ᐊᒥᓱᑦ ᓄᓇᕕᒻᒥ ᐃᓄᐃᑦ ᐃᓚᒌᑦ ᐃᑲᔪᕐᓯᒪᓲᖑᒻᒪᑕ ᐱᕐᖃᔭᖕᖏᑑᒍᑎᓕᓐᓂᒃ ᐃᑯᓪᓚᖏᑦᑐᑯᑦ ᐊᒻᒪᓗ ᐱᐅᓯᕆᓕᕐᓱᒍ ᑎᒥᒥᒍᑦ ᐃᓱᒪᒥᒍᓪᓘᓃᑦ ᐱᕐᖃᔭᖕᖏᑑᒍᑎᓕᓐᓂᒃ. ᑖᒃᑯᐊ ᐃᓚᒋᔭᐅᔪᑦ ᐱᑕᖃᓪᓗᑐᕆᐊᓕᒻᒥᒃ ᖃᓄᐃᓘᕐᑎᐅᕕᖃᓲᖑᕗᑦ ᑲᒪᒋᔭᖃᕐᓱᑎᒃ ᓇᒡᓕᒋᔭᒥᑕ ᐱᕐᖃᔭᖕᖏᑑᑉ ᐅᓪᓗᑕᒫᕐᓯᐅᑎᓂᒃ ᐃᑉᐱᒋᔭᐅᒍᑎᒋᒋᐊᓕᖏᓐᓂᒃ ᐃᑲᔪᕐᑕᐅᒍᑎᒋᒋᐊᓕᖏᓐᓂᓗ. ᑭᓯᐊᓂ, ᐃᑲᔪᕐᓯᔭᐅᒍᑎᑖᕆᓲᖏᑦ ᐱᑕᖃᓪᓗᐊᓲᖑᖕᖏᑐᑦ, ᐊᑭᓕᕋᑦᓴᑖᕐᓯᒪᒋᐊᓪᓚᐸᑦᓱᑎᓗ. ᑕᒪᓐᓇ ᑕᒐ ᐱᑦᔪᑎᒋᑦᓱᒍ ᒪᑭᕝᕕᒃ ᓄᐃᑦᓯᓚᕿᓯᒪᔪᖅ ᓕᓕᐅᑉ ᑮᓇᐅᔭᑎᒍᑦ ᐃᑲᔪᕐᓯᒍᑎᖓᓂᒃ, ᐱᑕᖃᕐᑎᓯᒍᑎᐅᑎᓪᓗᒍ ᐃᑲᔪᕐᓯᒪᒍᑎᒋᐊᓪᓚᓴᕐᓂᒃ ᑖᒃᑯᓄᖓ ᐃᓚᒌᓄᑦ.
ᓕᓕᐅᑉ ᑮᓇᐅᔭᖁᑎᖓ ᐊᑦᓯᔭᐅᒍᑎᓕᕕᓂᖅ ᐃᓕᑕᕐᓯᒍᑎᐅᑦᓱᓂ ᓕᓕ ᒪᐃᓇᐅᑉ, ᐃᓄᑦᔪᐊᒥᐅᑉ ᓂᐱᖃᕐᑎᓯᑦᓱᓂ ᐱᓇᓱᐊᕈᑦᔨᓂᖓᓂᒃ. ᑕᖃᓚᐅᕐᓯᒪᒐᓂ ᐃᑉᐱᒋᔭᐅᓕᕐᑎᓯᒐᓱᐊᕐᓯᒪᔪᖅ ᓄᓇᕕᒻᒥ ᐃᓄᐃᑦ ᐃᓚᒌᑦ ᐃᑯᓪᓚᖏᑦᑐᓂᒃ ᐱᕐᖃᔭᖕᖏᑑᒍᑎᓕᒻᒥᒃ ᐃᓚᒥᓂᒃ ᑲᒪᒋᔭᖃᕐᓱᑎᒃ ᐱᔭᕐᓃᓕᐅᕐᓂᕆᓲᖏᓐᓂᒃ.
