ᕕᕗᐊᕆ 28, 2018, ᖁᐊᕐᑕᒥᑦ, ᓄᓇᕕᒻᒥ – ᒪᑭᕝᕕ ᑯᐊᐳᕇᓴᖅ ᑲᑎᒪᓂᖃᓕᓚᐅᕆᕗᐃᑦ ᖁᐊᕐᑕᒥ ᓄᓇᕕᒻᒥ ᕕᕗᐊᕆ 19 ᐱᓇᓱᐊᕈᓯᕐᑕᖓᓂ ᑲᑎᒪᔨᖏᑦ ᑲᑎᒪᓂᖃᕐᑎᓗᒋᑦ. ᑖᓐᓇ ᐋᓐᑎ ᒧᐊᖃᐅᔅ, ᐊᖓᔪᕐᖄᑉ ᑐᖓᓕᖓᑦ ᒪᑭᑕᒐᓱᐊᕐᓂᒥᒃ ᐱᕙᓪᓕᐊᑎᑦᓯᒐᓱᐊᕐᕕᖓᓄᑦ ᐅᖄᒍᑎᒋᓚᐅᕐᑕᖏᓐᓄᑦ ᒪᑭᕝᕕᐅᑉ ᑲᑎᒪᔨᖏᑦ ᐊᖏᕐᑕᐅᑎᑦᓯᓕᓚᐅᔪᑦ ᓴᐳᒻᒥᒍᑎᐅᓂᐊᕐᑐᓂᒃ ᓄᐃᑕᐅᔪᖃᕋᓱᐊᓕᕐᑎᓗᒍ ᓄᓇᕕᒻᒥ ᑮᓇᐅᔭᒻᒪᕆᓕᕆᕕᑦᓴᒥᒃ ᓄᓇᓕᓕᒫᓄᐊᖓᔪᒥᒃ.
“ᑖᓐᓇ ᓄᓇᕕᐅᑉ ᓄᓇᖓᓅᓕᖓᔪᖅ ᑮᓇᐅᔭᒻᒪᕆᓕᕆᕕᐅᓂᐊᓕᕐᑐᖅ ᑫᓪᓗᑐᐃᒍᑎᐅᒋᐊᓪᓚᕈᓐᓇᓚᖓᓕᕐᒪᒃ ᖃᐅᔨᔭᐅᒍᑎᐅᖃᑦᑕᓂᕐᓴᐅᓗᓂᓗ ᑭᖕᖒᒪᒋᔭᐅᓲᓂᒃ ᑕᒪᒃᑯᓄᖓ ᓄᓇᕕᐅᑉ ᐃᓄᖏᑦᑕ ᑮᓇᐅᔭᓕᐅᕋᓱᐊᕐᑎᖏᓐᓄᑦ ᐊᒻᒪᓗ ᒪᑭᑕᒐᓱᐊᕐᓂᒥᒃ ᐱᕙᓪᓕᐊᑎᑦᓯᒐᓱᐊᕐᓂᑯᑦ ᑕᒫᓂ ᓄᓇᑦᑎᓂ ᐊᒥᓲᓈᕐᑐᑎᒍᑦ,” ᑌᒣᓕᑦᓱᓂ ᐅᖃᓚᐅᔪᕗᖅ ᐋᓐᑎ ᒧᐊᖃᐅᔅ. “ᐅᕕᒃᑫᑦ ᑮᓇᐅᔭᓕᐅᕋᓱᐊᕐᑏᑦ ᓴᐳᒻᒥᔭᐅᒋᐊᖃᕐᑎᓗᒋᑦ ᐃᑲᔪᕐᑕᐅᔪᖃᓲᖑᒋᐊᖃᕐᓱᓂᓗ ᓄᐃᑕᐅᔪᓂᒃ ᐱᔅᓇᓯᓂᒃ ᐱᕕᖃᕋᓱᐊᓕᕐᐸᑕ ᐱᒍᑦᔨᒍᑎᒋᔭᐅᒋᐊᓪᓚᕈᓐᓇᑐᓂᒃ ᐊᑐᐃᓐᓇᐅᒋᐊᑐᕋᔭᖕᖏᑑᒐᓗᐊᓂᒃ, ᑖᓐᓇ ᑭᖕᖒᒪᓇᕐᑐᒪᕆᐅᓲᖑᓕᕐᑐᖅ ᑮᓇᐅᔭᒻᒪᕆᓕᕆᕕᒃ ᖃᓂᓪᓕᑎᑦᓯᒍᑎᐅᓪᓚᕆᓂᐊᓕᕐᑐᖅ ᐱᒍᑦᔨᓂᕐᓂᒃ ᑭᖕᖒᒪᒋᔭᐅᔪᖃᒻᒪᕆᓲᖑᓕᕐᑎᓗᒍ ᓄᓇᕕᐅᑉ ᐃᓄᖏᑦᑕ ᑮᓇᐅᔭᓕᐅᕋᓱᐊᕐᑎᖏᓐᓄᑦ ᐊᒻᒪᓗ ᓄᓇᖁᑎᑦᑎᓂᒃ ᓄᓇᖕᖑᐊᑎᒍᑦ ᓇᓗᒋᔭᐅᒍᓐᓀᑎᑦᓯᒍᑕᐅᓂᐊᕐᒪᑦ, ᐱᒻᒪᕆᐅᓂᖃᕐᑐᒥᒃ ᐱᕙᓪᓕᐊᑎᑦᓯᒐᓱᐊᓕᕐᓂᑯᑦ ᓴᓇᕐᕈᑎᐅᓚᖓᓕᕐᑑᔪᖅ ᓄᓇᕕᒻᒥᐅᓄᑦ.”
ᑕᒪᑦᓱᒥᖓ ᓄᓇᕕᒻᒥ ᑮᓇᐅᔭᒻᒪᕆᓕᕆᕕᑦᓴᒥᒃ ᓄᐃᑕᐅᓚᖓᓕᕋᓗᐊᕐᒥᑎᓗᒍ, ᒪᑭᕝᕕᑯᑦ ᐱᓇᓱᐊᖃᑎᖃᓚᖓᔪᑦ ᓄᓇᓕᓕᒫᑦ ᑎᒥᖁᑎᖏᓐᓂᒃ ᓄᓇᕕᐅᓪᓗ ᑮᓇᐅᔭᓕᐅᕋᓱᐊᕐᑎᖏᓐᓂᒃ ᐊᐅᓚᑦᓯᒍᑎᐅᕙᓪᓕᐊᓯᒍᑕᐅᓂᐊᕐᑐᓂᒃ ᑖᑦᓱᒥᖓ ᓄᑖᒥᒃ ᑮᓇᐅᔭᒻᒪᕆᓕᕆᕕᑦᓴᒥᒃ. ᒪᑭᕝᕕᐅᑉ ᒪᑭᑕᒐᓱᐊᕐᓂᓕᕆᕕᖓᑕ ᐱᓇᓱᐊᕐᕕᖓᑦ ᐃᑲᔪᕐᓯᓯᒪᑫᓐᓇᖑᓱᑦᑐᖅ ᑮᓇᐅᔭᒻᒪᕆᓕᕆᕕᑦᓴᒥᒃ ᑕᒪᒃᑯᐊ ᑮᓇᐅᔭᕆᔭᐅᒋᐊᓖᓪᓗ ᐱᓇᓱᑦᑎᒋᔭᐅᒋᐊᖃᓚᖓᔪᐃᓪᓗ ᐱᔭᐅᖕᖏᓂᓕᒫᖏᓐᓂ
.
