Winter

ᐊᓪᓚᑕᖏᑦ ᕕᕈᓂᒃ ᑐᑉᐳ, ᔮᓂ ᓇᓴᖅ ᐊᒻᒪᓗ ᓄᐊ ᐃᑦᑑᑉ

ᐃᖃᓗᓐᓂᒃ ᒪᓕᒍᑎᒥᒃ ᐃᓕᑦᔨᕕᐅᒪᔪᓂᒃ ᒪᓕᑦᑕᖃᕐᓂᖅ
ᐅᐱᕐᖓᕆᓚᐅᔪᔭᑦᑎᓂ, ᐊᐅᒡᒍᓯ 2021-ᒥ, ᓯᑕᒪᐅᔪᕐᑐᓂᒃ ᐃᖃᓗᓐᓂᒃ ᑕᓯᕐᔪᐊᕈᓯᕐᒧᑦ ᒪᔪᕐᑐᓂᒃ ᐃᓕᑦᔨᕕᖃᓚᐅᔪᕗᑦ ᒪᓕᒍᑎᑦᓴᔭᒥᒃ ᐃᒫᓂᑦᑐᒥᒃ ᓈᓚᐅᑎᒥᒃ ᐊᑐᕐᓱᑎᒃ. ᐆᒪᔪᓕᕆᔨᒃᑯᑦ ᑲᖏᕐᓱᒥ (ᐊᖑᕕᒐᐱᖓᑦ ᑲᖏᕐᓱᒥᐅᑦ) ᓯᕗᓕᓚᐅᔪᔪᖅ ᑖᒃᑯᓂᖓ ᐱᓇᓱᑦᑕᐅᔪᓂᒃ ᑐᑭᓯᒪᒐᓱᒍᑎᐅᓚᖓᑦᓱᑎᒃ ᐃᖃᓗᑉᐱᓂᒃ ᑕᓯᕐᔪᐊᕈᓯᕐᒥᓲᓂᒃ ᑖᒃᑯᐊ ᓇᓂ ᐅᑭᐅᕐᓯᐅᓱᖑᒻᒪᖔᑕ. ᐋᙯᓪᓛ, ᐊᒥᓱᑦ ᐃᖃᓗᑉᐲᑦ ᑕᒃᑯᖓ ᑕᓯᒻᒪᕆᒻᒧᓱᖑᒻᒪᑕ, 20 ᑭᓚᒦᑕᓂ ᐅᖓᓯᓐᓂᓕᒻᒧᑦ ᑲᖏᕐᓱᒥᑦ. ᑭᓯᐊᓂ ᑕᒪᓐᓇᐅᒐᓗᐊᕐᑎᓗᒍ, ᑲᖏᕐᓱᒥᐅᑦ ᑖᒃᑯᓂᖓ ᐃᖃᓗᑉᐱᓂᒃ ᑕᑯᓪᓗᐊᓱᖑᖕᖏᑐᑦ ᐅᑭᐅᖑᓕᑐᐊᕐᒪᑦ. ᐃᖃᓗᑉᐲᑦ ᐅᑎᕐᐸᑎᓪᓗᒋᑦ ᐅᐱᕐᖓᓴᑐᖃᐅᓕᕐᒪᑦ ᑭᓯᐊᓂ.

ᐃᒥᐊᕙᓗᓐᓂᒃ ᑐᓵᒍᑏᑦ ᐃᓕᐅᕐᖃᑕᐅᓚᐅᔪᕗᑦ ᑕᓯᕐᒧᑦ ᑐᓴᕈᑎᑦᓴᐅᒐᓱᓕᕐᓱᑎᒃ ᐃᖃᓗᓐᓂᒃ ᐃᓕᑦᔨᕕᐅᒪᔪᓂᑦ. ᓂᐱᓕᐅᕐᑕᐅᖃᑦᑕᑐᑦ ᐃᒥᐊᕙᓗᖏᑦ ᐃᖃᓗᓐᓄᑦ ᐃᓕᔭᐅᒪᔪᑦ ᑐᓵᒐᓱᒍᑏᑦ. ᐊᕐᕌᒍᓕᒫᒥ ᓂᐱᓕᐅᕈᑎᓂᒃ ᐃᓕᒪᑎᑦᓯᓚᐅᔪᔪᑦ, ᐃᓚᐅᒻᒥᑎᓪᓗᒋᑦ ᐅᑭᐅᒋᒃ 2021-2022. ᑌᒃᑯᐊ ᓂᐱᓕᐅᕈᑏᑦ ᓯᑉᑎᒻᐱᕆ 2022-ᖑᓕᕐᑎᓗᒍ ᑕᓯᕐᓂᑦ ᐊᒧᓚᐅᔪᔭᕗᑦ, ᓂᐱᓕᐊᕆᓯᒪᔭᖏᓐᓂᒃ ᖃᕆᑕᐅᔭᓅᔦᑦᓱᑕ ᐊᓱᐃᓛ ᑐᓵᒐᓱᕝᕕᒋᓯᑦᓱᒋᑦ.

