ᐃᓄᒃᑎᑐᑦ ᐊᑦᓯᔭᐅᒍᓯᕆᕐᖄᓯᒪᔦᑦ ᐅᑎᕐᑎᒍᓐᓇᑌᑦ, ᐊᑭᖃᖕᖏᑐᒥᒃ !
ᓇᓗᕐᖁᑎᔪᑎᒍᑦ, ᑖᓐᓇᓭᓐᓇᐅᒋᐊᖃᕐᐳᖓ, ᓲᓱᒋᓗᒍ
ᐃᓅᓱᓐᓂᕋ (…) ᑌᒣᑦᑐᑐᐃᓐᓇᐅᓚᖓᕗᖓ, ᓇᓪᓕᒋᔮᖅ, ᑌᒣᑦᑐᒥᒃ
ᐃᓅᓯᖃᕐᓂᐊᓯᒪᒐᒪ.
“ᑌᒣᑦᑐᒥᒃ ᐃᓅᓯᖃᕐᓂᐊᓯᒪᕗᖓ”– Lady Gaga (2018)
ᖃᐅᔨᒪᔪᐃᓐᓇᐅᒐᑦᑕ, ᐃᓕᓴᕆᐊᕐᑎᑕᐅᖃᑦᑕᓯᒪᔪᕕᓃᑦ ᑭᖑᓂᖃᕈᑕᐅᓯᒪᒻᒪᑕ ᖃᓄᑐᐃᓐᓇᓕᒫᑦᓯᐊᖅ. 2006ᒥ ᐊᓪᓓᑦ ᐃᓕᓴᕆᐊᕐᑎᑕᐅᖃᑦᑕᓯᒪᔪᕕᓃᑦ ᐃᓂᓪᓚᑕᐅᒍᓯᖓᓄᑦ ᐊᖏᖃᑎᒌᒍᑎ ᖃᐅᔨᕙᓪᓚᕈᑕᐅᓯᒪᒻᒪᑦ ᑕᒪᑐᒥᖓ ᐊᑑᑎᔭᐅᓯᒪᔪᒥᒃ, ᒍᓐᓇᕕᓕᒫᒥᒍᓪᓗ, ᖃᓄᕐᑑᕈᑎᑦᓴᑕᖃᕐᓯᒪᑦᓱᓂ. ᑕᒐᑕᒐ, ᓱᕐᕋᑕᐅᒍᑕᐅᓯᒪᔪᑦ ᐃᓚᖏᑦ ᑲᒪᒋᔭᐅᓯᒪᖕᖏᑐᑦ, ᐃᓚᖏᓪᓗ ᓱᕐᖁᐃᑕᐅᓂᖃᑦᓯᐊᓯᒪᑦᓱᑎᒃ ᐃᓕᓴᕆᐊᕐᑎᑕᐅᖃᑦᑕᓯᒪᔪᕕᓂᕐᓄᑦ ᐊᔪᒉᓪᓘᓯᒪᒐᓗᐊᕐᓱᑎᒃ ᐊᑦᔨᒌᖕᖏᑐᓂᒃ ᕿᓄᒍᑎᑦᓴᓂᒃ. ᖃᐅᔨᒪᔪᐃᓐᓇᐅᔪᒍᑦ ᐃᓅᖃᑎᑦᑎᓂᒃ, ᕿᓄᒍᑎᒥᓂᒃ ᐊᐅᓪᓚᑎᑦᓯᒐᓱᐊᕐᓱᑎᒃ, ᖃᐅᔨᖃᑦᑕᓂᕐᒪᑕ ᐃᓕᑕᕐᓇᐅᑎᖏᑦ ᐊᑎᖏᑦ ᑕᒻᒪᑕᐅᖃᑦᑕᓯᒪᔪᕕᓂᐅᑎᓪᓗᒋᑦ ᐃᓕᓴᕆᐊᕐᑎᑕ ᐅᖃᑦᑕᓯᒪᔪᕕᓂᐅᑎᓪᓗᒋᑦ ᑌᒃᑯᓇᓂ ᐊᕐᕌᒍᓂ “ᐊᑦᔨᒌᖕᖏᑐᓂᒃ ᐊᓪᓚᑕᐅᓯᒪᒍᑎᖃᖃᑦᑕᓂᕋᒥᒃ”. ᔫᓯᐱᐅᑉ (Jusipi) ᐊᑎᖓ ᐊᓪᓚᑕᐅᓯᒪᔪᕕᓂᖅ ᖃᓪᓗᓈᑎᑐᑦ “Joseph”; ᒫᑕᐅᑉ (Maata) ᐊᑎᖓ ᐊᓪᓚᑕᐅᓯᒪᔪᕕᓂᖅ ᖃᓪᓗᓈᑎᑐᑦ Martha; ᐊᓯᖏᓪᓗ. ᓄᓇᓕᑐᖃᑦᑎᒍᑦ ᐊᑎᓯ ᓇᓗᓀᒃᑯᑕᒍᓗᑐᐃᓐᓇᐅᑎᓐᓇᒍ. ᐃᓕᑕᕐᓇᕈᑎᒋᔦᓐᓂ ᐃᓅᖃᑎᒋᔭᐅᑦᓯᐊᕈᑎᒋᑦᓱᒍᓗ.
