ᐊᓖᓯᐊ ᐃᖃᓪᓗᒧᑦ ᐊᓪᓚᑕᕕᓃᑦ
ᖃᒻᒥᖅ, ᐱᓪᓚᕆᐅᑦᓱᓂ ᐱᓇᓱᑦᑕᐅᔪᑦᓴᒥᒃ ᓄᓇᕕᒻᒥ ᑐᓴᕋᑦᓴᖂᕈᑕᐅᔪᖃ ᖃᑦᑕᒪᑦ, ᖃᕆᑕᐅᔭᒃᑯᓗ ᑐᓴᕋᑦᓴᑎᒍᑦ, ᓈᓚᐅᑎᒃᑯᓗ. ᐊᑕᓐᓂᐅᕕᒃ, ᓄᓇᕕᒻᒥ ᓄᑖᒍᑦᓱᓂ ᐱᓇᓱᕝᕕᑖᕐᖃᒥᖅ ᖃᐅᔨᓴᕐᓂᓂᒃ ᐊᐅᓚᑦᓯᕕᑦᓴᐅᓱᓂ, $500,000ᓂᒃ ᐅᐱᒍᓲᓯᕐᑕᐅᖃᒻᒥᓚᐅᔪᒻᒪᑦ ᐅᑭᐅᕐᑕᑐᕐᒥᐅᑦ ᐱᒐᓱᐊᕐᓯᒪᓂᖏᑦ ᓵᓚᖃᐅᑎᑖᕐᑎᑕᐅᖃᑦᑕᑎᓪᓗᒋᑦ ᕕᐳᐊᕆ 2023ᒥ ᓴᐳᑦᔨᒍᑎᑦᓴᐅᓂᐊᕐᑐᓂᒃ ᓄᓇᕕᒻᒥᐅᑦ ᐃᒻᒥᓂᕿᐅᑎᖃᕈᓐᓇᓯᕙᓪᓕᐊᓂᖓᓂᒃ ᖃᐅᔨᓴᕐᓂᓅᓕᖓᔪᓂᒃ. ᑕᒪᒃᑯᑎᒎᓇ ᑐᓴᕋᑦᓴᑎᒍᑦ, ᐊᒥᓱᑦ ᓄᓇᕕᒻᒥᐅᑦ ᑐᓴᕆᐅᕐᐸᓕᕐᓱᑎᒃ ᐊᑕᓐᓂᐅᕕᒻᒥᒃ. ᑐᑭᖃᕐᒪᑦ “ᐊᖏᕐᑕᐅᒋᐊᕐᑐᕕᒻᒥᒃ” ᐃᓄᒃᑎᑐᑦ, ᓄᓇᕕᒻᒥᐅᑦ ᐊᑕᓐᓂᐅᑕᐅᒋᐊᕐᑐᖃᑦᑕᓛᕐᒪᑕ ᑭᓇᑐᐃᓐᓇᒧᑦ ᐱᓇᓱᕝᕕᒧᓪᓘᓃᑦ ᖃᐅᔨᓴᕆᐊᕐᑐᕈᒪᔪᓄᑦ ᓄᓇᕕᒻᒥ.
…ᐊᑕᓐᓂᐅᕕᒃ ᓄᓇᕕᒻᒥᒃ ᐱᕙᓪᓕᐊᓯᐊᕐᓂᓴᐅᑎᑦᓯᓚᖓᕗᖅ, ᑐᓴᐅᒪᔭᐅ ᑎᑦᓯᕕᐅᓗᓂᓗ, ᐊᐅᓚᑦᓯᕕᐅᓗᓂᓗ ᑕᖅᕋᒥ ᖃᐅᔨᓴᕐᓂᓂᒃ ᓲᓱᒋᔭᐅᑎᓪᓗᒋᑦ ᐃᓄᐃᑦ ᐱᓪᓚᕆᖁᑎᖏᑦ ᓯᕗᓪᓕᐅᔨᒐᑦᓴᖏᓪᓗ, ᓄᓇᓕᓐᓃᑐᐃᓪᓗ ᓲᓱᒋᔭᐅ ᑎᓪᓗᒋᑦ, ᓄᓇᓕᓕᒫᒥᓪᓗ ᐱᓇᓱᕝᕖᑦ ᑎᓕᔭᐅᒪᐅᑎᖏᑦ ᓲᓱᒋᔭᐅᑎᓪᓗᒋᑦ. (– ᕿᐊᓪᑕ ᓯᓅᐹ)
