᐅᑦᓱᑎᒃᓗ 2021-ᒥ ᐱᒍᓐᓇᓯᒍᑎᐅᑦᓱᑎᒃ ᓱᕐᖁᐃᓯᓂᕐᒥᒃ ᐃᒫᒃ ᓂᓪᓕᓇᕐᑐᒪᕆᓪᓗ ᓂᕈᒥᓐᓂᓴᕐᓗ ᓱᑯᑦᓯᒦᓐᓂᖃᕐᒪᖓᑏᒃ ᑕᑯᓐᓇᑕᐅᑦᓱᑎᒃ ᖃᖓᑕᔪᒧᑦ ᓂᕈᒥᓐᓂᒃ ᑕᑯᑦᓴᐅᑎᑦᓯᒍᑎᒧᑦ ᓱᕐᖁᐃᓯᑎᑕᐅᒍᑎᐅᓚᖓᑦᓱᑎᒃ ᐃᒪᖅ ᓂᓪᓕᓇᕐᓂᓴᖅ ᑕᐅᑦᑐᖓ ᕿᕐᓂᓂᕐᓴᐅᑎᓪᓗᒍ ᑕᑯᑦᓴᐅᓱᓂ ᖃᖓᑕᔪᒃᑯᑦ ᓂᕈᒥᓐᓂᓂᒃ ᑕᑯᑦᓴᐅᑎᑦᓯᒍᑎᒃᑯᑦ) ᓱᓇᐅᕝᕙ ᐃᒪᖅ ᓄᓇᐅᑉ ᐃᑭᐊᓂᑦ ᐱᔪᕕᓂᖅ, ᐃᒪᕐᓂᒃ ᖃᐅᔨᓴᕋᑦᓴᓂᒃ ᑎᒍᓚᓚᐅᔪᒻᒥᔪᑦ ᖃᐅᔨᓴᕈᑎᒋᓛᕐᓱᒋᑦ ᐅᕐᓱᐊᓗᑦᓴᔭᐅᑦᓱᓂ ᓱᒃᑯᓇᕐᑐᑕᖃᕐᒪᖔᑦ.
ᓱᒨᑦ ᖃᐅᔨᓴᕐᑕᖃᕐᓂᖅ ᓲᕐᓗ ᐅᕐᓱᐊᓗᑦᓴᔭᒥᒃ Radon-222-ᒥᒃ ᑌᔭᐅᒍᑎᓕᒻᒥ ᐊᑑᑎᖃᕐᐸ ᓇᓗᓀᕆᒍᑎᒋᓗᒍ ᐃᒪᕐᒥᒃ ᓄᓇᐅᑉ ᐃᑭᐊᖓᓂᑦ ᐱᑭᐊᓚᔪᒥᒃ?
