ᓯᐊᔭ ᒣ ᖃᐅᔨᔭᖃᕐᐳᖅ ᓄᑖᒥᒃ ᖁᐱᕐᕈᒥᒃ ᑕᑯᔭᐅᓚᐅᕐᓯᒪᖕᖏᑐᒥᒃ ᐊᒻᒪᓗ ᐱᓪᓚᕆᐅᓂᖏᓐᓂᒃ ᓄᓇᕕᐅᑉ ᐱᕈᕐᑐᖏᑕ
ᐊᓪᓚᑕᖏᑦ ᒥᐊᕆᐋᒻ ᑐᐆᑉ
ᔫᓂ 2019 ᐃᓱᓕᑎᓪᓗᒍ, ᑰᒃᔪᐊᑉ ᑕᕐᕋᖓᓂᑦ ᐅᖓᓯᓐᓂᓕᒻᒥᒃ ᑫᕙᓪᓚᒍᓯᓕᒫᑲᓴᒻᒥ ᐃᖏᕐᕋᒋᐊᓕᒻᒥᒃ ᓯᐊᔭ ᒣ ᐃᓚᖃᓚᐅᔪᕗᖅ ᐱᓇᓱᖃᑎᒌᓂᒃ ᐱᓯᒪᔪᓂᒃ ᒪᓐᑐᔨᐊᑉ ᖁᐱᕐᕈᓂᒃ ᑕᑯᕚᒃᑯᕕᖓᓂᑦ. ᓯᐊᔭ ᐃᓚᒋᔭᐅᓚᐅᔪᔪᖅ ᐱᕙᓪᓕᐊᑎᑦᓯᒍᑎᐅᓯᑎᓪᓗᒋᑦ ᓄᓇᕕᒻᒥ ᖁᐱᕐᕈᓯᐅᕐᑎᐅᓱᑎᒃ ᐃᓅᖃᑎᒌᑦᑐᑦ ᓱᑯᐃᔦᒍᑎᒋᕙᓐᓂᐊᓕᕐᑕᖏᑕ ᐱᓇᓱᑦᑕᐅᒍᑎᖏᑦ, ᑕᒃᑲᓂ ᐃᓄᑐᐃᓐᓀᓗ ᐊᓪᓓᓗ ᑯᔩᑦ ᐅᕕᒃᑲᖁᑎᖏᑦ ᐱᒋᐅᕐᓴᔭᐅᓂᖃᓲᑦ ᖁᐱᕐᕈᓂᒃ ᑲᒪᓇᓱᑦᑕᖃᕐᓂᓂᒃ, ᓄᖑᐃᓐᓇᑎᑦᓯᑌᓕᓂᕐᓂᒃ ᐊᒻᒪᓗ ᖃᓄᐃᑦᑐᓂᖏᓐᓂᒃ ᓇᓗᓀᔦᓂᕐᓂᒃ.
“ᐅᒃᓗᖅ ᓯᓚᑦᓯᐊᒪᕆᐊᓘᓚᐅᔪᔪᖅ, ᓄᕗᔭᖃᓪᓗᐊᕋᓂ, ᐃᑉᐱᐊᓗᓕᐊᕐᓯᒪᓚ-ᐅᔪᔪᒍᑦ ᐱᓱᑦᓱᑕ ᓄᓇᐅᑉ ᖃᖃᖏᑕ ᖁᑦᓯᓂᖏᓐᓂ ᑌᑦᓱᒪᓂ ᑕᑯᑎᓪᓗᖓ ᐊᔪᒉᑦᑐᕋᑕᕐᒥᒃ ᓴᕋᓕᑭᑖᕐᒥᒃ… ᕿᒥᕐᕈᓯᐊᓚᐅᑲᑦᓱᒍ, ᑕᑯᓚᐅᔪᕙᕋ ᐊᑦᔨᒋᔭᐅᖕᖏᒋᐊᖓ ᑕᑯᖃᑦᑕᓯᒪᔭᒃᑲᓄᑦ ᑐᑭᓯᓂᐊᖃᑦᑕᓯᒪᔭᒃᑲᓄᓪᓗ ᐊᒻᒪᓗ ᑕᑯᓐᓇᐅᒐᕐᓱᒋᓪᓘᖃᑦᑕᓯᒪᔭᒃᑲᓄᑦ.