ᓇᐅᓕᒫᓂᑦ ᑐᓴᕐᑎᓯᒍᑎᒃ
ᐁᕆᓕ 28, 2020 – ᑰᑦᔪᐊᖅ, ᓄᓇᕕᒃ – ᒪᑭᕝᕕᒃ ᑐᓴᕐᑎᓯᔪᖅ ᐱᑦᓴᕋᑕᕐᑐᕕᓂᐅᓂᕐᒥᓂᑦ $11.25 ᒥᓕᐊᓐᓂᑦ ᑲᓇᑕᐅᑉ ᑲᕙᒪᖓᓂᑦ ᐃᑉᐸᓴᖅ. ᑖᒃᑯᐊ ᑮᓇᐅᔦᑦ ᐱᓯᒪᔪᑦ ᓄᓇᖃᕐᖄᓯᒪᔪᑦ ᓄᓇᓕᖏᓐᓂᑦ ᓴᐳᑦᔨᒋᐊᕈᑎᓕᐊᖑᓯᒪᔪᓂᑦ ᓄᓇᕕᒻᒥᐅᑦ ᐃᓄᖏᑦ ᐱᕕᖃᕐᓂᐊᒥᑎᓪᓗᒋᑦ. ᒫᑦᔨ 25, 2020-ᒥᑦ, ᑲᕙᒪᑐᖃᒃᑯᑦ ᑐᓴᕐᑎᓯᓚᐅᔪᒻᒪᑕ $45 ᒥᓕᐊᓐᓂᑦ ᐃᑲᔪᕐᓯᒍᑎᖃᕐᓂᐊᓂᕐᒥᓂᑦ ᐃᓄᐃᑦ ᓄᓇᓕᖏᓐᓂᑦ ᓄᕙᓐᓇᖅ ᑯᕉᓇᕓᕋᔅ ᐊᑑᑎᓂᖓᓄᑦ. ᑐᓴᕐᑎᓯᔪᕕᓂᐅᑎᓪᓗᒋᑦ ᐱᓇᓱᐊᕈᓯᖅ ᓈᒻᒪᑦ, ᓱᕐᖁᐃᑕᐅᓕᓚᐅᔪᕗᖅ ᓄᓇᕕᒃ $11.25 ᒥᓕᐊᓐᓂᑦ ᐱᒐᔭᕐᑎᓗᒍ ᑖᒃᑯᓇᖕᖓᑦ ᑮᓇᐅᔭᓂᑦ, ᑮᓇᐅᔦᓪᓗ ᒪᑭᕝᕕᐅᑉ ᐱᒐᔭᕐᑕᖏᓐᓂᑦ ᐊᒡᒍᑐᐃᓂᐊᕐᑎᓗᒍ ᓄᓇᕕᒻᒧᑦ.
“ᑕᕐᕿᓕᒫᑉ ᐅᖔᑕᓄᓪᓗ ᐅᑕᕐᕿᖃᑦᑕᓚᐅᕐᑕᕗᑦ ᑖᒃᑯᐊ ᑮᓇᐅᔦᑦ ᒫᓐᓇᐅᑎᓪᓗᒍ ᓄᓇᕕᒻᒥᐅᑦ ᐃᓄᖏᑦ ᐅᖁᒣᑦᑐᑰᕉᑕᕆᑎᓪᓗᒋᑦ ᓇᓗᓇᕐᑐᑯᓪᓗ,” ᐅᖃᕐᑐᖅ ᐊᖓᔪᕐᖄᖅ ᓵᓕ ᒍᐊᑦ. “ᒫᓐᓇᐅᑎᓪᓗᒍ ᐊᒥᓱᓄᑦ ᑐᑦᓯᕋᐅᑎᓕᐅᕐᕕᐅᓯᒪᖃᑦᑕᑐᒍᑦ ᐊᓪᓚᕕᐅᖃᑦᑕᓱᑕᓗ ᐃᓄᓐᓂᑦ ᓄᓇᓕᓐᓂᓗ ᐅᐃᒪᓇᕐᓂᕋᐃᔪᓂᑦ. ᑌᒪᖕᖓᓂᑦ ᐱᓇᓱᐊᕐᑐᒪᕆᐅᖃᑦᑕᑐᒍᑦ ᑮᓇᐅᔭᓂᑦ ᐱᒐᓱᐊᕐᓱᑕ, ᓇᑯᕐᓴᓕᕐᖁᖓ ᑐᓴᕐᑎᓯᒋᐊᒥᒃ ᑖᒃᑯᐊ $11.25 ᒥᓕᐊᓐᓂ ᐱᑦᓴᕋᑕᓚᐅᕋᑦᑎᒋᑦ, ᖃᒻᒥᐅᒍᓐᓇᕕᓕᒫᖓᒍᑦ ᓄᓇᓕᓐᓄᑦ ᐊᒡᒍᑐᓚᖓᑦᓱᒋᑦ, ᖃᐅᔨᒪᒐᓗᐊᕐᑐᒍᓪᓗ ᑮᓇᐅᔦᑦ ᐊᒥᒐᑐᐃᓐᓇᕆᐊᖃᕐᓂᖏᓐᓂᑦ, ᐱᓗᐊᕐᑐᒥ ᓄᕙᓐᓇᖅ ᐱᒋᐊᓕᕐᕿᒋᐊᓪᓚᓂᐊᕐᐸᑦ.”
