ᒣ 2019-ᖑᑎᓪᓗᒍ, ᐊᓪᓚᓯᒪᔪᑎᒍᑦ ᑐᑭᓯᒪᖃᑎᒌᒍᑎᐅᑦᓱᑎᒃ ᐱᔭᖃᕋᓱᒍ-ᒪᒍᑎᓂᒃ ᐊᑑᑎᓚᐅᔪᑎᓪᓗᒋᓂᑦ ᓇᔪᒻᒥᕕᒃ ᓄᓇᒥᒃ ᑎᒍᒥᐊᕐᑎᑯᓪᓗ ᑰᒃᔪᐊᒥᐅᑦ ᓄᓇᒥᒃ ᑎᒍᒥᐊᕐᑎᖏᑦ, ᒪᑭᕝᕕᓗ, ᐊᒻᒪᓗ ᐅᔭᕋᓐᓂᐊᑏᑦ ᐱᓇᓱᒐᖃᕐᕕᖁᑎᖓᑦ Commerce Resources-ᒥᒃ ᐊᑦᓯᕋᐅᑎᓕᒃ ᖃᓪᓗᓈᕐᑎᑐᑦ, ᐃᓄᑐᐃᓐᓀᑦ ᐃᓂᓪᓓᒍᑎᖃᓕᓚᐅᔪᕗᑦ ᐱᓇᓱᖃᑎᒌᑦᑐᓴᓂᒃ ᐸᕐᓇᓛᕐᑐᓂᒃ ᐱᓇᓱᒍᑎᑦᓴᓂᒃ ᓯᕗᓂᖃᕈᑎᒋᑦᓱᒋᑦ ᑲᒪᓇᓱᓐᓂᓴᒥᒃ ᐱᕙᓪᓕᐊᑎᑕᐅᒍᑎᖏᓐᓂᒃ Ashram/ᐋᔅᕌᒻᑯᑦ ᓄᓇᒥᑦ ᑭᑭᐊᑦᓴᔭᓂᒃ ᐃᑯᒪᐅᑎᒨᕐᑐᓕᐅᕐᑐᓄᑦ ᐊᑐᕐᑕᐅᓲᓂᒃ ᐱᓇᓱᓕᕋᔭᕐᓂᒥᒃ 180 ᑭᓚᒦᑕᓂᒃ ᐅᖓᓯᓐᓂᓕᒻᒥ ᑰᒃᔪᐊᑉ ᓯᕿᓂᐊᑕ ᓯᕿᓂᐅᑉ ᓂᐱᕝᕕᐊᓂᐅᓂᕐᓴᖅ. ᑖᒃᑯᐊ ᐱᓇᓱᖃᑎᒌᒍᑎᖃᓚᖓᔪᑦ ᑎᓕᔭᐅ-ᒪᒍᑎᖃᕐᑐᑦ ᐅᓄᕐᓯᒋᐊᕆᒐᔭᕐᓂᒥᒃ ᓄᓇᓖᑦ-ᐊᑐᐃᓐᓇᐅᒪᒍᑎᖏᓐᓂᒃ, ᐃᓂᓪᓓᒋᐊᖃᕐᓱᑎᒃᓗ ᓄᓇᓕᐅᑉ ᓯᕗᓪᓕᐅᔨᒍᒪᔭᖏᓐᓂᒃ ᓂᕆᐅᒋᒋᐊᓕᒻᒥᓂᓪᓗ ᐃᓕᖓᔪᓂᒃ ᐅᔭᕋᓐᓂᐊᕋᑦᓴᔭᓂᒃ ᒪᓂᔨᒍᑎᐅᓯᒪᔪᓂᒃ, ᐊᑐᐃᓐᓇᕈᕐᑎᒥᓗᑎᒃ ᐊᖏᖃᑎᒌᒐᓱᓂᐅᒋᐊᖃᓯᓛᕐᑐᓂᒃ ᓱᕐᕋᑕᐅᓂᕐᓄᓗ ᐱᕙᓪᓕᖁᑎᑖᕐᑕᐅᑎᑦᓴᓂᓪᓗ ᐊᖏᖃᑎᒌᒍᑎᓄᑦ.