ᖃᓄᐃᓕᖓᕙᑦ ᓴᐳᑦᔭᐅᒍᑏᑦ ᐊᑐᐃᓐᓇᐅᑎᑌᑦ ᓕᓕᐅᑉ ᑮᓇᐅᔭᑎᒍᑦ ᐃᑲᔪᕐᓯᒍᑎᖓᑎᒍᑦ?
ᐊᖏᖃᑎᒌᓐᓂᒧᑦ ᐃᓚᐅᔪᖅ ᐃᑯᓪᓚᖏᑦᑐᒥᒃ ᐊᒻᒪᓗ ᐱᐅᓯᕆᓕᕐᓱᒍ ᑎᒥᒥᒍᑦ ᐃᓱᒪᒥᒍᓪᓘᓃᑦ ᐱᕐᖃᔭᖕᖏᑑᒍᑎᓕᒃ, ᐅᕝᕙᓘᓐᓃᑦ ᐊᖓᔪᕐᖄᖓᑦ ᐊᓈᓇᖓ/ᐊᑖᑕᖓ ᐅᕝᕙᓘᓐᓃᑦ ᑲᒪᔨᖓ, ᐱᒍᓐᓇᕕᖃᑐᐃᓐᓇᕆᐊᓕᒃ ᐊᑭᓕᕐᑕᐅᒍᓐᓇᓗᓂ ᐅᑯᓂᖓ ᐅᓄᕐᓂᓖᑦ ᓇᓪᓕᖓᓂᒃ ᐊᑐᕐᓗᒋᑦ ᐱᓇᓱᐊᕐᑎᓯᒍᑎᓂᑦ ᒪᓕᑦᑕᐅᒋᐊᓖᑦ:
– $12,000 ᐃᓄᒃ ᐊᑕᐅᓯᖅ ᐊᕐᕌᒍᑕᒫᖅ, 20252026ᒥ, ᑖᓐᓇ ᐱᕐᖃᔭᖕᖏᑑᒍᑎᓕᒃ ᐃᓚᒥᓂᑦ ᐊᓂᕐᕋᖃᑐᐊᕐᐸᑦ
– $6,000 ᐃᓄᒃ ᐊᑕᐅᓯᖅ ᐊᕐᕌᒍᑕᒫᖅ ᑖᓐᓇ ᐱᕐᖃᔭᖕᖏᑑᒍᑎᓕᒃ ᐊᓂᕐᕋᕆᔭᐅᓲᒥᒃ ᑲᒪᒋᔭᐅᕕᒻᒥ ᐊᓂᕐᕋᖃᑐᐊᕐᐸᑦ
ᑭᓇ ᑐᑦᓯᕋᐅᑎᓕᐅᒍᓐᓇᐸ ᑮᓇᐅᔭᑎᒍᑦ ᐃᑲᔪᕐᑕᐅᒍᒪᐅᑎᓂᒃ ᓕᓕᐅᑉ ᑮᓇᐅᔭᑎᒍᑦ ᐃᑲᔪᕐᓯᒍᑎᖓᓄᑦ?
ᓕᓕᐅᑉ ᑮᓇᐅᔭᑎᒍᑦ ᐃᑲᔪᕐᓯᒍᑎᖓᑕ ᐋᕐᕿᓱᕐᑕᐅᓯᒪᒍᓯᖓ ᐃᒣᓕᖓᔪᖅ ᓄᓇᕕᒻᒥ ᐃᓄᐃᑦ ᐃᓅᓯᓖᑦ ᐃᑯᓪᓚᖏᑦᑐᑯᑦ ᐊᒻᒪᓗ ᐱᐅᓯᕆᓕᕐᓱᒍ ᐱᕐᖃᔭᖕᖏᑑᒍᑎᓖᑦ ᐃᑲᔪᕐᓗᒋᑦ, ᐊᒻᒪᓗᑦᑕᐅᖅ ᐊᖓᔪᕐᖄᖏᑦ ᐊᓈᓇᖓ/ᐊᑖᑕᖓ ᐅᕝᕙᓘᓐᓃᑦ ᑲᒪᔨᖏᑦ ᑖᒃᑯᐊ ᐃᑲᔪᕐᑕᐅᔪᑦ ᐃᓄᒻᒪᕆᐅᕋᑕᖕᖏᑐᐊᕐᐸᑕ.
