2022

ᑕᒃᒐᐅᓕᕐᖁᖅ. ᐅᓪᓗᖅ ᓇᓪᓕᐅᑎᐊᓗᑦᓴᖁᖅ. ᓇᓪᓕᐅᓂᕐᓯᐅᕈᑎᖃᓛᕐᓂᖅ ᐊᑯᓂ ᐸᕐᓇᑕᐅᔪᖅ ᖃᓄᓕᒫᖅ ᐱᑦᓯᐊᕋᓱᑦᓱᒍ ᓇᓪᓕᐅᑎᕗᖅ. ᐅᕝᕙᓘ ᑲᑎᑎᑕᐅᓂᖅ ᓱᑲᑦᑐᒥᒃ ᐊᓂᒎᑎᓲᖅ ᓲᕐᓗ ᓛᔅ-ᕖᑲᔅᒦᑦᑐᑐᑦ ᐊᑑᑎᔭᐅᓚᐅᕐᐸ. ᐅᓕᒻᒥᒃ ᑲᑎᑎᑕᐅᒍᑎᒥᒃ ᐊᑐᓛᕐᑕᒥᓂᒃ ᓈᒻᒪᓴᕐᓂᐅᕚ. ᐅᕝᕙᓘ ᐱᐅᓯᕆᔭᐅᖔᕐᐸ “ᐃᓅᓕᕐᓯᒪᕗᖓ ᐃᓕᓐᓂᒃ ᓇᓪᓕᒍᓱᑦᑐᓴᐅᑦᓱᖔᖅ” ᐅᓪᓗᑯᑦ ᕿᑎᕋᓕᕇᕐᓯᒪᓕᕐᑎᓗᒍ. ᓱᓕ ᐊᑕᐅᓯᖅ ᐱᔭᕆᐊᖃᕐᐳᖅ. ᑲᑎᑎᑕᐅᓂᖅ ᐃᓕᖓᒻᒪᑦ ᐱᐅᓂᕐᓴᒧᑦ ᐱᐅᖕᖏᓂᕐᓴᒧᓪᓗᓃᑦ. ᑌᒣᒻᒪᑦ, ᐱᓪᓚᕆᐅᓂᖏᑦ ᓱᕐᖁᐃᑐᒥᒃ ᖃᓄᕐᓗᓃᑦ ᑲᑎᑎᑕᐅᓂᖃᕐᑐᖃᕋᓗᐊᕐᐸᑦ ᖃᑦᓯᐅᒐᓗᐊᕐᐸᑕᓗ ᑲᑎᑎᑕᐅᔫᓐᓃᑐᑦ, ᑖᓐᓇ ᑲᑎᑎᑕᐅᖃᑎᒌᓐᓂᖅ ᓇᓛᒎᕐᓂᖃᑦᓯᐊᓚᐅᕐᖁᖅ ᑌᒣᑦᓯᐊᓚᐅᕐᖁᓗ ᓱᔪᖃᕐᓂᐊᕋᓗᐊᕐᐸᑦ!

ᑲᑎᑎᑕᐅᓂᖅ ᐱᓂᐊᕐᓂᐅᕗᖅ ᒪᓕᒐᖃᕐᓱᓂ. ᑯᐯᒃᒥ ᐊᑑᑎᔭᐅᒋᐊᖃᓲᖅ ᑲᑎᑎᑦᓯᒍᓐᓇᐅᑎᓕᓐᓄᑦ, ᒪᕐᕉᓂᒃ ᑕᑯᓐᓇᑎᖃᕐᓗᑎᒃ. ᑲᑎᑎᑦᓯᔪᖅ ᓇᓗᓀᕐᑕᐅᒪᒍᑎᖃᕐᓱᓂ “ᐊᔪᕿᕐᑐᐃᔨ” ᐅᕝᕙᓘᓐᓃᑦ “ᑲᑎᑎᑦᓯᒍᓐᓇᐅᑎᓕᒃ” ᑖᓐᓇ ᑐᑦᓯᐊᕕᒻᒥ ᓯᕗᓕᕐᑎᐅᒍᓐᓇᑐᖅ, ᐅᕝᕙᓗᓐᓃᑦ ᐃᓄᒃ ᑎᒃᑯᐊᑕᐅᒪᔪᖅ ᑲᑎᑎᑕᐅᒍᒪᔫᓐᓄᑦ ᑲᑎᑎᑦᓯᖁᔭᐅᓯᒪᓗᓂ. ᓱᓕ, ᐱᖁᔦᑦ ᒪᓕᒐᕐᓂᓗ ᖃᓄᐃᓕᖓᓂᐅᓂᐊᕐᑐᓂᓪᓗ ᐋᕐᕿᒍᑎᐅᓯᒪᓚᖓᕗᑦ ᑲᑎᑎᑦᓯᔫᑉ ᐊᖏᕐᑕ-ᐅᓯᒪᒍᑎᖏᓐᓂᒃ ᑲᑎᑎᑦᓯᒍᓐᓇᓂᕐᒥᒃ, ᐊᓯᖏᓐᓂᓗ ᒪᓕᑦᑕᐅᒋᐊᖃᓲᓂᒃ ᒪᓕᑦᓯᐊᓗᓂ ᓯᕗᓂᐊᒍᑦ ᐊᒻᒪᓗ ᐊᑑᑎᓂᖃᓕᕐᐸᑦ ᑲᑎᑎᑕᐅᓂᖅ, ᑌᒣᓘᕐᓂᖃᑦᓯ-ᐊᓗᓂ ᑲᑎᑎᑕᐅᓂᕐᒥᒃ ᓇᓛᒍᑦᓯᐊᓱᓂ ᐱᓂᐊᕐᓂᖃᕐᓂᐊᕋᒥ.

