ᑕᒪᓐᓇ ᓄᓇᐅᑉ ᓯᑐᓂᕕᓂᖓ ᐊᕙᑎᒥᒃ ᓄᓇᓕᒻᒥᓗ ᓱᕐᕃᓂᖃᓚᖓᔪᖅ
ᓄᓇ ᓯᑐᔪᕕᓂᐅᓚᐅᔪᕗᖅ ᑰᑦᔪᐊᕌᐱᐅᑉ ᓴᓂᐊᓂ ᐅᐱᕐᖓᓴᐅᓕᕐᑎᓗᒍ ᑕᒪᓐᓇᓗ ᓯᑐᓂᕕᓂᖅ ᓯᑐᓂᐅᓯᒪᒻᒥᔪᓄᑦ ᐊᖏᓂᖓ ᑐᖓᓕᐅᑦᓱᓂ ᐊᕐᕌᒍᐃᑦ 150 ᐊᓂᒍᓕᕐᑐᑦ ᓯᑐᓂᖃᓚᐅᕐᑐᕕᓂᐅᑎᓪᓗᒍ. ᐁᕆᓕ 22ᒥ ᐅᓪᓛᑯᑦ ᑌᒣᓕᔪᓂᐅᓚᐅᔪᖅ ᑰᑦᔪᐊᕌᐱᐅᑉ ᐊᒻᒪᓗ ᒍᐊᒻᒪᑰᔅᑐᐃᑉ ᓄᓇᓕᖓᑕ ᓴᓂᐊᓂ, 1.8 ᑭᓛᒥᑕᓄᑦ ᐅᖓᓯᓐᓂᖃᕐᑐᒥ ᑕᑉᐹᓂ ᑰᒻᒥ, ᓄᓇᐅᑉ ᓯᑐᓂᕕᓂᖓ 1.8 ᑭᓛᒥᑕᓄᑦ ᐊᖏᓂᖃᕐᓱᓂ 500 ᒦᑕᓄᑦ ᓴᓂᒧᑦ ᐊᖏᓂᖃᓚᐅᔪᖅ ᑰᑉ ᓯᓈᓂ. ᑕᒪᓐᓇ 40 ᒥᓕᐊᓐ cubic ᒦᑕᓂᒃ ᑰᑦᔪᐊᕌᐱᐅᑉ ᑰᖓᓄᑦ ᓯᑐᔪᕕᓂᐅᓚᐅᔪᖅ.
ᑰᑦᔪᐊᕌᐱᒻᒥ ᓯᕗᓕᕐᑎ ᐃᑎᒪ ᐃᑦᑐᓵᖅ ᑎᒻᒥᔪᒃᑯᑦ ᑕᑯᓂᐊᕐᑐᕕᓂᐅᓚᐅᔪᖅ ᑌᒣᓕᕐᖃᒥᐅᑎᓪᓗᒍ. “ᑕᑕᒥᑦᓯᐊᓚᐅᔪᕗᖓ. ᑕᑕᒥᐅᒪᑐᐃᓐᓇᓕᕐᓱᖓ,” ᑌᒣᓕᑦᓱᓂ ᐃᑎᒪ ᐅᖃᓚᐅᔪᖅ. “ᑕᑯᓚᐅᕐᓯᒪᖕᖏᒧᑦ ᑌᒣᑦᑐᓗᑐᐊᓗᒻᒥᒃ, ᐊᔪᒉᑦᑐᕋᑕᐅᓚᐅᔪᖅ ᑕᑯᒥᐊᒥᒃ.”
