“ᓄᓇᕕᒻᒥᐅᑦ ᐃᓄᖏᑦ ᐅᕕᒃᑲᒪᕆᐅᕗᑦ. ᑕᒐᑕᒐ/ ᒫᓐᓇ ᐅᕕᒐᕐᑐᐃᑦ ᑲᒪᒋᔭᐅᑦᓯᐊᓗᑎᒃ ᐱᒋᐅᕐᓴᑎᑕᐅᒋᐊᖃᓪᓚᕆᓕᕐᖁᑦ… ᐱᒍᒪᓂᖃᑦᓯᐊᒪᑕ ᐊᒻᒪᓗ ᓂᕆᐅᓐᓂᖃᓪᓚᕆᑉᐳᖓ ᐱᐅᔪᓂᒃ ᐱᔪᖃᓚᖓᓂᖓᓂᒃ ᑕᒫᖕᖓᓂᑦ.” — ᑌᒣᓕᑦᓱᓂ ᐊᓖᓯᐊ ᐊᔭᒍᑕᖅ ᐅᖃᓚᐅᔪᖅ.
ᐅᕕᒃᑳᐱᐅᒐᓗᐊᕐᓱᓂ, ᐊᕙᑎ ᐊᑕᐅᓯᖅ ᐱᖓᓲᔪᕐᑐᓂᓪᓗ 26-ᓂᒃ ᐅᑭᐅᖃᕐᓱᓂ, ᐊᓖᓯᐊ ᐊᔭᒍᑕᖅ ᐊᑯᓂᑲᓪᓚᒃ ᐱᓇᓱᐊᕐᑐᓄᑦ ᐃᓚᒋᔭᐅᓯᒪᓕᕐᖁᖅ. ᑕᒐᑕᒐ/ᒫᓐᓇ ᐳᕐᑐᓂᕐᓴᓄᑦ ᑐᑭᒧᐊᕐᑎᓯᔨᒋᔭᐅᔪᖅ ᐃᓱᐊᕐᓯᕕᒻᒥ, ᑰᑦᔪᐊᒥ, ᐃᑲᔪᕐᓯᒪᒍᑎᖃᓲᖅ ᐃᓄᐃᑦ ᐱᐅᓯᑐᖃᖏᑦᑎᒍᑦ ᐃᑲᔪᕐᓯᒍᑎᑦᓴᓂᒃ ᒪᒥᓴᕈᑎᑦᓴᓂᓪᓗ ᑭᖑᕚᕆᑦᑐᐃᑦᐅᐃᕆᓯᒪᓚᕿᓲᒍᒻᒪᑕ ᑲᑉᐱᐊᓇᕐᑐᑎᒍᑦ ᖁᐊᕐᓵᓇᕐᑐᑰᖃᑦᑕᓯᒪᓂᕐᒥᓄᑦ.
ᓇᑦᓯᓕᐅᑦ ᑕᕐᕿᖓᓂ (ᒫᑦᓯ) 6-ᒥ, ᑲᓇᑕᐅᑉ ᓴᓇᖕᖑᐊᓯᒪᔪᓕᕆᕕᖓᓐᓂ ᐋᑐᒍᐊᒥᓚᐅᔪᖅ 2020-ᐅᑉ ᐊᕐᕌᒍᖓᓂ ᓄᓇᖃᕐᖄᓯᒪᔪᐃᑦ ᐃᓄᐃᑦ ᐅᕕᒃᑲᓄᑦ ᐃᓕᑕᕆᔭᐅᒍᑎᑖᒍᓲᒥᒃ ᐃᓕᑕᕆᔭᐅᒍᑎᑖᕐᑎᑕᐅᓚᐅᔪᖅ ᑲᓇᑕᓕᒫᒥ ᑕᓚᕖᓴᒃᑯᑦ ᑕᑯᑦᓴᐅᓱᓂ.
