ᑐᓴᕐᑕᐅᓴᐅᑎᒋᒋᐊᓕᒃ
ᔪᓓ 10, 2019: ᒪᑭᕝᕕᒃ ᑯᐊᐳᕇᓴᓐ ᐊᒻᒪᓗ ᐃᓄᕕᐊᓗᐃᑦ ᓄᓇᓕᖏᑦᑕ ᑎᒥᖁᑎᖓ (IRC) ᑐᓴᕐᑕᐅᑎᑦᓯᕘᒃ ᐱᔭᕇᕐᓂᕋᕐᓱᑎᒃ ᐱᓇᓱᐊᕐᑕᐅᒋᐊᓕᓐᓂᒃ ᐊᑕᐅᓯᕈᕐᑎᓱᒋᒃ ᕘᔅᑦ ᐃᐊᕐ ᐊᒻᒪᓗ ᑲᓀᑎᐊᓐ ᓄᐊᑦ ᐊᑦᑕᓀᑦᑑᓱᑎᒃ, ᑲᔪᓯᑦᓯᐊᕈᓐᓇᓚᖓᑦᓱᑎᒃ ᐅᑭᐅᕐᑕᑐᓕᒫᒥ ᖃᖓᑦᑕᔫᕐᓂᐊᑎᐅᓗᑎᒃ. ᑕᒪᓐᓇ ᐃᒫᒃ ᑐᑭᓕᒃ ᕘᔅᑦ ᐃᐊᕐ ᐊᒻᒪᓗ ᑲᓀᑎᐊᓐ ᓄᐊᑦ ᐱᓇᓱᐊᕐᐸᓕᐊᒍᓐᓇᓯᔫᒃ ᐊᑕᐅᓯᕈᕐᑎᓯᓗᑎᒃ ᐊᐅᓚᑦᓯᓂᕐᒨᓕᖓᔪᓂᒃ ᐱᓇᓱᓐᓂᒥᓂᒃ, ᑐᑭᓯᒪᓇᕆᐊᓪᓚᑐᓂᒃ ᖃᖓᓗ ᑕᒪᒃᑯᐊ ᐱᓇᓱᑦᑕᐅᓂᕆᓚᖓᔭᖏᑦ ᐊᑑᑎᓂᐊᕐᒪᖔᑕ ᑐᓴᕐᑎᓯᒍᑎᐅᑦᓴᑎᒋᓛᕐᒥᑎᓪᓗᒋᑦ.
ᐊᑕᐅᓯᕈᕐᑎᑕᐅᓯᒪᓕᕐᓗᓂ ᑲᓀᑎᐊᓐ ᓄᐊᑦ ᑲᔪᓯᑎᑦᓯᓚᖓᔪᖅ ᐅᖓᑖᓄᓗ ᐊᑐᐃᓐᓇᐅᑎᑕᐅᓂᖏᒍᑦ ᐊᑦᑕᓇᖕᖏᑐᑦ, ᑕᒪᐅᙰᓐᓈᑎᑕᐅᓇᖕᖏᑐᒃᑯᑦ ᐊᒻᒪᓗ ᐊᑭᑐᓗᐊᖕᖏᑐᒥᒃ ᖃᖓᑦᑕᔫᕐᓂᐊᓂᒃᑯᑦ ᐱᒍᑦᔭᐅᓂᕐᒥᒃ ᐃᓄᐃᑦ ᑎᒥᐅᔪᐃᓪᓗ ᑕᑎᖃᕐᓗᑎᑭᓯᐊᓂᐅᓲᑦ ᓂᕆᐅᒋᔭᖏᑦᑕ. ᔮᓂ ᐋᑕᒥ, ᕘᔅᑦ ᐃᐊᕐᒥ ᐊᖓᔪᕐᖄᖅ ᐅᓪᓗᒥ, ᐊᑕᐅᓯᐅᓕᕐᑎᓗᒍ ᖃᖓᑦᑕᔫᕐᓂᐊᓂᖅ ᐊᖓᔪᕐᖄᕆᔭᐅᓛᕐᑐᖅ. ᐹᑦᑐᕆᒃ ᑯᕉᐱᓐ, ᐃᓄᕕᐊᓗᐃᑦ ᓄᓇᓕᖏᑦᑕ ᑎᒥᖁᑎᖓᑕ ᐊᖓᔪᕐᖄᖓ ᐊᒻᒪᓗ ᑲᓀᑎᐊᓐ ᓄᐊᑦᒧᑦ ᐊᖓᔪᕐᖄᕆᔭᐅᑦᓱᓂ, ᖃᓄᐃᓘᕐᑎᐅᓂᖓ ᐊᖓᔪᕐᖄᑉ-ᑐᖓᓕᖓ ᐃᓂᒦᓯᓛᕐᑐᖅ. ᐊᑕᐅᑦᓯᑯᑦ, ᐱᑕᖃᕐᑎᓯᓛᕐᑑᒃ ᑲᔪᓯᐅᒐᑦᓯᐊᑐᒥᒃ, ᐅᑭᐅᕐᑕᑐᒥᐅᓅᓕᖓᔪᓂᒃ-ᐱᓇᓱᐊᑦᓯᐊᓂᕐᒥᒃ ᑕᓯᐅᕐᓯᓂᕐᒥᒃ ᑕᑯᓐᓇᒍᓯᖃᕐᓂᒥᓪᓗ ᑖᑦᓱᒧᖓ ᐊᑕᐅᓯᕈᕐᑎᑕᐅᔪᒧᑦ ᖃᖓᑦᑕᔫᕐᓂᐊᓂᕐᒧᑦ ᐅᑭᐅᕐᑕᑐᓕᒫᓂᒃ ᐱᒍᑦᔨᓗᑎᒃ.