ᐊᔪᒉᑦᑑᒐᓗᐊᖅ, ᑭᓯᐊᓂ ᑌᒣᓕᒋᐅᑦᔭᖏᑦᑐ. Michel Allard, ᓄᓇᒥᒃ ᖃᐅᔨᓴᓲᖅ ᓚᕚ ᐃᓕᓐᓂᐊᕕᕐᔪᐊᖓᓂ, ᐃᓚᒋᔭᐅᔪᕕᓂᐅᓚᐅᔪᖅ ᑕᑯᓂᐊᕐᑐᓄᑦ ᑌᒣᓕᕐᖃᒥᐅᑎᓪᓗᒍ, ᑰᑦᔪᐊᕌᐱᒻᒥᐅᓄᑦ ᑕᑯᓂᐊᖃᑎᕕᓂᐅᓚᐅᔪᖅ ᑲᕙᒪᒃᑯᓂ ᐱᓯᒪᔪᐃᑦ ᐃᓚᒋᔭᐅᒻᒥᑎᓪᓗᒋᑦ, ᑲᑎᕕᒃ ᓄᓇᓕᓕᒫᑦ ᑲᕙᒪᒃᑯᑦ ᓇᐅᓕᒫᓂᒃ/ᐃᓄᓕᒫᑦ ᐊᑦᑕᓀᑦᑐᒥᑦᑎᓯᒐᓱᐊᕐᓂᕐᒧᑦ ᐊᓪᓚᕕᒻᒥ ᐱᓯᒪᔪᐃᑦ ᑖᕗᖕᖓᑎᑦᓯᑎᓪᓗᒋᑦ, ᑭᖑᓂᖓᒍᑦ ᑕᑯᓂᐊᕇᕋᒥᒃ ᑲᑎᒪᔪᕕᓂᐅᓚᐅᔪᑦ. Allard ᐊᕐᕌᒍᓂ ᐊᕙᑎᑦ ᒪᖅᕈᑦ (40) ᐅᖓᑖᓄᑦ ᖃᐅᔨᓴᖃᑦᑕᓯᒪᓕᕐᑐᖅ ᑯᐯᒃ ᑕᕐᕋᖓᓂ ᓄᓇᒥᒃ, ᓄᓀᑦ ᖃᓄᐃᓕᖓᓂᖏᓐᓂᒃ, ᐅᑦᑑᑎᒋᓗᒋᑦ ᐊᓯᑦᔨᐸᓪᓕᐊᓂᖏᓐᓂᒃ ᐊᐅᓚᓂᕐᒥᓄᑦ, ᓄᓇᐅᑉ ᐊᐅᑖᒍᑦ ᐊᓯᑦᔨᑕᐅᕙᓪᓕᐊᓂᖏᓐᓂᒃ, ᐊᒻᒪᓗ ᓄᓀᑦ ᐊᑖ ᐊᐅᑉᐸᓕᐊᓂᖏᓐᓂᒃ. ᐅᖃᓚᐅᔪᖅ ᓯᓚ ᐊᓯᑦᔨᕙᓪᓕᐊᒐᓗᐊᕐᑎᓗᒍ ᓄᓇᐅᑉ ᐊᑖ ᐊᐅᑉᐸᓕᐊᓂᖓ ᑌᒣᑦᑎᓯᓯᒪᑦᔭᖏᑦᑐᖅ ᑖᕙᑦᓱᒥᖓ, ᓄᓇᓂᒃ ᓯᑐᔪᖃᖃᑦᑕᓯᒪᒐᓗᐊᕐᒥᔪᖅ ᑰᑦᔪᐊᕌᐱᐅᑉ ᑰᖓᑕ ᑕᓴᒪᓐᓇᖓᓂᐅᓂᕐᓴᖅ, ᐃᓚᖏᑦ ᖃᐅᔨᓴᕐᑕᐅᖃᑦᑕᓯᒪᔪᑦ ᐊᒻᒪᓗ ᖃᖓᓂᑕᐅᒻᒪᖔᑕ ᖃᐅᔨᓴᖃᑦᑕᓱᒋᑦ 19 ᖃᓐᑌᑦ ᐊᕐᕌᒍᖏᓐᓂ ᑌᒣᖃᑦᑕᓯᒪᔪᐃᑦ, ᐊᒻᒪᓗ ᐃᓚᖓ 2,200 ᐊᕐᕌᒍᐃᑦ ᐊᓂᒍᓕᕐᑐᑦ ᑌᒣᓕᓚᐅᕐᑐᕕᓂᐅᑎᓪᓗᒍ.
