ᑐᖕᖓᕕᖃᕐᓱᑎᒃ ᑭᓯᑦᓯᓯᒪᒍᑎᖏᓐᓂᒃ ᑲᑎᕕᒃ ᓄᓇᓕᓕᒫᑦ ᐃᒡᓗᓕᕆᔨᕐᔪᐊᑯᑦ, ᔭᓄᐊᕆᐅᓚᐅᔪᔪᒥ 4,500 ᐃᓚᐅᒍᑎᓖᑦ ᐊᓂᕐᕋᖏᑦ ᓄᓇᕕᒻᒥ ᐃᑦᓯᕕᒻᒦᑐᓂᒃ ᓂᕿᑖᕐᑎᑕᐅᓚᐅᔪᕗᑦ, ᓂᐅᕕᕐᓱᒋᑦ ᓄᓇᕕᒻᒥ ᓂᕿᑎᒍᑦ ᐱᑦᔪᔨᕕᒻᒥᑦ ᐊᐅᓪᓚᑎᑕᐅᒍᑎᖏᓐᓂᒃ ᐊᑭᓖᖃᑎᖃᕐᓱᑎᒃ ᓂᕿᑦᓯᐊᑐᒪᓂᖅ ᑲᓇᑕᐅᑉ ᑕᕐᕋᖓᓂ ᐊᒻᒪᓗ ᓄᓇᕕᒻᒥ ᓂᕿᑎᒍᑦ ᐱᑦᔪᔨᕕᒃ. ᐃᓄᐃᑦᑯᑦ ᐅᓯᔨᐅᓚᐅᔪᔪᑦ ᐃᑦᓯᕕᓐᓂᒃ, ᓄᓇᓕᓐᓂᓗ ᐃᑯᐊᓪᓚᑐᕐᓂᐊᑏᑦ ᐃᓄᐃᑦ ᐊᓂᕐᕋᖏᓐᓅᔦᑦᓱᑎᒃ. ᐊᑐᓂᑦ ᐃᑦᓯᕖᑦ ᐃᓗᓕᖃᕐᓱᑎᒃ ᓂᕿᑐᐃᓐᓇᓂᒃ ᐊᓂᕐᓂᓴᖃᖕᖏᑐᒥᒃ ᐴᕐᑐᓯᒪᔪᓂᒃ, ᐃᓚᖃᓚᐅᔪᔪᓂᒃ ᐅᑯᓂᖓ 2.8 kg ᐅᖁᒣᓐᓂᓕᓐᓂᒃ ᑯᒃᑰᓯᕕᓂᕐᓂᒃ, 1.7 kg ᐅᖁᒣᓐᓂᓕᓐᓂᒃ ᑐᑦᑐᐊᓗᔭᕕᓂᐅᑦᓱᑎᒃ ᓯᖃᓕᐊᓂᒃ, 1 kgᒥᒃ ᐅᖁᒣᓐᓂᓕᓐᓂᒃ ᑭᐊᑦᓴᐅᑎᐅᑉ ᐃᓗᐊᓂ ᐃᒑᑦᓴᔭᓂᒃ ᑐᑦᑐᐊᓗᔭᕕᓂᕐᓂᒃ ᐊᒻᒪᓗ ᑰᒃᑯᓯᕕᓂᕐᓂᒃ, ᐱᖓᔪᕐᑐᓂᒃ ᐸᑲᑯᐊᓃᑦ ᓂᐅᕕᓂᖏᓐᓂᒃ ᐊᒻᒪᓗ ᒥᑭᓂᕐᓴᒥᒃ ᓇᑲᓯᒪᔪᓂᒃ ᐸᑲᑯᐊᓃᑦ ᓂᐅᖏᓐᓂᒃ, ᐊᒻᒪᓗ ᓇᑲᑎᕐᓯᒪᖕᖏᑑᓐᓂᒃ ᐸᑲᑯᐊᓂᕕᓃᓐᓂᒃ/ᓯᑲᕕᓂᓐᓂᒃ. ᓄᓇᓕᓐᓂ ᖃᒥᑎᕆᔩᑦ ᐊᒻᒪᓗ ᐋᓐᓂᑐᖃᑐᐊᕐᒪᑦ ᑲᒪᔨᒋᔭᐅᒋᐊᖕᖓᓲᑦ ᐃᑦᓯᕕᓐᓂᒃ ᐁᑦᑐᑐᐃᔨᐅᓚᐅᔪᔪᑦ, ᐊᒻᒪᓗ ᒪᑭᕝᕕᒃ ᑐᓂᑦᓱᓂ $10,000.00ᓂᒃ ᐊᑐᕐᑕᐅᓚᖓᔪᓂᒃ ᐱᓇᓱᒍᑎᒋᓂᐊᕐᑕᖏᓐᓄᑦ ᓇᓗᓀᕆᒍᑎᐅᓗᑎᒃ ᑲᔪᓯᔪᒥᒃ ᐊᑭᓕᕐᑐᐊᖑᒐᑎᒃ ᐃᑯᐊᓪᓚᑐᕐᓂᐊᓂᕐᒥᒃ ᖃᒥᑎᕆᔨᐅᔪᑦ ᐱᓇᓱᑉᐸᑕᖏᓐᓂᒃ.
