ᑲᑎᕕᒃ ᐊᕙᑎᓕᕆᓂᕐᒧᑦ ᐊᔪᖀᒋᐊᕐᑏᑦ ᑲᑎᒪᔩᑦ
ᓄᓇᕕᐅᑉ ᓄᓇᓕᖏᓐᓂ ᐃᒋᑦᓯᕖᑦ ᑌᔭᐅᖕᖑᐊᓱᖑᕗᑦ ᓲᕐᓗ “ᑲᓀᑎᐋᓐ ᑌᐅ” ᑕᒪᓐᓇᓗ ᓈᒻᒪᓈᑦᓯᐊᑐᔭᓱᖑᕗᖅ. ᐊᕐᕌᒍᒐᓵᓗᓐᓂ ᓄᓇᒃᑯᔪᕕᓃᑦ, ᓄᓇᒃᑯᔪᒻᒪᕆᕕᓃᓪᓗ, ᐃᒡᓗᐃᓗ ᐱᐅᒃᑯᑎᕕᓂᖏᑦ, ᐊᒻᒪᓗ ᑭᑭᐊᕕᓃᑦ ᐃᑦᑕᑯᓕᐊᖑᓯᒪᔪᑦ ᓴᓇᔪᓄᑦ, ᓄᑕᐅᓯᓕᑎᕆᔪᓄᑦ ᐊᒻᒪᓗ ᐃᑐᑦᑎᕆᓂᕐᒥᒃ ᐱᓇᓱᑦᑐᓄᑦ ᓄᐊᑦᓯᒪᓕᕐᖁᑦ, ᐱᕕᐅᕙᑦᓱᑎᒃ ᓲᕐᓗ ᓯᖁᒥᓯᒪᔨᐊᓕᓐᓄᑦ ᐃᓚᑦᓴᑕᕐᕕᐅᓂᕐᒥᒃ ᐊᒥᓱᓄᑦ ᐃᕙᔮᖑᕙᑦᑐᑦ ᐊᑐᕐᑐᓴᓕᐊᖑᒋᐊᓪᓚᐸᑦᓱᑎᒃ ᐊᑐᕈᓐᓇᓂᖏᑦ! ᑌᒣᒃᑲᓗᐊᕐᑎᓗᒋᑦ, ᐃᓚᖓᓂᒃ ᑕᒪᒃᑯᐊ ᑭᑭᐊᔦᑦ ᓴᓇᓯᒪᔪᑦ ᑲᑎᕐᓱᑕᐅᓯᒪᓱᖑᕗᑦ ᑭᓪᓕᒥᐅᑕᖃᕐᓱᑎᒃ ᐃᓚᖓᓂᓪᓗ ᐃᓚᑦᓱᑎᐅᑦᓱᑎᒃ ᐊᓯᖏᓐᓄᑦ ᐱᐅᒃᑯᑎᕕᓂᕐᓄᑦ ᐊᑯᓓᓐᓂᓴᒥᒃ ᐃᓗᓖᔭᕐᑕᐅᓯᒪᓱᖑᖕᖏᓚᑦ ᓱᒃᑯᑎᕆᒍᓐᓇᑐᓂᒃ ᐃᓗᓕᖏᓐᓂᒃ ᐱᔦᕕᐅᓯᒪᒐᑎᒃ. ᐊᒻᒪᓗᒋᐊᓪᓚᒃ, ᑕᒪᒃᑯᐊ ᑭᑭᐊᔦᑦ ᐃᒋᑦᓯᕕᓐᓅᑕᐅᖕᖏᑐᑦ ᓴᓂᕐᕙᑕᐅᒪᖕᖏᑐᓪᓗ ᐅᕝᕙᓗᓐᓃ ᐃᒋᑦᓯᕕᐅᖕᖏᑐᒧᑦ ᐃᒋᑕᐅᒪᔪᑦ ᓄᓇᓕᓐᓂ ᐱᑕᖃᕐᑎᓯᓱᖑᒋᕗᑦ ᐃᓄᐃᑦ ᐃᓗᓯᖏᓐᓄᑦ ᖃᓄᐃᖕᖏᓯᐊᕆᐊᖃᕐᓂᖏᓐᓄᓗ ᐅᓗᕆᐊᓇᕐᑐᓂᒃ, ᓄᓇᐅᑉ ᐊᕙᑖᓄᑦ ᐅᓗᕆᐊᓇᕆᐊᓪᓚᒥᑦᓱᑎᒃ. ᓱᓪᓕᑕᐅᒻᒪᓕᐊᓪᓛᑦ, ᑕᒪᒃᑯᐊ ᐃᑦᑕᑯᐃᑦ ᓱᑯᑎᕆᒍᓐᓇᑐᓂᒃ ᐱᑕᖃᓗᐊᖕᖑᐊᓂᖏᑦ ᐃᓗᓕᕕᓂᖏᑦ ᐃᕐᖓᕈᓐᓇᓱᑎᒃ ᐅᕝᕙᓗᓐᓃᑦ ᓄᓇᐅᑉ ᐊᕙᑖᓄᑦ ᐄᔭᐅᓗᑎᒃ ᐊᑦᑐᖃᓗᐊᓕᑐᐊᕋᒥᒃ ᐅᕝᕙᓘᓐᓃᑦ ᒪᖕᖏᐅᓗᐊᓕᑐᐊᕋᒥᒃ. ᐃᓚᖏᑦᑕᐅᖅ ᓄᕝᕗᓖᓪᓗ ᐃᐱᑦᑐᓂᓪᓗ ᑮᓇᓖᑦ ᐋᓐᓂᒪᕆᒍᑎᐅᒍᓐᓇᓱᑎᒃ.