ᐅᒃᓱᐊᓗᑦᓴᔭ Radon-222 ᐅᕐᓱᐊᓘᕗᖅ ᐱᐅᓯᑐᐃᓐᓇᒥᒎᕐᓱᓂ ᓄᓇᐅᑉ ᓯᕐᒥᖓᓃᑦᑐᖅ, ᙯᕐᑐᒥᓗ ᐊᒻᒪᓗ ᐃᒪᕐᒥ ᓄᓇᐅᑉ ᐃᑭᐊᓂᑦ ᐱᑭᐊᓚᔪᒥ. ᓄᓇᐅᑉ ᐃᑭᐊᖓᓂᑦ ᐱᔪᖅ ᐃᒪᖅ ᓯᕐᒦᕈᑐᐊᕋᒥ ᐅᕐᓱᐊᓗᑦᓴᔭᖕᖑᓲᖑᕗᖅ ᐅᓪᓗᐃᑦ ᐱᖓᓱᑦ ᕿᑎᕐᖃᓗ ᐊᓂᒍᑐᐊᕐᒪᓴᑕ. ᑖᓐᓇ ᐅᕐᓱᐊᓗᑦᓴᔭ Radon-222 ᓄᖑᓲᖅ, ᑌᒣᒻᒪᑦ, ᐅᕐᓱᐊᓗᑦᓴᔭᕐᑕᖃᕐᓂᓴᐅᑐᐊᕐᒪᑦ ᑰᑉ ᐃᓚᖓ, ᓱᕐᖁᐃᑐᒥᒃ ᓄᓇᐅᑉ ᐃᑭᐊᓂᑦ ᐃᒪᖅ ᐱᑭᐊᓚᔪᖅ ᐊᖏᓂᕐᓴᐅᓱᖑᕗᖅ ᑌᑲᓂ ᓄᓇᒥ. ᒣᓛᑦ ᕙᒃᖃᕆ ᖃᐅᔨᓴᓛᕐᑐᖅ ᐃᒪᕐᓂᒃ ᐃᒥᕐᑖᕕᓂᕐᓂᒃ ᐃᓚᖃᕐᑎᓗᒋᑦ ᐊᓪᓚᖁᑎᖏᓐᓂᒃ ᐱᔭᐅᒪᔪᓂᒃ ᖃᒪᓂᐊᓘᑉ ᑰᖓᓂᑦ ᐊᒥᕐᖃᖃᑎᒌᒍᑎᒋᓛᕐᑕᒥᓂᒃ ᒪᑯᓯ ᐋᓇᖃᑕᒻᒧᑦ ᐋᕐᕿᕕᒃ ᓄᓇᒥᒃ ᑎᒍᒥᐊᕐᑎᑯᓐᓂ ᐱᓇᓱᑦᑐᒧᑦ ᑕᓯᐅᔭᕐᒥᐅᓄᓪᓗ. ᑖᒃᑯᐊ ᖃᐅᔨᓴᕐᓂᐅᔪᑦ ᐃᓱᓕᒍᑎᓂᒃ ᐱᔭᐅᒍᓐᓇᓛᕐᒥᔪᑦ MiraNor-ᑯᑦ ᖃᕆᑕᐅᔭᑎᒍᑦ ᑕᑯᓇᓱᑦᑕᐅᕕᖓᓐᓂ ᐅᕙᓂ miranor.inrs.ca.
