ᐊᓪᓚᑕᕕᓂᖏᑦ Stephen Hendrie
ᓯᓚᕐᔪᐊᒥᐅᒍᖃᑎᒌᑦ ᑭᒡᒐᑐᕐᑎᖏᑦ ᐱᖓᓱᓂᒃ ᑲᑎᒪᓂᒻᒪᕆᖃᖃᑦᑕᓚᐅᔪᒻᒪᑕ ᓄᓇᕐᔪᐊᒥᐅᒍᖃᑎᒌᑦ ᑲᑎᒪᑎᑦᓯᑎᓪᓗᒋᑦ ᑲᑎᒪᒋᐊᕐᑐᓯᒪᖃᑕᐅᓚᐅᔪᕗᑦ ᓄᓇᕕᒻᒥᐅᑦ ᐃᓄᐃᑦ ᐅᑭᐊᑦᓴᒥ 2022-ᒥ. ᐅᑯᐊᑕᒐ ᑲᑎᒪᓂᐅᖃᑦᑕᓚᐅᔫᑦ COP27 ᓯᓚᕐᔪᐊᒥ ᓯᓚᐅᑉ ᐊᓯᑦᔨᕙᓪᓕᐊᓂᖓᓂᒃ ᑲᑎᒪᓂᕐᔪᐊᖅ Sharm El-Sheikh, Egypt-ᒦᑦᓱᑎᒃ, ᐊᒻᒪᓗ ᑲᑎᒪᓂᕐᔪᐊᖅ COP15 ᐊᓂᕐᑎᕆᔪᓕᒫᑦ ᓇᔪᓲᖏᓪᓗ ᐱᑦᓱᒋᑦ ᒪᓐᑐᕆᐊᓪᒦᑦᓱᑎᒃ, ᐊᒻᒪᓗ ᑲᑎᒪᓂᕐᔪᐊᖅ COP19 ᓯᓚᕐᔪᐊᒥᐅᒍᖃᑎᒌᑦ ᑕᐅᕐᓰᖃᑦᑕᐅᑎᓂᖓ ᐆᒪᔪᑦ ᐊᑦᑕᓇᕐᑐᒦᓐᓂᕋᕐᑕᐅᔪᑦ ᐱᓪᓗᒋᑦ (CITES) Panama-ᒦᑦᓱᑎᒃ.
ᐋᑕᒥ ᑎᓖᓪ ᐊᓚᑯ, ᒪᑭᕝᕕᐅᑉ ᐊᖓᔪᕐᖄᖓᑕ ᑐᖓᓕᖓ ᑲᒪᒋᔭᑦᓴᖃᓲᖅ ᐊᓪᓚᕕᒻᒥᒃ ᐊᕙᑎᓕᕆᓂᕐᒧᑦ, ᐆᒪᔪᓕᕆᓂᕐᒧᑦ, ᖃᐅᔨᓴᕐᓂᒧᓪᓗ (DEWR), ᑲᑎᒪᒋᐊᕐᑐᓯᒪᖃᑕᐅᓚᐅᔪᕗᖅ ᐅᓪᓗᓂ ᐃᓓᓐᓇᖏᓐᓂ ᑲᑎᒪᓂᕐᔪᐊᒧᑦ COP27 Egyptᒦᑦᓱᑎᒃ, ᐊᒻᒪᓗ ᑲᑎᒪᓂᕐᔪᐊᒧᑦ COP15 ᒪᓐᑐᕆᐊᓪᒦᑦᓱᑎᒃ. Egyptᒥ ᐊᒥᓲᓚᐅᔪᕗᑦ ᐃᓄᓐᓂᒃ ᑭᒡᒐᑐᕐᑏᑦ ᓯᕗᓕᕐᑎᓗᒋᑦ ᐃᓄᐃᑦ ᐅᑭᐅᕐᑕᑐᕐᒥᐅᒍᖃᑎᒌᑦ ᑲᑎᒪᔨᖏᑦ (ICC). ᓄᓇᕕᒻᒥᐅᑦ ᑕᑯᓐᓇᕈᓯᖏᓐᓂᒃ ᑐᓴᕐᑕᐅᑎᑦᓯᓚᐅᔪᕗᖅ ᐊᒥᓱᒻᒪᕆᓐᓄᑦ ᑲᑎᒪᒋᐊᕐᓯᒪᔪᓄᑦ, 190 ᐅᖓᑖᓅᓚᐅᔪᒻᒪᑕ ᓄᓇᕐᔪᐊᒥᐅᓂᒃ ᑭᒡᒐᑐᕐᑐᑦ, Egyptᒥᐅᑦ ᓄᓇᖓᓃᑦᑐᒥ ᐃᓄᒋᐊᑦᑑᖏᑦᑐᒥ ᓯᑦᔭᖓᓂ ᑕᕆᐅᑉ Red Sea, ᓯᐅᕋᑐᐃᓐᓇᒧᑦ ᐊᕙᓗᔭᐅᒪᔪᒥ. Sharm El-Sheikh ᑐᑭᓕᒃ “ᓯᓚᑐᔪᑦ ᑲᖏᕐᓱᖓ,” ᑌᔭᐅᒍᓯᖃᕐᒥᓱᓂ “ᓭᒪᓇᕐᑐᑕᓕᒃ ᓄᓇ.”
“ᓄᓇᕕᒻᒥ, ᓄᓇᐅᑉ ᐊᐅᔪᐃᑦᑐᑕᖓ ᐊᐅᑉᐸᓕᐊᔪᖅ. ᓯᑑᑉᐸᓕᕐᑐᑦ ᒪᕐᕋᑕᖃᕐᓂᖏᑦ ᓄᓀᑦ. ᒪᙯᒋᐊᓯᒐᑦᑕ ᐊᕐᖁᓯᓂᕆᓲᕗᑦ ᖁᐊᓲᒍᒍᓐᓀᒪᑕ, ᒪᙯᕝᕕᒋᓲᕆᓯᒪᔭᑦᑎᓄᑦ ᑎᑭᐅᑎᒍᓐᓇᓲᒍᒍᓐᓀᑐᒍᑦ. ᐅᑭᐊᑦᓴᒥ ᐅᐱᕐᖓᓴᒥᓪᓗ, ᐊᐅᑦᓴᐅᑎᒋᓲᒍᓕᕐᑐᑦ. ᓯᑯᒥᒃ ᐊᕐᖁᓯᓂᖃᓪᓚᕆᒐᑦᑕ, ᐊᐳᑎᒥᓪᓗ ᐊᕐᖁᓯᓂᖃᕐᓱᑕ, ᑌᒣᒻᒪᑦ ᒪᙯᕝᕕᒋᓲᑦᑎᓄᑦ ᑎᑭᐅᑎᒍᓐᓇᓲᒍᒍᓐᓀᕙᓪᓕᐊᔪᒍᑦ. ᓱᕐᕃᓂᖃᕐᓯᒪᔪᖅ ᓂᕿᑦᓴᖃᑦᓯᐊᕆᐊᖃᕐᓂᑎᓐᓂᒃ,” ᐋᑕᒥ ᐅᖃᕐᑐᕕᓂᖅ, ᐃᓓᒋᐊᕐᒥᓱᓂᓗ ᐅᖃᕐᑕᒥᓂᒃ Egyptᒥᐅᒎᑦ ᐃᓚᖏᑦ ᐊᐳᑎᒥᒃ ᑕᑯᓚᐅᕐᓯᒪᖕᖏᓂᕋᕐᓱᒋᑦ. “ᑐᑭᓯᑎᑦᓯᒐᓱᐊᕐᑐᖃᓕᕋᒥ ᓇᓄᖃᓲᒍᒋᐊᖓᓂᒃ, ᑕᑕᒥᐅᒪᖃᑦᑕᓚᐅᔫᑦ, ᑌᒣᒻᒪᑦ ᐊᑦᔨᒌᖕᖏᓚᕆᑦᑐᓂᒃ ᓯᓚᕐᔪᐊᒥᐅᒍᖃᑎᒌᓂᒃ ᑖᕙᓃᑦᑐᖃᖃᑦᑕᓚᐅᔪᕗᖅ.”
