ᓄᓇᕕᒻᒥ ᐱᓇᓱᒐᖃᕐᕖᑦ ᐱᓇᓱᑉᐳᑦ ᐱᑕᖃᕐᑎᓯᒍᑎᐅᓛᕐᑐᓂᒃ ᐃᓗᕐᖁᓯᕐᒧᑦ ᓇᒻᒪᓯᓕᑎᕐᓯᒪᓂᕐᓴᓂᒃ ᐅᕕᒃᑲᓂᒃ ᓴᐳᑦᔨᓂᕐᒧᑦ ᐱᑦᔪᔨᒍᑎᓂᒃ ᓄᓇᕕᒻᒥ ᑎᑭᐅᑎᕙᓪᓕᐊᓕᕐᐳᑦ ᓇᒻᒥᓂᖅ-ᑐᑭᑖᕆᖃᑦᑕᕈᓐᓇᓂᑦᓴᒥᓄᑦ ᐊᒻᒪᓗ ᐃᒻᒥᓂᕿᓂᕐᓴᐅᓗᑎᒃ ᐱᔪᓐᓇᓂᑦᓴᖓᓄᑦ ᓄᓇᕕᒻᒥ ᐃᓗᓯᓕᕆᓂᕐᓄᓗ ᐃᓄᓕᕆᓂᕐᓄᓗ ᐱᑦᔪᔨᕕᐅᑉ.
ᓄᓇᕕᒻᒥ ᐃᓚᒌᑦ ᐸᐸᑕᐅᕕᖓᑦ ᓴᕐᕿᑎᑕᐅᓂᖃᓚᐅᔪᕗᖅ 2017-ᒥ ᑌᑦᓱᒪᓂ ᓄᓇᕕᒻᒥ ᐃᓗᓯᓕᕆᓂᕐᓄᓗ ᐃᓄᓕᕆᓂᕐᓄᓗ ᐱᑦᔪᔨᕕᒃ ᐱᓇᓱᑦᑎᑕᓚᐅᕐᓯᒪᒻᒪᑦ ᓄᓇᕕᒻᒥ ᑲᑎᐅᑎᑎᑕᐅᓯᒪᒍᑎᖏᓐᓄᑦ ᐅᕕᒃᑫᓗ ᐃᓚᒌᑦᑐᓂᓪᓗ ᐱᑦᔪᔨᒍᑎᓄᑦ ᐊᔪᖀᒋᐊᕐᑎ ᒣᓇ ᐳᐆᓐ. ᓱᑫᑦᑯᑦ ᐱᓇᓱᖃᑎᒌᑦᑐᖁᑎᖏᑦ ᓄᐃᑕᐅᓕᓚᐅᔪᒻᒥᔪᑦ ᐱᓇᓱᒐᖃᕐᕖᑦ ᐅᓇᒻᒥᓱᐊᒍᑎᓖᑦ ᓯᕗᓕᕐᑎᖏᓐᓂᑦ ᐱᔪᓂᒃ, ᑭᒃᒐᑐᕐᓱᑎᒃ ᐃᓘᓐᓇᒐᓚᖏᓐᓂᒃ ᓄᓇᕕᐅᑉ 14-ᖑᑦᓱᑎᒃ ᓄᓇᓕᖏᓐᓂᒃ. ᐊᕐᕌᒎᓐᓂ ᒪᕐᕉᓂ ᑐᑭᓯᓂᐊᕐᓃᓗ, ᐅᖃᖃᑎᒌᓐᓂᖃᕐᓃᓗ ᐊᒻᒪᓗ ᐊᐱᕐᓱᓂᑲᑦᑕᓃᑦ ᐊᑑᑎᔭᐅᓂᖃᓚᐅᔪᕗᑦ ᐱᑦᔪᑎᐅᑎᓪᓗᒋᑦ ᑭᖕᖒᒪᑦᓯᒍᑎᐅᔪᑦ ᐅᕕᒃᑫᑦ ᐱᑦᔪᔭᐅᒍᑎᖏᓐᓄᑦ ᐊᒻᒪᓗ ᑖᒃᑯᐊ ᐱᑦᔪᔨᒍᑎᐅᔪᑦ ᖃᓄᐃᓘᕐᓗᒋᑦ ᐋᕐᕿᒋᐊᕋᔭᕐᒪᖔᑕ ᐃᓄᑐᐃᓐᓀᑦ ᐃᓗᕐᖁᓯᖓᑎᒎᕐᓂᓴᓕᐊᖑᓗᑎᒃ. ᓄᓇᕕᒻᒥ ᐃᓚᒌᑦ ᐸᐸᑕᐅᕕᖓᑦ ᓴᕐᕿᑎᑕᐅᓂᖃᓚᐅᔪᕗᖅ 2019-ᖑᑎᓪᓗᒍ ᓄᐃᑕ-ᐅᒍᑎᖃᕐᓱᓂ ᐅᖃᖃᑎᒌᒍᑎᐅᓯᒪᔪᓂᒃ ᑌᒪᖕᖓᓂᓪᓗ ᐱᔭᖃᕐᐸᓕ ᐊᓂᖃᑐᐃᓐᓇᖁᖅ, ᐊᖏᕐᑕᐅᒍᑎᑖᕐᓱᑎᒃᓗ ᓇᒻᒥᓂᖅ ᑲᑎᖕᖓᔨᖁ ᑎᖃᕋᔭᕐᓂᒥᓄᑦ, ᑖᒃᑯᐊ ᓴᕐᕿᑎᑕᐅᓂᖃᓛᓕᕐᑐᑦ ᐅᑭᐊᖑᓚᖓᔪᒥ.
