ᔫᓂᐊ ᒣ ᕿᒻᒥᖃᓕᒫᓲᒍᓯᒪᔪᖅ. “ᕿᒻᒥᖃᕆᐊᒥᒃ ᐊᓕᐊᓲᒍᔪᖓ ᒥᑭᔪᐊᐱᐅᑦᓱᖓᓂᑦ. ᐃᓅᓯᓕᒫᕋᓂ ᕿᒻᒥᖃᓲᒍᓯᒪᔪᖓ ᐊᓕᐊᒋᑦᓱᒍᓗ,” ᐅᖃᕐᑐᕕᓂᖅ ᔫᓂᐊ ᐃᔪᕐᓱᓂᓗ ᐊᓇᕐᕋᓯᒪᑦᓱᓂ ᑰᑦᔪᐊᒥ. ᐅᐱᓐᓇᑑᑦᓱᓂᓗ ᐃᕙᒃᑲᑐᓄᑦ ᓱᑲᓕᐅᑎᖃᑕᐅᖃᑦᑕᓯᒪᓂᖓ ᓯᕗᓪᓕᐹᒥᒃ ᓱᑲᓕᐅᑎᔪᓄᑦ ᐊᕐᕌᒍᐃᑦ 21 ᓈᓕᕐᑎᓗᒋᑦ, ᑕᕝᕙᓂᓗ ᓱᑲᓕᐅᑎᖃᑕᐅᕐᖃᒥᓚᐅᕐᒥᓱᓂ ᐊᕙᑎᐅᒍᑎᖓᓂᒃ ᓱᑲᓕᐅᑎᔪᓄᑦ, ᒫᑦᓯᐅ ᕿᑎᖓᓂ ᐊᑑᑎᔭᐅᒌᓚᐅᕐᑐᒧᑦ.”
“ᓵᓚᖃᓚᐅᕐᓯᒪᒻᒥᔪᖓ,” ᔫᓂᐊ ᐅᖃᕐᑐᕕᓂᖅ. “2002-ᒥ ᓵᓚᖃᓚᐅᕐᓯᒪᒐᒪ, ᖃᐅᔨᒪᔪᖓ ᖃᓄᖅ ᐃᑉᐱᓂᐊᕐᒪᖔᑦ ᓵᓚᓕᒃ.”
ᑕᕝᕙᓂ ᐊᕐᕌᒍᕐᒥ #2-ᒥᒃ ᑭᑎᑦᔪᑎᓖᒃ, ᐁᓴ ᓱᕈᓯᓛᕐᓗ ᐸᐅᓚᓯ ᐊᒪᕈᐊᓕᓪᓗ, ᐃᑲᐅᕐᓂᑐᕐᓱᑎᒃ 39-ᓂᒃ 30-ᒥᓂᑦ, 3-ᓂᓪᓗ ᑕᒃᓵᐱᓐᓂᒃ ᓵᓚᖃᓚᐅᔪᕘᒃ. ᑐᖓᓕᕆᔭᐅᑎᓪᓗᒋᒃ #11-ᒥᒃ ᑭᑎᑦᔪᑎᓖᒃ, ᔮᓂᒻᒪᕆ-ᐴᓐᓗ ᔮᑯᓯ ᐊᒫᒪᑦᑐᐊᓗ, 42-ᓂᒃ ᐃᑲᐅᕐᓂᑐᕐᓱᑎᒃ, 3 ᒥᓂᑦ, 25-ᓂᓪᓗ ᑕᒃᓵᐱᓐᓂᒃ. ᐱᖓᔪᒋᔭᐅᑎᓪᓗᒋᒃ #10-ᒥᒃ ᑭᑎᑦᔪᑎᓖᒃ, ᑯᓗ ᑐᑲᓚᓪᓗ ᐲᑕ ᕿᓐᓄᐊᔪᐊᕐᓗ ᐃᑲᐅᕐᓂᑐᕐᓱᑎᒃ 43-ᓂᒃ 32-ᒥᓂᑦ, 12-ᓂᓪᓗ ᑕᒃᓵᐱᓐᓂᒃ.
