ᑐᓴᕋᑦᓭᑦ
ᕕᕗᐊᕆ 6, 2019 – ᑰᔾᔪᐊᒥᑦ ᓄᓇᕕᒻᒥᑦ – ᒪᑭᕝᕕᐅᑉ ᐊᖓᔪᕐᖄᒪᕆᖓᑦ ᐅᖃᕐᓯᒪᓕᕐᐳᖅ ᐃᓄᐃᑦ ᓄᓇᕕᒻᒦᑐᑦ ᐊᔪᐃᓐᓇᖏᓐᓇᓂᐊᕆᐊᖏᓐᓂᒃ ᐃᒻᒥᒎᓪᓚᕆᑦᑐᒥᒃ ᐅᖃᐅᓯᕐᒧᑦ ᐱᖁᔭᓕᐅᕈᑎᑦᓴᒥᒃ ᓴᐳᑦᔨᓯᒪᒍᑎᐅᓂᐊᕐᑐᒧᑦ ᐃᓄᑦᑎᑑᕐᓂᒥᒃ, ᑖᒃᑯᐊ ᓄᐃᑕᓂᖃᖕᖏᒪᑕ ᑖᒃᑯᓇᓂ ᑐᓴᕐᓴᐅᖃᒻᒥᓕᕐᑐᒥᑦ ᓄᓇᖃᕐᖄᓯᒪᔪᓄᐊᖓᔪᓂᒃ ᐱᖁᔭᓕᐊᖑᓯᒪᓂᐊᕐᑐᓂᒃ. ᓵᓕ ᒍᐊᑦ ᐅᖃᓚᐅᕐᑐᖅ ᐃᓄᕐᓴᓂᕃᑦᓱᓂ ᓴᐳᑦᔨᓯᒪᒍᑎᑦᓴᒧᑦ ᐱᓕᐅᒥᑎᑦᓯᒋᐊᕈᑎᑦᓴᒧᓪᓗ ᐱᕙᓪᓕᐊᑎᑦᓯᓂᐅᔪᒥᒃ ᑕᒪᑦᓱᒥᖓ ᓯᕗᓪᓕᐹᖑᓂᖃᕐᑐᒥᒃ ᓄᓇᖃᕐᖄᓯᒪᔪᓄᑦ ᐅᖃᐅᓯᕆᔭᐅᓯᒪᔪᒥᒃ ᑲᓇᑕᒥ – ᐃᓄᑦᑎᑑᕐᓂᒥᒃ.
“ᐊᓪᓚᕕᖃᓚᐅᔪᕗᖓ ᑲᕙᒪᒃᑯᓄᑦ ᐊᐅᒍᔅᑎ 2018-ᒥ ᐅᐱᒋᔭᖃᕐᓂᕋᕐᓱᖓ ᑎᓕᔭᐅᕐᖃᒥᐅᓚᐅᔪᒥᒃ ᑐᕐᖃᑕᕐᕕᒧᑦ ᑕᒪᑦᓱᒧᖓ ᑲᓇᑕᒥ ᐃᓗᕐᕈᓯᓕᕆᓂᕐᒧᑦ ᐱᐅᓯᑐᖃᓕᕆᓂᕐᒧᓗ, ᐆᒧᖓ ᐸᑉᓗ ᕌᑎᒋᐊᔅᒧᑦ (Pablo Rodriguez) ᐊᒻᒪᓗ ᑭᓪᓕᖃᕐᕕᒋᓚᐅᕐᓱᒍ ᖃᓄᐃᓕᖓᐅᑎᕗᓐᓄᑦ ᑕᒪᑦᓱᒪᐅᑉ ᒥᑦᓵᓄᑦ, ᐃᒻᒥᒎᓕᖓᓪᓚᕆᑦᑐᒥᒃ ᐱᖁᔭᓕᐅᕐᑕᐅᒪᔪᖃᕆᐊᖃᕐᓂᖓᓄᑦ ᐃᓄᑦᑎᑑᕐᓂᐅᑉ ᐅᖃᐅᓯᖓ ᐱᓪᓗᒍ,” ᑌᒣᓕᑦᓱᓂ ᐅᖃᓚᐅᕐᑐᖅ ᒪᑭᕝᕕᐅᑉ ᐊᖓᔪᕐᖄᒪᕆᖓᑦ ᓵᓕ ᒍᐊᑦ. “ᐃᓄᑦᑎᑑᕐᓂᐅᑉ ᐅᖃᐅᓯᖓ ᐆᒪᒻᒪᑦ ᓲᖑᔫᑎᑕᐅᑦᓱᓂᓗ ᐊᒻᒪᓗ ᐱᓕᐅᒥᓂᕐᓴᐅᖁᑦᓱᒍ ᐃᓕᑕᕆᔭᐅᓪᓚᕆᑦᑑᖁᓕᕋᑦᑎᒍᑦ ᑲᓇᑕᒧᑦ.”