“ ᐅᖃᕐᑐᖅ ᓯᐊᔭ. ᑌᒃᑯᐊ Booth’s Sulphur ᓴᕋᓕᑭᑕᖑᓂᕋᕐᑕᐅᔪᑦ ᐊᑦᔨᔪᐊᕆᔮᓚᐅᔪᔭᖓ. “ᐅᖃᐅᓯᕆᓚᐅᔪᔭᕋ ᐊᑦᔨᒋᔭᐅᖕᖏᓂᕋᕐᓱᒍ ᐊᕐᕌᒎᓐᓂᓗ ᒪᕐᕉᓂ ᐅᑕᕐᕿᓚᐅᔪᕗᖓ ᐅᕙᓐᓂᒃ ᖃᐅᔨᒋᐊᕐᕕᖃᕆᐊᓕᒻᒥᒃ ᐅᖃᐅᑎᔭᐅᓚᐅᔪᕗᖓᓗ ᑌᒃᑯᐊ ᓴᕋᓕᑭᑖᑦ ᓄᐊᑕᕕᓂᒃᑲ, ᑕᑯᔭᐅᓚᐅᕐᓯᒪᖕᖏᑐᒋᐊᖏᑦ ᐊᒃᓚᓯᒪᔪᖕᖑᐃᒍᑎᐅᓚᐅᕐᓯᒪᓇᑎᒃᓗ ᓇᓂᓗᓐᓃᑦ ᓯᓚᕐᔪᐊᒥ. ᖁᕕᐊᓱᑦᑐᒪᕆᐊᓘᓕᓚᐅᔪᒋᐊᒥᒃ ᐅᖃᕐᓗᖓ ᑭᓯᐊᓂ ᕿᒃᒋᑖᓚᕿᓚᐅᔪᒐᒪᓪᓛᑦ!”
ᖁᕕᐊᓇᕆᐊᓪᓚᓚᐅᔪᒻᒥᔪᖅ, ᑖᒃᑯᐊ ᓴᕋᓕᑭᑖᑦ ᐁᑉᐯᑖᖏᑦ ᐊᑦᓯᕋᐅᑎᑖᕐᑕ-ᐅᓚᖓᒋᐊᖏᑦ ᐊᑦᓯᑕᐅᑦᓱᑎᒃ Colias tyche ᓯᐊᔭᒥᒃ.
© Miriam Dewar/Makivvik
“ᖁᐱᕐᕈᓂᒃ ᓄᐊᑦᓯᓚᐅᕐᓯᒪᖕᖏᑐᖓ, ᑭᑭᐊᓐᓂᓚᐅᕐᓯᒪᓇᖓᓗ,“ ᓯᐊᔭ ᐅᖃᕐᑐᖅ. “ᑕᑯᓐᓇᐅᔮᒐᐅᒐᑐᐃᓐᓇᓲᕆᒐᒃᑭᑦ ᑎᒍᓚᐅᕐᑐᑐᐃᓐᓇᓲᕆᑦᓱᒋᓪᓗ, ᑐᑭᓯᓂᐊᕐᐸᓱᒋᓪᓗ, ᑭᓯᐊᓂ ᓄᐊᓚᐅᕐᓯᒪᖕᖏᑕᒃᑲ. ᑌᒣᓘᕈᒪᓲᑐᖃᐅᑦᓱᖓ, ᑌᒣᒻᒪᑦ ᖁᕕᐊᓱᒻᒪᕆᓕᓚᐅᔪᕗᖓ.