ᐃᓄᐃᑦ ᐅᑭᐅᕐᑕᑐᕐᒥᐅᒍᖃᑎᒌᑦ ᑲᑎᒪᔨᖏᑦ ᑭᒡᒐᑐᕐᑎᑕᖃᕐᓂᕆᕗᑦ ᓯᓚᕐᔪᐊᒥᐅᓕᒫᓂᒃ ᑭᒡᒐᑐᕐᓱᓂ ᑐᑭᒧᐊᑦᑎᓯᔨᒥᒃ Sara Olsvigᒥᒃ ᑲᓛᓰᑦ ᓄᓇᖓᓂᒥᐅᒥᒃ, ᓖᓴ ᖁᐱᕐᕈᐊᓗᒻᒥᓗ ᑲᓇᑕᒥᐅᑦ ᐃᓄᐃᑦ ᐅᑭᐅᕐᑕᑐᕐᒥᐅᒍᖃᑎᒌᑦ ᑲᑎᒪᔨᖏᑦᑕ ᐊᖓᔪᕐᖄᖓᓂᒃ, ᐳᕕᕐᓂᑐᕐᒥᐅᒥᒃ. ᐊᖓᔪᕐᖄᖓ ᖃᕐᔪᐃᑦ ᐅᕕᒐᕐᑐᐃᑦ ᑲᑎᒪᔨᖏᑦᑕ, ᓵᓇᓯ ᐹᓴᓐᔅ, ᑲᑎᒪᔪᓃᒻᒥᑎᓪᓗᒍ. ᓄᓇᕘᕐᒥᐅᑦ ᐃᓄᒻᒪᕆᖓ ᐃᓕᕐᖁᓯᓕᕆᓂᕐᒥᓗ ᐃᒫᙰᓚᔨᐅᑦᓱᓂ ᐱᑕ ᐃᕐᓂᖅ ᑭᒡᒐᑐᕐᑎᓚᕆᒋᔭᐅᓐᓂᒥᑎᓪᓗᒍ.
Iᐃᓄᐃᑦ ᐅᑭᐅᕐᑕᑐᕐᒥᐅᒍᖃᑎᒌᑦ ᑲᑎᒪᔨᖏᑦ ᑐᓴᕋᑦᓴᓕᐅᕐᓯᒪᓚᐅᔪᕗᑦ ᑲᑎᒪᓂᕐᔪᐊᒥ COP27 ᓄᐃᑕᐅᔪᕕᓂᕐᓂᒃ ᑐᑭᓯᔭᐅᑎᑦᓯᓱᑎᒃ “ᐱᕙᓪᓕᐊᓴᓕᕐᖁᒍᑦ, ᐱᒋᐊᑦᓯᐊᕆᐊᖃᓯᒋᕗᒍᑦ.” ᐅᓪᓘᓂᒃ ᒪᕐᕈᑐᕆᐊᓪᓚᕆᐊᖃᕐᓂᕃᓚᐅᔪᕗᑦ, ᑭᓯᐊᓂ ᑲᑎᒪᓂᖅ ᓄᐃᑦᓯᒍᑕᐅᒻᒥᓱᓂ ᐊᖏᖃᑎᒌᒍᑎᓕᐊᕆᔭᐅᔪᒥᒃ ᓄᐃᑦᓯᒍᑎᑦᓴᒥᒃ ᐊᓯᐅᔨᔭᐅᔪᖃᕐᐸᑦ ᓱᒃᑯᑕᐅᔪᖃᕐᐸᓗ ᑮᓇᐅᔭᖃᕐᑎᑕᐅᒍᑎᑦᓴᓄᑦ ᓯᓚᕐᔪᐊᒥᐅᑦ ᐊᑦᑕᓇᕐᓯᓂᐅᔭᕐᓂᐹᑦ ᐅᑎᕐᑎᓯᕕᐅᖃᑦᑕᕋᔭᕐᑎᓗᒋᑦ ᐊᓯᐅᔨᓯᒪᒍᑎᒃ ᓯᓚᕐᔪᐊᒥ ᓯᓚᐅᑉ ᐊᓯᑦᔨᕙᓪᓕᐊᓂᖓᑕ ᐱᔮᓄᑦ.
“ᐊᓯᐅᔨᔭᐅᓯᒪᔪᓂᒃ ᓱᒃᑯᑕᐅᓯᒪᔪᓂᓪᓗ ᐊᑭᓖᒍᑎᑦᓴᐅᓗᑎᒃ ᑮᓇᐅᔭᖃᕐᑎᓯᒍᑎᑦᓭᑦ ᐊᓪᓗᕆᐊᕐᓂᐅᕗᑦ ᓯᓚᕐᔪᐊᒥ ᓯᓚᐅᑉ ᐊᓯᑦᔨᕙᓪᓕᐊᓂᖓᓄᑦ ᓱᕐᕋᑕᐅᓯᒪᔪᑦ ᑐᑭᑖᕈᑕᐅᓯᒪᑦᓯᐊᖃᑦᑕᖁᑦᓱᒋᑦ. ᑮᓇᐅᔭᖃᑎᑕᐅᖃᑦᑕᓯᒍᑦᑕ, ᐃᑉᐱᒍᓱᑦᓯᐊᓛᕐᖁᒍᑦ ᐃᓄᐃᑦ, ᓱᕐᕋᑕᐅᓯᒪᓂᕐᐹᒍᓯᒪᔪᑦ ᓯᓚᕐᔪᐊᒥ ᓯᓚᐅᑉ ᐊᓯᑦᔨᕙᓪᓕᐊᓂᖓᓄᑦ ᐅᑭᐅᒐᓵᓗᓐᓂ, ᐊᑦᔨᒌᑦᓯᐊᒥᒃ ᐊᑐᐃᓐᓇᖃᕐᑎᑕᐅᑦᓯᐊᓛᕐᒪᖔᑕ ᑮᓇᐅᔭᖃᕐᑎᑕᐅᒍᑎᓂᒃ,” ᐅᖃᕐᑐᕕᓂᖅ Sara Olsvig. “ᐅᐃᒪᓇᕐᑐᒪᕆᐅᓕᕐᑎᓗᒍ ᓯᓚᕐᔪᐊᒥ ᓯᓚᐅᑉ ᐊᓯᑦᔨᕙᓪᓕᐊᓂᖓ ᓯᓚᕐᓂᓗᓲᒻᒪᕆᐅᓕᕐᑎᓗᒍᓗ, ᐱᓇᓱᖃᑎᒌᑦᑐᑦ ᐊᖏᖃᑎᒌᒍᓐᓇᓯᒪᖕᖏᓚᑦ ᐅᖃᐅᓯᐅᓪᓚᕆᒋᐊᖃᕐᓂᖓᓂᒃ ᐅᕐᓱᐊᓘᑉ.”
