ᐊᓪᓚᑐᖅ ᐳᓖᓯ ᔮᓐ-ᐱᐊ ᓚᑐᐊ, ᓄᓇᕕᒻᒥ ᐳᓖᓯᒃᑯᑦ ᐱᒍᑦᔨᔨᖏᓐᓂ
ᖃᕆᑕᐅᔭᓄᑦ ᐱᑐᑦᓯᒪᐅᑎᕕᒻᒪᕆᒃ ᐊᒻᒪᓗ ᐃᓄᐃᑦ ᑐᓴᐅᒪᒍᑎᖏᑦ ᐊᑐᕐᑕᐅᓕᕐᐸᓕᐊᔪᒻᒪᕆᐅᒻᒪᑕ, ᐃᓄᐃᑦ ᓄᓇᕕᒻᒥᐅᑦ ᐱᓐᓂᐊᑕᐅᕙᓕᕐᑐᑦ ᖃᕆᑕᐅᔭᒃᑯᑦ ᐅᐃᕖᕐᕆᓯᐅᑎᓄᑦ ᐊᒻᒪᓗ ᖃᕆᑕᐅᔭᒃᑯᑦ ᐃᑎᕇᒃᑯᑎᓂᒃ ᑎᓪᓕᒐᕈᑎᓄᑦ. ᑕᒪᒃᑯᐊ ᐅᐃᕖᕐᕆᓯᐅᑏᑦ ᓄᐃᓲᖑᕗᑦ ᐊᑦᔨᒌᖕᖏᑑᑦᓱᑎᒃ, ᐊᒻᒪᓗ ᑐᑭᓯᒪᔪᖃᕈᓂ ᖃᓄᖅ ᐅᐃᕖᑦᑐᐃᑦ ᐱᓇᓱᓲᖑᒻᒪᖔᑕ ᐃᑲᔪᕈᓐᓇᐳᖅ ᐃᓕᑦᓯ, ᐃᓚᓯᓗ ᐊᒻᒪᓗ ᑮᓇᐅᔭᓯ ᐊᑦᑕᓇᕐᑐᒨᕐᓂᐊᖏᓐᓇᓯ.
ᐱᐊᕋᓖᑦ ᐅᖑᒪᑦᓯᐅᑎᖏᑦ ᓴᐳᒻᒥᐅᑎᒋᓗᒋᑦ ᐱᐊᕋᓯᓐᓂᒃ
ᐱᐊᕋᓖᑦ ᐊᒻᒪᓗ ᓄᑲᕇᑦ ᐊᖓᔪᑦᓯᖏᑦ ᖃᐅᔨᒪᒋᐊᖃᕐᖁᑦ ᐱᐊᕋᓖᑦ ᐅᖑᒪᑦᓯᐅᑎᖏᓐᓂᒃ ᐱᑕᖃᓲᓂᒃ ᐊᒥᓲᓂᕐᓴᓂ ᐃᑯᒪᐅᒻᒨᑐᒐᓚᓐᓂ ᐊᒻᒪᓗ ᐃᓄᐃᑦ ᑐᓴᐅᒪᐅᑎᒍᑎᖏᓐᓄᑦ ᐃᑎᕈᑎᓂ. ᐱᒻᒪᕆᐅᕗᖅ ᐊᑐᕐᑎᓯᓗᓂ ᑖᒃᑯᓂᖓ ᐱᐊᕋᓖᑦ ᐅᖑᒪᑦᓯᐅᑎᖏᓐᓂᒃ ᐱᐊᕋᓯ ᐊᑐᖕᖏᓂᖏᓐᓂ ᐱᑐᑦᓯᒪᐅᑎᕕᒻᒪᕆᒻᒥᒃ. ᑖᓐᓇ ᓯᕗᓪᓕᐸᐅᕗᖅ ᓴᐴᓗᑕᑦᓴᐅᓱᓂ ᓱᕐᖁᐃᕈᑎᒋᓗᒍ ᑖᒃᑯᐊ ᐱᐊᕃᑦ ᐃᔨᖏᑦᑕ ᑕᑯᓚᕿᖕᖏᓂᖓᓂᒃ ᐃᓗᓕᕐᓂᒃ ᐱᐊᕋᕐᓅᓕᖓᖕᖏᑐᓂᒃ. ᐱᑐᑦᓯᒪᐅᑎᕕᒻᒪᕆᒻᒥᒃ ᐊᑐᕐᑐᑦ ᐃᓘᓐᓇᓕᒫᖏᑦ ᐱᑦᓯᐊᕈᒪᔪᐃᓐᓇᐅᔭᖏᓪᓚᑦ. ᐃᓄᐃᑦ ᑐᓴᐅᒪᐅᑎᒍᑎᖏᑦ ᐅᕝᕙᓘᓐᓃᑦ ᐱᑐᑦᓯᒪᐅᑎᕕᒻᒥ ᐱᖕᖑᐊᕈᑏᑦ ᐅᐃᕖᑦᑐᓄᑦ ᐊᑐᕐᑕᐅᓲᖑᕗᑦ ᖃᓂᓪᓕᑎᕈᑕᐅᑦᓱᑎᒃ ᐱᐊᕋᓯᓐᓄᑦ, ᑌᒣᒻᒪᓗ ᐃᑉᐱᒍᓱᒋᐊᖃᕐᖁᓯ ᓱᓇᓂᒃ ᐱᐊᕋᓯ ᐊᒻᒪᕕᖃᓕᕐᒪᖔᑕ ᐱᑐᑦᓯᒪᐅᑎᕕᒪᕆᒻᒥ, ᓱᕐᖁᐃᖃᑦᑕᓗᓯᓗ ᐱᑐᑦᓯᒪᐅᑎᕕᒻᒦᑐᑦ “ᐃᓚᓐᓈᑦ” ᐃᓄᑦᑕᖏᑦ ᐱᐊᕋᓯᓐᓄᑦ ᐊᒻᒪᕕᐅᖃᑦᑕᖁᒻᒪᖔᑦᓯᒋᑦ.
ᑮᓇᐅᔭᓂᒃ ᐊᐅᓪᓚᑎᑦᓯᑌᓕᓗᓯ ᐃᓄᒻᒧᑦ ᖃᕆᑕᐅᔭᒃᑯᑦ ᐱᑐᑦᓯᒪᕕᒻᒥ ᑭᓯᐊᓂ ᑕᑯᓲᓯᓐᓄᑦ
ᐃᓄᐃᑦ ᓄᓇᕕᒻᒥ ᐱᔭᐅᖃᑦᑕᓯᒪᕗᑦ ᐱᑐᑦᓯᒪᐅᑎᕕᒻᒪᕆᒻᒥ ᐁᑉᐸᓴᕐᓯᐅᖑᐊᕐᑐᑦ ᐅᕝᕙᓘᓐᓃᑦ ᐱᐅᑦᓴᖑᐊᕐᑐᑦ ᐅᐃᕖᕐᕆᓯᐅᑎᖏᓐᓄᑦ. ᐱᐅᓯᖃᕙᓪᓗᑐᑦ ᐃᒫᒃ, ᐱᔭᐅᒐᓱᐊᕐᑐᖅ ᑲᑎᓯᑦᓴᖁᖅ ᐃᓄᒻᒥᒃ ᖃᕆᑕᐅᔭᒃᑯᑦ (ᐊᕐᖁᑎᖃᕐᓱᓂ ᐱᖃᑎᑦᓴᓯᐅᕈᑎᒥᒃ, ᐃᓄᐃᑦ ᑐᓴᐅᒪᐅᑎᒍᑎᖏᓐᓂᒃ, ᐅᕝᕙᓘᓐᓃᑦ ᐱᑐᑦᓯᒪᐅᑎᓗᓂ ᐱᖕᖑᐊᕈᑎᒥᒃ) ᐊᒻᒪᓗ ᑌᒪ ᐱᒋᐊᕐᑎᓯᕗᖅ ᐱᖃᓐᓈᕇᓐᓂᒥᒃ. ᐅᐃᕖᕐᕆᓯᔪᖅ ᐊᑐᓚᖓᔪᖅ ᖃᐅᔨᒪᒍᑎᓂᒃ ᐃᓕᓐᓅᓖᖓᔪᓂᒃ ᐱᑐᑦᓯᒪᐅᑎᕕᒻᒥ ᓇᕝᕚᑕᒥᓂᒃ (ᑕᑯᑦᓴᐅᑎᒍᑎᑎᓐᓂᒃ, ᐊᓪᓚᓕᓂᑎᓐᓂᒃ) ᐃᓕᓐᓂᒃ ᖃᐅᔨᒪᑦᓯᐊᓂᕐᓴᐅᓂᐊᕋᒥ ᐱᓂᐊᕋᒥᓗ ᒪᓗᒍᓱᖕᖏᓂᕐᓂᒃ. ᑌᒣᑦᑐᐃᑦ ᐅᐃᕖᕐᕆᓯᓃᑦ ᑲᔪᓯᕙᓪᓕᐊᒍᓐᓇᑐᑦ ᑕᕐᕿᓂᒃ ᐊᒥᓱᓂᒃ ᓈᔨᑦᓴᒪᕆᓪᓗᑎᒃ, ᐱᔭᐅᔪᐃᓪᓗ ᐃᓚᖏᑦ ᑌᑦᓱᒥᖓ ᐃᓄᒻᒥᒃ ᓇᓪᓕᒍᓱᓕᓯᖏᓐᓇᕈᓐᓇᓱᑎᒃ. ᐅᖃᖃᑕᐅᓂᖏᑦ ᐊᓪᓚᓯᒪᔪᑎᒍᑦ ᑭᓯᐊᓂ ᐊᑐᕙᓪᓗᑐᑦ ᐃᓚᖏᑦ ᐃᓚᑦᓴᕋᑖᓗᖓᓂᒃ ᑕᑯᓐᓇᐅᑎᒍᑎᓂᒃ ᐊᑐᓲᖑᒐᓗᐊᕐᑎᓗᒋᑦ (AI ᓴᓇᒪᔪᖁᑎᖏᑦ ᐊᔪᕐᓴᖏᓐᓂᓴᐅᑎᑦᓯᓕᕐᒥᒪᑕ ᐅᐃᕖᕐᕆᓯᔩᑦ ᐊᓯᑦᔨᑐᐃᓂᖓᓂᒃ ᓂᐱᒥᓂᒃ ᐊᒻᒪᓗ ᑕᑯᓐᓇᐅᑎᒍᑎᒃᑯᑦ ᐊᑦᔨᖑᐊᒥᓂᒃ). ᑖᓐᓇ ᐱᖃᓐᓈᖑᖕᖑᐊᑐᖅ ᐱᓇᓱᒐᕐᒥᓄᑦ ᐊᐅᓪᓚᓯᒪᖏᓐᓇᑎᑕᐅᖕᖑᐊᓲᐹᓗᒃ, ᐃᓄᑦᑕᖓᓗ ᐱᔭᐅᒐᓱᐊᕐᑐᒧᑦ ᐊᒻᒪᖃᔦᖕᖏᐅᒪᖕᖑᐊᖃᑦᑕᕈᓐᓇᓱᓂ ᐊᑯᓂᐊᓗᒃ. ᑖᓐᓇ ᐱᖃᓐᓈᖑᐊᖅ ᓯᐅᕉᓕᕐᐸᑦ ᑮᓇᐅᔭᓕᐅᕈᑎᑦᓴᐹᓗᒻᒥᒃ ᖃᐅᔨᒪᓂᕋᓯᓛᕐᑐᖅ ᐅᕝᕙᓘᓐᓃᑦ ᑭᑦᓴᓇᕐᑐᒧᑦ ᐃᓅᓯᕐᒥᓂ ᑎᑭᑕᐅᓯᒪᓂᕋᕐᓗᓂ ᐱᓐᓂᐊᑕᒥᓂᒃ ᑮᓇᐅᔭᕐᑖᓗᓂ ᑭᓯᐊᓂᐅᓂᕋᓕᕐᓗᓂ. ᐅᐃᕖᕐᕆᓯᔪᖅ ᑎᑭᑎᑦᓯᕕᐅᒍᒪᓚᖓᔪᖅ ᑮᓇᐅᔭᓂᒃ ᑐᕃᓐᓇᕕᐅᓗᓂ ᐅᕝᕙᓘᓐᓃᒃ ᑐᔪᕐᑕᐅᒍᒪᓗᓂ ᐊᑭᓕᕇᕐᓯᒪᔪᓂᒃ ᓯᒃᑭᑖᐱᓐᓂᒃ ᓂᐅᕕᕐᓂᐊᕈᑎᑦᓴᔭᓂᒃ.