ᓯᐊᔭ ᑕᒪᑐᒥᖓ ᖁᐱᕐᕈᓕᕆᓂᕐᒥᒃ ᐱᐅᓯᕆᑐᐃᓐᓇᓱᒍ ᐊᓕᐊᒋᔭᓕᑐᖃᐅᔪᖅ. ᐊᒃᑳᓗᖓ ᔮᓐ ᒣ ᓇᑭᑐᐃᓐᓇᓕᒫᖅ ᓯᓚᕐᔪᐊᒥᑦ ᓄᐊᑦᓯᖃᑦᑕᓯᒪᒻᒥᔪᖅ ᖁᐱᕐᕈᓂᒃ ᐊᖁᕕᕋᐅᑎᖃᑎᖃᓱᖑᑦᓱᓂᐊᓪᓛᑦ ᐊᓯᒥᓂᒃ ᑕᒪᒃᑯᓂᖓ ᐱᔭᖃᕋᓱᑉᐸᒥᔪᓂᒃ. ᓄᐊᓯᒪᔭᖏᑦ ᐅᒃᓗᒥ ᔮᓐ ᒣ ᑕᑯᕚᒃᑯᕕᖁᑎᖓᓃᑦᑐᑦ ᐊᒥᕆᑫᑦ ᓄᓇᖓᓐᓂ ᑳᓗᕌᑐᒥ ᑌᔭᐅᔪᒥ. ᑌᓐᓇ ᒣᑉ ᑕᑯᕚᒃᑯᕕᖁᑎᖓ ᐱᔪᕆᒍᑎᒋᒻᒪᕆᑦᑕᖓ ᑳᓗᕌᑑᑉ ᑯᖏᓐᓂ/ Colorado Springs’ ᓯᕗᓪᓕᐹᖑᑦᓱᓂ ᖁᐱᕐᕈᓂᒃ ᑕᑯᕚᒃᑯᕕᐅᒋᐊᖓ
“ᐃᓚᖓᒍᑦ ᐅᖃᕈᓐᓇᑐᖓ, ᐃᑉᐱᒋᔭᒃᑯᑦ ᐱᐅᓯᑐᐃᓐᓇᐅᔮᓚᐅᔪᔪᖅ. ᑭᖑᕙᕇᓄᑦ ᖁᐱᕐᕈᓕᕆᓲᓄᑦ ᑕᓪᓕᒪᐅᒍᑎᐅᑦᓱᖓ ᓄᐊᑦᓯᕙᑦᓱᖓᓗ ᐊᔪᒉᑦᑐ-ᒪᕆᐅᓚᐅᔪᖅ, ᐃᓚᒃᑯᑦ, ᑌᒣᒋᐊᓕᕕᓂᐅᔮᕐᓱᓂ. ᖁᐱᕐᕈᐃᓗ ᓯᓚᕐᔪᐊᓗ ᓱᕐᕃᑐᖏᑦ ᐃᓚᒋᔭᐅᔮᕐᒪᑕ ᑭᓇᐅᓂᕋᓄᑦ ᐃᓚᒌᑎᒍᓪᓗ ᑭᓇᐅᓂᑦᑎᓄᑦ (ᒣᒃᑯᓱᑕ). ᐅᐱᒍᓱᓐᓂᔪᐊᒥᒃ ᐃᑉᐱᓂᐊᓚᐅᔪᕗᖓ ᖁᕕᐊᓱᒻᒪᕆᑦᓱᖓᓗ ᖁᕕᐊᓱᓐᓂᑐᐃᓐᓇᐅᑉ ᐅᖓᑖᓄᑦ. ᒫᓐᓇᓕ ᑕᒐ ᐅᖃᕈᓐᓇᓕᕐᖁᖓ ᐊᒥᓱᐊᓗᓐᓂᒃ ᓴᐅᓂᖃᓕᕆᐊᕐᒪ ᑎᖏᒪᔭᕋᑦᑐᓂᒃ ᓄᓇᕕᒻᒥ ᓴᐅᓂᖅ ᑐᑭᖃᕐᒪᑦ ᐃᓄᒃ ᐅᕝᕙᓘᓐᓃᑦ ᓱᓇᑐᐃᓐᓇᖅ ᐆᒪᔪᖅ ᐊᑦᓯᑕᐅᓯᒪᔪᖅ ᐃᕝᕕᑦ ᓲᓱᒋᔭᐅᑦᓯᐊᓂᑯᓐᓄᑦ).
