ᐳᕋᓲ ᓯᑕᒪᐅᒍᑎᖓᓂᒃ ᐊᕐᕌᒍᒥ ᐃᓕᓴᓕᕐᑐᖅ ᑭᖑᓪᓕᐹᕆᓕᕐᑕᖓᓂᒃ ᐃᓕᓴᕐᓂᖓᑕ ᒪᑭᐊᓪ ᐃᓕᓐᓂᐊᕕᕐᔪᐊᒥ ᒪᓐᑐᕆᐊᒦᑦᑐᒥ, ᐃᓕᓭᔨᐅᒋᐅᕐᓴᓱᓂ ᐃᓕᓴᕆᐊᓕᓵᕐᑐᓂᒃ ᐳᒃᑭᓂᕐᓴᒥᓪᓗ ᐃᓕᓵᓂᒃ. ᑕᕐᕋᒥ ᐃᓕᓭᖃᑦᑕᓯᒪᔪᖅ ᐃᓇᖏᕐᑌᔨᐅᑦᓱᓂ ᐃᓕᓭᔨᓂᒃ ᒋᐊᖃᓕᑐᐊᕋᒥ ᐱᔭᕇᕐᓯᒪᓕᕐᓱᓂᓗ ᐃᓕᓭᒋᐅᕐᓴᕈᓐᓇᐅᑎᒥᒃ ᒪᓐᑐᕆᐊᒦᓪᓗᓂ. ᐊᓇᕐᕋᒥᓂᓪᓗ ᐱᔭᕇᓛᕈᒪᑦᓱᓂ ᐃᓕᓭᒋᐅᕐᓴᕈᓐᓇᐅᑎᒥᓂᒃ.
ᐳᕋᓲ ᑲᖏᕐᓱᐊᓗᑦᔪᐊᒥᐅᓄᑦ ᑫᓪᓚᑐᕐᑕᐅᖃᑦᑕᓯᒪᓂᕐᒥᓂᒃ ᐅᐱᒋᔭᖃᕐᐳᖅ ᐃᓕᓭᔨᐅᒍᒪᓚᕿᑦᓱᓂ ᐊᕙᑎᓕᕆᓂᕐᒥᒃ.
“ᐱᕈᕐᓴᕕᒋᓯᒪᔭᕋ ᓄᓇᒥ ᐃᓄᓐᓃᓱᖓᓗ; ᐅᓪᓗᒥ ᐃᓕᑕᕐᓇᐅᑎᒋᕙᕋ. ᐱᕈᕐᓴᓯᒪᔪᖓ ᓄᓇᓕᐊᓲᒍᑦᓱᑕ ᐊᓯᓃᑦᓱᑕ ᑌᒪᖕᖓᑦ ᐊᓪᓗᕆᐊᕐᓂᕆᓯᒪᕙᕋ ᓄᓇᒧᑦ ᐱᑐᑦᓯᒪᓂᖅ ᐱᐅᓯᑐᐃᓐᓇᕆᓯᒪᕙᕋ ᐅᓪᓗᒥᒧᑦ, ᑌᒣᒻᒥᒪᑕ ᐃᓄᐃᑦ ᓄᓇᕕᐅᑉ ᐊᕙᑎᑦᓯᐊᕌᐱᖓᓂ ᐱᕈᕐᓴᓯᒪᔪᑦ.” ᐅᐱᒍᓱᓐᓂᕋᕐᓂᒥᔪᖅ ᑫᓪᓚᑐᕐᑎᒋᓲᒥᓂᒃ ᐱᑦᓯᐊᖁᔨᓲᓂᒃ ᐃᓄᑦᓯᐊᒍᑐᐃᓐᓇᖁᔨᓲᓂᓪᓗ.
