ᒪᑭᕝᕕᓗ ᐊᕙᑕᖅ ᐱᐅᓯᑐᖃᓕᕆᕕᓪᓗ ᐱᓇᓱᒐᖃᕐᕖᒃ ᐃᓚᐅᖃᑕᐅᓚᐅᔪᕘᒃ ᐊᕐᕌᒍᑕᒫᑦ Kwe/ᐊᐄ! ᑲᑎᓯᒋᑦ ᓄᓇᓕᑐᖃᐅᑦᓱᑎᒃ ᐃᓅᖃᑎᒌᑦᑐᑦ ᔫᓂᐅᑎᓪᓗᒍ ᖃᓄᐃᓘᕐᓂᖃᕐᑎᓗᒋᑦ ᑯᐯᒃ ᓯᑎᒥ. ᒪᑭᕝᕕᐅᑉ ᐊᖓᔪᕐᖃᖓᓄᑦ ᑐᖓᓕᖅ ᑮᓇᐅᔭᑎᒍᑦ ᒪᑭᑕᒐᓱᒍᑎᓕᕆᓂᕐᓂᒃ ᐱᕙᓪᓕᐊᑎᑦᓯᕕᒻᒥ ᐋᓐᑎ ᒧᐊᖃᐅᔅ ᐅᖄᔨᐅᓚᐅᔪᕗᖅ ᓱᔪᖃᕐᓂᐅᔪᑦ ᐅᒃᑯᐃᑕᐅᒍᑎᖏᑕ ᓇᓪᓕᐅᓂᕐᓯᐅᑕᐅᒍᑎᖓᓂ, ᐊᕙᑕᖅ ᑐᐱᕐᒥᒃ ᓇᑉᐯᒪᓚᐅᔪᒻᒥᔪᖅ ᐃᓄᓐᓄᑦ ᐃᑎᕐᑕᐅᑲᑕᓐᓂᐊᑐᒥᒃ ᑕᑯᔭᕐᑐᕕᐅᓗᓂ ᓄᐊᑕᐅᒪᔪᓂᑦ ᑕᑯᑦᓴᐅᑎᑦᓯᒍᑎᐅᑦᓱᑎᒃ ᓄᓇᕕᒻᒥᐅᑦ ᐃᓄᑐᐃᓐᓀᑦ ᐃᓗᕐᖁᓯᖓᓐᓂᒃ.
ᐊᕙᑕᐅᑉ ᐱᓇᓱᑦᑎᖓ ᐃᓴᐱᐋᓪ ᓱᒃᑭᐊᑦ ᑐᑭᓯᑎᑦᓯᓚᐅᔪᖅ ᑐᑭᑖᖃᑎᒌᑦᑐᕕᓂᐅᒋᐊᒥᒃ ᐃᓄᑐᐃᓐᓀᑦ ᐱᖕᖑᐊᕈᓯᖏᓐᓂᒃ ᑐᐱᕐᒥ ᐱᓂᐊᕐᓂᖃᖃᑦᑕᓚᖓᑎᓪᓗᒋᑦ. ᑕᑯᑦᓴᐅᑎᑦᓯᓚᐅᔪᔪᑦ ᐊᑦᔨᖑᐊᓂᒃᓗ ᓴᓇᖕᖑᐊᓯᒪᔪᓂᒃᓗ ᐊᕙᑕᐅᑉ ᓄᐊᑦᓯᒪᔭᖏᓐᓂᒃ ᐃᓄᑐᐃᓐᓀᑦ ᐱᖕᖑᐊᕈᓯᕐᒥᓂᒃ ᐱᖕᖑᐊᑎᓪᓗᒋᑦ, ᑕᑯᓐᓇᐅᔮᕐᑎᓯᒍᑎᒃᑯᓗ Nanook of the North-ᑯᓐᓂᒃ ᓄᐃᑕᑎᑦᓯᓱᑎᒃ. ᑐᐱᐅᑉ ᐃᓗᐊᓂ ᓄᐃᑕᑎᑕᐅᓚᐅᔪᒻᒥᔫᒃ ᐊᒪᐅᑎᐊᐲᒃ, ᐁᑉᐸᖓ ᐊᑦᑕᑐᐊᖑᓚᐅᔪᔪᖅ ᐲᑐᕆᔅ ᑎᐊᒥᑦ, ᐸᓂᐊᐱᑦᓯᐅᑎᓗ ᐊᒪᐅᑎᖕᖑᐊᕌᐱᒃ ᑲᒥᑐᐃᓐᓀᓗ.