ᑐᑦᑐᐃᑦ ᐊᓐᓂᑐᐊᖑᓯᒪᓚᐅᔪᔪᑦ ᐊᓐᑎ ᒪᓄᒃᒧ, ᐸᐅᓗᓯ ᖃᓴᓪᓗᐊᒧᑦ, ᐋᓕ ᖃᓴᓪᓗᐊᒧᑦ, ᐁᓴ ᒣᓇᒧᑦ, ᑌᕕᑎ ᓈᓚᒃᑐᒧᑦ, ᓂᒃ ᒍᐊᑦᒧᑦ, ᓰᒥᐅᓂ ᐃᓄᒃᐸᒧᑦ, ᒫᒃᓯ ᒧᐊᖃᐅᔅᒧᑦ, ᐊᒻᒪᓗ ᐹᐱ ᐃᖃᓗᖕᒧᑦ, ᑖᒃᑯᐊ ᐃᓘᓐᓇᑎᒃ ᐃᓄᑦᔪᐊᒥᐅᑦ. ᐃᖃᓗᑉᐲᑦ ᐱᔭᐅᑎᓪᓗᒋᑦ ᔮᔨ ᐃᑦᑐᒧᑦ ᐊᐅᐸᓗᖕᒥᐅᒧᑦ ᐊᒻᒪᓗ ᐊᕿᒃᒌᑦ ᐊᓐᓂᑐᐊᖑᓯᒪᓚᐅᔪᔪᑦ ᐸᒃᓕ ᐸᓚᒥᖕᒧᓗ ᔫᓇ ᐸᓚᒥᖕᒧᓗ ᑰᒃᔪᐊᕌᐱᖕᒥᐅᓄᑦ ᐊᒻᒪᓗ ᐋᑕᒥ ᑫᓐᒧᑦ ᑰᒃᔪᐊᒥᐅᒧᑦ.
ᒪᓐᑐᔨᐊᒨᕐᑕᐅᒪᓕᑐᐊᕐᒪᑕ, ᐊᕕᑦᑐᕆᐊᖃᓕᕋᒥᒃ ᐊᖏᔪᒥᒃ ᐱᔭᑦᓴᐅᓕᓚᐅᔪᔪᑦ ᐊᕕᑦᑐᑕᐅᓂᖃᓚᐅᔪᕗᓪᓗ ᐅᒃᓘᓂ ᒪᕐᕉᓂ ᐱᓇᓱᑦᑕᐅᓱᑎᒃ ᑭᑎ ᑯᐊᑕᒧᑦ, ᓓᓇ ᑯᔩᒧᑦ, ᐋᓂ ᐹᕋᓐᒧᑦ, ᐱᐊᑦᓯ ᐃᑎᓪᓗᐃᒧᑦ ᐊᒻᒪᓗ ᓕᓯ ᑯᔫᒧᑦ. ᐳᕃᔭᓐ ᐳᒥᐊᕐᓘᓗ ᑯᕆᔅ ᒨᕈᕕᒃᓗ ᐅᓪᓗᓂ ᑕᒃᓕᒪᒐᓚᓐᓂ ᑖᒃᑯᓂᖓ ᐁᑦᑐᑐᑎᖃᓚᐅᔪᔫᒃ ᓴᑐᕐᕖᑦ ᐊᕐᓀᑦ ᑲᑐᑦᔨᖃᑎᒌᕝᕕᖓᓄᑦ ᐊᒻᒪᓗ ᐁᑦᓯᕋᕐᕕᖃᕐᑎᓯᓚᐅᔪᑦᓱᑎᒃ ᐃᓚᐅᔫᖃᑕᐅᔪᓂᒃ ᐃᓚᒌᓂᒃ ᕘᑦᕃᒥ ᓄᓇᓯᒪᔪᓂᒃ.