MiraNor-ᑯᑦ ᖃᐅᔨᓴᕐᑎᖁᑎᖏᑦ ᔭᔅᒥᓐ ᕆᒨᓗ ᕆᓵ ᒪᕐᑎᐋᓪᓗ ᐃᓚᖃᕐᓱᑎᒃ ᐳᕐᑐᓂᕐᐹᒥᒃ ᐃᓕᓐᓂᐊᓯᒪᐅᑎᑖᕋᓱᑦᑐᒥᒃ ᒣᓛᑦ ᕙᒃᖃᕆᒥᒃ ᐱᓪᓗᑯᒋᐊᓕᓕᕆᓂᕐᒥᒃ ᐃᒪᓕᕆᓂᕐᒥ ᓯᕐᒥᖏᑎᒍᑦ ᐊᒻᒪᓗ ᓄᓇᐅᑉ ᓂᕈᒥᓐᓂᖓᓂᓪᓗ ᓂᓪᓕᓇᕐᓂᖓᓂᓪᓗ ᐃᓕᓯᒪᔫᑦᓱᑎᒃ ᐱᔪᓐᓇᐳᑦ. ᑖᒃᑯᐊ ᖃᐅᔨᒪᔭᖏᑦ ᐱᔪᓐᓇᕈᑎᒋᓲᕆᕙᖏᑦ ᑭᐅᒪᒋᐊᖃᓕᕋᒥᒃ ᐊᐱᕆᒍᑎᓂᒃ ᐃᓕᖓᔪᓂᒃ ᐃᒪᕐᒧᑦ ᓄᓇᐅᑉ ᐃᑭᐊᓂᑦ ᐱᑭᐊᓚᔪᒧᑦ. MiraNor-ᑯᑦ ᐱᓪᓗᑯᒋᐊᓕᑎᒍᑦ ᓯᓚᐅᑉ ᐊᓯᑦᔨᓂᖓᓂᒃ ᖃᐅᔨᓴᕐᑎᓂᒃ ᐃᓚᖃᕐᒥᔪᑦ ᐱᓪᓗᑯᒋᐊᖃᕐᓂᖏᓐᓂᒃ ᓯᓚᐅᑉ ᐊᓯᑦᔨᓂᖓᑕᓗ, ᓄᓇᐅᓪᓗ ᓱᒃᑯᓇᕐᑐᖃᕐᓂᖓᑕ, ᓄᓇᐅᓪᓗ ᐊᓯᑦᔨᓂᕆᓱᖏᓐᓂᒃ ᑰᓐᓂᓗ ᓂᕐᔪᑎᑕᖃᓲᓂᒃ ᐊᕙᑎᐅᓪᓗ ᐃᒪᖏᓐᓂᒃ ᐊᒻᒪᓗ ᐊᓪᓚᖁᑎᓕᐊᖑᒪᔪᓂᒃ ᑐᑭᓯᓂᐊᓲᓂᒃ. ᐃᒻᒥᒎᕐᑐᒥᒃ ᖃᐅᔨᓴᕐᓂᓂᒃ ᐱᓇᓱᕝᕕᖃᕐᓱᑎᒃ ᐱᑕᖃᕐᑎᓯᒍᓐᓇᓲᑦ ᓱᑯᐃᔭᕐᓯᒪᔪᑎᒍᑦ ᖃᐅᔨᒪᔭᐅᒋᐊᓕᓐᓂᒃ ᐃᑲᔪᕐᓯᓂᖃᓚᖓᑦᓱᑎᒃ ᑲᔪᓯᐅᒐᕈᓐᓇᑐᓂᒃ ᐱᕙᓪᓕᐊᑎᑦᓯᒍᑎᖃᕐᓂᓂᒃ ᑯᐯᒃ ᑕᕐᕋᖓᓂ.
ᑐᑭᓯᒋᐊᒃᑲᓂᕈᒪᒍᕕᑦ ᑕᑯᒋᐊᕈᓐᓇᐳᑎᑦ MiraNor-ᑯᑦ ᐅᕙᓂ miranor.inrs.ca
ᑖᒃᑯᐊ ᐱᓇᓱᑦᑕᐅᔪᑦ ᑲᔪᓯᒍᓐᓇᑎᑕᐅᓚᐅᔪᕗᑦ ᑮᓇᐅᔭᑎᒍᑦ ᓴᐳᑦᔭᐅᒪᑦᓱᑎᒃ ᑲᕙᒪᑐᖃᒃᑯᓄᑦ.