ᑮᓇᐅᔭᓂᒃ ᐊᐅᓪᓚᑎᑦᓯᒍᕕᑦ, ᐅᖃᐅᑎᔭᐅᒍᓐᓇᒥᔪᑎᑦ ᐃᓄᒻᒧᑦ ᐃᑲᔪᕈᒪᓂᕋᕐᑐᒧᑦ ᑮᓇᐅᔭᑎᓐᓂᒃ ᐅᑎᕐᑎᓯᒐᓱᐊᕐᑎᓗᑎᑦ. ᑌᒣᓘᕐᑐᑦ ᐅᑉᐱᕆᓇᒋᑦ; ᑕᒪᓐᓇ ᓯᕗᓪᓕᒧᑦ ᐅᐃᕖᕐᕆᓯᐅᑎᖓᓄᑦ ᑐᖓᓕᐅᓱᓂ ᐃᓚᐅᕗᖅ.
ᐊᒻᒪᓗ, ᐊᐅᓪᓚᑎᑦᓯᖃᑦᑕᕈᓐᓀᓗᓯ ᐅᕕᓃᖕᖔᑐᓂᒃ ᐊᑦᔨᖑᐊᓯᓐᓂᒃ ᐅᕝᕙᓘᓐᓃᑦ ᖃᕆᑕᐅᔭᐅᑉ ᐊᑦᔨᓕᐅᕈᑎᖓᓄᑦ ᓄᐃᑎᖃᑦᑕᕈᓀᓗᓯ ᐊᓐᓄᕃᑦᑑᓗᓯ ᑖᒃᑯᐊ ᐊᑦᔨᖑᐊᑦ ᓄᐃᑕᐅᑦᓴᑐᐃᓐᓇᕆᐊᖃᕐᒪᑕ ᐃᓄᐃᑦ ᑐᓴᐅᒪᐅᑎᒍᑎᖏᓐᓂ ᑭᓇᒃᑯᑐᐃᓐᓇᓕᒫᓄᑦ ᑕᑯᑦᓴᐅᓯᓗᑎᒃ. ᐅᐃᕖᕐᕆᓯᔩᑦ ᑮᓇᐅᔭᓂᒃ ᑐᑦᓯᕋᕈᓐᓇᑐᑦ ᐲᕐᑕᐅᖁᓕᕆᕕᒃᑭᑦ (ᑲᖕᖑᓵᕆᓂᕐᒧᑦ ᑎᒍᔨᓐᓂᓂᖅ).
ᓂᐅᕕᐊᑦᓴᓄᑦ ᐅᐃᕖᕐᕆᓯᐅᑏᑦ ᐱᑦᔪᑎᖃᕈᓐᓇᑐᑦ ᓂᐅᕕᕐᓂᒥᒃ ᐃᒥᐊᓗᒻᒥᒃ SAQ-ᑯᑦ ᐅᕝᕙᓘᓐᓃᑦ ᒪᕐᓰ ᑐᕆᐊᓐᑯᑦ ᐊᓯᐊᓂᒃ ᐱᑎᓪᓗᒍ, ᐅᕝᕙᓘᓐᓃᑦ ᓂᐅᕕᕐᓂᒥᒃ ᒥᐊᔨᒍᐊᓇᒥᒃ ᐱᔪᒥᒃ SQDC-ᑯᑦ ᐊᓯᐊᓂᒃ. ᑌᒣᑦᑐᓂᒃ ᓂᐅᕕᕋᓱᐊᕈᑦᓯ ᐊᓯᐊᓂᒃ ᖃᕆᑕᐅᔭᒃᑯᑦ ᐱᑐᑦᓯᒪᕕᒻᒥᒃ, ᖃᐅᔨᒪᒋᑦᓯ ᑲᒪᓕᕆᐊᑦᓯ ᐱᖁᔭᓂᒃ ᓯᖁᑦᑎᕆᔪᓂᒃ, ᑌᒣᒻᒪᓗ ᓂᕆᐅᑦᓴᕋᓯ ᐱᑦᓯᐊᕋᓱᓚᖓᓂᖓᓂᒃ. ᓴᖑᕕᑦᓴᖃᕐᓂᐊᖏᑦᑐᓯ ᐅᐃᕖᕐᕆᔭᐅᒍᑦᓯ ᓂᐅᕕᕋᓱᓪᓗᓯ ᓱᓇᑐᐃᓐᓇᒥᒃ ᐱᖁᔭᓂᒃ ᓯᖁᑦᑎᕆᐅᑎᒋᓗᒍ. ᐊᒻᒪᓗ, ᖃᐅᔨᒪᓇᕐᖃᔭᕋᓂ ᓂᐅᕕᐊᓯ ᐱᐅᔫᓂᐊᕋᓗᐊᕐᒪᖔᑕ.
