ᒪᑭᕝᕕᑯᑦ ᐊᕐᕌᒍᑕᒫᕐᓯᐅᑎᒥᓂᒃ ᑲᑎᒪᓂᒻᒪᕆᖓ ᑕᕝᕙᓂ ᐊᕐᕌᒍᒥ ᐁᕆᓕ 26-ᒥᑦ 30-ᒧᑦ ᐊᑯᓕᕕᒻᒥ ᐱᒻᒪᕆᐅᓚᐅᔪᕗᖅ ᓄᓇᕕᒻᒥᐅᑦ ᐅᕕᒃᑲᖏᓐᓄᑦ.
ᑐᑭᑖᕈᑎᒃ ᐊᖏᕈᑎᐅᑦᓱᓂ ᐊᓂᒎᑎᑎᑕᐅᓚᐅᔪᖅ ᒪᑭᕝᕕᑯᑦ ᑲᑎᒪᔨᖏᓐᓄᑦ ᓂᕈᐊᕈᓐᓇᖃᑕᐅᖃᑦᑕᓂᐊᓕᕐᑎᓗᒍ ᐅᕕᒃᑫᑦ ᑭᒡᒐᑐᕐᑎᖓ. ᖃᕐᔪᐃᑦ ᐅᕕᒃᑫᑦ ᑲᑎᒪᔨᖏᑦᑕ ᐊᖓᔪᕐᖄᖓ ᑲᑎᒪᔨᓄᑦ ᐃᑦᓯᕙᖃᑕᐅᒍᓐᓇᕋᓗᐊᕐᓱᓂ ᑕᑯᓐᓇᕆᐊᕐᓯᒪᑐᐃᓐᓇᖃᑦᑕᓚᐅᔪᑦᓱᓂ ᑌᒣᓚᖓᒍᓐᓀᑐᖅ. ᖃᕐᔪᐃᑦ ᐊᖓᔪᕐᖄᖓ ᐊᓖᓯᐊ ᐃᖃᓪᓗᖅ ᑲᑎᒪᔨᐅᖃᑕᐅᖏᓐᓈᓚᖓᔪᖅ ᓂᕈᐊᖃᑕᐅᒍᓐᓇᓂᖃᓕᕐᓗᓂ ᐊᒻᒪᓗ ᑖᑦᓱᒥᖓ ᐃᓂᖃᑦᓭᓇᓚᖓᑦᓱᓂ ᒪᑭᕝᕕᑯᑦ ᐊᕐᕌᒍᑕᒫᕐᓯᐅᑎᒥᓂᒃ ᑲᑎᒪᓂᒻᒪᕆᖃᖕᖏᓂᓕᒫᖏᓐᓂ, ᐅᕕᒃᑲᓂᒃ ᓄᑖᖅ ᑭᒡᒐᑐᕐᑎᐅᓚᖓᔪᖅ ᓇᓗᓀᕐᑕᐅᒋᐊᖃᓕᕐᒥᐸᑦ.
ᐊᓕᐊᓲᖕᖒᒥᔭᕐᓇᑐᖅ ᐊᒻᒪᓗ ᓂᕈᐊᕈᓐᓇᓂᖃᕐᓗᓂ ᐃᑦᓯᕙᐅᑕᖃᓚᖓᓕᕆᐊᒥᒃ ᒪᑭᕝᕕᑯᓐᓂ. ᐅᖃᐅᓯᑦᓴᕗᑦ ᑐᓴᕐᑕᐅᒍᓗᑐᐃᓐᓇᖃᑦᑕᓂᐊᕈᓐᓀᑐᑦ ᐃᓱᒪᑦᓴᓯᐅᕈᑕ-ᐅᖃᑦᑕᓚᖓᓕᕐᒪᑕ ᓱᓇᑐᐃᓐᓀᑦ ᐅᖃᐅᓯᑦᓴᕗᑦ ᑲᑎᒪᔩᑦ ᑐᑭᑖᕈᑎᖃᒐᓱ-ᐊᓕᑐᐊᕐᐸᑕ, ᐊᓕᐊᑉᐳᖓ ᒪᑭᕝᕕᑯᑦ ᓴᐳᒻᒥᖏᓐᓇᓕᒫᓱᒍᒻᒪᑕ ᖃᕐᔪᐃᑦ ᐅᕕᒃᑫᑦ ᑲᑎᒪᔨᖏᓐᓂᒃ ᐊᒻᒪᓗ ᑕᒪᓐᓇ ᐱᒋᐊᕐᕕᓕᐅᑎᑐᐃᓐᓇᐅᖁᓇᕐᑐᖅ ᐊᓯᖏᐊᓪᓛᑦ ᑎᒥᐅᔪᐃᑦ ᓂᕈᐊᖃᑕᐅᒍᓐᓇᑎᑦᓯᓗᑎᒃ ᐃᑦᓯᕙᐅᑕᖃᕐᕕᐅᖁᓇᕐᑐᖅ ᐅᕕᒃᑫᑦ ᐃᓚᒋᔭᐅᒍᓐᓇᓯᐊᕐᑎᓗᒋᑦ,” ᑌᒣᓕᑦᓱᓂ ᐊᓖᓯᐊ ᐃᖃᓗᒃ ᐅᖃᓚᐅᔪᖅ.