ᑕᕝᕙᓂ ᐊᕐᕌᒍᕐᒥ ᓱᑲᓕᐅᑎᔪᑦ ᐊᕐᓱᕈᓐᓇᑐᑎᒎᖃᑦᑕᓂᕐᖁᑦ. ᓯᓚᐅᑉ ᐱᔮᓄᑦ ᐊᐳᓯᕐᓯᒪᔪᐊᓗᒻᒧᓗ ᕿᒧᑦᓯᑏᑦ ᐱᒐᓱᐊᒻᒪᕆᖃᑦᑕᑎᓪᓗᒋᑦ ᕿᒻᒦᓗ ᐊᓗᐃᕈᖃᑦᑕᑎᓪᓗᒋᑦ. ᔫᓂᐊ ᑕᕝᕙᓂ ᐊᕐᕌᒍᕐᒥ ᓱᑲᓕᐅᑎᔪᓂᒃ ᐊᕐᓱᕈᓐᓇᓂᕐᐸ-ᐅᖃᑕᐅᓂᕃᓚᐅᔪᕗᖅ, ᖁᓕᓪᓗ ᐱᖓᓲᔪᕐᑐᕕᑦᓱᓂ ᓯᑕᒪᐅᔪᖕᖏᒐᕐᑐ-ᕕᑦᓱᓂᓘᓐᓃᑦ ᓱᑲᓕᐅᑎᖃᑕᐅᓲᒍᓕᕐᓱᓂ ᐃᕙᒃᑲᑐᓄᑦ ᓱᑲᓕᐅᑎᓂᖅ ᐱᒋᐊᓚ-ᐅᕐᓯᒪᓂᖓᓂ 2001-ᒥ ᐅᒥᐅᔭᕐᒥᑦ ᐱᒋᐊᕐᓱᑎᒃ. ᑕᕝᕙᓂ ᐊᕐᕌᒍᕐᒥ, ᔫᓂᐊ ᕿᒧᑦᓯᖃᑎᓕᕕᓂᖅ ᐃᕐᓂᒥᓂᒃ, ᐊᖂᔭᖅ ᓯᓅᐹ ᒣᒥᒃ. ᑕᕝᕙᓂ ᐊᕐᕌᒍᕐᒥ, ᐊᐅᓪᓚᑎᓚᐅᔪᕗᑦ ᓱᑲᓕᐅᑎᓚᖓᔪᑦ ᕕᐳᐊᕆ 24-ᒥ ᖁᓕᓪᓗ ᒪᕐᕈᓗᐃᑦ ᕿᒧᑦᓯᓗᑎᒃ ᓱᑲᓕᐅᑎᓚᖓᑎᓪᓗᒋᑦ. ᔪᓂᐊ ᐅᓂᒃᑳᑐᕕᓂᖅ ᐱᒋᐊᕐᓂᕕᓂᖏᓐᓂᒃ ᓱᑲᓕᐅᑎᓯᔪᑦ.
“ᑌᑲᓂ ᐅᓪᓗᒥ ᐱᒋᐊᕐᑎᓗᒋᑦ ᓄᕗᔭᓕᕇᓚᐅᔫᖅ ᓯᓚᑦᓯᐊᒍᒐᓛᒐᓂᓗ ᐅᓪᓛᖓᓂ. ᒪᓂᕐᖃᐅᓂᖓᒎᕆᐊᓯᑦᓱᑕ ᓴᓪᓗᓂᑦ ᐃᕗᔨᕕᒻᒧᑦ, ᓯᓚᑦᓯᐊᒍᓯᕙᓪᓕ-ᐊᓕᓚᐅᔫᖅ, ᑭᓯᐊᓂ ᐊᐳᑎᒃ ᐊᕿᓕᕙᓪᓕᐊᓯᓚᐅᔫᖅ ᐊᕐᓱᕈᓐᓇᑐᒃᑰᓯᑦᓱᑕ. ᑌᑲᓂ ᐅᓪᓗᒥ ᒪᓂᕐᖃᐅᓂᖓᓅᕐᐸᓕᐊᑕᓚᐅᔪᔪᒍᑦ.”
