Winter

ᐊᓪᓚᑕᖏᑦ ᓯᑏᕙᓐ ᕿᐊᓐᑐᕆ

ᐅᓪᓗᖅ ᑏᓯᒻᐱᕆ 2020 ᓇᓪᓕᐅᑎᓚᐅᔪᕗᖅ ᐃᓱᓕᕝᕕᐅᓯᑦᓱᓂ ᐊᕐᕌᒍᒐᓵᓗᓐᓂ ᐱᓇᓱᒐᖃᕐᕕᒋᓯᒪᓕᕐᑕᖏᓐᓂ ᒥᐊᔨ ᖃᓴᓪᓗᐊᖅ ᐃᓄᑉᐸᐅᑉ ᐱᓇᓱᑦᑎᐅᓱᓂ ᒪᑭᕝᕕᒧᑦ ᑮᓇᐅᑦᔭᓵᑦ ᑖᒃᓯᓕᕆᔭᐅᒍᑎᖏᓐᓂᒃ ᐱᓇᓱᒍᑎᓂᒃ. ᒥᐊᔨ ᐱᓇᓱᐊᓚᐅᕐᑐᖅ ᐊᕐᕌᒍᓂ 26-ᓂ, ᐱᒋᐅᕐᓴᔭᐅᒋᐊᖕᖓᓯᓚᐅᕐᓯᒪᑎᓪᓗᒍ ᐊᕐᕌᒍᑦ 30 ᐊᓂᒍᓕᕐᑎᓗᒋᑦ. ᐋᓐᔨᐊᓗ ᒪᓂᐊᑕ, ᐱᓇᓱᒐᕐᒥᓂ ᐊᖓᔪᕐᖃᕆᖃᑦᑕᓯᒪᔭᖓ, ᑕᒐᑕᒐᓗ ᒪᑭᕝᕕᐅᑉ ᑮᓇᐅᔭᓕᕆᓂᕐᓄᑦ ᐱᑦᔪᔨᕕᖓᓂ ᑐᑭᒧᐊᑦᑎᓯᔨᒋᔭᐅᔪᖅ, ᐅᖃᐅᓯᖃᓚᐅᔪᕗᖅ ᒥᐊᔨᒥᒃ ”ᐱᓇᓱᑦᓯᑎᒻᒪᕆᐅᓂᕃᑦᓱᓂ ᐱᓇᓱᒋᐊᕐᑐᖏᓐᓇᓱᖑᓂᕋᕐᓱᒍᓗ. ᒥᐊᔨ ᐱᓇᓱ-ᐊᖃᑦᑕᓚᐅᔪᕗᖅ ᐱᒻᒪᕆᐊᓗᓐᓂᒃ ᐱᓇᓱᑦᑕᐅᔪᑦᓴᓂ.”