ᑕᒪᒃᑯᐊ ᓱᒃᑯᕈᑎᐅᑲᓪᓚᒍᓐᓇᓂᖏᑦ ᐊᓐᓂᑭᓕᕐᑕᐅᓇᓱᓐᓂᖏᑦ ᐱᓇᓱᑦᑕᐅᕗᑦ ᑲᑎᕕᒃ ᓄᓇᓕᓕᒫᑦ ᑲᕙᒪᖓᓄᑦ ᐱᕙᓪᓕᐊᑎᑦᓯᒍᑎᐅᑦᓱᑎᒃ ᓄᓇᐅᑉ ᐊᕙᑎᖓᓄᑦ ᐱᐅᓂᕐᓴᓂᒃ ᐱᓇᓱᒍᑎᓂᒃ ᐊᒥᓱᓂ ᓄᓇᕕᐅᑉ ᓄᓇᓕᖏᓐᓂ. 2016-ᒥᓗ 2017-ᒥᓗ, ᓱᒃᑯᓇᕐᑐᓂᒃ ᓄᖑᑎᕆᓂᕐᒥᒃ ᐱᒋᐅᕐᓴᑎᑦᓯᒍᑎᖃᕐᓃᑦ ᐃᓕᖓᔪᑦ ᓄᓇᒃᑯᔫᕕᓂᕐᓄᑦ, ᓲᕐᓗ ᐃᓚᐅᑎᓪᓗᒋᑦ ᓄᓇᒃᑯᔫᒻᒪᕆᕕᓃᑦ, ᓄᓇᒃᑯᔪᑐᐃᓐᓇᕕᓃᑦ, ᓯᑭᑑᕕᓃᑦ ᐊᒻᒪᓗ ᓯᑕᒪᓕᑲᓪᓚᕕᓃᑦ, ᐊᑑᑎᔭᐅᓚᐅᔪᕗᑦ ᑲᖏᕐᓱᒥᓗ, ᐃᓄᑦᔪᐊᒥᓗ ᐊᒻᒪᓗ ᑰᒃᔪᐊᕌᐱᖕᒥ. ᓄᓇᓕᓐᓂ ᑕᒪᒃᑯᐊ ᓱᔪᖃᕐᓂᐅᑎᓪᓗᒋᑦ ᐊᒥᓱ ᓄᓇᒃᑯᔪᕕᓃᑦ ᐃᓗᓖᔭᕐᑕᐅᓚᐅᔪᕗᑦ ᓱᒃᑯᓇᕐᑐᓂᒃ ᐃᓗᓕᒥᓐᓂᒃ ᐃᓚᐅᑎᓪᓗᒋᑦ ᓄᓇᒃᑯᔫᑦ ᐃᑯᒪᐅᑎᕕᓂᖏᑦ, ᒨᑯᔨᓖᑦ ᐃᖏᕐᕋᓯᒋᐊᕈᑎᕕᓃᑦ, ᐅᖁᒣᓗᑕᑦᓴᔭᐅᑦᓱᑎᒃ ᐃᓚᕕᓂᖏᓐᓂᒃ, ᐅᕐᓱᕈᑎᕕᓂᖏᓐᓂᒃ, ᐅᕐᓱᐊᓗᕕᓂᖏᓐᓂᒃ, ᖁᐊᕆᒃᑯᑎᕕᓂᕐᑕᖏᓐᓂᒃ, ᐊᒻᒪᓗ ᐃᒐᓛᕐᓂᐅᑎᕕᓂᖏᓐᓂᒃ.
