ᒪᕐᕉᒃ ᓄᓇᕕᒻᒥ ᐃᓕᑕᕆᔭᐅᒍᑏᒃ ᑐᓂᔭᐅᓂᕆᓚᐅᕐᑕᒋᒃ ᐅᖃᕐᑕᐅᓚᐅᕐᐴᒃ ᑕᒃᑲᓂ ᐊᕐᕌᒍᒥ ᒪᑭᕝᕕᒃ ᐊᕐᕌᒍᑕᒫᕐᓯᐅᑎᒥᓂᒃ ᑲᑎᖕᖓᑎᑦᓯᓂᖃᕐᑎᓗᒍ ᐅᒥᐅᔭᒥ. ᑖᓂᐊᓕ ᐋᓇᓈᕐᓗ ᔫᓯᐱ ᐸᓪᓚᔮᑦᓗ ᑐᓂᔭᐅᓚᐅᕐᐴᒃ ᐃᓕᑕᕆᔭᐅᒍᑏᓐᓂᒃ, ᑐᓂᕐᕈᑎᒋᔭᐅᓲᓂᒃ ᐊᕐᕌᒍᑕᒫᑦ ᐃᓄᑐᐃᓐᓇᓄᑦ ᐊᖑᑎᓄᓪᓗ ᐊᕐᓇᓄᓪᓗ ᑌᔭᐅᒍᑎᑦᓴᓯᐊᓂᒃ ᐱᔭᖃᕐᓯᒪᔪᓄᑦ ᐊᒥᓱᐃᓂ ᖃᓄᑐᐃᓐᓇᖅ ᐱᒐᓱᐊᕐᕕᐅᔪᓂ.
ᑖᓂᐊᓕ ᐋᓇᓈᖅ ᑎᒃᑯᐊᑕᐅᓚᐅᔪᕗᖅ ᐱᑦᔪᑎᖃᕐᓱᓂ ᑕᖃᕐᖂᑕᓚᐅᕐᓯᒪᒐᓂ ᐱᓇᓱᐊᖏᓐᓇᓱᖑᒐᒥ ᑲᖏᕐᓱᐊᓗᒃᔪᐊᑉ ᐅᕕᒃᑲᖏᓐᓂᒃ ᐅᓪᓗᕆᐊᖅ ᐃᓕᓐᓂᐊᕕᒻᒥ ᑲᖏᕐᓱᐊᓗᒃᔪᐊᒥ ᐱᓇᓱᑦᓱᓂ. ᑖᓂᐊᓕ ᐃᓕᓐᓂᐊᑎᑦᓯᔨᐅᔪᖅ ᐅᓪᓗᕆᐊᖅ ᐃᓕᓐᓂᐊᕕᖕᒥ ᐃᓕᓭᔨᐅᓕᕐᓱᓂ ᐊᕐᕌᒍᕐᓂ 20-ᑲᓴᓐᓂ, ᐃᓕᓐᓂᐊᑎᑦᓯᔨᐅᑦᓱᓂ ᐅᕕᒃᑲᓂᒃ ᐃᓕᓐᓂᐊᓂᑐᐃᓐᓇᒥᒃ ᐃᓕᓐᓂᐊᑎᑕᐅᖕᖏᑐᓂᒃ.
ᐃᓅᓕᕐᓯᒪᔪᖅ 1967-ᒥ, ᑖᓂᐊᓕ ᐃᓕᓐᓂᐊᑎᐅᖃᑦᑕᓯᒪᔪᖅ ᑲᕙᒪᑐᖃᒃᑯᑦ ᐅᓪᓗᑯᑦ ᐊᒃᓚᓂᒃ ᐃᓕᓐᓂᐊᑎᑦᓯᕕᒋᓯᒪᔭᖓᓂ ᑲᖏᕐᓱᐊᓗᒃᔪᐊᒥ ᐱᕈᕐᓴᓂ-ᖃᕐᓯᒪᕗᕐᓗ ᐃᓕᓴᕐᑕᐅᓱᓂ ᐊᑖᑕᒥᓄᓪᓗ ᐃᓄᑐᖃᕐᓄᓗ. ᐃᓕᓐᓂᐊᕕᒻᒥ ᐱᓇᓱᒐᕐᑕᓚᐅᕋᓂ ᑖᓂᐊᓕ ᐊᕐᕌᒍᕐᓂ ᐊᒥᓱᓂ ᒪᙯᑦᑎᓯᕕᖁᑎᖃᓚᐅᔪᕗᖅ ᒪᙯᔭᕐᑐᓯᒪᔪᓄᑦ ᐃᓱᐊᕆᔭᐅᕕᒋᒻᒪᕆᖃᑦᑕᓚᐅᔪᔭᒥᓂᒃ ᑐᖕᖓᓇᕐᑐᒪᕆᐅᒐᒥ.
