““ᑲᑎᕕᒃ ᓄᓇᓕᓕᒫᓂ ᐳᓖᓯᒃᑯᑦ ᐃᓄᓐᓄᑦ ᐳᓖᓯᐅᒋᐊᖃᕐᓂᒥᓂᒃ ᑲᔪᓯᒋᐊᑦᓯᐊᕆᐊᓕᐅᒐᓗᐊᑦ ᒪᑭᕝᕕᑯᑦ ᐊᖓᔪᕐᖄᖓᑦ ᐅᖃᕐᑐᖅ.“
ᑐᓴᕋᑦᓭᑦ
ᐊᐅᒡᒍᓯ 13, 2020 – ᑰᑦᔪᐊᖅ, ᓄᓇᕕᒃ – ᒪᑭᕝᕕᑯᑦ ᖁᐊᕐᓵᕈᑎᖃᕐᓯᒪᓂᕋᕐᓂᖁᑦ ᑐᓴᕋᑦᓴᓕᐊᒍᓯᒪᔪᓂᒃ ᐳᓖᓯᓄᑦ ᑎᒍᔭᐅᓯᒪᔪᑦ ᑐᖁᕙᑦᑐᑦ 30-ᕕᓪᓗᐊᑐᒥᒃ ᐅᓄᕐᓂᓴᐅᒪᑕ ᓄᓇᕕᒻᒥ ᐅᑦᑐᕋᐅᑎᒋᒍᑦᑎᒍ ᐊᓐᑎᐊᕆᐅᒥ ᐳᓖᓯᓄᑦ ᑎᒍᔭᐅᓯᒪᑦᓱᑎᒃ ᑐᖁᕙᑦᑐᑦ ᐅᓄᕐᓂᖏᓐᓄᑦ. ᑐᓴᕐᑎᓯᒍᑏᑦ ᐅᖃᐅᓯᕐᑕᖃᕐᒥᔪᑦ ᓄᓇᕕᒻᒥ ᐃᓅᒍᓐᓀᐸᑦᑐᑦ ᐅᓄᕐᑐᒪᕆᐅᒋᐊᖏᑦᑕ, ᐅᓄᕐᓂᓴᐅᖕᖏᑯᑎᒃ ᐊᓯᖏᓐᓂᑦ ᓄᓇᓂᑦ ᐊᕕᑦᑐᓯᒪᔪᓂᑦ. ᑐᓴᕐᑎᓯᒍᑎᓕᐊᕕᓃᑦ ᑕᑯᑦᓱᒋᑦ ᑐᖁᖓᔪᓕᕆᔨᒻᒪᕆᖓᑕ ᑯᐯᒃᒥᐅᑦ ᐊᓪᓚᕕᖓᓂᑦ ᐱᓯᒪᔪᑦ 17 ᓄᓇᕕᒻᒥᐅᑦ ᐃᓄᐃᑦ ᐃᓅᒍᓐᓀᓂᕐᖁᑦ ᐊᕐᕌᒍᐃᑦ 2000 2018-ᓗ ᐊᑯᓐᓂᖓᓂ ᐳᓖᓯᓄᑦ ᑎᒍᔭᐅᓯᒪᑦᓱᑎᒃ, ᑎᒍᔭᐅᒪᕕᒻᒦᓱᑎᒃ ᐳᓖᓯᓄᓪᓘᓃᑦ ᑲᒪᒋᔭᐅᓂᕐᒥᓂ ᑲᒪᒋᔭᕕᓂᐅᑦᓱᑎᓪᓘᓃᑦ. ᓄᓇᕕᒻᒥᐅᑦ ᐅᓄᕐᓂᖏᑦ 11,746-ᒦᒍᓇᐅᔪᕕᓃᑦ ᑖᒃᑯᓇᓂ ᐊᕐᕌᒍᓂ. ᐅᑦᑐᕋᐅᑎᒋᒍᑦᑎᒋᑦ ᓄᓇᕘᕐᒧᑦ 13-ᓂᒃ ᐃᓅᒍᓐᓀᕕᐅᓯᒪᔪᒧᑦ ᐃᓄᒋᐊᓐᓂᖃᕐᑐᒧᑦ 32,441-ᓂᒃ.