ᐱᓇᓱᖃᑎᒌᑦᑐᑦ ᐱᓇᓱᑦᑕᒥᓂᒃ ᐱᕙᓪᓕᐊᓯᓚᐅᔪᕗᑦ 2020-2021 ᐊᕐᕌᒍᖓᓂ ᐅᔭᕋᓐᓂᐊᓂᖅ ᐊᑑᑎᕙᓪᓕᐊᓯᑎᓪᓗᒍ ᓯᕗᓂᖓᒍᑦ-ᑲᔪᓯᓂᖃᕐᓂᐊᒪᖔᑦ ᑲᒪᒋᔭᐅᓂᖃᖏᓐᓇᑎᓪᓗᒍ ᐊᒻᒪᓗ ᓄᓇᐅᑉ ᐊᕙᑎᖓᓂᓪᓗ ᐃᓄᐃᓪᓗ ᐃᓅᑦᔪᓯᖏᓐᓂᒃ ᓱᕐᕃᓂᐅᒐᔭᕐᑐᓂᒃ ᖃᐅᔨᓴᕐᓂᒥᒃ ᐱᓇᓱᑦᑎᓗᒋᑦ. ᐱᓇᓱᖃᑎᒌᑦᑐᑦ ᓄᐊᑦᓯᓚᐅᔪᔪᑦ ᐃᓘᓐᓇᖏᓐᓂᒃ ᐊᑐᐃᓐᓇᐅᓱᑎᒃ ᑐᑭᓯᒪᒍᑎᑦᓴᓂᒃ (ᓄᓇᐅᑉ ᐊᑐᕐᑕᐅᓂᑦᓴᖓᓂᒃ ᖃᐅᔨᓴᕈᑎᐅᓯᒪᔪᓂᒃ, ᐃᓄᓕᒫᓂᒃ ᑐᑭᓯᓂᐊᕐᕕᖃᕈᑎᕕᓃᑦ ᑐᓴᕐᑕᐅᒍᑎᕕᓂᖏᓐᓂᒃ, ᓄᓇᓕᓕᒫᑦ ᐸᕐᓇᑕᐅᓯᒪᒍᑎᖏᓐᓂᒃ, ᓯᓚᓪᓕᓂᑦ ᐃᑲᔪᕐᑕᐅᒍᑎᐅᓯᒪᔪᓂᒃ, ᐊᓯᖏᓐᓂᓗ) ᐸᕐᓇᕈᑎᐅᓚᕐᓱᑎᒃ ᓈᒻᒪᓈᕐᑎᓯᒪᑦᓯᐊᑐᓂᒃ ᑐᑭᓯᒪᒍᑎᑦᓴᓂᒃ ᒪᓂᔨᓯᒪᒍᑎᐅᔪᑦ ᐅᔭᕋᓐᓂᐊᓂᐅᑉ ᖃᓄᐃᓕᖓᓂᑦᓴᖓᓂᒃ ᐊᒻᒪᓗ ᐃᓱᐊᖁᑎᑕᕐᑕᐅᒍᑎᑦᓴᖏᓐᓂᒃ ᓲᓱᒋᔭᖃᓛᕐᑐᓂᒃ ᑲᒪᒋᔭᖃᕐᓗᑎᒃᓗ ᓄᓇᓖᑦ ᒪᑭᑕᒐᓱᒍᑎᑦᓴᖏᓐᓂᓗ ᐃᓅᑦᔪᓯᐅᔪᓪᓗ ᐱᕙᓪᓕᐊᒍᑎᖏᓐᓂᒃ.
ᑐᑭᓯᒪᑦᓯᐊᒋᐊᓪᓚᒍᒪᒧᑦ ᖃᓄᖅ ᐱᕙᓪᓕᐊᑎᑕᐅᓂᖃᓱᖑᒻᒪᖔᑕ ᑭᑭᐊᑦᓴᔭ-ᐅᑦᓱᑎᒃ ᐃᑯᒪᐅᒻᒨᑐᑦᓴᓕᐊᖑᓲᑦ ᐱᔭᐅᓂᖃᓱᖑᒻᒪᑕ, ᐱᓇᓱᖃᑎᒌᑦᑐᑦ ᓵᑲᑑᓐᒧᓪᓗ ᔨᐊᓗᓀᕝᒧᓪᓗ ᐊᐅᓪᓚᓚᐅᔪᔪᑦ ᓯᑉᑎᒻᐱᕆ 19-ᒥᑦ ᑎᑭᑦᓱᒍ 24 ᑲᑎᖕᖓᓯᒋᐊᕐᑐᓱᑎᒃ ᐊᑦᔨᒌᑦᑎᖏᑦᑐᓂᒃ ᐅᓇᒻᒥᓱᐊᖃᑎᒌᑦᑐᓂᒃ ᐃᓚᐅᕕᖃᕐᓱᑎᒃ Nechalacho Project/ᓈᑦᓴᓛᑦᓱ ᐅᔭᕋᓐᓂᐊᕕᒻᒥᒃ, ᓲᕐᓗ ᐅᖃᕐᑕᐅᓯᒪᒻᒪᑦ “ᑲᓇᑕᒥ ᓯᕗᓪᓕᐹᖑᑦᓱᓂ ᑭᑭᐊᑦᓴᔭᓂᒃ ᐃᑯᒪ-ᐅᒻᒧᑐᓕᐊᑦᓴᔭᓂᒃ ᐅᔭᕋᓐᓂᐊᕕᐅᑦᓱᓂ.” ᐱᓇᓱᖃᑎᒌᑦᑐᑦ ᑲᑎᓯᓚᐅᔪᔪᑦ Cheetah Resources-ᑯᓐᓂᒃ ᑖᒃᑯᐊ ᐅᔭᕋᓐᓂᐊᓂᕐᒥᒃ ᐱᕙᓪᓕᐊᑎᑦᓯᒍᑎᖃᕐᒪᑕ ᐊᒻᒪᓗ ᐊᓪᓓᑦ ᑏᓐᓃᑦ ᔨᐊᓗᓀᕝᒥᐅᑦ/Yellowknife Dene First Nation’s Det’on Cho ᐱᓇᓱᒐᖃᕐᕕᖓᓐᓂᒃ ᐱᓇᓱᖃᑎᖃᕐᓱᑎᒃ Det’on Cho-Nahanni ᓴᓇᔨᓂᒃ, ᑖᒃᑯᐊᖑᑦᓱᑎᒃ ᓯᕗᓪᓕᐸᐅᔪᑦ ᓄᓇᓕᑐᖃᐅᑦᓱᑎᒃ ᐱᓇᓱᒍᑦᔨᒍᑎᓖᑦ ᑲᓇᑕᒥ ᐅᔭᕋᓐᓂᐊᓂᕐᓂᒃ ᐱᓇᓱᒐᖁᑎᖃᕐᓱᑎᒃ ᓇᒻᒥᓂᖅ ᓄᓇᑐᖃᕐᒥᓂ.