ᐊᕐᓱᕈᓐᓇᑑᓚᐅᔫᖅ ᕿᒧᑦᓯᑐᓕᒫᓄᑦ, ᔫᓂᐊᒧᑦ ᐱᓗᐊᕐᑐᖅ, ᕿᒻᒥᖃᓚᐅᔪᒻᒪᑦ ᕿᒻᒥᒪᕆᐅᖕᖏᑐᓂᒃ ᐊᓗᐃᕈᖃᑦᑕᓱᑎᓘᕐᑎᓗᒋᑦ. ᐅᓪᓗᐃᑦ ᓯᑕᒪᑦ ᓯᕗᓪᓕᐹᑦ ᐊᕐᓱᕈᓐᓇᑑᓚᐅᔪᕗᑦ, ᐅᖃᕐᑐᕕᓂᖅ ᔫᓂᐊ. ᖃᐅᑐᐊᕐᒪᑦ, ᐃᕗᔨᕕᓕᐊᓕᕐᓱᑎᒃ, ᐊᓄᕐᕋᓂᐊᕐᓂᕋᕐᑕᐅᓕᓚᐅᔫᖅ ᐱᕐᓯᓚᖓᓂᕋᕐᑕᐅᓱᓂᓗ ᐅᓐᓄᖓᓂ. ᑌᒪ, ᐃᕙᒃᑲᑐᓄᑦ ᓱᑲᓕᐅᑎᔪᓂᒃ ᑲᒪᔩᑦ ᑐᑭᑖᓕᓚᐅᔪᕗᑦ ᐅᓪᓕᓚᖓᓕᕐᓱᑎᒃ ᐅᖓᓯᓐᓂᓕᒻᒥ 20 ᑭᓗᒦᑕᓂᒃ ᓄᓇᓕᒻᒥᑦ, ᕿᒧᑦᓯᑏᓪᓗ ᓇᓪᓗᑳᕐᓱᑎᒃ ᓇᐅᒃᑰᓗᑎᒃ ᕿᒻᒥᒥᓂᒃ ᐃᕗᔨᕕᓕᐊᕐᑎᓯᓂᐊᕐᒪᖔᕐᒥᒃ. ᐊᓱᐃᓛᒃ ᓯᓚᓐᓂᐊᕈᑎᕕᓃᑦ ᓱᓕᔪᕕᓂᐅᓕᕐᓂᖁᑦ, ᐆᓀᑦᑑᓕᓚᐅᔫᖅ, ᐊᓄᕐᕋᓱᓂᓗ, ᕿᒧᑦᓯᑏᑦ ᐃᕗᔨᕕᒻᒦᒋᐊᖃᓚᕿᑦᓱᑎᒃ ᐅᓪᓗᓂ ᐱᖓᓱᓂ.
ᐱᕐᓯᒍᓐᓀᑐᐊᕐᒥᒪᑦ, ᓱᑲᓕᐅᑎᓯᒻᒥᓱᑎᒃ, ᑭᓯᐊᓂ ᐆᓀᑦᑐᒪᕆᐅᖏᓐᓈᓚᐅᔫᖅ. “ᓯᓚᑦᓯᐊᒍᓕᓚᐅᔫᖅ, ᑭᓯᐊᓂ ᐊᐳᑎ ᐊᕿᑦᑐᒪᕆᐅᓕᕐᒥᓱᓂ. ᓯᑯᖃᕐᓱᓂᓗ ᓵᑦᑐᒪᕆᒻᒥᒃ, ᓯᓚᓗᖃᑦᑕᑐᕕᓂᐅᒻᒥᓱᓂ ᖁᐊᖃᑦᑕᑐᒥᒃ ᑕᖅᑭᐅᓚᐅᕐᑐᒥ, ᕿᒻᒦᑦ ᐊᓗᒃᑯᑦ ᑭᓕᖃᑦᑕᓕᓚᐅᔫᑦ. ᖃᒥᖃᕐᑎᒐᓗᐊᕐᓱᒋᑦ ᐃᓚᖏᑦ ᓈᔨᒍᑎᐅᒍᓐᓇᓚᐅᔪᖕᖏᑐᑦ ᕿᒻᒥᓕᒫᓄᑦ, ᔫᓂᐊ ᐅᖃᕐᑐᕕᓂᖅ. ᑰᕕᓕᐊᕐᓱᑕ ᐊᕐᓱᕈᓐᓇᑑᓕᓚᐅᔪᒻᒥᔪᖅ, ᔫᓂᐊᓗ ᑌᑲᓃᓕᕐᓱᑎᒃ ᕿᒥᑐᖃᕆᓂᕐᐹᒥᑕ ᐃᓚᖓᓐᓂᒃ ᕿᒧᑎᑦᓯᖃᔦᓚᐅᔪᒻᒥᔪᖅ ᐅᓯᔭᐅᑎᒋᐊᖃᓯᑦᓱᒍ ᐃᑲᔪᕐᑎᓄᑦ.