ᒪᑭᕝᕕᐅᑉ ᑲᑎᖕᖓᔨᖏᑦ ᐅᖄᓚᐅᑎᒃᑯᑦ ᑲᑎᒪᓂᖃᓚᐅᕐᑎᓗᒋᑦ ᐁᕆᓕ 24-ᖑᑎᓪᓗᒍ, ᒪᑭᕝᕕᒃ ᓇᓗᓀᕐᓯᓯᒪᔪᖅ ᖃᓄᖅ ᑮᓇᐅᔦᑦ ᐊᒡᒍᑐᕐᑕᐅᓂᐊᕐᓂᖏᓐᓄᑦ. ᐊᑐᓂᑦ ᓄᓇᓖᑦ ᐊᑦᔨᒌᒥᒃ ᐅᓄᕐᓂᓕᓐᓂᑦ $50,000-ᓂᑦ ᐱᓂᐊᕐᑐᑦ ᐃᓚᒋᐊᕐᑕᐅᓂᐊᕐᓗᑎᑦ ᐅᓄᕐᓂᖏᓐᓂᑦ ᓄᓇᓕᐅᑉ ᖃᑦᓯᓂᑦ ᐃᓄᖃᕐᓂᖓ ᐃᓚᐅᔫᒍᑎᓕᓐᓂᑦ ᒪᓕᓪᓗᒍ. ᑲᑎᑦᓱᑎᒃ ᑖᒃᑯᐊ ᐅᓄᕐᓂᖏᑦ $9.25 ᒥᓕᐊᓐᖑᔪᑦ ᑐᕌᖓᔪᑦ 15-ᓄᑦ ᓄᓇᓕᓐᓄᑦ, ᑮᓇᐅᔦᑦ ᐊᑐᕐᑕᐅᔪᑦᓴᒫᑦ ᓄᓇᓖᑦ ᑭᖕᖒᒪᒋᔭᖏᓐᓂᑦ ᓂᐅᕕᕈᑎᑦᓴᐅᓗᑎᑦ ᐃᒻᒥᒎᓈᕐᑎᑐᐃᓪᓗ ᐃᓄᐃᑦ ᐃᑉᐱᐊᔪᒻᒥᒐᑦᓴᑖᓚᖓᒐᑎᑦ.
