ᕕᕈᐊᕆ 5, 2024 – ᓭᓐ-ᓗᕋ, ᑯᐯᒃ – ᐊᖓᔪᕐᖄᖅ ᐱᑕ ᐋᑕᒥ ᓂᕈᐊᕐᑕᐅᒋᐊᓪᓚᓂᕐᖁᖅ ᒪᑭᕝᕕᑯᓄᑦ ᐊᖓᔪᕐᖄᖑᓂᕐᒧᑦ 1,812ᓄᑦ ᓂᕈᐊᕐᑕᐅᓱᓂ (71.29%). ᓂᕈᐊᕐᓂᓕᕕᓂᖅ, ᓯᑕᒪᖓᓐᓂᒥ ᕕᕈᐊᕆ 1ᒥ, ᓯᕗᓪᓕᐸᐅᑦᓱᓂ ᑭᓇᓕᒫᒃᑯᑦ ᓂᕈᐊᕈᓐᓇᓂᖓ ᖃᕆᑕᐅᔭᑎᒍᑦ ᓂᕈᐊᕈᓐᓇᓂᖃᕐᑎᑕᐅᑦᓱᑎᑦ ᓄᓇᕕᒻᒥᐅᑦ ᐃᓚᐅᔪᖁᑎᖏᑦ. ᑕᒡᒐᓂ ᐊᕐᕌᒍᕐᒥ ᓂᕈᐊᕐᑐᕕᓃᑦ ᖃᕆᑕᐅᔭᑎᒍᑦ 26.59%ᖑᓐᓂᖁᑦ, ᐅᕝᕙᓗᓐᓃᑦ 2,612 ᓂᕈᐊᕐᑐᕕᓃᑦ. ᖃᕆᑕᐅᔭᑎᒍᑦ ᓂᕈᐊᕐᓂᑐᕕᓃᑦ 23.58%-ᖑᓐᓂᖁᑦ ᑖᒃᑯᓇᓂ ᓂᕈᐊᕐᑐᓂ, ᐊᒻᒪᓗ ᓂᕈᐊᕐᕕᒧᓪᓗᑐᕐᑐᐃᑦ ᓂᕈᐊᕈᑎᖏᑦ ᓂᕈᐊᕐᕕᓂ 76.41%-ᖑᓐᓂᖁᑦ ᑲᑎᓕᒫᕐᓱᑎᑦ ᓂᕈᐊᕈᑎᐅᔪᓂ.
ᓲᓯ ᖃᐅᒃᑫ ᐊᒻᒪᓗ ᖄᔨ ᑐᓗᒐᒃ ᐃᓚᐅᓐᓂᖁᒃ ᐱᑕ ᐋᑕᒥᒧᑦ ᓂᕈᐊᕐᑕᐅᑎᒐᓱᑦᓱᑎᑦ ᒪᑭᕝᕕᑯᑦ ᐊᖓᔪᕐᖄᖓᓄᑦ.
ᖃᑦᓯᐅᓂᖏᑦ ᓂᕈᐊᕐᑕᐅᒍᑎᖏᑦ ᐅᑯᐊᖑᕗᑦ:
ᐱᑕ ᐋᑕᒥ: 1,862 ᓂᕈᐊᕐᑕᐅᒍᑎᖏᑦ (71.29%)
ᖄᔨ ᑐᓗᒐᒃ: 393 ᓂᕈᐊᕐᑕᐅᒍᑎᖏᑦ (15.05%)
ᓲᓯ ᖃᐅᒃᑫ: 347 ᓂᕈᐊᕐᑕᐅᒍᑎᖏᑦ (13.28%)