ᐊᒻᒪᓗ ᓱᓕ, ᑕᑯᒍᑦᓯ ᐊᑭᑐᔪᒥᒃ ᓱᓇᒐᓚᒻᒥᒃ ᐆᑦᑑᑎᒋᓗᒍ ᓯᑭᑑᒥᒃ ᐅᕝᕙᓘᓐᓃᑦ ᓯᑕᒪᓂᒃ ᐊᑦᓴᓗᐊᓕᐊᐱᒻᒥᒃ ᖃᕆᑕᐅᔭᒃᑯᑦ ᐱᑐᕝᕕᒥ ᒪᓂᔭᐅᑎᓪᓗᒍ ᐊᑭᑭᑦᑐᒪᕆᐅᓗᓂ, ᐊᒻᒪᓗ ᓂᐅᕐᕈᓯᕐᑐᖅ ᑮᓇᐅᔭᓂᒃ ᑐᕐᖁᑕᐅᖁᔨᑉᐸᑦ ᐊᓐᓀᒌᒃᑯᑎᒋᓚᖓᓗᒋᑦ, ᐃᑉᐱᒍᓱᒻᒪᕆᐊᓗᒋᑦᓯ. ᐊᓯᐅᔨᓚᕿᒍᓐᓇᖁᓯ ᑕᐅᓴᓐᑎᓂᒃ ᐊᒥᓱᓂᒃ ᐱᓚᖓᔪᕆᔭᓯᓐᓄᑦ ᑎᑭᑕᐅᓚᐅᕐᓯᒪᓂᐊᕋᓯ. ᐱᐅᓂᕐᓴᐅᕗᖅ ᑌᒣᑦᑐᖅ ᓂᐅᕕᐊᕆᓗᒍ ᓂᐅᕕᕐᕕᓚᕆᒻᒥᒃ. ᐊᒻᒪᓗ, ᓂᐅᕐᕈᓯᕐᑐᖅ ᐅᖃᕐᐸᑦ ᑎᑭᑎᑦᓯᒍᓐᓇᓂᕋᕐᓗᓂ ᐊᐅᓪᓚᕈᑎᖓ ᐊᑭᖃᕐᑎᓇᒍ, ᑕᒪᓐᓇ ᒪᓗᓐᓇᓂᖓᓂᒃ ᑕᑯᒍᑎᑦᓴᐅᕗᖅ, ᓄᓇᕕᒻᒧᑦ ᐅᓯᒍᑏᑦ ᐊᑭᑐᓂᖓ ᖃᐅᔨᒪᑦᓱᒍ. ᐃᓕᓐᓂᒃ ᐊᔭᐅᕆᓂᖅ ᓂᐅᕕᓵᖁᓗᑎᑦ (“ᑭᖑᓪᓕᐸᐅᓕᕐᒪᑦ”, “ᐊᓯᓐᓂᐅᕕᑦ ᓂᐅᕕᕈᒪᔪᖃᕐᒪᑦ”) ᒪᓗᓐᓇᑐᒻᒪᕆᐅᒻᒥᔪᖅ. ᐅᐃᒪᒍᓐᓀᓗᑎᑦ ᑐᑭᑖᖃᑦᑕᕆᑦ, ᐊᒻᒪᓗ ᐊᔭᐅᕐᑕᐅᑎᑦᑌᓕᓗᑎᑦ.
ᐃᒻᒥᓂᒃ ᓴᐳᒻᒥᓗᑎᑦ, ᐊᒻᒪᓗ ᓱᕐᖁᐃᓯᐊᕐᓗᑎᑦ ᐃᓄᐃᑦ ᑐᓴᐅᒪᐅᑎᒍᑎᖏᓐᓄᑦ ᐊᒻᒪᕈᑎᕕᑦ ᐋᕐᕿᓯᒪᓂᖓᓂᒃ “ᐃᓚᓐᓈᑦ” ᓂᕈᐊᕐᓯᒪᓗᒋᑦ, “ᓇᐅᓕᒫᑦ” ᓂᕈᐊᕐᓯᒪᒍᓐᓀᓗᒋᑦ ᐊᒻᒪᓗ ᓂᕈᐊᖃᑦᑕᓗᑎᑦ ᐃᓚᓐᓈᓂᒃ ᐃᓅᓯᓪᓚᕆᒻᒥ ᖃᐅᔨᒪᔭᕐᓂᐅᕕᑦ ᑭᓯᐊᓂ.