ᐊᓯᐊ ᑐᑭᑖᕈᑎᒃ ᐊᓂᒎᑎᑎᑕᐅᓚᐅᔪᒻᒥᔪᖅ ᐃᓄᐃᑦ ᓯᓵᓯᐱᒥᐅᑦ ᐃᓄᑦᑎᑐᑦ ᐅᖄᑦᓯᐊᖃᔭᖕᖏᑲᓗᐊᕈᑎᒃ ᑎᒃᑯᐊᑕᐅᒍᓐᓇᖃᑦᑕᓚᖓᓕᕐᑎᓗᒋᑦ ᒪᑭᕝᕕᑯᓐᓂ ᑲᑎᒪᔨᐅᓂᕐᒧᑦ ᓯᓵᓯᐱᒥᐅᓂᒃ ᑭᒡᒐᑐᕈᓐᓇᓗᑎᒃ. ᑕᒪᓐᓇ ᐊᑐᕐᓂᖃᓛᕐᑐᖅ 2021 ᐊᕐᕌᒍᖓᓂᑦ 2027 ᐊᕐᕌᒍᖓᓄᑦ ᑎᑭᓪᓗᒍ.
ᐊᕐᕌᒍᑕᒫᕐᓯᐅᑎᒥᒃ ᑲᑎᒪᓂᒻᒪᕆᖃᓚᐅᔪᒐᓗᐊᕐᑎᓗᒋᑦ ᑕᒃᑯᒨᑦ, ᐊᑯᓕᕕᐅᑉ ᐃᙯᓕᓴᕐᕕᖓᓂ 50 ᐃᓄᐃᑦ ᑭᓯᐊᓂ ᑖᕙᓃᒍᓐᓇᓚᐅᔪᑦ ᐃᓚᐅᔪᐃᑦ. ᖃᓂᒪᓇᕐᒥᒃ ᑰᕕᑦ-19ᒍᓂᕋᕐᑕᐅᔪᒥᒃ ᓯᐊᒻᒪᑎᑦᓯᑌᓕᒐᓱᐊᒧᑦ ᓄᓇᓕᓕᒫᓄᑦ, ᒪᑭᕝᕕᒃᑯᑦ ᖃᓪᓗᓈᓂ ᐱᓇᓱᑦᑎᖏᑦ ᐅᖄᓚᐅᑎᑎᒍᑦ ᑲᑎᒪᓂᒻᒪᕆᒻᒧᑦ ᐃᓚᐅᒍᓐᓇᑎᑕᐅᓚᐅᔪᒻᒥᔪᑦ.
ᖃᐅᔨᒐᓱᐊᕆᐊᑦᓯᐊᕈᒪᔪᐃᑦ ᑐᑭᑖᕈᑎᕕᓃᑦ ᒥᑦᓵᓄᑦ ᐊᓂᑑᑎᑕᐅᓚᐅᔪᓂᒃ ᐊᒻᒪᓗ ᐊᓪᓚᕖᑦ ᑐᓴᕐᑎᓯᐅᑎᓕᐊᕕᓂᖏᑦᑕ ᐃᓘᓐᓇᖏᓐᓂᒃ ᑕᑯᒐᓱᐊᕐᕕᖃᖁᓐᓇᑐᑦ ᒪᑭᕝᕕᐅᑉ ᖃᕆᑕᔭᒥᑦᑎᐊᖏᓐᓂᒃ ᐅᕗᖓ ᑕᑯᒐᓱᐊᕐᓗᑎᒃ: https://www.makivvik.ca/2021-makivik-agm/.