ᐊᕐᕌᒍᓂ ᐊᒥᓱᓂ ᐸᕐᓀᕈᑕᐅᓕᕐᓱᓂ, ᓄᐃᑕᐅᕙᓪᓕᐊᓕᕐᒪᑦ ᓴᐳᑦᔭᐅᓯᐊᕐᓱᓂᓗ ᐊᒥᓱᓄᑦ ᓄᓇᕕᒻᒥ ᐱᓇᓱᕝᕕᓄᑦ ᒪᑭᕝᕕᒃ, ᑲᑎᕕᒃ ᓄᓇᓕᓕᒫᑦ ᑲᕙᒪᖓ, ᓄᓇᕕᒻᒥ ᐃᓗᓯᓕᕆᓂᕐᒧᑦ ᑲᑎᒪᔩᑦ, ᑲᑎᕕᒃ ᐃᓕᓴᕐᓂᓕᕆᓂᖅ, ᑲᑎᕕᒃ ᓄᓇᓕᓐᓂ ᐃᓪᓗᓕᕆᔨᕐᔪᐊᑯᑦ, ᓄᓇᕕᒻᒥ ᑕᕆᐅᕐᒥᐅᑕᓕᕆᔨᒃᑯᑦ ᑲᑎᒪᔨᖏᑦ, ᐊᕙᑕᖅ ᐱᕐᖁᓯᑐᖃᓕᕆᕕᒃ, ᐊᖑᕕᒐᖅ, ᓄᓇᕕᐅᑉ ᑕᕆᐅᖓᓂᒃ ᐸᕐᓀᓂᕐᒧᑦ ᐱᓇᓱᐊᕐᑏᑦ, ᓄᓇᕕᐅᑉ ᑕᕆᐅᖓ ᓱᕐᕋᑕᐅᓕᕐᒪᖔᑦ ᕿᒥᕐᕈᔩᑦ ᑲᑎᒪᔨᖏᑦ, ᓄᓇᕕᒻᒥ ᓄᓇᒥᒃ ᑎᒍᒥᐊᕐᑏᑦ ᑲᑐᑦᔨᖃᑎᒌᓐᓂᖓ, ᖃᕐᔪᐃᓗ. ᓄᓇᓕᓕᒫᓂ ᐊᒥᓱᑦ ᓄᓇᕕᒻᒥ ᑭᖕᖒᒪᑦᓯᓂᕋᕐᓯᒪᒻᒪᑕ ᐱᓇᓱᕝᕕᒥᒃ ᐊᑕᓐᓂᐅᕕᑦᑎᑑᕐᑐᒥᒃ. ᖃᐅᔨᓴᕐᓃᑦ ᐱᓇᓱᐊᕐᑕᐅᔪᒻᒪᕆᐅᒻᒪᑕ ᓄᓇᕕᒻᒥ, ᑐᓴᕐᕕᖃᕐᓯᒪᑦᓱᑕᓗ ᐊᒥᓱᓂᑦ ᓄᓇᕕᒻᒥᐅᓂᑦ ᓂᐸᖃᕈᑎᖃᕈᓐᓇᖏᑦᑑᓲᒍᓂᕋᕐᑐᓂᒃ ᖃᐅᔨᓴᕐᓂᖃᓕᕋᓗᐊᕐᒪᑦ ᓄᓇᑦᑎᓂ.
ᑭᖕᖒᒪᓇᕐᐳᖅ. ᖃᐅᔨᓴᕐᓂᐅᖃᑦᑕᓯᒪᔪᑦ ᐃᓱᒪᒋᓕᐅᑎᒍᑕᐅᖃᑦᑕᓯ ᒪᖕᖏᓚᑦ ᐃᓄᐃᑦ ᓯᕗᓪᓕᐅᔨᒐᑦᓴᖏᓐᓂᒃ. ᐃᓄᐃᑦ ᐊᖓᔪᕐᖃᐅᕕᖃᕆ ᐊᑦᓯ ᐊᕆᐊᖃᕐᐳᑦ ᖃᐅᔨᓴᕐᓂᓂᒃ ᓄᓇᕕᒻᒥ.
(– ᐋᑕᒥ ᑎᓖᓪ-ᐊᓚᑯ)
ᓄᓇᕕᒻᒥᐅᑦ ᐃᓄᐃᑦ ᐊᑯᓂᓂᐊᓗᒃ ᑐᑭᓯᒪᓯᒪᔪᑦ ᓲᖑᓂᕐᑖᕈᑕᐅᒍᓐᓇᓂᖓᓂᒃ ᖃᐅᔨᒪᑦᓯᐊᓂᐅᑉ, ᖃᐅᔨᒪᑦᓯᐊᓂᕐᓗ ᓄᓇᕕᒻᒥᐅᓄᑦ ᐃᓄᓐᓄᑦ ᓇᒻᒥᓂᖅᐊᐅᓚᑦᓯᒍᓐᓇᓯᕙᓪᓕᐊᒍᑕᐅᒍᓐᓇᓱᓂ.ᕿᒥᕐᕈᔨᐅᒍᓐᓇᓂᕐᒧᑦ; ᐱᓇᓱᐊᕐᓂᐊᑎᓪᓗᒋᑦ ᓄᓇᕕᒻᒥ ᓄᓇᓕᓐᓃᑐᑦ ᐱᓇᓱᕝᕖᓗ ᓇᓗᓀᕐᓯᖃᑦᑕᓗᑎᒃ ᓱᓀᑦ ᖃᐅᔨᓴᕐᑕᐅᖄᕐᑐᓴᐅᒻᒪᖔᑦ ᓱᓀᓪᓗ ᑭᖕᖒᒪᒋᔭᐅᒻᒪᖔᑕ; ᑐᓴᐅᒪᔭᐅᑎᑦᓯᓗᑎᓪᓗ ᐊᑕᓐᓂᐅᕕᒻᒥᒃ ᓄᓇᕕᓕᒫᒥ ᓯᓚᑖᓂᓪᓗ.
ᐊᔪᕐᓴᓂᕐᒦᕈᑕᐅᒍᓐᓇᑐᑦ ᐊᒥᓲᕗᑦ ᑭᓯᐊᓂ ᐅᓪᓗᒥᐅᓕᕐᑐᖅ ᓯᓚᕐᔪᐊᑎᓐᓂ, ᑐᑭᓯᒪᐅᑎᑦᓴᖃᑦᓯᐊᖏᓐᓂᖅ ᐊᔪᕐᓴᓂᐅᖃᑕᐅᒋᕗᖅ. ᓯᓚᑎᑦᑎᓂᑦ ᐱᓯᒪᔪᓄᑦ ᑐᑭᑖᕈᑦᔭᐅᑐᐃᓐᓇᐸᓐᓂᐊᕈᑦᑕ ᓱᓀᑦ ᐱᓪᓚᕆᐅᒻᒪᖔᑕ ᐊᐱᕐᓱᒐᑐᐃᓐᓇᐅ ᓗᑕᓗ, ᐱᓐᓀᓗᑦᓯᒪᒍᑎᑦᑎᓂᒃ ᐋᕐᕿᓱᐃᒍᓐᓇᓯᕙᓚᖓᖕᖏᓚᒍᑦ. ᑐᑭᓯᒪᐅ ᑎᑦᓴᖃᕐᓂᐊᖏᒃᑯᑕ ᓱᓇᐅᓚᖓᖕᖏᓚᒍᑦ ᓲᖑᓂᖃᕐᓂᐊᕋᑕᓗ ᑐᑭᓯᒐᓱᐊᕆᐊᖃᕐᓂᒥᒃ ᐅᕝᕙᓘᓐᓃᑦ ᐃᓅᓯᒃᑯᑦ ᐊᓯᑦᔨᒋᐊᕈᑎᑦᓴᑎᓐᓂᒃ. ᐃᓅᖃᑎᒌᓪᓗᑕ ᐱᕙᓪᓕᐊᓚᖓᒍᑦᑕ ᑲᑎᕐᓱᐃᓯᒪᒋᐊᖃᕐᐳᒍᑦ ᐊᑐᕈᓐᓇᓗᒋᓪᓗ ᑐᑭᓯᒪᐅᑎᑦᓴᓂᒃ ᓈᒻᒪᒋᔭᑦᑎᒍᑦ. (– ᒫᒃ ᐅᔮᓂ ᑯᐊᑕ, 1976)
ᐃᓄᐃᑦ ᐊᓪᓚᓲᒍᓯᒪᖕᖏᒪᑕ ᖃᐅᔨᒪᔭᒥᓂᒃ, ᐊᓪᓚᖃᑦᑕᓲᒍᖁᒐᓗᐊᕐᑕᑲ ᖃᐅᔨᒪᔭᒥᓂᒃ ᐃᓕᑕᕆᔭᐅᕙᓐᓂᐊᑎᓪᓗᒋᑦ ᑲᕙᒪᓄᑦ…ᐃᓅᑦᓱᑕ ᐊᓪᓚᓲᒍᑐᐊᕈᑦᑕ ᖃᐅᔨᒪᔭᑦᑎᓂᒃ ᑐᓵᔨᖃᕆᐊᑐᕋᔭᖕᖏᓚᒍᑦ. ᐃᒣᓕᒍᒪᔪᖓ – ᐃᓄᓐᓂᒃ ᓱᑯᐃᔦᔨᐅᓲᓂᒃ ᑕᑯᖃᑦᑕᕈᒪᔪᖓ.