“ᐊᓯᖏᑦ ᐃᓱᒫᓘᑎᐅᖃᑦᑕᒥᔪᑦ ᐃᓄᓐᓄᑦ ᑭᖑᓪᓕᐹᒥ Sharm El-Sheikh ᐊᖏᖃᑎᒌᒍᑎᒦᑦᑐᑦ ᐱᑕᖃᑦᓯᐊᖏᓐᓂᓴᐅᖃᑦᑕᒪᑕ ᓄᓇᓕᑐᖃᕐᓅᓕᖓᔪᓂᒃ ᐊᒻᒪᓗ ᐃᓅᖃᑎᒌᑦ ᐱᒍᓐᓇᐅᑎᖏᓐᓅᓕᖓᔪᓂᒃ ᐱᑕᖃᕐᓂᓴᐅᓯᒪᑎᓪᓗᒋᑦ 2021ᒥ ᑲᑎᒪᓂᕐᔪᐊᒥ COP26 ᐅᖃᐅᓯᐅᓯᒪᔪᓂ Glasgowᒥ,” ᐅᖃᕐᑐᕕᓂᖅ Sara Olsvig “ᐅᕝᕙᓘᓐᓃᑦ ᐳᔪᕐᓗᓂᒃ ᐃᑯᓪᓚᑎᑦᓯᒐᓱᐊᕈᒪᓂᐅᒋᐊᓖᑦ ᓯᓚᕐᔪᐊᒥ ᐆᕐᖁᓂᖓᑕ 1.5ᑕᒦᑦᑎᓭᓐᓇᕙᓪᓗᕋᓱᐊᕈᒪᑦᓱᒍ ᐅᕐᖂᓗᐊᖕᖏᓂᕐᓴᐅᓗᓂᓘᓐᓃᑦ.” “ᐃᓅᖃᑎᒌᑦ ᐱᒍᓐᓇᐅᑎᖃᕐᓂᖓ ᐅᖃᐅᓯᐅᓪᓗᐊᓂᖕᖏᓂᖓ ᐃᓱᒫᓗᓐᓇᑐᓪᓚᕆᐅᒋᕗᖅ,” ᐅᖃᕐᑐᕕᓂᖅ ᓖᓴ ᖁᐱᕐᕈᐊᓗᒃ, ᐊᖓᔪᕐᖄᖅ ᐃᓄᐃᑦ ᐅᑭᐅᕐᑕᑐᕐᒥᐅᒍᖃᑎᒌᑦ ᑲᑎᒪᔨᖏᓐᓄᑦ ᑲᓇᑕᒥ. “ᐃᓅᖃᑎᒌᑦ ᐱᒍᓐᓇᐅᑎᖃᕐᓂᖓ ᐅᖃᕐᑕᐅᖃᑦᑕᑐᕕᓂᐅᒐᓗᐊᕐᓱᓂ COP27 ᑲᑎᒪᓂᕐᔪᐊᒥ, ᐅᖃᐅᓯᐅᒋᐊᓪᓚᕆᐊᖃᓯᒻᒥᓱᑎᒃ ᐊᕐᕌᓂ ᐅᖃᐅᓯᐅᖃᑦᑕᑐᕕᓃᒃ ᑲᑎᒪᓂᕐᒥ Glasgow Pact ᐱᑕᖃᕈᓐᓀᒪᑕ, ᑐᑭᓯᒍᑕᐅᑦᓱᓂᓗ ᐃᓅᖃᑎᒌᑦ ᐱᒍᓐᓇᐅᑎᖃᕐᓂᖓ ᑐᖕᖓᕕᐅᑎᑕᐅᖕᖏᑑᒋᐊᖓᓂᒃ ᓄᓇᕐᔪᐊᓃᑦᑐᓄᑦ, ᓲᑭᐊᒍᒐᓗᐊᖅ.”
“ᐱᕙᓪᓕᐊᓴᓕᕐᖁᒍᑦ, ᐱᒋᐊᑦᓯᐊᕆᐊᖃᓯᒋᕗᒍᑦ.” ᖁᐱᕐᕈᐊᓗᒃ ᐃᓓᒋᐊᕐᓂᖁᖅ. “ᕿᓯᐊᓂ ᓴᐱᓕᖃᑦᑕᖏᑦᑐᒍᑦ.
ᑲᑎᒪᓂᕐᔪᐊᒥ COP 27, ᐃᓄᐃᑦ ᑐᑭᖃᑦᓯᐊᓚᕆᑦᑐᓂᒃ ᐊᓪᓚᑐᕕᓂᐅᓚᐅᔪᕗᑦ ᑕᓪᓕᒪᓂᒃ ᐅᓐᓂᑑᑎᒋᔭᒥᓂᒃ ᐃᓄᐃᑦ ᕿᓄᒍᑎᖏᓐᓂᒃ ᓯᓚᕐᔪᐊᓕᒫᒥ ᓯᕗᓕᕐᑎᓄᑦ, ᖃᐅᔨᓴᕐᑎᒪᕆᓐᓄᑦ, ᓇᒻᒥᓂᕆᔭᐅᑦᓱᑎᒃ ᐱᓇᓱᕝᕕᒪᕆᓐᓄᑦ ᐊᓯᖏᓐᓄᓗ.
ᑎᓖᓪ ᐊᓚᑯ ᑐᑭᓯᓇᕐᑎᓯᓚᐅᔪᕗᖅ ᐊᑑᑎᓯᒪᔭᒥᓂᒃ Egyptᒦᑦᓱᑎᒃ ᓱᓇᓕᒫᓂᒃ ᐅᖄᔪᖃᖃᑦᑕᕈᓐᓇᑎᓪᓗᒍ. ᐊᕐᕌᒎᓐᓂ ᒪᕐᕉᓂ ᖃᓂᒪᓇᖃᓚᐅᔪᑎᓪᓗᒍ ᓯᓚᕐᔪᐊᓕᒫᒥ, ᐃᓄᐃᑦ ᑲᑎᖃᑦᑕᓕᓚᐅᔪᕗᑦ ᐅᓄᕐᑐᒪᕆᐅᖃᑦᑕᓱᑎᒃ ᓂᓐᓂᐅᕋᓚᐅᑎᖃᑦᑕᓕᕐᓱᑎᒃ, ᖃᐅᔨᓴᕐᑕᐅᔪᐃᑦᑑᓱᑎᒃ, ᖃᓄᕐᓗᓃᑦ ᒪᓕᒐᖃᕐᑎᑕᐅᒍᓐᓀᓱᑎᒃ. “ᐅᕐᖂᔪᐊᓗᒻᒦᓱᑕ ᖃᓄᕐᓕᑭᐊᖅ ᐊᓐᓇᓂᕐᖁᖓ. ᐅᓪᓗᑕᒫᑦ 2930 degrees ᐅᕐᖂᓂᖃᖃᑦᑕᓚᐅᔫᖅ. ᐸᓂᕐᓇᑐᒻᒪᕆᐅᑦᓱᓂ ᐸᕐᖄᓂᖓ. ᓇᓂᓕᒫᑦᓯᐊᖅ ᐊᓄᕆᐅᑎᖃᕐᓱᓂ.”