“ᕿᒧᑎᒍᒣᓚᐅᔪᔭᕋ. ᕿᒻᒥᑐᖃᐅᓂᕐᓴᐅᒪᑦ ᓯᕐᓈᕆᓕᓚᐅᔪᑦᓱᒍᓗ.”
ᐱᖓᓱᐃᑦ ᕿᒧᑦᓰᑦ ᓱᑲᓕᐅᑎᖃᑕᐅᒍᓐᓀᓯᒪᓕᓚᐅᔫᑦ. 3-ᒥᒃ ᑭᑎᑦᔪᑎᓖᒃ, ᒫᓯᐅ ᐋᕐᖓᓗ ᐹᑦᓚᔮᑦ ᑫᑦᑕᓗ, ᓱᑲᓕᐅᑎᖃᑕᐅᒍᓐᓀᖄᓚᐅᔫᒃ, ᕿᒻᒥᖏᑦ ᕿᒧᒍᒣᓚᐅᔪᒻᒪᑕ. 8-ᒥᒃ ᑭᑎᑦᔪᑎᓖᒃ, ᐋᓕᒃ ᐊᐅᐸᓗᓪᓗ ᑏᕕ ᑯᓗᓛᕐᓗ, ᓱᑲᓕᐅᑎᖃᑕᐅᒍᓐᓀᓴᐅᑎᒋᒻᒥᑎᓪᓗᒋᒃ. 5-ᒥᒃ ᑭᑎᑦᔪᑎᓖᒃ, ᐸᐅᓗᓯ ᔦᓴᓐ ᐃᕐᓂᓗ ᔦᒥ ᑭᐊᑌᓐᓇᓗ, ᓱᑲᓕᐅᑎᑎᑕᐅᒍᓐᓀᓚᐅᔪᒻᒥᔫᒃ ᐊᑦᑕᕆᔭᐅᓕᕐᓂᕋᒥᒃ ᕿᒻᒥᖏᑦ ᐊᕐᓱᕈᓗᐊᓕᓚᐅᔪᒻᒪᑕ ᐊᐳᑎᖃᕐᓂᖓᒎᕐᓂᒥᓂ ᐃᑲᔪᕐᑎᓄᓪᓗ ᐁᔭᐅᒋᐊᖃᓯᓚᐅᔪᑦᓱᑎᒃ.
ᐱᖓᔪᒋᔭᐅᔪᕕᓂᖅ ᑯᓗ ᑐᑲᓚᒃ, ᐅᐱᒋᔭᐅᒍᑎᑖᕐᑐᕕᓂᖅ ᐃᓚᐅᒋᐅᕐᓂᒥᓄᑦ, ᐃᓄᐃᓪᓗ ᐱᕐᖁᓯᑐᖃᖓᑎᒍᑦ ᐊᓐᓄᕌᕐᓯᒪᓂᕕᓂᕐᒥᓄᑦ, ᑐᑭᓯᔭᐅᑎᑦᓯᓚᐅᔪᕗᖅ, ᓯᓚᑦᓯᐊᒍᕙᓪᓕᐊᓂᕆᓕᓚᐅᔪᔭᖓᓂ.
