ᐊᓪᓚᑕᖏᑦ ᓯᑏᕙᓐ ᕿᐊᓐᑐᕆᐅᑉ
ᓯᓚᕐᔪᐊᒥ ᖃᓂᒪᓇᖃᕐᑎᓗᒍ ᖃᐅᔨᓯᒪᓕᕐᖁᒍᑦ ᐅᑭᐅᕐᑕᑐᒥ ᖃᖓᑦᑕᔫᑦ ᐊᑑᑎᖃᓪᓚᕆᓐᓂᖏᓐᓂᒃ. ᐱᒍᑦᔨᓗᑐᕆᐊᖃᕐᒪᑕ, ᓯᕿᓂᕐᒥ ᐊᕐᖁᑎᑯᑖᕌᓗᖃᓲᒍᒻᒪᑕᓕ ᑌᒣᑦᑐᓭᓐᓇᖅ, ᐊᑭᓕᕐᑕᐅᓯᒪᔪᓂᒃ ᑲᕙᒪᑐᖃᒃᑯᓄᑦ ᑯᐯᒃᑯᓗ ᑲᕙᒪᖓᓄᑦ. ᐃᓄᐃᑦ ᓇᒻᒥᓂᖃᕐᓯᒪᓕᕐᑐᑦ ᐅᑭᐅᕐᑕᑐᒥ ᖃᖓᑦᑕᔫᓕᕆᓂᕐᒥᒃ ᐊᑎᓕᐅᕐᕕᐅᓚᐅᕐᓯᒪᑎᓪᓗᒍᓂᑦ ᔦᒥᓯ ᐯᒥ ᑯᐯᒃᓗ ᑕᕐᕋᖓᓂ ᐊᖏᖃᑎᒌᒍᑎᒃ 1975ᒥ, ᓄᐃᑕᐅᓚᐅᕐᓯᒪᒻᒪᑦ ᐃᓄᐃᑦ ᖃᖓᑦᑕᔫᓕᕆᓂᖓ, ᓇᒻᒥᓂᕆᔭᐅᔪᖅ ᐃᓘᓐᓈᒍᑦ 100%ᒥᒃ ᒪᑭᕝᕕᑯᓐᓄᑦ. ᕘᔅᑎᐊ ᓂᐅᕕᐊᕆᔭᐅᓚᐅᕐᓯᒪᔪᖅ 1991ᒥ, ᐊᑕᐅᓯᖕᖑᖃᑎᖃᕐᑎᑕᐅᑦᓱᓂ ᑲᓀᑎᐊᓐ ᓄᐊᑦᒥᒃ 2019ᒥ, ᓇᒻᒥᓂᕆᔭᐅᔪᒥᒃ ᐃᓄᕕᐊᓗᐃᑦ ᐱᓇᓱᕝᕕᖁᑎᖓᓂᒃ. ᑕᑯᓪᓗᕆᓐᓇᑐᖅ, ᑖᒃᑯᐊ ᖃᖓᑦᑕᔫᓕᕆᓃᒃ ᐱᒍᑦᔨᒪᓃᒃ 1%ᖏᓐᓂᒃ ᑲᓇᑕᒥᐅᑦ, ᖃᖓᑕᕕᖃᓲᒍᑦᓱᑎᒃ 40%ᖓᓂᒃ ᑲᓇᑕᒥᐅᑦ ᓄᓇᕐᔪᐊᖓᑕ.