ᐃᓅᒃ ᑲᑎᑎᑕᐅᔫᒃ ᑯᐯᒃ ᓯᓚᑖᓂ ᑲᑎᑎᑕᐅᓐᓂᐸᓃᒃ, ᒪᓕᒉᑦ ᐊᓯᖏᑦ ᐊᑐᕐᑕᐅᒋᐊᖃᓱᖑᒋᕗᑦ ᑲᑎᑎᑕᐅᓂᒪᒋᒃ ᐱᖁᔭᑎᒍᑦ ᓈᒻᒪᓈᕐᓯᒪᓂᐊᕐᐸᓃᒃ ᓄᓇᓕᕐᓚᒥ ᐅᕝᕙᓗᓐᓃᑦ ᓄᓇᖁᑕᐅᔪᒥ ᑲᑎᑎᑕᐅᕕᖓᓐᓂ. ᖃᐅᔨᓴᕐᓃᓗ ᐊᔪᖀᒋᐊᕈᑏᓪᓗ ᐱᔭᐅᕐᖃᓯᒪᒋᐊᖃᕐᐳᑦ ᑲᑎᑎᑕᐅᔭᕐᑐᓚᕈᕕᑦ ᓄᓇᓕᕐᓚᐱᑦ ᐊᓯᐊᓂ ᓲᕐᓗ ᐅᒥᐊᕐᑐᓗᓯ, ᐅᕝᕙᓘᓐᓃᑦ ᓲᕐᓗ ᒥᓯᓪᓗᓯ ᑲᑎᑎᑕᐅᓂᖃᕈᑦᓯ.

ᓯᕗᓪᓕᐹᑦ ᐱᔭᐅᔪᒪᔪᑦ ᑲᑎᑎᑕᐅᓂᕐᒥ: ᑲᑎᑎᑕᐅᔪᑦᓵᒃ
ᓱᓕᑦᓯᐊᑐᒥᒃ ᑖᓐᓇ ᐱᒻᒪᕆᐅᓂᕐᐸᐅᕗᖅ ᐃᓗᓐᓇᓕᒫᖏᓐᓂᑦ!

ᑲᑎᑎᑕᐅᓂᕐᒥ ᐱᔭᐅᔪᒪᔪᑦ ᑐᖓᓕᖓ: ᖃᓄᐃᓕᖓᓂᖓ
ᑲᑎᑎᑕᐅᓂᖅ ᐊᑑᑎᔭᐅᔪᓐᓇᐳᖅ ᑐᑦᓯᐊᕕᒃᑯᖏᒃᑲᓗᐊᕈᓂ ᐅᕝᕙᓗᓐᓃᑦ ᑐᑦᓯᐊᕕᒃᑰᓗᓂ.

ᑐᑦᓯᐊᕕᒃᑰᖏᑦᑐᖅ ᑲᑎᑎᑕᐅᓂᖅ:

ᑯᐯᒃᒥ ᐃᕐᖃᑐᐃᕕᓕᕆᓂᕐᓄᑦ ᑐᕐᖃᑕᕐᕕᒃ ᑐᑦᓯᐊᕕᒃᑯᖏᑦᑐᒥᒃ ᑲᑎᑎᑕᐅᓂᕐᒥᒃ ᐱᓂᐊᕐᓂᕆᔭᐅᑎᑦᓯᓱᖑᕗᖅ ᐅᑯᓄᖓ:

• ᐃᕐᖃᑐᐃᕕᕐᔪᐊᒥ ᐊᓪᓚᑎᓄᑦ ᐊᓪᓚᑎᐅᓪᓗ ᑐᖓᓕᖏᓐᓄᑦ
• ᐱᖁᔭᑎᒍᑦ ᐱᔪᓐᓇᐅᑎᓕᓐᓂᒃ ᐊᑎᓕᐅᕐᑎᐅᓂᕐᒥᒃ ᐱᖁᔭᑎᒍᑦ ᑲᔪᓯᑎᑕᐅᒋᐊᓕᓐᓂᒃ
• ᓄᓇᓕᓐᓂ ᓯᕗᓕᕐᑎᓂᒃ, ᓄᓇᓕᐅᑉ ᑲᑎᒪᔨᖏᑕ ᐃᓚᐅᔪᖁᑎᖏᓐᓂᒃ ᐅᕝᕙᓗᓐᓃᑦ ᓄᓇᓕᕐᓚᒥ ᓄᓇᓕᐊᕉᑉ ᑲᑎᖕᖓᔨᖏᓐᓂᒃ ᐊᒻᒪᓗ ᓄᓇᓕᐅᑉ ᑲᕙᒫᐱᖓᑕ ᐱᓇᓱᑦᑎᖏᓐᓂᒃ ᑲᑎᑎᑦᓯᒍᓐᓇᑐᓂᒃ ᑯᐯᒃᒥᐅᑦ ᐃᕐᖃᑐᐃᕕᓕᕆᓂᕐᓄᑦ ᑐᕐᖃᑕᕐᕕᖓᑕ ᐊᖏᕐᓯᒪᔭᖏᓐᓂ (ᑕᒪᓐᓇ ᐊᑐᕐᑕᐅᒍᓪᓕᐅᓲᖅ ᓄᓇᓕᒋᔭᐅᔪᒥ)
• ᑭᓇᑐᐃᓐᓇᒧᑦ ᐊᖏᕐᑕᐅᒪᔪᒧᑦ ᑲᑎᑎᑦᓯᒍᓐᓇᓂᕋᕐᑕᐅᓗᓂ ᐃᕐᖃᑐᐃᕕᓕᕆᓂᕐᓄᑦ ᑐᕐᖃᑕᕐᕕᒧᑦ, ᑖᓐᓇ ᑲᑎᑎᑦᓯᔪᖅ ᑲᑎᑎᑕᐅᔫᒃ ᐃᓚᓐᓈᕆᒍᓐᓇᑕᖓ ᐅᕝᕙᓘᓐᓃᑦ ᐃᓚᓪᓚᕆᒋᔭᐅᓗᓂ ᑲᑎᑎᑕᐅᔫᒃ ᓇᓪᓕᑐᐃᓐᓇᖓᓄᑦ

