ᐱᖓᓲᔪᕐᑐᑦ ᕿᒧᑦᓯᑏᑦ ᐃᓄᐃᑦ ᐱᕐᖁᓯᑐᖃᖓᑕ ᐱᐅᓕᐊᕐᑕᐅᒋᐊᖃᕐᓂᖓᓂᒃ ᐱᓪᓚᕆᐅᑎᑦᓯᓂᕐᒥᒃ ᐊᑑᑎᓂᖃᓚᐅᔪᕗᑦ
ᒍᐃᓕ ᑫᓐᓗ ᐃᑦᓴᔭ ᐊᕐᓇᑐᕐᓗ ᑕᓯᐅᔭᕐᒥᐅᒍᑦᓱᑎᒃ ᓯᕗᓪᓕᐸᐅᒍᑎᑖᓚᐅᔪᕘᒃ ᐁᑦᑐᑐᕐᑕᐅᓂᖃᕐᑎᓗᒋᑦ ᐊᐅᐸᓗᒻᒥ ᓵᓚᖃᕐᓂᕋᒥᒃ 2023ᒥ ᐃᕙᒃᑲᑐᓄᑦ ᓱᑲᓕᐅᑎᖃᑕᐅᑦᓱᑎᒃ ᕿᒧᑦᓯᑯᑦ, ᑲᑎᓕᒫᕐᓱᑎᒃ 38:38:20 ᐃᑲᐅᕐᓂᑐᕐᑐᕕᓂᐅᑦᓱᑎᒃ.
ᐱᖓᓲᔪᕐᑐᑦ ᕿᒧᑦᓰᑦ ᓱᑲᓕᐅᑎᓚᐅᔪᕗᑦ ᓄᕐᖃᑎᑕᐅᓚᐅᕐᓯᒪᑎᓪᓗᒍᓂᑦ ᓱᑲᓕᐅᑎᓂᖅ 2022ᒥ ᖃᓂᒪᓇᖅ ᑰᕕᑦ ᐱᑦᔪᑕᐅᑎᓪᓗᒍ. ᐊᐅᓪᓚᑎᓚᐅᔪᕗᑦ ᑲᖏᕐᓱᔪᐊᒥᑦ ᒫᑦᓯ 15ᒥ, 427 kms ᐅᖓᑖᓅᕐᑐᓂᒃ ᐅᖓᓯᓐᓂᓕᒻᒥᒃ ᐃᖏᕐᕋᓱᑎᒃ, ᐊᐅᐸᓗᒻᒧᑦ ᐅᖓᒻᒧᐊᕇᕐᓱᑎᒃ ᒫᑦᓯ 26ᒥ.
ᑫᓐᓗ ᐊᕐᓇᑐᕐᓗ ᐁᑦᑐᑐᕐᑕᐅᕕᒻᒦᖃᑎᖃᓚᐅᔪᕘᒃ ᐳᕕᕐᓂᑐᕐᒥᐅᓂᒃ ᑳᕐᓘᔅ ᓱᕈᓯᓛᒥᒃ ᐸᐅᓚᓯ ᐊᒪᕈᐊᓕᒻᒥᓗ, ᑲᑎᓕᒫᕐᓱᑎᒃ 39:00:20 ᐃᑲᐅᕐᓂᑐᕐᑐᕕᓃᓐᓂᒃ, ᑰᑦᔪᐊᒥᐅᓂᓪᓗ ᐋᓗᐸ ᖃᐅᒃᑫᒥᒃ ᓯᐊᓪᑕᓐ ᒍᐃᑦᓕᒥᓪᓗ 44:18:19 ᐃᑲᐅᕐᓂᑐᕐᑐᕕᓃᓐᓂᒃ. ᓯᑕᒪᒋᔭᐅᑎᓪᓗᒋᒃ ᑕᕝᕙᓂ ᐊᕐᕌᒍᒥ ᑭᐊᓐ ᓚᐯᓗ ᐋᓐᑐᕉ ᑯᐊᑕᓗ ᑕᓯᐅᔭᕐᒥᐅᒃ ᑕᓪᓕᒪᒋᔭᐅᑎᓪᓗᒋᒃ ᓵᓕ ᐊᕐᓇᑐᕐᓗ ᔮᓂ ᕿᑎᕐᓗ ᑕᓯᐅᔭᕐᒥᐅᒍᒻᒥᔫᒃ, ᐱᖓᓲᔪᕐᑑᒍᑕᐅᑎᓪᓗᒋᒃ ᓵᓐᑎ ᔮᑲᓗ ᐹᓕ ᑭᐊᑌᓐᓇᓗ ᑲᖏᕐᓱᔪᐊᕐᒥᐅᒃ. ᕿᒧᑦᓯᓂᕐᒥᒃ ᓄᐃᑎᑦᓯᕙᓪᓕᐊᕆᐊᓪᓚᓂᕆᓚᖓᔭᖓ ᐱᒋᐊᕐᑎᑕᐅᒋᐊᖕᖓᓯᑎᓪᓗᒍ. ᐅᐱᒍᓱᑦᑐᒍᑦ ᐃᓄᐃᑦ ᕿᒧᑦᓯᓂᕐᒥᒃ ᐅᑎᕐᑎᓯᒋᐊᓪᓚᓯᒪᒻᒪᑕ ᓄᓇᕕᒻᒥ, ᖁᐊᕐᓴᖓᓇᕐᑐᑰᕈᑕᐅᓚᐅᕐᓯᒪᒐᓗᐊᕐᑎᓗᒍ ᕿᒻᒦᔭᕐᑕᐅᓂᖃᕐᑎᓗᒍ ᑲᕙᒪᐅᓯᒪᔪᓄᑦ ᑌᑦᓱᒪᓂ ᐊᕐᕌᒍᓂ 1950 ᕿᑎᓪᓗᐊᖏᓐᓃᓱᑕ ᐊᕐᕌᒍᓂ 1960 ᐃᓱᓕᓂᖓᓄᑦ.”
ᑐᓴᕋᑦᓴᓃᑦᑐᓂ, ᒪᑭᕝᕕᒃ ᖃᐅᔨᕙᓪᓚᓂᖃᕐᓯᒪᔪᖅ ᐊᔪᐃᓐᓇᓚᕆᑦᓯᒪᓂᖏᓐᓂᒃ ᕿᒧᑦᓯᑏᑦ ᒪᓕᑦᑎᖏᓪᓗ ᓄᐃᑕᑎᑦᓯᓂᕐᒪᑕ ᐱᓪᓚᕆᐅᒋᐊᖓᓂᒃ ᐱᐅᓕᐊᕆᐊᑦᓯᐊᕆᐊᖃᕐᓂᐅᑉ ᐃᓄᐃᑦ ᐱᕐᖁᓯᑐᖃᖏᓐᓂᒃ. ᕿᒧᑦᓯᑏᑦ ᐃᓚᐅᓲᑦ ᐃᕙᒃᑲᑐᓄᑦ ᓱᑲᓕᐅᑎᔪᓄᑦ ᑐᑦᔭᓯᕗᑦ ᓯᕗᓂᕐᒥ ᓱᑲᓕᐅᑎᖃᑦᑕᓯᒪᔪᓂᒃ ᐊᕐᕌᒍᐃᑦ ᐊᕙᑎᑦ ᓈᓕᕐᑎᓗᒋᑦ, ᐱᓪᓚᕆᐅᓗᐊᕐᒥᓱᓂᓗ ᒪᓐᓇ, ᑐᑦᔭᓯᕗᑦ ᐊᕐᖁᓯᓂᕆᓯᒪᔭᖏᓐᓂᒃ ᓯᕗᓕᕆᓚᐅᕐᑕᒥᑕ, ᑌᒫᑦᓭᓇᖅ ᐃᖏᕐᕋᖃᑦᑕᓲᒍᓐᓂᒪᑕ. ᐊᔪᐃᓐᓇᓂᕆᕙᑦᑕᖏᑦ ᕿᒧᑦᓯᕈᑎᑦᓴᓕᐅᕐᓱᑎᒃ ᖃᐅᔨᒍᑎᒋᕙᕗᑦ ᕿᒧᑦᓯᓂᐅᑉ ᐃᓕᕐᖁᓯᕐᒨᓕᖓᓪᓚᕆᓐᓂᖓᓂᒃ.