ᑐᑭᓯᓇᕐᑎᓯᓚᐅᔪᖅ ᓄᓇᐅᑉ ᖄᖓ 8,000 ᓴᐅᓴᑐᐃᓐᓇᓂᒃ ᐊᕐᕌᒍᖃᓕᕐᓂᕋᕐᓱᒍ. ᑌᑦᓱᒪᓂᐅᑎᓪᓗᒍ Tyrrell Sea-ᒍᓂᕋᕐᑕᐅᔪᒧᑦ ᐃᒪᕐᐱᖓᓄᑦ ᐃᕐᖃᖓᓂᑦᓯᒪᔪᖅ. ᓯᑯᑦᔪᐊᖅ ᐊᐅᑉᐸᓕᐊᓕᕐᒪᑦ ᑕᓯᐅᔭᕐᔪᐊᒥ, ᐊᒥᓱᑲᓪᓛᓗᐃᑦ ᓯᓕᑦᑐᓈᕐᑐᓱᑎᒃ “ᓱᕐᕋᒍᐊᕐᑐᓴᔭᐅᑦᓱᑎᒃ” ᒪᕐᕋᐅᔦᑦ ᑲᑕᒐᓯᓚᐅᕐᑐᕕᓃᑦ. ᒪᕐᕋᐅᔦᑦ ᐃᔨᓐᓄᑦ ᑕᑯᑦᓴᐅᖏᑦᑐᐃᑦ ᑲᑎᕐᓱᓯᒪᔪᑦ, ᓱᓇᑕᖃᖕᖏᑐᐃᑦ ᐊᑯᓐᓂᖏᓐᓂ.
“ᒪᕐᕋᐅᔭᖅ ᓱᕐᕋᒍᐊᕐᑑᒪᑦ, ᐃᒫᒃ ᑐᑭᓕᒃ ᓯᑎᔪᑦᓴᔭᐅᑦᓱᓂ, ᑭᓯᐊᓂ ᐃᔨᓐᓄᑦ ᑕᑯᑦᓴᔭᐅᖏᒻᒪᑦ ᐊᖏᓕᒪᐅᑎᐅᑦᓱᓂ ᕿᕐᖑᑎᐅᔭᒧᑦ ᑕᑯᔭᐅᒍᓐᓇᓱᑎᒃ ᑭᓯᐊᓂ “ᓱᕐᕋᒍᐊᕐᑐᐃᑦ,” ᐊᒻᒪᓗ ᐃᒪᕐᒧᑦ ᐊᑦᑐᑐᐊᕋᒥᒃ ᐃᒪᕈᕕᐅᑦᓱᑎᒃ ᓯᕐᒥᒎᕐᐸᓕᐊᓯᓲᑦ.
ᒪᕐᕋᐅᔭᖃᕐᓂᑯᖓᓄᑦ ᓄᓇᐅᑉ ᖄᖓ ᒪᕐᕋᒍᕐᑐᕕᓂᐅᓂᑯᖓᓄᑦ ᓄᓇ ᓯᑐᓚᕿᓯᒪᔪᖅ, ᐊᓯᐊᓄᑦ ᑌᒣᑦᑎᑕᐅᑦᓱᓂ, ᑰᑉ ᓯᓈᓂᑦᑐᖅ ᓄᓇ ᓯᑐᓚᕿᑦᓱᒍ, ᐊᑭᓐᓇᑖᓚᕿᑦᓱᒍ ᓯᑐᓚᕿᑐᐊᕐᒪᑦ ᒪᕐᕋᐅᔭᓄᑦ ᑌᒣᑦᑕᐅᓱᓂ. ᓯᓈᓂᑦᑐᖅ ᐊᑭᓐᓇᒥ ᑲᑕᑐᐊᕐᒪᑦ, ᐃᒫᐅᑉ ᐃᕐᖃᖓ ᒪᕐᕋᒍᒐᔭᕐᑐᖅ, ᒪᕐᕋᐅᔭᖅ ᐃᒪᕐᒧᑐᐊᕐᒪᑦ, ᐃᒪᖅ ᒪᕐᕃᓇᐅᓕᕐᑐᖅ ᓯᑐᓚᕿᑦᓱᒍ ᑰᒻᒥ.
ᓱᓇ ᐱᑦᔪᑕᐅᑎᓪᓗᒍ ᓄᓇ ᓯᑐᓚᕿᔪᕕᓂᐅᒐᓗᐊᕐᐸᑦ, ᑕᑯᑦᓴᐅᔪᒥᒃ ᑰᒻᒥᒃ ᓱᕐᕋᐃᔪᖅ. ᒪᕐᕋᑐᐃᓐᓇᐅᔭᖏᑦᑐᖅ ᑰᒻᒨᑎᓪᓗᒍ, ᑭᓯᐊᓂ ᒥᓕᐊᓐ cubic ᒦᑕᒐᓵᓗᐃᑦ ᓴᓃᑦ ᓯᑐᔪᓃᑦ, ᓯᐅᕃᓪᓗ, ᐅᔭᕋᓪᓓᓗ, ᖁᐱᕐᕈᐃᑦ ᐆᒪᔪᒐᓭᑦ ᓯᕐᒥᒥᑦᑐᑦ, ᐊᒻᒪᓗ ᓇᐹᕐᑐᒐᓭᑦ, ᑰᑦᔪᐊᕌᐱᐅᑉ ᑰᖓᓅᓚᕿᑦᓱᑎᒃ. ᒪᕐᕃᑦ ᑕᕆᐅᕐᒨᑎᓪᓗᒋᑦ ᑕᓯᐅᔭᕐᔪᐊᒧᑦ.
ᓯᕗᓕᕐᑎ ᐃᑎᒪ ᐃᑦᑐᓵᖅ ᐱᓇᓱᐊᕈᓰᒃ ᒪᕐᕉᓂᒃ ᓈᓕᕐᑎᓗᒋᒃ ᓂᕐᓕᓯᐅᕆᕋᒥᒃ ᐅᑎᕐᖃᒥᐅᑦᓱᓂ ᑰᒻᒥᒃ ᑕᑯᓂᐊᕐᑐᕕᓂᐅᓕᓚᐅᔪᒻᒥᔪᖅ ᖃᓄᐃᓕᖓᓕᕐᒪᖔᑦ. “ᐃᒪᖅ ᒪᕐᕃᓇᓪᓚᕆᐅᔮᓚᐅᔪᖅ, ᐊᒡᒐᓃᕙᖓ ᐃᒫᓄᕐᓯᓱᖓ ᐊᒡᒐᕋ ᐊᓯᐅᑦᓴᐅᑎᒋᓚᐅᔪᖅ ᐃᒫᓄᑦ ᒥᓱᕋᑖᑦᓯᐊᓱᒍ,” ᑌᒣᓕᑦᓱᓂ ᐃᑎᒪ ᐅᖃᓚᐅᔪᖅ. ᑭᓯᐊᓂ ᐅᓐᓇ ᐱᒻᒪᕆᐅᓗᐊᖕᖑᐊᑐᖅ, ᑌᒣᓪᓗᐊᓕᕐᑎᓗᒍ ᐊᕐᕌᒍ ᓄᓇᓕᒻᒥᐅᑦ ᓄᓗᐊᕐᓂᐊᓲᒍᒻᒪᑕ ᐃᖃᓗᓐᓂᐊᓱᑎᒃ ᓂᐅᕐᕈᓭᒐᔭᖕᖑᐊᓕᕐᑎᓗᒋᑦ ᐆᒪᔪᕐᓂᐊᑎᒃᑯᓄᑦ ᓂᕐᕈᑎᒋᓗᒋᑦ, ᓱᕐᕋᐃᓯᒪᔪᒻᒪᕆᐊᓘᓯᔪᖅ.
“ᑌᒣᓐᓂᑯᖓᓄᑦ ᑕᒪᓐᓇ ᓄᕐᖃᑎᒋᐊᖃᓚᐅᕐᑕᕗᑦ ᑕᒪᓐᓇ ᓄᓇᐅᑉ ᓯᑐᔪᕕᓂᐅᓂᖓᓄᑦ ᓱᕐᕃᓯᒪᑐᐃᓐᓇᕆᐊᖃᕐᒪᑦ ᐊᑦᑕᓇᕐᑑᑐᐃᓐᓇᕆᐊᓕᓐᓂᒃ ᐊᕙᑎᑦᑎᓄᑦ,” ᑌᒣᓕᑦᓱᓂ ᐅᖃᓚᐅᔪᖅ. ᑌᒣᒻᒪᑦ, ᐊᖑᓇᓱᑦᑏᑦ, ᒥᑎᒋᐊᕐᓂᐊᑏᑦ ᐃᖃᓗᓐᓂᐊᑏᑦ ᑲᑐᑦᔨᖃᑎᒌᓐᓂᖓ ᖃᐅᔨᓴᕋᑦᓴᓂᒃ ᐱᒐᓱᐊᖁᔨᓕᕐᑐᑦ ᖃᐅᔨᓴᕐᑕᐅᒐᔭᕐᑐᓂᒃ ᒪᑭᕝᕕᐅᑉ ᖃᐅᔨᓴᕐᕕᖓᓄᑦ, ᐃᖃᓗᓐᓂᐊᕈᓐᓇᖏᓐᓈᒪᖔᑦᑕ ᒪᕐᕃᓈᓗᑦᓱᓂ ᐃᒫᒥ.