ᐃᓄᒃ ᑲᑎᑎᑦᓯᒍᓐᓇᑎᑕᐅᒍᒪᔪᖅ ᐱᔪᓐᓇᓂᖃᕆᐊᖃᕐᖁᖅ ᑲᒃᑯᓂᖓ

ᖃᓄᐃᓕᖓᒍᑎᐅᔪᓂᒃ:

• ᐅᑭᐅᖃᕆᐊᓕᒃ 18-ᓂ ᐅᖓᑖᓂᓗᓐᓃᑦ ᑲᑎᑎᑦᓯᓂᕐᒥᒃ ᐃᓕᓐᓂᐊᑎᐅᖕᖏᓗᓂ, ᑲᑎᑎᑦᓯᓂᖃᓕᕈᓂ ᐃᑲᔪᕐᑎᖃᕆᐊᑐᖕᖏᓗᓂ, ᐅᕝᕙᓘᓐᓃᑦ ᐊᓯᐊᒍᑦ ᓴᐳᑦᔭᐅᒪᒍᑎᒥᓂᒃ ᑲᒪᔨᖃᕈᓐᓀᓗᓂ
• ᐱᖁᔭᓂᒃ ᓯᖁᒥᑦᓯᓂᕐᒥᒃ ᐊᑑᑎᓚᐅᕐᓯᒪᒍᓐᓀᓗᓂ ᐊᕐᕌᒍᓂ
ᐱᖓᓱᓂ ᑲᑎᑎᑦᓯᓇᓱᓐᓂᒥ ᓯᕗᓂᖓᓂ (ᐅᕝᕙᓘᓐᓃᑦ ᐱᓂᕐᓗᓂᖃᓚᐅᕐᓯᒪᒍᓐᓀᓗᓂ ᐸᓯᔭᐅᒍᑎᑦᓴᔭᒥᒃ ᐊᕐᕌᒍᒥ ᑲᑎᑎᑦᓯᓂᕐᒥᒃ ᐱᓂᐊᕐᓂᖃᕐᕕᒋᓚᖓᔭᒥᓂ)
• ᑲᓇᑕᒥ ᓄᓇᓯᒪᔫᓗᓂ ᐅᕝᕙᓘᓐᓃᑦ ᑯᐯᒃᒥ ᓄᓇᓯᒪᔫᓗᓂ
• ᐊᑐᐊᕐᓯᒍᓐᓇᓯᐊᕐᓗᓂ ᑯᐯᒃ ᐱᖁᔭᖏᓐᓂᒃ ᐃᓅᓯᖃᑦᓯᐊᕆᐊᖃᕐᓂᓄᑦ ᐊᑐᐊᕐᓯᒍᑎᒋᑦᓯᐊᓗᒋᑦ ᑲᑎᑎᑕᐅᔫᓐᓄᑦ ᒍᐃᒍᐃᑎᑐᑦ ᖃᓪᓗᓈᕐᑎᑐᓪᓗᓃᑦ
• ᐊᖏᕐᓯᒪᑦᓯᐊᓗᓂ ᒪᓕᓚᖓᓂᕋᕐᓗᓂ ᑲᑎᑎᑦᓯᒍᑎᐅᑦᓱᑎᒃ ᒪᓕᑦᑕᐅᒋᐊᓕᓐᓂᒃ
ᑐᑭᓯᒋᐊᒃᑲᓂᕈᒪᔪᑦ ᑕᑯᒋᐊᕈᓐᓇᐳᑦ ᑯᐯᒃ ᐃᕐᖃᑐᐃᕕᓕᕆᓂᕐᓄᑦ

ᑕᑯᓇᓱᑦᑕᐅᕕᖓᓂ ᐅᕙᓂ:
(https://www.justice.gouv.qc.ca/en/couples-and-families/marriage-civil-union-and-de-facto-union/officiant)

ᑲᑎᑎᑦᓯᔪᖅ ᐊᓪᓚᓯᒪᔪᑦᓴᓂᒃ ᐊᓪᓚᓯᒪᔪᓕᐅᕈᑎᒥ ᐊᑦᓯᕋᐅᑎᖃᕐᓱᓂ ᖃᓪᓗᓈᕐᑎᑐᑦ Request for the Designation of an Officiant of a Marriage or Civil Union-ᒥᒃ ᐊᓪᓚᒋᐊᓕᒃ ᐊᐅᓪᓚᑎᓪᓗᒍᓗ ᑯᐯᒃᒥ ᐃᕐᖃᑐᐃᕕᓕᕆᓂᕐᓄᑦ ᐱᑦᔪᔨᕕᒻᒧᑦ ᑕᕐᕿᓂ ᐱᖓᓱᓂ ᑲᑎᑎᑦᓯᓂᖃᓚᐅᖕᖏᓂᕐᒥᓂ. ᑲᑎᑎᑦᓯᔪᖅ ᐊᓱᐃᓛᒃ ᑎᑭᑎᑦᓯᕕᐅᓛᓕᕋᒥ ᑐᑭᓯᒪᒍᑎᑦᓴᓂᒃ ᐃᓕᖓᑦᓱᑎᒃ ᑲᑎᑎᑕᐅᓂᕐᒧᑦ, ᑖᒃᑯᓂᖓ ᐊᑐᕐᓗᓂ ᐱᓂᐊᕐᓂᖃᕐᓂᐊᓕᕋᒥ ᑲᑎᑎᑦᓯᓂᑦᓴᖓ ᑎᑭᓪᓗᒍ. ᑲᑎᑎᑦᓯᔪᖅ ᑖᒃᑯᓂᖓ ᐃᓘᓐᓇᓯᐊᖏᓐᓂᒃ ᒪᓕᑦᓯᐊᕆᐊᓕᒃ ᐱᖁᔭᑎᒍᑦ ᐊᑑᑎᒋᐊᓕᒻᒥᓂᒃ ᐊᑑᑎᖁᓪᓗᒍ ᐱᖁᔭᑎᒎᕐᓂᖃᑦᓯᐊᑐᒥᒃ ᑲᑎᑎᑕᐅᒪᓂᕐᑕᖁᓪᓗᒋᒃ ᑲᑎᑎᑕᒋᒃ.