ᐃᓚᐅᒍᓐᓇᕈᑎᖏᑦ ᓱᕐᖁᐃᓯᒍᑎᓄᑦ ᐱᓇᓱᐊᕐᑎᓯᒍᑎᓄᑦ ᐃᓚᐅᒍᓐᓇᓂᕐᒥᒃ ᐅᑯᐊ:
– ᐃᓚᐅᔫᓗᓂ ᔦᒻᔅ ᐯ ᐊᒻᒪᓗ ᑯᐯᒃ ᑕᕐᕋᖓᑕ ᐊᖏᖃᑎᒌᓐᓂᖓᓄᑦ.
– ᐃᓅᓯᕐᒥᓂ ᐃᑯᓪᓚᖏᑦᑐᒥᒃ ᐊᒻᒪᓗ ᐱᐅᓯᕆᓕᕐᓱᒍ ᑎᒥᒥᒍᑦ ᐃᓱᒪᒥᒍᓪᓘᓃᑦ ᐱᕐᖃᔭᖕᖏᑑᒍᑎᖃᕐᓗᓂ, ᐃᓗᓯᓕᕆᓂᕐᒥ ᐱᓇᓱᑦᑎᒪᕆᒻᒧᑦ ᓱᕐᖁᐃᓯᒍᑕᐅᓯᒪᔪᑎᒍᑦ.
– ᐅᑭᐅᖃᕐᓗᓂ 64ᓂᒃ ᐃᑭᓐᓂᓴᓂᓪᓘᓃᑦ.
ᐊᑐᕆᐊᖃᕐᐳᖔ ᑕᑕᕐᓴᒐᕐᒥᒃ ᑐᑦᓯᕋᐅᑎᓕᐅᕈᑎᒃᑲᓄᑦ?
ᐋ, ᓕᓕᐅᑉ ᑮᓇᐅᔭᑎᒍᑦ ᐃᑲᔪᕐᓯᒍᑎᖓᓄᑦ ᑐᑦᓯᕋᐅᑎᓕᐅᕈᑏᑦ ᑕᑕᕐᓴᒋᐊᓖᑦ ᖃᕆᑕᐅᔭᒨᕐᑕᐅᒍᓐᓇᑐᑦ ᐅᕙᖕᖓᑦ ᒪᑭᕝᕕᑯᑦ ᑕᑯᑦᓴᐅᑎᑦᓯᕕᖓᓂᑦ
https://www.makivvik.ca/lillysfundsupportprogram/
ᖃᓄᐃᓕᓗᖓ ᑐᑦᓯᕋᐅᑎᓕᐅᒍᓐᓇᐳᖓ ᑮᓇᐅᔭᑎᒍᑦ ᐃᑲᕐᑕᐅᒍᑎᓂᒃ ᓕᓕᐅᑉ ᑮᓇᐅᔭᑎᒍᑦ ᐃᑲᔪᕐᓯᒍᑎᖓᓂᑦ?
