ᓯᓚ ᓂᓪᓚᕙᓪᓕᐊᓕᕐᒥᒪᑦ ᐅᕐᖁᓯᓴᐅᑏᑦ ᐃᖏᕐᕋᖃᑦᑕᓚᖓᓕᕆᕗᑦ ᑌᒣᓕᕐᑎᓗᒋᑦ, ᐱᒻᒪᕆᐅᕗᖅ ᓄᓇᕕᒻᒥᐅᓂᒃ ᐊᓂᕐᕋᓕᓐᓂᒃ ᐊᒻᒪᓗ ᐱᓇᓱᒐᖁᑎᓕᓐᓂᒃ ᐃᕐᙯᑎᑦᓯᒋᐊᕐᓂᖅ ᐱᑦᔪᑎᒋᑦᓱᒋᑦ ᐅᕐᖁᓯᓴᐅᑏᑦ ᐅᕐᓱᐊᓗᖏᓐᓄᑦ ᐃᑲᔪᕐᓯᔭᐅᒍᑏᑦ. ᐱᒍᓐᓇᓂᐊᕈᕕᑦ ᑖᒃᑯᓇᖕᖓᑦ ᐱᓇᓱᒍᑎᐅᔪᓂᑦ, ᐊᓪᓚᖁᑎᖃᕆᐊᖃᕐᐳᑎᑦ ᑯᐯᒃᑯᑦ ᐃᑯᒪᓕᕆᔨᒃᑯᖏᓐᓂ ᐱᖃᕐᓗᑎᑦ ᐃᓱᐊᖁᑎᒥᒃ (ᐃᒡᓗᔪᐊᒥ) ᐃᑲᔪᕐᑕᐅᒍᑎᖃᖕᖏᑐᒥᒃ.
ᒪᑭᕝᕕᒃ ᐃᓚᐅᔪᖅ ᑐᑦᑕᕕᐅᑦᓱᓂ ᐊᑭᓕᕐᑐᐃᒋᐊᓕᓐᓄᓗ, ᑯᐯᒃᑯᓗ ᐃᑯᒪᓕᕆᔨᖏᓐᓄᑦ ᐊᒻᒪᓗ ᓄᓇᕕᒻᒥ ᐅᕐᓱᐊᓗᓐᓂᐊᑎᒃᑯᓄᑦ. ᒪᑭᕝᕕᒥ ᐱᓇᓱᑦᑎ ᒣᒃ ᐃᐆᕆᐆ ᑐᑭᓯᑎᑦᓯᒍᑎᓕᒃ ᐱᒻᒪᕆᐅᓂᖃᕆᐊᖓ ᑐᑭᓯᒪᒋᐊᖃᕐᓂᖅ ᖃᓄᖅ ᑐᑭᖃᒻᒪᖔᑦ ᐃᑲᔪᕐᑕᐅᒍᑎᖃᖕᖏᑐᒥᒃ ᐃᒡᓗᔪᐊᖁᑎᖃᕐᓂᖅ ᐊᒻᒪᓗ ᖃᓄᖅ ᐱᒍᓐᓇᕕᓖᑦ ᐃᓚᐅᒍᑎᑦᓴᖏᑦ ᐊᓪᓚᑕᐅᒍᓐᓇᕕᖃᕆᐊᖏᑦ.