ᐃᓄᐃᑦ ᑮᓇᐅᑦᔭᓵᖏᑕ ᑖᒃᓯᓕᕆᔭᐅᒍᑎᖏᓐᓂᒃ ᐱᓇᓱᒍᑏᑦ ᓴᕐᕿᕆᐊᖕᖓᓯᓚᐅᕐᓯᒪᕗᑦ ᐆᑦᑐᕋᐅᑎᐅᓯᑦᓱᑎᒃ 1993-ᖑᑎᓪᓗᒍ ᑲᖏᕐᓱᐊᓗᒃᔪᐊᒥ. ᒥᐊᔨ ᐃᓚᐅᓯᑦᓴᐅᑎᒋᓯᒪᔪᖅ ᐱᕙᓪᓕᐊᒋᐊᖕᖓᓯᑎᓪᓗᒍ ᑲᔪᓯᓚᐅᔪᕗᕐᓗ ᑲᒪᒋᔭᖃᕐᑎᖑᕐᓱᓂ ᑮᓇᐅᑦᔭᓵᑦ ᑖᒃᓯᓕᕆᔭᐅᒍᑎᖏᓐᓂᒃ ᐃᓄᑐᐃᓐᓀᑦ ᑕᐅᓴᓐᑎᓃᑦᑐᑦ ᓄᓇᕕᒻᒥᐅᑦ ᐱᓇᓱᑦᑕᐅᒍᑎᒋᒋᐊᓕᖏᓐᓂᒃ. ᑖᒃᑯᐊ ᓴᕐᕿᑎᑦᓯᓚᐅᔪᔪᑦ 20-25 ᒥᑦᓯᑎᓐᓃᑐᓂᒃ ᐃᓱᓕᑦᑕᑐᓂᒃ ᐱᓇᓱᒐᕐᓂᒃ ᐊᕐᕌᒍᑕᒫᑦ ᐱᓇᓱᑦᑕᐅᖃᑦᑕᓕᓚᐅᔪᔪᓂᒃ ᐊᕐᕌᒍᑦ ᐊᕙᑎᑦ ᐅᖓᑖᓂ. ᐅᖄᓚᕕᐅᑦᓱᓂ ᐊᓂᕐᕋᒥᓂ ᐃᓄᑦᔪᐊᒥ, ᖁᕕᐊᓱᐊᓂᖃᓕᕐᑎᓗᒍ ᐱᓇᓱᒐᖃᕐᑎᐅᓂᕐᒥᒃ ᕿᑲᓕᕐᓂᒥᒃ, ᒥᐊᔨ ᐅᖃᓚᐅᔪᕗᖅ ᐊᕐᕌᒍᒐᓵᓗᓐᓂ ᐱᓇᓱᖃᑦᑕᓯᒪᓂᕐᒥᓂᒃ ᑲᒪᒋᔭᖃᕐᓱᓂ ᑮᓇᐅᑦᔭᓵᓕᑦ ᑖᒃᓯᓕᕆᔭᐅᒍᑎᖏᓐᓂᒃ.

“ᓯᕗᓪᓕᐹᒥ ᐱᒋᐅᕐᓴᔭᐅᒋᐊᖕᖓᓯᑦᓱᖓ 1991-ᒍᑎᓪᓗᒍ, ᐊᑐᓚᐅᕐᓯᒪᕗᒍᑦ ᓯᑯᑦᓴᔭᓂᒃ. ᖃᕆᑕᐅᔭᓂᒃ ᓱᓕ ᐊᑐᕐᓯᒪᖕᖏᑐᒍᑦ,” ᐅᖃᕐᑐᖅ ᒥᐊᔨ. ”1993-ᒥ ᑖᒃᓯᓕᕆᔩᑦ ᑎᑭᓚᐅᕐᓯᒪᔪᑦ ᒪᑭᕝᕕᒥᑦ ᐱᑦᓱᑎᒃ ᐃᓄᑦᔪᐊᒥᐅᑦ ᑖᒃᓯᔭᕐᑕᐅᒍᑎᖏᓐᓂᒃ ᐱᓇᓱᒋᐊᕐᑐᓱᑎᒃ, ᐃᑲᔪᓚᐅᕐᓯᒪᒻᒥᔭᒃᑲ. 1994-ᖑᑎᓪᓗᒍ ᓄᓇᕕᒻᒥᐅᑦ ᐱᒋᐅᕐᓴᑎᑕᐅᓚᖓᓚᐅᕐᓯᒪᒻᒥᔪᑦ ᐱᒋᐅᕐᓴᑎᑕᐅᒍᒪᓂᖏᑦ ᑖᒃᓯᓕᕆᐅᑎᓂᒃ ᓄᓇᓕᒻᒥᓂ. ᐃᓚᐅᒍᒪᑦᓱᖓ ᐊᓪᓚᓯᒪᔪᖕᖑᐃᓚᐅᔪᔪᖓ. ᑕᕐᕿᓕᒫᒥ ᐱᒋᐅᕐᓴᔭᐅᓕᓚᐅᕐᓯᒪᔪᒍᑦ ᑰᒃᔪᐊᒥ.”