ᑭᐅᒍᑎᓕᕕᓂᖅ ᐊᒥᓱᑲᓪᓚᓄᑦ ᓴᐳᑦᔭᐅᓂᕐᒥᓄᑦ, ᐊᖓᔪᕐᖄᖅ ᐱᑕ ᐋᑕᒥ ᐅᖃᕐᑐᕕᓂᖅ ᓇᑯᕐᒥᓱᓂ. ᐅᖃᕐᓱᓂ, “ᐅᐱᒍᓱᓪᓚᕆᒃᑯᖓ ᐊᒻᒪᓗ ᐃᓗᒃᑯᑦ ᓱᕐᕋᑕᐅᑦᓱᖓ ᐅᑉᐱᕆᔭᖃᕐᓂᖏᓐᓄᑦ ᐃᓅᖃᑎᒃᑲ ᓂᕈᐊᕆᐊᓪᓚᒪᑕ ᐅᕙᓐᓂᒃ. ᐅᐱᒍᓲᑦᓯᒋᕗᖓ ᓇᑯᕐᒥᓱᒋᓗ ᖄᔨ ᐊᒻᒪᓗ ᓲᓯ ᐃᑲᒧᕐᓯᒍᒪᓂᖏᓐᓄᑦ ᓄᓇᕕᒻᒥᐅᑦ ᐱᕙᓪᓕᐊᓂᖏᓐᓂᒃ. ᑖᓐᓇ ᑎᓕᔨᒋᐊᓪᓚᕈᑎᐅᔪᖅ ᑲᑐᑦᔨᖃᑎᒌᑦᓱᑎᑦ ᐊᖏᕐᓂᖏᑦ ᑖᒃᑯᓂᖓᑦᓭᓇᖅ ᑕᑯᓐᓇᐅᔮᕐᑕᑎᓐᓂᑦ ᑲᑐᑦᔨᓗᑎᑦ ᐊᒻᒪᓗ ᐃᒻᒥᓂᒃ ᑐᑭᑖᕈᓐᓇᓂᖃᕐᓗᑕ ᓄᓇᕕᒻᒥ.
ᐊᖓᔪᕐᖄᖅ ᐱᑕ ᐋᑕᒥ ᐅᖃᕆᐊᓪᓚᑐᕕᓂᖅ ᐱᒻᒪᕆᐅᓂᖓᓂᒃ ᐱᓇᓱᖃᑎᒌᓐᓂᕗᓐᓂᒃ ᐳᕐᑐᓂᕐᓴᐅᖃᑎᒥᓂᑐᐃᓐᓇᐅᖏᑦᑐᖅ ᑲᑎᖕᖓᔨᓂᓗ ᑭᓯᐊᓂ ᓄᓇᓕᓕᒫᓂ ᑎᒥᐅᔪᖁᑎᖏᓐᓂᓗ. “ᐃᓂᕐᕋᓂᑦᑎᓂᑦ ᐅᖁᒣᑦᑐᑯᕈᑎᐅᔪᓂᑦ ᐱᕕᑦᓴᓯᐊᖑᓂᐊᕐᑐᓂᓗ ᓯᕗᓂᑦᑎᓂ, ᑐᓂᒪᑦᓯᐊᖁᖓ ᑲᑐᑦᔨᖃᑎᒌᓐᓂᕆᓂᐊᕐᑕᑎᓐᓂᑦ ᐊᑕᐅᓯᐅᑦᔨᓗᑕᓗ, ᐳᕐᑐᓂᕐᓴᓂ ᑲᑎᖕᖓᔨᑐᐃᓐᓇᐅᖏᓪᓗᑕ ᑭᓯᐊᓂ ᐱᒻᒪᕆᖁᑎᕗᑦ ᓄᓇᓕᓕᒫᓂ ᐱᒍᑦᔨᔨᐅᖃᑎᕗᓐᓂᒃ. ᐊᖏᖃᑎᒌᓐᓂᓕᐅᕈᑎᒋᕐᖃᒥᓚᐅᕐᑕᕗᑦ ᐱᖁᔭᓕᕆᓂᕐᒥ ᑯᐯᒃᑯᓗ ᓄᐃᑦᓯᕗᖅ ᐊᓪᓗᕆᐊᕈᑎᒻᒪᕆᒥᒃ ᐱᓇᓱᐊᕐᑕᑎᓐᓂᑦ ᓯᕗᓂᕐᒥ ᐃᒻᒥᓂᒃ ᑐᑭᑖᕈᓐᓇᓂᕐᒧᑦ. ᓇᑯᕐᒦᖁᖓ ᖃᔪᓯᔪᒥᒃ ᐱᒐᓱᐊᕈᓐᓇᑎᑕᐅᓂᕋᓂᒃ ᑕᒪᑦᓱᒥᖓ ᐱᓇᓱᑦᑕᐅᔪᒥᒃ ᐱᑕᖃᓪᓚᕆᒋᐊᓕᒥᒃ ᐊᒻᒪᓗ ᑐᓂᒪᑦᓯᓯᐊᓱᖓ ᓂᐱᖏᑦ ᐃᓄᖁᑎᑦᑕ ᑐᓵᔭᐅᖁᑦᓱᒋᑦ ᑐᑭᑖᕐᓂᐅᔪᓂ.”