ᑕᒪᑐᒥᖓ ᐅᔭᕋᓐᓂᐊᕈᓯᕐᒥᒃ ᖃᓄᐃᓘᕐᑕᐅᓱᖑᒻᒪᖔᑦ-ᑐᑭᓯᓂᐊᕐᓂᖅ ᐱᓇᓱᖃᑎᒌᒍᑎᓕᓐᓄᑦ ᐱᒍᓐᓇᕈᑎᐅᓚᐅᔪᕗᖅ ᑐᑭᓯᒪᓂᕐᒥᒃ ᖃᓄᖅ ᐃᓅᖃᑎᒌᒍᓯᖃᕐᒪᖔᑕ ᓄᓇᓕᑐᙯᓪᓗ ᐊᒻᒪᓗ ᐅᔭᕋᓐᓂᐊᓂᕐᒥᒃ ᐱᔭᖃᕋᓱᑦᑐᑦ, ᖃᓄᐃᑦᑐᓂᓪᓗ ᒪᓕᒐᖁᖃᕐᒪᒐᑕ ᐊᒻᒪᓗ ᐊᖏᕐᑕᐅᒍᑎᓂᒃ ᖃᓄᖅ ᐱᔭᖃᖃᑦᑕᒪᖔᑕ, ᖃᓄᑎᒋᓪᓗ ᐱᓇᓱᑦᑕᐅᓂᖃᓚᖓᒻᒪᖔᑦ, ᓱᕐᕃᒍᑎᒋᓂᐊᕐᑕᖏᓪᓗ ᐊᒻᒪᓗ ᒪᑭᑕᒐᓱᒍᑎᑎᒍᑦ ᐱᕙᓪᓕᖁᑎᖏᑦ ᖃᓄᐃᓕᖓᓚᖓᒻᒪᖔᑕ ᓄᓇᓕᓐᓄᑦ. ᑌᒪᓕ ᑖᓐᓇ ᓈᑦᓴᓛᑦᓱᒥ ᐱᓇᓱᑦᑕᐅᔪᖅ ᐃᓱᒪᒋᑦᓱᒍ ᖃᓄᕐᓗᓃᑦ ᐊᑦᔨᒐᓚᒋᔭᐅᓂᖃᖕᖏᑲᓗᐊᕐᑎᓗᒍ Ashram/ᐋᔅᕌᒻ ᐱᓇᓱᑦᑕᖏᓐᓄᑦ ᐱᑦᔪᑎᐅᑎᓪᓗᒍ ᐊᖏᓂᖓ, ᖃᓄᐃᑦᑑᓂᖓ ᐊᒻᒪᓗ ᓄᓇᓕᕐᓚᖓᑕ ᒪᓕᒐᖃᕐᑎᓯᒍᑎᖏᑦ, ᑌᒣᒃᑲᓗᐊᕐᑎᓗᒋᑦ ᐱᓇᓱᖃᑎᒌᑦᑐᑦ ᐃᓱᒪᒐᓱᒍᑎᑦᓴᑕᑦᓯᐊᓚᐅᔪᕗᑦ ᐱᓇᓱᒍᑎᒋᒋᐊᖃᓪᓚᕆᓛᕐᑕᒥᓐᓂᒃ ᓇᒻᒥᓂᕐᒥᓂ Ashram/ᐋᔅᕌᒻ ᐱᓇᓱᑦᑕᖏᓐᓄᑦ ᐊᓪᓚᖁᑎᒥᓂᒃ.