ᑮᓇᐅᑦᔭᓵᓂᒃ ᑖᒃᓰᕈᑏᑦ ᐅᐃᕖᕐᕆᓯᒍᑕᐅᓂᖏᑦ ᐱᑕᖃᕐᓂᓴᐅᕙᓕᕐᑐᑦ. ᑳᓇᑕᒥ ᑮᓇᐅᔭᕐᑖᓂᒃ ᐊᓪᓚᕕᒻᒪᕆᒃ ᐊᒻᒪᓗ ᑮᓇᐅᔭᕐᑖᓕᕆᔩᑦ ᑯᐯᒃ ᐃᓕᓐᓄᑦ ᖃᓄᐃᓘᕐᓂᐊᑐᑦ ᐊᓪᓚᑕᕐᑎᑯᑎᒍᑦ ᑭᓯᐊᓂ. ᐅᖃᓕᒪᕕᐅᒍᕕᑦ, ᖃᕆᑕᐅᔭᒃᑯᑦ ᐊᓪᓚᑖᕈᕕᑦ, ᐊᓯᐊᒍᓪᓘᓃᑦ ᑐᓴᕈᑎᒃᑯᑦ ᖃᓄᐃᓘᕐᑕᐅᒍᕕᑦ, ᖃᐅᔨᒪᓚᖓᔪᑎᑦ ᐅᐃᕖᕐᕆᓯᔨᐅᓂᖓᓂᒃ. ᑖᒃᓰᕈᑎᓄᑦ ᐊᑭᓕᑦᓭᖁᔭᐅᒍᕕᑦ ᑐᕃᓐᓇᑐᒥᒃ ᐊᑭᓖᖁᔭᐅᓗᑎᑦ ᐅᕝᕙᓘᓐᓃᑦ ᐊᑭᓕᕇᕐᓯᒪᔪᓂᒃ ᓵᑦᑐᔮᓂᒃ ᐊᑐᖁᔭᐅᓗᑎᑦ, ᐅᐃᕖᓴᕐᑕᐅᕗᑎᑦ. ᓯᕘᕋᑎᑕᐅᒍᕕᑦ ᑎᒍᔭᐅᓚᖓᓂᕋᕐᑕᐅᓗᑎᑦ ᐅᕝᕙᓘᓐᓃᑦ ᐱᖁᑎᑎᓐᓂᒃ ᐊᑦᓵᑕᐅᓚᖓᓂᕋᕐᑕᐅᓗᑎᑦ, ᓱᕐᖁᐃᐳᖅ ᐅᐃᕖᕐᕆᔭᐅᒐᓱᒋᐊᕐᐱᑦ. ᑲᕙᒪᒃᑯᓄᑦ ᐊᑭᓕᑦᓴᖃᕈᕕᑦ, ᐃᓱᒪᒥᒍᑎᖃᕐᖁᑎᑦ ᐊᑭᓕᕈᓐᓇᓱᒋᑦ ᑮᓇᐅᔭᒃᑯᕕᒃ ᐊᕐᖁᑎᒋᓗᒍ ᐅᕝᕙᓘᓐᓃᑦ ᐊᓪᓚᑎᒍᑦ ᑎᑭᑦᑐᑦ ᐊᑭᓕᕆᐊᓖᑦ ᐊᑭᓕᕐᑐᑐᐃᓐᓇᓗᒋᑦ.