ᑐᑦᓯᐊᕕᒃᑰᑐᖅ ᑲᑎᑎᑕᐅᓂᖅ:

ᐊᔪᕿᕐᑐᐃᔩᓪᓗ ᑐᑦᓯᐊᑎᑦᓯᔩᓪᓗ ᐊᖏᕐᑕᐅᒪᔪ ᑐᑦᓯᐊᕕᒻᒧᑦ ᒪᓕᑦᑕᒥᓄ ᑲᑎᑎᑦᓯᒍᓐᓇᕕᖃᕐᑎᑕᐅᕗᑦ ᐅᑉᐱᓂᒃᑰᑐᒥᒃ ᑲᑎᑎᑦᓯᓂᕐᒥᒃ. ᑌᒣᒐᓗᐊᕐᑎᓗᒋᑦ ᐃᕐᖃᑐᐃᕕᓕᕆᓂᕐᓅᓕᖓᔪᓂᒃ ᑐᕐᖃᑕᕐᕕᒃ ᐊᖏᕐᓯᒪᒋᐊᖃᕆᕗᖅ ᑖᒃᑯᓂᖓ ᑲᑎᑎᑦᓯᒍᓐᓇᕕᖃᕐᑎᓯᓗᓂ.

ᑲᑎᑎᑕᐅᓂᒃᑯᑦ ᖃᓄᐃᓘᕆᐊᓪᓛᕕᖃᖕᖏᑐᑦ: ᐱᐅᓯᖃᕐᑎᑕᐅᒍᑎᒥᒎᕐᑐᑦ

ᑲᑎᑎᑕᐅᓂᐅᑉ ᓯᕗᓂᖓᓂ ᐱᐅᓯᕆᔭᐅᒋᐊᓖᑦ:

ᑲᑎᑎᑕᐅᖃᑎᒌᒍᒪᔫᒃ ᑲᑎᑎᑕᐅᓂᑦᓴᒥ ᓯᕗᓂᖓᓂ ᑲᑎᖕᖓᓯᒋᐊᖃᕐᐴᒃ ᑲᑎᑎᑦᓯᔨᒋᓛᕐᑕᒥᓂᒃ. ᑲᑎᑎᑦᓯᔨᒋᓛᕐᑕᖓ ᑐᑭᓯᒪᑦᓯᐊᕈᑎᑦᓴᒥᓂᒃ ᐱᑦᔪᑎᖃᕐᓗᓂ ᐊᐱᕐᓱᓂᒍᓐᓇᑐᖅ ᑲᑎᑎᑕᐅᓂᕆᒍᒪᔭᖓᓅᓕᖓᔪᓂᒃ, ᓲᕐᓗ, ᐁᑉᐸᑖᕆᓚᖓᔭᖓᑕ ᐊᑎᖓᓂᒃ, ᓯᓚᑎᑦᓴᖏᓐᓂᒃ, ᐅᑭᐅᖏᓐᓂᒃ, ᐊᒻᒪᓗ ᖃᓄᐃᓕᖓᔪᒥᒃ ᑲᕙᒪᓄᑦ ᐃᓕᑕᕆᔭᐅᓂᖃᕐᒪᖔᑦ. ᑲᑎᑎᑦᓯᓛᕐᑐᖅ ᐊᐱᕆᑐᐃᓐᓇᕆᐊᖃᕐᒥᔪᖅ ᐁᑉᐸᕇᕈᒍᒪᔫᒃ ᐊᓪᓚᖁᑎᓂᒃ ᓱᕐᖁᐃᑐᒥᒃ ᖃᓄᐃᓕᖓᔪᒥᒃ ᑲᕙᒪᓄᑦ ᐃᓕᖓᑎᑕᐅᒍᑎᖏᓐᓂᒃ ᐱᑎᑕᐅᒍᒪᓗᓂ. ᑲᑎᑎᑦᓯᔪᖅ ᓱᕐᖁᐃᓯᓯᒪᑦᓯᐊᕆᐊᓕᒃ ᑕᒪᕐᒥᒃ ᑲᑎᑎᑕᐅᒐᓱᑦᑑᒃ ᐃᓱᒪᒥᑦᓯᐊᓱᑎᒃ ᐊᔭᐅᕐᑕᐅᓂᑯᒨᖕᖏᑐᖅ ᑲᑎᑎᑕᐅᒐᓱᒋᐊᖏᒃ. ᑲᑎᑎᑦᓯᔪᖅ ᐁᑉᐸᕇᕈᓚᖓᔫᒃ ᑕᒪᕐᒥᒃ ᐱᖁᔭᑎᒍᑦ ᐱᑕᖃᕆᐊᓕᓐᓂᒃ ᐱᖃᑦᓯᐊᕋᓗᐊᕐᒪᖔᓐᓃᒃ, ᐃᓕᖓᔪᓂᒃ ᐅᑭᐅᖏᓐᓄᓗ ᑲᕙᒪᑎᒍᓪᓗ ᖃᓄᐃᓕᖓᔪᒦᓐᓂᖏᓐᓄᑦ.