ᖁᐱᕐᕈᖅ ᐁᑦᑐᑑᑕᐅᓲᖅ ᓯᓚᕐᔪᐊᓕᒫᒥ ᖃᓂᒻᒪᕈᑕᐅᒋᐊᖕᖓᓯᓚᐅᕐᓯᒪᕗᖅ, ᖃᐅᔨᒪᔪᐃᓐᓇᐅᓕᕋᑦᑕ, ᓭᓇᒥ ᐃᐅᔪᑉᒥ ᖃᓂᒻᒪᕈᑕᐅᖃᑦᑕᓯᒻᒥᓱᓂ 2020 ᐊᕐᕌᒍᐃᑦ ᐱᒋᐊᕐᓂᖏᓐᓂᒃ. ᐃᑕᓕᒥᐅᑦ ᓇᒧᑐᐃᓐᓈᕆᐊᖃᖕᖏᑑᓕᕇᓚᐅᔪᕗᑦ ᑕᕐᖀᓂ ᒪᕐᕉᓂ ᒫᑦᓯᐅᑉ ᐱᒋᐊᕐᓂᖓᓂ ᐱᒋᐊᕐᓱᑎᒃ. ᓄᐊᑦ ᐊᒥᐅᔨᑲᒥᐅᑦ ᑌᒣᓐᓂᐊᓕᕐᒥᒪᑕ ᒫᑦᓯᐅᑉ ᕿᑎᓪᓗᐊᖓᓂ. ᐅᑭᐅᕐᑕᑐᕐᒥᐅᑦ ᓯᓚᕐᔪᐊᒥᐅᒍᖃᑎᒥᓂᒃ ᐱᑐᑦᓯᒪᖃᑎᖃᕈᓐᓀᓗᑎᒃ ᑭᓯᐊᓂᐅᒋᐊᖃᓕᓚᐅᔪᕗᑦ. ᑕᒐᓖ ᑕᕐᕋᒥ ᖃᖓᑦᑕᔫᓕᕆᓃᑦ ᖃᓄᐃᓕᖓᓕᕐᓂᖃᑦ ? ᓄᕐᖃᖓᓯᑐᐃᓐᓇᕈᓐᓇᓂᖕᖏᑐᑦ ᐊᓯᖏᑦ ᖃᖓᑦᑕᔫᓕᕆᓃᑦ ᓄᕐᖃᖓᒋᐊᖃᓯᒐᓗᐊᕐᒪᑕ. ᑭᖕᖒᒪᓇᕐᑐᓂᒃ ᐋᓐᓂᐊᓯᐅᕆᒍᑎᓂᒃ, ᓂᕿᓂᒃ, ᑭᖕᖒᒪᒋᔭᐅᔪᓂᒃ ᐱᓇᓱᑦᑎᓂᓪᓗ ᐅᓯᑲᑦᑕᕆᐊᖃᕐᓂᕋᒥᒃ ᐅᖓᓯᒋᔭᐅᔪᒥᐅᓄᑦ ᐃᓄᐃᑦ ᓄᓇᓕᖏᓐᓄᑦ ᓄᓇᕕᒻᒥ, ᓄᓇᕘᕐᒥ, ᓄᓇᑦᓯᐊᒥᓪᓗ.
ᑲᔪᓯᒋᐊᖃᕐᓯᒪᔪᑦ ᐊᐅᓚᓂᕐᒥᓂᒃ, ᐃᓄᓐᓂᒃ ᐅᓯᖕᖏᑲᓗᐊᕋᒥᒃ, ᑮᓇᐅᔭᓄᑦ ᐃᑎᕐᑐᑦ ᐃᑭᓕᐅᒥᓪᓚᕆᑦᑎᓗᒋᑦ 90%ᒧᑦ. ᐱᔭᕆᐊᑦᑐᑐᒻᒪᕆᐅᓯᒪᔪᑦ. ᑌᒪ ᐃᓄᐃᑦ ᐱᓂᐊᕐᓂᓕᕆᔩᑦ ᑯᐯᒃᒥ ᑲᕙᒪᒃᑯᓂᒃ ᑲᓇᑕᒥᐅᓂᓪᓗ ᐱᒡᒐᑕᕋᓱᐊᕐᕕᖃᕆᐊᖃᓕᓚᐅᔫᑦ ᑮᓇᐅᔭᑎᒍᑦ ᐃᑲᔪᕐᓯᔭᐅᒍᒪᑦᓱᑎᒃ ᖃᖓᑦᑕᔫᑦ “ᐱᒍᑦᔨᒋᐊᖃᓪᓗᑐᕐᓂᒥᓄᑦ ᐱᒍᑦᔨᖃᑦᑕᕆᐊᖃᕐᒪᑕ”.
ᒪᑭᕝᕕᑯᑦ ᐊᖓᔪᕐᖄᖓ ᓵᓕ ᒍᐊᑦ, ᐊᕙᑎᓪᓗ ᖁᓕᓪᓗ ᓯᑕᒪᓪᓗᓂ ᐊᕐᕌᒍᓂ ᐅᖃᕐᑎᒪᕆᐅᖃᑕᐅᓯᒪᔪᖅ ᐊᑐᒑᒥ, ᐱᓇᓱᐊᒻᒪᕆᐅᑎᖃᖃᑕᐅᓚᐅᔪᕗᖅ ᑕᕐᕿᓂ ᐊᒥᓱᓂ ᑲᓀᑎᐊᓐ ᓄᐊᑦ ᑮᓇᐅᔭᖃᕐᑎᑕᐅᒍᑎᑦᓴᖏᓐᓂᒃ, ᑲᕙᒪᑐᖃᒃᑯᓂᑦ, ᓄᓇᕘᕐᒥᑦ, ᓄᓇᑦᓯᐊᒥᓪᓗ. ᑯᐯᒃᑯᓗ ᑲᕙᒪᖓᓂᒃ ᐃᓄᐃᑦ ᖃᖓᑦᑕᔫᖏᑦᑕ ᑮᓇᐅᔭᕐᑐᕈᑎᑦᓴᖏᓐᓂᒃ, ᑲᓀᑎᐊᓐ ᓄᐊᑦᓗ ᑮᓇᐅᔭᕐᑐᕈᑎᑦᓴᖏᓐᓂᒃ.