“ᑖᓐᓇ ᓄᓇᖃᕐᖄᓯᒪᔪᓄᑦ ᐃᓕᑕᕆᔭᐅᒍᑎᑖᒍᓲᖅ ᐅᕙᓐᓄᑦ ᐱᒻᒪᕆᐊᓗᒃ, ᑖᓐᓇ ᐅᕙᓐᓄᑦ, ᓱᕐᖁᐃᓇᕐᑎᓯᔪᖅ ᖃᓄᕐᑑᕋᓱᐊᕐᑐᓄᑦ ᐃᓚᒋᔭᐅᓲᒍᓂᕐᓃᕙᖓ ᓄᓇᓕᑦᑎᓂ. ᒥᑭᓪᓕᑎᕐᓇᑐᕋᑕᖅ ᐅᕙᓐᓄᑦ ᐊᒻᒪᓗ ᐱᓇᓱᐊᕐᓂᑯᑦ ᐱᒐᓱᐊᕆ- ᐊᓪᓚᕈᒪᐅᑎᒋᓚᕿᑦᓱᒍ. ᖃᐅᔨᒍᑎᒋᓪᓚᕆᑦᑕᕋ ᐃᒻᒥᓂᒃ ᐊᐱᕐᓱᖑᓱᓐᓇᓲᒍᒻᒪᑦ ᐅᕕᒃᑲᐅᓱᓂ ᓈᒻᒪᓈᓕᕋᓗᐊᕐᒪᖔᑦᑕ, ᐅᕝᕙᓘᓐᓃᑦ ᐱᓇᓱᒐᑦᓴᕆᔭᑦᑎᓃᒐᓗ- ᐊᕐᒪᖔᑦᑕ,” ᑌᒣᓕᑦᓱᓂ ᐊᓖᓯᐊ ᐅᖃᓚᐅᔪᖅ ᐱᓇᓱᐊᕈᓰᑦ ᐊᒥᓱᑦᔭᖏᑦᑐᑦ ᓈᓯᒪᓕᕐᑎᓗᒋᑦ ᐃᓕᑕᕆᔭᐅᒍᑎᑖᕐᑐᕕᓂᐅᑦᓱᓂ.
“ᑖᓐᓇ ᓄᓇᖃᕐᖄᓯᒪᔪᓄᑦ ᐃᓕᑕᕆᔭᐅᒍᑎᑖᕆᔭᐅᓲᖅ ᐅᕙᓐᓂᒃ ᖁᕝᕙᑎᑦᓯᓚᕆᑦᑐᖅ, ᑲᑦᓱᙰᓕᒋᐊᓪᓚᕈᑎᒋᔭᕋ ᑲᔪᓯᒋᐊᓪᓚᕈᒪᓚᕿᐅᑎᒋᑦᓱᒍᓗ ᐊᓕᐊᒋᑦᓱᒋᑦ ᐱᓇᓱᐊᕐᐸᑕᕐᓃᕙᖓ — ᐱᒍᑦᔨᓂᒃᑯᑦ ᐊᒻᒪᓗ ᑐᑭᓯᒪᖃᑎᒋᑦᓯ- ᐊᓗᒋᑦ ᐱᓇᓱᐊᖃᑎᖃᕈᒪᒐᒪ ᓄᓇᓕᑦᑎᓂᒃ. ᑫᓪᓗᑐᐃᖃᑎᒌᒋᐊᖃᕐᐳᒍᑦ ᐱᒍᓐᓇᑎᑦᓯᒐᓱᐊᖃᑎᒌᓪᓗᑕ ᐱᓯᑎᐊᓘᒐᑦᑕ ᓄᓇᕕᒻᒥᐅᒍᔪᒍᑦ!” ᑌᒣᓕᑦᓱᓂ ᐊᓖᓯᐊ ᐅᖃᓚᐅᔪᖅ.