ᑌᒪᓕ ᐅᑭᐅᖃᕆᐊᖃᕋᓗᐊᕐᑎᓗᒋᑦ 18-ᓂᒃ ᑲᑎᑎᑕᐅᒍᒪᔪᑦ, ᑯᐯᒃᒥ ᐅᑭᐅᖏᑦ 16-ᖑᓚᐅᕐᐸᑕ ᑲᑎᑎᑕᐅᒍᓐᓇᐳᑦ. ᑌᒣᒃᑲᓗᐊᕐᓱᓂᓗ 16-ᓂᓪᓗ 17-ᓂᓪᓗ ᐅᑭᐅᓖᑦ ᐱᓯᒪᒋᐊᖃᕐᐳᑦ ᐃᕐᖃᑐᐃᕕᒻᒧᑦ ᑲᑎᑎᑕᐅᒍᓐᓇᓂᕋᕐᑕᐅᓗᓂ ᐊᖏᕐᑕᐅᓯᒪᒍᑎᒥᒃ.

ᑲᑎᑎᑦᓯᔪᖅ ᐊᓪᓚᓯᒪᔪᑎᒍᑦ ᐱᒐᓱᒍᑎᖃᕆᐊᖃᕐᐳᖅ ᐃᓄᓕᒫᑦ ᐊᓪᓚᓯᒪᔪᖕᖑᑕᐅᒪᕕᖓᓂᑦ ᐅᕙᖕᖓᑦ Registrar of the Civil Status ᐊᓪᓚᓯᒪᔪᖕᖑᑕᐅᒍᑎᑦᓴᖏᓐᓂᒃ ᑲᑎᑎᑕᒥᑕ. ᑖᒃᑯᐊ ᑐᓴᕐᑕᐅᑎᑦᓯᒍᑎᐅᔪᑦ ᐊᓪᓚᓯᒪᔪᖕᖑᑕᐅᒋᐊᓖᑦ ᑐᑭᒧᐊᑦᑎᓯᔨᐅᑉ/ Directeur’s ᖃᕆᑕᐅᔭᒃᑯᑦ ᐊᓪᓚᓯᒪᔪᖃᐅᑎᖓᓂ ᐅᓪᓗᐃᑦ 20 ᐊᓂᒍᓚᐅᕐᑎᓇᒋᑦ ᑲᑎᑎᑕᐅᓂᑦᓴᖏᑕ ᓯᕗᓂᐊᓃᑦᑐᑦ. ᑐᓴᕐᑕᐅᑎᑦᓯᒍᑏᑦ ᐊᓪᓚᓯᒪᔪᕐᑕᖃᕐᓗᑎᒃ ᐊᑎᖓᓂᒃ, ᓯᓚᑎᑦᓴᖓᓂᒃ, ᓄᓇᓯᒪᕕᖓᓂᒃ, ᐊᕐᕌᒍᕐᒥ ᐃᓅᓕᕐᕕᒋᓯᒪᔭᖏᓐᓂᒃ ᑕᒪᕐᒥᒃ ᐁᑉᐸᑖᕆᒍᓱᓕᕐᑑᒃ, ᖃᖓᓗ ᓇᓪᓕᐊᓂᓗ ᐅᓪᓗᒥᒃ ᑲᑎᑎᑕᐅᕕᒋᓛᕐᑕᖓᓂᒃ ᑲᑎᑎᑦᓯᔨᒋᓛᕐᑕᖓᑕᓗ ᐊᑎᖓᓂᒃ. ᑕᑯᓐᓇᑎ, ᑕᑯᓐᓇᑎᒋᔭᐅᓐᓂᖏᒃᑲᓗᐊᕈᓂ ᑲᑎᑎᑕᐅᔫᓐᓄᑦ, ᓱᓕᓂᕃᖃᑕᐅᒻᒥᑎᓪᓗᒍ ᑖᒃᑯᓂᖓ ᑐᑭᓯᒪᒍᑎᓂᒃ. ᑲᑎᑎᑕᐅᓂᖅ ᐊᑑᑎᔭᐅᒋᐊᓕᒃ ᑕᕐᖀᑦ ᐱᖓᓱᑦ ᐊᓂᒍᓚᐅᕐᑎᓇᒋᑦ ᑌᒪᖕᖓᑦ ᑐᓴᕐᑎᓯᒍᑎᓂᒃ ᐊᓪᓚᓯᒪᔪᖕᖑᐃᒍᑎᐅᓚᐅᔪᓂᕐᒥᓂᑦ, ᑕᒪᑐᒥᖓ ᐊᑑᑎᓐᓂᖏᒃᑯᑎᒃ, ᓄᑖᓂᒃ ᑐᓴᕐᑎᓯᒍᑎᓂᒃ ᐊᑐᕆᐊᑦᓯᐊᕆᐊᖃᓕᕋᔭᕐᑑᑦ.