“ᑕᒪᓐᓇ ᐱᔭᕆᐊᑐᔪᒻᒪᕆᐅᓚᐅᔪᕗᖅ,” ᐅᖃᕐᑐᖅ ᓵᓕ ᒍᐊᑦ. “ᐃᓄᐃᑦ ᑮᓇᐅᔭᖏᓐᓂᒃ ᐊᑐᓚᐅᔪᒐᑦᑕ, ᑲᕙᒪᒃᑯᑦ ᑮᓇᐅᔭᕆᖕᖏᑕᖏᓐᓂᒃ, ᐱᒍᑦᔨᒍᑎᒋᒋᐊᓕᑦᑎᓂᒃ ᐱᒍᑦᔨᒍᑎᒋᑦᓱᒋᑦ.” ᐱᒡᒐᑕᕋᓱᐊᕆᐊᖃᒻᒪᕆᓚᐅᔪᕗᒍᑦ ᑲᕙᒪᒃᑯᓂᑦ ᑮᓇᐅᔭᕐᑖᕋᓱᐊᕐᓱᑕ.”
ᐱᒡᒐᑕᕋᓱᐊᒻᒪᕆᓚᐅᔪᕗᑦ ᐳᕐᑐᓂᕐᓴᖏᑦ ᒪᑭᕝᕕᑯᑦ ᐊᖓᔪᕐᖄᖓᑕ ᐊᓪᓚᕕᖓᓂᑦ ᐱᓯᒪᔪᑦ, ᐃᓄᕕᐊᓗᐃᓪᓗ ᐱᓇᓱᒐᖃᕐᕕᖓ, ᐃᓄᐃᓪᓗ ᖃᖓᑦᑕᔫᓕᕆᓂᖓᑕ ᑲᓀᑎᐊᓐ ᓄᐊᑦᓗ ᖃᖓᑦᑕᔫᓕᕆᓂᖓᑕ ᑭᒡᒐᑐᕐᑎᖏᑦ. ᐃᑲᐅᕐᓂᓂ ᐊᒥᓱᑐᕐᓱᑎᒃ ᐅᖄᓚᐅᑎᒃᑯᑦ ᑲᑎᒪᖃᑦᑕᓚᐅᔪᕗᑦ ᐅᓪᓗᑕᒫᑦ, ᑲᕙᒪᒃᑯᓂᒃ ᓵᖕᖓᓯᓂᑐᐃᓐᓇᐅᖏᑦᑐᒥᒃ ᐱᓇᓱᐊᕐᓱᑎᒃ, ᖃᓄᐃᖕᖏᓯᐊᕐᑐᓴᐅᓂᕐᒧᑦ ᐱᓐᓀᓗᑕᐅᔪᓂᒃ ᑲᒪᒋᐊᑲᕐᒥᓱᑎᒃ ᓯᓚᕐᔪᐊᒥ ᖃᓂᒪᓇᕐᒨᓕᖓᔪᓂᒃ ᐊᑦᑕᓀᑦᑐᓯᐊᒍᓗᑎᒃ ᖃᖓᑕᒋᐊᖃᕐᓂᖏᓐᓄᑦ ᖃᖓᑦᑕᔫᑦ.
ᒍᐃᓕᐊᒻ ᑕᒍᓐᓈᖅ, ᐱᓂᐊᕐᓂᓕᕆᐅᑎᓂᒃ ᐃᒫᙰᓚᔨᖓ ᓵᓕ ᒍᐊᑦ, ᑕᒪᑐᒥᖓ ᐱᒐᓱᐊᒻᒪᕆᓐᓇᑑᓂᕃᓐᓂᖁᖅ. “ᓄᕐᖃᔪᐃᑦᑑᖃᑦᑕᓚᐅᔪᕗᒍᑦ, ᑐᕐᖃᑕᕐᕕᓕᒫᑲᓵᓂᒃ ᑲᑎᓯᖃᑦᑕᓱᑕ, ᐅᖃᕐᑎᒪᕆᖏᓐᓂᒃ ᑲᕙᒪᒃᑯᑦ ᐅᖄᕕᖃᕆᐊᖃᖃᑦᑕᓱᑕᒪ ᑎᐊᓂᔅ ᐹᑎᓴᓐᒥᒐᓚᒃ, ᑲᓇᑕᒥᐅᓪᓗ ᐊᖓᔪᕐᖄᖓᓄᑦ ᐊᓪᓚᖃᑦᑕᓱᑕ ᐊᑕᐅᓯᐊᕋᑕ, ᐊᑐᒑᒦᑦᑐᒧᑦ ᑐᓂᒋᐊᕐᑐᖃᑦᑕᓱᒋᑦ.” ᓖᓴ ᓯᒪᑦ, ᒪᑭᕝᕕᑯᑦ ᐊᓪᓚᕕᖓᓃᑦᓱᓂ ᐊᑐᒑᒥ ᑲᓇᑕᒥᐅᑦ ᑲᕙᒪᖓᓂᒃ ᑲᕙᒪᓐᓂᐊᖃᑦᑕᑎᓪᓗᒍ, ᔮᓐ ᑐᐳᐃᓗ ᐊᖓᔪᕐᖄᑉ ᐊᓪᓚᕕᖓᓃᑦᓱᓂ ᒪᓐᑐᕆᐊᒥ ᑯᐯᒃᑯᑦ ᑲᕙᒪᖓᓂᒃ ᑲᕙᒪᓐᓂᐊᖃᑦᑕᑎᓪᓗᒍ, ᑲᕙᒪᓐᓂᐊᑐᓄᑦ ᐃᓚᐅᑦᓱᑎᒃ.