2016-ᒥ, ᓄᓇᓕᓕᒫᓂ ᑮᓇᐅᔭᓕᐅᕋᓱᐊᕐᑎᐅᓲᑦ ᑐᑭᓯᓂᐊᕐᕕᐅᓚᐅᔪᒻᒪᑕ ᐃᓱᒪᑦᓴᓯᐅᕐᑕᐅᖁᔨᔪᖃᕐᓱᓂ ᓄᐃᑕᐅᔪᖃᕐᑐᓴᐅᓕᕐᓂᖓᓄᑦ ᓄᓇᕕᐅᑉ ᑮᓇᐅᔭᒻᒪᕆᓕᕆᕕᑦᓴᖓᓂᒃ. ᐅᖄᖃᑎᒋᔭᐅᓚᐅᑲᑦᑎᓗᒋᑦ ᑲᑎᕕᒃ ᓄᓇᓕᓕᒫᑦ ᑲᕙᒪᖓᑦ, ᐊᓯᖏᑦ ᑮᓇᐅᔭᓕᐅᕋᓱᐊᕐᑎᐅᖃᑕᐅᒻᒥᔪᑦ ᓄᓇᕕᒻᒥᐅᑦ, ᑖᒃᑯᐊ ᒪᑭᕝᕕᐅᑉ ᒪᑭᑕᒐᓱᐊᕐᓂᒥᒃ ᐱᕙᓪᓕᐊᑎᑦᓯᒐᓱᐊᕐᕕᖓᑕ ᐊᓪᓚᕕᖓ ᐱᓇᓱᐊᖃᑎᖃᕐᓱᑎᒃ ᒪᑭᕝᕕᐅᑉ ᐱᖁᔭᓕᕆᔨᖏᓐᓂᒃ, ᓄᐃᑕᐅᔪᖃᓯᓚᐅᔪᕗᖅ ᐊᓪᓚᓯᒪᔪᓂᒃ ᓄᐃᑦᓯᒍᑎᐅᓂᐊᕐᑐᓄᑦ ᑮᓇᐅᔭᒻᒪᕆᓕᕆᕕᑦᓴᒥᒃ, ᒪᑯᓂᖓ ᐱᖁᔮᐱᒋᔭᐅᓂᐊᕐᑐᓅᓕᖓᔪᓂᒃ ᐱᖁᔭᒻᒪᕆᖏᓐᓄᓗ.
ᒪᑭᕝᕕᐅᑉ ᒪᑭᑕᒐᓱᐊᕐᓂᒥᒃ ᐱᕙᓪᓕᐊᑎᑦᓯᒐᓱᐊᕐᕕᖓᑦ ᓯᕗᓕᕐᓯᑐᐃᓐᓇᕆᐊᖃᓚᖓᓯᔪᖅ ᓄᐃᑕᐅᔪᖃᕋᓱᐊᓕᕐᐸᑦ ᑮᓇᐅᔭᒻᒪᕆᓕᕆᕕᑦᓴᒥᒃ ᑕᒪᒃᑯᓇᓂ ᐱᓇᓱᐊᕈᓯᕐᓂ ᙯᔪᕐᓂ. ᑎᒥᖕᖑᑎᑕᐅᓚᖓᔪᖅ ᖄᖏᕐᓂᑯᓕᐅᕐᑎᓴᔭᐅᒍᓐᓀᓗᓂ ᐊᑖᒍᑦ ᑲᓇᑕᒥ ᖄᖏᕐᓂᑯᓕᐅᕐᑎᐅᖏᑦᑐᐃᑦ ᑎᒥᖁᑎᖏᓐᓄᑦ ᐱᖁᔭᖏᑦ. ᒪᑭᕝᕕᑯᑦ ᐃᓚᐅᔫᖃᑕᐅᓂᐊᕐᑐᑦ, ᐊᐅᓚᑦᓯᓂᓕᕆᔭᐅᒋᐊᓕᓐᓄᓗ ᐃᓚᐅᖃᑕᐅᖃᑦᑕᓗᑎᒃ, ᑌᓯᓂᒃᑯᑦ ᐊᑕᐅᓯᕐᒥᒃ ᑲᑎᒪᔨᒥᒃ ᓯᑕᒪᐅᔪᖕᖏᒐᕐᑐᐃᑦ ᐊᑯᓐᓂᖏᓐᓂᒥᐅᖑᓂᐊᕐᑐᒥᒃ. ᑖᒃᑯᐊᓕ ᐊᓯᖏᑦ ᐱᖓᓲᔪᕐᑐᐃᑦ ᑲᑎᒪᔨᐅᓂᐊᕐᒥᔪᑦ ᓂᕈᐊᕐᑕᐅᒪᒋᐊᖃᕐᓂᐊᑐᑦ ᓄᓇᕕᒻᒥᐅᓄᑦ ᐃᓚᐅᖃᑕᐅᓲᓄᑦ. ᑲᑎᒪᔨᖏᑦ ᓂᕈᐊᕐᑕᐅᔪᐃᑦ ᐱᓯᒪᒋᐊᖃᕐᓂᐊᑐᑦ ᑕᓯᐅᔭᕐᔪᐊᒥᑦ (2), ᐃᑭᕋᓴᕐᔪᐊᒥᑦ (2) ᐊᒻᒪᓗ ᐅᖓᕙᒥᑦ (2).
ᑎᒥᖕᖑᑎᑕᐅᓕᑐᐊᕐᐸᑦ, ᑖᓐᓇ ᑮᓇᐅᔭᒻᒪᕆᓕᕆᕕᒃ ᑲᑎᒪᔨᖃᕆᐊᖕᖓᑎᑕᐅᓂᐊᕐᑐᖅ ᐱᒋᐊᖕᖓᑎᑦᓯᒍᑎᐅᓂᐊᕐᑐᓂᒃ ᓂᕈᐊᕐᑕᐅᔪᖃᖕᖏᓂᓕᒫᖓᓂ ᓯᕗᓪᓕᐹᒥ ᐊᕐᕌᒍᖓᓂ ᑲᑎᒪᓂᖏᓐᓂ. ᐃᓚᐅᔫᖃᑕᐅᔪᑦᓴᓂᒃ ᕿᓂᕐᑕᐅᔪᖃᕈᓐᓇᓂᐊᕐᑐᖅ, ᒪᑭᕝᕕᑯᓗ ᑎᒍᒥᐊᕆᐊᖕᖓᓂᐊᕐᑎᓗᒋᑦ ᑖᑦᓱᒪ ᑮᓇᐅᔭᒻᒪᕆᓕᕆᕕᐅᑉ ᐊᐅᓚᑦᓯᓂᓕᕆᐅᑎᒋᒋᐊᓕᖏᓐᓂᒃ ᑖᒃᑯᓄᖓ ᐱᓇᓱᑦᑎᒋᔭᐅᓪᓚᕆᓂᐊᓕᕐᑐᓂᒃ ᓇᓂᔭᐅᔪᖃᖕᖏᓂᓕᒫᖓᓂ.
ᑖᑦᓱᒥᖓ ᑮᓇᐅᔭᒻᒪᕆᓕᕆᕕᑦᓴᒥᒃ ᐃᑲᔪᕐᓯᒋᐊᖕᖓᓗᓂ ᑎᒥᖕᖑᑎᑕᐅᒐᓱᐊᓕᕐᐸᑦ, ᐋᓐᑎ ᒧᐊᖃᐅᔅ, ᓴᐳᒻᒥᔭᐅᓯᒪᑦᓯᐊᓗᓂ ᒪᑭᕝᕕᐅᑉ ᐳᕐᑐᓂᕐᓴᖏᓐᓄᓗ ᑲᑎᒪᔨᖏᓐᓄᓗ, ᑎᓕᔨᓯᒪᓚᖓᓕᕐᒪᑦ ᑖᒃᑯᓂᖓ ᑯᕆᔅᑏᓐ ᓇᑯᓛᕐᒥᓗ ᓵᓕ ᐊᓚᑯᒥᓪᓗ ᑲᑎᒪᔨᒋᔭᐅᒋᐊᖕᖓᓂᐊᓕᕐᑎᓗᒋᒃ ᑖᒃᑯᓄᖓ ᓄᓇᕕᐅᑉ ᑮᓇᐅᔭᒻᒪᕆᓕᕆᕕᖓᓄᑦ.