ᒥᑦᓴᐅᓵᕐᓱᒋᑦ 35,000ᒦᓚᐅᔪᕗᑦ ᑎᓕᔭᐅᓯᒪᔪᑦ ᑲᑎᒪᓂᕐᔪᐊᒧᑦ COP27. ᓱᑎᑦᓯᕖᑦ ᓂᕈᑐᔪᐊᓘᖃᑦᑕᓚᐅᔪᕗᑦ 15,000ᓄᑦ ᓇᔪᕐᑕᐅᖃᑦᑕᓱᑎᒃ. ᐃᓄᐃᑦ ᓄᓇᓕᑐᖃᕐᓄᑦ ᓇᔪᕋᑦᓴᓕᐊᕕᓂᕐᒦᕙᓪᓗᖃᑦᑕᓚᐅᔪᕗᑦ, ᑭᓇᑐᐃᓐᓇᑯᓐᓄᑦ ᐁᕕᐅᒍᓐᓇᓯᐊᕐᑐᒥ. “ᓂᐸᓕᔭᕐᕕᐅᔪᓪᓚᕆᐊᓗᒻᒥ,” ᐋᑕᒥ ᐅᖃᕐᑐᖅ. “ᑌᑯᖕᖓᕋᒪ ᓂᐸᕆᑦᓯᓱᖓ ᐅᖄᒋᐊᕐᑐᖃᑦᑕᓚᐅᔪᕗᖓ, ‘ᖃᓄᐃᑉᐱᓰ ?’ ᑐᓴᕐᑕᐅᒐᓱᐊᕐᓱᖓ ᐃᓄᓐᓄᑦ. ᓂᐸᕆᓐᓂᓴᐅᒋᐊᖃᕐᓇᓚᐅᔪᒻᒪᑦ ᐊᓯᒃᑲᓂᑦ.”
ᐃᓱᒪᑦᓴᓯᐅᕈᑎᖃᑦᓯᐊᓯᒪᓐᓂᖁᖅ ᑭᖑᓂᕐᒥ ᐊᔪᐃᓐᓇᕈᑕᐅᓪᓚᕆᑦᓯᒪᒐᓗᐊᕐᑎᓗᒋᑦ, ᒪᑯᐊ Kyoto Protocol 1997ᒥ, Parisᒥᐅᓂᒃ ᐊᖏᖃᑎᖃᕈᑕᐅᓯᒪᔪᖅ 2015ᒥ, ᐱᕙᓪᓕᐊᔭᐅᓯᒪᔪᕐᓗ Glasgowᒥ ᑲᑎᒪᓂᕐᔪᐊᒥ COP26, ᓄᓇᕐᔪᐊᒥᐅᒍᖃᑎᒋᔭᐅᓪᓚᕆᑦᑐᑦ ᑲᑎᒪᓂᕐᔪᐊᓕᐊᕐᓯᒪᖃᑕᐅᓐᓂᖕᖏᒪᑕ COP27, Russiaᒥᐅᓪᓗ ᐅᓇᑕᖃᑎᖃᕐᓱᑎᒃ Ukraineᒥᐅᓂᒃ. “ᐱᔭᕆᐊᑐᔪᒻᒪᕆᒃ ᓯᓚᕐᔪᐊᒥᐅᓕᒫᑦ ᐊᑕᐅᑦᓯᑯᑦ ᐱᓇᓱᖃᑎᒌᒍᑎᖃᕈᓐᓇᖏᑦᑑᓂᖓ.”
ᑕᒪᓐᓇ ᐃᓱᒪᒋᑦᓱᒍ, ᐅᖃᕐᑐᕕᓂᖅ ᓄᓇᓕᓐᓂ ᓄᓇᓕᓕᒫᓂᓪᓗ, ᓄᓇᕕᒻᒥ, ᓯᕐᓛᐱᐅᓐᓃᑦ ᐊᓪᓗᕆᐊᕈᑎᖃᕐᓂᐅᑉ ᐃᑲᔪᕐᓯᒍᓐᓇᓂᖓᓂᒃ. “ᐱᒋᐊᕐᑎᑕᐅᔪᑦ ᒥᑭᔪᐊᐱᐅᒐᓗᐊᕐᐸᑕ, ᑲᑎᒪᓂᕐᔪᐊᒥᓪᓗ COP ᑐᑭᓯᔭᐅᑎᑦᓯᓚᐅᔪᑦᓱᖓ ᐃᒫᒃ, ‘ᐱᐅᑦᓴᓵᕐᑕᐅᖃᑦᑕᓚᐅᔪᒐᑦᑕ ᓂᐅᕕᖁᔭᐅᓂᑦᑎᓄᑦ ᐊᖏᔪᕐᓚᐅᑎᓂᒃ ᐊᓄᕆᒥᑦ ᐃᑯᒪᐅᑎᑦᓴᓕᐅᕈᑎᑦᓴᓂᒃ, ᐱᔭᕆᐊᑐᔪᐊᓗᓐᓂᓗ ᐱᓇᓱᒍᓯᐅᒍᓐᓇᑐᓂᒃ ᐱᐅᑦᓴᓵᕐᑕᐅᓱᑕ, ᒥᑭᓂᕐᓴᓂᓪᓘᓃᓪᓕ ᐊᓪᓗᕆᐊᕈᑎᖃᕐᖄᓴᕈᑦᑕ ?’ ᐃᓄᓕᒫᑦ ᐃᓪᓗᐊᐱᖃᓲᑦ ᒪᙯᕐᕕᒥᓐᓃᑐᓂᒃ ᒥᑭᔪᖕᖑᐊᒥᒃ ᐊᓄᕆᒧᑦ ᐃᑯᒪᐅᑎᓕᐅᕐᕕᓴᖃᕈᑎᒃ ᒥᑭᔪᖕᖑᐊᒥᓪᓗ ᓯᕿᓂᕐᒥᑦ ᐃᑯᒪᐅᑎᓕᐅᕐᕕᓴᑲᕈᑎᒃ ᑐᕃᓐᓇᑐᒥᒃ, ᐃᑯᒪᐅᑎᒥᑕ ᐃᑯᒪᓕᐅᕈᑎᑦᓴᖓᓂᒃ. ᐅᕐᓱᐊᓗᑦᑐᖏᑦᑑᑫᓐᓇᕈᑎᑦᓴᖓᓂᒃ ᐃᑯᒪᐅᑎᓕᐅᕈᑏᑦ, ᒥᑭᔪᐊᐱᐅᒐᓗᐊᕐᐸᑦ ᐃᑲᔪᕐᓯᓚᕆᒍᓐᓇᑎᓪᓗᒍ.”
