ᐊᖏᕐᑕᐅᒋᐊᙯᓐᓈᑐᑦ ᑲᑐᑦᔮᕆᑦᓱᒍ ᐊᕙᑕᖅ – ᒪᑭᕝᕕᒃ ᑐᓴᕋᑦᓴᖓᑦ
ᐊᕐᓇᓕᖕᖒᑎᕕᒃ 14, 2026 – ᒪᓐᑐᔨᐊᓪ, ᑯᐯᒃ – ᐊᕙᑕᖅ, ᓄᓇᕕᐅᑉ ᐃᓄᐃᑦ ᐱᐅᓯᑐᖃᓕᕆᕕᖓᑦ ᐊᒻᒪᓗ ᒪᑭᕝᕕᒃ ᑯᐊᐳᕇᓴ ᐊᑎᓕᐅᖃᑎᒌᑦᑐᕕᓃᑦ ᐊᑑᑎᔭᐅᒋᐅᕐᑐᒥᒃ ᐱᓇᓱᐊᓚᖓᓂᕐᒧᑦ ᐊᖏᕐᓯᒪᒍᑎᒥᒃ ᓄᐃᑦᓯᓂᕐᒧᑦ “ᓱᑲᒃ” ᐅᖃᐅᓯᕐᒥ ᐊᖓᔪᕐᖃᐅᕕᒻᒥᒃ. ᐱᓇᓱᐊᕋᑦᓴᖃᓚᖓᔪᖅ ᓄᓇᕕᒻᒥ ᐃᓄᒃᑎᑐᑦ ᐅᖃᐅᓯᕐᒥᒃ ᐊᓐᓇᑎᑦᓯᓂᕐᒥᒃ, ᐊᑯᓃᕐᑐᒧᑦ-ᓯᕗᓂᕐᒥ ᑐᕌᒐᖃᕐᓗᓂ ᐊᑐᓪᓚᕆᑦᑕᐅᑎᓕᕐᓗᒍ ᐅᖃᐅᓯᖅ, ᑌᒣᑦᓯᒪᒻᒥᒪᑦ ᐃᓄᐃᑦ ᐊᓂᕐᕋᓯᒪᕕᖓᓂ ᓄᓇᖓᓂ.
“ᑖᓐᓇ ᐅᖃᐅᓯᕗᓐᓂᒃ ᐊᓐᓇᑎᑦᓯᒍᑎᓄᑦ ᐊᑐᕐᓂᖃᓪᓚᕆᑦᓱᓂ ᐊᓪᓗᕆᐊᕐᓂᖅ,” ᐅᖃᓚᐅᕐᑐᖅ ᒍᐃᓕᐊᒻ ᑕᒍᕐᓈᖅ, ᐊᖓᔪᕐᖄᖅ ᐊᕙᑕᖅ ᐱᐅᓯᑐᖃᓕᕆᕕᒻᒥ. “ᐊᕐᕌᒍᓂ ᐊᒥᓲᓕᕐᑐᓂᒃ ᐱᓇᓱᐊᕐᓯᒪᓕᕐᖁᒍᑦ ᐅᓪᓗᒥᒧᑦ ᑎᑭᓚᕿᒍᑎᕗᓐᓂᒃ, ᐊᒥᓱᕕᑦᓱᑎᒃ ᐃᓄᒻᒪᕇᑦ ᑲᑎᖕᖓᓂᕆᓯᒪᓕᕐᑕᖏᑎᒍᑦ, ᐱᒋᐊᕐᑐᕕᓂᐅᑦᓱᑎᒃ ᐊᕐᕌᒍᖓᓂ 1981ᒥ, ᐱᓇᓱᐊᕐᑕᐅᓯᒪᓪᓚᕆᑦᑐᑎᒍᑦ ᑐᓴᕐᑎᓯᒍᑎᖓᑎᒍᑦ ᐃᓪᓕᕆᔭᕗᑦ – ᑐᓴᕐᑎᓯᒍᑎ-ᐅᑉ ᐃᓄᒃᑎᑐᑦ ᐅᖃᐅᓯᕐᒨᓕᖓᔪᓂᒃ, ᐊᒻᒪᓗ ᐅᖃᒻᒪᕆᒍᑎᒃ ᐊᑦᑕᓀᓕᑎᑦᓯᒍᑎᓄᑦ ᐃᓄᒃᑎᑑᕐᓂᒥᒃ ᓄᓇᕕᒻᒥ ᐊᖏᕐᓯᒪᒍᑎᒥᒃ ᐊᑎᓕᐅᕐᑕᐅᔪᕕᓂᕐᒥ 32 ᐃᓄᐃᑦ ᑭᒡᒐᑐᕐᑎᖏᑦᑕ ᑕᒃᑯᐊᓂ, ᐃᓚᐅᑎᓪᓗᒋᑦ 2026-ᒥ ᐊᕙᑕᖅ ᐃᓄᒻᒪᕇᑦ ᑲᑎᖕᖓᓂᒻᒪᕆᖓᓂ, ᑲᑎᖕᖓᑎᓪᓗᒋᑦ ᒪᓐᑐᔨᐊᒥ. ᐊᑎᓕᐅᕐᑕᐅᓂᖓᑕ ᑭᖑᓂᐊᒍᑦ ᐊᕙᑕᒃᑯᓂ ᐊᖓᔪᕐᖄᒧᑦ ᒍᐃᓕᐊᒻ ᑕᒍᕐᓈᒧᑦ, ᐊᒻᒪᓗ ᒪᑭᕝᕕᒥ ᐊᖓᔪᕐᖄᒧᑦ ᐱᑕ ᐋᑕᒥᒧᑦ, ᐊᒻᒪᓗᑦᑕᐅᖅ ᑮᓇᐅᔭᓕᕆᔨᖏᓐᓄᑦ ᐊᕙᑕᒃᑯᓂ ᒍᐃᓕᐊ ᓂᖏᐅᕐᒧᑦ, ᐊᒻᒪᓗ ᔮᔨ ᐴᑎᒧᑦ ᒪᑭᕝᕕᑯᓐᓂ, ᐊᓱᐃᓛ ᐃᓄᐃᑦ ᐃᓄᑐᙯᑦ ᐊᓪᓚᓯᒪᔪᖁᑎᒥᒃ ᐊᑎᓕᐅᖃᑎᐅᓯᓚᐅᔪᕗᑦ.
“ᐃᓄᒃᑎᑑᕐᓂᐅᑉ ᐅᖃᐅᓯᐅᑉ ᐱᑕᙯᓐᓇᑎᑕᐅᓂᖓ ᔦᒻᔅ ᐯ ᐊᒻᒪᓗ ᑯᐯᒃ ᑕᕐᕋᖓᑕ ᐊᖏᖃᑎᒌᓐᓂᖓᓂ ᐃᓚᒋᔭᐅᑎᑕᐅᓯᒪᖕᖏᒪᑦ, 1975-ᒥ ᐊᑎᓕᐅᕐᑕᐅᔪᕕᓂᕐᒥ” ᐅᖃᕐᑐᕕᓂᖅ ᐱᑕ ᐋᑕᒥ, ᒪᑭᕝᕕᒃ ᑯᐊᐳᕇᓴᒥ ᐊᖓᔪᕐᖄᖅ.
“ᑎᓕᔭᐅᒪᒍᑎᖃᕋᑦᑕ ᐊᖏᖃᑎᒌᓐᓂᒥᒃ ᑲᔪᓯᑎᑦᓯᓂᕐᒥᒃ, ᐊᒻᒪᓗ ᐃᓄᐃᑦ ᐃᓅᓯᖏᓐᓂᒃ ᐱᐅᓯᒋᐊᕆᓂᕐᒥᒃ. ᐅᖃᐅᓯᖅ ᐃᓅᓯᑦᑕ ᐃᓚᒋᓪᓚᕆᒻᒪᐅᒃ, ᑌᒣᒻᒪᓗ ᐅᐱᒋᔭᖃᕐᐳᒍᑦ ᐱᓇᓱᐊᖃᑎᖃᕆᐊᒥᒃ ᐊᕙᑕᒃᑯᓂᒃ ᓴᐳᑦᔨᓯᒪᒋᐊᒥᓪᓗ ᐊᕙᑕᒃᑯᑦ ᑭᖑᓂᕐᒥᓂᑕᕐᓂᒃ ᐱᓇᓱᐊᕐᑕᖏᓐᓂᒃ ᐅᖃᐅᓯᐊᐱᕗᓐᓂᒃ ᐱᑕᙯᓐᓇᑎᑦᓯᓂᕐᒥ. ᐃᓘᓐᓇᑯᑦ ᑐᓂᒪᒍᑎᖃᕐᐳᒍᑦ ᐊᕙᑕᒃᑯᓂᒃ ᐱᓇᓱᖃᑎᖃᓚᖓᓂᕐᒥᒃ ᓱᑲᒃ ᓄᐃᑕᐅᑎᓪᓗᒍ.”