ᐃᒻᒪᖄ ᐅᑭᐅᒥ ᓇᓂᑦᑐᕕᓃᑦ ᐃᖃᓗᑉᐲᑦ?
ᓯᑕᒪᐅᔪᕐᑐᓂᑦ ᐃᖃᓗᓐᓂᒃ ᒪᓕᒍᑎᑕᑦᓯᔭᐅᒪᔪᓂᑦ, ᐊᑕᐅᓯᖅ ᐃᖃᓗᑦᑕᐅᓴᐅᑎᒋᓚᐅᔪᔪᖅ, ᑕᓯᕐᒨᕈᓐᓇᓯᓚᐅᔪᖕᖏᑐᕐᓗᓃᑦ. ᓯᑕᒪᐅᔪᖕᖏᒐᕐᑐᑦ ᐃᖃᓗᐃᑦ ᐊᑕᐅᓯᐊᕐᑕᐅᓱᑎᒃ ᑕᓯᕐᔪᐊᕈᓯᕐᒦᑐᐃᓐᓇᐅᑎᓪᓗᒋᑦ ᑐᓴᕐᓴᐅᓚᐅᔪᔪᑦ. ᐅᑭᐅᓕᒫᒥ ᑕᓪᓕᒪᑦ ᑕᓯᕐᒦᓚᐅᔪᔪᑦ.

ᐃᖃᓗᐃᑦ ᓂᒪᓐᓂᓴᐅᓚᐅᔪᕗᑦ ᐅᑭᐅᕐᖃᒥᐅᑎᓪᓗᒍ, ᑏᓯᒻᐱᕆᐅᑉ ᑕᕐᕿᖓ ᕿᑎᕐᖃᕉᑎᓚᐅᕐᑎᓇᒍ ᐊᑐᓂᑦ ᐃᖃᓗᐃᑦ ᑐᓴᕐᑕᐅᖃᑦᑕᓱᑎᒃ ᑕᒃᑲᓂᑦᓭᓇᐅᖕᖏᑐᖅ ᑕᓯᕐᒥ ᐊᒥᓱᓄᑦ ᓂᐱᓕᐅᕈᑎᓄᑦ ᑐᓴᕐᑕᐅᖃᑦᑕᓱᑎᒃ. ᐅᑭᐅᑉ ᑕᕐᕿᖏᓐᓂ, ᐃᖃᓗᐃᑦ ᑕᓯᕐᔪᐊᕈᓯᕐᒥ ᓅᑲᑕᖃᑦᑕᓚᐅᔪᔪᑦ, ᓂᒪᓪᓗᐊᕋᑎᒃ. ᓂᒪᑦᑐᐹᓗᓯᓚᐅᔪᒻᒥᔪᑦ ᐅᐱᕐᖓᓴᑐᖃᐅᓕᕐᒪᑦ ᒣ ᑕᕐᕿᖓᑕ ᕿᑎᒐᓚᖓᓂ. ᒪᕐᕉᒃ ᐃᖃᓗᑉᐲᒃ 2022 ᐅᐱᕐᖔᖓᓂ ᓅᓚᐅᔪᖕᖏᑑᒃ ᑕᓯᕐᒦᖏᓐᓇᓚᐅᔪᑦᓱᑎᒃᓗ ᓯᑉᑎᒻᐱᕆᐅᓕᕐᑎᓗᒍ ᓂᐱᓕᐅᕈᑎᓂᒃ ᑕᓯᕐᒦᒍᓐᓀᑎᑦᓯᓯᒪᓕᕐᑎᓗᑕ. ᐊᓯᓕᒫᖏᑦ ᑕᓯᕐᒦᒍᓐᓀᓯᒪᓕᓚᐅᔪᔪᑦ ᔫᓂ 2022 ᑕᕐᕿᖓ ᕿᑎᕐᖃᕉᑎᓚᐅᕐᑎᓇᒍ.

