ᑖᒃᑯᐊ ᐅᓂᒃᑲᓕᐊᑦ ᑐᖓᓕᒋᔭᐅᕗᑦ ᑕᕐᕋᓕᒃ ᕿᒥᕐᕈᐊᑦ ᐅᓂᒃᑲᐅᓯᖃᕈᑎᒋᖃᑦᑕᓚᖓᔭᖏᓐᓄᑦ ᐊᕐᓇᓂᒃ ᐱᓇᓱᒐᓕᓐᓂᒃ ᐃᓄᐃᑦ
ᐃᓚᖏᓐᓄᑦ ᐃᓱᒪᒋᔭᐅᔪᓂᒃ “ᐊᕐᓇᐅᑉ ᐱᓇᓱᒐᑦᓴᔭᕆᖕᖏᑕᖓᓂᒃ” ᐱᓇᓱᒐᓕᓐᓂᒃ
ᓄᓇᕕᒻᒥ ᐳᓕᓰᑦ ᐱᑦᔪᔨᒍᑎᖏᓐᓄᑦ ᐳᓖᓯᐅᖃᑎᐅᔪᖅ ᐅᓛᔪ ᑐᐳᐃ-ᒥᕉᓐ ᐅᖃᕐᑐᖅ ᐳᓖᓯᐅᑉ ᐱᓇᓱᒐᖏᓐᓂᒃ, ᑕᒪᓐᓇ ᐱᓇᓱᒐᖅ ᐃᓱᒻᒪᓯᑎᒍᑦ ᐊᖑᑎᓯᐅᑎᐅᓂᕋᕐᑕᐅᔪᖅ, ᐱᔭᕐᓃᑐᑲᓪᓚᐅᕙᑉᐳᖅ, ᑭᓯᐊᓂᓗ ᓲᕐᓗ ᐃᓱᕐᕆᓕᕐᓇᑑᑦᓱᓂ.
“ᐃᓄᐃᑦ ᐃᓚᖏᑦ ᐃᓱᒪᒻᒪᑕ ᐊᕐᓀᑦ ᓄᑭᖃᑦᓯᐊᖏᓗᐊᕆᐊᖏᑦ ᓴᖕᖐᓗᐊᕆᐊᖏᓪᓗ, ᑕᐸᓀᑦᑐᓂᐊᕐᖃᔭᖕᖏᓗᐊᕆᐊᖏᓪᓗ, ᐱᔪᓐᓇᓯᐊᖕᖏᒋ-ᐊᖏᓪᓗ. ᑕᑯᑎᑦᓯᒋᐊᖃᖏᓐᓇᓱᖑᔪᒍᑦ ᐱᔪᓐᓇᓂᖃᑦᓯᐊᕆᐊᑦᑕ ᓯᖁᒥᓪᓗᒍᓗ ᐊᖑᑎᓯᐅᑎᐅᒋᐊᖓ ᐳᓕᓯᐅᑉ ᐱᓇᓱᒐᖓᓂᒃ ᐃᓱᒻᒪᓯᖅ,“ ᐅᖃᕐᑐᖅ ᐅᓛᔪ. “ᖃᐅᔨᒪᔭᐅᒋᐊᖃᕆᕗᑦ ᐊᕐᓀᑦ ᐳᓖᓯᐅᒍᓐᓇᓂᖃᑦᓯᐊᕆᐊᖏᑦ ᐊᖑᑎᑎᑐᑦ ᐱᒍᓇᓂᖃᑦᓯᐊᓱᑎᒃ, ᐅᑉᐱᕈᓱᑉᐳᖓᓗ ᐅᓪᓗᒥ ᐃᓄᐃᑦ ᖃᐅᔨᒪᓂᕐᓴᐅᓕᕆᐊᖏᑦ ᑕᒪᓐᓇ ᐊᕐᓇᒧᑦ ᐳᓖᓯᐅᓂᖅ ᐱᓇᓱᑦᑕᐅᓯᐊᕐᐸᒥᒋᐊᖓ.”