ᑕᒪᑐᒥᖓ ᑐᓴᕐᑕᐅᑎᑦᓯᓂᖅ ᐱᑦᔪᑎᖃᕐᐳᖅ ᐃᓄᓐᓂᒃ ᖃᐅᔨᒪᑎᑦᓯᒍᑎᑦᓴᐅᓱᓂ ᑲᑎᑎᑕᐅᓂᖃᓛᕐᑑᓂᒃ ᑲᑎᑎᑦᓯᓛᕐᑐᒥᒃ ᑲᑎᑎᑦᓯᓂᖃᓚᐅᕐᑎᓇᒍ ᐅᖃᐅᑦᔨᒋᐊᖃᕈᑎᒃ ᐱᕕᑦᓴᖃᑦᓯᐊᖁᓪᓗᒋᑦ ᑲᑎᑎᑕᐅᒋᐊᖃᖕᖏᓂᕃᓗᑎᒃ ᑲᑎᑎᑕᐅᒍᒪᔫᓐᓂᒃ. ᓲᕐᓗ, ᑲᑎᑎᑦᓯᖁᔭᐅᓯᒪᔪᖅ ᑲᑎᑎᑦᓯᒍᒪᖕᖏᑑᒍᑎᖃᕈᓐᓇᒪᑦ ᐁᑉᐸᕇᕈᒐᓱᑦᑑᒃ ᐊᐅᖃᑎᒌᖑᓗᐊᑐᐊᕐᐸᓃᒃ ᐱᖁᔭᓄᑦ ᐃᓕᑕᕆᔭᐅᔪᒥᒃ, ᐅᕝᕙᓗᓐᓃᑦ ᓇᓪᓕᑐᐃᓐᓇᖓ ᑲᑎᑎᑕᐅᒐᓱᑦᑐᖅ ᐱᖁᔭᑎᒍᑦ ᐊᓯᐊᓂᒃ ᑲᑎᑎᑕᐅᒪᖃᑎᖃᖏᓐᓇᑐᐊᕐᐸᑦ.

ᓱᑌᔪᕐᑐᒥᒃ ᖃᓄᐃᓕᖓᓃᑦ ᑐᖕᖓᕕᒋᓗᒋᑦ, ᑲᑎᑎᑦᓯᖁᔭᐅᔪᖅ ᐅᕝᕙᓘᓐᓃᑦ ᐃᓄᓕᒫᑦ ᐊᓪᓚᓯᒪᔪᖕᖑᑕᐅᒪᕕᖓᑦ ᐅᓇ Registrar of the Civil Status ᑐᑭᑖᕈᑎᖃᕈᓐᓇᒪᑦ ᑐᓴᕐᑎᓯᒍᑎᓂᒃ ᐊᓪᓚᓯᒪᔪᖕᖑᐃᓚᖓᒍᓐᓀᓗᓂ, ᓲᕐᓗ ᐃᒣᑉᐸᑦ, ᓇᓪᓕᖓ ᑲᑎᑎᑕᐅᒐᓱᑦᑐᖅ ᐋᓐᓂᐊᒪᕆᑐᐊᕐᐸᑦ ᑐᖁᓂᐅᔭᓚᕿᓗᓂ.

ᖃᒻᒥᑯᑦ ᐱᐅᓯᖃᕐᐸᓕᕆᕗᑦ, ᐁᑉᐸᑖᕆᖑᔫᒃ ᑲᑎᑎᑕᐅᒋᐊᒥᒃ ᐊᖏᖃᑎᒌᓯᒪᓂᕐᒥᓄᑦ ᐊᑎᓕᐅᕐᓯᒪᒍᑎᓕᐅᕐᓂᒥᒃ ᐱᖁᔭᑎᒍᑦ ᐊᓪᓚᓯᒪᔪᓂᒃ ᓱᓕᓕᕐᑎᓯᔨᐅᑉ ᓴᖓᓂ, ᑌᒣᓪᓗᐊᓕᕐᑎᓗᒍ ᐱᐅᔫᓱᖑᕗᖅ ᑲᑎᑎᑕᐅᒪᓂᕐᒥᒍᑦ ᖃᓄᐃᓕᖓᓂᑦᓴᒥᓂᒃ ᐋᕐᕿᒋᐊᒥᒃ. ᖃᓄᐃᓕᖓᔪᓂᑦᓴᒥᓂᒃ ᐋᕐᕿᓯᒪᖕᖏᑐᐊᕈᑎᒃ, ᐁᑉᐸᑕᕇᖑᔫᒃ ᐃᓕᖓᓂᖃᓯᑦᓴᐅᑎᒋᓛᕐᐴᒃ ᑲᑎᑎᑕᐅᒪᓂᖃᓯᓗᑎᒃ ᓱᓇᓕᒫᑦᓯᐊᓂᒃ ᓇᓪᓕᖁᐊᕇᒥᒃ ᐱᐅᓕᓂᐊᒐᕐᒥᓂᒃ ᐊᓯᓕᒫᖏᓐᓂᓗ ᐱᖃᕐᓂᕋᕐᑐᐃᓇᐅᒍᓐᓇᓯᓗᑎᒃ.

ᐱᐅᓯᕆᔭᐅᓲᑦ ᑲᑎᑎᑕᐅᓂᕐᒥᒃ ᓇᓪᓕᐅᓂᕐᓯᐅᕈᑎᖃᕐᓂᒧᑦ ᑎᑭᐅᑎᑎᑦᓯᒍᑏᑦ ᑲᑎᑎᑕᐅᓂᕐᒥᒃ ᓇᓪᓕᐅᓂᕐᓯᐅᕈᑎᖃᕐᓂᖅ ᓇᓂᑐᐃᓐᓇᖅ ᐊᑑᑎᔭᐅᔪᓐᓇᐳᖅ ᓇᔪᕐᑕᐅᔪᖅ ᐅᐸᑦᑕᐅᒍᓐᓇᕕᖃᑦᓯᐊᓚᐅᕐᐸᑦ ᐃᓄᓐᓄᑦ ᓇᓪᓕᑐᐃᓐᓇᖓᓂᓗ ᐅᓪᓗᖃᕈᓐᓇᓱᓂ ᑲᑎᑎᑦᓯᔨᐅᓚᖓᔫᑉ ᐊᑐᐃᓐᓇᐅᕕᒋᒍᓐᓇᑕᑐᐃᓐᓇᖓᓂ.