ᓂᕿᑐᐃᓐᓇᑖᕐᑎᑕᐅᓚᐅᔪᒻᒥᔪᑦ ᐃᓄᑐᐃᓐᓀᑦ ᐱᓇᓱᑦᑐᑦ ᐃᓚᒌᓴᒃᑯᓂ ᐯ ᑑᕐᕕᒥ, ᑕᕐᕋᒥᐅᑦ ᓂᐱᖓᑕᓗ ᐱᓇᓱᑦᑎᖏᑦ. ᐃᓕᓐᓂᐊᑎᓂᓪᓗ ᐱᑦᔪᔨᕕᖓ ᑲᑎᕕᒃ ᐃᓕᓴᕐᓂᓕᕆᓂᐅᑉ, ᐊᒻᒪᓗ ᑯᐯᒃ ᓯᕿᓂᐊᓂ ᐃᓄᑐᐃᓐᓀᑦ ᑲᑐᑦᔨᖃᑎᒌᕝᕕᖓᑦ. ᒪᑭᕝᕕᐅᓗ ᑲᑎᕕᒃ ᐃᓕᓴᕐᓂᓕᓂᕆᕕᐅᓪᓗ ᐱᓇᓱᑦᑎᖏᑦ ᐃᓄᑐᐃᓐᓀᑦ ᓂᖀᑐᖁᔭᐅᔪᐃᓐᓇᐅᓚᐅᔪᒻᒥᔪᑦ ᒪᑭᕝᕕᐅᑉ ᐊᒃᓚᕕᖃᕐᕕᖓᑕ ᓯᓚᑖᓂ ᓄᓇᒃᑯᔫᑦ ᕿᑲᕐᕕᖓᓐᓂᑦ ᐊᒻᒪᓗ ᐃᓄᑐᐃᓐᓀᑦ ᒪᓐᑐᔨᐊᒧᑦ ᖃᓂᑦᑐᒥ ᓄᓇᓯᒪᔪᑦ ᓂᖀᑐᕈᓐᓇᕕᖃᕐᑎᑕᐅᓚᐅᔪᒻᒥᓱᑎᒃ ᒪᑭᕝᕕᐅᑉ ᐊᒃᓚᕕᖏᑕ ᓰᓐᓗᕌᓐᒦᑦᑐᒥᑦ ᐊᒡᓚᕕᖓᓐᓂᑦ. ᓂᕿᑕᕐᑎᑕᐅᖃᑕᐅᓚᐅᔪᒻᒥᔪᑦ ᑕᓯᕐᐅᕐᑎᒌᑦᑯᑦ, ᐅᒃᓗᕆᐊᖅ ᓱᕈᓰᓪᓗ ᓂᕕᐊᕐᓯᐊᓗ ᑲᒪᒋᔭᐅᕕᖓᑦ, ᐊᒻᒪᓗ ᐊᓐᓇᒋᐊᕐᕕᐅᓲᑦ ᐱᑦᔪᔭᖃᕐᐸᑐᑦ ᐊᓂᕐᕋᖃᖕᖏᑐᓂᒃ ᐃᓄᑐᐃᓐᓇᓂᒃ, ᐃᓚᐅᑎᓪᓗᒋᑦ Projets Autochtones du Quebec, Resilience, Chez Doris, Open Door, ᐊᒻᒪᓗ Native Friendship Centre
