ᑖᒃᑯᐊ ᒪᕐᕉᒃ ᑎᒃᑯᐊᑕᐅᓚᐅᔪᕘᒃ ᑲᑐᑦᔮᖃᕐᓗᑎᒃ ᐱᓇᓱᖃᑎᒌᓐᓂᐊᓕᕐᑎᓗᒋᒃ ᐊᒥᓱᑦ ᐱᔪᓐᓇᓂᖃᑦᓯᐊᑐᑦ ᐱᔭᖃᕋᓱᖃᑎᐅᑎᓪᓗᒋᑦ ᐊᑯᓃᕐᑐᒥᒃ ᐊᐱᕐᓱᓂᖃᑦᑕᓂᕐᒥᒃ ᐱᓇᓱᓚᐅᕐᑎᓗᒋᑦ ᐊᖏᖃᑎᒌᒐᓱᑦᑎᓴᕐᓯᐅᑐᑦ ᑭᖑᓂᐊᒍᑦ ᐁᕆᓕᐅᑉ ᑕᕐᕿᖓ ᐃᓱᓕᒋᐊᕕᑦᑎᓗᒍ ᐱᓇᓱᒋᐊᓯᓚᐅᔪᔫᒃ.
ᒪᑭᕝᕕᐅᑉ ᐊᖓᔪᕐᖄᒪᕆᖓ ᐱᑕ ᐋᑕᒥ ᓂᑦᔮᒍᑎᖃᓚᐅᔪᔪᖅ ᓈᒻᒪᓴᕆᐊᒥᒃ ᑎᒃᑯᐊᑕᐅᔫᓐᓂᒃ.
“ᐳᕿᐊᓱᖕᖏᓚᖓ ᐋᓐᑕᓂ ᐃᑦᑐᓵᑦᓗ ᑐᓄ ᓇᐹᕐᑐᓗ ᑭᒡᒐᑐᕐᑎᓯᐊᖑᓚᖓᒋᐊᖏᒃ ᓄᓇᕕᐅᑉ ᐅᓇᒻᒥᓱᐊᒍᑎᖏᓐᓄᑦ ᑖᒃᑯᓇᓂ ᐊᖏᖃᑎᒌᒐᓱᓐᓂᐅᔪᓂ,” ᐅᖃᕐᑐᖅ ᐱᑕ. “ᒪᑭᕝᕕᒃ ᖁᕕᐊᓱᒍᑎᖃᕐᐳᖅ ᑎᒃᑯᐊᓯᒋᐊᒥᒃ ᒪᕐᕉᓂᒃ ᐱᔪᓐᓇᓂᖃᑦᓯᐊᑐᒻᒪᕇᓐᓂᒃ ᓯᕗᓕᕐᑏᓂᒃ ᑕᒪᕐᒥᒃ ᐱᔪᓐᓇᓂᖏᓪᓗ ᐊᒻᒪᓗ ᐊᖏᖃᑎᒌᒐᓱᓐᓂᓂᒃ ᐊᑑᑎᖃᑦᑕᓯᒪᓂᖏᒃ ᐱᕙᓪᓕᖁᑎᐅᓚᖓᑎᓪᓗᒋᒃ ᐱᔭᖃᕋᓱᒍᑎᑦᑎᓄᑦ. ᐳᕿᐊᓱᖕᖏᓚᖓ ᐱᔪᓐᓇᓂᖏᒃ, ᑐᓂᓯᒪᓂᖏᓪᓗ, ᐊᒻᒪᓗ ᐃᓄᑐᐃᓐᓀᑦ ᐱᔪᓐᓇᐅᑎᖏᓐᓂᒃ ᐱᔭᖃᕈᒪᓂᖏᒃ ᐃᑲᔪᕐᓯᒪᓚᖓᒋᐊᖏᒃ ᐱᔭᖃᕈᑎᒋᓂᐊᕐᑕᑎᓐᓂᒃ ᑐᑭᖃᑦᓯᐊᑐᒥᒃ ᐱᕙᓪᓕᐊᓂᖃᕐᓂᓂᒃ ᐱᒍᒪᔭᑦᑎᓂᒃ ᐱᓪᓗᒋᑦ ᓇᒻᒥᓂᖅᐊᐅᓚᒍᓐᓇᓂᕐᑕᕆᒍᒪᔭᕗᑦ.”