EECOMᑯᑦ ᐊᓪᓚᓯᒪᔭᖏᑦ ᐅᖃᐅᓯᕐᑕᖃᕐᐳᑦ ᐳᕋᓲᒥᒃ ᓱᓇᓱᐊᕐᓂᓕᒫᒥᒍᑦ ᐃᓕᕐᖁᓯᕐᒥᓂᒃ ᓄᐃᑕᑎᑦᓯᓕᒫᑐᐃᓐᓇᓲᒍᓂᕃᑦᓱᑎᒃ, ᐱᓗᐊᕐᑐᖅ ᐃᓕᓭᓕᑐᐊᕋᒥ. ᐃᓄᐃᑦ ᐅᓂᒃᑲᐅᓯᖏᑦ, ᑲᑕᑦᔭᓂᖅ, ᐊᑦᓴᑕᐅᑎᓕᔭᕐᓱᓂ ᑖᓂᓯᕐᓂᖅ, ᐃᓄᒻᒪᕆᓐᓂᒃ ᐅᓂᒃᑳᓯᐅᖃᑎᖃᕐᓂᖅ, ᐅᓂᒃᑲᑐᐊᕐᓂᖅ ᒪᙯᓐᓂᓂᒃ ᓂᑭᑦᓯᐊᖁᑎᒋᓂᕐᐹᒥᓂᓪᓗ, ᓄᓇᓕᐊᕐᓯᒪᑦᓱᓂᓗ ᐱᒋᐅᕐᓴᑎᑦᓯᒍᑎᐅᓲᑦ ᑕᒪᒃᑯᐊ ᐃᓕᓭᒍᑎᖏᑦᑕ ᐃᓚᒋᓲᕆᕓᑦ. ᐅᐱᒋᔭᖃᕋᒥ ᐅᒃᑯᐃᖔᕈᑎᖃᑦᓯᐊᓱᓂᓗ ᐃᓕᓵᒥᓄᑦ ᑌᒫᑦᓭᓇᖅ ᐱᐅᓯᖃᕐᕕᐅᓲᒍᕗᖅ. ᐃᓕᓐᓂᐊᑎᑦᓯᕕᒻᒥ ᐃᓕᓭᒍᓐᓀᑐᐊᕋᒥ, ᖃᕆᑕᐅᔭᒃᑯᑦ ᑐᓴᕋᑦᓴᖃᕐᕕᑎᒍᑦ ᐃᓕᓭᓲᖅ ᐃᓄᓐᓂᒃ ᐃᓄᐃᑦ ᐃᓕᕐᖁᓯᖏᓐᓂᒃ ᑲᓇᑕᒥᓪᓗ ᐊᑑᑎᔭᐅᕙᑦᑐᕕᓂᕐᓂᒃ, ᓚᔪᕐᑕᖃᓂᖁᑦ ᐊᓪᓚᑕᐅᓯᒪᔪᑦ.
ᐳᕋᓲ ᓂᕆᐅᖕᖏᓈᕐᖁᔭᐅᓚᐅᔪᕗᖅ ᐅᐱᒍᓲᒻᒥᓱᓂᓗ ᖃᕆᑕᐅᔭᒃᑯᑦ ᐊᓪᓚᕕᐅᒐᒥ ᓇᓪᓕᑳᕐᑕᐅᓯᒪᓂᕐᒥᓂᒃ ᐅᐱᒍᓲᓯᕐᑕᐅᒐᔭᕐᓱᓂ.
“ᐅᐱᒍᓱᑉᐳᖓ ᑖᑦᓱᒥᖓ ᐅᐱᒍᓲᓯᕐᑕᐅᒐᒪ, ᐃᓅᑦᓱᖓ ᐊᕐᓇᐅᓱᖓ ᐃᓕᓐᓂᐊᓂᕐᒥᒃ ᐊᓕᐊᒋᔭᖃᓪᓗᑐᕐᓱᖓ ᐃᓕᕐᖁᓯᕐᒥᓗ,” ᐅᖃᕐᑐᖅ ᐋᓐᑐᕆᐊ. “ᑖᓐᓇ ᐃᓕᑕᕆᔭᐅᒍᑎᑖᕋ ᐅᐱᒍᓱᒋᐊᓪᓚᕈᑎᒋᓚᖓᕙᕋ ᐃᓅᑦᓱᖓ ᐊᕐᓇᐅᓂᕋᓂᒃ, ᐃᓄᓐᓃᒋᐊᓪᓚᕈᒪᓚᕿᐅᑎᒋᑦᓱᒍᓗ ᐃᓕᑦᓯᕙᓪᓕᐊᖃᑎᒋᖃᑦᑕᓗᒋᑦ ᐊᕙᑎᑦᑎᓂᒃ.”