ᐳᓖᓯ ᐅᓛᔪ ᑐᐳᐃ-ᒥᕉᓐ ᑰᒃᔪᐊᒥ ᐃᓅᓕᕐᓯᒪᕗᖅ ᖃᓪᓗᓈᓪᓗ ᓄᓇᖓᓄᑦ ᐃᓚᒌᑦ ᐊᐅᓪᓛᓚᐅᕐᓯᒪᕗᑦ ᐃᓕᓐᓂᐊᓂᕐᒥᒃ ᐱᑦᔪᑎᖃᕐᓱᑎᒃ ᐅᑭᐅᖃᓕᕐᑎᓗᒍ 7-8 ᒥᑦᓯᑎᓐᓂ. ᐳᕐᑐᓂᕐᓴᒥᒃ ᐃᓕᓐᓂᐊᑕᒥᓂᒃ ᐱᔭᕇᕋᒥ, ᑰᒃᔪᐊᒥ ᐱᓇᓱᒐᕐᒥᒃ ᐱᒋᐅᕐᓴᓚᐅᕐᑐᓯᒪᔪᖅ ᐱᓇᓱᖃᑕᐅᑦᓱᓂ ᐱᓂᕐᓗᑐᖃᕐᑎᓯᑦᑌᓕᓂᕐᒥᒃ ᐱᓇᓱᑦᑎᒧᑦ ᐃᓕᓐᓂᐊᕆᐊᓛᑐᐃᓐᓇᓱᓂ ᐱᔭᕇᕐᓗᓂ ᐳᓖᓯᐅᒋᐊᒥᒃ ᐱᒋᐅᕐᓴᔭᐅᒍᑎᓂᒃ ᐊᓐᑎᐅᔨᐅᒥ ᐳᓕᓯᐅᒋᐊᒥᒃ ᐳᕐᑐᓂᕐᓴᒋᐊᓪᓚᒥᒃ ᐃᓕᓐᓂᐊᕕᒻᒥ. ᐃᓕᓐᓂᐊᑕᒥᓂᒃ ᐱᔭᕇᓚᐅᔪᔪᖅ ᓅᕕᒻᐱᕆ 2019-ᒥ ᐱᓇᓱᐊᕈᓰᓪᓗ ᐊᒥᓲᖕᖏᑐᑦ ᐊᓂᒍᕐᑎᓗᒋᑦ ᑰᒃᔪᐊᒧᑦ ᓄᑦᑎᓕᓚᐅᔪᒋᕗᖅ ᐳᓖᓯᓄᑦ ᐱᓇᓱᖃᑎᐅᒋᐊᕐᑐᓯᑦᓱᓂ ᐱᒋᐊᖕᖓᐅᑎᖃᕐᓱᓂ ᐊᕐᖁᑎᒃᑯᑦ ᐃᖏᕐᕋᔭᑲᑦᑎᐅᓂᕐᒥᒃ. ᐁᕆᓕ 2021-ᒥᓂᑦ ᐱᓇᓱᒐᖃᓕᕐᑐᖅ ᐳᓖᓯᐅᓂᕐᒥᒃ ᐊᒥᓱᐃᓕᖓᔪᓂᒃ ᐱᓇᓱᒐᓕᓐᓂᒃ ᐱᓇᓱᖃᑎᖃᕐᓱᓂ ᓄᓇᕕᐅᑉ ᐳᓖᓯᖏᑕ ᐱᑦᔪᔨᔨᖏᓐᓂᓗ ᑯᐯᒃ ᑲᕙᒪᒃᑯᓗ ᑭᓪᓕᓯᓂᐊᕐᑎᖏᓐᓂᒃ.
ᖁᓚᕐᓇᖏᑦᑐᖅ ᐊᖑᑏᑦ ᐳᓕᓰᑦ ᐊᒥᓲᓂᕐᓴᐅᒋᐊᖏᑦ ᐊᕐᓇᓂᑦ ᐱᓇᓱᑦᑐᑦ ᐃᓄᓕᒫᑦ ᐱᓂᕐᓗᓂᕐᒨᑌᓕᒋᐊᖃᕐᓂᖏᓐᓂᓗ ᐊᒻᒪᓗ ᑲᑉᐱᐊᓇᕐᑐ-ᒧᕐᑌᓕᒋᐊᖃᕐᓂᖏᓐᓂᒃ ᑕᒫᓂ ᓄᓇᓕᕐᔪᐊᑎᓐᓂ. ᑲᓇᑕᐅᑉ ᑲᕙᒪᖓᑕ ᐱᑦᔪᔨᕕᖓ ᐃᓕᖓᔪᖅ ᐃᓄᓕᒫᓂᒃ ᐱᓂᕐᓗᓂᕐᒨᑌᓕᒋᐊᖃᕐᓂᖏᓐᓂᒃ ᖃᕆᑕᐅᔭᒃᑯᑦ ᑕᑯᓇᓱᑦᑕᐅᕕᖓᓂ ᐅᖃᕐᒪᑕ ᐊᕐᓀᑦ ᐱᓇᓱᑦᑏᑦ 50%-ᖏᑦ ᐱᓇᓱᒐᖃᕆᐊᖏᑦ ᒪᓕᒐᖃᕐᑎᓯᒍᑎᓕᕆᓂᕐᓂᒃ, ᑭᓪᓕᓯᓂᐊᕐᓂᓂᒃ ᐊᒻᒪᓗ ᐱᓂᕐᓗᓯᒪᔪᓂᒃ ᑎᒍᔭᐅᒪᕕᒻᒨᕆᓃᑦ, ᑌᒣᒃᑲᓗᐊᕐᓱᑎᒃ ᐃᑭᓐᓂᓴᓂᒃ 25%-ᓂᑦ ᐱᓇᓱᑦᐸᐳᑦ ᐳᓖᓯᐅᓂᕐᓂᒃ. ᑭᓯᑕᐅᒪᒍᑎᖏᑦ ᑕᑯᑦᓱᒋᑦ ᓄᓇᕕᒻᒥᐅᑦ ᑌᒪᖕᖓᑦ ᒣ 1, 2022-ᖑᓚᐅᔪᒻᒪᓂᓂᑦ, ᓄᓇᕕᒻᒥ ᐳᓖᓯᖃᕐᓂᒥᒃ ᐱᑦᔪᔨᕕᒃ ᑐᓴᕐᑕᐅᑎᑦᓯᓯᒪᕗᖅ 14%-ᒥᑦ ᐃᑭᓐᓂᓴᐅᒋᐊᖏᑦ ᐊᕐᓀᑦ ᐳᓖᓯᖁᑎᖏᑦ (76 ᐊᖑᑏᑦ ᐳᓕᓰᑦ ᐊᒻᒪᓗ 12 ᐊᕐᓀᑦ ᐳᓕᓰᑦ).