Allard ᐅᖃᓚᐅᔪᖅ ᑯᐯᒃᑯᑦ ᑲᕙᒪᒃᑯᖏᑦᑕ ᐊᐅᓚᒍᑎᓕᕆᓂᕐᒧᑦ ᑐᕐᖃᑕᕐᕕᒃᑯᑦ, ᐃᒪᖅ ᒪᕐᕃᓇᐅᓚᖓᔪᕆᑦᓱᒍ ᑕᕝᕙᓂ ᐊᕐᕌᒍᒥ ᐅᖃᕐᑐᕕᓂᐅᓚᐅᔪᑦ, ᐃᒻᒪᖄᖅ ᐊᑯᓂᐅᓂᕐᓴᖅ ᒪᕐᕃᓇᐅᑐᐃᓐᓇᕆᐊᓕᒃ. ᑕᒪᓐᓇ ᐃᒪᐅᑉ ᓂᕈᒥᓐᓂᖓᓂ ᓂᓪᓕᒪᓂᖓᓂᓗ ᐊᓯᑦᔨᖏᓐᓂᐅᔭᓚᖓᖕᖏᑐᖅ ᐊᒻᒪᓗ ᑰᑉ ᐃᕐᖃᖓᑕ ᐊᑖᓂ ᓄᓇᒥᒃ. ᐊᒻᒪᓗ, ᓇᐹᑐᐃᑦ ᓴᐅᓴᓐᓂᑦᑐᐃᑦ ᐅᓄᕐᓂᖏᑦ ᓯᑐᖃᑕᐅᔪᕕᓃᑦ ᑰᑉ ᓯᓈᓂᓚᖓᓕᕐᓱᑎᒃ, ᐅᕝᕙᓘᓐᓃᑦ ᓯᑦᔭᒥ ᑲᑎᕐᓱᓗᑎᒃ ᓱᔪᑉᐸᓕᐊᓚᖓᔪᑦ.
“ᐃᒪᖅ ᓱᕐᕋᑕᐅᖕᖏᓂᐅᔭᓚᖓᖕᖏᑐᖅ,” ᑌᒫᒃ ᐅᖃᓚᐅᔪᖅ.
ᑲᕙᒪᒃᑯᓂ ᖃᓄᐃᑦᑐᑐᐃᓐᓇᓂ ᐊᑦᔨᒌᖕᖏᑐᓂ ᐱᓕᕆᕖᑦ ᑖᕙᑦᓱᒥᖓ ᐃᑉᐱᒋᔭᖃᕋᓱᐊᕐᓗᑎᒃ ᑲᔪᓯᖏᓐᓇᖃᑦᑕᓚᖓᔪᑦ, ᖁᒻᒧᐊᑎᑕᐅᓯᒪᔪᑎᒍᑦ ᐊᑦᔨᓕᐅᕈᑎᓂᒃ ᐊᑐᖃᑦᑕᓗᑎᒃ ᐊᒻᒪᓗ ᐊᓯᐊᓂ ᓯᑐᒍᓇᐅᔪᖃᖏᓐᓇᒪᖔᑦ ᓇᐅᑦᓯᑐᕐᑕᐅᖃᑦᑕᒪᑕ, ᐊᑦᑕᓇᕐᑐᐊᓘᒍᓇᐅᓗᐊᖕᖏᑐᑦ. “ᑰᑉ ᓯᓈᖓᓂ ᑭᖏᑦᑑᓕᕐᑐᓂᒃ ᐊᓯᖏᓐᓂᒃ ᐊᑭᓐᓇᑖᕐᓯᒪᔫᔮᕋᓂᓗ ᑌᑲᓂ ᓯᑐᔪᕕᓂᐅᑉ ᐊᓯᐊᓂ,” Allard ᑌᒣᓕᑦᓱᓂ ᐅᖃᓚᐅᔪᖅ, ᐅᖃᒋᐊᓪᓚᓚᐅᔪᒻᒥᔪᖅ ᑖᒃᑯᐊ ᒪᕐᕈᒃ ᓄᓇᓖᒃ ᐊᑦᑕᓀᓐᓂᓴᒥ ᓯᐅᕋᕐᒦᓂᕋᓚᐅᔪᒻᒥᔭᖏᒃ, 30 ᒦᑕᓄᑦ ᑭᖏᓐᓂᓕᒻᒥ ᑰᑉ ᓯᓈᓂ, ᑌᒣᒻᒪᑦ ᐊᑦᑕᓇᖕᖏᑐᒥᑦᑐᑦ ᓯᑐᑲᓪᓚᓂᐅᔭᖕᖏᑐᒥᒃᑲᒥᒃ.