ᑮᓇᐅᔦᑦ ᐊᒥᐊᒃᑯᖏᑦ, $1.5 ᒥᓕᐊᓐ ᐊᒡᒍᑐᕐᑕᐅᓂᐊᕐᑐᑦ ᐊᕕᑦᑎᓗᒋᑦ ᑲᑎᕕᒃ ᐃᓕᓴᕐᓂᓕᕆᓂᖅ, ᒪᓐᑐᔨᐊᒥᐅᑦ ᐃᓄᖏᑦ ᐊᒻᒪᓗ ᒪᑭᕝᕕᒃ. ᐊᑐᓂᑦ ᐱᓂᐊᕐᓱᑎᑦ $500,000-ᓂᑦ. ᒪᑭᕝᕕᒃ ᐃᒻᒪᖃᐅᑎᑦᓴᓂᑦ ᓴᓂᕐᕓᓯᒪᓂᐊᕐᒥᔪᖅ $500,000-ᓂᑦ, ᐊᑐᕐᑕᐅᔪᑦᓴᒫᖑᑎᓪᓗᒋᑦ ᓂᕆᐅᓇᖕᖏᑐᓄᑦ ᑎᑭᑕᐅᑉᐸᑕ ᓄᓇᓖᑦ ᑕᕐᕿᓂᑦ ᙯᔪᓂᑦ. ᒪᑭᕝᕕᒃ ᑮᓇᐅᔭᓂᑦ ᐊᑭᓕᕐᑐᐃᑎᑦᓯᓂᐊᖕᖏᑐᖅ ᐊᐅᓚᑦᓯᓂᓕᕆᒍᑎᐅᓂᖏᓐᓄᑦ ᑖᒃᑯᐊ ᑮᓇᐅᔦᑦ, ᓄᓇᓖᑦ ᐅᓄᕐᓂᐸᐅᒍᓐᓇᑐᓂᑦ ᑮᓇᐅᔭᕐᑖᖃᑦᑕᓂᐊᕐᒪᑕ ᑭᖕᖒᒪᒋᔭᒥᓄᑦ.
ᒪᑭᕝᕕᒃ ᐊᑕᐅᓯᐅᖕᖏᑐᓂᑦ ᑐᑦᓯᕋᐅᑎᓕᐅᕐᕕᐅᓯᒪᒻᒪᑦ ᓄᓇᓕᓐᓄᑦ ᑮᓇᐅᔭᕐᑐᕈᑎᐅᒐᔭᕐᑐᓄᑦ ᓄᕙᓐᓇᖅ ᑯᕉᓇᕓᕋᔅ ᐱᑦᔪᑎᒋᑦᓱᒍ. ᑐᑦᓯᕋᐅᑏᑦ ᓈᒻᒪᓈᕐᓯᒪᖃᑦᑕᓚᐅᕐᑐᑦ ᑐᕌᕐᓂᓕᐊᖑᓯᒪᔪᓄᑦ ᑕᓪᓕᒪᐅᓕᕿᖓᑦᓱᑎᒃ ᑮᓇᐅᔭᖃᕐᑎᑕᐅᒍᓐᓇᑎᑕᐅᔪᓄᑦ ᓄᓇᖃᕐᖄᓯᒪᔪᓂᑦ ᓴᐳᑦᔨᒋᐊᕐᓂᒧᑦ ᑮᓇᐅᔭᖃᕐᑎᓯᒍᑎᓂᑦ ᐱᓯᒪᔪᓄᑦ. ᐅᑯᐊᑕᒐ ᑮᓇᐅᔭᖃᕐᑎᑕᐅᒍᓐᓇᑐᑦ: ᓴᐳᑦᔨᒍᑎᑦᓭᑦ ᐃᓄᑐᖃᕐᓂᒃ ᐊᒻᒪᓗ ᐃᓗᓯᕐᓱᓯᐊᖕᖏᑐᓂᑦ ᓄᓇᓕᓐᓂ; ᓂᕿᖃᑦᓯᐊᖏᓐᓂᒧᑦ ᐊᐅᓚᑦᔭᕆᐊᕈᑎᑦᓭᑦ; ᐃᓕᓐᓂᐊᓂᓕᕆᓂᖅ ᐊᒻᒪᓗ ᓴᐳᑦᔨᒍᑎᑦᓭᑦ ᐱᐊᕋᕐᓂᒃ; ᐃᓱᒪᒥᒍᑦ ᖃᓄᐃᑦᔪᑎᓖᑦ ᐃᑲᔪᕐᓯᔭᐅᒍᑎᑦᓴᖏᑦ ᐊᒻᒪᓗ ᐅᐃᒪᓇᕐᑐᓕᕆᔩᑦ ᐱᒍᑦᔨᐅᑎᖏᑦ; ᐊᒻᒪᓗ ᓯᕗᕐᖏᓕᕈᑎᑦᓭᑦ ᐊᑐᐃᓐᓇᐅᒪᒋᐊᖃᕐᓂᒧᑦ ᐃᕐᐸᑎᑦᓯᑌᓕᓂᕐᒥᒃ ᓄᕙᓐᓇᒥᒃ COVID-19-ᒥᒃ.