ᓄᐃᑦᓯᒐᓱᐊᕐᓂᒥᓂ ᐊᒻᒪᓗ ᖃᕐᔪᐃᑦ ᐅᕕᒃᑫᑦ ᑲᑎᒪᔨᖏᓐᓄᑦ ᓯᕗᓪᓕᐹᑦᓯ- ᐊᒍᑦᓱᓂ ᐊᖓᔪᕐᖄᑕᕆᔭᐅᔪᕕᓂᐅᑦᓱᓂ ᐃᓄᐃᑦ ᐅᕕᒃᑲᖏᓐᓂᒃ ᖃᐅᔨᓂ- ᐊᕐᕕᖃᓚᐅᔪᖅ ᐃᓘᓐᓇᖏᓐᓂᒃ ᖁᓕᓪᓗ/ᑕᓪᓕᒪᐅᔪᕐᑐᓗ ᓯᑕᒪᓪᓘᓂᒃ (14-ᓂᒃ) ᓄᓇᓕᓕᒫᓂᒃ, ᓄᐃᑕᐅᑎᑦᓯᒋᐅᕐᓱᓂ ᐱᓇᓱᐊᕈᑎᑦᓴᓂᒃ ᑲᑎᑎᑦᓯᓱᓂ ᐅᕕᒃᑲᓂᒃ ᐃᓄᑐᖃᕐᓂᓗ. ᐅᕕᒃᑲᓂᒃ ᑭᒡᒐᑐᕐᑎᒪᕆᐅᓚᐅᔪᒻᒥᔪᖅ ᐃᓄᐃᑦ ᖃᓄᐃᒻᒪᖔᑕ ᖃᐅᔨᓴᕐᑕᐅᓂᖃᕐᑎᓗᒋᑦ ᖃᓄᐃᑉᐱᑖ? ᓚᔪᒥᒃ ᐊᑦᓯᕋᕐᑕᐅᒍᑎᖃᕐᑎᓗᒍ ᖃᐅᔨᓴᕐᓂᖅ, ᖃᐅᔨᓴᕐᓂᖅ ᐱᒋᐊᕐᑎᑕᐅᑎᓪᓗᒍ, ᓄᓇᕕᒻᒥᐅᑦ ᐃᓗᓯᓕᕆᓂᒃᑯᑦ ᖃᐅᔨᒐᓱᐊᕐᑕᐅᑎᓪᓗᒋᑦ, ᐊᒻᒪᓗ ᓄᓇᓕᓕᒫᓂ ᐅᑭᐅᕐᑕᑐᒥ ᒪᓕᒐᐅᑉ ᐋᕐᕿᓯᒪᐅᑎᑦᓴᖓ ᑲᑎᒪᓂᕐᒥ ᐅᖃᖃᑎᒌᒍᑕᐅᑎᓪᓗᒍ ᐃᓚᒋᔭᐅᓚᐅᔪᒻᒥᔪᖅ, ᐊᑯᓃᕐᑐᑎᒍᑦ ᐃᓂᓪᓚᖓᐅᑎᑦᓴᓕᐅᕐᑐᓄᑦ ᑲᓇᑕᒥᐅᓂᒃ ᐅᑭᐅᕐᑕᑐᒥᐅᓂᓪᓗ ᒪᓕᒐᓕᐅᕐᓂᖃᕐᑎᓗᒍ ᐃᓚᒋᔭᐅᓚᐅᔪᒻᒥᔪᖅ.