ᓄᓇᕕᒻᒥ ᐅᕕᒃᑲᓂᒃ ᐱᑦᔪᔨᒍᑏᑦ ᖁᕕᐊᒋᔭᐅᖕᖏᑐᒻᒪᕆᐅᕙᑉᐳᑦ ᐱᑕᖃᖕᖏᓗᐊᕐᒪᑕ ᕿᑐᕐᖓᐅᔪᓄᑦ ᐊᓂᕐᕋᕆᔭᐅᑫᓐᓇᕋᔭᕐᑐᑦ ᐱᓇᓱᑦᑎᖃᖕᖏᓗ-ᐊᕐᓱᑎᒃᓗ ᑲᒪᒋᔭᖃᕋᔭᕐᑐᓂᒃ. ᐊᒥᓲᓗᐊᕐᑐᑦ ᐃᓄᑐᐃᓐᓀᑦ ᕿᑐᕐᖓᖏᑦ ᑲᒪᒋᔭᐅᓗᐊᕐᑐᑦ ᑯᐯᒃ ᓄᓇᓕᕐᓚᖓᑕ ᐱᑦᔪᔨᒍᑎᖏᓐᓄᑦ ᐅᕕᒃᑲᓂᒃ ᓴᐳᒻᒥᓂᕐᒥᒃ ᐊᐅᓪᓚᑎᑦᓯᑲᑕᓗᐊᕐᓱᑎᒃᓗ ᖃᓪᓗᓈᑦ ᓄᓇᖏᓐᓄᑦ ᕿᑐᕐᖓᐅᔪᑦ ᑲᒪᒋᔭᐅᕕᒋᓂᐊᕐᑕᖏᓐᓄᑦ, ᐊᐅᓪᓚᑎᑦᓱᒋᑦ ᓄᓇᓕᖏᓐᓂᑦ ᐃᓚᖏᓐᓂᓗ. ᑕᒪᓐᓇ ᓴᕐᕿᑎᑕᐅᒪᔪᖅ ᐱᑦᔪᔨᕕᐅᑉ ᓱᖏᕐᑐᑎᑦᓴᐅᔪᕆᑦᓯᓂᖃᖕᖏᓂᖓᓄᑦ.
ᓄᓇᕕᒻᒥ ᐃᓚᒌᑦ ᐸᐸᑕᐅᕕᖓᑦ ᐱᓇᓱᑉᐳᖅ ᐃᑲᔪᓯᓇᓱᑦᓱᓂ ᐊᓯᑦᔨᓂᑦᓴᖏᓐᓂᒃ ᑕᒪᑐᒪ ᐃᑲᔪᕐᓯᒍᑎᖃᕐᓱᓂ ᐃᓄᑐᐃᓐᓇᓂᒃ ᐱᓇᓱᑦᑐᓴᓂᒃ ᑲᒪᒋᐊᖕᖓᖃᑕᐅᒍᑎᓂᒃ ᐊᒥᓱᖕᖑᕙᓪᓕᐊᖁᑦᓱᒋᑦ ᐱᓇᓱᑦᑐᑦ ᐱᑦᔪᔨᕕᒻᒧᑦ. ᒫᓐᓇᐅᑎᓪᓗᒍ ᓇᐅᑦᓯ-ᑐᕐᑕᐅᔪᑦ ᐃᓘᓐᓇᑎᒃ ᐱᖁᔭᑎᒎᕐᑐᑎᒍᑦ ᐊᑐᕐᑕᐅᓂᖃᕈᓐᓇᓂᖏᑦ, ᓯᕗᓪᓕᐹᖅ ᐊᖏᔫᓂᖃᕐᓱᓂ ᐊᑑᑎᔭᐅᓂᖃᓛᕐᑐᖅ ᓴᕐᕿᑎᑦᓯᓂᖓᑦ ᓇᒻᒥᓂᖅ ᑲᑎᖕᖓᔨᖁᑎᑦᓴᒥᓂᒃ ᓄᐃᑕᐅᓛᕐᑐᒥᒃ ᐅᑭᐊᓕᕐᐸᑦ. ᓯᕗᓂᖃᕐᒪᑕ ᐃᓄᑐᐃᓐᓇᓂᒃ ᐱᒋᐊᕐᑎᓯᓂᖃᕐᐸᓕᐊᓂᑦᓴᒥᒃ ᖁᓚᕆᔭᖃᕈᓐᓀᓂᑦᓴᖏᓐᓂᒃ ᐅᕕᒃᑫᓗ ᐃᓚᒌᖑᔪᓪᓗ ᐱᑦᔪᔭᐅᒍᑎᖏᓐᓂᒃ, ᐱᓗᐊᕐᑐᒥᒃ ᐅᕕᒃᑫᑦ ᓴᐳᑦᔭᐅᒪᒍᑎᖏᓐᓂᒃ, ᐱᓇᓱᖃᑎᒋᓗᒋᑦ ᐃᓗᓯᖃᑦᓯᐊᓇᕐᑐᒥᒃ ᐃᓅᓯᖃᖁᓪᓗᒋᑦ ᓄᓇᕕᒻᒥᐅᑦ ᕿᑐᕐᖓᖏᓪᓗ ᐃᓚᒌᑦᑐᖁᑎᖏᓪᓗ ᐱᑦᔪᔭᐅᒍᑎᒋᒍᓐᓇᑕᖏᑎᒍᑦ. ᐃᓄᑐᐃᓐᓀᑦ ᑕᓯᐅᕐᑎᐅᓛᕐᑐᑦ ᑐᑭᑖᕐᑐᐃᔨᐅᓗᑎᒃᓗ, ᐱᑦᔪᔨᒍᑎᖃᕐᓗᑎᒃ ᑐᖕᖓᕕᖃᑦᓯᐊᑐᓂᒃ ᐃᓄᑐᐃᓐᓀᑦ ᖃᐅᔨᒪᔭᖏᓐᓂᓗ ᖃᓄᐃᓘᕈᑎᑐᖃᑦᓴᔭᖏᓐᓂᓗ.