ᑯᐯᒃᒥ, ᐊᑏᑦ ᐃᓅᖃᑎᒋᔭᐅᓂᕐᓂᒃ ᖃᐅᔨᒪᑎᑦᓯᒍᑕᐅᕗᖅ, ᐊᓯᑦᔨᒐᓱᐊᕐᓗᒍ ᒪᓕᒐᕐᑕᓕᒻᒪᕆᐅᑦᓱᓂ, ᑲᒪᒋᔭᐅᑦᓯᐊᒪᕆᒋᐊᖃᕐᓱᓂ, ᐱᕙᓪᓕᐊᑕᕐᓗᒍ ᐱᕕᑦᓴᖃᕐᕕᒋᑦᓯᐊᓗᒍᓗ, ᐊᑭᓕᕆᐊᖃᕐᓱᒍᓗ ᐊᓯᑦᔩᒋᐊᖃᕐᓂᖅ. 14ᓂᒃ ᐅᑭᐅᓖᑦ ᐊᖓᔪᑦᓰᓗ ᑯᐯᒃᒥᐅᒍᓕᕐᑐᑦ ᐊᕐᕌᒍᓕᒫᒥ ᐊᑎᕐᒥᓂᒃ ᐊᓯᑦᔩᒍᒪᒍᓐᓇᑐᑦ ᑯᐯᒃᒥᐅᑦ ᐊᑎᖏᑦᑕ ᐊᓪᓚᑕᐅᓯᒪᕕᖓᓄᑦ, ᐊᑖᑕᖓ, ᐊᓈᓇᖓ, ᑲᒪᔨᖓᓘᓐᓃᑦ ᑲᒪᒐᔭᕐᑎᓗᒋᑦ ᐅᑭᐅᑭᓗᐊᖏᓐᓈᓱᓂ ᑯᐯᒃᒥᐅᒍᑦᓱᓂ ᐃᓪᓗᒥᐅᒍᖃᑎᒋᓕᕐᓱᒍ ᐊᕐᕌᒍᓕᒫᒥ. ᐱᕙᓪᓕᐊᑕᕐᑐᓂᒃ ᑲᒪᒍᓰᑦ ᐊᓪᓚᑕᐅᓯᒪᔪᑦ ᑯᐯᒃᒥᐅᑦ ᐊᑎᖏᑦᑕ ᐊᓪᓚᑕᐅᓯᒪᕕᖓᓄᑦ ᒪᓕᒐᑎᒍᓪᓗ ᑕᒪᑐᒧᖓᐅᓕᖓᔪᒧᑦ ᒪᓕᒐᓕᐊᒍᓯᒪᔪᒧᑦ ᐱᑦᔪᑎᓕᒻᒧᑦ ᐊᑏᑦ ᐊᓯᑦᔨᑕᐅᒍᓐᓇᓂᖏᓐᓂᒃ ᐃᓅᖃᑎᒋᔭᐅᓂᕐᓅᓕᖓᔪᓄᓪᓗ (CCQ, r. 4) ᐃᓚᐅᒻᒥᑎᓪᓗᒋᑦ ᓇᐅᓕᒫᓂᒃ ᖃᐅᔨᒪᑎᑦᓯᒍᑏᑦ ᑐᓴᕋᑦᓴᓅᕐᑕᐅᒋᐊᖃᓲᑦ Gazette officielle du Québecᓄᑦ ᓇᓪᓕᐊ ᐊᑎᕐᒥᓂᒃ ᐊᓯᑦᔩᒍᓐᓇᓂᐊᕐᑎᓗᒍ $150.00ᓂᒃ ᐊᑭᓖᒋᐊᖃᕋᔭᕐᓗᓂ.