ᐅᐃᒪᓇᕐᑐᓕᕆᕙᓪᓕᐊᓯᑎᓪᓗᒋᑦ ᒫᑦᓯᐅᑉ ᐱᒋᐊᕐᓂᖓᓂ, ᐊᓪᓚᕕᐅᖃᑦᑕᓯᓚᐅᔪᕗᑦ ᑯᐯᒃᒥᐅᑦ ᐊᖓᔪᕐᖄᖓ ᕙᕌᓐᓱᐊ ᓕᑰ, ᑲᓇᑕᒥᐅᑦ ᑐᕐᖃᑕᕐᕕᖓ ᐃᖏᕐᕋᐅᑎᓕᕆᓂᕐᓄᑦ ᒫᒃ ᑳᕐᓅ, ᐊᓪᓚᕕᖃᓚᐅᔪᒻᒥᑎᓪᓗᒋᑦ ᑲᑐᑦᔨᓱᑎᒃ ᒪᑭᕝᕕᑯᑦ ᐊᖓᔪᕐᖄᖓ ᓵᓕ ᒍᐊᑦ IRCᑯᓗ ᑐᑭᒧᐊᑦᑎᓯᔨᖓ ᐊᒻᒪᓗ ᐊᖓᔪᕐᖄᖓᑦ ᑐᐃᓐ ᓯᒪᑦ ᑲᓇᑕᒥᐅᑦ ᐊᖓᔪᕐᖄᖓᓂᒃ ᑐᕈᑑᒥᒃ. ᑐᑭᓯᓇᑦᓯᐊᑐᓂᒃ ᑐᕃᓐᓇᓯᐊᕐᑐᓂᓪᓗ ᐊᓪᓚᓱᑎᒃ. ᑕᕐᕋᒥ ᖃᖓᑦᑕᔫᓕᕆᓃᑦ ᐱᒍᑦᔨᓗᑐᕆᐊᖃᕐᒪᑕ. ᑲᕙᒪᒃᑯᓄᑦ ᑮᓇᐅᔭᖃᕐᑎᑕᐅᒋᐊᖃᕐᒪᑕ ᓯᓚᕐᔪᐊᒥ ᖃᓂᒪᓇᖃᓕᕐᑎᓗᒍ, ᖏᑐᐊᕈᑎᒃ ᑲᑕᑐᐃᓐᓇᓚᖓᒻᒪᑕ ᑮᓇᐅᔭᑎᒍᑦ.