| ᓄᓇᓕᒃ | ᐅᓄᕐᓂᖏᑦ |
| ᓯᓵᓯᐱ | $107,509 |
| ᑰᑦᔪᐊᕌᐱᒃ | $505,651 |
| ᐅᒥᐅᔭᖅ | $367,249 |
| ᐃᓄᒃᔪᐊᖅ | $1,233,680 |
| ᐳᕕᕐᓂᑐᖅ | $1,229,888 |
| ᐊᑯᓕᕕᒃ | $492,379 |
| ᐃᕗᔨᕕᒃ | $328,699 |
| ᓴᓪᓗᐃᑦ | $1,073,792 |
| ᑲᖏᕐᓱᔪᐊᖅ | $556,840 |
| ᖁᐊᕐᑕᖅ | $329,331 |
| ᑲᖏᕐᓱᒃ | $434,238 |
| ᐊᐅᐸᓗᒃ | $186,506 |
| ᑕᓯᐅᔭᖅ | $273,086 |
| ᑰᑦᔪᐊᖅ | $1,466,245 |
| ᑲᖏᕐᓱᐊᓗᒃᔪᐊᖅ | $664,907 |
| ᑲᑎᑦᓱᑎᒃ: | $9,250,000 |
-30-
ᖃᐅᔨᒋᕐᕕᓴᖅ:
ᑳᓴᓐ ᑕᒍᕐᓈᖅ
ᑐᓴᐅᒪᔪᓕᕆᓂᕐᒥᒃ ᑐᑭᒧᐊᑦᑎᓯᔨ
ᒪᑭᕝᕕᒃ
ctagoona@makivik.org
ᒪᑭᕝᕕᒃ ᑎᒥᐅᔪᖅ ᓄᐃᑕᐅᓯᒪᑦᓱᓂ ᓄᓇᑖᕐᓂᒧᑦ ᐊᖏᖃᑎᒌᒍᑎᑎᒍᑦ ᑎᓕᔭᐅᒪᐅᑎᖃᕐᓱᓂ ᐊᐅᓚᑦᓯᓂᐊᕐᓂᒥᒃ ᑮᓇᐅᔭᕐᑖᕆᔭᐅᓯᒪᔪᓂᑦ ᓄᓇᕕᒻᒥᐅᑦ ᐃᓄᑐᐃᓐᓇᖏᓐᓄᑦ ᔦᒥᓯ ᐯ ᑯᐯᓪᓗ ᑕᕐᕋᖓᑕ ᐊᖏᖃᑎᒌᒍᑎᖓᒍᑦ. ᒪᑭᕝᕕᒃ ᐊᐅᓚᑦᓯᓂᖃᕐᒥᔪᖅ ᕿᑐᕐᖏᐅᑎᑦᓯᓂᕐᒥᒃ ᑖᒃᑯᓂᖓ ᑮᓇᐅᔭᓂᑦ ᑫᓪᓚᑐᐃᓂᕐᒥᓗ ᒪᑭᑉᐸᓕᐊᓂᕐᒥᒃ ᐱᕙᓪᓕᐊᑎᑦᓯᓂᕐᒥᒃ ᐃᑲᔪᕐᓯᒪᓂᒃᑯᑦ ᐃᓄᑐᐃᓐᓇᓄᑦ ᓇᒻᒥᓂᖁᑎᒋᔭᐅᔪᐃᑦ ᖄᖏᕐᓂᑯᓕᐅᕐᑏᑦ ᓄᓇᕕᒻᒥ. ᒪᑭᕝᕕᒃ ᑫᓪᓚᑐᐃᒍᑎᓕᒃ ᐊᓯᐅᔨᔭᐅᑎᑦᓯᑌᓕᑦᓱᓂᓗ ᐃᓄᐃᑦ ᐃᓗᕐᖁᓯᖓᓂᑦ ᐅᖃᐅᓯᖓᓂᓪᓗ ᖃᓄᐃᖕᖏᓯᐊᕆᐊᖃᕐᓂᒥᒃ, ᓂᕿᖃᑦᓯᐊᕆᐊᖃᕐᓂᒥᒃ ᐊᒻᒪᓗ ᐊᔪᕐᓴᓂᕐᒥᒃ ᓄᖑᑎᕆᓂᕐᒥᒃ, ᐊᒻᒪᓗ ᐃᓕᓐᓂᐊᓯᒪᒋᐊᖃᕐᓂᖏᓐᓂᑦ ᐃᓄᑐᐃᓐᓀᑦ ᓄᓇᓕᓐᓂ.