ᑐᑦᓯᕋᐅᑎᓕᐅᕐᓂᒧᑦ ᑮᓇᐅᔭᑎᒍᑦ ᐃᑲᔪᕐᑕᐅᒍᑎᓂᒃ, ᓕᓕᐅᑉ ᑮᓇᐅᔭᑎᒍᑦ ᐃᑲᔪᕐᓯᒍᑎᖓᓂᒃ ᑐᑦᓯᕋᐅᑎᓄᑦ ᑕᑕᕐᓴᒐᖅ ᐱᔭᕇᕐᓯᒪᑦᓯᐊᓗᒍ ᐊᑎᓕᐅᕐᓯᒪᓗᒍᓗ ᐊᐅᓪᓚᑎᓗᒍ ᖃᕆᑕᐅᔭᑎᒍᑦ ᐊᓪᓚᑖᕐᑎᓯᒍᑎᒧᑦ ᐅᕗᖓ: Lillysfund@makivvik.ca
ᒪᕐᕈᐃᓕᕿᖓᔫᒃ ᐃᓚᐅᔪᒥᒃ ᐱᓇᓱᐊᕐᑎᓯᒍᑎᓄᑦ ᐃᓚᐅᒍᓐᓇᒪᖔᑦ ᖃᐅᔨᓴᕈᑎᐅᓂᐊᕐᑑᒃ:
– ᑖᓐᓇ ᐃᓚᐅᔪᖅ ᐃᓚᐅᒍᓐᓇᕕᖃᑦᓴᕈᓂᓗ ᑲᓇᑕᐅᑉ ᐱᕐᖃᔭᖕᖏᑑᒍᑎᓕᓐᓂᒃ ᑖᒃᓰᔭᕐᓂᑯᑦ ᐃᑲᔪᕐᓯᒪᐅᑎᖓᓄᑦ, ᐃᓚᐅᒍᓐᓇᕕᖃᑐᐊᕈᓂ ᓄᐃᑦᓯᒋᐊᑐᑐᐃᓐᓇᒨᕐᑐᖅ ᐃᓚᐅᒍᓐᓇᓂᕐᒥᓂᒃ ᓱᓕᓂᕃᒍᑎᒥᒃ (ᐊᓪᓚᑖᕆᓯᒪᔭᖓ, ᐊᓯᐊᓘᓐᓃᑦ) ᓕᓕᐅᑉ ᑮᓇᐅᔭᑎᒍᑦ ᐃᑲᔪᕐᓯᒍᑎᖓᓄᑦ ᑐᑦᓯᕋᐅᑎᓕᐅᕐᓂᒧᑦ ᑕᑕᕐᓴᒐᕐᒧᑦ ᐃᓚᒋᔭᐅᑎᓗᒍ.
– ᑖᓐᓇ ᐃᓚᐅᔪᖅ ᖃᐅᔨᒪᖕᖏᑑᑦᓴᕈᓂᓗ ᐃᓚᐅᒍᓐᓇᑎᑕᐅᒻᒪᖔᕐᒥ ᑲᓇᑕᐅᑉ ᐱᕐᖃᔭᖕᖏᑑᒍᑎᓕᓐᓂᒃ ᑖᒃᓰᔭᕐᓂᑯᑦ ᐃᑲᔪᕐᓯᒪᐅᑎᖓᓄᑦ, ᑌᒣᓕᖓᑉᐸᑦ ᐃᓗᓯᓕᕆᓂᕐᒥ ᐱᓇᓱᑦᑎᒪᕆᒧᑦ ᖃᐅᔨᓴᕐᑕᐅᒋᐊᓕᒃ. ᑖᓐᓇ ᖃᐅᔨᓴᕐᑕᐅᓂᖓ ᐱᒍᓐᓇᑎᑦᓯᓂᐊᕐᑐᖅ ᑖᑦᓱᒥᖓ ᐃᓗᓯᓕᕆᓂᕐᒥ ᐱᓇᓱᑦᑎᒪᕆᒻᒥᒃ ᐊᑎᓕᐅᕈᓐᓇᑎᓪᓗᒍ ᓕᓕᐅᑉ ᑮᓇᐅᔭᑎᒍᑦ ᐃᑲᔪᕐᓯᒍᑎᖓᓄᑦ ᑐᑦᓯᕋᐅᑎᓕᐅᕐᓂᒧᑦ ᑕᑕᕐᓴᒐᕐᒥᒃ.
ᖃᓄᖅ ᖃᐅᔨᓴᕐᑕᐅᒐᔭᕐᐳᖓ ᐃᓗᓯᓕᕆᓂᕐᒥ ᐱᓇᓱᑦᑎᒪᕆᒧᑦ?