ᓯᓚᕐᔪᐊᒥ ᐅᐃᒪᓇᕐᓯᒍᑕᐅᑎᓪᓗᒍ ᖃᓂᒪᓇᖅ ᑌᑰᓇᑦᓭᓇᖅ, ᑲᓀᑎᐊᓐ ᓄᐊᑦ ᑕᕐᕿᓂ ᐱᖓᓲᔪᕐᑐᓂ ᐊᐅᓚᑕᐅᓂᖃᓕᓚᐅᔫᖅ ᐊᑕᐅᓯᖕᖑᑎᑕᐅᕐᖃᒥᐅᑎᓪᓗᒋᒃ ᖃᖓᑦᑕᔫᓕᕆᓃᒃ. ᒪᓕᒐᓕᐅᕐᑕᐅᓯᒪᒌᓚᐅᔫᖅ ᑲᓇᑕᒥ ᐃᖏᕐᕋᐅᑎᓕᕆᔨᓄᑦ ᐊᕐᖁᑎᒥᓂᒃ ᓴᖑᑎᕆᒍᓐᓇᕋᓂ, ᖃᓄᓪᓗᐊᑎᒋᓗ ᖃᖓᑕᖃᑦᑕᓂᕆᒋᐊᓕᖓ ᒪᓕᒐᓕᐅᕐᑕᐅᓯᒪᑦᓱᓂ, ᖃᑦᓯᓂᓪᓗ ᐱᓇᓱᑦᑎᖃᕆᐊᖃᕐᓂᖓ. ᑕᒪᒃᑯᐊᑕᒐ ᐃᓱᒫᓘᑎᒋᔭᐅᓚᐅᔫᑦ ᓄᓇᕘᕐᒥᐅᑦ ᑲᕙᒪᖓᓄᑦ ᖃᖓᑦᑕᔫᓕᕆᓃᒃ ᐊᑕᐅᓯᖕᖑᑎᑕᐅᓚᐅᕐᑎᓇᒋᒃ ᓱᓕ, “ᐱᔭᑦᓴᕆᓂᐊᕐᓂᕆᓯᒪᔭᖏᓐᓄᓗ” ᐃᓚᐅᑦᓱᑎᒃ ᓄᑖᑉ ᑲᓀᑎᐊᓐ ᓄᐊᑦ ᐊᑕᐅᓯᖕᖑᑎᑕᐅᓚᖓᑉᐸᓃᒃ ᖃᖓᑦᑕᔫᓕᕆᓃᒃ. ᑕᒐ, ᐊᐅᓚᑕᐅᓂᕆᒋᐊᓕᖓ ᐱᔭᕆᐊᑐᔫᑦᓴᐅᑎᒋᓚᐅᔫᖅ ᒪᓕᒐᖃᓪᓚᕆᑦᓴᐅᑎᒋᓚᐅᔪᒐᒥ, ᓯᓚᕐᔪᐊᒥ ᖃᓂᒪᓇᖅ ᐱᔭᕆᐊᑦᑐᑎᕆᒋᐊᓪᓚᒥᑎᓪᓗᒍ. ᒍᐃᓕᐊᒻ ᑕᒍᓐᓈᖅ ᐅᖃᕐᑐᖅ, “ᐊᓯᖏᓪᓕ ᖃᖓᑦᑕᔫᓕᕆᓃᑦ ᑌᒣᑦᑎᑕᐅᑎᓐᓇᒋᑦ. ᐅᓯᖃᕋᑎᒃ ᑲᖓᑕᒋᐊᖃᖃᑦᑕᓚᐅᔫᑦ ᑲᕙᒪᒃᑯᑦ ᒪᓕᒐᖏᓐᓂᒃ ᒪᓕᑦᓱᑎᒃ.
ᔮᓂ ᐋᑕᒥ ᐊᖓᔪᕐᖄᕆᔭᐅᔪᖅ ᑲᑎᒪᔨᖏᓐᓄᒃ ᑲᓀᑎᐊᓐ ᓄᐊᑦᑯᑦ. ᐃᒫ ᑐᑭᓯᑎᑦᓯᔪᕕᓂᖅ. “ᐊᓯᖏᑦ ᖃᖓᑦᑕᔫᓕᕆᓃᑦ ᓄᕐᖃᓯᒪᓪᓚᕆᓚᐅᔪᕗᑦ Porter, Sunwing, Air Transat. ᖃᖓᑕᓂᕆᒋᐊᓕᖏᓐᓂᒃ ᖃᖓᑦᑕᔫᖁᑎᑦᑕ ᐊᓯᑦᔩᒍᓐᓇᓚᐅᔪᖕᖏᑐᒍᑦ ᐊᖏᕐᑕᐅᓯᒪᒍᓐᓀᓗᑕ ᑲᓇᑕᒥ ᐃᖏᕐᕋᐅᑎᓕᕆᔨᓄᑦ. ᐊᐅᓪᓚᑲᑦᑕᑐᖃᑦᓯᐊᕈᓐᓀᓚᐅᔫᖅ ᐃᓄᓐᓂᒃ. ᖃᖓᑕᓂᕆᒋᐊᓕᖏᓐᓂᓗ ᐃᑭᓪᓕᑎᕆᒍᓐᓇᕋᑕ “ᐱᔭᑦᓴᕆᒋᐊᖃᕐᓂᕋᕐᓯᒪᓚᐅᔪᒐᑦᑎᒍ” ᑲᓇᑕᒥ ᐃᖏᕐᕋᐅᑎᓕᕆᔨᓄᑦ ᐊᖏᕐᑕᐅᓯᒪᕐᖄᕆᐊᖃᕐᓂᖅ.