“ᓲᕐᓗ ᐃᒣᓕᖓᒍᓐᓇᒪᑦ, ᓇᒻᒥᓂᕐᓂᒃ ᐃᒡᓗᔪᐊᖁᑎᖃᕈᕕᑦ, ᐱᒍᓐᓇᕕᖃᕐᐳᑎᑦ. ᐃᒡᓗᒥᒃ ᐊᑦᑕᑐᐊᖃᕈᕕᑦ ᑲᑎᕕᒃ ᓄᓇᓕᓕᒫᑦ ᐃᒡᓗᓕᕆᔨᒃᑯᖏᓐᓂᑦ, ᐱᒍᓐᓇᕕᖃᖕᖏᓚᑎᑦ, ᑮᑕ ᐊᑦᑕᑐᐊᑦ ᐃᑲᔪᕐᑕᐅᒍᑎᖃᕇᕐᒪᑦ,” ᑌᒫᒃ ᐅᖃᕐᑐᖅ. ᐃᓄᓕᒫᓄᓕᖓᔪᑦ ᐃᒡᓗᔪᐊᑦ ᐱᒍᓐᓇᕕᖃᖕᖏᒥᔪᑦ ᑖᒃᑯᓇᖕᖓᑦ ᐃᑲᔪᕐᓯᓂᕐᒥᒃ ᐱᓇᓱᒍᑎᓂᑦ. ᓲᕐᓗ ᐃᒣᓕᖓᒍᓐᓇᒪᑦ, “ᓄᓇᓕᓐᓄᑦ ᑲᕙᒫᐱᒃᑰᒍᕕᑦ, ᐃᒡᓗᔪᐊᖁᑎᓕᒫᖏᓪᓗ ᑲᕙᒫᐱᒃᑯᑦ, ᑕᕐᕋᒥ ᓄᓇᓖᑦ ᐊᒡᓚᕕᖏᑦ, ᐱᒍᓐᓇᕕᖃᖕᖏᓚᑦ. ᓱᒨᑦ?. ᐱᑦᔪᑎᖃᕐᓱᑎᒃ ᑲᕙᒪᒃᑯᓄᑦ ᑮᓇᐅᔭᖃᕐᑎᑕᐅᓱᖑᓂᕐᒥᓂᒃ, ᓇᓪᓕᑐᐃᓐᓇᖏᓐᓂᑦ ᑲᕙᒫᓐᓂᑦ ᑮᓇᐅᔭᖃᕐᑎᑕᐅᒍᑎᖃᕐᓱᑎᒃ ᓄᓇᓕᐅᑉ ᑲᕙᐱᖓᓂᓪᓗᓃᑦ ᐅᕝᕙᓘᓐᓃᑦ ᓄᓇᓕᕐᓚᐅᑉ ᑲᕙᒪᖓᓂᑦ,” ᑲᕙᒪᓄᑦ ᐱᑐᑦᓯᒪᓂᖃᖕᖏᑐᑦ ᐱᓇᓱᒐᖃᕐᕕᖁᑎᐅᔪᑦ ᐱᒍᓐᓇᑐᐃᓐᓇᕆᐊᓖᑦ ᐃᒡᓗᔪᐊᖁᑎᖏᑦ ᐅᕝᕙᓘᓐᓃᑦ ᐊᑦᑕᑐᐊᖏᑦ ᐃᑲᔪᕐᓯᔭᐅᒍᑎᑕᕐᑕᖏᑐᐊᕐᐸᑕ. ᓄᓇᒥᒃ ᑎᒍᒥᐊᕐᑏᑦ, ᑌᒣᒐᓗᐊᕐᓗᑎᒃ, ᑮᓇᐅᔭᓕᐅᕐᑎᐅᒐᒥᒃ, ᐱᒍᓐᓇᑐᐃᓐᓇᕆᐊᓖᑦ, ᐃᒡᓗᔪᐊᖅ ᐊᑐᕐᑕᐅᑐᐊᕐᐸᑦ ᐱᓇᓱᒐᖁᑕᐅᔪᒧᑦ.