100%-ᖓᑦ ᐃᓄᓐᓄᑦ ᓇᖕᒥᓂᕆᔭᐅᑦᓱᓂ ᖃᖓᑦᑕᔫᕐᓂᐊᑎ ᑖᓐᓇ, ᑲᓀᑎᐊᓐ ᓄᐊᑦ ᐃᓘᓐᓈᒍᕐᑐᒥᒃ ᑐᕌᒐᒋᓚᖓᔭᖓ ᐃᒣᓕᖓᔪᖅ ᐊᑲᐅᓯᓕᐅᒥᒃᑫᓗᓂ ᐊᑦᑕᓇᖕᖏᑐᒥᒃ ᑲᔪᓯᑦᓯᐊᑐᒥᒃ ᐃᓄᐃᑦ ᐅᓰᓪᓗ ᐊᐅᓚᑕᐅᓂᖏᓐᓂᒃ ᓄᓇᒥᓄᑦ, ᓄᓇᒥᓂᑦ ᐊᒻᒪᓗ ᐃᓄᐃᑦ ᓄᓇᖓᓂ ᐃᓘᓐᓈᓂ, ᓯᕗᓂᕐᒥ ᓯᕕᑦᑐᕆᐊᕆᒍᓐᓇᕕᖃᕐᓗᓂ ᐊᒥᓲᓂᕐᓴᒋᐊᓪᓚᓄᑦ ᖃᖓᑦᑕᔫᖏᑦᑕ ᐅᐸᖃᑦᑕᕋᔭᕐᑕᖏᓐᓂᒃ. ᐊᔪᐃᓐᓈᕆᔭᙯᓐᓇᓂᐊᕐᑐᖅ ᖃᖓᑦᑕᔫᕐᓂᐊᓂᕐᒥ ᐱᓇᓱᐊᕐᑐᓂ ᓯᕗᓕᕐᓂᒥᒃ ᐱᓇᓱᑦᑎᖃᕐᓂᑯᑦ, ᑲᔪᓯᓗᑎᒃ ᐃᓄᓐᓂᒃ ᓄᓇᖃᕐᖄᓯᒪᔪᓂᓪᓗ ᐱᓇᓱᑦᑎᑖᕋᓱᓐᓂᒥᒃ ᐱᓇᓱᒐᑦᓯᐊᒪᕆᐊᓗᖃᕐᑎᓗᒋᑦ ᑕᕝᕙᓂ ᐱᓇᓱᐊᕐᕕᐅᔪᒥ. ᑕᒪᒃᑯᑎᒎᓇ ᖃᓄᕐᑑᓂᒃᑯᑦ, ᐃᑲᔪᕐᓯᒣᓐᓇᓚᖓᔪᖅ ᐱᕙᓪᓕᐊᑎᑦᓯᓂᕐᒥᒃ ᐊᑦᑕᓇᖏᓐᓂᕐᓴᒥᒃ ᐊᒻᒪᓗ ᖃᓄᐃᑦᑐᑐᐃᓐᓇᑕᖃᕐᓂᓴᒥᒃ ᐅᑭᐅᕐᑕᑐᒥ ᑮᓇᐅᔭᑎᒍᑦ ᒪᑭᑕᒐᓱᐊᕐᓂᒥ ᐅᓪᓗᒥ ᐃᓅᔪᑦ ᓯᕗᓂᕐᒥᓗ ᐃᓅᓂᐊᕐᑐᑦ ᐱᕙᓪᓕᑕᐅᒍᑎᑦᓴᖏᓐᓄᑦ.