ᐳᓖᓯᓄᑦ ᐊᑭᓖᓗᓂ ᐊᓂᒍᑏᑦ ᐅᐃᕖᕐᕆᓯᒍᑕᐅᓂᖏᑦ ᐊᑦᑐᐊᔪᑦ ᑭᓇᒐᓚᐅᑉ ᐃᓕᓐᓂᒃ ᑎᑭᑎᑦᓯᖁᔨᓂᖓᓄᑦ ᑮᓇᐅᔭᓂᒃ ᐃᓄᒻᒥᒃ ᖃᓂᒋᔭᕐᓂᐅᕕᑦ ᐊᓂᑎᑦᓯᓂᐊᕋᒥ ᑎᒍᔭᐅᒪᕕᒻᒥᒃ. ᐊᑐᑦᓴᑐᐃᓐᓇᕆᐊᓖᑦ ᐃᓚᓯ ᓂᐱᖓᓂᒃ (ᓂᐱᓕᐅᕈᓐᓇᓕᕐᒪᑕ AI ᐱᓇᓲᑎᖏᓐᓄᑦ). ᓄᓇᕕᒻᒥ ᐊᓂᑎᑕᐅᔪᖃᕐᓂᐊᐸᑦ ᐊᓂᒍᓐᓇᑎᑦᓯᐅᑎ ᐊᑭᓕᕐᓗᒍ, ᐊᓪᓚᑕᕐᑎᑯᑦ ᑮᓇᐅᔭᓂᒃ ᐊᐅᓪᓚᑎᑦᓯᒍᑎᖓ ᐊᑭᓕᕈᒫᕐᓂᐊᑐᖅ ᑮᓇᐅᔭᓕᕆᓂᕐᒧᑦ ᑐᕐᖃᑕᕐᕕᒧᑦ ᐳᓖᓯᓅᕐᑕᐅᓲᖑᕗᖅ. ᑖᓚᑐᐃᓐᓀᑦ ᑳᓰᑦ ᐅᕝᕙᓘᓐᓃᑦ ᑐᕃᓐᓇᑐᒥᒃ ᑐᕐᖁᐃᒍᑏᑦ ᐊᖏᕐᑕᐅᓲᖑᖕᖏᑐᑦ. ᓱᕐᖁᐃᓯᐊᕐᓗᑎᑦ ᐅᖄᒐᓗᐊᕐᒪᖔᕐᐱᑦ ᐳᓖᓯᓪᓚᕆᒻᒧᑦ, ᐊᒻᒪᓗ ᕿᓂᖃᑦᑕᓗᑎᑦ ᐱᑐᑦᓯᒪᐅᑎᕕᒻᒥ ᐳᓖᓯᒃᑯᓂᒃ ᐃᓕᓐᓄᑦ ᐃᒻᒪᖄ ᐊᒻᒪᕋᓱᑦᑐᓂᒃ, ᐅᖃᓕᒪᕕᒋᓗᒋᓪᓗ ᑮᓇᐅᔭᓂᒃ ᐊᐅᓪᓚᑎᑦᓯᖏᓐᓂᓂ.
ᐱᑐᑦᓯᒪᕕᒻᒥ ᑮᓇᐅᔭᑦᓴᓄᑦ (cryptocurrency) ᐅᐃᕖᕐᕆᓯᐅᑏᑦ ᐃᓱᐊ-ᕆᔭᐅᒻᒥᔪᑦ, ᐅᐃᕖᕐᕆᓯᔩᓪᓗ ᖃᐅᔨᕙᑦᓱᑎᒃ ᓄᑖᓂᒃ ᑮᓇᐅᔭᓯᓐᓂᒃ ᑎᓪᓕᒍᑎᑦᓴᓂᒃ. ᐊᓕᐊᑦᑐᕋᑕᐅᓲᑦ “ᐊᖏᓪᓕᓵᕐᑎᓯᓂᕐᒥᒃ ᑌᒪ ᑲᑌᓯᖏᓐᓇᓂᕐᒥᒃ” ᐃᒫᒃ ᐃᓄᐃᑦ ᐊᒥᓱᑦ ᑐᓴᐅᒪᔭᖓᑦ ᐃᓄᒃ ᐱᔭᑦᓴᐅᓂᕃᓯᒪᑎᓪᓗᒍ ᓄᑖᒥᒃ ᐱᑐᑦᓯᒪᕕᒻᒥ ᑮᓇᐅᔭᑦᓴᒥᒃ. ᐃᓄᐃᑦ ᓯᐊᕈᒋᐊᖑᓕᕐᒪᑦ ᓈᒻᒪᑐᓂᒃ ᓂᐅᕕᕐᓯᒪᓕᕐᒪᑕ, ᐅᐃᕖᕐᕆᓯᔪᖅ ᒪᑐᔨᕗᖅ ᐅᒃᑯᐃᕕᒥᓂᒃ ᐊᒻᒪᕕᐅᕐᖃᔦᕐᓱᓂᓗ. ᐃᓱᒪᖕᖏᓂᕐᓂ ᐊᑐᕋᔭᕐᓗᑎᑦ ᓂᐅᕕᕋᔭᕐᓗᑎᓪᓘᓃᑦ ᐱᑐᑦᓯᒪᕕᒻᒥ ᑮᓇᐅᔭᑦᓴᒥᒃ, ᖃᐅᔨᒪᔪᑦᓴᐅᕗᑎᑦ ᖃᓄᖅ ᑮᓇᐅᔭᑐᐃᓐᓇᒧᑦ ᑳᓯᒧᑦ ᐊᓯᖏᓐᓄᓗ ᐊᑭᓖᒍᑎᓄᑦ ᐊᑦᔨᐅᖏᑦᑑᒪᖔᑦ. ᑐᕌᕐᓂᐊᖏᓐᓇᕕᑦ ᐱᑐᑦᓯᒪᕕᒻᒥ ᑮᓇᐅᔭᑦᓵᑎᒍᑦ ᐅᐃᕖᕐᕆᔭᐅᓂᕐᒧᑦ, ᐃᕐᖃᐅᒪᓗᑎᑦ ᐅᐃᕖᕐᕆᓯᒐᓱᑦᑐᑦ ᑭᓯᐊᓂ ᐊᔪᐃᓐᓇᓲᖑᓂᖓᓂᒃ ᐊᑭᓕᕐᑕᐅᓂᕐᒥᒃ ᐱᑐᑦᓯᒪᕕᒻᒥ ᑮᓇᐅᔭᑦᓴᓄᑦ, ᐊᒻᒪᓗ ᐅᑉᐱᖃᑦᑕᕈᓐᓀᓗᓯ ᓇᐅᓕᒫᓂᒃ ᐅᖃᕐᑐᓂᒃ ᓱᑲᑦᑐᒥᒃ ᐊᔪᕐᓇᖏᒻᒪᕆᑦᑎᓗᒍᓗ ᑮᓇᐅᔭᓕᐅᕈᓐᓇᕆᐊᕐᐱᑦ ᐱᑐᑦᓯᒪᕕᒻᒥ ᑮᓇᐅᔭᑦᓴᓂᒃ ᓂᐅᕕᕐᓂᐊᕕᓐᓂ.
ᖃᐅᔨᒪᓇᕈᑎᑎᑦ ᐊᑦᑕᓇᕐᑐᒨᕐᑌᓕᑦᓯᐊᓗᒋᑦ ᐅᖃᐅᓯᖅ ᐃᑎᕈᑏᑦ ᐊᓯᑦᔨᓴᐅᑎ-ᒋᖃᑦᑕᓗᒍ, ᐊᒻᒪᓗ ᖃᐅᔨᒪᔭᐅᑎᑦᑌᓕᑦᓯᐊᓗᒍ. ᐃᓄᒃ ᐅᐃᕖᑦᑑᖏᑐᐊᕈᓂ ᐃᑎᕈᑎᕕᑦ ᐅᖃᐅᓯᖓᓂᒃ ᑐᑦᓯᕋᓚᐅᕐᓯᒪᓂᐊᖕᖏᑐᖅ.
ᐳᓖᓯ ᔮᓐ-ᐱᐊ ᓚᑐᐊ ᐱᖁᔭᑎᒍᑦ ᐱᓗᑲᒍᑎᓂᒃ ᓯᕗᕐᖏᓂᒋᐊᕐᓂᒥᒃ ᑲᒪᔨᐅᕗᖅ ᓄᓇᕕᒻᒥ ᐳᓖᓯᒃᑯᑦ ᐱᒍᑦᔨᔨᖏᓐᓂ. ᐊᐅᓪᓚᑲᑦᑕᓲᖅ ᓇᒧᑐᐃᓐᓇᖅ ᓄᓇᕕᒻᒥ ᓄᐃᑦᓯᒋᐊᕐᑐᖃᑦᑕᓱᓂ ᑕᑯᑎᑦᓯᒍᑎᓂᒃ ᐃᑲᔪᕐᑐᓂᒃ ᓄᓇᕕᒻᒥᐅᓂᒃ ᑮᓇᐅᔭᑎᒍᑦ ᐅᐃᕖᕐᕆᔭᐅᑦᑌᓕᑎᓪᓗᒋᑦ ᐊᒻᒪᓗ ᖃᕆᑕᐅᔭᒃᑯᑦ ᑎᓪᓕᕕᐅᑦᑌᓕᑎᓪᓗᒋᑦ.
© Nunavik Police Service