ᐱᓇᓱᒍᑎᓂᑦ ᐱᕕᖃᕋᓱᒍᑎᐅᔪᑦ ᓇᓗᓇᖕᖏᑐᒻᒪᕆᐅᕗᑦ. ᑭᓇᑐᐃᓐᓇᖅ ᓄᓇᕕᒻᒦᓗᓂ, ᐊᒡᓚᖁᑎᖃᕐᓗᓂ ᑯᐯᒃᑯᑦ ᐃᑯᒪᓕᐅᕈᑎᓕᕆᔨᒃᑯᖏᓐᓂ, ᓇᒻᒥᓂᖃᕐᓗᓂᓗ ᐃᒡᓗᔪᐊᒥᒃ ᐃᑲᔪᕐᑕᐅᒍᑎᑖᕐᑕᖏᑦᑐᒥᒃ ᐱᒐᓱᒍᓐᓇᐳᖅ, ᐃᓚᐅᒍᑎᑕᕐᓯᒪᒋᐊᖃᕐᐳᓗ ᐱᓇᓱᒍᑎᐅᔪᓄᑦ. ᐱᔭᖃᕋᓱᒍᑏᑦ ᐊᓪᓚᓯᒪᔪᖕᖑᐃᒍᑎᑕᖏᑦ ᐱᑕᖃᕐᑎᑕᐅᓚᖓᔪᑦ ᒪᑭᕝᕕᒧᑦ. ᒪᑭᕝᕕᒃ ᐊᓱᐃᓛ ᐊᐅᓪᓚᑎᑦᓯᕕᖃᓛᓕᕐᒪᑦ ᑯᐯᒃᑯᑦ ᐃᑯᒪᓕᕆᔨᖏᓐᓂᒃ, ᑖᒃᑯᐊᓗ ᓱᓕᓕᕐᑎᓯᓗᑎᒃ, ᓱᕐᖁᐃᓯᑎᑦᓯᒍᑎᒥᓪᓗ ᐱᒐᓱᒍᑎᓕᐅᕐᑐᕕᓂᕐᒥᒃ ᐁᑦᑐᐃᓗᑎᒃ. ᑭᖑᓂᐊᒍᑦ ᐊᓱᐃᓛᒃ ᒪᑭᕝᕕᒃ ᑐᓴᕐᑎᓯᓂᐊᓕᕐᒪᑦ ᑕᒪᖏᓐᓂᒃ ᐃᑲᔪᕐᑕᐅᒍᑎᑖᕐᑕᓚᖓᔪᒥᓪᓗ ᐊᒻᒪᓗ ᓄᓇᕕᒻᒥ ᐅᕐᓱᐊᓗᓐᓂᐊᑎᒃᑯᓂᒃ, ᖃᐅᔨᑎᓪᓗᓂᒋᒃ ᐱᒋᐊᕐᕕᓕᐅᑎᓗᑎᒃ ᐅᓪᓗᖓᓂᑦ ᐊᓪᓚᓯᒪᔪᑎᒍᑦ ᐱᒐᓱᒍᑎᓕᐊᕆᓚᐅᔪᔭᖏᓐᓂᑦ, ᐃᑲᔪᕐᑕᐅᒍᑎᑖᕐᑕᓚᖓᔪᖅ ᐊᓪᓚᑕᐅᓯᒪᖃᑕᐅᓚᖓᓕᕐᒪᑦ ᐅᕐᖁᓯᓴᐅᑎᓄᑦ ᐅᕐᓱᐊᓗᑦᑕᕈᑎᖏᑦ ᐃᑲᔪᕐᓯᔭᐅᒍᑎᖃᕐᓂᐊᓕᕐᑎᓗᒋᑦ ᑕᒪᒃᑯᐊ ᐱᓇᓱᑦᑕᐅᒍᑎᖏᑎᒎᕐᑐᓂᒃ. ᐊᓪᓚᑕᐅᓯᒪᖃᑕᐅᓕᕈᓂ, ᐃᑲᔪᕐᓯᔭᐅᒍᑎᑖᕐᑕᑐᖅ ᐃᓚᐅᖏᓐᓇᓚᖓᓕᕐᑎᓗᒍ ᐃᒡᓗᔪᐊᖁᑎᒥᓂᒃ ᐊᑦᓯᑦᔩᖏᓐᓂᓕᒫᒥᓂ ᐊᒻᒪᓗ ᑯᐯᒃᑯᑦ ᐃᑯᒪᓕᐅᕈᑎᓕᕆᔨᖏᓐᓂᑦ ᐊᒡᓚᖁᑎᒥᓂᒃ ᐊᓯᑦᔩᖏᓐᓂᓕᒫᒥᓂ. ᐊᓱᐃᓛᓕ ᐊᓯᑦᔩᓂᕈᑎᒃ ᐊᓯᖏᓐᓂᒃ ᐱᒐᓱᒍᑎᓂᒃ ᐊᓪᓚᓯᒪᔪᖕᖑᐃᒋᐊᓪᓚᒋᐊᖃᓯᒐᔭᕐᐳᑦ ᐃᑲᔪᕐᓯᔭᐅᒍᑎᓂᒃ ᐱᒍᓐᓇᑎᑕᐅᒋᐊᓪᓚᒍᑎᑦᓴᒥᓂᒃ.
ᐃᐆᕆᐅ ᐅᖃᕐᑐᖅ ᐃᕐᖃᐅᒪᑦᓯᐊᕆᐊᖃᕐᓂᒥᒃ, ᐊᑐᓂᑦ ᐃᒡᓗᔪᐊᑦ ᐊᓪᓚᖁᑎᖃᕐᑐᓴᐅᒋᐊᖏᑦ. “ᐱᓇᓱᒐᖁᑎᖃᖕᖑᐊᓴᕈᕕᑦ ᑕᒃᒐ ᐃᖏᕐᕋᑎᑦᓯᓗᑎᓪᓗ ᐱᖁᑎᑲᐅᑎᒥᒃ. ᓂᐅᕐᕈᑎᒋᒍᕕᐅᒃ ᐱᓇᓱᒐᖁᑏᑦ, ᓂᐅᕕᕐᑐᕕᓂᖅ ᐱᓇᓱᒐᖁᑎᓐᓂᒃ ᐊᓪᓚᖁᑎᑖᕐᖃᒥᓕᕋᔭᕐᐳᖅ ᑯᐯᒃᑯᑦ ᐃᑯᒪᓕᕆᔨᒃᑯᖏᓐᓂ. ᐊᓪᓚᓯᒪᔪᑎᒍᑦ ᐱᔭᖃᕋᓱᒍᑎᓕᐅᕆᐊᓖᑦ. ᑌᒣᒋᐊᖃᕐᐳᓗ ᐱᑦᔪᑎᒋᓗᒋᑦ ᐱᑐᑦᓯᒪᓂᐅᔪᑦ ᐊᓪᓚᖁᑎᓕᒻᒧᓗ ᐊᒻᒪᓗ ᐃᒡᓗᔪᐊᒥ ᓇᒻᒥᓂᖁᑎᓕᒻᒧᑦ,” ᑌᒣᓕᑦᓱᓂ ᐅᖃᕐᑐᖅ ᐃᐆᕆᐆ.
ᓄᓇᕕᒻᒥ ᐅᕐᓱᐊᓗᐃᑦ ᐊᑭᒋᓚᖓᓕᕐᑕᖏᑦ ᐊᕐᕌᒍᑕᒫᑦ ᐊᑕᐅᓯᕕᑦᓱᑎᒃ ᐅᓄᕐᓂᖏᑦ ᑐᑭᑖᕐᑕᐅᓱᖑᕗᑦ ᓯᑉᑎᒻᐱᕆ 1 ᐅᓪᓗᖓᓂ. ᓄᓇᕕᒻᒥ ᐅᕐᓱᐊᓗᓐᓂᐊᑏᑦ ᐊᓪᓚᓯᒪᔪᖁᑎᖃᕐᑐᑦ ᑭᓇᒃᑯᑦ ᐃᑲᔪᕐᑕᐅᒍᑎᑖᕐᑕᒪᖔᑕ, ᐊᑭᓖᒍᑎᑦᓴᖏᓐᓂᓗ ᑐᓂᔨᕕᒋᓲᕆᕙᖏᑦ ᐃᑲᔪᕐᓯᔭᐅᒍᑏᑦ ᑖᒃᓯᑕᐅᒪᓕᕐᓱᑎᒃ ᐅᓄᕐᓂᖃᕐᑎᓗᒋᑦ. ᑭᓇᐅᔭᑦᓴᔭᓂᒃ ᐊᓪᓚᓯᒪᔪᓕᐅᓱᖑᖕᖏᑐᑦ. ᐅᕐᖁᓯᓴᐅᑎᐅᑉ ᐅᕐᓱᐊᓗᖓ ᐊᑭᖃᕐᐸᑦ, ᐆᑦᑐᑎᒋᓗᒍ, ᐅᓄᕐᓂᓕᓐᓂᒃ $2-ᒥᒃ ᓖᑕᑕᒫᑦ, ᓇᒻᒥᓂᕆᑦᓱᒍ ᐊᓂᕐᕋᓕᒃ ᑮᓇᐅᔭᕐᑐᖏᓐᓂᓴᐅᒍᑎᖃᕋᔭᕐᐳᖅ ᐊᑭᖏᑕ 60%-ᖏᓐᓂᒃ, ᑌᒣᒻᒪᑦ ᐊᑭᓕᒍᑎᑦᓴᓂᒃ ᐊᓪᓚᓯᒪᔪᕐᑕᑎᑕᐅᒐᔭᖕᖏᓚᑦ ᐊᑭᓕᖁᔭᐅᓗᑎᒃ $2-ᒥᒃ ᓖᑕᑕᒫᑦ, ᑭᓯᐊᓂ ᐃᑲᔪᕐᓯᔭᐅᒍᑎᑕᓖᑦ ᐅᓄᕐᓂᖓᓂᒃ ᐊᑭᓖᖁᔭᐅᓗᑎᒃ. ᒪᕐᕈᐃᖑᒻᒥᔫᒃ ᐅᓄᕐᓃᒃ, ᐅᖃᕆᐊᓪᓚᑐᖅ ᐃᐆᕆᐆ ᑐᑭᓯᑎᑦᓯᒍᑎᖃᕐᓱᓂ, ᐊᑦᔨᒌᖕᖏᓂᖏᓐᓂᒃ ᐊᓂᕐᕋᕆᔭᐅᔪᑦ ᐅᓄᕐᓂᖃᕐᑎᑕᐅᒍᑎᖏᑕ ᐊᒻᒪᓗ ᑮᓇᐅᔭᓕᐅᕋᓱᕝᕕᐅᔪᑦ ᐅᓄᕐᓂᖃᕐᑎᑕᐅᒍᑎᖏᑕ ᑐᖕᖓᕕᖃᕐᓱᑎᒃ ᖃᓄᐃᓕᖓᓂᖓᓂᒃ ᐃᒡᓗᔪᐊᖁᑕᐅᔫᑉ (ᐊᓂᕐᕋᐅᒍᓂ ᐅᕝᕙᓘᓐᓃᑦ ᑮᓇᐅᔭᓕᐅᕋᓱᕝᕕᐅᒍᓂ) ᑕᒪᒃᑯᐊ ᐃᓘᓐᓇᑎᒃ ᐱᑐᑦᓯᒪᒻᒪᑕ ᑯᐯᒃᑯᑦ ᐃᑯᒪᓕᕆᔨᖏᑕ ᐊᑭᖃᕐᑎᓯᒍᑎᖏᓐᓄᑦ ᐃᑯᒪᐅᑎᑐᕐᑕᐅᔪᓂᒃ ᑐᖕᖓᕕᖃᕐᓱᑎᒃ ᐊᑕᐅᓯᕐᒥᒃ Kilowatt-ᒥᒃ. ᐊᓂᕐᕋᐅᔪᑦ ᐊᑭᓕᕐᑐᐃᒍᑎᖏᑦ ᐃᑭᓐᓂᓴᐅᔪᑦ ᑮᓇᐅᔭᓕᐅᕋᓱᕝᕕᐅᔪᑦ ᐊᑭᓕᕐᑐᐊᖏᓐᓂᑦ.
