ᔮᓂ ᐱᑕᓗ ᐊᒻᒪᓗ ᐱᑕ ᐊᐅᓪᓚᓘᓚᐅᔪᔪᖅ ᐅᐱᒍᓱᓯᕐᑕᐅᓕᓚᐅᔪᒋᕘᒃ ᓄᓇᕕᒻᒥᐅᓂᒃ ᐅᐱᓐᓇᑐᓂᒃ ᐅᐱᒍᓲᓯᕈᑎᒥᒃ ᐃᓅᓯᓕᒫᒥᓂ ᑐᓂᓯ-ᒪᓂᕆᕙᑦᑕᒥᓐᓄᑦ ᐱᓇᓱᑦᓱᑎᒃ ᓄᓇᕕᒻᒥᐅᖑᖃᑎᒥ ᐃᓄᑐᐃᓐᓇᐅᖃᑎᒥ ᐃᓅᓯᖏᑕ ᐱᐅᓯᒋᐊᕈᑎᑦᓴᖏᓐᓂᒃ. ᒪᑭᕝᕕᐅᑉ ᐳᕐᑐᓂᕐᓴᖏᑦ ᓇᓗᓀᕆᓚᐅᔪᕗᑦ ᑖᒃᑯᓃᖓ ᒪᕐᕉᓂᒃ ᐅᐱᒋᔭᐅᒍᑎᒥᒃ ᓄᓇᕕᒻᒥ ᐱᑎᑕᐅᕐᖃᒥᐅᓕᓚᐅᕐᒥᔫᓐᓂᒃ ᐅᐱᒍᓲᓯᓚᐅᕐᑕᒥᓐᓂᒃ ᒪᑭᕝᕕᐅᑉ 2022-ᒥ ᐊᕐᕌᒍᑕᒫᕐᓯᐅᑎᒥᓂᒃ ᑲᑎᖕᖓᑎᑦᓯᓂᖓᓂ ᑲᖏᕐᓱᒦᓚᐅᔪᔪᒥᒃ ᑎᕆᓪᓗᓕᐅᖑᑎᓪᓗᒍ.

ᐱᑕ ᐊᐅᓪᓚᓗᒃ ᓂᕐᑐᑕᐅᒍᑎᖃᓚᐅᔪᕗᖅ ᐱᓇᓱᖃᑦᑕᓯᒪᓂᕐᒥᓄᑦ ᐃᑲᔪᕐᓯᒪᒐᓱᑦᓱᓂ ᓄᓇᕕᒻᒥᐅᓂᒃ ᐊᖑᓇᓱᑦᑎᓂᒃ. ᐱᑕ ᐊᕐᕌᒍᓂ ᐊᒥᓱᓂ ᓄᓇᓕᒻᒥᓂ ᐃᕗᔨᕕᒻᒥ ᓯᕗᓕᕐᑎᐅᖃᑦᑕᓯᒪᔪᖅ ᐃᓗᕐᖁᓯᕐᒥᓗ ᐃᓕᓐᓂᐊᑎᑦᓯᒍᑎᖃᓱᖑᑦᓱᓂ ᐱᔭᖃᕋᓱᑦᓱᓂ ᐃᓕᓐᓂᐊᑎᑦᓯᓂᕐᒥᒃ ᐃᓕᓐᓂᐊᑎᑦᓯᓂᕐᒥᒃ ᐅᕕᒃᑲᖏᓐᓂᒃ ᐃᓕᓭᑦᓱᓂ ᓄᓇᒥᓂᑦ ᐱᔪᓂᒃ ᐃᓅᒐᓱᒍᑎᖃᕈᓐᓇᕆᐊᖏᑦ. ᒪᑭᕝᕕᒃ ᐱᑕᒥᒃ ᑎᑭᖁᔨᑦᓴᖑᐊᓚᐅᔪᔪᒐᓗᐊᖅ ᑲᑎᖕᖓᓂᕐᔪᐊᒧᑦ ᑭᓯᐊᓂᓕ ᐱᑕ ᐃᓅᒍᓐᓀᑲᓪᓚᓚᐅᔪᒐᒥ ᑲᑎᖕᖓᔪᓕᐊᕈᓐᓇᓯᓚᐅᔪᖕᖏᓚᖅ ᓇᒻᒥᓂᖅ ᐁᑦᓯᖁᓇᓚᐅᔪᒐᓗᐊᕐᓱᓂ ᐅᐱᒋᔭᐅᒍᑎᒥᓂᒃ. ᓄᓕᐊᖓ ᐄᕙ ᐊᐅᓪᓚᓗᒃ ᑲᑎᖕᖓᓂᕐᔪᐊᓕᐊᓚᐅᔪᕗᖅ ᐅᐱᒋᔭᐅᒍᑎᖓᓂᒃ ᐱᑕᒥᒃ ᑎᒍᓯᒍᑦᔨᒋᐊᕐᑐᓱᓂ.

