ᐊᑦᔨᖑᐊᑦ ᐃᓘᓐᓇᑎᒃ ᐱᒋᔭᐅᔪᑦ ᓄᓇᕕᒻᒥ ᖃᐅᔨᓴᕐᓂᓂᒃ ᐱᑦᔪᔨᕕᒻᒧᑦ
ᐊᕐᕌᒍᓂ 28-ᓂ ᒪᑭᕝᕕᒥ ᐱᓇᓱᑦᑎᐅᖃᑦᑕᓚᐅᕐᓱᓂ, ᓂᕐᔪᑎᓕᕆᓂᕐᒥᒃ ᐱᓪᓗᑯᒋᐊᓕᓕᕆᔨᐅᑦᓱᓂ ᐁᕆᓕ ᐃᓱᓕᑎᓪᓗᒍ ᓵᓐᑎ ᓴᐸ, ᓄᕐᖃᓚᐅᕐᖁᖅ ᓄᓇᕕᒻᒥ
ᖃᐅᔨᓴᕐᓂᓂᒃ ᐱᓇᓱᕝᕕᒥᓂᑦ ᑰᒃᔪᐊᒥ.
ᒫᓐᓇᓯᐅᑎᐅᑦᓱᓂ ᓄᓇᕕᒻᒥ ᖃᐅᔨᓴᕐᓂᓄᑦ ᐱᑦᔪᔨᕕᒻᒥ ᑐᑭᒧᐊᑦᑎᓯᔨ ᐱᐅᔨ ᕘᑦ ᐅᖃᓚᐅᕐᖁᖅ ᓵᓐᑎᒥᒃ ᐱᓇᓱᑉᐸᓂᕃᑦᓱᓂ ᐊᒥᓱᑲᓪᓚᓂ ᐱᓇᓱᑦᑕᐅᔪᓂ ᐱᑦᔪᔨᕕᒻᒧᑦ, ᐱᓇᓱᑦᑕᖃᓗᐊᖕᖑᐊᓱᓂ ᓂᕐᔪᑏᑦ ᖃᓂᒻᒪᓯᖃᕈ-ᑎᒋᓲᖏᓐᓅᓕᖓᔪᓂᒃ. ᐃᓚᐅᕕᖃᓪᓚᕆᑉᐸᒥᑦᓱᓂᓗ ᓄᓇᕕᒻᒥ ᖁᒻᒥᓇᕐᑐᓂᒃ ᖃᐅᔨᓴᕐᑕᖃᕐᓂᒥᒃ ᐱᓇᓱᒍᑎᐅᔪᓄᑦ.
“ᓵᓐᑎ ”ᐅᖄᖃᑎᖃᕈᓐᓇᓯᐊᓲᖅ ᒪᙯᑦᑎᓂᒃ ᐱᔭᖃᕋᓱᑦᓯᐊᐸᑦᓱᓂᓗ ᖃᐅᔨᓴᕈ-ᑎᑦᓴᓂᒃ ᓄᓇᓕᓐᓂᑦ. ᐱᓇᓱᐊᕈᓯᐅᑉ ᓄᖕᖑᐊᓂ ᐱᓇᓱᕝᕕᓕᐊᑲᓪᓚᐸᑦᓱᓂ ᖃᐅᔨᓴᕆᐊᕐᑐᓱᓂ ᐁᕕᕕᓃᑦ ᐅᖃᖏᓐᓂᒃ,“ ᐱᐅᔨᐅᑉ ᐅᖃᐅᓯᖏᑦ. ᐅᐱᕐᖔᑕᒫᑦ ᓵᓐᑎ ᐱᓇᓱᖃᑦᑕᓚᐅᔪᒻᒥᔪᖅ ᓂᕐᓕᓂᒃ ᐅᔭᒥᓕᕐᑐᐃᓂᕐᒥᒃ ᑰᒃᔪᐊᑉ ᖃᓂᒋᔭᖓᓂ, ᐊᐅᐸᓘᓪᓗ ᐊᒻᒪᓗ ᑲᖏᕐᓲᑉ, “ᐅᔭᒥᓯᒪᔪᒥᒃ ᓂᕐᓕᓴᕐᓂᕈᕕᑦ ᓵᓐᑎᐅᑉ ᐅᔭᒥᑕᕕᓂᖓᓂᒃ ᓂᕐᓕᑐᕕᓂᐅᕗᑎᑦ!“ ᐅᖃᕐᑐᖅ ᐱᐅᔨ.