-30-
ᐅᖄᓚᕕᑦᓴᖅ:
ᒍᐃᓕᐊᒻ ᑕᒍᕐᓈᖅ
ᑐᓴᐅᒪᒍᑎᓄᑦ ᑐᑭᒧᐊᑦᑎᓯᔨᖓᑦ ᑐᓴᕋᑦᓴᓕᕆᔨᖓᑦ
ᒪᑭᕝᕕᒃ ᑯᐊᐳᕇᓴᓐ
ᐅᖄᓚᐅᑎᖓ: 819-964-2925
wtagoona@makivik.org
www.makivik.org
ᒪᑭᕝᕕᒃ ᓄᓇᑖᕐᓂᒧᑦ ᑎᒥᖁᑎᒋᔭᐅᕗᖅ ᑎᓕᔭᐅᒪᑦᓱᓂ ᑲᒪᒋᔭᖃᕆᐊᖃᕐᓂᒥᒃ ᓄᓇᕕᐅᑉ ᐃᓄᖏᑦᑕ ᑮᓇᐅᔭᒻᒪᕆᖁᑎᖏᓐᓂᒃ ᑐᓂᔭᐅᓯᒪᔪᓂᒃ ᑖᒃᑯᐊ ᔦᒥᔅᐯᒥᓗ ᑯᐯᒃ ᑕᕐᕋᖓᓂᓗ ᐊᖏᖃᑎᒌᓐᓂᖓᑦ. ᒪᑭᕝᕕᑯᑦ ᐱᓇᓱᐊᒐᖃᕐᑎᑕᐅᒻᒪᑕ ᐊᐅᓚᑦᓯᓂᓕᕆᒋᐊᖃᕐᓂᒥᒃ ᑮᓇᐅᔦᕈᑎᖃᕆᐊᖃᕐᓂᒥᓪᓗ ᑖᒃᑯᓂᖓ ᑮᓇᐅᔭᕐᓂᒃ ᒪᑭᑕᒐᓱᐊᕐᓂᒥᒃ ᐱᕈᕐᓭᒍᒪᐅᑎᒋᓗᒋᑦ ᐃᑲᔪᕐᓯᓂᕐᒥᑎᒍᑦ ᐃᓄᓐᓄᑦ ᐊᐅᓚᑕᐅᓂᖃᕐᑐᓂᒃ ᐱᔅᓇᓯᓂᒃ ᓄᓇᕕᒻᒥ. ᒪᑭᕝᕕᑯᑦ ᐊᓯᐅᑎᑦᓯᑌᓕᒪᓂᕐᒥᒃ ᑫᓪᓗᑐᐃᒍᑎᖃᕐᐳᑦ ᐃᓄᐃᑦ ᐃᓗᕐᕈᓯᖓᓂᒃ ᐅᖃᐅᓯᖓᓂᓪᓗ ᐊᒻᒪᓗᑦᑕᐅᖅ ᖃᓄᐃᖏᓯᐊᕐᓂᖏᓐᓂ, ᐃᓅᓯᖃᑦᓯᐊᓂᖏᓐᓂᒃ, ᐊᑦᓱᔪᑦᑌᓕᒪᓂᕐᒥᒃ, ᐃᓕᓐᓂᐊᓂᓕᕆᓂᖏᓐᓂᓗ ᓄᓇᓖᑦ ᐃᓄᖏᓪᓗ.