ᑭᓯᐊᓂ ᐃᓱᒫᓗᓐᓇᑐᖅ ᐅᒥᐊᕐᑐᑎᓄᑦ. ᓯᕗᓕᕐᑎ ᐃᑎᒪ ᐃᑦᑐᓵᖅ ᑐᓴᐅᑎᒃᑯᑦ ᐃᓄᓐᓂᒃ ᑐᓴᕐᑎᓯᓯᒪᔪᖅ ᐃᑉᐱᒍᑦᓯᐊᖃᑦᑕᖁᔨᑦᓱᓂ ᑰᒃᑰᓕᑐᐊᕈᑎᒃ, ᓯᑐᓂᕐᒧᑦ ᓴᓗᒣᓪᓕᑎᑕᐅᓂᑯᐃᑦ ᑕᑯᑦᓴᐅᒪᑕ, ᐊᖏᔪᕐᓛᓗᒐᓭᑦ ᕿᔪᐃᑦ ᐃᒪᕐᒥ ᑕᑯᑦᓴᐅᒪᑕ, ᐊᐅᓚᑦᔭᕈᓐᓇᖏᕐᓯᒪᒐᒥᒃ ᑕᕝᕙᓂᕐᓭᓇᕐᓱᑎᒃ.
“ᓱᖏᐅᓐᓂᕆᖃᑦᑕᓯᒪᔭᕗᑦ ᐊᓯᑦᔨᑕᐅᒻᒪᑦ ᐃᓱᖃᖕᖏᑐᒧᑦ, ᑌᒣᒻᒪᑦ ᑰᒻᒥ ᐃᖏᕐᕋᓕᑐᐊᕈᑦᑕ ᓇᐅᒃᑯᑦ ᓴᖑᐊᒋᐊᖃᕐᒪᖔᑕ ᐃᓕᓴᕋᓱᐊᕆᐊᖃᖃᑦᑕᓚᖓᓕᕐᑐᑦ ᐅᒥᐊᕐᑐᖃᑦᑕᑐᓕᒫᑦ ᑕᒫᓂ,” ᑌᒣᓕᑦᓱᓂ ᐅᖃᓚᐅᔪᖅ ᖃᐅᔨᒪᔭᐅᖁᓕᕐᑕᒥᓂᒃ, “ᐅᖃᐅᑎᖃᑦᑕᓚᖓᔭᕗᑦ ᐃᑉᐱᒍᓱᒐᓱᐊᑦᓯᐊᒪᕆᖃᑦᑕᖁᓗᒋᑦ ᑖᒃᑯᓇᓂ ᑕᕐᕿᐅᖃᑦᑕᓚᖓᔪᓂ ᓯᕗᓂᕐᒥ.”
ᑯᐯᒃᑯᑦ ᑲᕙᒪᒃᑯᖏᑦᑕ ᐊᐅᓚᒍᑎᓕᕆᓂᕐᒧᑦ ᑐᕐᖃᑕᕐᕕᑯᑦ ᐊᒻᒪᓗ ᓇᐅᓕᒫᓂᒃ/ᐃᓄᓕᒫᓂᒃ ᐊᑦᑕᓇᖏᑦᑐᒦᑦᑎᓯᒐᓱᐊᕐᑏᑦ ᓄᓇᓕᒻᒥᐅᑦ ᓯᑐᓂᐅᑉ ᓴᓂᐊᓂᓪᓗᐊᖁᔨᒐᑎᒃ ᐅᖃᐅᑏᓯᒪᔪᑦ 100 ᒦᑌᑦ ᒥᑦᓯᑎᓅᖕᖏᑐᖅ ᓴᓂᐊᒎᖃᑦᑕᖁᔭᐅᖕᖏᑐᑦ, ᓯᓈᖏᑦ ᓯᑐᓯᓇᐅᖏᓐᓈᑐᐃᓐᓇᕆᐊᖃᕐᒪᑕ.