“ᐊᓪᓚᕕᖃᖃᑦᑕᓱᑕ, ᑐᕃᓐᓇᑐᒃᑯᓗ ᐅᖄᓚᐅᑎᒃᑯᑦ ᑲᕙᒪᓐᓂᐊᖃᑦᑕᓱᑕ, ᐱᓇᓱᐊᕈᓰᑦ ᐊᒥᓲᖕᖏᑐᑦ ᓈᑎᓪᓗᒋᑦ ᐅᖄᒍᑎᒋᖃᑦᑕᑕᕕᓂᕆᑦᓱᒋᑦ ᐊᖏᖃᑎᒌᒐᓱᐊᕈᑎᒋᖃᑦᑕᑕᕕᓂᕆᑦᓱᒋᓪᓗ ᔮᓂ ᐅᖃᕐᑐᖅ ᐃᓱᕐᕆᓯᓂᕐᓴᕕᓂᐅᓂᕋᕐᓱᓂ ‘ᐱᔭᑦᓴᕆᒋᐊᖃᕐᓂᕋᕐᓯᒪᔭᕕᓂᕐᒥᓂᒃ’ ᑭᓯᐊᓂ ᑮᓇᐅᔭᖃᕐᑎᓯᒍᑎᑦᓭᑦ ᓱᕐᖁᐃᓇᓚᐅᔪᖕᖏᑐᑦ. “ᑐᑭᓯᑎᒐᓱᐊᕆᐊᖃᓪᓚᕆᓚᐅᔪᔭᕗᑦ ᐊᐅᓚᓂᕆᓲᑦᑎᓂᒃ. ᑭᒡᒐᑐᕐᑏᑦ ᐃᓚᖓᑦ ᐊᐱᕐᓱᓚᐅᔫᖅ ᐃᒫᒃ ‘ᓱᒧᓪᓖ ᐱᓇᓱᐊᕈᓯᑕᒫᑦ ᐊᑕᐅᓯᐊᑐᐃᓐᓇᓗᓯ ᖃᖓᑕᖃᑦᑕᖏᓪᓚᓯ ?”.
ᔮᓂᓗ ᖃᖓᑦᑕᔫᓕᕆᓂᕐᓂᓗ ᑭᒡᒐᑐᕐᑏᑦ ᑐᑭᓯᓇᕐᑎᓯᓚᐅᔪᕗᑦ ᐅᑭᐅᕐᑕᑐᖅ ᖃᓄᐃᑦᑑᒪᖔᑦ, ᖃᖓᑦᑕᔫᑦ ᐊᕐᖁᑎᑐᐊᑦᓯᐊᒍᒋᐊᖏᓐᓂ ᐅᑭᐅᕐᑕᑐᒧᑦ, ᑎᑭᑕᐅᑦᑕᕈᑎᑑᑦᓱᑎᒃ ᓂᐅᕕᐊᑦᓴᓄᑦ, ᐱᓇᓱᒋᐊᕐᑐᓗᑐᕆᐊᓕᓐᓄᓗ. ᑭᓈᓂᕐᓗᑯᑦᑕ ᐅᑏᑦ ᐃᒥᕐᑕᐅᑏᓪᓗ ᓴᓂᑦᑕᕈᑏᓪᓗ ᓯᖁᒥᑐᐊᕐᒪᑕ ᐃᓚᑦᓴᖃᕋᑎᒃ, ᐱᓇᓱᐊᕈᓯᓕᒫᒥ ᐅᑕᕐᕿᑐᐃᓐᓇᕈᑕᐅᒍᓐᓇᖏᑦᑐᑦ. ᓄᓇᓕᒃ ᐊᐅᓚᑕᐅᓂᖃᕆᐊᖃᕐᒪᑦ. ᐋᓐᓂᐊᕖᑦ ᐋᓐᓂᐊᕕᐊᐲᓪᓗ ᐱᓇᓱᑦᑎᖃᕆᐊᓖᑦ, ᖃᓂᒪᔪᓪᓗ ᓯᕿᓂᕐᒧᑦ ᐊᐅᓪᓚᑲᑦᑕᕆᐊᖃᕐᓱᑎᒃ ᐅᐃᒪᓇᕐᑐᒥᒃ ᑲᒪᒋᔭᐅᕕᓐᓄᑦ. ᑐᑭᓯᑦᓴᕋᑖᓗᓚᐅᔫᑦ. ᑕᕐᕋᒥ ᖃᖓᑦᑕᔫᑦ “ᐱᒍᑦᔨᒋᐊᖃᓪᓗᑐᕐᓂᖏᑦ” ᑐᑭᓯᔭᐅᑦᓴᕋᑕᓚᐅᔪᕗᑦ.