“ᑕᒪᓐᓇ ᓈᒻᒪᓈᖕᖏᓗᑐᕐᑐᖅ ᐃᓄᓐᓄᑦ,” ᒪᑭᕝᕕᑯᑦ ᐊᖓᔪᕐᖄᖓ ᓵᓕ ᒍᐊᑦ ᐅᖃᕐᑐᕕᓂᖅ. “ᐊᕐᕌᒍᓂ ᐅᓄᕐᑐᓂ ᑕᒪᓐᓇ ᑲᔪᓯᓕᕐᒪᑦ. ᖃᐅᔨᓴᕐᓂᖃᕆᐊᖃᓕᕐᑐᖅ ᖃᓄᖅ ᑲᑎᕕᒃ ᓄᓇᓕᓕᒫᓂ ᐳᓖᓯᒃᑯᑦ ᐊᐅᓚᑦᓯᓲᒍᒻᒪᖔᑕ ᐃᓄᓐᓂᒃ ᑎᒍᔭᐅᔪᓂᒃ. ᑲᑎᕕᒃ ᓄᓇᓕᓕᒫᓂ ᐳᓖᓯᒃᑯᑦ ᓄᐃᑕᐅᓚᐅᕐᓯᒪᔪᑦ 1975-ᒥ ᔦᒥᓯ ᐯᒥ ᑯᐯᒃᓗ ᑕᕐᕋᖓᓂ ᐊᖏᖃᑎᒌᒍᑎᑎᒍᑦ ᐃᓄᓐᓄᑦ ᐳᓖᓯᒋᔭᐅᓚᖓᑎᓪᓗᒋᑦ ᐃᓇᖐᑦᓱᑎᒃ ᑯᐯᒃᒥ ᐳᓖᓯᒃᑯᓂᒃ. ᑲᑎᕕᒃ ᓄᓇᓕᓕᒫᓂ ᐳᓖᓯᒃᑯᑦ ᑲᔪᓯᒋᐊᑦᓯᐊᕆᐊᖃᕐᐳᑦ ᐃᓄᓐᓄᑦ ᐳᓖᓯᐅᒋᐊᖃᕐᓂᒥᓂᒃ ᐃᓄᓐᓂᒃ ᑐᑭᒧᐊᑦᑎᓯᔨᖃᕐᓗᑎᒃ. ᐃᓄᒻᒥᒃ ᐱᓇᓱᑦᑎᑖᕆᔭᐅᖁᔨᓯᒪᒐᓗᐊᕐᑐᖓ ᓯᕗᓕᕐᓂᐊᑐᒥᒃ ᓄᓇᕕᒻᒥ ᐳᓖᓯᓂᒃ ᑭᓯᐊᓂ ᓱᕙᓪᓕᐊᔭᐅᓯᒪᖕᖏᑐᖅ.”
ᑕᕝᕙᓂ ᐊᕐᕌᒍᒥ ᑯᐯᒃᑯᑦ ᑲᕙᒪᖓᑦ ᑎᒃᑯᐊᓯᓚᐅᔪᕗᑦ ᓯᕗᓕᕋᔭᕐᑐᒥᒃ ᐳᓖᓯᓂᒃ, ᑯᐯᒻᒥ ᐳᓖᓯᒃᑯᓂᒃ Sûreté du Québec. ᐊᕐᓇᒥᒃ ᐳᓖᓯᐅᓚᐅᕐᓯᒪᖕᖏᑐᒥᒃ ᐱᓇᓱᒐᕐᑖᑎᑦᓯᒋᐅᓚᐅᕐᑐᑦ ᐱᓇᓱᒐᒻᒪᕆᒻᒥᒃ ᐳᓖᓯᒃᑯᓂᒃ ᐱᓇᓱᖃᑎᖃᓚᖓᔪᒥᒃ.
ᑐᓴᕋᑦᓭᑦ ᐅᖃᐅᓯᕐᑕᖃᕐᒥᔪᑦ ᔫᑳᓐᒥ ᓄᓇᑦᓯᐊᒥᓗ ᑭᑎᑦᓯᒍᑕᐅᓯᒪᔪᓂᒃ. ᑖᒃᑯᓈᓐᓂ ᓄᓈᓐᓂ ᐃᓄᒋᐊᓐᓂᓖᑦ 40,000-ᐅᖓᑖᓅᑐᐃᓐᓇᕆᐊᓕᓐᓂᒃ ᐊᑐᓂ. ᐊᕐᕌᒍᓂ 18-ᒍᒻᒥᔪᓂ ᐳᓖᓯᓄᑦ ᑎᒍᔭᐅᓯᒪᑦᓱᑎᒃ ᑐᖁᕙᑦᑐᑦ ᑕᓪᓕᒪᐅᓯᒪᔪᑦ ᐱᖓᓲᔪᕐᑑᓴᕈᑎᒃ, ᐃᑭᓐᓂᓴᒻᒪᕇᑦ ᓄᓇᕕᒻᒥ ᐳᓖᓯᓄᑦ ᑎᒍᔭᐅᓯᒪᑦᓱᑎᒃ ᑐᖁᕙᑦᑐᓂᑦ.