ᒥᐊᔨ ᐱᓇᓱᒋᐊᖕᖓᓯᓚᐅᕐᓯᒪᕗᖅ ᐃᓱᓕᑦᑕᑐᒥᒃ ᐱᓇᓱᖃᑦᑕᓯᑦᓱᓂ ᐊᕐᕌᒍᓂ ᐱᖓᓲᔪᕐᑐᓂ ᑖᒃᑯᓇᓂ ᐱᓇᓱᑦᑕᐅᔪᓂ ᐊᒻᒪᓗ ᐃᓱᓕᑦᑕᖏᑦᑐᒥᒃ ᐱᓇᓱᓯᓚᐅᔪᕗᖅ 2000-ᒥ ᒪᑭᕝᕕᒧᑦ ᑖᒃᓯᓕᕆᐅᑎᓂᒃ ᐊᑕᐅᑦᓯᑯᕐᑎᓯᔨᑖᖑᑦᓱᓂ. ᐅᖃᕐᑐᖅ, “ᐃᓄᓐᓂᒃ ᐃᑲᔪᕈᒪᓚᐅᕐᓯᒪᒐᒪ ᐊᓪᓚᓯᒪᔪᖕᖑᐃᒍᑎᖃᓕᕐᑎᓗᒋᑦ ᑖᒃᓯᓕᕆᔭᐅᒍᑎᒥᓐᓂᒃ ᐊᓪᓚᓯᒪᔪᖕᖑᐃᒍᑎᖃᖕᖏᑐᐊᕈᑎᒃ ᑖᒃᓯᓕᕆᔭᐅᒍᑎᒥᓐᓂᒃ ᑮᓇᐅᔭᓂᒃ ᐱᕐᖃᔭᕋᔭᖕᖏᒪᑕ ᑲᕙᒪᒃᑯᓂᑦ, ᓲᕐᓗ ᕿᑐᕐᖓᒥᓄᑦ ᑖᒃᓯᑎᒍᑦ ᐱᕙᓪᓕᖁᑎᑕᕐᑕᐅᑎᓂᒃ ᑌᒣᒻᒪᑦ ᐃᑲᔪᕋᓱᑦᓯᒪᔭᒃᑲ.”

ᒪᑭᕝᕕᒃ ᓄᓇᓕᓕᒫᓂ ᑖᒃᓯᓕᕆᐅᑎᓕᕆᔨᓂᒃ ᐱᓇᓱᑦᑎᖃᓕᓚᐅᕐᓯᒪᔪᖅ ᑖᒃᑯᓂᖓ ᐱᓇᓱᒍᑎᓂᒃ ᐱᓇᓱᑦᑐᓂᒃ. ᒥᐊᔨ ᑎᑭᑎᑦᓯᕕᐅᖃᑦᑕᓯᒪᔪᖅ ᑖᒃᓯᓕᕆᔭᐅᒍᑎᓄᑦ ᓇᑭᓕᒫᖅ ᓄᓇᕕᒻᒥ ᑎᑭᑕᐅᕙᑦᓱᓂ, ᕿᒥᕐᕈᓱᓂᒋᑦ ᑕᒻᒪᓯᒪᔪᐃᔭᕐᓱᒋᓪᓗ ᐱᖃᑦᑕᓚᐅᔪᔭᖏᑦ. “ᐊᓪᓚᑕᕐᕕᑎᒍᑦ ᐊᐅᓪᓚᑎᑦᓯᒋᐊᖃᖃᑦᑕᓚᐅᔪᔪᖓ ᓯᑯᑦᓴᔭᖁᑎᓕᒫᓂᒃ ᑐᕌᕐᑎᓗᒋᑦ ᑯᐯᒃ ᑲᕙᒪᒃᑯᑦ ᑮᓇᐅᔭᓕᕆᕕᖓᓄᑦ ᐊᒻᒪᓗ ᑲᕙᒪᑐᖃᒃᑯᑦ ᑮᓇᐅᔭᓕᕆᕕᖓᓐᓄᑦ.” ᒥᐊᔨ ᐅᖃᕐᑐᖅ ᐱᔭᕆᐊᑭᓕᓂᕐᓴᐅᓕᓚᐅᕐᓯᒪᒋᐊᖏᑦ ᖃᕆᑕᐅᔭᑎᒍᑦ eFile-ᓂᑦ ᑖᒃᓯᓕᕆᐅᑎᑖᕐᓯᒪᓕᑐᐊᕐᒪᑦ, ᑖᒃᓯᔭᕐᑕᐅᒍᑏᑦ ᖃᕆᑕᐅᔭᑎᒍᑦ ᐊᐅᓪᓚᑎᖃᑦᑕᓕᕐᓱᒋᑦ. ”ᐃᑲᔪᕐᑕᐅᕙᕐᔪᐊᓯᒪᔪᖓ ᓲᖕ-ᔪᐃ ᔮᖕᒧᑦ ᐱᓇᓱᑦᑎᒋᓚᐅᔪᔭᖓᓄᑦ ᒪᑭᕝᕕᐅᑉ ᑌᑦᓱᒪᓂ ᖃᕆᑕᐅᔭᑎᒍᑦ eFile-ᒥᒃ ᐊᑐᖃᑦᑕᓕᕐᓱᑕ.”