2022ᒥᓂᑦ ᐊᐅᔭᐅᑎᓪᓗᒍ, ᑖᒃᑯᐊ ᐊᑭᓖᒍᑕᐅᒋᐊᓖᑦ ᐊᑎᕐᒥᓂᒃ ᐊᓯᑦᔨᑕᐅᔨᐊᖃᑐᐃᓐᓇᕆᐊᓕᓐᓅᓕᖓᖕᖏᑐᑦ, ᐃᓕᓴᕆᐊᕐᑎᑕᐅᓯᒪᑦᓱᑎᒃ ᐊᓯᑦᔨᑕᐅᓯᒪᓐᓂᕈᑎᒃ ᐊᑎᖏᑦ, ᐃᓄᒃᑎᑐᑦ ᐊᑦᓯᔭᐅᒍᓯᕆᕐᖄᓯᒪᔭᒥᓂᒃ ᐅᑎᕐᑎᓯᒐᓱᐊᓯᒍᑎᒃ. ᑕᒪᓐᓇ ᐊᑭᓖᒍᑎᒋᒋᐊᖃᖕᖏᑕᖓ ᐃᓕᓵᒍᓯᒪᔪᑦ, ᑭᖑᕚᖏᑦᑕᓗ. ᑕᒪᓐᓇᓗ ᓄᑖᓄᑦ ᑭᓇᐅᓂᕐᒥᓅᓕᖓᔪᓄᑦ ᐊᓪᓚᖁᑎᓅᓕᖓᒻᒥᓱᓂ ᐊᑎᕐᒥᓂᒃ ᐊᓯᑦᔩᓯᒪᓂᖓᓂᒃ ᒪᓕᒋᐊᖃᕐᒪᑕ ᓄᑖᑦ ᐊᓪᓚᖁᑏᑦ. ᐊᑭᓖᒋᐊᖃᖕᖏᓂᖅ ᐊᑑᑎᓂᖃᓛᕐᑐᖅ ᐊᕐᕌᒍᓂ ᖁᓕᓐᓂ ᐅᕝᕙᓘᓐᓃᑦ ᔫᓂ 8, 2032 ᑎᑭᓪᓗᒍ.
ᔫᓂ 8, 2022ᒥ, ᑯᐯᒃᒥ ᐅᖃᕐᕕᒪᕆᒻᒥ ᐊᖏᕈᑕᐅᓯᒪᕗᖅ ᐱᖁᔮᐱᒃ 2: ᐱᖁᔭᖅ ᐱᑦᔪᑎᓕᒃ ᐃᓚᒌᑦ ᐱᖁᔭᖓᑕ ᐊᓯᑦᔨᑕᐅᒍᓐᓇᓂᖓᓂᒃ ᑭᓇᒥᒃ ᐊᖓᔪᕐᖄᖃᕐᓂᖅ ᐱᓪᓗᒍ ᐊᓯᑦᔨᑕᐅᒍᓐᓇᓂᖓᓂᓪᓗ ᐃᓅᖃᑎᒋᔭᐅᓂᕐᒧᑦ ᒪᓕᒐᐅᑉ ᐱᒍᓐᓇᐅᑎᖃᕐᓂᒨᓕᖓᔫᓪᓗ. ᐃᓚᔭᐅᒋᐊᕐᓯᒪᑦᓱᓂᓗ, ᐃᓄᐃᑦ ᐊᑎᕐᒥᓂᒃ ᐊᓯᑦᔨᑕᐅᔨᐊᖃᕐᓯᒪᔪᑦ ᐃᓕᓴᕆᐊᕐᑎᑕᐅᓯᒪᓂᑯᒥᓄᑦ ᑭᖑᕚᖏᓪᓗ ᐅᑎᕐᑎᓯᒍᓐᓇᓂᐊᕐᑎᓗᒋᑦ ᐃᓄᒃᑎᑐᑦ ᐊᑦᓯᔭᐅᒍᓯᒋᕐᖄᓯᒪᔭᒥᓂᒃ ᐊᑭᓖᒋᐊᖃᕈᓐᓀᓗᑎᒃ. ᐊᓯᑦᔩᒍᑕᐅᓕᕐᓂᖁᖅ ᒪᓕᒐᓕᐊᒍᓯᒪᔪᒥᒃ ᐱᑦᔪᑎᓕᒻᒥᒃ ᐃᓅᖃᑎᒋᔭᐅᓂᕐᒨᓕᖓᔪᓂᒃ ᐊᑏᓪᓗ ᐊᓯᑦᔨᑕᐅᒍᓐᓇᓂᖓᓂᒃ ᐅᕝᕙᓘᓐᓃᑦ ᐊᖑᑕᐅᓂᕋᕐᓂᐅᑉ ᐊᕐᓇᐅᓂᕋᕐᓂᐅᓘᓐᓃᑦ ᐊᓯᑦᔨᑕᐅᒍᓐᓇᓂᖓᓂᒃ (CCQ, r. 10):