ᒪᑭᕝᕕᑯᑦ ᓇᑯᕐᓴᓂᖃᓚᐅᖕᖏᒪᑕ ᑖᒃᑯᓂᖓ ᓄᑖᓂᒃ ᑲᕙᒪᑐᖃᒃᑯᑦ ᓄᓇᖃᕐᖄᓯᒪᔪᓄᐊᖓᔪᓂᒃ ᐅᖃᐅᓯᓕᕆᓂᕐᒧᑦ ᐱᖁᔭᖏᓐᓂᒃ ᐃᓚᐅᑎᑦᓯᖏᑦᑑᒋᐊᖏᓐᓄᑦ ᐃᓄᓐᓄᐊᖓᓗᐊᖑᐊᑐᒥᒃ ᓴᐳᑦᔨᓯᒪᒍᑎᑦᓴᓂᒃ ᐃᓄᑦᑎᑑᕐᓂᒥᒃ, ᐅᖃᓪᓚᑕᐅᓯᒪᓚᐅᔪᒐᓗᐊᕐᑎᓗᒍ ᐃᓚᐅᖃᑕᐅᒐᔭᕆᐊᖓᓄᑦ, ᐊᒻᒪᓗ ᐃᓄᐃᑦ ᐱᓇᓱᐊᖃᑎᖃᑦᓯᐊᕋᓱᐊᓚᐅᕋᓗᐊᕐᑎᓗᒋᑦ ᑲᕙᒪᑐᖃᒃᑯᓂᒃ ᑖᒃᑯᓇᓂ ᐊᒥᓱᒐᓚᓐᓂ ᑕᕐᕿᐅᓚᐅᕐᑐᓂ. ᑕᒪᓐᓇ ᐱᖁᔭᓕᐅᖑᒐᓱᐊᕐᑐᓂᒃ ᐊᓪᓚᑕᐅᔪᖃᕐᐸᓕᐊᑎᓪᓗᒍ ᐃᓄᕐᓴᓚᕆᓚᐅᕐᒪᑕ ᐊᒻᒪᓗ ᐱᖁᔭᑎᒍᑦ ᑌᔭᐅᓂᖃᕈᓐᓇᖏᑦᑑᓱᓂ ᐱᕙᓪᓕᐊᑎᑦᓯᖃᑎᒌᓐᓂᒥᒃ ᑕᒪᑦᓱᒥᖓ ᐃᓄᐃᑦ ᐅᑉᐱᓕᕐᑎᑕᐅᒪᓚᐅᕋᓗᐊᕐᑎᓗᒋᑦ.
“ᐱᖁᔭᓕᐅᕐᑎᒪᕆᐅᓯᒪᓂᕋᒍᑦ ᖃᐅᔨᒪᕗᖓ ᑕᒪᓐᓇ ᐃᓄᑦᑎᑑᕐᓂᖅ ᓯᕗᓪᓕᐸᐅᑦᓱᓂ ᓄᓇᖃᕐᖄᓯᒪᔪᓄᑦ ᐅᖃᐅᓯᕆᔭᐅᑦᓱᓂ ᐃᓕᑕᕆᔭᐅᒪᔪᕐᑎᒍᑦ ᐃᓄᑦᑎᑑᓕᕐᑎᓯᒍᑎᐅᓯᒪᒋᐊᖓᓄᑦ ᑲᓇᑕᐅᑉ ᐱᖁᔭᓕᐅᕐᑎᒪᕆᖓᑕ ᐃᓗᐊᓂ, ᐊᒻᒪᓗ ᐊᒥᓱᒻᒪᕆᓐᓂᒃ ᐊᕐᕌᒍᕐᓂᒃ ᑲᔪᓯᑎᑕᐅᒐᓱᐊᓚᐅᔪᒻᒥᓱᓂ,” ᑌᒣᓕᑦᓱᓂ ᐅᖃᓚᐅᕐᑐᖅ ᓵᓕ ᒍᐊᑦ. “ᓱᕐᕋᑕᐅᓂᐊᖕᖏᓚᒍᑦ ᖃᐅᔨᒪᒐᑦᑕ ᑕᒪᓐᓇ ᐱᖁᔭᓕᐊᖑᒐᓱᐊᓕᕐᑐᖅ ᓇᒻᒪᖏᑦᑑᓂᖃᕆᐊᖓᓄᑦ. ᑭᓯᐊᓂᓕ ᐊᔪᐃᓐᓇᖏᓐᓇᓚᖓᔪᒍᑦ ᐊᔭᐅᕆᖏᓐᓇᓗᑕ ᑲᕙᒪᒃᑯᓂᒃ ᐊᒻᒪᓗ ᖃᓄᐃᓕᐅᕐᓂᐊᓱᑕ ᐱᕙᓪᓕᐊᑎᑦᓯᒍᑎᐅᓂᐊᕐᑐᒧᑦ ᐃᓄᓐᓄᐊᖓᓪᓚᕆᑦᑐᒥᒃ ᐱᖁᔭᑦᓴᓂᒃ ᓴᐳᑦᔨᓯᒪᒍᑎᐅᓂᐊᕐᑐᓂᒃ, ᑫᓪᓗᑐᐃᒍᑎᐅᓂᐊᕐᑐᓂᓪᓗ ᐊᓯᐅᑎᑦᓯᑌᓕᒪᒍᑎᐅᓂᐊᕐᑐᒥᓪᓗ ᐅᖃᐅᓯᑦᑎᓂᒃ.”
-30-
ᐅᖄᖃᑎᒋᔭᐅᒍᓐᓇᑐᖅ:
ᒍᐃᓕᐊᒻ ᑕᒍᕐᓈᖅ
ᐊᖓᔪᕐᖄᒪᕆᐅᑉ ᖃᓄᐃᓕᒋᐊᖁᔨᔨᖓᑦ ᐊᒻᒪᓗ
ᑐᓴᐅᒪᒍᑎᓕᕆᓂᕐᒥᒃ ᑐᑭᒧᐊᑦᑎᓯᔨᖓᑦ
ᒪᑭᕝᕕᒃ ᑯᐊᐳᕇᓴᓐ
ᐅᖄᓚᐅᑎᖓ: 819-964-2925
ᖃᕆᑕᐅᔭᒃᑯᑦ: wtagoona@makivik.org
www.makivik.org
ᒪᑭᕝᕕᑯᑦ ᓄᓇᑖᕋᓱᐊᕐᑎᐅᓂᕐᒥᒃ ᑎᒥᐅᔫᒍᑎᖃᕐᐳᖅ ᑎᓕᔭᐅᒪᑦᓱᓂ ᑲᒪᒋᐊᖃᕐᓂᒥᒃ ᓄᓇᕕᐅᑉ ᐃᓄᖏᑦᑕ ᑮᓇᐅᔭᖁᑎᖏᓐᓂᒃ ᐱᕕᖃᕐᑎᑕᐅᓯᒪᔪᓄᑦ ᐊᑖᒍᑦ ᔦᒥᔅᐯᒥᓗ ᑯᐯᒃ ᑕᕐᕋᖓᓂᓗ ᐊᖏᖃᑎᒌᓐᓂᖓᑦ. ᒪᑭᕝᕕᑯᑦ ᐊᑐᕐᑕᐅᒍᓯᖃᕐᒪᑕ ᐃᓚᖃᕐᑐᓂᒃ ᐊᐅᓚᑦᓯᒋᐊᖃᕐᓂᒥᒃ ᑮᓇᐅᔦᕈᑎᐅᒋᐊᓕᓐᓂᓗ ᑕᒪᒃᑯᓂᖓ ᐊᑭᓕᕐᑕᐅᒍᑎᐅᓯᒪᔪᓂᒃ ᐊᒻᒪᓗ ᑫᓪᓗᑐᐃᓗᑎᒃ ᒪᑭᑕᒐᓱᐊᕐᓂᒥᒃ ᐱᕈᕐᓭᓂᕐᒥᒃ ᐃᑲᔪᕐᓯᓂᒃᑯᑦ ᓄᐃᑕᐅᔪᖃᕐᑎᓗᒍ ᐃᓄᓐᓄᑦ ᐊᐅᓚᑕᐅᔪᓂᒃ ᐱᔅᓇᓯᓂᒃ ᓄᓇᕕᒻᒥ. ᒪᑭᕝᕕᑯᑦ ᑫᓪᓗᑐᐃᓂᖃᓲᖑᕗᑦ ᐊᓯᐅᑎᑦᓯᑌᓕᒪᓂᕐᒧᑦ ᐃᓄᐃᑦ ᐃᓗᕐᕈᓯᖓᓂᒃ ᐅᖃᐅᓯᖓᓂᓪᓗ ᐊᒻᒪᓗ ᖃᓄᐃᖏᓯᐊᕐᓂᓕᕆᓂᒃᑯᑦ, ᑐᖕᖓᕕᖃᑦᓯᐊᓂᒃᑯᓗ, ᐊᑦᓱᔫᑎᑦᓯᑌᓕᒪᓂᕐᒥᓗ, ᐊᒻᒪᓗ ᐃᓄᐃᑦ ᐃᓕᓐᓂᐊᓂᖏᓐᓂᒃ ᓄᓇᓕᓐᓃᑎᓪᓗᒋᑦ.