ᓯᐊᔭ ᐊᐃᕈ, ᑐᑭᒧᐊᑦᑎᓯᔨᐅᑉ ᐃᑲᔪᕐᑎᖓ ᐃᓄᑐᐃᓐᓀᑦ ᐃᓪᓕᓇᕐᑐᖁ-ᑎᖏᓐᓄᑦ ᐊᒻᒪᓗ ᓵᖕᖓᓯᒍᑎᓄᑦ ᓄᓇᕕᒻᒥ ᐃᓚᒌᑦ ᐸᖓᑕᐅᕕᖓᑕ, ᓴᖑᒍᑎᖃᕐᓂᐅᔭᕋᓂ ᐃᓚᒌᖑᔪᑦ ᐃᑲᔪᕐᓯᒪᔭᐅᒋᐊᖃᕐᓂᖏᓐᓅᓕᖓᔪᓂᒃ ᓄᓇᓕᓐᓂᓗ ᓄᓇᓕᓕᒫᓂᓗ. “ᕿᑐᕐᖓᕗᑦ ᐃᓚᒋᔭᖏᓪᓗ ᓴᐳᑦᔭᐅᒪᓂᑦᓴᒥᒃ ᑭᖕᖒᒪᑦᓯᒪᑕ ᐊᓂᕐᕋᒥᓂ, ᓄᓇᓕᒻᒥᓂ ᐊᒻᒪᓗ ᓄᓇᓕᓕᒫᓂᑦ. ᑲᑐᑦᔨᖃᑎ-ᒌᒍᑎᒋᑦᓯᐊᓗᒋᑦ ᐱᓇᓱᖃᑎᒌᓐᓂᖃᕆᐊᖃᕐᐳᒍᑦ ᓱᕐᖁᐃᑐᒥᒃ ᓄᓇᓕᖁᑎᓕᒫᕗᑦ ᖃᓄᐃᖕᖏᓯᐊᕐᓇᑐᒥᒃ ᐃᓅᓯᖃᕐᕕᐅᖁᓪᓗᒋᑦ!”
ᒫᓐᓇᓕ ᓄᓇᕕᒻᒥ ᐃᓚᒌᑦ ᐸᐸᑕᐅᕕᖓᑦ ᐊᖏᕐᑕᐅᒍᑎᑖᕐᓯᒪᓕᕐᒪᑦ ᓄᓇᕕᒻᒥ ᐃᓗᓯᓕᕆᓂᕐᓄᓗ ᐃᓄᓕᕆᓂᕐᓄᓗ ᐱᑦᔪᔨᕕᒻᒥ ᓴᕐᕿᑎᑦᓯᒍᒪᑦᓱᓂ ᓇᒻᒥᓂᖅ ᑲᑎᖕᖓᔨᖁᑎᑦᓴᒥᓂᒃ, ᐱᓇᓱᓚᖓᓕᕆᕗᖅ ᑐᕌᕐᑐᓂᒃ ᑮᓇᐅᔭᖁᑎᖃᕐᓂᑯᑦ ᐃᒻᒥᓂᕿᒍᓐᓇᓂᑦᓴᒥᓂᒃ ᐊᕗᖓᐅᓕᒋᐊᕆᓗᓂᓗ ᒪᓂᒪᑎᒍᓐᓇᑕᒥᓂ ᓄᓇᕕᐅᑉ ᐃᓄᑐᐃᓐᓇᖏᓐᓄᑦ ᐱᕙᓪᓕᐊᑎᑦᓯᒍᑎᖃᓯᓗᓂᓗ ᓄᓇᓕᒻᒥᓂ ᐱᓇᓱᑦᑎᐅᕙᓐᓂᐊᑐᓂᒃ.