ᑕᒐᑕᒐ ᖃᓂᒪᓐᓇᔪᐊᖅ ᐃᕐᐸᓯᒪᑎᓪᓗᒍ, ᐅᒃᑯᐊᓯᒪᔪᑦ ᐱᓇᓱᐊᕈᓰᓐᓂ ᒪᕐᕉᓂ, ᐅᒃᑯᐃᓕᕐᒥᒍᑎᒃ, ᐃᑎᕐᑕᐅᒍᓐᓇᓚᐅᔪᖕᖏᑐᑦ ᐃᓄᓐᓄᑦ ᐃᓄᑦᔪᐊᒥ ᐊᓪᓚᕕᒻᒥᓂ. ᒥᐊᔨ ᐱᓇᓱᒐᕐᒥᓄᑦ ᓄᕐᖃᔪᐃᑦᑐᖃᑦᓚᓚᐅᔪᔪ, ᐱᓇᓱᐊᕈᓯᐅᑉ ᓄᖕᖑᐊᓂᒐᓴᒃ, ᐅᓪᓗᓂ ᑕᒃᓯᓕᕆᐅᑏᑦ ᐱᔭᕇᕐᑕᐅᒪᕕᒋᒋᐊᓕᖏᓐᓂ ᐁᕆᓕᐅᑉ ᑕᕐᕿᖓ ᐱᒋᐊᕐᖃᒥᐅᑎᓪᓗᒍ. ᐅᖃᕐᑐᖅ ᐱᓇᓱᒻᒪᕆᒋᐊᖃᕐᓃᑦ ᐅᓪᓗᖏᑕ ᐊᓯᖏᓐᓂ ᐃᖃᓘᔭᕆᐊᖃᑦᑕᓚᐅᔪᒻᒥᔪᖅ ᐱᓇᓱᐊᕈᓯᐅᑉ ᓄᖕᖑᐊᓂ. ᒥᐊᔨ ᐅᖃᖕᖑᐊᓚᐅᔪᒻᒥᔪᖅ ᐃᓄᓐᓄᑦ ᓱᓕ ᐊᐱᕐᓱᑕᐅᓱᖑᖏᓐᓇᕆᐊᒥᒃ ᐱᑦᔪᑎᓕᓐᓄᑦ ᑖᒃᓯᓕᕆᔭᐅᓂᕐᒥᒃ, ᑭᓯᐊᓂ ᐅᖃᓚᐅᔪᔪᖅ ᐱᓇᓱᒐᖃᕐᑎᐅᒍᓐᓀᓯᒪᓕᕆᐊᒥᒃ, ”ᐱᓇᓱᒐᑦᓴᖃᕈᓐᓀᖁᖓᓕ!” ᐋᓐᔨᐊᓗ ᒪᓂᐊᑕᒧᑦ ᐅᖄᓚᕕᐅᓚᐅᔪᒻᒥᔪᖅ ᑏᓯᒻᐱᕆᐅᑎᓪᓗᒍ, ᐱᓇᓱᒐᖃᕐᓂᒥᒃ ᓄᕐᖃᖏᓗᐊᕐᑎᓗᒍ, ᓇᑯᕐᒦᑕᐅᑦᓱᓂ ᐊᕐᕌᒍᓂ ᐅᓄᕐᑐᓂ ᑐᓂᓯᒪᑦᓯᐊᖃᑦᑕᓚᐅᔪᓂᖓᓄᑦ ᑭᒃᒐᑐᕐᓱᓂ ᐃᓄᑐᐃᓐᓇᓂᒃ.

“ᒥᐊᔨ ᐱᓯᑎᒻᒪᕆᐅᑦᓱᓂ ᐊᕐᓇᐅᕗᖅ ᐱᔪᓐᓇᓂᖃᑦᓯᐊᓂᖓ ᓇᓗᓀᕐᑕᐅᓗᑐᓚᐅᕐᓯᒪᓇᓂ.”