ᐊᕕᑦᑐᓯᒪᓂᖓ III.2
ᐊᑭᓖᒋᐊᖃᖕᖏᑐᑦ
10.3 ᐃᓄᐃᑦ ᐊᑎᕐᒥᓂᒃ ᐊᓯᑦᔨᑕᐅᔨᐊᖃᕐᓯᒪᔪᑦ ᓄᓇᓕᑐᙯᑦ ᐃᓕᓴᕆᐊᕐᑎᑕᐅᓯᒪᑦᓱᑎᒃ ᑭᖑᕚᖏᓪᓘᓃᑦ ᐊᑎᕐᒥᓂᒃ ᐊᓯᑦᔨᑕᐅᖁᔨᔪᑦ ᐃᓄᒃᑎᑐᑦ ᐊᑦᓯᔭᐅᒍᓯᕐᖄᕕᓂᕐᒥᓄᑦ ᐊᑭᓖᒋᐊᖃᖕᖏᓚᑦ ᐊᑎᕐᒥᓂᒃ ᐊᓯᑦᔩᒍᒪᐅᑎᓂᒃ ᔫᓂ 8, 2032 ᑎᑭᓪᓗᒍ.
ᑕᑉᐱᑯᓇᓂ ᐅᓪᓗᓂ, ᐃᓄᐃᑦ ᐊᑭᓖᖃᑦᑕᓛᖕᖏᒥᔪᑦ ᐊᑦᔨᓕᐅᕐᑕᐅᒍᑎᖏᓐᓂᒃ ᐊᓪᓚᓯᒪᔪᑦ ᐱᖁᔦᑦ, ᐃᓅᓕᕐᕕᖓᑕ ᓇᓗᓀᕐᑕᐅᒍᑎᖏᑦ ᐊᒻᒪᓗ ᓱᕐᖁᐃᑕᐅᒍᑎᑦᓭᑦ.
ᑖᓐᓇ ᐊᑯᓂᐊᓗᒃ ᐅᑕᕐᕿᔭᐅᓕᕐᑐᖅ ᒪᓕᒐᖅ, ᕿᓄᒍᑕᐅᓚᐅᕐᓯᒪᑦᓱᓂ 2015ᒥ ᐱᓇᓱᐊᕐᑕᐅᖁᔭᐅᓯᒪᑦᓱᓂ ᓭᒻᒪᐅᑎᒋᐊᖃᕐᓂᒥᒃ ᖃᐅᔨᓴᕐᑎᓄᑦ, ᑲᕙᒪᒃᑯᓂᒃ ᕿᓄᕕᖃᕐᓯᒪᒻᒪᑕ ᐃᓕᓴᕆᐊᕐᑎᑕᐅᖃᑦᑕᓯᒪᔪᕕᓃᑦ ᐃᓚᖏᓪᓗ ᐃᓄᒃᑎᑐᑦ ᐊᑦᓯᔭᐅᒍᓯᑐᖃᕐᒥᓂᒃ ᐅᑎᕐᑎᓯᒍᓐᓇᓯᓂᐊᕐᑎᓗᒋᑦ:
ᐱᓇᓱᐊᕐᑕᐅᒋᐊᓖᑦ 17:
ᑲᕙᒪᓕᒫᓂᒃ ᑎᓕᔨᕗᒍᑦ ᐃᓕᓴᕆᐊᕐᑎᑕᐅᓯᒪᖃᑦᑕᑐᕕᓃᑦ ᐃᓚᖏᓪᓗ ᐃᓄᒃᑎᑐᑦ ᐊᑦᓯᔭᐅᒍᓯᐅᓯᒪᔪᓂᒃ ᐅᑎᕐᑎᓯᒍᑎᑦᓴᓕᕆᖁᑦᓱᒋᑦ ᐃᓕᓴᕆᐊᕐᑎᑕᐅᓯᒪᖃᑦᑕᓯᒪᔪᕕᓃᑦ ᐱᒍᑦᔭᐅᒍᑎᖏᑎᒍᑦ ᐊᑭᓖᖁᑦᓱᒋᑦ ᐊᐅᓚᑦᓯᓂᓕᕆᓂᕐᓄᑦ ᐊᑭᖏᓐᓂᒃ ᐊᕐᕌᒍᓂ ᑕᓪᓕᒪᓂ ᐊᑎᕐᒥᓂᒃᐊᓯᑦᔩᒐᓱᐊᕈᑏᑦ ᐊᑑᑎᔭᐅᓂᖏᓐᓂ ᓄᑕᐅᓯᓕᕐᑐᑕᐅᓂᖏᓐᓂᓗ ᐃᓕᑕᕐᓇᐅᑎᑦᓭᑦ ᐊᓪᓚᖁᑏᑦ, ᒪᑯᐊ ᐃᓅᓕᕐᕕᕕᓃᑦ ᓇᓗᓀᕐᑕᐅᒍᑎᖏᑦ, ᑲᓇᑕᐅᑉ ᓯᓚᑖᓄᑦ ᐊᐅᓪᓚᕈᓐᓇᐅᑏᑦ, ᐊᖁᒍᓐᓇᐅᑏᑦ, ᓯᕿᓂᖕᖑᐊᑦ, ᐃᓚᐅᒍᑏᑦ, ᐱᓇᓱᒍᓐᓇᐅᑏᓪᓗ.
ᐅᓪᓗᒥᒧ, ᑌᒣᓕᖓᑎᑦᓯᕙᒻᒥᔪᑦ ᐅᑯᓇᓂ ᓄᓇᖃᕐᕕᓖᑦ Alberta, Nova Scotia, Ontario, ᓄᓇᑦᓯᐊᒥ, ᐱᖁᔭᕐᑖᑎᑕᐅᓯᒪᓕᕐᓱᑎᓪᓗ ᑕᒪᑐᒧᖓᐅᓕᖓᔪᓂᒃ ᐃᓚᖏᑦ ᐳᔮᕙᓐᓰᑦ.
ᑕᒪᒃᑯᐊ ᓯᕗᒻᒧᕆᐊᕈᑕᐅᓯᒪᔪᑦ ᓄᓇᓕᑐᙯᑦ ᐊᑎᕐᒥᓂᒃ ᐊᑦᓯᔭᐅᒍᑎᒋᕐᖄᕆᓯᒪᔭᒥᓄᑦ ᐊᓯᑦᔩᒍᓐᓇᐸᓐᓂᐊᑎᓪᓗᒋᑦ ᐊᑭᖃᕐᑎᓇᒍ ᐋᑐᒑᒥᑦ ᑕᒪᓐᓇ ᐱᒋᐊᕐᖄᑎᑕᐅᓯᒪᑎᓪᓗᒍ. 2021ᒥ, ᑲᓇᑕᒥᐅᑦ ᑲᕙᒪᖓ ᑐᓴᕐᑕᐅᑎᑦᓯᓂᕐᒪᑦ ᒪᓕᒐᕐᒥᒃ ᑕᒪᑐᒧᖓᐅᓕᖓᒻᒥᔪᒥᒃ ᑲᕙᒪᑐᖃᒃᑯᑦ ᐊᓪᓚᖁᑎᖏᓐᓅᓕᖓᔪᓂᒃ. ᐊᑭᖃᖕᖏᑑᑎᑕᐅᖃᑦᑕᕆᐊᖃᕐᓯᒪᔪᑦ ᐊᑎᕐᒥᓂᒃ ᐊᓯᑦᔩᔪᑦ ᑲᓇᑕᐅᑉ ᓯᓚᑖᓅᕈᑎᑦᓴᓃᑦᑐᓂᒃ ᐊᑎᕐᒥᓂᒃ, ᓇᓗᓀᕐᑕᐅᒍᑎᒥᓃᑦᑐᓂᓪᓗ ᓇᓂᒥᐅᒍᓂᕋᕈᑎᒥᓃᑦᑐᓂᓪᓗ.