ᐱᐅᓯᕆᔭᐅᓲᑦ ᑲᑎᑎᑕᐅᓂᕐᒥ:

ᐁᑉᐸᕇᕈᕐᑑᒃ ᐃᓱᒪᒥᓪᓗᑎᒃ ᑲᑎᑎᑕᐅᓂᒃᑯᑦ ᓇᓪᓕᐅᓂᕐᓯᐅᓂᖃᕈᓐᓇᐴᒃ ᐋᕐᕿᓯᒪᒍᑎᒋᒍᒪᔭᒥᓐᓂᒃ ᐅᑉᐱᕈᓱᒍᑎᒥᓂᒃᓗ. ᓲᕐᓗ ᓂᑦᔭᑎᑕᐅᖁᔭᒥᓂᒃ ᓂᑦᔮᔫᕐᓗᑎᒃ ᐊᒻᒪᓗ ᐊᑐᐊᕐᑕᐅᖁᓯᒪᔭᖏᑦ ᐊᓪᓚᓂᐊᕐᑕᐅᓗᑎᒃ, ᐊᓪᓚᒍᓐᓇᓱᑎᒃᓗ ᓇᒻᒥᓂᖅ ᐅᖃᒻᒪᕆᐅᑎᒋᓚᖓᔭᒥᓂᒃ, ᐊᓯᖏᓐᓂᓗ. ᐁᑉᐸᑖᕆᑦᑑᒃ ᐃᓱᒪᒥᑦᓯᐊᑑᒃ ᐊᑐᕈᒪᔭᒥᓐᓂᒃ ᐊᑐᕈᓐᓇᓂᖃᕐᓱᑎᒃ!

ᑭᓯᐊᓂᑦᑕᐅᖅ ᐱᐅᓯᕆᔭᐅᓲᑦ ᐃᓚᖏᑦ ᒪᓕᑦᑕᐅᒋᐊᖃᕆᕗᑦ. ᐅᖃᕆᐊᓪᓚᐳᒍᑦ, ᑲᑎᑎᑦᓯᔨᖓᑦ ᐊᖏᕐᑕᐅᒍᑎᖃᕆᐊᓕᒃ ᑲᑎᑎᑦᓯᒍᓐᓇᐅᑎᖃᕐᓗᓂ. ᑲᑎᑎᑕᐅᔪᒃ ᒪᕐᕉᓂᒃ ᑕᑯᓐᓇᑎᖃᕆᐊᓖᒃ. ᑲᑎᑎᑦᓯᔪᖅ ᐊᓪᓚᓂᐊᕆᐊᓕᒃ ᐊᓪᓚᑕᐅᒪᔪᓂ ᑯᐯᒃᒥᐅᑦ ᐃᓅᓯᖃᑦᓯᐊᕆᐊᖃᕐᓂᒧᑦ ᐱᖁᔭᖃᕐᑎᑕᐅᒍᑎᖏᓐᓂᒃ ᑖᒃᑯᐊ ᐊᓪᓚᓂᐊᕐᑕᖏᑦ ᐃᓕᖓᓂᖃᕐᑐᑦ ᐱᔪᓐᓇᐅᑎᖃᕈᑎᖏᓐᓄᓗ ᐱᔭᕆᐊᓕᖏᓐᓄᓗ. ᐊᓪᓚᓂᒃ ᐊᑐᐊᕐᓯᔪᖅ ᖃᓪᓗᓈᕐᑎᑐᓪᓗᓃᑦ ᒍᐃᒍᐃᑎᑐᓪᓗᓃᑦ ᐊᓪᓚᓂᐊᕐᑎᓗᒍ. ᓇᓪᓕᖏᓪᓗᓃᑦ ᑲᑎᑎᑕᐅᔫᒃ ᐅᖃᐅᓯᕐᒥᒃ ᐊᑐᕐᑕᐅᔪᒥᒃ ᑐᑭᓯᐊᖕᖏᐸᓃᒃ, ᑐᓵᔨᒋᓂᐊᕐᑕᒥᓂᒃ ᐱᓇᓱᑦᑎᓯᒋᐊᖃᕐᐴᒃ ᓇᒻᒥᓂᖅ ᐊᑭᓕᕐᑐᓗᓂᐅᒃ. ᐊᓪᓚᓂᐊᕐᑕᐅᒋᐊᓕᓐᓂᒃ ᐊᑐᐊᕐᓯᒌᕈᓂ, ᑲᑎᑎᑦᓯᔪᖅ ᐊᐱᕐᓱᕆᐊᖃᕐᐳᖅ ᑕᒪᖏᓐᓂᒃ ᑲᑎᑎᑕᐅᔫᓐᓂᒃ ᐊᖏᕈᑎᖃᖁᓗᒋᒃ ᑲᑎᑎᑕᐅᓂᕐᒥᓂᒃ ᐊᓱᐃᓛᓗ ᐅᖃᒻᒪᕆᒍᑎᒋᓯᓗᒋᒃ ᑲᑎᑎᑕᐅᒪᓂᕐᑖᕆᐊᖏᒃ.