ᐊᕐᕌᒍᓂ 1990-ᓃᑦᓱᑕ ᒪᑭᕝᕕᑯᑦ ᑲᑎᒪᔨᖃᕐᓯᒪᔪᑦ ᓄᓇᕕᒻᒥ ᐱᓇᓱᖃᑎᒌᑦᑐᓴᓂᒃ ᐃᕐᖃᑐᐃᕕᑎᒍᑦ ᑐᑭᑖᕐᑕᐅᒋᐊᓖᑦ ᐱᓪᓗᒋᑦ. ᑭᖑᓪᓕᐹᑦ ᑐᓴᕐᑎᓯᒍᑎᖏᑦ ᐊᓪᓚᑕᐅᓯᒪᔪᑦ 1993-ᒥ ᑌᔭᐅᑦᓱᑎᒃ “ᓯᕗᓂᑦᓴᓕᐅᕐᓂᖅ: ᐃᓄᐃᑦ ᐱᓇᓱᖃᑎᒌᑦᑐᑦ ᐃᕐᖃᑐᐃᕕᑎᒍᑦ ᑐᑭᑖᕐᑕᐅᒋᐊᓖᑦ ᐱᓪᓗᒋᑦ. ᐅᓐᓂᑑᑎᓕᐊᒍᓯᒪᔪᖅ ᐃᓚᖃᕐᓯᒪᔪᑦ ᓚᔪᓂᒃ, ᐃᓄᓐᓂᒃ ᐳᓖᓯᖃᕆᐊᖃᕐᓂᖅ ᑭᖕᖒᒪᓇᕐᑐᖅ ᐃᕐᖃᑐᕐᑕᐅᒋᐊᓖᓪᓗ ᑐᑭᑖᕐᑕᐅᕕᑦᓴᖃᑦᓯᐊᓗᑎᒃ ᐃᓄᐃᑦ ᐃᓕᕐᖁᓯᖓᓅᓕᖓᓂᕐᓴᒥᒃ, ᐃᒣᑦᑑᒐᔭᕐᑐᒥᒃ ᐃᓄᐃᑦ ᐱᖁᔭᑐᖃᖏᑎᒍᑦ ᐱᕐᖁᓯᑐᖃᖏᑎᒍᓪᓗ ᐃᕐᖃᑐᕐᑕᐅᒋᐊᓖᑦ ᑐᑭᑖᕐᑕᐅᕕᑦᓴᖓᓂᒃ. ᑐᓴᕐᑎᓯᒍᑏᑦ ᐅᓐᓂᑑᑎᑕᖃᕐᓂᒥᔪᑦ, “ᐱᒋᐅᕐᓴᑎᑦᓯᒍᑎᓭᑦ ᐃᓕᓭᒍᑎᑦᓭᓗ ᓄᐃᑕᐅᖁᔭᐅᑦᓱᑎᒃ ᐊᑑᑎᔭᐅᒋᐊᖃᓪᓗᑐᓚᖓᓗᑎᒃ ᑲᔪᓯᔭᐅᓂᐊᕐᓗᑎᓪᓗ ᐱᓇᓱᑦᑎᓕᒫᓄᑦ ᓄᓇᕕᒻᒥ ᓄᓇᑦᓯᐊᒥᓪᓗ ᐃᕐᖃᑐᕐᑕᐅᒋᐊᓖᑦ ᑐᑭᑖᕐᑕᐅᕕᑦᓴᖃᕐᕕᖏᓐᓂ.”