ᖃᓄᐃᓗᓛᓕᕆᕙᑦ?
ᑌᒪᓕ ᓈᓚᒐᓱᒍᑏᑦ ᐊᕐᕌᒍᓕᒫᒥ ᑐᓴᕐᓴᐅᖏᓐᓇᓚᖓᒻᒪᑕ, ᓂᐱᓕᐅᕈ-ᑎᑕᖏᓐᓂᒃ ᐃᒫᓄᔦᒋᐊᓪᓚᓯᒪᓕᕐᖁᒍᑦ. ᑕᓪᓕᒪᑦ ᑕᓯᕐᔪᐊᕈᓯᕐᒧᑦ ᐃᓕᒋᐊᓪᓚᓚᐅᕐᑐᑦ, ᐱᖓᓱᒋᐊᓪᓚᓂᓪᓗ ᐅᖓᓪᓖᓄᑦ ᑕᓯᕐᓄᑦ ᐃᓕᔨᓛᕐᓱᑕ ᑕᓰᑦ ᓯᑯᓯᒪᓕᑐᐊᕐᐸᑕ. ᓂᐱᓕᐅᕈᑏᑦ ᐅᐱᕐᖓᓕᕐᒥᐸᑦ ᐊᒧᔭᐅᓛᕐᑎᓗᒋᑦ. ᑖᒃᑯᐊ ᓂᐱᓕᐅᕈᑎᑦ ᑕᑯᒍᓐᓇᕈᑎᐅᓛᕐᑐᑦ ᐃᒣᑦᑐᓂᒃ:

– ᐃᓕᑦᔨᕕᐅᒪᔪᑦ ᐃᖃᓗᑉᐲᑦ ᐅᑎᓛᕐᒥᒪᖔᑕ ᑕᓯᕐᔪᐊᕈᓯᕐᒧᑦ;
– ᑕᒃᑯᖓᑦᓭᓇᖅ ᑕᓯᕐᒧᑦ ᐅᑭᐅᕆᐊᑕᒫᑦ ᐅᑭᐅᕐᓯᐅᕆᐊᕐᑐᓱᖑᒻᒪᖔᑕ;
– ᐃᖃᓗᐃᑦ ᐃᓚᖏᑦ ᑕᓯᕐᓄᑦ ᐅᖓᓪᓕᓄᑦ ᐁᓱᖑᒻᒪᖔᑕ.

ᑖᓐᓇ ᖃᐅᔨᓴᕐᓂᖅ ᐱᒍᓐᓇᕈᑎᐅᕗᖅ ᐊᓪᓚᓯᒪᔪᖕᖑᐃᓂᑦᓴᒥᒃ ᐱᒻᒪᕆᐅᒍᑎᖏᓐᓂᒃ ᑕᓯᐅᓪᓗ ᑰᒃᓗ ᓄᓇᓕᓐᓄᑦ ᐆᒪᒐᓱᒍᑎᑦᓴᓂᒃ ᐃᖃᓗᓐᓂᐊᓂᒃᑯᑦ ᑕᒪᓐᓇᓗ ᐱᓪᓚᕆᐅᕗᖅ ᐱᑦᔪᑎᒋᑦᓱᒍ ᐅᔭᕋᓐᓂᐊᓂᕐᒥᒃ ᐅᓇᒻᒥᓱᐊᒍᑎᐅᓂᖓ ᑕᓯᕐᔪᐊᕈᓯᐅᑉ ᐊᕙᑖ.

ᑖᒃᑯᐊ ᐱᓇᓱᑦᑕᐅᔪᑦ ᓯᕗᓕᕐᑕᐅᕗᑦ ᐆᒪᔪᓕᕆᔨᒃᑯᓄᑦ ᑲᖏᕐᓱᒥ ᑮᓇᐅᔭᖃᕐᑎᓯᔨᖃᕐᓱᑎᒃ ᐱᓇᓱᒍᑎᓂᒃ ᐃᓄᐃᑦ ᖃᐅᔨᓴᕐᓂᒥᒃ ᐱᓕᕆᑦᔪᑎᒃᑯᓄᑦᓃ ᓴᐳᒻᒥᔭᐅᑦᓱᑎᒃ ArcticNet/ᐋᒃᑎᒃᓂᐊᑦᑯᓐᓄᓗ ᐃᓄᐃᑦ ᑕᐱᕇᑦ ᑲᓇᑕᒥᒃᑯᓄᓪᓗ. ᐊᐱᕆᒍᑎᑦᓴᖃᕈᕕᑦ ᑕᒪᑐᒧᖓ ᐱᓇᓱᑦᑕᐅᔪᒨᓕᖓᔪᓂᒃ ᖃᐅᔨᒋᐊᕆᑦ ᐅᑯᓈᖕᖓᑦ: anguvigak@kangirsuk.ca ᐅᕝᕙᓘᓐᓃᑦ Veronique.Dubos@inrs.ca.