“ᕿᑎᖓᓃᒍᓇᐅᓕᕐᓱᑎᒃ, ᓯᑎᓂᕐᓴᐅᓕᕐᑐᕕᓂᖅ ᐊᐳᑎ ᕿᒧᕕᐅᒍᓐᓇᓯᐊᕐᓂᓴᐅᓕᕐᓱᓂ ᕿᒻᒥᓄᑦ,” ᐅᖃᕐᑐᕕᓂᖅ. “ᐊᕐᓱᕈᓐᓇᓗᐊᖕᖏᓂᕐᓴᐅᓕᕐᓱᓂ. ᑭᓯᐊᓂ ᐊᒥᓲᓂᕐᓭᑦ ᕿᒻᒦᑦ ᐊᓗᐃᕈᑦᓯᒪᓕᕐᑐᕕᓃᑦ ᑭᓕᕐᓯᒪᑦᓱᑎᓪᓗ ᒪᓂᑦᑐᑎᒎᖃᑦᑕᓯᒪᓂᕐᒥᓄᑦ, ᐅᐱᓐᓇᕋᓂ ᕿᒧᓪᓚᕆᒍᓐᓇᖃᑦᑕᕈᓐᓀᑐᕕᓃᑦ.”
ᒫᑦᓯ 10-ᒥ, ᓯᑕᒪᐅᔪᕐᑐᓂ ᐅᓪᓗᓂ ᓱᑲᓕᐅᑎᓕᕐᓱᑎᒃ ᐃᖏᕐᕋᓕᕐᓱᑎᓪᓗ 450-ᓂᒃ ᑭᓗᒦᑕᓂᒃ ᐃᕗᔨᕕᒻᒧᑦ ᐊᑯᓕᕕᒻᒧᓗ, ᖁᓕᐅᖕᖏᒐᕐᑐᑦ ᕿᒧᑦᓰᑦ ᐅᖓᒻᒧᐊᕇᕐᓂᖁᑦ ᐳᕕᕐᓂᑐᒧᑦ. ᖃᐅᔨᒪᓇᓚᐅᔪᕗᖅ ᐱᖓᓱᑦ ᑎᑭᕐᖄᓂᕐᐹᑦ ᐳᕕᕐᓂᑐᒥᐅᓕᒫᒍᒋᐊᖏᑦᑕ. ᑯᓗ ᑌᑯᓃᖓ ᕿᒧᑦᓯᓕᓃᓐᓂᒃ ᓯᕗᓪᓕᐹᒥᒃ ᑐᖓᓕᖓᓂᓪᓗ, ᐅᕕᒐᕐᓂᓴᐅᒪᒐᓗᐊᕐᑎᓗᒋᒃ, ᐃᓕᓭᔨᖃᓲᒍᖃᑦᑕᓂᕋᓚᐅᔪᕗᖅ.
“ᐊᐅᓪᓛᓯᒪᖃᑎᒋᖃᑦᑕᓲᕆᒻᒥᔮᒃᑲ ᐃᓕᓭᔨᒋᖃᑦᑕᓱᒋᒃ, ᐅᖄᕕᑦᓴᓯᐊᕆᓲᒃᑲ,” ᐅᖃᕐᑐᕕᓂᖅ ᑯᓗ.”
ᔫᓂᐊᒧᓪᓕᑕᐅᖅ, ᐃᓚᐅᒋᐅᕐᑐᒥᒃ ᑕᑯᑦᓱᖓ ᑯᓗᒻᒥᒃ ᓄᑲᕐᓯᐅᓂᕐᓴᓂᓪᓗ ᓱᑲᓕᐅᑎᖃᑕᐅᔪᓂᒃ ᑫᓪᓚᑐᕐᑕᐅᓇᕐᑐᖅ. ᕿᒻᒦᑦ, ᐃᓄᐃᑦ ᐃᓕᕐᖁᓯᖓᓄᑦ ᐱᓪᓚᕆᐅᓂᕐᐸᐅᖃᑕᐅᔪᑦ, ᐅᖃᕐᑐᕕᓂᖅ ᔫᓂᐊ.