ᑌᓐᓇ ᐃᓗᓯᓕᕆᓂᕐᒥ ᐱᓇᓱᑦᑎᒪᕆ ᖃᐅᔨᓴᕋᔭᕐᑐᖅ ᐅᑯᐊ ᐊᑐᕐᓗᒋᑦ
“ᐊᕐᖁᑎᐅᒋᐊᓕᒃ ᐱᒍᓐᓇᓯᐊᖕᖏᓂᕐᒧᑦ ᐃᑲᔪᕐᑕᐅᒍᑎᓂᒃ ᐱᓇᓱᐊᕐᑎᓯᒍᑏᑦ” ᓄᓇᕕᒻᒥ ᐃᓗᓯᓕᕆᔨᒃᑯᓂ. ᓄᓇᓕᓯᓐᓂ ᐋᓐᓂᐊᓯᐅᕐᑕᐅᕕᒻᒥ ᐱᓇᓱᑦᑎᒪᕆᒻᒥᒃ ᑖᒃᑯᓂᖓ ᖃᐅᔨᓴᕈᑎᓂᒃ ᐱᓇᓱᐊᕐᑐᖃᕈᓐᓇᑐᖅ ᐱᔭᕇᕐᓗᒋᓗ ᓕᓕᐅᑉ ᑮᓇᐅᔭᑎᒍᑦ ᐃᑲᔪᕐᓯᒍᑎᖓᓄᑦ ᑐᑦᓯᕋᐅᑎᓕᐅᕈᑎᖏᓐᓂᑦ ᑌᒃᑯᐊ ᐊᓪᓚᒋᐊᓖᑦ ᑕᑕᕐᓴᕇᕐᓗᒋᑦ.
ᖃᓄᐃᓘᓲᖑᕙᑦ ᑐᑦᓯᕋᐅᑎᓂᒃ ᑕᑕᕐᓴᒐᖅ ᑐᓂᔭᐅᓯᒪᓕᑐᐊᕐᒪᑦ?
ᐊᐅᓪᓚᑎᑦᓯᒌᕐᑐᕕᓂᐅᓕᕈᕕᑦ ᑕᑕᕐᓴᒐᕐᒥᒃ ᐅᕗᖓ
Lillysfund@makivvik.ca ᐃᓚᖃᕐᑎᓗᒋᑦ ᓱᓪᓕᑕᐅᒍᑎᖏᓐᓂᒃ ᐃᓚᐅᒍᓐᓇᓂᕐᐱᑦ ᑲᓇᑕᒥ ᐱᕐᖃᔭᖕᖏᑑᒍᑎᓕᓐᓄᑦ ᑖᒃᓰᔭᕐᓂᑯᑦ ᐃᑲᔪᕐᓯᒍᑎᖓᓄᑦ ᐅᕝᕙᓘᓐᓃᑦ ᐃᓗᓯᓕᕆᓂᕐᒥ ᐱᓇᓱᑦᑎᒪᕆᒧᑦ ᖃᐅᔨᓴᕐᑕ ᐅᒍᑎᑉᐱᑦ ᑭᖑᓂᐊᒍᑦ, ᑎᑭᑕᐅᓂᐊᕐᑐᑎᑦ [ᐊᓪᓚᓯᒪᔪᓂᒃ ᑎᑭᓐᓂᕃᔪᓂᒃ ᖃᕆᑕᐅᔭᒃᑯᑦ ᐊᓪᓚᑖᕈᑎᒃᑯᑦ ᐊᒻᒪᓗ/ᐅᕝᕙᓘᓐᓃᑦ ᐊᓪᓚᓯᒪᔪᕐᓂᐊᕕᑦᑎᒍᑦ.
ᑐᑦᓯᕋᐅᑎᓕᐊᕆᓯᒪᔭᑎᑦ ᐊᓱᐃᓛ ᕿᒥᕐᕈᒋᐊᓪᓚᑕᐅᓂᐊᕐᑐᑦ ᓱᓇᒥᑦᓯᒪᖔᑕ ᑲᒪᒋᔭᐅᓗᑎᒃ. ᑐᑭᓯᒪᒍᑎᐅᒋᐊᓕᓐᓂᑦ ᓇᓪᓕᑐᐊᓐᓇᖓᓂᒃ ᐱᑕᖃᖕᖏᑐᐊᕐᐸᑕ ᖃᐅᔨᒋᐊᕐᕕᐅᓛᕐᑐᑎᑦ.
ᐱᓇᓱᐊᕐᑎᓯᒍᑎᓄᑦ ᐱᑕᖃᕆᐊᖃᕐᑎᑕᐅᔪᓂᒃ ᓈᒻᒪᓈᕐᓯᒪᒍᕕᑦ ᐃᓚᐅᒍᓐᓇᑎᑕᐅᒍᕕᓪᓗ, ᐃᓚᐅᒍᓐᓇᓂᕐᐱᑦ ᓱᓕᓂᕋᕐᑕᐅᒍᑎᖏᓐᓂᒃ ᐱᒻᒪᕆᓂᒃ ᑐᑭᓯᓇᕈᑎᑕᓕᓐᓂᒃ ᐊᓪᓚᑖᕐᑎᑕᐅᓛᕐᑐᑎᑦ.
ᑐᑦᓯᕋᐅᑏᑦ ᓄᑕᐅᓯᓕᕐᑕᐅᒋᐊᖃᕐᐹᑦ ᐊᕐᕌᒍᑕᒫᖅ?
ᓄᑕᐅᓯᓕᕆᒍᑎᓄᑦ ᑕᑕᕐᓴᒐᖅ ᐃᓕᓐᓄᑦ ᐊᐅᓪᓚᑎᑕᐅᖃᑦᑕᓂᐊᕐᑐᖅ ᐊᕐᕌᒍᑕᒫᖅ ᐊᓪᓚᓯᒪᔪᖁᑎᕕᑦ ᓄᑕᐅᓯᓕᕐᑕᐅᓂᖏᓐᓄᑦ.
ᐃᑲᔪᕐᑕᐅᒍᑎᖃᕈᓐᓇᖁᖔ ᑕᑕᕐᓭᓗᖓ ᑐᑦᓯᕋᐅᑎᓕᐊᒃᑲᓂᒃ?
ᑕᑕᕐᓴᒋᐊᓕᓐᓂᒃ ᐊᓪᓚᓯᒪᔪᓕᐅᓕᕈᕕᑦ ᐃᑲᔪᕐᑕᐅᒋᐊᖃᑦᓴᓂᕈᕕᑦ, ᖃᐅᔨᒋᐊᕐᓗᑎᑦ ᒪᑭᕝᕕᒧᑦ. ᓕᓕᐅᑉ ᑮᓇᐅᔭᑎᒍᑦ ᐃᑲᔪᕐᓯᒍᑎᖓᑕ ᑕᑯᑦᓴᐅᓂᖏᑦ ᖃᕆᑕᐅᔦᑦ ᐱᑐᑦᓯᒪᖃᑎᒌᕝᕕᖓᓂ ᓄᑕᐅᓯᓕᕐᓯᒪᔪᓂᒃ ᓄᐃᑕᑎᑕᐅᖃᑦᑕᓂᐊᕐᑐᑦ ᑌᒫᒃ ᐃᓕᓐᓂᒃ ᐃᑲᔪᕈᓐᓇᑐᖅ ᑌᑦᓱᒪ ᖃᐅᔨᒋᐊᕐᕕᒋᒍᓐᓇᑕᕐᐱᑦ ᑐᕌᕈᑎᖏᓐᓂᒃ ᑕᑯᒍᓐᓇᕋᔭᕋᕕᑦ.
ᐊᑭᓕᕐᑕᐅᒍᓐᓇᒐᔭᕐᐳᖔ ᑐᕃᓐᓇᑐᒃᑯᑦ ᑮᓇᐅᔭᒃᑯᕕᒐᓄᑦ?
ᐋ’. ᐊᑭᓕᕐᑕᐅᒍᑎᑦᒪᑎᓐᓄᑦ ᑐᕃᓐᓇᑐᒃᑯᑦ ᑮᓇᐅᔭᒃᑯᕕᓐᓅᑎᓪᓗᒋᑦ, ᑮᓇᐅᔭᑦᓴᔭᖁᑎᕕᑦ ᐊᑐᒻᒣᑐᑦ ᐃᓚᖓᓂᒃ ᐃᓚᐅᑎᑦᓯᓗᑎᑦ ᑖᒃᑯᓄᖓ ᑐᑦᓯᕋᐅᑎᓕᐊᑎᓐᓄᑦ.
