ᓇᐅᓕᒫᓂᑦ ᑐᓴᕐᑎᓯᒍᑎᒃ
ᐁᕆᓕ 17, 2020 – ᑰᑦᔪᐊᖅ, ᓄᓇᕕᒃ –ᒪᑭᕝᕕᒃ, ᐊᖏᖃᑎᒌᒍᑎᑎᒍᑦ ᑎᒥᖕᖑᑎᑕᐅᓯᒪᔪᖅ ᑭᒡᒐᑐᕐᓱᓂ ᓄᓇᕕᒻᒥᐅᑦ ᐃᓄᖏᓐᓂᑦ, ᐊᑭᕋᕐᑐᒪᕆᑦᑐᖅ ᐅᔭᕋᓐᓂᐊᕖᑦ ᐅᒃᑯᐃᑕᐅᒋᐊᓪᓚᓚᖓᓂᖏᓐᓂᑦ ᓄᓇᕕᒻᒥ, ᑯᐯᒃ ᑲᕙᒪᖓ ᑐᓴᕐᑎᓯᓚᐅᕐᑎᓗᒍ ᐊᓪᓕᕇᕐᑐᓂ. ᑖᒃᑯᑑᑦᓱᑎᑦ ᑐᑭᑖᕐᓯᒪᔪᑦ, ᖃᐅᔨᒋᐊᕐᕕᖃᑐᐊᓪᓕᓯᒪᒐᑎᒃ ᐃᓄᓐᓂᑦ, ᑯᐯᒃ ᑲᕙᒪᖓᓄᑦ ᐊᓪᓛᑦ ᓴᐳᒻᒥᔭᐅᓂᖃᕐᓱᓂ ᑐᑭᑖᕈᑎᓕᐊᕆᓯᒪᔭᖏᓐᓄᑦ ᓇᐅᓕᒫᓂᑦ ᐃᓗᓯᓕᕆᓂᕐᒥᒃ ᑐᑭᒧᐊᑦᑎᓯᔨᐅᑉ, ᐊᒻᒪᓗ ᓇᐅᓕᒫᓂᑦ ᐃᓕᒪᓇᕐᑐᒦᑦᑎᓯᑦᑌᓕᓂᕐᒧᑦ ᑐᑭᒧᐊᑦᑎᓯᔨᐅᑉ, ᖃᖓᑦᑕᔫᑦ ᐊᐅᓚᓂᖏᑦᑕ ᓄᕐᖃᖓᑎᑕᐅᓂᖓᓂᑦ ᐅᒃᑯᐃᓯᓂᖃᕐᑎᓯᓂᕐᒧᑦ ᐅᔭᕋᓐᓂᐊᓃᑦ ᑲᔪᓯᒍᓐᓇᓂᐊᕐᒪᑕ. ᐃᓄᐃᑦ ᐊᒥᓲᓂᕐᓴᒪᕆᐅᕗᑦ ᓄᓇᕕᒻᒥ ᐅᖃᕐᕕᖃᕆᐊᖃᕐᓱᑎᓗ ᑐᑭᑖᕈᑎᒻᒪᕇᑦ ᐊᑑᑎᔭᐅᓚᖓᓕᕐᐸᑕ ᓲᕐᓗ ᑖᓐᓇᑎᑐᑦ. ᐅᔭᕋᓐᓂᐊᑏᑦ ᓄᓇᕕᒻᒧᑦ ᐅᑎᐊᕐᖃᓕᓚᐅᕐᑐᑦ ᐃᑉᐸᓴᖅ.
“ᒪᑭᕝᕕᒃ ᓈᒻᒪᓴᖕᖏᒪᕆᑦᑐᖅ ᐅᔭᕋᓐᓂᐊᕖᑦ ᐅᒃᑯᐃᑕᐅᒋᐊᓪᓚᓂᖏᓐᓂᑦ ᓄᓇᕕᒻᒥ ᒫᓐᓇᐅᑎᓪᓗᒍ. ᑕᒪᓐᓇ ᐅᓗᕆᐊᓇᕐᑐᒪᕆᐅᕗᖅ. ᐃᓄᐃᑦ ᓂᕈᐊᕐᑕᐅᒪᔪᑦ ᓄᓇᓕᓐᓂ ᑎᒥᒻᒪᕆᐅᔪᓂᓪᓗ ᑐᓴᕐᑕᐅᒋᐊᓖᑦ ᑐᑭᑖᕆᔨᐅᒋᐊᖃᕐᓱᑎᓗ ᐊᐅᓚᑦᔭᕆᐊᕈᑎᐅᓂᐊᕐᑐᓄᑦ. ᓄᓇᕕᒃ ᐊᐅᓚᑕᐅᒋᐊᖃᖕᖏᑐᖅ ᐊᐅᓚᑕᐅᑐᐃᓐᓇᑐᑦᓴᐅᒐᓂᓗ ᐱᓇᓱᑦᑎᑐᐃᓐᓇᓄᑦ ᐊᑐᕐᓂᓗᒍᑎᖃᕋᓱᐊᕐᑐᓄᑦ ᓄᕙᓐᓈᓗᒃ ᐊᑑᑎᑎᓪᓗᒍ ᐊᖓᔪᕐᖃᐅᑎᐅᒐᓱᐊᕈᑎᒋᓕᕐᓱᒍ” ᐅᖃᕐᑐᖅ ᒪᑭᕝᕕᐅᑉ ᐊᖓᔪᕐᖄᖓ ᓵᓕ ᒍᐊᑦ. “ᐊᒥᓱᕕᑦᓱᑕ ᐊᓪᓚᕕᖃᕐᓯᒪᓕᕐᑐᒍᑦ ᑯᐯᒃ ᑲᕙᒪᖓᓄᑦ ᐊᑕᐅᓯᐅᖕᖏᑐᓅᓕᖓᔪᓂᑦ ᐱᓇᓱᐊᕐᑕᐅᒋᐊᓕᓐᓄᑦ ᑭᓯᐊᓂ ᐅᓪᓗᒥᒧᑦ ᑭᐅᔭᐅᒍᑎᒋᓯᒪᕋᑕᖕᖏᑕᕗᑦ… ᐊᓪᓚᕕᐅᓯᒪᓂᕐᒥᓂᓪᓘᓃᑦ ᑭᐅᓚᐅᕐᓯᒪᖕᖏᑐᐃᑦ.”
ᓄᓇᕕᒻᒥᐅᑦ ᐃᓄᑐᐃᓐᓀᑦ ᐊᒻᒧᑎᕐᑕᐅᔪᑦ (ᓲᖕᖏᖒᕐᑎᑕᐅᔪᑦ) ᑯᐯᒃ ᑲᕙᒪᖓ ᑖᓐᓇᑑᑦᓱᓂ ᑐᑭᑖᕐᓯᒪᒻᒪᑦ, ᐋᓐᓂᕈᑎᐅᖃᑦᑕᓯᒪᔪᐊᓗᓐᓂᑦ ᑭᖑᓂᕐᒥ ᐅᑎᕆᐊᕐᔫᒥᑎᑦᓯᓚᖓᒻᒪᑦ. “ᑕᒪᒃᑯᐊ ᐊᑑᑎᓯᒪᔭᕗᑦ 1970 ᐊᕐᕌᒍᖏᑦ ᐱᒋᐊᕐᓯᒪᓕᕐᑎᓗᒋᑦ ᑌᑦᓱᒪᓂ ᑯᐯᒃ ᐊᖓᕐᖄᕆᓚᐅᕐᓯᒪᔭᖓ ᕌᐳᑦ ᐳᕌᓴ ᖃᐅᔨᒋᐊᕐᕕᖃᕐᓯᒪᒐᓂ ᑐᓴᕐᑎᓯᓚᐅᕐᓯᒪᒻᒪᑦ ᓄᓇᕕᒻᒥ ᑰᑦ ᓯᒥᑦᑐᑕᐅᓂᐊᓕᕐᓂᕋᕐᓱᒋᑦ ᐃᑯᒪᓕᐅᕈᑎᐅᓂᐊᕐᒪᑕ,” ᐅᖃᕐᑐᖅ ᓵᓕ ᒍᐊᑦ. “ᐊᓱᐃᓛ ᐊᑑᑎᓯᓚᐅᕐᓯᒪᒻᒥᔪᒍᑦ 1977-ᖑᑎᓪᓗᒍ ᕆᓂ ᓕᕕᐊᒃ ᑌᒫᑦᓭᓇᖅ ᖃᐅᔨᒋᐊᕐᕕᐅᓯᒪᑎᓐᓇᑕ ᐊᖏᕐᓯᒪᑎᓐᓇᑕᓗ ᓄᐃᑦᓯᓚᐅᕐᓯᒪᔪᖅ ᐱᖁᔭᒥᒃ 101-ᒥᑦ ᐃᓄᒃᑎᑐᑦ ᐅᖃᐅᓯᕐᒥᒃ ᐊᓯᐅᔨᑎᑦᓯᓚᕿᒐᔭᕐᓯᒪᔪᒥᑦ. ᑰᑦᔪᐊᒥ ᓄᓇᓖᓪᓗ ᐊᓯᖏᓐᓂᑦ ᓈᒻᒪᓴᖕᖏᓂᑦᑎᓂᑦ ᐱᓂᐊᕐᓂᑎᒍᑦ ᓄᐃᑕᑎᑦᓯᓚᐅᕐᓯᒪᔪᒍᑦ, ᓄᓇᕕᒻᒥᐅᑦ ᐱᖁᔭᒧᑦ ᒍᐃᒍᐃᑎᑑᕈᓐᓇᕆᐊᖃᕐᓂᒧᑦ ᐊᑦᑐᑕᐅᓚᖓᖕᖏᑑᓚᕿᑦᓱᑎᒃ ᐃᓄᒃᑎᑐᑦ ᐅᖃᐅᓯᖅ ᓴᐳᒻᒥᔭᐅᒍᓐᓇᓯᓚᕿᑎᑦᓱᒍ.”