1994-ᖑᑎᓪᓗᒍ, ᒪᑭᕝᕕᒃ ᐱᓇᓱᒐᖃᕐᕕᓗ ᐊᒻᒪᓗ ᑯᐯᒃᑯᑦ ᐃᑯᒪᓕᕆᔨᖏᑦ ᐊᖏᖃᑎᒌᒍᑎᖃᓚᐅᕐᓯᒪᕘᒃ ᐃᑯᒪᐅᑎᓂᒃ ᐱᑕᖃᕐᑎᓯᒍᑎᐅᓚᖓᔪᑦ ᐸᕐᓇᑕᐅᒍᑎᖏᓐᓂᒃ ᐃᑲᔪᕐᓯᓂᖃᕐᓂᐊᓕᕐᓱᑎᒃ ᐅᕐᓱᐊᓗᐃᒃ ᐊᑭᓕᕐᑐᑕᐅᒍᑎᖏᓐᓂᒃ ᓄᓇᕕᒻᒥ, ᐱᔭᖃᕐᓗᑎᒃ, ᓱᓕᔪᒥᒃ, ᐊᑦᔨᒌᓕᕐᑎᕆᒋᐊᕐᓂᖃᕐᓗᑎᒃ, ᐊᑭᐅᔪᓂᓪᓗ ᒥᑦᓯᖓᓅᕆᒋᐊᕐᓗᑎᒃ ᐊᑭᓕᕐᑐᕋᔭᕐᑕᖏᑕ ᐃᑯᒪᓕᐅᕈᑎᓂᒃ ᐊᑐᐃᓐᓇᖃᑦᓯᐊᑐᐊᕈᑎᒃ ᓄᓇᖁᑕᐅᔪᓕᒫᒥ. ᑖᒃᑯᐊ ᐱᓇᓱᒍᑏᑦ ᐱᑕᖃᕐᑎᓯᒍᑎᑕᖃᕐᒥᔪᑦ ᐃᓕᖓᔪᓂᒃ ᓇᒻᒥᓂᓖᑦ ᓯᖁᒥᓯᒪᔨᐊᖃᕐᑌᓕᓂᖏᓐᓄᓗ ᓯᖁᒥᓯᒪᔪᕐᓂᐊᑕᐅᔨᐊᖃᕐᓂᖏᓐᓄᓗ ᐅᕐᓱᐊᓗᒃᑐᑐᓂᒃ ᐅᕐᖂᓯᓴᐅᑎᒥᓐᓂᒃ ᐃᒪᕐᒥᓗ ᐆᓇᕐᑐᓕᐅᕈᑎᒥᓐᓂᒃ ᐊᑐᕐᑕᐅᔪᓂᒃ ᑮᓇᐅᔭᓕᐅᕋᓱᕝᕕᓄᓪᓗ, ᐱᓇᓱᒐᖃᕐᕕᒪᕆᓐᓄᓗ, ᑲᕙᒪᐅᔪᓪᓗ ᐱᓇᓱᒐᖃᕐᕕᖁᑎᖏᓐᓄᑦ, ᐊᒻᒪᓗ ᓇᒻᒥᓂᖃᕐᓱᑎᒃ ᐊᑭᓕᕐᑐᐃᔪᓄᑦ ᐃᓘᓐᓇᖏᓐᓂ ᐃᓄᑐᐃᓐᓀᑦ ᓄᓇᓕᖏᓐᓂ. ᑖᒃᑯᐊ ᐃᑲᔪᕐᓯᒍᑎᓂᒃ ᐱᓇᓱᒍᑎᖃᕐᓃᑦ ᐊᖏᖃᑎᒌᒍᑎᑕᖏᑦ ᓄᑕᐅᓯᓕᒋᐊᕐᑕᐅᓚᐅᔪᕗᑦ 2010-ᖑᑎᓪᓗᒍ ᐊᓯᑦᔨᐊᐱᑦᑕᐅᓂᖃᓱᑎᒃ. ᑐᑭᓯᒋᐊᒃᑲᓂᕈᒪᔪᑦ ᐅᕗᖓ ᖃᕆᑕᐅᔭᑎᒍᑦ ᑕᑯᒋᐊᕈᓐᓇᐳᑦ: https://www.makivvik.ca/heating-oil-subsidy-program/