ᐃᓱᒪᓇᖃᑦᑕᓕᓚᐅᔫᖅ ᖃᖓᑦᑕᔫᓕᕆᓃᑦ ᓄᕐᖃᐅᖃᕐᑎᑐᐃᓐᓇᓗᒋᑦ ᑲᕙᒪᒃᑯᓗ ᐅᖃᐅᑎᓗᒋᑦ ᐃᒫᒃ, “ᑖᓚᑐᐃᓐᓇᖃᕈᓐᓀᕋᑦᑕ ᐊᐅᓚᑦᓯᒍᑎᑦᓴᑎᓐᓂᒃ ᖃᖓᑦᑕᔫᓕᕆᓂᕐᒥᒃ, ᐱᒍᑦᔨᐅᑎᐅᓪᓗᑐᕆ ᐊᓕᓐᓂᒃ ᐱᒍᑦᔨᓕᕆᑦᓯ ᐅᑭᐅᕐᑕᑐᒥ ᓄᓇᓕᓐᓂᒃ !” ᓵᓕ ᒍ ᐊᑦ ᐅᖃᓚᐅᔫᖅ, “ᓄᕐᖃᑎᑦᓯᓯ ᐊᑐᐃᓐᓇᕆᐊᕕᑉᐳᖓ ᖃᖓᑦᑕᔫᓕᒫᑦ ᓄᕐᖃᖓᑐᐃᓐᓇᓯᑎᓪᓗᒋᑦ ! ᑭᓯ ᐊᓂ ᐃᓱᒪᒋ ᐊᓪᓚᕆ ᐊᖃᓚᐅᔪᔪᖓ, ᐃᓄᖁᑎᑎᑦ ᐅᑭᐅᕐᑕᑐᒦᑦᑐᑦ, ᐱᒍᑦᔨᓗᑐᕆ ᐊᖃᕐᐸᑎᑦ, ᓄᕐᖃᑎᑦᓯᑐᐃᓐᓇᕈᓐᓇᕈᓐᓀᓱᖓ.”
ᑲᕙᒪᒃᑯᑦ ᑮᓇᐅᔭᖃᕐᑎᓯᒍᓐᓇᓯᓕᓚᐅᔪᕗᑦ ᖃᖓᑦᑕᔫᓕᕆᓃᑦ ᐊᐅᓚᒍᑎᑦᓴᖏᓐᓂᒃ. ᐃᓄᐃᑦ ᖃᖓᑦᑕᔫᖏᓐᓂᒃ, ᐊᖓᔪᕐᖄᖓᑦ ᐱᑕ ᐋᑕᒥ ᐊᖏᖃᑎᒌᒐᓱᐊᖃᑕᐅᖏᓐᓇᓕᒫᓚᐅᔪᕗᖅ ᑯᐯᒃᑯᑦ ᑲᕙᒪᖓᓄᑦ ᐃᓗᓯᓕᕆᔨᒃᑯᓄᓪᓗ ᐊᑭᓕᕇᕐᑕᐅᓯᒪᔪᒥᒃ ᐃᓄᐃᑦ ᑲᖓᑦᑕᔫᖏᑦ ᐊᑐᕐᑕᐅᖃᑦᑕᓂᐊᕐᑎᓗᒋᑦ. ᑕᒪᓐᓇ ᓯᓚᕐᔪᐊᒥ ᖃᓂᒪᓇᖃᕐᓂᖓᓂ ᐃᓄᐃᑦ ᖃᖓᑦᑕᔫᖏᓐᓂᒃ ᐊᑐᕐᑕᐅᖏᓐᓈᑎᑦᓯᒍᑎᐅᓚᐅᔪᕗᖅ ᐊᑭᖏᑦ ᐊᑭᓕᕐᑕᐅᑎᓪᓗᒋᑦ.
ᑲᓀᑎᐊᓐ ᓄᐊᑦᑯᑦ, ᑲᕙᒪᑐᖃᒃᑯᓄᑦ, ᑯᐯᒃᑯᑦ ᑲᕙᒪᖓᓄᑦ, ᓄᓇᕘᕐᒥᓗ ᑲᕙᒪᓄᑦ ᑲᑐᑦᔮᕆᔭᐅᓚᐅᔪᕗᖅ “ᐱᒍᑦᔨᐅᑎᐅᓪᓗᑐᕆᐊᓖᑦ ᐱᒍᑦᔨᐅᑎᐅᖃᑦᑕᕆᐊᖃᕐᓂᖓ” ᐅᑭᐅᕐᑕᑐᕐᒥ ᓄᓇᓕᓐᓂᒃ ᓄᓇᕕᒻᒥ, ᓄᓇᕘᕐᒥ, ᓄᓇᑦᓯᐊᒥᓪᓗ.