ᐊᓯᖏᓐᓂᒃ ᐆᑦᑐᕋᐅᑎᖃᕐᓂᒥᔪᖅ, ᐅᕐᓱᐊᓗᑦᑐᓗᐊᖕᖏᓂᕐᓴᒥᒃ ᐊᐅᓚᐅᑎᓕᓐᓂᒃ (four-stroke) ᓯᑭᑑᖃᕋᔭᕈᑦᑕ, ᓂᓪᓕᕈᑎᖃᕐᒥᓱᓂᓗ ᐃᓄᒃᔪᐊᒦᑦᑐᒥᒃ ᑰᖓ ᓯᒥᑦᑕᐅᑎᓪᓗᒍ ᐃᑯᒪᐅᑎᑦᓴᓕᐅᕈᑎᑦᓴᒥᒃ ᐸᕐᖄᕈᑎᐅᑉ ᐅᕐᓱᐊᓗᖓ diesel ᐊᑐᕐᑕᐅᖏᓐᓂᓴᐅᓕᕋᔭᕐᒪᑦ ᐃᓄᒃᔪᐊᒥᐅᓄᑦ, ᐃᑯᒪᐅᑎᒨᕐᑐᓂᓪᓗ ᓄᓇᒃᑰᔫᖃᕈᓐᓇᓯᒐᔭᕐᓱᑎᒃ ᓯᑭᑑᖃᕈᓐᓇᓯᒐᔭᕐᓱᑎᓪᓗ ᓄᓇᓕᒥᓂ, ᐱᑦᓴᖑᕆᐊᓪᓚᑐᑦᓴᒥᑦ ᐃᑯᒪᐅᑎᑦᓴᓕᐅᕈᑎᖃᓕᕈᑎᒃ.
ᑕᖅᑭᒥ ᐅᖓᓕᕆᓕᕐᒥᔭᖓᓂ ᒪᓐᑐᕆᐊᓪᒦᑦᓱᑎᒃ, ᐋᑕᒥ ᐊᐅᓚᑦᓯᔨᐅᖃᑎᖏᓪᓗ ᑲᑎᒪᒋᐊᕐᑐᓯᒪᓕᓚᐅᔪᒻᒥᔪᑦ ᑲᑎᒪᓂᕐᔪᐊᒧᑦ Convention on Biodiversity COP15. ᐃᑎᕐᑕᐅᑌᓕᔪᒦᑦᓱᑎᒃ Palais des Congrèsᒥ. ᑌᒣᑦᑐᒦᒐᓗᐊᕐᓱᑎᒃ, ᐊᑭᓂᐊᕆᐊᕐᑐᓯᒪᔪᓄᑦ ᑎᑭᑕᐅᓯᒪᓐᓂᖁᑦ ᑲᓇᑕᐅᑉ ᓯᑦᔭᖓᑕ ᓂᒡᒋᖓᓂᑦ ᐱᓯᒪᔪᓄᑦ, Brazil ᒥᓪᓗ, Indonesiaᒥᓪᓗ ᐅᓚᐱᑦᓯᒋᐊᕐᑐᓯᒪᔪᓄᑦ ᐅᖄᔪᓪᓚᕆᐊᓗᓐᓂᒃ, ᑲᓇᑕᒥᐅᓪᓗ ᐊᖓᔪᕐᖄᒪᕆᖓᑕ ᐅᒃᑯᐃᓯᓂᖓᓂᒃ ᑲᑎᒪᓂᐅᓚᖓᔪᒥᒃ.
ᐱᓇᓱᐊᕈᓰᓐᓂ ᒪᕐᕉᓂ ᑲᑎᒪᓂᕐᔪᐊᖅ ᓯᕗᓕᕐᑕᐅᓂᕐᖁᖅ ᓭᓇᒥᐅᓄᑦ ᐱᔭᑦᓴᑖᕐᑎᑕᐅᒍᑎᒋᔭᖓᓂᐅᒃ ᐊᕙᑎᓕᕆᓂᕐᒧᑦ ᑐᖅᑲᑕᕐᕕᐅᑉ Huang Runqiu. ᑲᓇᑕᒥᓪᓗ ᐊᕙᑎᓕᕆᓂᕐᒧᑦ ᑐᖅᑲᑕᕐᕕᒃ Steven Guilbeault ᐊᕙᑎᓕᕆᔨᐅᓯᒪᔪᖅ ᑲᔪᓯᑎᑦᓯᒋᐊᖃᕐᓂᒥᑎᓪᓗᒍ ᐊᑦᔨᒌᖕᖏᑐᓂᒃ ᑲᑎᒪᓂᕐᓂᒃ ᐊᖏᖃᑎᒌᖕᖏᒍᑎᐅᖃᑦᑕᑐᓂᓪᓗ ᑲᑎᒪᓂᐅᑉ ᐃᓱᓕᓂᖓᓂ ᐊᖏᖃᑎᒌᒍᑕᐅᓚᖓᒐᓗᐊᕐᓱᑎᒃ.
ᑲᑎᒪᓂᕐᔪᐊᒥ ᐅᓪᓗᖓᓂ ᓯᕗᓪᓕᐹᒥ, ᑐᕈᑑ ᑖᑦᓱᒥᖓ ᑭᖑᓪᓕᐹᒥᒃ ᐊᖏᖃᑎᒌᒍᑎᒥᒃ ᓂᓪᓕᕈᑎᖃᕐᓂᖁᖅ ᑲᓇᑕᒥ 30%ᖓᑕ ᓄᓇᑦᑕ ᐊᒻᒪᓗ 30%ᖓᑕ ᐃᒪᑦᑕ ᐅᖑᒪᔭᑦᓴᖑᕋᔭᕐᓂᖓᓂᒃ 3030ᒦᓕᕈᑦᑕ. ᐅᖑᒪᔭᑦᓴᖑᖁᔨᓂᖅ 30%ᖓᓂᒃ ᓄᓇᕐᔪᐊᑕ 3030ᒦᓕᕈᑦᑕ, ᑌᔭᐅᓂᖃᖃᑦᑕᕋᔭᕐᑎᓗᒍ “30-by-30”, ᐃᒣᓕᖓᖁᔭᐅᒐᔭᓯᒻᒥᓱᓂ “30-by-30-by-30-by-30”. ᑐᑭᖃᕐᓱᓂ 30%ᖓ ᐅᖑᒪᔭᐅᔪᖅ ᐃᓚᓗᒍ 30%ᖓᓂᒃ ᐱᐅᓕᐊᕆᐊᑦᓯᐊᑕᐅᓯᒪᔪᒥᒃ ᓄᓇᕐᔪᐊᒥᒃ ᐊᑭᖃᕐᓗᓂ $30ᐱᓕᐊᓐᓂᒃ, 3030ᒦᓕᕈᑦᑕ.