ᐋᓐᑕᓂ ᐃᑦᑐᓵᑦ, ᑰᒃᔪᐊᕌᐱᒻᒥᐅᑦ ᓯᕗᓕᕐᑎᖓᑦ, ᐊᕐᕌᒍᓂ ᐊᒥᓱᐊᓗᓐᓂ ᐃᓚᐅᕕᖃᖃᑦᑕᓱᑐᖃᐅᕗᖅ ᐱᓇᓱᒍᑎᓕᐊᖑᕙᑦᑐᓄᑦ ᖁᕝᕙᑎᕆᒍᑎᐅᑦᓱᑎᒃ ᐱᔪᓐᓇᐅᑎᖏᓐᓂᓗ ᐊᒻᒪᓗ ᖃᓄᐃᖕᖏᓯᐊᕐᑐᓴᐅᓂᖏᓐᓂᒃ ᓄᓇᕕᐅᑉ ᐃᓄᑐᐃᓐᓇᖏᑦᑕ. ᐊᖏᔪᒥᒃ ᐊᑑᑎᔭᖃᖃᑦᑕᓯᒪᔪᖅ ᐊᖏᖃᑎᒌᒐᓱᓐᓂᓂᒃ ᐃᓚᐅᑎᓪᓗᒋᑦ ᑰᒃᔪᐊᕌᐱᐅᑉ ᑰᖓᑕ ᐱᓇᓱᑦᑕᐅᓂᖓ, ᓴᓇᕐᕈᑎᒃ ᐊᖏᖃᑎᒌᒍᑏᒃ ᐊᒻᒪᓗ ᓄᓇᕕᒻᒥᐅᑦ ᐃᓄᑐᐃᓐᓀᑦ ᓄᓇᓂᒃ ᐃᓐᓄᐃᓯᒪᓇᓱᒍᑎᒥᓄᑦ ᐊᖏᖃᑎᒌᒍᑎᓂᒃ. ᐋᓐᑕᓂ ᐃᑦᑐᓵᑦ ᓂᕈᐊᕐᑕᐅᓯᒪᖃᑦᑕᓯᒪᒻᒥᔪᖅ ᒪᑭᕝᕕᐅᑉ ᐳᕐᑐᓂᕐᓴᒥᒃ ᐱᓇᓱᖃᑎᒌᑦᑐᖁᑎᖏᓐᓄᑦ ᐃᓚᐅᑦᓱᓂ, ᐱᑦᔪᔨᓯᒪᕗᕐᓗ ᐱᓇᓱᒐᖃᕐᒃ ᑮᓇᐅᔭᓕᕆᔨᒻᒪᕆᒋᔭᐅᑦᓱᓂ ᐊᕐᕌᒍᓂ 15ᑲᓴᓐᓂ.
ᑐᓄ ᓇᐹᕐᑐᖅ ᓲᓱᒋᔭᐅᓂᖃᑦᓯᐊᓱᓂ ᓄᓇᓕᓐᓂ ᓯᕗᓕᕐᑎᐅᔪᖅ ᐊᖏᖃᑎᒌᒐᓱᑦᑎᐅᓱᓂᓗ. ᑰᒃᔪᐊᑉ ᓄᓇᓕᖓᓂ ᓯᕗᓕᕐᑎᐅᓯᒪᔪᖅ ᐱᒐᓱᐊᒻᒪᕆᒍᑎᖃᖃᑦᑕᓯᒪᒋᕗᕐᓗ ᖄᖏᓐᓈᔭᐅᑎᑦᓯᑌᓕᑦᓱᓂ ᐃᓄᑐᐃᓐᓀᑦ ᐱᔪᓐᓇᐅᑎᖏᓐᓂᒃ ᐊᒻᒪᓗ ᐃᓚᐅᖃᑦᑕᓯᒪᕗᕐᓗ ᐊᒥᓱᑲᓪᓚᓄᑦ ᐱᓇᓱᒍᑎᓕᐊᖑᔪᓄᑦ ᓯᕗᓂᖃᕈᑎᐅᑦᓱᑎᒃ ᖁᕝᕙᑎᕆᓂᕐᒥᒃ ᑮᓇᐅᔭᑎᒍᑦ ᒪᑭᑕᒐᓱᒍᑎᑦᓴᓂᒃ ᐱᕙᓪᓕᐊᑎᑦᓯᒍᑎᓂᒃ ᐊᒻᒪᓗ ᓇᒻᒥᓂᒪᑭᑕᒍᓐᓇᓯᒐᓱᒍᑎᓂᒃ ᓄᓇᕕᒻᒥ. ᐅᖄᒍᓐᓇᓂᖃᑦᓯᐊᑐᖅ ᐃᓄᒃᑎᑐᑦ, ᖃᓪᓗᓈᕐᑎᑐᑦ ᐊᒻᒪᓗ ᒍᐃᒍᐃᑎᑐᑦ ᐱᓇᓱᖃᑦᑕᓯᒪᒻᒥᓱᓂᓗ ᐊᖏᖃᑎᒌᒐᓱᖃᑕᐅᑦᓱᓂ ᑲᑐᑦᔨᖃᑎᒌᓐᓂᖏᓐᓄᑦ ᑲᑎᕕᒃ ᓄᓇᓕᓕᒫᑦ ᑲᕙᒪᖓᑕ, ᐃᓚᖃᕐᒥᑎᓪᓗᒋᑦ ᑲᑐᑦᔨᖃᑎᒌᓐᓂᓄᑦ ᐃᓚᐅᖃᑕᐅᓂᕐᒥᒃ ᑲᑎᕕᒃ ᓄᓇᓕᓕᒫᑦ ᑲᕙᒪᖓᑕ ᐳᕐᑐᓂᕐᓴᖏᓐᓂ.