ᑐᓴᕐᑎᓯᒍᑎ ᐊᑎᕐᒥᒃ ᐊᓯᑦᔩᒍᑎᓕᐅᕈᓯᕐᓂᒃ:
1. ᐊᑎᕐᒥᓂᒃ ᐊᓯᑦᔩᒍᒪᐅᑎᓕᐅᕐᓂᖅ ᑯᐯᒃᒥ ᐊᑎᕐᓂᒃ
ᐊᓪᓚᖁᑎᖃᕐᕕᖓᓄᑦ (DIRECTEUR DE L’ETAT CIVIL)
ᐊᑎᕐᒥᓂᒃ ᐊᓯᑦᔩᒍᒪᐅᑎᓕᐅᕐᓂᖅ ᑯᐯᒃᒥ ᐊᑎᕐᓂᒃ ᐊᓪᓚᖁᑎᖃᕐᕕᖓᓄᑦ ᑯᐯᒃᒥ ᐊᑎᕐᓂᒃ ᐊᓪᓚᖁᑎᖃᕐᕕᒥ ᐊᐅᓚᑕᐅᓂᖃᓲᑦ ᐊᑎᕐᒥᓂᒃ ᐊᓯᑦᔩᒍᒪᐅᑎᓕᒫᑦ ᐃᕐᖃᑐᐃᕕᑎᒍᑦ ᑲᒪᒋᔭᐅᖕᖏᑐᓂᒃ. ᐱᑦᔪᑎᑦᓭᑦ ᐊᓪᓚᖁᑏᓪᓗ ᓴᐳᑦᔨᒍᑎᑦᓴᓕᐊᒍᓯᒪᔪᑦ ᐱᓪᓚᕆᐊᓘᕗᑦ, ᐊᑎᕐᓂᒃ ᐊᓪᓚᖁᑎᖃᕐᕕᒥ ᕿᒥᕐᕈᔭᐅᑦᓯᐊᖃᑦᑕᕈᓐᓇᒪᑕ. “ᐊᑎᕐᒥᓂᒃ ᐊᓯᑦᔩᒍᒪᐅᑎᒃ” ᐊᑐᐃᓐᓇᐅᑎᑕᐅᕗᖅ ᐊᑎᕐᓂᒃ ᐊᓪᓚᖁᑎᖃᕐᕕᒥ.
2. ᖃᐅᔨᒪᑎᑦᓯᒋᐊᖃᕐᓂᖅ ᓱᕐᕋᑕᐅᓯᒪᔪᓕᒫᓂᒃ
ᐃᓚᓗᑳᖏᑦ ᐊᑎᕐᒥᓂᒃ ᐊᓯᑦᔩᒍᒪᐅᑎᓕᐅᕐᓯᒪᔫᑉ ᖃᐅᔨᑎᑕᐅᒋᐊᖃᕋᔭᕐᑐᑦ. ᐊᖏᖕᖏᑑᒍᓐᓇᓱᑎᒃ; ᑕᒪᓐᓇᓗ ᐱᔭᕆᐊᑦᑐᕈᑕᐅᒍᓐᓇᓱᓂ ᑲᔪᓯᑦᓯᐊᕈᓐᓇᕋᔭᕐᓂᖓᓄᑦ ᐊᑎᕐᒥᒃ ᐊᓯᑦᔩᒐᓱᐊᕈᑎᐅᑉ. ᓇᓪᓕᖏᑦ ᖃᐅᔨᑎᑕᐅᒋᐊᓖᑦ ᓇᓗᓀᕐᓯᒍᓐᓇᑐᑦ ᖃᐅᔨᑎᑕᐅᓯᒪᓂᕐᒥᓂᒃ ᐊᖏᕐᓯᒪᒻᒪᖔᕐᒥᓘᓐᓃᑦ ᐊᑎᕐᒥᒃ ᐊᓯᑦᔩᒍᒪᐅᑎᒥᒃ.
3. ᓱᕐᖁᐃᑕᐅᒍᑎᖓ ᖃᐅᔨᒪᑎᑦᓯᒍᑎᐅᑉ
ᑯᐯᒃᒥ ᐊᑎᕐᓂᒃ ᑲᒪᔩᑦ ᓱᕐᖁᐃᓯᑎᑕᐅᒋᐊᖃᕋᔭᕐᑐᑦ ᑌᓐᓇ ᖃᐅᔨᑎᑕᐅᓯᒪᔪᖅ ᐱᑎᑕᐅᑦᓯᐊᒪᖔᑦ ᐊᑎᕐᒥᓂᒃ ᐊᓯᑦᔩᒍᒪᐅᑎᐅᑉ ᐊᑦᔨᖓᓂᒃ, ᐊᓪᓚᓯᒪᔪᕐᓂᐊᕕᒃᑯᑦ ᓇᓗᓀᕐᑕᐅᒍᑎᓕᐅᕐᑕᐅᓯᒪᔪᒥᒃ ᐅᕝᕙᓘᓐᓃᑦ ᐁᑦᑐᑕᐅᓗᓂ ᐸᔪᑦᑕᐅᓗᓂ ᐱᖁᔭᓕᕆᔨᓂᒃ ᑭᒡᒐᑐᕐᑎᒧᑦ.
4. ᐊᑎᕐᒥᓂᒃ ᐊᓯᑦᔩᒍᒪᐅᑎᐅᑉ ᓄᐃᑕᑎᑕᐅᓂᕆᒋᐊᓕᖓ
ᒪᓕᑦᓱᒍ ᑯᐯᒻᒥᐅᑦ ᐃᓅᖃᑎᒌᓐᓂᒧᑦ ᒪᓕᒐᖓ ᐃᓚᐅᑎᑕᐅᒍᓐᓇᖏᑦᑑᒍ ᑎᓕᒫᓪᓗ, ᓇᐅᓕᒫᓂᒃ ᖃᐅᔨᒪᑎᑦᓯᒍᑎᒃ ᐊᑎᕐᒥᓂᒃ ᐊᓯᑦᔩᒍᒪᔪᖃᓕᕐᐸᑦ ᕿᓄᒍᑕᐅᓪᓚᕆᒋᐊᖃᕐᐳᖅ, ᖃᐅᔨᒪᔭᐅᑦᓯᐊᕆᐊᖃᕐᒪᑕ ᐊᑎᕐᒥᓂᒃ ᐊᓯᑦᔩᒍ ᑎᓕᐅᕐᓯᒪᔪᑦ. ᐅᖃᐅᓯᑦᓴᓂᒃ ᑐᓴᕐᑎᑕᐅᒋᐊᓖᑦ ᑯᐯᒃᒥ ᐊᑎᕐᓂᒃ ᑲᒪᔩᑦ ᓇᐅᓕᒫᓂᒃ ᖃᐅᔨᒪᑎᑦᓯᒍᑎ ᓄᐃᑕᐅᓯᒪᓕᕐᐸᑦ, ᑕᒪᓐᓇᓗ ᐱᔭᕆᐊᑦᑐᕈᑕᐅᑐᐃᓐᓇᕆᐊᖃᕐᓱᓂ ᑲᔪᓯᑦᓯᐊᕋᔭᕐᓂᖓᓂᒃ ᐊᑎᕐᒥᓂᒃ ᐊᓯᑦᔩᒍᒪᐅᑎᓕᐊᒍᓯᒪᔫᑉ.
5. ᑐᑭᑖᕈᑕᐅᓂᖓ
ᕿᒥᕐᕈᔭᐅᒌᕐᐸᑦ ᐊᑎᕐᒥᓂᒃ ᐊᓯᑦᔩᒍᒪᒍᑎᒃ, ᑯᐯᒃᑯᑦ ᐊᑎᕐᓂᒃ ᑲᒪᔨᖏᑦ ᐊᓪᓚᓯᒪᔫᑎᓪᓗᒋᑦ ᑐᑭᓯᑎᑦᓯᒍᑎᓕᐅᕋᔭᕐᑐᑦ ᑐᑭᑖᕈᑕᐅᓯᒪᔪᓂᒃ ᐊᖏᕐᑕᐅᒍᑎᓂᒃ ᕿᐱᓗᑦᑕᐅᒍᑎᒥᓪᓘᓃᑦ. ᑌᓐᓇ ᐊᑎᕐᒥᓂᒃ ᐊᓯᑦᔨᑕᐅᖁᔨᔪᕕᓂᖅ ᐊᓪᓚᕕᐅᒐᔭᕐᑐᖅ ᑐᑭᑖᕈᑕᐅᔪᕕᓂᕐᒥᒃ, ᒋᐊᖃᕐᐸᓗ, ᐊᓪᓚᕕᐅᒻᒥᑎᓪᓗᒋᑦ ᓇᓪᓕᖏᑦ ᓈᒻᒪᓴᖕᖏᓂᕐᒥᓂᒃ ᐊᓪᓚᒍᑎᓕᕕᓃᑦ ᐅᖃᐅᓯᑦᓴᓕᕕᓃᓪᓘᓃᑦ ᐊᑎᕐᒥᓂᒃ ᐊᓯᑦᔩᒍᒪᐅᑎᒃ ᐱᓪᓗᒍ.