ᐱᐅᔨ ᓵᓐᑎᒥᒃ ᐅᓂᒃᑲᐅᑎᓕᒃ ᐅᐃᒪᔮᖕᖏᑐᓂᕋᕐᓱᒍ ᕿᓄᐃᑦᑐᒪᕆᐅᑦᓱᓂᓗ ᖃᐅᔨᒪᔭᖃᑦᓯᐊᓱᓂ ᓄᓇᒥᒃ. “ᐃᓕᒃᑯᓕ ᖁᕕᐊᒋᖃᑦᑕᓚᐅᔪᔭᕋ ᑰᒃᔪᐊᑉ ᑰᖓᓂ ᓄᓗᐊᕐᓂᐊᖃᑎᒋᒋᐊᖓ ᐃᖃᓗᓐᓂᓗ ᖃᐅᔨᓴᕈᑎᑦᓴᑕᖃᑎᒋᒋᐊᖓ. ᐅᖓᕙᒥ ᐅᒥᐊᕐᑐᓱᑕ, ᑕᑦᑐᐊᓗᒻᒧᑦ ᑎᑭᑕᐅᓯᒪᒻᒥᔪᒍᑦ. ᓵᓐᑎ ᖃᓄᐃᓘᕆᐊᖃᕆᐊᒥᒃ ᖃᐅᔨᒪᑦᓯᐊᓚᐅᕐᓯᒪᔪᖅ, ᐱᓯᑎᖁᑎᖃᓕᓚᐅᕐᓯᒪᕗᖓᓗ ᓄᓇᐅᑉ ᑭᓪᓕᐊᓄᑦ ᑎᑭᐅᑎᒐᑦᑕ, ᓵᓐᑎ ᖃᐅᔨᒪᑦᓯᐊᓯᒪᔪᖅ ᓇᓃᒻᒪᖔᑦᑕ. ᐅᒥᐊᕐᑐᓕᕋᒪ, ᓵᓐᑎᒧᑦ ᐃᓕᓐᓂᐊᑎᑕᐅᒍᑎᒋᓯᒪᔭᒃᑲᓂᒃ ᐊᑐᓱᖑᖏᓐᓇᖁᖓ.”
ᒪᑭᕝᕕᒥ ᐊᖓᔪᕐᖄᑉ ᑐᖓᓕᖓᑕ ᐱᑦᔪᔨᕕᖓ ᐊᕙᑎᓕᕆᓂᕐᓄᓗ, ᐆᒪᔪᓕᕆᓂᕐᓄᓗ ᐊᒻᒪᓗ ᖃᐅᔨᓴᕐᓂᓄᑦ ᐋᑕᒥ ᑎᓪᓖᓪ ᐊᓚᑯ ᐅᖃᓚᐅᔪᕗᖅ ᓵᓐᑎᒥᒃ ᐱᓇᓱᖃᑎᖃᕐᓱᓂ , ᑕᑯᓐᓇᖃᑦᑕᓚᐅᔪᒋᐊᒥᒃ ᐊᖑᑎᒥᒃ ᐃᒻᒥᓂᒃ ᐱᒻᒪᕆᐅᑎᓂᖃᕋᓂ ᐊᒥᓱᓂᒃ ᐅᖃᐅᓯᕐᓂᒃ ᓂᑦᔮᒐᔪᖕᖏᑐᒥᒃ – ᓂᐯᑦᑐᒥᒃ, ᐅᖃᔪᖃᓕᕐᒪᑦ ᓈᓚᑦᓯᐊᓱᖑᑦᓱᓂ. ᓵᓐᑎ ᓄᓇᕕᒻᒥ ᖃᐅᔨᓴᕐᓂᓂᒃ ᐱᑦᔪᔨᕕᒻᒥᒃ ᐃᑲᔪᕐᓯᒪᓪᓚᕆᖃᑦᑕᓚᐅᕐᑐᖅ, ᐋᑕᒥ ᐅᖃᕐᑐᖅ, ᐲᕐᕙᓚᑦᓯᒪᓛᕐᑐᒪᕆᐅᓂᕃᑦᓱᓂᓗ ᓵᓐᑎᒥᒃ.
ᓵᓐᑎ ᒪᑭᕝᕕᒥ ᐱᓇᓱᒋᐊᖕᖓᓯᓚᐅᕐᓯᒪᕗᖅ ᐅᓪᓗᓕᒫᕐᓯᐅᑎᐅᒐᓂ ᑌᑦᓱᒪᓂ ᔪᓓ 1994-ᖑᑎᓪᓗᒍ. ᐅᓪᓗᖅ ᐱᓇᓱᓱᖓᕐᕕᒋᓚᐅᔪᔭᖓ ᐁᕆᓕ 30, 2022. ᒪᑭᕝᕕᐅᑉ ᐱᓇᓱᑦᑎᓕᒫᖏᓐᓄᑦ ᓵᓐᑎ ᐱᔪᖃᖁᔭᐅᕗᖅ ᖁᕕᐊᓇᕐᑐᒥᒃ ᐊᒻᒪᓗ ᓈᒻᒪᓈᑦᓯᐊᑐᒥᒃ ᐱᓇᓱᑦᑎᐅᒍᓐᓀᓂᖃᖁᔭᐅᑦᓱᓂ.