ᐱᓇᓱᐊᓚᖓᓂᕐᒧᑦ ᐊᖏᕐᓯᒪᒍᑎ ᐅᖃᕐᓯᒪᔪᖅ ᐃᒫᒃ, “ᐃᓪᓗᕕᒐᖅ ᐃᓗᒪᖃᑦᑕᓕᑐᐊᕐᒪᑦ ᐊᕿᓕᑦᓱᓂᓗ, ᐃᓄᐃᑦ ᓇᑉᐯᓱᕕᓃᑦ ᓱᑲᕐᒥᒃ ᐃᓪᓘᑉ ᐃᓗᐊᓂ, ᓇᐸᑕᕐᒥᒃ ᓇᑎᕐᒧᑦ ᓇᑉᐯᓱᑎᒃ ᖁᓛᓄᑦ ᐃᑯᕐᕆᑎᕆᒍᑎᒋᑦᓱᒍ, ᐃᓚᒌᑦ ᐃᓪᓗᒦᑦᑐᑦ ᐊᑦᑕᓈᕐᑐᒨᕇᒃᑯᓯᕐᓱᒋᑦ ᐅᕐᖂᔪᒦᖏᓐᓇᕈᓐᓇᓯᑎᑦᓱᒋᓗ ᑭᖑᕚᓂᑦ, ᖃᓪᓗᓈᑦ ᒪᓕᒐᓕᐊᕆᓲᖏᑦ ᐃᓄᒃᑎᑐᑦ ᐅᖃᐅᓯᕐᒥᒃ ᐊᔭᐅᕐᑐᐃᓯᒪᓕᕐᒪᑕ, ᖁᓛᖓᓂᒃ ᐊᕿᓕᓚᖀᓯᒪᑦᓱᑎᒃ. ᑕᒐᑕᒐᐅᑎᓪᓗᒍ, ᓇᑉᐯᓕᕐᖁᒍᑦ ᓱᑲᒃ ᐅᖃᐅᓯᓕᕆᓂᕐᒧᑦ ᐊᖓᔪᕐᖃᐅᕕᒃ-ᒥᒃ, ᑖᓐᓇ ᐃᓗᐊᓂ ᓇᑉᐸᑕᐅᔪᖅ, ᐃᒫᒃ ᐃᓄᒃᑎᑐᑦ ᐅᖃᐅᓯᖅ ᐊᑦᑕᓀᑦᑐᒦᓪᓗᓂ ᕿᑐᕐᖓᕗᓐᓄᑦ ᕿᑐᕐᖓᖏᓐᓄᓗ ᓇᐸᖏᓐᓇᒍᓐᓇᓚᖓᖁᓗᒋᑦ. ᓱᑲᒃ ᐃᓂᒥᓅᕐᑐᖅ ᒪᑭᕝᕕᑯᑦ ᐊᕙᑕᒃᑯᓗ ᓴᓂᐊᓂ, ᐊᑕᐅᓯᕐᒥᒃ ᐱᑦᔪᑎᖃᕐᓱᓂ: ᐃᓄᒃᑎᑐᑦ ᐅᖃᐅᓯᕐᒥᒃ ᐆᒪᑦᓯᐊᑎᑦᓯᓗᓂ ᓄᓇᕕᒻᒥ ᐃᓅᓯᕆᔭᐅᔪᓂ ᐃᓚᒋᔭᐅᖏᓐᓇᑎᑦᓯᐊᓗᒍ, ᓯᕗᓂᕐᒥ ᑖᕗᖓᓕᒫᖅ.”