ᐃᕙᒃᑲᑐᓄᑦ ᓱᑲᓕᐅᑎᓂᖅ 2023ᒥ ᕿᒧᑦᓯᑏᑦ ᑎᒥᒃᑯᑦ ᐱᒍᓐᓇᓯᐊᕐᓂᖏᓐᓂᒃ ᐊᔪᐃᓐᓇᓯᑎᐅᓂᖏᓐᓂᓗ ᓄᐃᑦᓯᒍᑎᑑᓯᒪᖕᖏᓚᖅ. ᓱᕐᖁᐃᓯᒍᑕᐅᒋᕗᓪᓕ ᐱᓪᓚᕆᐅᒋᐊᖓᓂᒃ ᐱᐅᓕᐊᕆᐊᑦᓯᐊᕆᐊᖃᕐᓂᐅᑉ ᐃᓄᐃᑦ ᐱᕐᖁᓯᑐᖃᖓᓂᒃ, ᕿᒧᑦᓯᕈᑎᑦᓴᓕᐅᕈᓐᓇᓂᕐᒥᒃ ᑲᒪᑦᓯᐊᕈᓐᓇᓂᕐᒥᓗ.
ᐃᓚᐅᔪᕕᓂᓕᒫᑦ ᐅᐱᒍᓲᓯᕐᑕᐅᓂᕐᖁᑦ ᑖᓚᑐᐃᓐᓇᓂᒃ ᐃᒣᓪᓗᐊᑐᕌᑐᐃᓐᓇᕆᐊᓕᓐᓂᒃ $47,500ᓂᑦ $11,700ᓄᑦ, ᐁᑦᑐᑕᐅᓐᓂᒥᔫᒃ ᓵᓕ ᐊᕐᓇᑐᕐᓗ ᔮᓂ ᕿᑎᕐᓗ ᐃᓚᐅᒋᐅᕐᓂᕋᒥᒃ ᑕᕝᕙᓂ ᐊᕐᕌᒍᒥ, ᓵᓐᑎ ᔮᑲᓗ ᐸᐅᓗ ᑭᐊᑌᓐᓇᓗ ᐊᑦᔨᒌᑦᑎᓯᑦᓯᐊᖃᑦᑕᓂᕐᒥᓄᑦ ᓱᑲᓕᐅᑎᖃᑎᒥᓂᒃ ᐅᐱᒍᓲᓯᕐᑕᐅᓂᕐᒥᔫᒃ, ᐱᕐᖁᓯᑐᖃᕐᒥᓗ ᓄᐃᑕᑎᑦᓯᓂᕐᒥᓄᑦ ᐅᐱᒍᓲᓯᕐᑕᐅᒥᑎᓪᓗᒋᒃ, ᐃᓄᐃᑦ ᐱᕐᖁᓯᑐᖃᖓᑎᒍᑦ ᐊᓐᓄᕌᕐᓯᒪᓐᓂᕋᒥᒃ, ᓵᓕ ᐊᕐᓇᑐᕐᓗ ᔮᓂ ᕿᑎᕐᓗ.
ᖃᓄᐃᓕᖓᓪᓚᕆᓐᓂᕕᓂᖏᑦ ᓵᓚᖃᐅᑎᑖᕐᑐᑦ ᐅᐱᒍᓲᓯᕐᑌᓗ ᑕᑯᒋᐊᕋᑦᓴᐅᕗᑦ ᐃᕙᒃᑲᑐᓄᑦ ᓱᑲᓕᐅᑎᔪᑦ ᑐᓴᕋᑦᓴᖃᕐᕕᖓᓂ ᐅᕙᓂ Ivakkak.com.