ᑖᓂᐊᓕᐅᑉ ᓱᕐᕃᓂᕆᓯᒪᔭᖓ ᐊᖏᔪᒻᒪᕆᐅᔪᖅ. ᑖᓂᐊᓕ ᐊᒥᓱᓂᒃ ᐱᕐᖃᔭᑦᓯᐊᖏᑦᑑᒍᑎᖃᕐᓱᑎᒃ ᐅᕕᒃᑲᓂ ᐱᒋᐅᕐᑎᓯᓯᒪᑦᓯᐊᑐᖅ ᓄᓇᓕᖕᒥᓂ ᐃᓘᓐᓇᓗᑐᑎᒃ ᐃᓕᓐᓂᐊᑎᑕᖏᑦ ᐱᒋᐅᕐᓂᑖᕐᓯᒪᖕᖏᑲᓗᐊᕐᑎᓗᒋᑦ, ᑖᓂᐊᓕ ᑲᔪᓯᑦᓯᐊᓱᓂ ᐃᑲᔪᕆᐊᓕᓐᓂᒃ ᐃᑲᔪᕋᓱᖏᓐᓇᓲᖑᔪᖅ. ᐊᖓᔪᕐᖄᕆᔭᑎᑐᑦ ᐱᐅᓯᖃᕐᕕᖃᓲᖅ ᓱᕈᓯᕐᓂᒃ ᐃᓕᓴᕐᑕᒥᓂᒃ ᑕᖃᓚᐅᕐᓯᒪᒐᓂ ᐱᒐᓱᑦᓱᓂ ᑕᒪᒃᑯᐊᓗ ᐱᓇᓱᑦᑕᖏᑦ ᓄᓇᓕᖕᒥᓂᑦ ᐃᓕᓐᓂᐊᕕᒻᒥᓗ ᓲᓱᒋᔭᐅᑦᓯᐊᓂᕐᒥᒃ ᐊᑭᓕᕐᑕᐅᒍᑎᒋᓯᒪᕙᑉᐸᖏᑦ ᐊᒃᓛᑦ ᐅᖃᕐᑕᐅᕙᑦᓱᓂ “ᐊᓯᑦᓴᖃᖕᖏᒋᐊᖓ.”
ᑌᔭᐅᔪᑦᓴᓯᐊᒻᒪᕆᒻᒥᒃ ᐃᓅᓯᓕᒫᒥᓂ ᐱᒍᑦᔨᓇᓱᒍᑎᒋᕙᑦᑕᒥᓄᑦ ᐃᓄᑐᐃᓐᓇᖏᓐᓂᒃ ᓄᓇᕕᐅᑉ ᐱᑦᔪᔭᖃᕐᓱᓂ ᑐᓴᖃᑦᑕᐅᑎᒍᑎᓕᕆᓂᑎᒍᑦ ᐃᓗᕐᖁᓯᕐᒨᓕᖓᔪᑎᒍᓪᓗ, ᒪᑭᕝᕕᒃ ᑐᓴᕐᑕᐅᔪᑦᓴᓯᐊᖁᑎᖃᓚᐅᕆᕗᖅ ᔫᓯᐱ ᐹᓪᓚᔮᑦᒥᒃ ᐱᔪᑦᓴᓯᐊᖁᑎᒋᑦᓱᓂᐅᓪᓗ ᓄᓇᕕᒻᒥ ᐃᓕᑕᕆᔭᐅᒍᑎᒥᒃ.
ᓯᕗᓕᕐᑎᐅᓂᖅ ᔫᓯᐱᐅᑉ ᐱᐅᓯᑐᐃᓐᓇᕆᕙᖓ. ᐱᓇᓱᐊᖃᑦᑕᓯᒪᒐᒥ ᑲᑎᖕᖓᔨᓄᑦ ᓯᕗᓕᕐᑎᐅᓂᕐᒥᒃ ᓄᓇᕕᒻᒥ ᐃᓗᓯᓕᕆᓂᕐᓄᓗ ᐃᓄᓕᕆᓂᕐᓄᓗ ᐱᑦᔪᔨᕕᒻᒥ ᐃᓚᐅᖏᓐᓇᐸᑦᓱᓂᓗ ᑲᑎᖕᖓᔨᖏᓐᓄᑦ. ᐃᓚᒋᔭᐅᕙᑦᑐᑐᖃᐅᒻᒥᔪᖅ ᐊᕙᑕᖅ ᐱᐅᓯᑐᖃᓕᕆᕕᒻᒧᑦ ᑌᒪᖕᖓᑦ ᓴᕐᕿᓚᐅᕐᓯᒪᑎᓪᓗᒍᓂᑦ ᐊᖓᔪᕐᖃᐅᕕᒋᓯᒪᒻᒥᓱᒍᓗᐊᓪᓛᑦ.