Gregor Gilbert, ᑐᑭᒧᐊᑦᑎᓯᔨ ᒪᑭᕝᕕᒥ ᐊᕙᑎᓕᕆᓂᕐᒧᑦ, ᐆᒪᔪᓕᕆᓂᕐᒧᓗ ᖃᐅᔨᓴᕐᓂᒧᓪᓗ ᐊᓪᓚᕕᒻᒥ, ᐃᒫᒃ ᐅᖃᕐᓂᖁᖅ. “ᐃᓱᒫᓗᒋᔭᖃᓪᓚᕆᑦᑐᖓ ᑕᒪᒃᑯᓂᖓ ᐅᖃᐅᓯᐅᖃᑦᑕᑐᓂᒃ 30 by 30ᓕᕆᔪᓂᒃ ᐊᓯᖏᓐᓂᓗ ᑐᑭᓯᓇᕈᑎᖃᓪᓗᐊᑎᑕᐅᒐᑎᒃ ᖃᓄᖅ ᐱᔭᕆᔭᐅᒍᓐᓇᓛᕐᒪᖔᑕ ᖃᓄᕐᓗ ᑲᔪᓯᑎᑕᐅᓂᖃᓛᕐᒪᖔᑕ. ᑲᓇᑕᒦᑦᑐᓄᑦ ᓯᕿᓂᕐᒥ ᑕᒪᓐᓇ ᐱᔭᕆᐊᑐᒋᔭᐅᓛᕐᑐᖅ. ᑕᒪᒃᑯᓂᖓ ᑐᓂᒪᒍᑕᐅᔪᓂᒃ ᐱᔭᖃᕈᓐᓇᓛᖕᖏᒪᑕ ᑕᖅᕋᒥᒃ ᑕᑯᒋᐊᖃᑦᑕᕈᓐᓀᓗᑎᒃ. ᐊᑯᓕᕕᒻᒥᐅᒧᑦ ᓇᓪᓕᐊᓄᑦ, ᐆᑦᑐᕋᐅᑎᒐ, ᖃᓄᖅ ᑕᒪᓐᓇ ᑐᑭᖃᕐᐸ ? ᑕᒪᓐᓇ ᐱᔭᑦᓴᒪᕆᐅᓚᖓᔪᖅ ᑲᕙᒪᑐᖃᒃᑯᑦ ᑕᑯᓐᓇᕈᓯᖓᑎᒍᑦ.”
ᐋᑕᒥ ᐊᓚᑯ ᐅᖃᐅᓯᑦᓴᖃᕐᕕᖃᓪᓚᕆᓐᓂᒥᔪᖅ ᐅᖑᒪᔭᐅᓂᕐᒨᑕᐅᒐᔭᕐᑐᓂᒃ ᓄᓇᓂᒃ ᐅᑭᐅᕐᑕᑐᒥ. “ᐃᓱᒪᒐ ᐊᑦᔨᒋᔭᐅᖕᖏᑐᖅ ᓱᓇᓕᒫᓂᓪᓕ ᐅᖑᒪᒋᐊᖃᕐᑐᕆᒐᒪ, ᑎᕿᕐᖁᓗᐊᑐᐃᓐᓇᐅᖏᑦᑐᒥᒃ, ᑕᕐᓵᐱᑐᐃᓐᓇᐅᖏᑦᑐᒥᓪᓘᓃᑦ.” ᐅᓂᒃᑳᑐᕕᓂᖅ ᓄᓇᕕᒻᒦᑐᓂᒃ ᓄᓇᓂᒃ ᑎᑎᕐᑕᐅᓯᒪᔪᓂᒃ ᐅᔭᕋᕐᓂᐊᕕᓕᐅᕈᒪᔪᓄᑦ, ᑕᒪᓐᓇᓗ ᓯᕗᓪᓕᐅᔭᐅᒐᔪᑦᓱᓂ ᐅᖑᒪᔭᐅᒋᐊᓕᓐᓂᒃ ᓄᓇᓂᑦ.
ᐃᒪᕐᒥ ᐅᖑᒪᔭᐅᒋᐊᓕᓐᓂᒃ ᐅᓂᒃᑳᓚᕆᑦᑐᕕᓂᖅ ᑲᑦᓱᙰᑦᑑᒍᑕᐅᓪᓚᕆᓐᓂᖓᓂᒃ ᐃᒪᕐᐱᓕᕆᔨᒃᑯᓄᑦ ᓄᐃᑦᓯᒍᒪᓂᒃᑯᑦ ᐅᖑᒪᔭᐅᔪᑦᓴᓂᒃ ᐃᒪᕐᒥ. “ᓱᓇᓕᒫᑦ ᐱᑐᑦᓯᒪᐅᑎᓂᖃᕐᒪᑕ. ᑯᕕᔭᐅᔪᖃᕐᓂᐸᑦ ᐃᕗᔨᕕᒻᒥ, ᑰᓯᒐᔭᕐᑐᖅ ᓴᓪᓗᓄᑦ, ᖁᐊᕐᑕᒧᑦ ᑲᖏᕐᓱᔪᐊᒧᓪᓗ. ᑕᒪᓐᓇ ᐅᖑᒪᑦᓯᓂᓪᓚᕆᐅᔪᕆᖕᖏᑕᕋ ᐃᓓᓐᓈᐱᖓᓂᒃ ᐅᖑᒪᑦᓯᓂᐅᒻᒪᑦ. ᖃᐅᔨᒪᔪᖓ ᐱᕙᓪᓕᐊᓂᐅᒋᐊᓕᓐᓂᒃ ᐃᓱᒪᖃᕐᓱᑎᒃ ᐅᖑᒪᔭᐅᒋᐊᓕᓐᓂᓗ ᐃᓱᒪᖃᕐᒥᓱᑏᕐᒪᑕ.
ᐱᕙᓪᓕᐊᓂᐅᒋᐊᓕᓐᓂᒃ ᐊᕙᑎᑦᑎᓂ ᐃᓱᒪᖃᕐᓱᓂ ᐅᖑᒪᔭᐅᒋᐊᓕᓐᓂᓗ ᐃᓱᒪᖃᕐᒥᓱᓃᕐᑐᒥᒃ ᖃᐅᔨᒪᔪᖓ ᐊᕐᕌᒍᒐᓵᓗᓐᓂ ᑌᒣᑦᑑᓕᕐᓱᓂ David Suzukiᒥᒃ, ᐅᖄᔨᐅᓲᖅ CBC TV’s “The Nature of Things” 1979ᒥᓂᑦ. ᐋᑕᒥ ᐃᕐᖃᐅᒪᒐᑦᓴᑖᓪᓚᕆᑦᑐᕕᓂᖅ ᑲᑎᒪᓂᕐᔪᐊᓕᐊᕐᓯᒪᑦᓱᓂ COP15 ᑲᑎᓯᓐᓂᕋᒥ ᐊᕙᑎᓕᕆᔨᒻᒪᕆᒻᒥᒃ, ᓄᓇᕕᓕᐊᖁᑦᓴᐅᑎᒋᑦᓱᒍᓗ.