10/07/2022
ᑖᒃᑯᐊ ᐅᓂᒃᑲᓕᐊᑦ ᑐᖓᓕᒋᔭᐅᕗᑦ ᑕᕐᕋᓕᒃ ᕿᒥᕐᕈᐊᑦ ᐅᓂᒃᑲᐅᓯᖃᕈᑎᒋᖃᑦᑕᓚᖓᔭᖏᓐᓄᑦ ᐊᕐᓇᓂᒃ ᐱᓇᓱᒐᓕᓐᓂᒃ ᐃᓄᐃᑦᐃᓚᖏᓐᓄᑦ ᐃᓱᒪᒋᔭᐅᔪᓂᒃ “ᐊᕐᓇᐅᑉ ᐱᓇᓱᒐᑦᓴᔭᕆᖕᖏᑕᖓᓂᒃ” ᐱᓇᓱᒐᓕᓐᓂᒃ ᓄᓇᕕᒻᒥ ᐳᓕᓰᑦ ᐱᑦᔪᔨᒍᑎᖏᓐᓄᑦ ᐳᓖᓯᐅᖃᑎᐅᔪᖅ ᐅᓛᔪ ᑐᐳᐃ-ᒥᕉᓐ ᐅᖃᕐᑐᖅ ᐳᓖᓯᐅᑉ ᐱᓇᓱᒐᖏᓐᓂᒃ, ᑕᒪᓐᓇ ᐱᓇᓱᒐᖅ ᐃᓱᒻᒪᓯᑎᒍᑦ ᐊᖑᑎᓯᐅᑎᐅᓂᕋᕐᑕᐅᔪᖅ, […]
10/07/2022
ᐊᓪᓚᑕᖏᑦ ᓯᑏᕙᓐ ᕿᐊᓐᑐᕆᐅᑉ ᔭᓄᐊᕆᐅᑉ ᑕᕐᕿᖓᑕ ᐱᓇᓱᐊᕈᓯᖏᑕ ᑭᖑᓪᓕᐹᖓᓐᓂ, ᐃᓄᑐᐃᓐᓀᑦ ᐱᓇᓱᖃᑎᒌᑦᑐᑦ ᐊᒻᒪᓗ ᖃᐅᔨᓴᕐᑏᑦ ᐃᓚᐅᔭᕐᑐᓯᒪᓚᐅᔪᕗᑦ ᖃᕆᑕᐅᔭᑎᒍᑦ ᑲᑎᖕᖓᓂᕐᓄᑦ ᐊᑑᑎᔭᐅᓚᐅᔪᔪᓄᑦ ᔨᓐᓃᕙ, ᓱᒋᑦᓱᓚᓐ ᓄᓇᖓᓂ, ᕿᒥᕐᕈᓂᐅᑦᓱᓂ ᓱᔪᑲᓪᓚᖃᔭᖕᖏᑐᓂᒃ ᐅᐊᕈᑎᒌᓕᐊᖑᓯᒪᔪᓂᒃ ᐃᓄᓐᓄᑦ ᓱᒃᑯᓇᕐᑐᓱᑎᒃ. ᐃᓕᑕᕆᔭᐅᓂᖃᓱᓂ ᑖᓐᓇ ᓱᔪᖃᕐᓂᖅ […]
04/26/2021
ᐊᒃᓚᑕᖏᑦ ᓯᑏᕙᓐ ᕿᐊᓐᑐᕆ ᓯᑕᒪᖓᓐᓂᐅᑎᓪᓗᒍ ᑏᓯᒻᐱᕆ 10, 2020ᒥ, ᒪᑭᕝᕕᒃ ᐃᓚᐅᕕᖃᕐᓯᒪᔪᖅ ᓄᓇᖃᕐᖄᓯᒪᔪᑦ ᑕᕐᕋᒥᐅᓪᓗ ᑲᒪᒋᔭᐅᒍᑎᖏᑦ ᐅᖄᔭᐅᑎᓪᓗᒋᑦ (INAN) ᐅᖃᕐᕕᒪᕆᒻᒥ ᑲᑎᖕᖓᔩᑦ ᑲᑎᖕᖓᓂᖓᓐᓄᑦ ᐅᖄᔭᐅᑎᓪᓗᒍ ᓂᕿᑦᓴᖃᑦᓯᐊᕆᐊᖃᕐᓂᖅ ᑕᕐᕋᒥ. ᑲᑎᖕᖓᔩᑦ ᖃᐅᔨᒐᓱᐊᕐᑐᑦ ᖃᓄᖅ ᐱᕙᓪᓕᑎᑦᓯᒍᓐᓇᕋᔭᕐᒪᖔᕐᒥᒃ ᓂᕿᑦᓴᖃᑦᓯᐊᕆᐊᖃᕐᓂᒥᒃ ᑕᕐᕋᒦᑦᑐᓂᒃ […]