COURTESY OF CST. ULAAYU DUPUIS-MIRON
ᐳᓖᓯ ᑐᐳᐃ-ᒥᕈᓐ ᐱᓇᓱᒐᕐᒥᒃ ᐅᓇᒻᒥᓱᐊᓯᓚᐅᔪᕗᖅ ᐊᒥᓱᐃᓂᒃ ᐊᑕᐅᑦᓯᑯᑦ ᐱᓇᓱᒐᕐᑕᖃᕐᒪᑦ, “ᐅᓪᓗᑕᒫᑦ ᑌᒫᑦᓭᓇᓕᓚᐅᕐᓯᒪᖕᖏᑐᒥᒃ ᐱᓇᓱᒍᒪᑦᓱᓂ, ᖃᐅᔨᒪᓇᖕᖏᒪᑦ ᐅᓪᓗᒥ ᓱᔪᖃᕐᓂᐊᓕᕐᒥᒪᖔᑦ,” ᓚᑦᓱᓂ ᑐᑭᓯᑎᑦᓯᔪᖅ. “ᐱᓇᓱᒐᖃᕋᑦᑕ ᐃᓄᓐᓂᒃ ᓴᐳᑦᔨᓯᒪᔪᑦᓴᐅᓱᑕ ᐱᑦᔪᔨᒋᐊᖃᕐᓱᒋᓪᓗ. ᓄᓇᕐᖃᑎᒌᓂᒃ ᐃᑲᔪᕈᒪᒐᒪ, ᐱᓂᕐᓗᑕᐅᒪᔪᓂᓪᓗ ᐊᓯᒥᓂᒃ ᐅᑉᐱᕆᔭᖃᕐᖃᔦᕐᓯᒪᔪᓂᒃ ᐃᑲᔪᕐᑕᐅᒍᓐᓇᓂᒃᑯᑦ ᐊᒻᓗ ᓄᕐᖃᑎᑦᓯᓗᖓ ᐱᓂᕐᓗᐸᑦᑐᓂᒃ ᓄᓇᓕᑦᑎᓂ, ᑲᑉᐱᐊᓇᖕᖏᓂᕐᓴᕈᖁᓗᒍ.” ᐅᓛᔪ ᐱᓇᓱᒐᖃᓱᖑᕗᖅ ᐃᒥᐊᓗᓐᓂᒃ ᓂᐅᕐᕈᓯᕐᑎᓂᒃ ᓄᕐᖃᑎᑦᓯᒐᓱᓐᓂᒥᒃ ᐊᒻᒪᓗ ᐊᓯᖏᓐᓂᒃ ᐋᖓᔮᓐᓇᑐᓂᒃ ᓂᐅᕐᕈᓯᕐᑎᓂᒃ ᓄᓇᕕᒻᒥ, ᑌᒣᒃᑲᓗᐊᕐᓱᓂ ᐅᖃᕐᒥᔪᖅ ᓄᓇᕐᖃᑎᒌᓄᑦ ᐃᑲᔪᕐᑕᐅᖃᑦᑕᑐᑦᓴᐅᒋᐊᒥᒃ ᐱᓇᓱᖃᑎᐅᓗᑎᓪᓗ ᐱᔭᑦᓴᖁᑎᒥᓂᒃ ᐅᓪᓗᖅ ᐊᓂᒍᕐᐸᑦ ᐱᔭᕇᕐᓯᒪᑦᓯᐊᓂᕐᒥᒃ ᐱᓂᐊᕐᓗᓂ.
ᑌᒪᓕ ᐱᓇᓱᑦᑕᖓ ᐅᖁᒣᑦᑐᑲᓪᓚᑕᖃᕐᐸᑲᓗᐊᕐᑎᓗᒍ, ᐳᓖᓯ ᑐᐳᐃ-ᒥᕈᓐ ᐅᖃᕐᑐᖅ, ᐃᑉᐱᓂᐊᕐᓂᑯᑦ ᐅᑎᕐᕕᐅᒍᑎᑦᓯᐊᑦ ᐊᖏᔪᒻᒪᕆᐅᓱᖑᒋᐊᖏᑦ. ᐊᕐᓀᑦ ᐱᓂᕐᓗᑕᐅᔪᑦ ᐃᓱᐊᕆᔭᖃᕐᓂᓴᐅᓱᖑᒻᒪᑕ ᐅᖃᕕᖃᕆᐊᒥᒃ ᖃᓄᐃᓘᕐᑕᐅᒍᑎᒋᓚᐅᕐᑕᒥᓂᒃ ᐊᓯᒥᓄᑦ ᐊᕐᓇᒧᑦ ᐅᖄᒍᓐᓇᓯᐊᕐᓂᓴᐅᑦᓱᑎᒃ ᐱᓇᓱᒐᖓᓗ ᐱᔭᖃᕆᐊᖃᓗᐊᖕᖑᐊᓱᖑᕗᖅ ᓄᕐᖃᑎᑦᓯᒋᐊᕆᐊᒥᒃ ᐊᕗᖓᐅᓕᓗᐊᓚᐅᖕᖏᓂᖏᓐᓂ ᐱᓂᕐᓗᕈᑎᐅᓕᕐᑐᑦ, ᐊᕐᓀᑦ ᐊᕐᓇᒧᑦ ᓄᓪᓚᑎᑕᐅᑦᓯᐊᓴᐅᑎᒋᓂᕐᓴᐅᓱᖑᒻᒪᑕ. ᐱᔭᖃᕈᓐᓇᓂᖅ ᐋᖓᔮᓐᓇᑐᓂᓪᓗ ᐃᒥᐊᓗᓐᓂᓗ ᐊᕐᓵᓯᓂᕐᒥᒃ ᐱᓇᓱᒐᕐᒪ ᐱᐅᓂᕐᐹᖑᒍᑎᒋᓱᕆᕙᖓ, ᐃᓚᐅᑎᓪᓗᒋᑦ ᐱᔭᑦᓴᖁᑎᑦᑕ ᐊᑦᔨᒌᖕᖏᑐᒻᒪᕆᐅᓂᖏᑦ, ᐱᓇᓱᖃᑎᒌᖃᑎᖃᕆᐊᒥᓪᓗ. ᐱᓂᕐᓗᑕᐅᒪᔪᓂᒃ ᐃᑲᔪᕈᒪᓂᖅ ᐃᑲᔪᕐᑕᐅᒍᒪᖕᖏᑐᓂᒃ, ᐅᖁᒣᑦᑐᕙᑦᑐᖅ, ᐅᖃᕐᑐᖅ ᐅᓛᔪ, ᐊᒥᓱᓂᓪᓗ ᑫᕙᓪᓚᒍᓯᕐᓂᒃ/ᐃᑲᐅᕐᓂᓂᒃ ᐱᓇᓱᒋᐊᖃᕐᓂᖅ. ᑭᓯᐊᓂ ᑕᒪᒃᑯᐊᖑᒐᓗᐊᕐᑎᓗᒋᑦ ᐱᓇᓱᒐᖅ ᐱᒐᓱᒍᒥᓇᕆᐊᓪᓚᑐᐃᓐᓇᖏᓐᓇᓲᖅ ᐅᖃᕐᑐᖅ ᐅᓛᔪ.
ᐊᕐᓇᐅᖃᑎᒥᓂᒃ ᑫᓪᓚᑐᐃᔪᖅ ᐱᔪᒪᑉᐸᑕ ᑲᔪᓯᖁᑦᓱᒋᑦ ᐱᓇᓱᒐᖃᕐᓂᒥᒃ ᐳᓖᓯᐅᓂᕐᒥᒃ. “ᐳᓖᓯᐅᒍᒪᓪᓚᕆᒃᑯᑎᒃ ᐱᓇᓱᒍᒪᒍᓂᐅᓪᓗ ᐱᒐᓱᒐᑦᓴᓯᐊᒻᒪᕆᐅᔪᖅ. ᐱᓇᓱᒐᕋ ᐊᓕᐊᒋᒻᒪᕆᑦᑕᕋ ᐊᓯᐊᓂᒃ ᐱᓇᓱᒐᕐᒥᒃ ᐱᓇᓱᒍᒪᒐᔭᖕᖏᓚᖓ” ᐅᖃᕐᑐᖅ ᐳᓖᓯ ᑐᐳᐃ-ᒥᕈᓐ ᒫᓐᓇᓗ ᐱᓇᓱᒐᕐᒥᓂᒃ ᐳᕐᑐᓂᕐᓴᒋᐊᓪᓚᒥᒃ ᐱᔭᖃᕋᓱᓕᕆᕗᖅ ᑭᓪᓕᓯᓂᐊᕐᑎᕈᒐᔭᕐᓱᓂ ᓄᓇᕕᒻᒥ ᐳᓕᓰᑦ ᐱᑦᔪᔨᕕᖓᓐᓂ.