ᑭᖑᓪᓕᐸᐅᑎᓪᓗᒍ, ᑲᑎᑎᑦᓯᔪᖅ ᐊᑎᓕᐅᕐᕕᖃᕆᐊᖃᕐᖁᖅ ᑲᑎᑎᑕᐅᔫᒃ ᐅᖃᒻᒪᕆᑦᑕᐅᒍᑎᖓᓂᒃ. ᑲᑎᑎᑕᐅᔫᓪᓗ ᐊᒻᒪᓗ ᒪᕐᕉᒃ ᑕᑯᓐᓇᑎᒋᒃ ᐊᑎᓕᐅᖃᑕᐅᒋᐊᖃᕐᒥᔪᑦ. ᐅᖃᒻᒪᕆᐅᑎ ᐱᑕᖃᕐᑎᓯᒍᑎᐅᓯᒻᒪᑦ ᐊᓪᓚᓯᒪᔪᓂᒃ ᓱᕐᖁᐃᓯᒍᑎᑦᓴᓂᒃ ᑲᑎᑎᑕᐅᓂᖃᕆᐊᖏᒃ. ᑲᑎᑎᑦᓯᔪᖅ ᐅᖃᒻᒪᕆᐅᑎᓂᒃ ᐊᐅᓪᓚᑎᑦᓯᒋᐊᓕᒃ ᑐᕌᕐᑎᓗᒋᑦ ᐅᕗᖓ Registrar of the Civil Status/ᐃᓄᓕᒫᑦ ᐊᓪᓚᓯᒪᔪᖕᖑᑕᐅᒪᕕᖓᓄᑦ ᐊᐅᓪᓚᑎᓪᓗᓂᒋᑦ ᐅᓪᓗᐃᑦ 30 ᐊᓂᒍᓚᐅᕐᑎᓇᒋᑦ ᑲᑎᑎᑦᓯᓂᕆᓚᐅᕐᑕᒥ ᑭᖑᓂᐊᓂ. Directeur/ᐊᓪᓚᓯᒪᔪᓕᕆᔨ ᐊᑐᐃᓐᓇᕈᐃᓂᐊᓕᕐᒪᑦ ᐃᓕᑕᕆᔭᐅᓂᓕᒻᒥᒃ ᑲᑎᑎᑕᐅᒪᓂᕃᒍᑎᒥᒃ. ᑲᑎᑎᑕᐅᔫᒃ ᐊᓪᓚᖁᑎᑕᖑᔪᑦ ᐊᑦᔨᖏᓐᓂᒃ ᐱᒍᒪᑐᐊᕈᑎᒃ, ᐊᓪᓚᓯᒪᔪᑎᒍᑦ ᐱᒐᓱᒋᐊᖃᕐᐴᒃ ᐊᓪᓚᓗᑎᒃ ᐅᕗᖓ Registrar of the Civil Status/ᐃᓄᓕᒫᑦ ᐊᓪᓚᓯᒪᔪᖕᖑᑕᐅᒪᕕᖓᓄᑦ.

ᐃᓅᓯᖃᕐᓂᐊᓕᕐᒪᓃᒃ ᖁᕕᐊᓇᕐᑐᒥᒃ ᐃᓱᖃᖕᖏᑐᒧᑦ, ᑲᑎᑎᑕᐅᓂᖓᑦ ᓇᓛᒍᕐᓯᒪᑦᓯᐊᑎᓪᓗᒍ!

ᐱᖁᔭᓕᕆᐅᑎᑎᒍᑦ ᐃᑲᔪᕐᓯᒍᑏᑦ ᓯᕗᓂᖃᕈᑎᐅᕗᑦ ᑐᑭᓯᒪᑎᑦᓯᒍᑎᑦᓴᐅᓂᕐᒥᒃ ᓄᓇᕕᐅᑉ ᐃᓄᑐᐃᓐᓇᖏᓐᓂᒃ ᐃᓗᓐᓈᒍᑦ ᐊᒻᒪᓗ ᐊᕗᖓᐅᓕᒍᓐᓇᑐᒥᒃ ᐱᐅᓯᖃᕐᓗᓂ ᐃᓕᖓᑎᓪᓗᖏᑦ ᐱᖁᔭᓄᑦ ᐊᑐᕐᑎᑕᐅᔪᓄᑦ ᑯᐯᒃᒥ ᐃᓕᖓᖕᖏᓚᓪᓗ ᐱᖁᔭᑎᒎᕐᑐᓂᒃ ᐃᓱᒪᖃᕐᓂᓄᑦ ᐅᕝᕙᓗᓐᓃᑦ ᐱᖁᔭᑎᒎᕐᑐᓂᒃ ᐊᔪᖀᒋᐊᕐᓂᒧᑦ ᑖᒃᑯᐊ ᐱᔭᐅᔪᓐᓇᒪᑕ ᐱᓇᓱᑦᑎᓯᒍᑎᐅᓗᑎᒃ ᓇᒻᒥᓂᖅ ᐱᓇᓱᒐᖁᑎᓕᓐᓂᒃ (ᐱᖁᔭᓕᕆᔨᓂᒃ ᐅᕝᕙᓘᓐᓂᑦ ᐱᖁᔭᑎᒎᕐᑐᓂᒃ ᐊᑎᓕᐅᕈᓐᓇᑐᓂᒃ). ᒪᑭᕝᕕᐅᑉ ᐱᖁᔭᓕᕆᔨᖏᑦ ᓇᑯᕐᒦᐳᑦ www.educaloi. qc.ca-ᒥᒃ ᐃᓗᓐᓈᒍᑦ ᐃᑲᔪᕐᓯᒋᐊᕈᑎᒋᓲᖏᓐᓄᑦ ᐊᑐᐃᓐᓇᕈᕐᑎᑕᐅᑎᓪᓗᒋᑦ ᑖᒃᑯᐊ ᐱᖁᔭᓕᕆᒍᑎᑎᒍᑦ ᐃᑲᔪᕐᓯᒍᑎᓕᐊᖑᔪᑦ.