“ᓯᕗᓕᕐᑎᐅᖃᑎᒃᑲ ᐱᓇᓱᖃᑎᒌᑦᓯᐊᖁᔭᒃᑲ ᐊᑕᐅᓯᕐᒥᒃ ᑐᕌᒐᖃᕐᓗᑎᒃ ᐱᐅᔪᒥᒃ ᐊᓯᑦᔨᓂᕐᒨᓕᖓᔪᒥᒃ”. ᐅᖃᕐᑐᖅ ᒍᐊᑦ. “ᓄᓇᕕᒻᒥᐅᓕᒫᑦ ᑲᕙᒣᓪᓗ ᐱᒐᓱᐊᒻᒪᕆᐅᑎᖃᕆᐊᖃᕐᐳᑦ ᐊᓯᑦᔨᒋᐊᕆᖃᕐᓂᒥᒃ ᑐᑭᒧᐊᑦᑎᑕᐅᓂᐊᕋᑦᑕ ᐃᓱᐊᕐᑐᒧᑦ.”
-30-
ᖃᐅᔨᒋᐊᕐᑐᕕᑦᓴᖅ:
ᑳᓴᓐ ᑕᒍᓐᓈᖅ
ᑐᑭᒧᐊᑦᑎᓯᔨ ᑐᓴᐅᒪᖃᑎᒌᕝᕕᒥᒃ
ᒪᑭᕝᕕᑯᓐᓂ
ctagoona@makivik.org
www.makivik.org
ᒪᑭᕝᕕᑯᑦ ᓄᓇᑖᕋᓱᐊᕐᓂᒧᑦ ᐊᖏᖃᑎᒌᒍᑎᖃᕐᓯᒪᓂᕐᒧᑦ ᐱᓇᓱᒐᖃᕐᕕᐅᕗᖅ ᑎᓕᔭᐅᒪᐅᑎᖃᕐᓱᑎᒃ ᐊᐅᓚᑦᓯᒋᐊᖃᕐᓂᒥᒃ ᐱᕐᖁᓯᑐᖃᓕᕆᒍᑎᑦᓴᖏᓐᓂᒃ ᑮᓇᐅᔭᖏᓐᓂᒃ ᓄᓇᕕᒻᒥᐅᑦ ᐃᓄᐃᑦ ᐱᓯᒪᔪᓂᒃ ᔦᒥᓯ ᐯᒥ ᑯᐯᒃᓗ ᑕᕐᕋᖓᓂ ᐊᖏᖃᑎᒌᒍᑎᒥᑦ. ᒪᑭᕝᕕᑯᑦ ᐱᔭᑦᓴᖃᕐᒥᔪᑦ ᑖᒃᑯᓂᖓ ᑮᓇᐅᔭᓂᒃ ᐊᐅᓚᑦᓯᓂᕐᒥᒃ ᑮᓇᐅᔭᖃᕐᑎᓯᓂᕐᒥᓗ ᑖᒃᑯᓇᖕᖓᑦ ᑮᓇᐅᔭᓂᑦ ᖃᐅᔨᒪᔭᐅᑎᑦᓯᒍᑎᑦᓴᓂᒃ ᒪᑭᑉᐸᓕᐊᒍᑎᑦᓴᖃᕆᐊᖃᕐᓂᖏᓐᓂᒃ ᓄᐃᑦᓯᖃᑕᐅᖃᑦᑕᓗᑎᒃ ᐃᓄᓐᓄᑦ ᐊᐅᓚᑕᐅᔪᑦᓴᓂᒃ ᐱᓇᓱᒐᖃᕐᕕᓴᓂᒃ. ᒪᑭᕝᕕᑯᑦ ᖃᐅᔨᒪᔭᐅᑎᑦᓯᔨᐅᒻᒪᑕ ᐃᓄᐃᑦ ᐃᓕᕐᖁᓯᖓᑕ ᐅᖃᐅᓯᖓᑕᓗ ᐱᐅᓕᐊᕐᑕᐅᓯᐊᕆᐊᖃᕐᓂᖏᓐᓂᒃ ᖃᓄᐃᖕᖏᓯᐊᕆᐊᖃᕐᓂᖏᓐᓂᓗ, ᒪᑭᑕᒐᓱᐊᕈᑎᑦᓴᖃᑦᓯᐊᕆᐊᖃᕐᓂᖏᓐᓂᓗ, ᐊᔪᕐᓴᕆᐊᖃᖕᖏᓂᖏᓐᓂᓗ, ᐃᓕᓐᓂᐊᓯᒪᒋᐊᖃᕐᓂᖏᓐᓂᓗ ᐃᓄᐃᑦ ᓄᓇᓕᓐᓂ.