ᔮᓂ ᐱᑕ, ᐊᕐᕌᒍᓂ ᐅᓄᕐᑐᓂ ᑭᒡᒐᑐᕐᑎᑐᖃᐅᖃᑦᑕᓯᒪᔪᖅ ᐃᓄᑐᐃᓐᓇᐅᖃᑎᒥᓂᒃ ᑕᒪᖏᓐᓂ ᓯᓚᕐᔪᐊᒥᓗ ᓄᓇᓕᓕᒫᑎᒍᓪᓗ ᓇᓗᓀᕐᑕᐅᓂᖃᓚᐅᔪᒋᕗᖅ. ᔮᓂᐅᑉ ᐃᓚᐅᖃᑦᑕᓯᒪᓂᖓ ᐱᓂᐊᕐᓂᓕᕆᓂᕐᓄᑦ ᐱᕙᓪᓕᐊᒋᐊᖕᖓᓯᓚᐅᕐᓯᒪᕗᖅ 1970-ᓃᑦᑐᓂ ᐊᕐᕌᒍᕐᓂ, ᑖᒃᑯᓇᓂ ᐊᕐᕌᒍᕐᓂ ᐊᒥᓱᓂᒃ ᐱᔭᑦᓴᖁᑎᖃᖃᑦᑕᓯᒪᔪᖅ. ᑯᐊᐸᒃᑯᓄᑦ ᑲᑎᖕᖓᔨᐅᓯᒪᔪᖅ ᑲᒪᔨᒻᒪᕆᒋᔭᐅᓯᒪᑦᓱᓂᓗ ᐃᓚᐅᒋᐊᓯᓚ-ᐅᖕᖏᓂᕐᒥᓂ ᓄᑖᒧᑦ ᐱᓇᓱᒐᖃᕐᕕᒧᑦ ᓴᕐᕿᖃᒻᒥᐅᑎᓪᓗᒍ ᐃᓄᐃᑦ ᑕᐱᕇᑦᓴᑦ ᑲᓇᑕᒥ. ᐃᓚᐅᖃᑕᐅᓯᒪᒻᒥᓱᓂᓗ ᐃᓄᐃᑦ ᑲᑐᑦᔨᖃᑎᒌᓐᓂᖓᓄᑦ ᑯᐯᒃ ᑕᕐᕋᖓᓂ ᑖᒃᑯᓄᖓᓗ ᐊᕐᕕᑕᕐᑎᒋᔭᐅᓯᒪᒋᕗᖅ. ᔮᓂ ᒪᑭᕝᕕᐅᑉ ᐳᕐᑐᓂᕐᓴᖏᓐᓄᑦ ᐃᓚᐅᖃᑦᑕᓕᓚᐅᔪᒻᒥᔪᖅ ᐱᓇᓱᒐᖃᕐᕕᒃ ᐃᓂᓪᓚᑕᐅᓂᖃᕐᐸᓕᐊᑎᓪᓗᒍ, ᐳᕐᑐᓂᕐᓴᖏᓐᓄᓗ ᐃᓚᐅᖃᑦᑕᓯᒪᕗᖅ ᐊᕐᕌᒍᕐᓂ 23-ᓂ ᐊᓂᒍᐃᑦᓱᓂ. ᐊᖏᔪᒻᒪᕆᒻᒥᒃ ᐱᔭᖃᕐᓯᒪᒻᒥᔪᖅ ᐊᖏᖃᑎᒌᒐᓱᑦᑎᐅᖃᑕᐅᑦᓱᓂ ᓄᓇᕕᒻᒥᐅᑦ ᐃᓄᑐᐃᓐᓀᑦ ᓄᓇᓂᒃ ᐃᓐᓄᐃᓯᒪᓇᓱᒍᑎᒥᓄᑦ ᐊᖏᖃᑎᒌᒍᑎᖏᓐᓂᒃ, ᓄᓇᕕᒻᒥᐅᓄᓪᓗ ᓂᕐᔪᑎᓕᕆᓂᕐᓄᑦ ᑐᕐᖃᑕᕐᕕᐅᓯᒪᑦᓱᓂ, ᓂᕐᔪᑎᓕᕆᓂᕐᒥᒃ ᐱᑦᔪᑎᖃᕐᓱᑎᒃ ᑲᑎᖕᖓᔪᓄᑦ ᐃᓚᐅᖏᓐᓇᖃᑦᑕᓯᒪᔪᖅ ᓴᐳᑦᔨᓯᒪᓇᓱᑦᓱᓂ ᐃᓄᑐᐃᓐᓀᑦ ᐅᓇᒻᒥᓱᐊᒍᑎᖏᓐᓂᒃ.

ᒪᑭᕝᕕᐅᑉ ᐊᖓᔪᕐᖄᖓ ᐱᑕ ᐋᑕᒥ ᐅᖄᒍᑎᖃᓚᐅᔪᕗᖅ ᐱᔭᖃᕐᓯᒪᒍᑎᖏᓐᓂᒃ ᑖᒃᑯᐊ ᐅᐱᒋᔭᐅᒍᓯᕐᑕᐅᔫᒃ ᓄᓇᕕᒻᒥᐅᑦ ᐅᐱᒋᔭᐅᒍᑎᑕᕐᑎᑕᐅᒍᑎᒋᓲᖓᓐᓂᒃ. “ᐱᔪᕆᒍᑎᖃᒻᒪᕆᑉᐳᖓ ᐃᓅᓯᓕᒫᒥᓂ ᐱᓇᓱᖃᑦᑕᓚᐅᕐᑕᖏᓐᓂᒃ ᑖᒃᑯᐊ ᒪᕐᕉᒃ ᐊᖑᑏᒃ. ᑕᒪᕐᒥᒃ ᐃᓄᑐᐃᓐᓀᑦ ᐃᓅᓯᖏᑕ ᐋᕐᕿᒋᐊᕈᑎᒋᒍᓐᓇᑕᖏᓐᓂᒃ ᐃᒻᒥᓄᑦ ᐅᖃᕐᓯᒪᒻᒪᓂᒃ ᐃᒫᒃ ‘ᓴᐳᑦᔭᐅᒪᒋᐊᖃᓕᕐᒪᑕᓕᐅᑯᐊ.’ ᐊᕐᕌᒍᓂ ᐊᒥᓱᓂ ᐱᓇᓱᖃᑎᖃᖃᑦᑕᓯᒪᕗᖓ ᔮᓂ ᐱᑕᒥᒃ, ᑐᓂᒪᑦᓯᐊᓂᖓᓗ ᐊᒥᓱᐃᓄᑦ ᓂᕐᔪᑎᓕᕆᓂᐅᔪᑦ ᐊᓪᓚᖁᑎᖏᓐᓄᑦ ᐃᓗᕐᖁᓯᑦᑎᓅᓕᖓᓪᓚᕆᑦᑐᓄᑦ ᐅᐱᓐᓇᑐᖃᑦᑕᓚᐅᔪᕗᖅ,” ᐅᖃᕐᑐᖅ ᐱᑕ. “ᐱᑕ ᐊᐅᓪᓚᓗᑦᑕᐅᖅ ᐃᓅᓯᓕᒫ-ᒐᓚᒻᒥᓂ ᓴᐳᑦᔨᓯᒪᓇᓱᖃᑦᑕᓚᐅᕆᕗᖅ ᖁᕝᕙᑎᕆᒍᑎᖃᕐᐸᓱᓂᓗ ᐃᓄᑐᐃᓐᓇᑎᒍᑦ ᐃᓅᓯᑦᑎᓂᒃ. ᑎᑭᒍᓐᓇᓛᖁᑦᓴᖑᐊᓚᐅᔪᔭᕋᓗᐊᕋᓕ ᐱᑕ, ᑭᓯᐊᓂ ᐃᓅᒍᓐᓀᓂᕋᕐᑕᐅᑎᓪᓗᒍ ᑐᓴᕆᐊᖓ ᐊᓕᐊᓇᖕᖏᑑᓚᐅᔪᕗᖅ. ᓱᕐᖁᐃᑐᒥᒃ ᓇᓗᓀᕐᑕᐅᖁᓚᐅᕋᒃᑯ ᐅᐱᒋᔭᐅᒍᑎᖓᓂᒃ ᓄᓇᕕᒻᒥᐅᑦ ᐱᑎᑕᐅᒍᑎᖃᕐᓗᓂ ᐊᑎᖓ ᐃᓕᒪᑐᐃᓐᓇᓚᐅᕐᑐᖅ ᑲᔪᓯᑎᑦᓱᒍᓗ ᐊᕐᕌᒍᑕᒫᕐᓯᐅᑎᑦᑎᓂᒃ ᑲᑎᖕᖓᓂᕐᒥ, ᐱᓇᓱᖃᑦᑕᓯᒪᔭᖏᑦ ᐃᓅᓯᕐᒥᓂᒃ ᑐᓂᒪᓂᖃᕐᕕᒋᑦᓯᐊᓱᒋᑦ ᓇᓗᓀᕐᑕᐅᒋᐊᖃᓚᐅᕐᒪᑕ.”

ᐅᐱᒋᔭᐅᒍᑏᑦ ᓄᓇᕕᒻᒥ ᓇᓪᓕᐅᓂᕐᓯᐅᕈᑎᐅᓱᖑᕗᑦ ᓇᓗᓀᕆᒍᑎᐅᑦᓱᑎᒃ ᓄᓇᕕᒻᒥᐅᑦ ᐃᓄᑐᐃᓐᓀᑦ ᐱᔭᖃᕐᓯᒪᒍᑎᖏᓐᓂᒃ ᑖᒃᑯᐊᓗ ᐅᐱᒍᓲᓯᕐᑕᐅᔪᑦ ᖃᑦᓯᑐᐃᓐᓇᓂᒃ ᐅᑭᐅᖃᓱᖑᕗᑦ ᐱᔪᒪᓕᕐᑎᓯᓯᒪᑦᓱᑎᒃ ᓄᓇᕕᒻᒥᐅᓂᒃ ᐃᓚᐅᔫᖃᑎᒌᑦᑐᓂᒃ ᐱᒐᓱᑦᑕᒥᓐᓂᒃ ᓴᐱᓕᕐᓂᐊᕋᑎᒃ ᐱᒐᓱᖁᑦᓱᒋᑦ. ᒪᑭᕝᕕᒃ ᒫᓐᓇᐅᑎᓪᓗᒍ ᐱᓇᓱᑦᑐᖅ ᐋᕐᕿᒋᐊᕆᑦᓱᓂ ᑎᒃᑯᐊᓯᓂᕐᒥᒃ ᐱᓇᓱᒍᑎᐅᓱᓂᒃ ᐅᐱᒍᓲᓯᕋᑦᓴᐅᔪᕆᔭᐅᓕᕐᑐᓂᒃ ᐅᖃᐅᓯᖃᓛᕆᕗᕐᓗ ᓄᑖᖑᓂᕐᐸᓂᒃ ᑎᒃᑯᐊᓯᒍᑎᓂᒃ ᐊᑐᐃᓐᓇᕈᐃᒍᓂ ᑕᒃᒐᓂ ᐊᕐᕌᒍᒥ ᐱᔭᕇᕐᑕᐅᑐᐊᕐᐸᑕ.