“ᑐᓴᐅᒪᓲᒍᔪᒍᑦ ᐅᓂᒃᑳᑕᐅᑎᓪᓗᒋᑦ ᕿᒻᒦᑦ ᐃᓅᓕᑦᓯᖃᑦᑕᓲᒍᒋᐊᖏᓐᓂᒃ ᐃᓄᓐᓂᒃ ᐅᖄᕕᒋᓯᒪᔭᒃᑲᓗ ᕿᒻᒥᖃᓲᒍᓯᒪᔪᑦ ᓯᑭᑑᖃᓚᐅᕐᑎᓇᒍ, ᐃᓄᒡᒍ ᑎᑦᓴᑐ ᐊᖃᕐᓯᒪᓂᕋᕐᑐᓂᒃ ᕿᒻᒥᒥᓂᒃ,” ᐅᖃᕐᑐᕕᓂᖅ ᔫᓂᐊ. ᐊᕐᕌᒍ ᓱᑲᓕᐅᑎᖃᑕᐅᓛᕆᐊᒥᒃ ᖃᐅᔨᒪᕋᑕᖕᖏᓂᕋᕋᓗᐊᕐᓱᓂ, ᔫᓂᐊ ᕿᒻᒥᖃᓛᕈᓇ-ᐅᓂᕋᖕᖑᐊᓚᐅᔪᕗᖅ ᐊᕙᑎᑦ ᓯᑕᒪᓂᒃ ᐅᑭᐅᖃᓕᕋᑕᕐᓗᓂ. ᐃᕙᒃᑲᑐᓄᑦ ᓱᑲᓕᐅᑎᔪᓄᑦ ᐃᓚᐅᖕᖏᑲᓗᐊᕈᓂ.
“ᕿᒻᒦᓂᒃᑯᐊ ᑭᖑᕚᕆᔭᐅᑦᓱᑕ ᐅᓪᓗᒥᒧᑦ ᑎᑭᐅᑎᒍᑎᒋᓯᒪᔭᑦᑎᓄᑦ ᐱᓪᓚᕆᐅᖃᑕᐅᒻᒪᑕ ᓲᓱᒋᒋᐊᓕᕗᑦ, “ᐅᖃᕐᑐᕕᓂᖅ ᔫᓂᐊ. “ᑕᒪᓐᓇ ᑌᒪᖕᖓᑦ ᑐᑭᓯᒪᓲᕋ.”
ᐃᕙᒃᑲᑐᓄᑦ ᓱᑲᓕᐅᑎᔪᓂ ᐸᐅᓚᓯ ᐴᓐ ᑐᑭᒧᐊᑦᑎᓯᔨᒻᒪᕆᐅᑎᓪᓗᒍ. ᔪᐊᓂ ᐴᓐᓗ ᐊᕐᖁᓯᐅᕆᓂᕐᒥᒃ ᑐᑭᒧᐊᑦᑎᓯᔨᐅᑎᓪᓗᒍ, ᑲᒪᔨᐅᑎᓪᓗᒋᓪᓗ ᐱᓕ ᐹᓕᓴᓗ ᔮᑯᓯ ᐃᑦᑐᑲᓪᓚᓗ. ᕿᒻᒦᓗ ᐋᓐᓂᐊᓯᐅᕐᑎᖃᕐᓱᑎᒃ ᓇᑌᓐ ᑭᔨᐅᕐᒥᒃ ᐃᑲᔪᕐᑎᖃᕐᓱᓂᓗ ᒫᓯᐅ ᐊᓚᑯᒥᒃ. ᒪᑭᕝᕕᐅᑉ ᐱᓇᓱᑦᑎᒋᒃ ᓱᑲᓕᐅᑎᔪᓕᕆᓂᕐᒥᒃ ᐊᑕᐅᑦᓯᑰᕐᑎᓯᔨᒋᔭᐅᑎᓪᓗᒋᒃ ᐊᑭᓂᓯ ᓯᕗᐊᕋᐱᓪᓗ ᓕᓐ ᒧᐊᖃᐅᔅᓗ.
ᑐᑭᓯᒋᐊᑦᓯᐊᕕᑦᓴᖅ ᕿᒧᑦᓯᖃᑕᐅᔪᕕᓂᕐᓂᒃ ᐱᓇᓱᐊᕐᑐᕕᓂᕐᓂᓗ, ᑮᓇᐅᔭᖃᕐᑎᓯᔪᕕᓂᕐᓂᓗ, ᓵᓚᓐᓃᔪᕕᓂᕐᓂᓗ ᐃᕙᒃᑲᑐᓄᑦ ᓱᑲᓕᐅᑎᔪᕕᓂᕐᓂᒃ 2021-ᒥ, ᑐᓴᕋᑦᓴᖃᕐᕕᕗᑦ ᖃᕆᑕᐅᔭᒃᑯᑦ ᑕᑯᒋᐊᕋᑦᓴᐅᕗᖅ www.ivakkak.com.