“ᐱᓇᓱᐊᓯᓚᐅᔪᕗᒍᑦ ᑕᒪᑦᓱᒥᖓ ᐅᖃᐅᓯᕐᒥ ᐱᓇᓱᐊᕐᓂᒥᒃ, ᐊᕐᕌᒍᓂ ᐊᒥᓱᓂᒃ ᖄᖏᓕᕐᑐᓂᑦ, ᓱᓇᖃᑦᔭᑎᓐᓇᒍ,” ᐅᖃᕐᑐᕕᓂᖅ ᔦᐱᑎ ᓄᖕᖓᖅ. “ᐊᑖᑕᑦᓯᑑᐅᑯᕗᑦ ᑭᖑᓪᓕᐹᖑᓐᓂᒪᑕ ᐃᓄᒃᑎᑐᓪᓚᕆᒃ ᐅᖃᓕᒪᓲᓂᑦ. ᐊᓯᑦᔨᐸᓪᓕᐊᓂᖏᑦ ᐱᒋᐊᓯᔪᕕᓃᑦ ᐃᓕᓴᕐᕕᒨᕐᑕᐅᖃᓯᓂᕕᓂᕗᓐᓂᒃ. ᕿᑐᕐᖓᕗᑦ ᐃᓄᒃᑎᑐᑦ ᐅᖄᕐᖃᔦᓕᕐᐸᓕᐊᔪᑦ. ᖃᓄᐃᓕᖓᔪᒦᓐᓂᖓ ᐅᐃᒪᓇᕐᓯᓯᒪᓕᕐᑐᖅ.
ᐃᓘᓐᓇᖏᓐᓂ ᓄᓇᕕᒻᒥ ᓄᓇᓕᓐᓂᑦ ᓄᓇᓕᒻᒥ ᐱᐅᓯᑐᖃᓕᕆᔨᖏᑦ ᐱᓇᓱᖃᑎᒋᓗᒋᑦ ᐃᓄᒃᑎᑐᑦ ᐅᖃᐅᓯᕐᒥᒃ ᐱᑕᙯᓐᓇᑎᑦᓯᓂᕐᒧᑦ ᐱᓇᓱᐊᓚᖓᕗᒍᑦ. ᐸᕐᓀᒍᑎᖃᕐᑐᒍᑦ ᑐᖕᖓᕕᓕᕐᑐᐃᒍᑎᓂᒃ ᓱᑲᒃ ᐅᖃᐅᓯᕐᒥᒃ ᑲᑎᖕᖓᓂᒻᒪᕆᖃᕈᑎᑦᓴᓂᒃ ᐊᕐᕌᒍᖓ 2028 ᐱᒋᐊᕐᖃᒥᐅᓕᕐᐸᑦ.”
ᐱᓇᓱᖃᑎᒌᒍᑎᓂᒃ ᑲᑎᖕᖓᔨᓂᒃ, ᑲᑎᖕᖓᔨᑕᖃᕐᓱᑎᒃ ᓯᑕᒪᐅᔪᕐᑐᓂᒃ ᑲᑎᖕᖓᔨᓂᒃ, ᓄᐃᑕᔪᖃᕐᓯᒪᓕᕐᑐᖅ ᑖᒃᑯᓈᓐᓂ ᒪᕐᕉᓂᑦ ᑎᒥᐅᔫᓂᑦ ᑲᑎᖕᖓᔨᑕᖃᕐᓱᓂ, ᓄᑖᑉ ᐅᖃᐅᓯᕐᒧᑦ ᐊᖓᔪᕐᖃᐅᕕᐅᑉ ᐋᕐᕿᓱᕐᓯᒪᓂᑦᓴᖓᓂᒃ ᐱᕙᓪᓕᐊᑎᑦᓯᓱᑎᒃ, ᑎᑭᐅᑎᒻᒥᓱᑎᒃ ᐱᓇᓱᐊᓚᖓᓂᕐᒧᑦ ᐊᖏᕐᓯᒪᒍᑎᐅᑉ ᐊᑎᓕᐅᕐᑕᐅᓂᖓᓄᑦ.