ᓇᓪᓕᐊ ᐊᑎᕐᒥᓂᒃ ᐊᓯᑦᔩᓯᒪᔪᖅ, ᑲᒪᒋᔭᑦᓴᖃᕐᐳᖅ ᐅᕝᕙᓘᓐᓃᑦ ᐊᑖᑕᖓ ᐊᓈᓇᖓᓘᓐᓃᑦ ᑲᒪᔨᖓᓘᓐᓃᑦ ᖃᐅᔨᑎᑦᓯᒋᐊᖃᕐᓂᒥᒃ ᐊᑎᕐᒥᓂᒃ ᐊᓯᑦᔩᓯᒪᓕᕐᓂᒥᓂᒃ ᑲᕙᒪᒃᑯᑦ ᐊᓪᓚᕕᖏᓐᓂᒃ ᐱᓇᓱᕝᕕᖁᑎᖏᓐᓂᓘᓐᓃᑦ. ᑌᒣᒻᒪᑦ ᓇᓗᓀᕐᑕᐅᒍᑎᑖᕐᓯᒪᒋᐊᖃᕐᐳᖅ ᐊᑎᕐᒥᓂᒃ ᐊᓯᑦᔩᓯᒪᓂᕋᐅᑎᒥᒃ ᓄᑖᒥᓪᓗ ᐃᓅᓕᕐᕕᖓᑕ ᓇᓗᓀᒃᑯᑕᖓᓂᒃ ᓱᕐᖁᐃᓯᑎᑦᓯᒍᑎᑦᓴᑖᕆᓗᒋᑦ.
ᑕᒪᓐᓇ ᐊᕐᖁᑎᒋᓗᒍ, ᐊᑭᓖᒋᐊᖃᖕᖏᓚᑦ ᐊᑎᕐᒥᓂᒃ ᐊᓯᑦᔩᓯᒪᔪᑦ ᐃᓕᓴᕆᐊᕐᑎᑕᐅᖃᑦᑕᓯᒪᔪᕕᓃᑦ ᐱᒍᑦᔭᐅᒍᑎᖏᑎᒍᑦ, ᐅᕝᕙᓘᓐᓃᑦ ᓄᑖᒥᒃ ᐃᓅᓕᕐᕕᖓᑕ ᓇᓗᓀᕐᑕᐅᒍᑎᖓᓂᒃ ᐱᑖᕐᓯᒪᔪᑦ, ᔫᓂ 2032 ᑎᑭᓪᓗᒍ.
ᑯᐯᒃᑯᑦ ᐊᑎᕐᓂᒃ ᐊᓪᓚᖁᑎᖃᕐᕕᖓ ᖃᐅᔨᒋᐊᕐᕕᓴᐅᕗᖅ ᓱᓇᓪᓗᑑᓂᖏᓐᓂᒃ ᑐᑭᓯᒍᒪᔪᖃᕐᐸᑦ ᖃᓄᐃᓘᕈᓰᑦ ᐊᑎᕐᓃᕕᑦ ᖃᓄᐃᓕᒋᐊᕈᑎᖃᕈᒪᒍᕕᑦ. ᑕᑯᒋᐊᕐᕕᓴᖅ: https://www.etatcivil.gouv.qc.ca/en/change-name.html
ᐃᑲᔪᕐᑕᐅᒋᐊᓪᓚᕈᒪᔪᑦ ᒪᑭᕝᕕᒥ ᓄᓇᕕᒻᒥ ᓄᓇᓕᓐᓂ ᐃᕐᖃᑐᐃᓂᓕᕆᕕᑎᒍᑦ ᐃᑲᔪᕐᓯᔭᐅᒍᓐᓇᐳᑦ. ᐅᕗᖓ: notary@makivvik.ca