(– ᔮᓂ ᐅᕝᕙᐅᑦ)
ᐊᑕᓐᓂᐅᕕᒃ ᐱᑦᔪᑎᖃᓛᕐᑐᖅ ᐃᑉᐱᒋᔭᖃᕆᐊᖃᕐᓂᒥᒃ ᖃᐅᔨᓴᕐᓃᑦ ᓄᓇᕕᒻᒥᐅᑦ ᒪᑭᑕᑦᓯᐊᕆᐊᖃᕐᓂᖏᓐᓅᓕᖓᑦᓯᐊᒪᖔᑕ, ᓄᓇᕕᒻᒥᐅᑦ ᑐᑭᑖᕐᑎᒋᔭᐅᒍᓐᓇᓂᐊᕐᑎᓗᒋᑦ ᖃᐅᔨᓴᕐᑕᐅᓂᖃᕆᐊᖃᕐᓂᕈᑦᑕ ᓄᓇᕗᓪᓗ ᖃᐅᔨᓴᕐᑕᐅᓂᖃᕆᐊᖃᕐᓂᐸᑦ. ᕿᒥᕐᕈᔭᐅᖃᑦᑕᓗᑎᒃ ᐊᖏᕈᑕᐅᖃᑦᑕᓗ ᑎᓘᕐᐸᑎᓪᓗᒋᑦ ᖃᐅᔨᓴᕐᓃᑦ, ᐊᑕᓐᓂᐅᕕᒻᒥ ᐃᑉᐱᒋᔭᐅᓂᐊᕐᓗᑎᒃ ᖃᐅᔨᓴᕐᓃᑦ ᑐᑭᓯᑎᑦᓯᒍᑕᐅᓯᒪᑦᓯᐊᒪᖔᑕ ᐃᓅᑦᓱᑕ ᐃᓕᕐᖁᓯᑦᑎᓂᒃ ᐱᓪᓚᕆᖁᑎᑦᑎᓂᓪᓗ, ᖃᐅᔨᒪᔭᑐᖃᕗᓪᓗ ᐃᓕᑕᕆᔭᐅᓂᕐᓴᐅᕙᓐᓂᐊᑎᓪᓗᒍ ᐊᑐᕐᑕᐅᓂᕐᓴᐅᕙᓪᓗᓂᓗ. ᓴᐳᑦᔨᓯᒪᖃᑦᑕᓗᑕ ᓄᓇᓕᓐᓂᒃ ᐃᒻᒥᓂᒃ ᖃᐅᔨᓴᕐᓂᖃᖁᖃᑦᑕᓗᒋᑦ, ᐊᑕᓐᓂᐅᕕᑎᒍᑦ ᐃᓄᓐᓂᒃ ᐊᒥᓱᒋᐊᓪᓚᐅᖁᔨᒋᕗᒍ ᖃᐅᔨᓴᕐᑎᖑᕈᒪᔪᓂᒃ.
ᐊᑕᓐᓂᐅᕕᒃ ᐊᐅᓚᑕᐅᓂᖃᓯᒋᐊᓛᕈᓇᐅᕗᖅ 2025ᒥ. ᐊᐅᓚᑕᐅᓂᖃᓯᒋ ᐊᓚᐅᕐᑎᓇᒍ, ᐱᓇᓱᑦᑎᖏᑦ ᑕᑉᐱᑯᓂᖓ ᐱᓇᓱᐊᖃᑦᑕᓚᖓᕗᑦ ᐊᓯᖏᓐᓂᓗ ᐱᓪᓚᕆᐅᖃᑕᐅᒻᒥᔪᓂᒃ ᓯᕗᓂᑦᓴᓕᐅᕈᑎᑦᓴᓂᒃ ᐊᑕᓐᓂᐅᕕᒃ ᐃᖏᕐᕋᓯᑎᑕᐅᓪᓚᕆᓯᑉᐸᑦ. ᐊᑕᓐᓂᐅᕕᒻᒥ ᐱᕙᓪᓕᐊᑎᑕᐅᔪᓂᒃ ᐊᖑᒪᑦᓯᒋᐊᕈᒪᔪᑦ ᐱᕕᑦᓴᐅᓕᕐᑐᓂᓪᓗ ᖃᐅᔨᒪᒍᒪᔪᑦ, ᑕᑯᒋᐊᕈᓐᓇᐳᑦ Facebookᑎᒍᑦ ᑐᕌᕈᑎᑦᑎᓂ www.facebook.com/atanniuvik, ᖃᕆᑕᐅᔭᒃᑯᓗ ᑐᓴᕋᑦᓴᖃᕐᕕᑎᓐᓂᒃ ᐅᕗᖓ www.atanniuvik.ca, ᖃᕆᑕᐅᔭᒃᑯᓘᓐᓃᑦ ᐊᓪᓚᕕᐅᒍᓐᓇᓱᑕ ᐅᕗᖓ info@ atanniuvik.ca.