ᖃᐅᔨᒋᐊᕈᒪᒍᕕᑦ ᖃᓄᐃᓕᖓᓂᖏᓐᓂᑦ ᓂᕈᐊᕐᑐᕕᓃᑦ ᐃᓗᓕᖏᓐᓂᑦ, ᑕᑯᒋᐊᕆᑦ ᐅᕙᓂ OneFeather ᖃᕆᑕᐅᔭᑎᒍᑦ ᓄᐃᑕᑎᑦᓯᕕᖓᓂ
> https://www.onefeather.ca/nations/makivvik/elections/president-2024
-30-
ᐅᖄᕕᐅᒍᓐᓇᑐᖅ:
ᑳᓴᓐ ᑕᒍᓐᓇ
ᑐᑭᒧᐊᑦᑎᓯᔨᒃ ᑐᓴᕋᑦᓴᓕᕆᕕᒻᒥ
ᒪᑭᕝᕕᒃ
ctagoona@makivvik.ca
www.makivvik.ca
ᒪᑭᕝᕕᒃ ᓄᓇᑖᕐᓂᒧᑦ ᑎᒥᖕᖑᑎᑕᕕᓂᖅ ᑎᓕᔭᐅᒪᒍᑎᓕᒃ ᐊᐅᓚᑦᓯᓂᐊᕐᓱᓂ ᓄᓇᖁᑎᖓᑕ ᑮᓇᐅᔭᖁᑎᖏᓐᓂᑦ ᐃᓄᐃᑦ ᓄᓇᕕᒻᒥᐅᑦ ᑮᓇᐅᔭᕐᑖᕕᓂᖏᓐᓂᑦ ᔦᒻᔅ ᐯ ᑯᐯᒃᓗ ᑕᕐᕋᖓᓂ ᐊᖏᖃᑎᒌᒍᑎᖓᑎᒍᑦ. ᒪᑭᕝᕕᑯᑦ ᐱᓇᓱᒋᐊᓕᖏᓐᓂᑦ ᐃᓚᖃᕐᖁᑦ ᐊᐅᓚᑦᓯᓗᑎᑦ ᐊᒻᒪᓗ ᑭᓇᐅᔭᓕᐅᕆᐊᓪᓚᒐᓱᓪᓗᑎᑦ ᑭᓇᐅᔭᖏᓐᓂᑦ ᐱᕈᕐᑎᓯᕙᓪᓕᐊᓂᒃᑯᓗ ᑮᓇᐅᔭᓂᑦ ᐃᑲᔪᕐᓯᓂᒃᑯᑦ ᐃᓄᓐᓄᑦ ᐊᐅᓚᑕᐅᔪᓂᑦ ᒪᑭᑕᒐᓱᐊᕈᑎᓂᑦ ᓄᓇᕕᒻᒥ. ᒪᑭᕝᕕᒃ ᓄᐃᑕᑎᑦᓯᒐᓱᑦᑐᖅ ᐊᓯᐅᑐᐃᓐᓇᑎᑦᓯᑌᓕᑦᓱᓂᓗ ᐃᓄᐃᑦ ᐃᓗᕐᕈᓯᖓᓂᒃ ᐅᖃᐅᓯᖓᓂᓗ ᐃᓗᓯᕐᓱᓯᐊᕐᓂᖏᓐᓂᓗ, ᖃᓄᐃᖕᖏᓯᐊᕐᓂᖏᓐᓂᑦ, ᐊᔪᕐᓴᓂᕐᓂᑦ ᓄᖑᑎᕆᓂᕐᓄᑦ, ᐊᒻᒪᓗ ᐃᓕᓐᓂᐊᓂᖏᓐᓂᑦ ᐃᓄᐃᑦ ᓄᓇᓕᖏᓐᓃᑐᓂᑦ.