ᑲᑎᕕᒃ ᐊᕙᑎᓕᕆᓂᕐᒧᑦ ᐊᔪᖀᒋᐊᕐᑏᑦ ᑲᑎᒪᔩᑦ
Comité consultatif de l’environnement Kativik
Kativik Environmental Advisory Committee
ᐳᕕᕐᓂᑑᑉ ᖃᕐᖄᓗᖏᑕ ᐱᕈᕐᑐᖁᑎᖏᑕ ᐊᑯᕐᖓᓂ. ᑕᑯᒋᐊᖕᖓᓗᒍ ᑖᓐᓇ ᐱᕈᕐᓯᐊᖅ ᖃᑯᕐᑕᓂᒃ ᐅᖃᐅᔮᐱᓕᒃ ᐃᓱᒪᓇᓪᓗᐊᕈᓇᐅᖕᖏᑐᖅ, ᐅᕝᕙᓘᓐᓃᑦ ᐃᑉᐱᓇᑦᔭᖏᒻᒪᕆᑐᐃᓐᓇᕆᐊᓕᒃ, ᑭᓯᐊᓂ ᑖᓐᓇ ᖃᕐᙯᑦ ᐱᕈᕐᑐᖓᑦ ᓄᓇᕕᐅᑉ ᐊᓯᐊᓂ ᐱᑕᖃᖕᖏᑐᖅ ᓯᓚᕐᔪᐊᓕᒫᒥ ᐊᓯᖃᖕᖏᑐᖅ. ᐅᖃᐅᓯᕆᑦᓯᐊᕋᔭᕈᓂ 25ᕌᐱᑐᐃᓀᑦ ᒥᑦᓯᑎᓐᓃᐳᑦ ᓯᓚᕐᔪᐊᒥ ᑌᒣᑦᑐᑦ ᐱᕈᕐᑐᑦ, ᐊᑕᐅᓯᑦᓯᐊᒥᓗ ᓄᓇᒥ ᐊᑦᔨᖃᕋᑎᒃ ᑕᑯᑦᓴᐅᕗᑦ ᓄᓇᒥ ᐊᖏᓂᓕᒻᒥᒃ 13 km2 ᓴᓪᓗᐃᑦ ᐁᑉᐸᖏᑕ ᑯᖓᓄᑦ ᖃᓂᑦᑐᓱᑎᒃ, ᐳᕐᑐᓂᐅᑉ ᓯᕿᓂᐊᑕ ᓄᐃᕕᐊᓂ ᐅᖓᓯᓐᓂᖃᕐᓱᑎᒃ 16 ᑭᓚᒦᑕᓂᒃ (ᖃᕐᖃᒥᐅᓂᑦ).
ᐃᑭᑦᑐᐊᐱᐅᓚᕿᔪᑦ ᐱᑦᔪᑎᖃᕐᓱᑎᒃ ᓄᓇᒥᒃ ᐱᕈᕐᕕᒥᓂᒃ. ᐳᕕᕐᓂᑑᑉ ᖃᕐᖄᓗᖏᑕ ᓄᓇᖓ ᑌᒣᑦᑐᒥᒃ ᑕᐅᑦᑐᖃᓚᕿᔪᖅ ᑮᑕ ᓄᓇᖓ ᓯᖃᓕᐊᓂᒃ ᐅᔭᕋᓚᑳᖃᕐᒪᑦ. Peridotite ᐃᓕᒃᑯᓱᓂ ᐅᔭᕋᑦᓴᔭᐅᒻᒥᒪᑦ ᓄᓇᐅᑉ ᖄᖓᓃᑦᓱᓂ ᑭᓯᐊᓂᓕ ᐱᑕᖃᕙᓪᓗᓲᖅ ᖄᖓᓃᓐᓂᓴᐅᑦᓱᓂ. ᑕᒪᓐᓇ ᐅᔭᕋᑦᓴᔭ ᑭᑭᐊᑦᓴᔭᐅᓂᖓ ᐊᒥᒐᖕᖏᑐᖅ ᑌᒣᒻᒪᑦ oxidized peridotite ᐊᐅᐸᓛᖓᔪᒥᒃ ᑕᐅᑦᑐᖃᕐᐳᖅ. Oxidized peridotite ᐊᐅᑦᑎᕆᒍᓐᓇᒪᕆᒻᒥᒪᑦ ᑌᒣᒃᑲᒥ ᓱᒃᑯᓇᕐᑐᕈᓲᖅ ᐱᕈᕐᕕᐅᔪᓐᓇᕋᓂᓗ ᐱᕈᕐᓯᐊᓄᑦ ᑭᓯᐊᓂ ᐱᕈᕈᓐᓇᑐᑐᐊᑦᓯᐊᖑᔪᖅ ᐳᕕᕐᓂᑑᑉ ᖃᕐᖃᖏᑕ ᑲᑲᒍᑎᑦᓴᔭᐅᔭᖓ ᑌᒣᑦᑐᒥ ᐱᕈᕈᓐᓇᑐᓕᐊᖑᒪᒐᒥ.