-30-
ᖃᐅᔨᒋᐊᕐᕕᓴᖅ:
ᔪᐊᓇ ᕈᐅ
ᐊᕙᑕᖅ ᑐᓴᐅᒪᖃᑎᒌᓐᓂᓕᕆᓂᕐᒥ ᑐᑭᒧᐊᑦᑎᓯᔨ
jrowe@avataq.qc.ca
(514) 449-1968
ᑳᑐᕆᓐ ᒧᐊᕆᓪ
ᒪᑭᕝᕕᒃ ᑐᓴᐅᒪᖃᑎᒌᓐᓂᓕᕆᓂᕐᒥ ᑐᑭᒧᐊᑦᑎᓯᔨ
kmorrill@makivvik.ca
(514) 745-8880 ext. 2227
ᐊᕙᑕᖅ ᐱᐅᓯᑐᖃᓕᕆᕕᒃ ᐱᑕᖃᕐᑎᓯᓲᖅ ᐊᑦᑕᓀᑦᑐᒥᒃ ᑐᖕᖓᕕᖃᕐᑎᓯᑦᓱᓂ ᐅᓪᓗᒥ ᐃᓄᐃᑦ ᐃᓅᓯᕆᑦᓱᒍ ᐃᓗᕐᕈᓯᖓᓂᒃ. ᑌᒪᖕᖓᓂ 1980ᒥ
ᓄᐃᑕᐅᓕᕐᓂᕋᒥᓂᑦ, ᐊᕙᑕᖅ ᐱᕈᕐᑎᓯᓯᒪᔪᖅ ᐃᓗᕐᕈᓯᕐᒧᐊᖓᔪᓂᒃ ᓯᕗᓕᕐᑎᓚᕆᒋᔭᐅᓕᕐᓱᓂ ᓄᓇᕕᒻᒥ ᐃᓄᓐᓄᑦ ᐊᒻᒪᓗ ᐱᒻᒪᕆᒥᒃ
ᐱᓇᓱᒍᑎᑦᓴᖃᐅᑎᒋᔭᐅᑦᓱᓂ ᐃᓄᐃᑦ ᐃᓗᕐᕈᓯᖓᓅᓕᖓᔪᓄᑦ ᑲᓇᑕᒥ ᑲᓇᑕᐅᓪᓗ ᓯᓚᑖᓂ. ᑐᕌᒐᖃᕐᑐᒍᑦ ᐱᑕᙯᓐᓇᑎᑦᓯᒍᒋᓗᒋᑦ ᐃᓄᐃᑦ
ᐃᓗᕐᕈᓯᖓᓂᒃ ᐅᖃᐅᓯᖓᓂᓪᓗ ᐊᑐᑦᓯᐊᖏᓐᓇᖁᓗᒋᑦ ᓯᕗᓂᕐᒥ, ᑭᖑᕚᕆᔭᐅᔪᑦ ᐱᕙᓪᓕᕈᑎᖃᖁᓗᒋᑦ ᑭᖑᕝᕕᑕᐅᒍᑎᒋᓯᒪᔭᒥᓂᒃ ᓯᕗᓕᑦᑕ
ᓯᓚᑐᓂᖏᓐᓄᑦ.
ᒪᑭᕝᕕᒃ ᑎᒥᐅᔪᖅ ᑖᓐᓇ ᑎᓕᔭᐅᒪᒍᑎᓕᒃ ᔦᒻᔅ ᐯ ᐊᒻᒪᓗ ᑯᐯᒃ ᑕᕐᕋᖓᑕ ᐊᖏᖃᑎᒌᓐᓂᖓ ᐊᑐᕐᓱᒍ ᓄᓇᕕᒻᒥ ᐃᓄᓐᓂᒃ
ᑭᒡᒐᑐᕐᓂᐊᑎᓪᓗᒍ ᐊᒻᒪᓗ ᓴᐳᑦᔨᓗᓂ ᐱᔪᓐᓇᐅᑎᖏᓐᓂᒃ ᐱᓇᓱᐊᕈᒪᔭᖏᓐᓂᓗ. ᒪᑭᕝᕕᒃ ᐱᓇᓱᐊᓲᖅ ᓯᕗᒧᐊᑦᑎᓯᒍᑎᓂᒃ
ᐱᓂᐊᕐᓂᓕᕆᓂᑎᒍᑦ, ᐃᓅᖃᑎᒌᓅᓕᖓᔪᑎᒍᑦ, ᐃᓗᕐᕈᓯᕐᒨᓕᖓᔪᑎᒍᑦ ᐊᒻᒪᓗ ᑮᓇᐅᔭᑎᒍᑦ-ᒪᑎᑕᒐᓱᓐᓂᑎᒍᑦ ᓄᓇᕕᒻᒥ ᐃᓄᐃᑦ
ᖃᓄᐃᖕᖏᓯᐊᕐᓂᖏᓐᓂᒃ ᐊᒻᒪᓗ ᓴᐳᑦᔨᓲᖑᑦᓱᓂ ᓄᓇᓕᓕᒫᓂ ᑲᔪᓯᑎᑕᐅᒍᓐᓇᑐᓂᒃ ᐱᕙᓪᓕᐊᑎᑦᓯᒍᑎᓂᒃ.