“ᐱᔭᕇᕐᑕᐅᓂᖏᑦ ᑖᑦᓱᒧᖓ ᐊᑕᐅᓯᕈᕐᑎᓯᓂᕐᒧᑦ ᐱᓇᓱᐊᕐᑕᐅᒋᐊᓕᓕᒫᑦ ᓇᓗᓀᕐᓯᔪᑦ ᐱᒻᒪᕆᒻᒥᒃ ᓯᕗᒧᑦ ᐊᓪᓗᕆᐊᕐᓂᖏᓐᓂᒃ ᐃᓘᓐᓀᑕ ᐃᓄᐃᑦ ᐅᑭᐅᕐᑕᑐᒥᐅᑦ,” ᐅᖃᓚᐅᕐᑐᖅ ᔮᓂ ᐋᑕᒥ, ᐊᖓᔪᕐᖄᖅ. “ᐊᑕᐅᓯᐅᓕᖓᔪᖅ ᐅᑭᐅᕐᑕᑐᓕᒫᒨᓕᖓᔪᖅ ᖃᖓᑦᑕᔫᕐᓂᐊᓂᖅ ᐱᑕᖃᕐᑎᓯᑦᓱᓂ ᑲᔪᓯᑦᓯᐊᑎᑕᐅᒍᓐᓇᑐᓂᒃ ᐃᓄᓐᓂᒃ ᐅᓯᓂᓪᓗ ᐅᓯᒍᑦᔨᓂᕐᒥᒃ ᐃᑲᔪᕐᓯᒪᓚᖓᔪᖅ ᐊᑲᐅᓯᓕᐅᒥᑎᑦᓯᓕᕐᓗᓂ ᐅᑭᐅᕐᑕᑐᒥᐅᑦ ᐃᓅᓯᖏᓐᓂᒃ ᑮᓇᐅᔭᑎᒍᑦ ᒪᑭᑕᒐᓱᐊᕐᓂᑯᑦ ᐱᕈᕐᐸᓕᐊᓂᒃᑯᑦ ᐱᓇᓱᒐᐅᒍᓐᓇᑐᐃᓪᓗ ᓄᐃᑎᓚᖓᔭᖏᑦᑎᒍᑦ.”
“ᑖᓐᓇ ᐃᓄᓐᓄᑦ-ᓯᕗᓕᕐᑕᐅᓱᓂ ᐋᕐᕿᓱᐃᒍᑎᓪᓚᕆᒃ ᐊᐅᓚᑦᔦᓚᖓᑦᓱᓂ ᑮᓇᐅᔭᒋᐊᓪᓚᓂᒃ ᐱᕈᕐᐸᓕᐊᒋᐊᓪᓚᓂᕐᒥᓗ ᐅᑭᐅᕐᑕᑐᒥ ᓄᓇᓕᓐᓂ ᐱᒍᑦᔨᕕᒋᓲᕗᓐᓂ ᑌᒫᑦᓭᓇᕐᓗ ᖃᖓᑦᑕᔫᓂᒃ ᐃᓅᓯᑦᑕ ᐃᓚᒋᓗᒋᑦ ᑭᓯᐊᓂᐅᓲᓂᒃ ᐊᑦᑕᓇᖕᖏᓂᕐᓴᐅᓕᕐᑎᓯᑦᓱᓂ ᐃᓱᐊᕐᓂᓴᐅᓕᕐᑎᓯᑦᓱᓂᓗ,” ᐅᖃᓚᐅᕐᑐᖅ ᐹᑦᑐᕆᒃ ᑯᕉᐱᓐ, ᐊᖓᔪᕐᖄᑉ-ᑐᖓᓕᖓ.