ᐊᐅᒡᒍᓯ ᐱᒋᐊᕐᖃᒥᐅᑎᓪᓗᒍ, ᒪᑭᕝᕕᑯᑦ ᑐᓴᕋᑦᓴᓂᒃ ᓄᐃᑦᓯᓚᐅᔪᕗᑦ ᐅᐱᒍᓲᑎᒥᓂᒃ ᑲᕙᒪᑐᖃᒃᑯᑦ ᑮᓇᐅᔭᖃᕐᑎᓯᒍᑎᖏᓐᓂᒃ ᐊᐅᒡᒍᓯ 6ᒥ $75ᒥᓕᐊᓐᓂᒃ ᑕᕐᕋᒥ ᖃᖓᑦᑕᔫᓕᕆᓂᕐᓂᒃ ᔪᓓ 1, 2020ᒥ ᐱᒋᐊᕐᓂᖃᕐᑎᑕᐅᔪᓂᒃ, ᐱᖓᓲᔪᕐᑐᓄᑦ ᑕᕐᕿᓅᓕᖓᔪᓂᒃ. $174ᒥᓕᐊᓐᒋᐊᓪᓚᓂᒃ ᑮᓇᐅᔭᖃᕐᑎᓯᓛᕐᓂᕋᕐᒥᓱᑎᒃ ᑕᕐᕿᓄᑦ ᖁᓕᓪᓗ ᓯᑕᒪᐅᔪᕐᑐᓅᓕᖓᔪᑦᓴᓂᒃ ᒋᐊᖃᕐᓂᐸᑦ.
ᓵᓕ ᒍᐊᑦ ᑮᓇᐅᔭᖃᕐᑎᓯᒍᑏᑦ ᑕᒡᒐᐅᓕᕐᒪᑕ, “ᐊᓕᐊᒋᔭᕋ ᑕᒪᓐᓇ. ᓯᕗᓂᑦᑎᓂ ᑮᓇᐅᔭᕐᑐᕈᑎᑦᓴᑎᓐᓂᒃ ᕿᓄᒍᑎᒋᔭᓕᒫᑦᑎᓂᒃ, ᑲᓇᑕᒥᐅᑦ ᑲᕙᒪᖓᓂᑦ ᐱᑎᑕᐅᖃᑦᑕᕈᒥᓇᓛᕐᑐᖅ, ᑕᒪᑐᒥᖓ ᐱᓐᓀᓗᑕᒥᒃ ᓄᐃᑦᓯᓯᒪᖕᖏᓇᑦᑕ, ᐱᒍᓐᓇᕕᓕᒫᑦᑎᒍᓪᓗ ᐱᓇᓱᐊᖃᑦᑕᓚᐅᕐᓱᑕ, ᓇᒻᒥᓂᖅ ᑮᓇᐅᔭᑦᑎᓂᒃ ᐊᑐᖃᑦᑕᓚᐅᕋᑦᑕ, ᑲᕙᒪᒃᑯᑦ ᑮᓇᐅᔭᕆᖕᖏᑕᖏᓐᓂᒃ, ᑲᓇᑕᒥᐅᓪᓗ ᑲᕙᒪᖓ ᐅᐱᒍᓱᑦᑐᓴᕕᓂᐅᑦᓱᑎᒃ ᖃᓄᐃᓕᓂᕕᓂᑦᑎᓂᒃ.”
ᐅᐃᒪᓇᕐᑐᑰᕐᓯᒪᒐᓗᐊᕐᓱᑕ, ᔮᓂ ᐋᑕᒥ ᐅᖃᕐᓯᒪᔪᖅ, “ᑲᕙᒣᑦ ᖃᐅᔨᕙᓪᓚᕆᐊᖃᕐᐳᑦ ᐅᑭᐅᕐᑕᑑᑉ ᐊᑦᔨᒋᔭᐅᖕᖏᓂᖓ ᑕᑯᓐᓇᑕᐅᑦᓯᐊᕆᐊᖃᕐᒪᑦ. ᑲᓇᑕᓕᒫᓂ ᑮᓇᐅᔭᑎᒍᑦ ᐃᑲᔪᕐᓯᒍᓐᓇᓲᒍᔪᒍᑦ ᐊᕐᖁᓯᐅᕐᓂᓂᒃ, ᓄᓇᒃᑰᔫᑯᑖᓂᒃ ᐊᕐᖁᓯᐅᕐᓂᓂᒃ, ᐅᒥᐊᕐᑐᕕᓐᓂᓗ. ᑭᓯᐊᓂ ᐅᑭᐅᕐᑕᑐᕐᒥ, ᑕᒪᒃᑯᐊ ᓇᓪᓕᖏᑦ ᐊᑐᐃᓐᓇᐅᖏᑦᑐᑦ. ᐱᓇᓱᐊᕐᑕᓕᒫᕗᑦ, ᐃᒻᒥᓂᕿᐅᑎᒋᒋᐊᖃᓲᕗᑦ. ᑲᕙᒪᒃᑯᓄᑦ ᐃᑲᔪᕐᓯᔭᐅᒐᑕ, ᐊᑭᑐᔪᐊᓘᑎᓪᓗᒋᑦ, ᑌᒫᒃ ᑭᓯᐊᓂ ᐊᐅᓚᑦᓯᒍᓐᓇᓚᖓᒐᑦᑕ ᐃᓱᕐᕉᑎᑦᓴᑖᓚᖓᒐᑦᑕᓗ ᐅᑭᐅᕐᑕᑐᒥ.”