ᓄᓇᕕᒻᒥ ᖁᐱᕐᕈᓯᐅᕐᑎᐅᓱᑎᒃ ᐱᓇᓱᒍᑎᐅᔪᑦ ᒪᓂᒪᑎᑦᓯᓱᖑᕗᑦ ᐅᐱᕐᖔᒥ/ᐊᐅᔭᒥ ᐱᓇᓱᒐᑦᓴᖏᓐᓂᒃ ᐅᕕᒃᑫ ᐅᑭᐅᓖᑦ 15-ᓂᑦ ᑎᑭᑦᓱᒋᑦ 30, ᑖᒃᑯᐊ ᐱᒋᐅᕐᓴᔭᐅᒍᑎᖃᕐᐸᑐᑦ ᐃᓚᐅᓂᕐᒥᒃ ᑲᒪᓇᓱᓐᓂᒥᒃ ᐱᓇᓱᑦᑐᓄᑦ. ᓯᐊᔭ, 31-ᓂᒃ ᐅᑭᐅᖃᓚᐅᔪᔪᖅ ᐅᖃᐅᑦᔭᐅᓕᕐᓱᓂ ᖃᐅᔨᒋᐅᕐᑐᕕᓂᐅᒋᐊᖓ ᓄᑖᒥᒃ ᖁᐱᕐᕈᒥᒃ ᐊᓯᓄᑦ ᑕᑯᔭᐅᓚᐅᕐᓯᒪᖕᖏᑐᒥᒃ, ᒫᓐᓇᓕ ᐃᑲᔪᕐᐸᓕᕐᑐᖅ ᖁᐱᕐᕈᓂᐊᕐᑎᓴᓂᒃ ᐱᓇᓱᖃᑎᑦᓴᓯᐅᕐᓂᒥᒃ. ᑕᒃᑲᓂ ᐊᕐᕌᒍᒥ ᑯᐯᒃ ᓯᑎᒥ ᐁᙰᖃᑎᒌᑦᑐᓄᑦ ᐃᓚᐅᓚᐅᔪᔪᖅ ᐁᑉᐸᖃᕐᓱᓂ ᒫᒃᓯᒻ ᓚᕆᕖᒥᒃ, ᒪᓐᑐᔨᐊᑉ ᖁᐱᕐᕈᓂᒃ ᑕᑯᕚᒃᑯᕕᖃᐅᑎᖓᓂ ᐱᓇᓱᑦᑎᒥᒃ, ᒪᕐᕉᓱᑎᒃ ᑐᓴᕐᑕᐅᑎᑦᓯᓚᐅᔪᔫᒃ ‘ᓴᕋᓕᑭᑖᑎᑐᑦ ᓱᕐᕋᓂᕐᒥᒃ ᓯᓚᐅᑉ ᐅᕐᖂᓯᒋᐊᕐᓂᖓᒍᑦ,’ ᐱᓇᓱᐊᕈᓯᐅᑉ ᓄᖕᖑᐊᓂ ᐱᓇᓱᐊᓚᐅᔪᔭᒥᓐᓂᒃ. ᑐᐱᕐᒦᓱᑎᒃ, ᑖᒃᑯᐊ ᒪᕐᕉᒃ ᐅᖄᒍᑎᖃᓚᐅᔪᔫᒃ ᐱᒻᒪᕆᐅᓂᖏᓐᓂᒃ ᐊᒃᓚᓯᒪᔪᖕᖑᐃᒍᑎᖃᖃᑦᑕᓂᐅᔪᑦ ᑕᕐᕋᐅᑉ ᐱᕈᕐᑐᖏᓐᓂᒃ, ᐅᖃᒍᑎᖃᕐᒥᓱᑎᒃᓗ ᐱᕙᓪᓕᐊᑎᑦᓯᒍᑎᑦᓴᐅᓂᖏᓐᓂᒃ ᖃᐅᔨᒪᒍᑎᐅᔪᑦ ᓄᓇᐅᑉ ᐱᕈᕐᑐᖏᑕ ᐊᑦᔨᒌᑦᑎᖏᓐᓂᖏᓐᓂᒃ, ᐱᓗᐊᕐᑐᒥ ᐃᓕᖓᓕᕐᐸᑕ ᖁᐱᕐᕈᓄᑦ ᐱᕈᕐᑐᓴᓂᒃ ᐃᕐᐸᑎᕆᓂᖃᓲᓄᑦ. ᓯᐊᔭ ᐅᖄᒍᑎᖃᓚᐅᔪᔪᖅ ᐊᑑᑎᓯᒪᔭᒥᓂᒃ ᓯᕗᓪᓕᐹᖑᑦᓱᓂ ᓄᓇᕕᒻᒥ ᖁᐱᕐᕈᓕᕆᓂᕐᒥᒃ ᐱᔭᖃᕋᓱᑦᓯᒪᒋᐊᒥ 2019-ᖑᑎᓪᓗᒍ ᐅᖃᓚᐅᔪᕗᕐᓗ ᖁᕕᐊᓱᑦᓯᒪᒋᐊᒥᒃ ᐃᓚᐅᖃᑕᐅᓂᕐᒥᓂᒃ ᓄᓇᓕᑐᖃᕐᓂᒃ ᐊᓯᖏᓐᓂᓗ ᐅᖃᐅᑦᔨᕕᒋᒍᓐᓇᓚᐅᔪᒐᒥᒍ ᐊᔪᒉᑦᑐᒥᒃ ᖃᐅᔨᔭᕕᓂᕐᒥᓂᒃ ᓄᓇᕕᒻᒥ. ᐱᒍᓐᓇᕈᑎᒋᓚᐅᔪᒻᒥᔭᖏᑦ ᖃᐅᔨᔭᖃᕐᓂᒥᒃ ᐊᓯᖏᓐᓂᒃ ᓄᓇᓕᑐᖃᐅᔪᑦ ᐃᓗᕐᖁᓯᖏᓐᓂᒃ ᑕᑯᒍᑎᒋᑦᓱᒋᓪᓗ ᑐᓴᕐᑕᐅᑎᑦᓯᒍᑎᖏᓐᓂᒃ.