“ᐅᐱᒪᒋᔭᖃᕐᐳᒍᑦ ᐃᓘᓐᓇᑕ ᐊᓖᓯᐊᒥᒃ ᐃᓚᑕᕆᔭᐅᒍᑎᑖᕐᓂᖓᓂᒃ,” ᑌᒣᓕᑦᓱᓂ ᒪᑭᕝᕕᒃᑯᑦ ᐊᖓᔪᕐᖄᖓ ᓵᓕ ᒍᐊᑦ ᐅᖃᓚᐅᔪᖅ. “ᓯᕗᓕᕐᑎᐅᓯᐊᓲᖅ ᐆᑦᑐᕋᐅᑎᑦᓴᓯᐊᖑᑦᓱᓂ. ᖃᐅᔨᒪᔭᕗᑦ ᐱᓇᓱᐊᕐᓯᒪᓂᖓᓄᑦ ᐊᖓᔪᕐᖄᕆᔭᐅᑦᓱᓂ ᖃᕐᔪᐃᑯᓐᓄᑦ, ᐊᒻᒪᓗ ᒫᓐᓇ/ᑕᒐᑕᒐ ᐃᓱᐊᕐᓯᕕᒻᒥ ᐱᓇᓱᐊᓕᕐᓱᓂ, ᑲᑦᓱᙰᓕᓭᑦᓯ- ᐊᓲᖅ ᐅᕕᒐᕐᑐᓂᒃ ᓄᓇᕕᓕᒫᒥ, ᓄᓇᕕᒻᒥᑐᐃᓐᓇᐅᖏᑦᑐᖅ ᓄᓀᑦ ᐊᓯᐊᓂᒐᓴᒃ.” ᑌᒣᓕᑦᓱᓂ ᓵᓕ ᐅᖃᓚᐅᔪᖅ.
ᓄᓇᖃᕐᖄᓯᒪᔪᓄᑦ ᐃᓕᑕᕆᔭᐅᒍᑎᑖᒍᓲᑦ ᖁᑦᓯᓂᕐᐸᐅᓱᑎᒃ ᐃᓕᑕᕆᔭ- ᐅᒍᑎᑖᕐᑎᓯᒍᑎᐅᓲᒍᕗᑦ, ᓲᓱᒋᓇᕐᑐᓂᒃ ᐃᓕᑕᕐᓯᒪᒍᑎᐅᑦᓱᑎᒃ ᓄᓇᖃᕐᖄᓯᒪᔪᐃᑦ ᓄᓇᓕᖏᓐᓂ. ᐊᕙᑎ ᐊᑕᐅᓯᖅ ᐱᖓᓲᔪᕐᑐᓘᓂ (26-ᓂ) ᐊᕐᕌᒍᐃᑦ ᐅᖓᑖᓂ ᐃᓕᑕᕆᔭᐅᒍᑎᑖᕐᓯᒪᓕᕐᑐᑦ 362 ᐊᓪᓓᑦ, ᐃᓄᐃᑦ ᐊᒻᒪᓗ ᐊᓪᓚᖓᔪᐃᑦ ᐱᒐᓱ- ᐊᕐᑕᒥᓂᒃ ᐱᔭᖃᕐᓯᒪᔪᐃᑦ. ᑲᓇᑕᓕᒫᒥ ᑕᓚᕖᓴᒃᑯᑦ ᑕᑯᑦᓴᐅᑎᑕᐅᓲᑦ ᐃᓕᑕᕆᔭ- ᐅᒍᑎᑖᕐᑎᑕᐅᔪᐃᑦ ᖁᕕᐊᓲᑎᒋᔭᐅᑎᓪᓗᒋᑦ, ᐊᑦᔨᒌᖕᖏᑑᑦᓱᑎᒃ ᓄᓇᖃᕐᖄᓯᒪᔪᐃᑦ ᑲᓇᑕᒥ, ᐊᒻᒪᓗ ᑲᓇᑕᒥᐅᒍᑦᓱᑎᒃ ᐊᑎᖏᑦ ᖃᐅᔨᒪᔭᐅᓂᖃᓪᓚᕆᑦᑐᐃᑦ ᓄᓇᖃᕐᖄᓯᒪᔪᐃᑦ ᑐᓴᕐᓂᔮᕐᑏᑦ ᐊᓯᖏᓪᓗ ᑕᑯᑦᓴᐅᑎᑕᐅᓲᒍᒻᒥᔪᑦ.