“ᑰᑦᔪᐊᓕᐊᖁᓪᓚᕆᑦᑕᕋ ᖃᐅᔨᓴᕐᕕᑎᓐᓂᒃ ᑕᑯᓂᐊᕐᓗᓂ. ᓚᔪᕕᓂᖅ, ‘ᐃᓄᒻᒪᕇᑦ ᐅᖄᕕᐅᖃᑦᑕᓲᑦ, ᐃᓄᐃᓪᓗ ᖃᐅᔨᒪᔭᑐᖃᖏᑦ ᐊᑐᕐᑕᐅᓲᒍᑦᓱᑎᒃ, ᓯᓕᕚ ?’ ᐅᖃᕐᑐᖓ, ᑕᒪᒋᓐᓂᒃ ᐊᑑᑎᓲᒍᔪᒍᑦ ! ᐃᓄᐃᑦ ᖃᐅᔨᒪᔭᑐᖃᖏᓐᓂᒃ ᐊᑐᓲᒍᔪᒍᑦ ᖃᓪᓗᓈᓪᓗ ᖃᐅᔨᓴᕈᓯᖏᓐᓂᒃ, ᖃᐅᔨᓴᕐᓂᕗᑦ ᐱᐅᓂᕐᓴᐅᓂᐊᓕᕐᒪᑦ !”
ᑲᑎᒪᓂᕐᔪᐊᖃᕐᑎᓗᒍ COP19 Panamaᒥ, ᐃᓄᐃᑦ ᑭᒡᒐᑐᕐᑕᐅᓚᐅᔪᕗᑦ ᓯᕗᓕᕐᑎᖏᓐᓄᑦ ᐃᓄᐃᑦ ᐅᑭᐅᕐᑕᑐᕐᒥᐅᒍᖃᑎᒌᑦ ᑲᑎᒪᔨᖏᑦᑕ, ᐱᓇᓱᑦᑎᓄᓪᓗ ᐆᑦᑐᕋᐅᑎᒐ, Gregor Gilbertᒧᑦ ᐊᐅᓚᑦᓯᔨᐅᓂᕐᒦᑐᓄᓪᓗ ᓄᓇᕕᑦᓯᐊᕘᕐᒥᐅᓄᑦ ᓄᓇᕘᕐᒥᐅᓄᓪᓗ. ᐃᓘᓐᓀᓅᓕᖓᑎᓪᓗᒍ ᖁᓕᕕᑦᓱᑎᒃ (10) ᑕᒪᒃᑯᓄᖓ ᑲᑎᒪᓂᐅᓲᓅᓕᐊᖃᑦᑕᓯᒪᓂᕋᕐᑐᕕᓂᖅ ᐊᕐᕌᒍᓂ ᐊᓂᒍᕐᑐᓂ ᐱᓪᓚᕆᐅᓂᕃᑦᓱᓂᓗ ᐱᓇᓱᖃᑎᒌᑉᐸᓕᐊᒋᐊᖃᕐᓂᒥᒃ. ᐃᓄᐃᑦ ᐅᖑᒪᑦᓯᓯᐊᕈᓐᓇᓯᒪᔪᑦ ᓇᓄᐃᑦ ᑕᐅᒃᓰᖃᑦᑕᐅᑎᒍᑕᐅᓂᖏᓐᓂᒃ CITESᑎᒍᑦ ᑌᑦᓱᒪᓂᒋᐊᖅ.
Gilbert ᐅᖃᕐᑐᖅ, “ᐊᑦᔨᒌᖕᖏᑐᓂᒃ ᐅᖄᒍᑎᖃᖃᑦᑕᓂᕐᒥᔪᑦ ᑐᒑᑦ ᐱᓪᓗᒋᑦ ᓱᕐᕃᓂᖃᕈᓐᓇᒥᒻᒪᑕ ᑑᒑᓖᑦ ᐊᖑᓇᓱᑦᑕᐅᓂᕆᓲᖏᓐᓂᒃ ᐁᕖᓪᓗ, ᐅᕝᕙᓘᓐᓃᑦ ᒪᑭᑕᒐᓱᐊᕈᑎᑦᓴᑖᕆᔭᐅᓲᒍᓂᖏᓐᓂᒃ ᑕᐅᕐᓰᑲᑦᑕᕈᑕᐅᒍᓐᓇᓂᖏᓐᓄᑦ ᑑᒑᓖᓪᓗ ᐁᕖᓪᓗ ᑑᒑᖏᑦᑕ ᐅᕝᕙᓘᓐᓃᑦ ᐱᓕᐊᕆᔭᐅᓲᒍᓂᖏᑦᑕ. ᐃᒣᓕᖓᒐᔪᓲᒍᒻᒥᔪᑦ ᓯᓚᕐᔪᐊᒥᐅᒍᖃᑎᒌᑦ ᑲᑎᒪᓂᒻᒪᕆᖏᓐᓂ ᑕᒪᒃᑯᐊ ᐆᒪᔪᐃᑦ ᐅᖃᐅᓯᐅᓪᓚᕆᖃᑦᑕᓯᓲᑦ ᓯᓚᕐᔪᐊᒥ ᓯᓚᐅᑉ ᐊᓯᑦᔨᕙᓪᓕᐊᓂᖓᑕ ᐃᓱᒫᓘᑕᐅᓂᖓᓄᑦ.”
ᐋᑕᒥ ᑲᖐᒋᔭᓕᒃ ᖃᓄᓪᓗᐊᑎᒋ ᐱᕕᑦᓴᖃᕐᑎᑕᐅᕙᒻᒪᖔᕐᒥ ᐃᓄᓐᓂᒃ ᓯᕗᓕᕐᑎᐅᓱᓂ ᑲᕙᒣᑦ ᒪᓕᒐᖏᓐᓂᒃ ᑲᓇᑕᒥ ᓈᒻᒪᓴᖕᖏᕙᓪᓛᕈᓐᓇᓂᕐᒥᒃ. COP ᑲᑎᒪᓂᓪᓚᕆᒋᓯᒪᔭᓕᒫᖏᓐᓄᑦ ᐁᓯᒪᓲᒍᒐᒥ ᑕᑯᖃᑦᑕᓯᒪᔪᖅ ᐊᕐᓱᕈᑦᑐᒪᕆᓐᓂᒃ ᐊᔪᕐᓴᑐᓂᒃ ᐅᓪᓗᑕᒫᑦ ᐃᓅᒐᓱᐊᕐᓂᒥᒍᑦ ᓄᓇᓕᑐᖃᕐᓂᒃ South Americaᒥᐅᓂᒃ, ᐅᖓᓯᒋᔭᐅᔪᒥᐅᓂᓪᓗ Africanᓂᒃ. “ᑕᒪᒃᑯᓄᖓ ᑲᑎᒪᓂᕐᔪᐊᓕᐊᑐᐊᕋᒪ ᐊᕐᓱᕈᓐᓇᑐᒃᑰᑐᓂᒃ ᑐᓵᓪᓚᕆᓲᒍᕗᖓ ᓄᓇᕕᒻᒥ ᓱᓇᑐᐃᓐᓇᓕᒫᖃᕋᑦᑕ. ᖃᐅᔨᓴᕐᕕᖃᕐᑐᒍᑦ, ᒪᙯᓐᓂᒧᑦ ᐃᖃᓗᓐᓂᐊᓂᕐᒧᑦ ᒥᑭᒋᐊᕐᓂᐊᓂᕐᒧᓗ ᑲᑎᒪᔨᖃᕐᑐᒍᑦ, ᓄᓇᑖᕋᓱᐊᕐᓂᒧᑦ ᐊᖏᖃᑎᒌᒍᑎᖃᕐᑐᒍᑦ, ᖃᖓᑦᑕᔫᖁᑎᖃᕐᑐᒍᑦ, ᑎᒥᐊᕈᖁᑎᖃᕐᓱᑕᓗ. ᑐᓵᓪᓚᕆᓐᓇᓲᖅ ᐅᓂᑳᑐᖃᕐᑎᓗᒍ ᐃᓄᐊᖃᑦᑕᐅᑎᔪᓂᒃ ᐅᔭᕋᕐᓂᐊᕕᓕᐅᕐᑐᖃᕆᐊᕐᑐᓯᑐᐊᕐᒪᒎᖅ, ᐱᓂᐊᕐᓂᓕᕆᔨᓕᒫᓪᓗ ᓱᒃᑯᑎᕆᒐᓱᐊᑐᐃᓐᓇᓱᑎᒃ ᐊᑭᓕᕐᑐᑕᐅᓲᒍᒐᒥᒃ ᐅᔭᕋᕐᓂᐊᕕᑦᓴᓕᐅᕈᒪᔪᓄᑦ. ᑌᒣᒻᒪᑦ ᓄᓇᕕᒻᒥᓕ ᐱᕕᑦᓴᖃᑦᓯᐊᑐᐊᓘᕗᒍᑦ, ᓯᓚᕐᔪᐊᒥᐅᒍᖃᑎᕗᑦ ᑕᑯᑦᓱᒋᑦ.”