ᑖᓐᓇ ᓄᑖᖅ ᑲᓀᑎᐊᓐ ᓄᐊᑦ ᐱᒍᑦᔨᓚᖓᔪᖅ ᑲᑎᕐᓱᓯᒪᓕᕐᑐᓂᒃ ᐅᐸᑦᑕᐅᓲᓂᒃ 24-ᓂᒃ ᐅᑭᐅᕐᑕᑐᒥ ᓄᓇᓕᓐᓂᒃ, ᓯᕿᓂᕐᓯᒦᓐᓂᐹᖏᓐᓂᑦ ᐋᑐᒑᒥᑦ, ᒪᓐᑐᕆᐊᓪᒥᑦ ᐊᒻᒪᓗ ᐃᐊᑦᒪᓐᑕᓐᒥᑦ, ᐃᓚᐅᑎᓪᓗᒋᑦ ᑭᑦᑐᕌᕐᑎᓯᒪᖕᖏᑐᑦ ᐊᓯᐊᓄᑦ ᐃᑭᒋᐊᓪᓚᕕᑦᓭᑦ ᐅᐸᒍᒪᔪᒥᓄᑦ ᑐᕌᕐᑕᒥᓄᑦ ᓇᓂᑐᐃᓐᓇᓕᒫᖅ ᑲᓇᑕᒥ, ᐊᒥᐊᕆᑲᒥᐅᑦ ᐊᑕᐅᓯᐅᕕᖓᓂ ᐊᒻᒪᓗ ᐊᓯᖏᓐᓂᑦ. ᓯᕗᓕᕐᓗᓂ ᐱᑕᖃᕐᑎᓯᓂᕐᐸᐅᓂᐊᕐᒥᔪᖅ ᓇᖕᒥᓂᖅ ᖃᖓᑦᑕᔫᒥᒃ ᐅᐸᒍᒪᔭᕐᓱᒍᑎᓕᓐᓂᒃ ᐱᒍᑦᔨᓂᕐᓂᒃ ᐊᖏᔪᕐᓚᖑᐊᖑᓂᕐᓴᓄᑦ ᐱᓇᓱᐊᕐᑐᓄᑦ ᐱᒍᑦᔨᔭᒥᓄᑦ ᑭᖕᖒᒪᒋᔭᓕᓐᓄᑦ ᑕᒪᐅᙰᓐᓈᑎᑦᓯᓂᐊᖕᖏᑐᒥᒃ, ᑲᔪᓯᑦᓯᐊᑐᒥᒃ ᐊᒻᒪᓗ ᑮᓇᐅᔭᕐᒧᑦ ᓈᒻᒪᓯᐊᕐᑐᒥᒃ ᐅᐸᒍᒪᔭᒥᓄᑦ ᐁᑎᑕᐅᓗᓂ/ᐅᑎᐅᑦᔭᐅᓗᓂᓗ ᓇᖕᒥᓂᖅ ᖃᖓᑦᑕᔫᒥᒃ ᐅᐸᒍᒪᔭᕐᓱᑐᑦ ᐱᒍᑦᔭᐅᓂᖏᓐᓂᒃ, ᐊᒻᒪᓗᑦᑕᐅᖅ ᑌᒫᑦᓭᓇᖅ ᓄᐊᑦ ᐊᒥᐊᕆᑲᒥ ᐅᐸᒍᒪᔭᕐᓱᑐᓂᒃ ᖃᖓᑦᑕᔫᕈᑦᔨᓂᕐᒥᒃ ᐱᖕᖑᐊᑎᓂᒃ, ᐅᒥᐊᕐᔪᐊᑯᑦ ᓂᐅᕐᕈᑎᓂᒃ ᐊᓯᖏᓐᓂᓗ ᐊᒥᓲᓈᕐᑎᓱᑎᒃ ᐊᐅᓚᓲᓂᒃ.
-30-
ᑐᓴᕋᑦᓴᓂᐊᕐᓂᒧᑦ ᖃᐅᔨᒋᐊᕐᕕᓭᑦ:
ᒍᐃᓕᐊᒻ ᑕᒍᕐᓈᖅ, ᑐᓴᐅᒪᖃᑎᒌᓐᓂᒧᑦ ᑐᑭᒧᐊᑦᑎᓯᔨ, ᒪᑭᕝᕕᒃ ᑯᐊᐳᕇᓴᓐ, (819)964-2925 wtagoona@makivik.org
ᒫᒃ ᕙᓚᒥᖕ, ᑮᓇᐅᔭᓕᕆᔨᒻᒪᕆ, ᐃᓄᕕᐊᓗᐃᑦ ᑎᒥᐅᔪᖁᑎᖏᑦ ᐱᓇᓱᐊᖃᑎᒌᑦᑐᑦ, (867)678-5429 MFleming@inuvialuit.com