ᒪᑭᕝᕕᒃ ᐊᑑᑎᒋᐊᓪᓚᖁᔨᖕᖏᑐᖅ ᐱᓂᐊᕐᓂᓗᑲᐅᖃᑦᑕᓯᒪᔪᓂᑦ ᑌᑦᓱᒪᓂ ᑯᐯᒻᒥᓗ ᕿᒥᕐᕈᒋᐊᓪᓚᖁᔨᑦᓱᓂ ᑐᑭᑖᕐᓯᒪᓂᖓᓂᑦ ᐅᒃᑯᐃᓯᒋᐊᓪᓚᓂᕐᒥᒃ ᐅᔭᕋᓐᓂᐊᕕᓐᓂ ᓄᓇᕕᒻᒥ, ᐃᓚᐅᑎᑕᐅᖁᔨᑦᓱᓂᓗ ᐃᓄᑐᐃᓐᓀᑦ ᓂᐱᖏᑦ ᑐᓴᕐᕙᓗᑦᑕᐅᖃᑦᑕᓗᑎᑦ ᖃᐅᔨᒋᐊᕐᕕᖃᓗᕈᑎᑦ. ᐊᑎᓕᐅᕐᑎᐅᒪᑦ ᔦᒥᓯ ᐯ ᑯᐯᓪᓗ ᑕᕐᕋᖓᑕ ᐊᖏᖃᑎᒌᓐᓂᖓᓄᑦ ᐊᒻᒪᓗ ᕌᒃᓚᓐ ᓄᓇᕕᒻᒥ ᐅᔭᕋᓐᓂᐊᕖᑦ ᐊᖏᖃᑎᒌᒍᑎᖏᓐᓄᑦ, ᒪᑭᕝᕕᒃ ᐱᖁᔭᓕᕆᓂᑎᒍᑦ ᒪᓕᒐᓕᐅᕐᓂᓕᕆᓂᑎᒍᑦ ᑭᒡᒐᑐᕐᑎᐅᕗᖅ ᓄᓇᕕᒻᒥᐅᑦ ᐃᓄᑐᐃᓐᓇᖏᓐᓂᑦ, ᑕᒪᓐᓇᓗ ᓇᓗᕐᖁᑎᒍᑎᐅᒋᐊᖃᖕᖏᓚᕆᑦᑐᖅ. ᑯᐯᒃ ᖃᐅᔨᒪᖕᖏᓯᕐᑐᒋᐊᖃᕈᓐᓀᑐᖅ ᒪᑭᕝᕕᒥᑦ ᐃᓘᓐᓈᒍᑦᓯᐊᓗ ᓲᓱᑦᓴᕆᐊᖃᕐᓱᓂ ᔦᒥᓯ ᐯ ᑯᐯᓪᓗ ᐊᖏᖃᑎᒌᒍᑎᖓᑕ ᐱᑦᔪᑎᖓᓂᑦ. ᐃᓄᑐᐃᓐᓀᑦ ᐊᖏᑐᐃᓐᓇᓚᖓᒍᓐᓀᑐᑦ ᖃᓪᓗᓈᓄᑦ ᐊᐅᓚᑕᐅᒍᓗᑐᐃᓐᓇᓂᕐᒥᒃ 2020 ᐊᕐᕌᒍᖏᓐᓃᓕᕐᑎᓗᑕ.