ᓯᐊᔭ ᐅᖃᓚᐅᔪᔪᖅ ᐱᒻᒪᕆᐅᓂᖃᕆᐊᖏᑦ ᓄᓇᕕᐅᑉ ᐃᓄᖏᓐᓄᑦ ᖃᐅᔨᒪᒋᐊᖃᕐᓃᑦ ᐱᕈᕐᑐᓂᒃ ᓄᓇᒥᓐᓃᑐᓂᒃ ᐱᓗᐊᕐᑐᒥ ᓯᓚᐅᑉ ᐱᐅᓯᖓ ᐊᓯᑦᔨᓕᕐᑎᓗᒍ ᐊᒻᒪᓗ ᐊᕐᕌᒍᓂ 30-ᓂ ᐊᓂᒍᕐᑐᓂ ᐊᖏᔪᒻᒪᕆᒻᒥᒃ ᐊᓯᑦᔨᓯᒪᓂᖃᓕᕆᐊᖏᑦ.
“ᖃᐅᔨᒍᒪᓂᖃᕈᑦᑕ, ᐅᓇᒻᒥᓱᒃᑯᑕᓗ, ᑐᑭᓯᒍᒪᓂᖃᕈᑦᑕᓗ ᓯᓚᐅᑉ ᐊᓯᑦᔨᓂᖏᑕ ᓱᕐᕃᓂᖏᓐᓂᒃ ᓄᓇᑦᑕ ᐱᐅᓯᖏᓐᓂᒃ ᐃᑲᔪᕐᓯᔭᐅᓂᐊᕐᐳᒍᑦ ᑕᑯᒍᓐᓇᓯᓗᑕ ᖃᓄᐃᓘᕐᓗᑕ ᓴᐳᑦᔨᓯᒪᒍᓐᓇᓂᖃᕐᓂᑎᓐᓂᒃ, ᓄᖑᐃᓐᓇᑎᑦᓯᑌᓕᒍᓐᓇᓂᑦᑎᓂᒃᓗ, ᐊᒻᒪᓗ ᖃᐅᔨᓴᕈᓐᓇᓂᕐᓂᒃ. ᐅᖄᒍᑎᖃᓕᑐᐊᕋᑦᑕ ᖃᐅᔨᓴᕐᓂᒥᒃ, ᐃᓱᒪᓱᖑᔪᖓᓕ ᑕᒪᓐᓇ ᐱᓇᓱᖃᑎᒌᒍᑎᐅᔪᑦᓴᐅᒋᐊᖓ ᖃᐅᔨᓴᕐᓂᓂᒃ ᐱᓇᓱᒐᖃᕐᕕᖁᑎᑦᑎᓄᑦ ᓄᓇᕕᒻᒥ. ᑕᒪᒃᑯᐊ ᐊᒃᓚᓯᒪᔪᖕᖑᐃᒍᑎᐅᓯᒪᔪᑦ ᓄᓇᕕᒻᒥᐅᓕᒫᓄᑦ ᐊᑐᐃᓐᓇᐅᓂᖏᑦ ᐱᑕᖃᑦᓯᐊᕆᐊᖃᕐᒪᑕ ᓇᒻᒥᓂᖅ ᑐᑭᑖᕐᑐᐃᔨᐅᓂᑦᓴᑕ ᐊᕐᖁᑎᖓᓄᑦ, ᐃᓄᖁᑎᑦᑎᓂᒃ ᓄᑭᑖᕆᓂᖅ ᓇᓗᓀᕆᓂᕐᓗ ᐱᐅᓯᑐᖃᕐᑎᒍᑦ ᖃᐅᔨᒪᔭᑦᑎᓂᒃ ᐱᑕᖃᓪᓚᕆᒋᐊᖃᕐᒪᑕ.”