ᐃᓅᓕᕐᓯᒪᔪᖅ 1947-ᒥ, ᔫᓯᐱ ᐃᓕᓐᓂᐊᑎᐅᓯᒪᕗᖅ ᑲᕙᒪᑐᖃᒃᑯᑦ ᐅᒃᓗᑯᑦ ᐃᓕᓐᓂᐊᑎᑦᓯᕕᒋᓯᒪᔭᖓᓐᓂ ᓴᓪᓗᓂ ᑭᖑᓂᐊᒍᑦ ᐳᕐᑐᓂᕐᓴᒋᐊᓪᓚᒥᒃ ᐃᓕᓐᓂᐊᕆᐊᓕᓚᐅᕐᓯᒪᒻᒥᔪᖅ ᐋᑐᒑᒧᑦ. ᓄᓇᓕᒻᒥᓄᑦ ᐅᑎᕋᒥ ᐅᑭᐅᖃᓕᕐᓱᓂ 18-ᓂᒃ, ᐱᓇᓱᒐᖃᓯᓚᐅᕐᓯᒪᒻᒥᔪᖅ ᑐᓵᔨᐅᑦᓱᓂ ᓴᓪᓗᐃᑦ ᐋᓐᓂᐊᕕᖓᓂ. ᓯᕿᓂᕐᒥᐅᓄᑦ ᐅᑎᓕᓚᐅᕐᓯᒪᒻᒥᔪᖅ ᐃᓚᒋᔭᐅᒋᐊᕐᑐᓯᑦᓱᓂ ᑯᐯᒃ ᑕᕐᕋᖓᓂ ᐃᓄᐃᑦ ᑲᑐᑦᔨᖃᑎᒌᓐᓂᖓᓄᑦ ᑖᓐᓇ ᓴᕐᕿᑎᑕᐅᒋᐊᖕᖓᑎᓪᓗᒍ 1970 ᐊᕐᕌᒍᖏᑦ ᐱᒋᐊᕐᖃᒥᐅᑎᒃᓗᒋᑦ. ᑎᓕᔭᐅᒍᑎᖃᕐᓯᒪᔪᖅ ᑐᓴᖃᑕᐅᑎᒍᑎᓕᕆᓂᕐᒥᒃ ᐱᓇᓱᑦᑎᒋᔭᐅᓚᖓᓕᕐᓱᓂ ᐃᓄᐃᑦ ᑲᑐᑦᔨᖃᑎᒌᓐᓂᖓᓄᑦ ᑯᐯᒃ ᑕᕐᕋᖓᓂ, ᐃᑲᔪᕐᓯᒪᕕᒋᓚᐅᔪᔭᒥᓂᒃ ᐊᑕᐅᑦᓯᑯᕐᑎᓯᔨᐅᖃᑕᐅᑦᓱᓂ ᑐᓴᐅᑎᓂᒃ ᓄᓇᕕᒻᒥ ᐱᔭᖃᕐᐸᓕᐊᓂᕐᓄᑦ, ᐱᓇᓱᑦᓱᓂ ᐊᔭᐅᕆᓂᕐᒥᒃ ᑲᓇᑕᒥ ᑐᓴᖃᑦᑕᐅᑎᒍᑎᓕᕆᓂᕐᓄᑦ ᑲᕙᒪᒃᑯᑦ ᐱᑦᔪᔨᕕᖓᓐᓂ ᐊᑐᓂᑦ ᓄᓇᓖᑦ ᓈᓚᐅᑎᓂᒃ ᐅᖄᓚᐅᑎᐅᒍᓐᓇᑐᓂᒃ ᐱᑕᖃᕆᐊᖃᕐᓂᕋᕐᓱᒋᑦ ᑕᒪᒃᑯᐊ ᐱᑦᔪᑎᖃᕐᑎᓗᒋᑦ ᓄᓇᓕᐊᕈᖑᐊᑦ ᐃᓘᓐᓇᑎᒃ ᑐᓴᕐᓴᐅᒍᓐᓇᖁᑦᓱᒋᑦ ᓱᔪᖃᓕᕐᐸᑦ ᐋᓐᓂᑐᖃᕐᐸᓗᓐᓃᑦ ᐅᐃᒪᓇᕐᓯᔪᖃᕐᐸᓗᓐᓃᑦ. ᐊᖓᔪᕐᖃᒪᕆᖕᖑᓚᐅᕐᓯᒪᔪᖅ ᑕᕐᕋᒥᐅᑦ ᓂᐱᖓᓐᓄᑦ.
ᒪᑭᕝᕕᒃ ᓇᓗᓀᕆᓚᐅᔪᕗᖅ ᑖᒃᑯᐊ ᒪᕐᕉᒃ ᐱᔭᖃᕐᓯᒪᒍᑎᖏᓐᓂᒃ 2023-ᒥ ᓄᓇᕕᒻᒥ ᐃᓕᑕᕆᔭᐅᒍᑎᒥᒃ ᐱᑎᑦᓱᒋᒃ ᐊᓯᖃᖕᖏᑐᓂᒃ ᐃᑲᔪᕐᓯᓯᒪᒍᑎᖏᓐᓄᑦ ᓄᓇᕕᐅᑉ ᐃᓄᑐᐃᓐᓇᖏᓐᓂᒃ.