ᑐᐱᕐᒥ ᑲᑕᑦᔭᖃᑦᑕᓚᐅᔪᒻᒥᔪᑦ ᔮᓇᔅ ᐹᓴᓐᓗ ᓵᓐᑎ ᐃᒪᕐᓚᓗ, ᓯᓪᕕᐊ ᑯᓗᑦᓰᓗ ᐊᒻᒪᓗ ᐊᑭᓂᓯ ᓯᕗᐊᕌᐱᒃ, ᐄᕕ ᒫᓪᓗ, ᖁᓪᓕᒥᒃ ᐃᑭᑦᓯᔨᐅᓚᐅᔪᒻᒥᔪᖅ ᐃᓄᑐᐃᓐᓀᓗ ᐱᖕᖑᐊᕈᓯᖏᓐᓂᒃ ᐱᖕᖑᐊᖃᑕᐅᑦᓱᓂ ᐃᓄᓐᓄᑦ. ᓄᓇᕕᐅᑉ ᑏᖏᑦ ᐊᑐᐃᓐᓇᐅᓚᐅᔪᒻᒥᔪᑦ ᐃᓄᓐᓄᑦ ᐅᑦᑐᕋᕐᑕᐅᔪᑦᓴᐅᓱᑎᒃ. ᐊᒻᒪᓗ ᐋᓗᐸ ᐊᐃᕈ ᒍᐊᑦ ᑐᐱᐅᑉ ᓯᓚᑖᓂᑦᓱᓂ ᑕᑯᓐᓇᐅᔮᕐᑎᓯᒍᑎᖃᓚᐅᔪᒻᒥᔪᖅ ᖁᑦᓯᑐᒦᑦᑐᒥ ᐊᕿᓯᒋᐊᕐᓂᒥᒃ ᐃᓄᓐᓂᒃ ᑕᑯᓐᓇᑎᒥᓂᒃ ᐅᑦᑐᕋᖁᔨᑲᑕᑦᓱᓂ.
ᒥᐊᔨ ᐸᓂᖓᔭᒃ ᐃᕗᔨᕕᒻᒥᐅᖅ ᐃᓚᒋᔭᐅᓚᐅᔪᔪᖅ ᓄᓇᕕᒻᒥᑦ ᑭᒡᒐᑐᕐᑐᓄᑦ ᓱᔪᖃᕐᓂᐅᔪᓃᖃᑕᐅᓚᐅᔪᖅ ᑕᑯᑦᓴᐅᑎᑦᓯᓱᓂ ᓴᓇᖕᖑᐊᓯᒪᔭᒥᓂᒃ ᐅᓂᒃᑲᐅᓯᕐᓂᓗ. ᐅᖃᓚᐅᔪᕗᕐᓗ ᑖᓐᓇ ᓱᔪᖃᕐᓂᖅ, ᖃᓄᐃᓘᖃᑎᒌᕝᕕᐅᔪᖅ ᓄᓇᖃᕐᖃᓯᒪᔪᓄᓪᓗ ᐊᒻᒪᓗ ᐃᓄᑐᐃᓐᓇᓄ ᑲᑎᕕᐅᓯᒪᑐᐃᓐᓇᓚᐅᔪᖕᖏᒋᐊᖓ, ᐃᓗᕐᖁᓯᕐᒥᓂᒃ ᐊᒥᕐᖃᖃᑎᒌᕝᕕᐅᓱᓂᓘᓚᐅᔪᒐᒥ ᐊᓯᓄᑦ ᓯᓚᕐᔪᐊᒥᐅᖑᖃᑎᒥᓄᑦ ᑕᑯᓐᓇᑕᐅᓂᖃᕐᓱᓂ, ᑕᑯᒥᓇᕐᓱᓂ, ᐃᓄᓕᒫᓂᓪᓗ ᑕᑯᑎᑦᓯᕕᐅᑦᓱᓂ ᐃᓄᑐᐃᓐᓀᑦ
ᓄᓇᒥᓐᓂ ᐃᒻᒥᓂᕿᑦᓱᑎᒃ ᖃᓄᐃᓘᕈᓐᓇᓂᖃᕐᒪᖔᑕ.