ᑕᒪᓐᓇ ᐃᓱᒪᒋᑦᓱᒍ, COP ᑲᑎᒪᓂᕐᔪᐊᖏᓐᓂ ᐊᒥᓱᕐᔪᐊᒍᓲᒍᕗᑦ ᓄᓇᕐᔪᐊᒥᐅᒍᖃᑎᒌᑦ, ᐊᕐᓱᕈᓐᓇᑐᒃᑰᑐᐃᓪᓗ ᓄᓇᓕᑐᙯᑦ, ᐊᓕᐊᓇᓲᖅ ᑲᕙᒪᓄᑦ ᐃᓕᑕᕆᔭᐅᓂᖃᖕᖏᑐᑦ ᓂᐸᖃᕐᑎᑕᐅᒍᓐᓇᓲᒍᓕᕐᒪᑕ. ᐊᕐᖁᑎᐅᑎᓪᓗᒋᑦ ᓄᓇᓕᓐᓂ ᑲᑎᒪᔨᓕᐊᒍᓯᒪᔪᑦ ᓄᓇᓕᑐᙯᓪᓗ ᑲᑎᒪᔨᖁᑎᖏᑦ (LCIPP).
ᓯᓚᕐᔪᐊᒥ ᓯᓚᐅᑉ ᐊᓯᑦᔨᕙᓪᓕᐊᓂᖓ ᐱᒐᓱᐊᒻᒪᕆᓐᓇᑐᒃᑰᓇᕐᑑᕗᖅ ᐃᓅᖃᑎᒌᑦᑐᓕᒫᓄᑦ. ᐱᓐᓀᓗᑌᑦ ᑖᒃᑯᓇᓂ ᐱᖓᓱᐃᓂ COP ᑲᑎᒪᓂᕐᔪᐊᓂ ᐱᑐᑦᓯᒪᐅᑎᓂᖃᕐᐳᑦ, ᐃᓘᓐᓇᑎᒃ ᓄᓇᕐᔪᐊᑎᓐᓂᒃ ᓱᔪᐃᕙᓪᓕᐊᓂᕐᑕᖃᕋᒥᒃ, ᐆᒪᔪᐃᑦ ᐊᑦᑕᓇᕐᓯᖃᑦᑕᑎᓪᓗᒋᑦ, ᐆᒪᔪᐃᓪᓗ ᓇᔪᓲᖏᑦ ᐊᑦᑕᓇᕐᓯᖃᑦᑕᑎᓪᓗᒋᑦ, ᓯᓚᕐᓂᓗ ᓲᒍᕙᓪᓕᐊᑐᐃᓐᓇᖃᑦᑕᓛᕐᓂᕋᕐᑕᐅᓯᒪᑎᓪᓗᒍᓗ ᐊᕐᕌᒍᓂ ᓯᕗᓂᑦᑎᓂ. ᐅᕐᓱᐊᓗᒻᒥᒃ ᐃᓅᒐᓱᐊᕈᑎᖃᕐᓂᕆᓲᕗᑦ ᐊᓯᑦᔨᒋᐊᖃᓕᕐᑕᕗᑦ, ᓄᑖᓂᒃ ᐃᑯᒪᓕᐅᕈᑎᑦᓴᓂᒃ ᓱᒃᑯᑎᕆᖕᖏᓂᕐᓴᓂᒃ ᓄᓇᑦᑎᓂᒃ ᐊᑐᖔᓯᓗᑕ.
ᐊᑐᐊᕋᑦᓴᐅᒥᔪᑦ
– UNFCCC COP27 ᓯᓚᕐᔪᐊᒥ ᓯᓚᐅᑉ ᐊᓯᑦᔨᕙᓪᓕᐊᓂᖓᓄᑦ ᑲᑎᒪᓂᖃᓚᐅᔪᕗᖅ Sharm ElSheikh, Egypt ᒥ ᓄᕕᒻᐸ 620, 2022ᒥ United Nations ᖃᕆᑕᐅᔭᒃᑯᑦ ᑐᓴᕋᑦᓴᖃᕐᕕᖓ: https://unfccc.int/cop27
– ᓄᓇᕐᔪᐊᒥᐅᒍᖃᑎᒌᑦ ᑲᑎᒪᓂᕐᔪᐊᖃᓚᐅᔪᕗᑦ ᓯᓚᕐᔪᐊᒥᐅᒍᖃᑎᒌᑦ ᑕᐅᕐᓰᖃᑎᒌᒍᓐᓇᓂᖓᓄᑦ ᐊᑦᑕᓇᕐᓯᓂᐅᔭᕐᑐᑦ ᐆᒪᔪᐃᑦ ᐱᓪᓗᒋᑦ (CITES) COP19 Panama City, Panama ᒥ ᓄᕕᒻᐸ 1415, 2022ᒥ
CITES website: https://cites.org/eng/cop19
– ᑲᑎᒪᓂᕐᔪᐊᖃᓚᐅᔪᕗᖅ ᐊᑦᓯᔭᐅᔪᒥᒃ UN Convention on Biodiversity (CBD) COP15 ᒪᓐᑐᕆᐊᓪ, ᑲᓇᑕᒥ ᑎᓯᒻᐸ 719, 2022ᒥ. United Nations ᖃᕆᑕᐅᔭᒃᑯᑦ ᑐᓴᕋᑦᓴᖃᕐᕕᖓ: https://www.cbd.int/conferences/20212022