ᐳᕋᓲ ᑲᖏᕐᓱᐊᓗᑦᔪᐊᒧᑦ ᐅᑎᓛᕈᒪᔪᖅ ᐃᓕᓭᒋᐊᕐᑐᓗᓂ ᐳᒃᑭᓂᕐᓴᒥᒃ ᐃᓕᓵᓂᒃ ᐅᓪᓗᕆᐊᒥ ᐃᓕᓐᓂᐊᕕᒻᒥ.
“ᐃᓕᓭᔨᐅᑦᓱᖓ, ᐃᓱᒻᒪᓯᖃᕐᑐᖓ ᐃᓄᓐᓃᒍᒪᓂᕐᒥᒃ ᐊᕙᑎᑦᑎᓃᒍᒪᓂᕐᒥᓗ. ᑐᕌᒐᖃᕐᑐᖓ ᐃᓕᓵᒃᑲ ᐊᕙᑎᒥᓂᒃ ᓇᔪᒐᖃᑦᓯᐊᕈᒪᓚᕿᑎᓂᐊᕐᓗᒋᑦ. ᑐᑭᖃᕐᑐᖅ ᑕᒪᓐᓇ ᓄᓇᓕᐊᖃᑦᑕᓂᕐᒥᒃ ᐃᓄᓐᓃᖃᑦᑕᓂᕐᒥᓗ, ᐃᓄᒻᒪᕆᓐᓃᖃᑦᑕᓂᕐᒥᓗ,” ᐅᖃᕐᑐᕕᓂᖅ ᐋᓐᑐᕆᐊ. “ᐱᑖᕐᕕᓵᓗᐃᑦ ᐃᓕᑦᓯᕕᑦᓴᑕᓕᒻᒪᕇᑦ ᑕᒪᒃᑯᐊ. ᐅᕙᓐᓄᓕ, ᐃᓅᓐᓃᖃᑦᑕᓱᖓ ᐊᕙᑎᑦᑎᓃᖃᑦᑕᓱᖓᓗ ᐃᓕᑦᓯᕕᖃᓲᒍᕗᖓ ᐊᕙᑎᓕᕆᓂᕐᒥᒃ ᐃᓕᓭᒍᑎᑦᓴᓂᒃ.”
ᐊᕐᕌᒍᓂ ᓯᕗᓂᑦᑎᓂ, ᐳᕋᓲ ᐃᓕᓴᕐᓂᓕᕆᓂᕐᒥ ᐱᓇᓱᐊᕈᒪᒐᔭᕐᑐᖅ ᐊᐅᓚᑦᓯᓂᓕᕆᕕᖓᓂ ᐱᓇᓱᐊᕈᒪᒐᔭᕐᒥᓱᓂᓗ ᒪᑭᕝᕕᑯᓐᓂ.
“ᓄᓇᕕᒻᒥ ᐊᓯᑦᔨᕙᓪᓕᐊᓂᕐᒥᒃ ᑕᑯᒍᒪᕗᖓ, ᐃᓄᐃᑦ ᑭᒡᒐᑐᕐᑕᐅᓯᐊᕆᐊᖃᕐᒪᑕ ᐳᕐᑐᓂᕐᓴᓂ ᐱᓇᓱᒐᕐᓃᑐᓄᑦ. ᐃᓐᓄᐸᓪᓕᐊᒋᐊᖃᓕᕐᑕᕗᑦ ᐱᓇᓱᒐᑦᓭᑦ ᖃᐅᔨᒪᒐᑦᑕ ᓱᓀᑦ ᐱᐅᓂᕐᐸᐅᒪᖔᑕ ᐅᕙᑦᑎᓄᑦ ᐊᕙᑎᑦᑎᓄᓪᓗ.”