Kwe/ᐊᐃ! ᐱᒋᐊᕐᕕᓕᐅᑎᕕᖃᓚᐅᕐᓯᒪᕗᖅ 2017-ᒥᒃ ᑕᑯᑦᓴᐅᑎᑦᓯᓂᐅᑦᓱᓂ, ᖁᕝᕙᑎᕆᓂᐅᑦᓱᓂ ᐊᒻᒪᓗ ᓇᓪᓕᐅᓂᕐᓯᐅᕈᑎᖃᕐᓂᐅᓱᓂ 11-ᓂᒃ ᐊᕕᑦᑐᓯᒪᓂᓕᓐᓂᒃ ᑯᐯᒃ ᓄᓇᓕᑐᖃᖏᓐᓂᒃ. ᐃᓚᐅᑎᑦᓯᓂᐅᑦᓱᓂ ᐃᓗᕐᖁᓯᕐᒥᒍᑦ ᖃᓄᐃᓘᕈᑎᑦᓴᔭᖏᓐᓂᒃ ᐊᒻᒪᓗ ᓴᓇᖕᖑᐊᑏᑦ ᑕᑯᒥᓇᕐᑐᓕᐅᕐᑏᓗ ᓂᐅᕕᐊᑦᓴᖃᐅᑎᐊᐱᖏᓐᓂᒃ ᐊᑐᐊᒐᕐᓂᓗ ᓂᐅᕕᐊᑦᓴᖏᓐᓂᒃ, ᐱᑕᖃᓚᐅᔪᒻᒥᔪᖅ ᑕᑯᓐᓇᕋᑦᓴᓕᐊᖑᓯᒪᔪᑦ ᓄᐃᑕᑎᑕᐅᓂᖏᑦ ᐊᒻᒪᓗ ᑲᑎᖕᖓᔪᑦ ᐅᖃᖃᑎᒌᓐᓂᖏᑦ ᐅᖃᒍᑎᖃᕐᓂᖏᓪᓗ, ᐃᓚᐅᑎᓪᓗᒍ “The Butterfly of Climate Change/ ᓴᕋᓕᑭᑖᖅ ᐱᓯᒪᔪᖅ ᓯᓚᐅᑉ ᐊᓯᑦᔨᓂᖓᓂᑦ,” ᐅᖄᓂᖃᓚᐅᔪᒻᒥᔪᖅ ᓯᐊᔭ ᐸᕐᓲ-ᒣ, ᓄᓇᕕᒻᒥ ᓯᕗᓪᓕᐹᖑᑦᓱᓂ ᖃᐅᔨᒪᒐᓱᒍᓐᓇᓂᓕᒃ, ᐱᒋᐅᕐᓴᔭᐅᒍᑎᖃᕐᓯᒪᑦᓱᓂᓄ ᐊᑦᓯᒋᐊᒥᓪᓗ ᓇᓗᓀᔦᒋᐊᒥᓪᓗ ᖁᐱᕐᕈᓂᒃ.