ᐱᕈᕐᓯᐊᒥᒃ ᑕᑯᒋᐅᓚᐅᕐᓱᑎᒃ, ᑲᑎᖕᖓᔩᑦ ᐃᓕᖓᔪᑦ ᓂᕐᔪᑎᓄᑦ ᓄᖑᐃᓐᓇᓯᓐᓇᐅᓕᕐᑐᓄᑦ ᑲᓇᑕᒥ (COSEWIC)ᑯᑦ 2019ᖑᑎᓪᓗᒍ ᑐᑭᑖᕈᑎᖃᓚᐅᔪᕗᑦ ᑌᓐᓇ ᐳᕕᕐᓂᑑᑉ ᖃᕐᖄᓗᖏᓐᓂ ᐱᕈᕐᑐᖅ ᐃᓕᖓᓂᕐᑕᓚᖓᓕᕆᐊᖓ “ᐊᑦᔨᖃᖕᖏᑐᒥᒃ ᐃᓱᒫᓗᒋᔭᐅᓂᖃᕐᑐᓴᐅᓂᕐᒥᒃ” ᐱᑦᔪᑎᖃᕐᓱᓂ ᐊᑦᔨᖃᖕᖏᓂᕐᒥᓂᒃ ᐊᒻᒪᓗ ᐱᑕᖃᓪᓗᐊᖏᒻᒪᕆᓐᓂᒥᓂᒃ. ᑌᒣᒃᑲᓗᐊᕐᑎᓗᒋᑦ, ᑕᒪᓐᓇ ᑌᒣᓕᖓᑎᑕᐅᓯᓂᖓ ᓱᕐᖁᐃᑐᒥᒃ ᓄᖑᐃᓐᓇᑎᑦᓯᑌᓕᓂᐅᖕᖏᓚᖅ, ᑌᒣᒻᒪᓗ ᑕᒪᑐᒥᖓ ᐱᑦᔪᑎᖃᕐᓱᓂ ᑯᐯᒃ ᑲᕙᒪᐅᑉ ᑐᕐᖃᑕᕐᕕᖓ ᐃᓕᖓᔪᖅ ᓄᓇᐅᑉ ᐊᕙᑎᖓᓄᑦ ᐊᒻᒪᓗ ᓯᓚᐅᑉ ᐊᓯᑦᔨᕙᓪᓕᐊᓂᖓᓂ ᐊᑭᓴᕐᑐᓇᓱᓐᓂᒧᑦ (MELCC) ᖃᒻᒥᑯᑦ ᑐᑭᑖᕈᑎᖃᓚᐅᔪᕗᖅ ᐃᓚᒋᓕᐅᑦᔨᓂᖃᕐᓂᐊᓱᓂ ᓄᑖᓄᑦ ᑲᑎᖕᖓᔨᓅᕐᑕᐅᖃᒻᒥᓄᑦ ᐊᒡᓚᓯᒪᒍᑎᐅᑦᓱᑎᒃ ᐱᕈᕐᑐᓂᒃ ᓴᐳᑦᔭᐅᒪᒋᐊᓕᓐᓂᒃ ᑐᖕᖓᕕᖃᕐᓗᑎᒃ ᐱᖁᔭᓂᒃ ᓲᓱᒋᔭᓕᓐᓂᒃ ᑲᑉᐱᐊᓇᕐᑐᒦᓕᕐᑐᓂᒃ ᐅᕝᕙᓘᓐᓂᑦ ᑲᑉᐱᐊᓇᕐᑐᒧᑐᐃᓐᓇᕆᐊᖃᓕᕐᑐᓂᒃ ᐱᕈᕐᑐᓂᒃ.
ᒫᓐᓇᓕ, ᒥᓴᐅᓵᕐᑕᐅᓯᒪᕗᑦ ᐅᓄᕐᓂᖃᕐᑎᓗᒋᑦ ᒥᑦᓯᑎᓐᓂ 25 ᐱᕈᕐᓯᐊᑦ. ᐊᓯᒋᐊᓪᓚᖏᑦ ᓯᕗᓂᑦᓴᑎᓐᓂ ᑕᑯᒋᐅᕐᑕᐅᑐᐃᓐᓇᕆᖃᕐᒥᔪᑦ ᑭᓯᐊᓂ ᑕᑯᔭᐅᔪᖃᖕᖏᓂᖓᓂ, ᓴᐳᑦᔨᓯᒪᓂᖅ ᐊᑦᔨᖃᖏᑐᒥᒃ ᐱᕈᕐᓯᐊᒥᒃ ᓯᕗᓪᓕᐅᔭᐅᓂᖃᓚᖓᕗᖅ. ᑌᒣᒻᒪᑦ ᑲᑎᕕᒃ ᓄᓇᓕᓕᒫᑦ ᐊᕙᑎᓕᕆᓂᕐᒧᑦ ᐊᔪᖀᒋᐊᕐᓂᓄᑦ ᑲᑎᖕᖓᔩᖏᑦ ᐃᓕᑦᓯᓂᒃ ᖃᐅᔨᑎᑦᓯᒍᒪᕗᖅ ᓴᐳᑦᔨᓯᒪᒍᒪᓂᕐᒥᓂᒃ ᐳᕕᕐᓂᑑᑉ ᖃᕐᖄᓗᖏᓐᓂ ᐱᕈᕐᓯᐊᖅ ᐱᑕᖃᕆᐊᖓ.