ᐊᖏᖃᑎᒌᒐᓱᑦᑎᖑᕋᓱᑦᑐᓂᒃ ᐊᐱᕐᓱᓂᓐᓃᑦ ᐊᑑᑎᔭᐅᓂᖃᓚᐅᔪᕗᑦ ᑎᑭᑦᓱᒍ ᔭᓄᐊᕆᐅᑉ ᑕᕐᕿᖓᑕ ᐃᓱᐊ. ᐊᑐᓂᑦ ᐊᐱᕐᓱᑕᐅᒍᑎᖃᖃᑦᑕᓚᐅᔪᔪᑦ ᐃᓕᖓᔪᓂᒃ ᓇᒻᒥᓂᐊᐅᓚᑦᓯᔨᐅᓂᕐᒥᒃ ᑎᓕᔭᐅᒪᒍᑎᓅᓕᖓᔪᓂᒃ, ᐃᓚᐅᑎᓪᓗᒋᑦ ᐊᑑᑎᒍᑎᒋᖃᑦᑕᓯᒪᔭᖏᑦ ᐱᓇᓱᖃᑎᖃᕐᓱᓂᒃ ᐊᒥᓱᐃᓂᒃ ᑲᕙᒪᐅᔫᑉ ᐱᑦᔪᔨᕕᖏᓐᓂᒃ, ᑐᑭᓯᒪᓂᖏᓐᓂᓗ ᔦᒥᓯ ᐯ ᐊᒻᒪᓗ ᑯᐯᒃ ᑕᕐᕋᖓᑕ ᐊᖏᖃᑎᒌᒍᑎᖏᓐᓂᒃ ᐊᒻᒪᓗ ᓄᓇᕕᒻᒥᐅᑦ ᐃᓄᑐᐃᓐᓀᑦ ᓄᓇᓂᒃ ᐃᓐᓄᐃᓯᒪᓇᓱᒍᑎᒥᓄᑦ ᐊᖏᖃᑎᒌᒍᑎᖏᓐᓂᒃ, ᐃᓚᖃᕐᒥᑎᓪᓗᒋᑦ ᐱᔭᖃᕋᓱᑦᓯᒪᓂᖏᑦ ᐊᖏᖃᑎᒌᒐᓱᓐᓂᓂᓪᓗ ᐱᔪᓐᓇᐅᑎᓕᑎᒍᓪᓗ ᐱᓇᓱᒐᕐᓂᒃ.
ᓯᕗᒧᐊᑦᑎᓯᓂᕐᓗ ᐊᖏᖃᑎᒌᒍᑎᖃᕋᓱᓐᓂᐅᔪᓂᒃ ᓇᒻᒥᓂᖅᐊᐅᓚᑦᓯᒍᓐᓇᓯᒍᒪᒍᑎᓂᒃ ᐊᖏᔪᒻᒪᕆᐊᓗᒻᒥᒃ ᒪᑭᕝᕕᒧᑦ ᐱᒻᒪᕆᐅᓂᖃᕐᐳᖅ. ᒪᑭᕝᕕᒃ ᐅᖃᕐᓯᒪᒻᒪᑦ ᑲᔪᓯᑎᑦᓯᓚᖓᑦᓱᓂ ᐱᓇᓱᖃᑎᖃᕐᓂᒥᒃ ᐋᓐᑕᓂ ᐃᑦᑐᓵᑦᒥᓪᓗ, ᑐᓄ ᓇᐹᕐᑐᒥᓪᓗ, ᐊᓯᖏᓐᓂᓗ ᐊᔪᙯᒋᐊᕐᑎᓂᒃ ᐊᑐᕐᑕᖃᕐᐸᑐᓂᓪᓗ ᓱᕐᖁᐃᑐᒥᒃ ᐱᔪᓐᓇᐅᑎᖏᓪᓗ ᐅᓇᒻᓱᐊᒍᑎᖏᓪᓗ ᐃᓄᑐᐃᓐᓀᑦ ᑭᒡᒐᑐᕐᑕᐅᓂᖃᑦᓯᐊᖁᓪᓗᒋᑦ ᐊᖏᖃᑎᒌᒐᓱᒍᑎᓂᒃ ᐱᓇᓱᒍᑎᖃᕐᓕᑐᓂ.