“ᓄᕙᓐᓈᓗᒃ ᐱᑦᔪᑎᐅᖕᖏᓚᖅ ᐃᓄᐃᑦ ᖃᐅᔨᒋᐊᕐᕕᐅᖃᑦᑕᖏᓐᓂᖏᓐᓄᑦ,” ᐅᖃᕐᑐᖅ ᓵᓕ ᒍᐊᑦ. “ᐃᓱᒫᓗᑦᑐᒪᕆᐅᔪᒍᑦ ᓄᕙᓐᓈᓗᒃ ᑯᕉᓇᕓᕋᔅ ᐃᕐᐹᑎᒋᐊᓪᓚᑐᐃᓐᓇᓚᖓᓂᖓᓂᑦ ᐅᔭᕋᓐᓂᐊᕖᑦ ᐅᒃᑯᐃᑕᐅᒋᐊᓪᓚᐸᑕ. ᐅᑉᐱᕈᓱᖕᖏᑐᒍᑦ ᐃᓄᐃᑐᐃᓐᓀᑦ ᐊᑦᑐᑕᐅᒐᔭᖕᖏᑑᓂᖏᓐᓂᑦ ᓄᕙᓐᓈᓗᒻᒧᑦ ᐱᓇᓱᑦᑏᑦ ᐅᑎᕐᑕᑲᖃᑦᑕᑎᓪᓗᒋᑦ ᓄᓇᕕᒻᒧᑦ.”
-30-
ᖃᐅᔨᒋᕐᕕᓴᖅ:
ᑳᓴᓐ ᑕᒍᕐᓈᖅ
ᑐᓴᐅᒪᔪᓕᕆᓂᕐᒥᒃ ᑐᑭᒧᐊᑦᑎᓯᔨ
ᒪᑭᕝᕕᒃ
ctagoona@makivik.org
www.makivik.org
ᒪᑭᕝᕕᒃ ᑎᒥᐅᔪᖅ ᓄᐃᑕᐅᓯᒪᑦᓱᓂ ᓄᓇᑖᕐᓂᒧᑦ ᐊᖏᖃᑎᒌᒍᑎᑎᒍᑦ ᑎᓕᔭᐅᒪᐅᑎᖃᕐᓱᓂ ᐊᐅᓚᑦᓯᓂᐊᕐᓂᒥᒃ ᑮᓇᐅᔭᕐᑖᕆᔭᐅᓯᒪᔪᓂᑦ ᓄᓇᕕᒻᒥᐅᑦ ᐃᓄᑐᐃᓐᓇᖏᓐᓄᑦ ᔦᒥᓯ ᐯ ᑯᐯᓪᓗ ᑕᕐᕋᖓᑕ ᐊᖏᖃᑎᒌᒍᑎᖓᒍᑦ. ᒪᑭᕝᕕᒃ ᐊᐅᓚᑦᓯᓂᖃᕐᒥᔪᖅ ᕿᑐᕐᖏᐅᑎᑦᓯᓂᕐᒥᒃ ᑖᒃᑯᓂᖓ ᑮᓇᐅᔭᓂᑦ ᑫᓪᓚᑐᐃᓂᕐᒥᓗ ᒪᑭᑉᐸᓕᐊᓂᕐᒥᒃ ᐱᕙᓪᓕᐊᑎᑦᓯᓂᕐᒥᒃ ᐃᑲᔪᕐᓯᒪᓂᒃᑯᑦ ᐃᓄᑐᐃᓐᓇᓄᑦ ᓇᒻᒥᓂᖁᑎᒋᔭᐅᔪᐃᑦ ᖄᖏᕐᓂᑯᓕᐅᕐᑏᑦ ᓄᓇᕕᒻᒥ. ᒪᑭᕝᕕᒃ ᑫᓪᓚᑐᐃᒍᑎᓕᒃ ᐊᓯᐅᔨᔭᐅᑎᑦᓯᑌᓕᑦᓱᓂᓗ ᐃᓄᐃᑦ ᐃᓗᕐᖁᓯᖓᓂᑦ ᐅᖃᐅᓯᖓᓂᓪᓗ ᖃᓄᐃᖕᖏᓯᐊᕆᐊᖃᕐᓂᒥᒃ, ᓂᕿᖃᑦᓯᐊᕆᐊᖃᕐᓂᒥᒃ ᐊᒻᒪᓗ ᐊᔪᕐᓴᓂᕐᒥᒃ ᓄᖑᑎᕆᓂᕐᒥᒃ, ᐊᒻᒪᓗ ᐃᓕᓐᓂᐊᓯᒪᒋᐊᖃᕐᓂᖏᓐᓂᑦ ᐃᓄᑐᐃᓐᓀᑦ ᓄᓇᓕᓐᓂ.