ᐊᕐᕌᒍᖅ 2022-ᖑᑎᓪᓗᒍ, ᓱᒃᑯᑎᕆᒍᓐᓇᑐᓂᒃ ᑭᑭᐊᑦᓴᔭᕕᓂᕐᓂᒃ ᐱᓇᓱᒍᑎᖃᕐᓂᖅ ᐱᓇᓱᑦᑕᐅᓂᖃᕆᐊᖕᖓᓯᓚᐅᔪᕗᖅ ᑲᖏᕐᓱᒥ ᑌᒣᑎᑕ-ᐅᓂᖃᓚᐅᔪᕗᕐᓗ ᐃᒋᑦᓯᕕᖓᑦ ᐅᒃᑯᐊᑕᐅᓂᖃᕐᑎᓗᒍ. ᑖᒃᑯᐊ ᐱᓇᓱᑦᑕᐅᔪᑦ ᑐᕌᕐᐳᑦ ᐅᑦᑐᕋᕐᓂᒧᑦ ᐃᑦᑕᑯᓂᒃ ᑲᒪᒋᔭᖃᕐᓂᒥᒃ, ᓱᓇᐅᓂᖏᑎᒍᑦ ᐊᕕᑦᑐᓗᒋᑦ, ᓱᒃᑯᓇᕐᑐᐃᔭᕐᓗᒋᑦ, ᓵᓪᓕᑎᕐᓗᒋᑦ ᐊᒻᒪᓗ ᐊᐅᓪᓚᑐᑦᓴᓕᐊᕆᓗᒋᑦ ᑭᑭᐊᑦᓴᔦᑦ ᓄᐊᓯᒪᔪᑦ ᑲᖏᕐᓱᒥ ᐊᐅᓪᓚᑎᓛᕐᓗᒋᑦ ᑭᑭᐊᕕᓂᕐᓂᒃ ᐊᑐᕐᑐᓴᓕᐅᕆᐊᓪᓚᓲᓄᑦ. ᑕᒪᒃᑯᐊ ᐱᓇᓱᑦᑕᐅᓂᖏᑦ ᑮᓇᐅᔭᕐᑐᕈᑎᐅᓛᕐᑐᑦ ᒥᑦᓯᑎᓐᓃᑐᓂᒃ $6-ᒥᓕᐋᓐ, ᑮᓇᐅᔭᖃᕐᑎᑕᐅᓛᕐᓱᑎᒃ ᑯᐯᒃ ᑲᕙᒪᖓᓄᑦ ᐊᒻᒪᓗ ᑲᑎᕕᒃ ᓄᓇᓕᓕᒫᑦ ᑲᕙᒪᖓᓄᑦ.
ᑕᒪᒃᑯᐊ ᐱᓇᓱᑦᑕᐅᓛᕐᑐᑦ ᐊᑐᕐᑐᓴᓕᐅᕆᐊᓪᓚᓲᓄᑦ ᐅᑯᓄᖓ (Senexen Environmental inc. / Avataani) ᐱᓇᓱᖃᑎᒋᔭᐅᑎᓪᓗᒋᑦ ᑲᖏᕐᓱᒥᐅᑦ ᑲᕙᒫᐱᒃᑯᖏᑦ ᑲᒪᔨᖃᕐᓗᑎᒃ ᑲᑎᕕᒃ ᓄᓇᓕᓕᒫᑦ ᑲᕙᒪᖓᓂᒃ. ᐊᑐᕆᐊᓪᓚᑐᑦᓴᓕᐅᕐᑏᑦ ᑎᑭᐅᑦᔨᓛᕐᑐᑦ ᐱᓇᓱᒍᑎᓂᒃ ᒪᕐᐸᑎᕆᒍᑎᓂᒃ ᐊᒻᒪᓗ ᐊᐅᓪᓚᑐᑦᓴᓕᐅᖃᑦᑕᓗᑎᒃ ᓄᓇᒃᑯᔫᕕᓂᕐᓂᒃ ᑭᑭᐊᑦᓴᔭᕕᓂᕐᓂᓗ ᖃᓪᓗᓈᑦ ᓄᓇᖓᓐᓄᑦ ᐊᐅᓪᓚᑐᑦᓴᓕᐅᕐᓗᑎᒃ ᐅᒥᐊᕐᔪᐊᑯᑦ Desgagnés/ᑎᒃᑳᖕᓃᒃᑯᑦ ᐊᐅᓪᓚᑎᓪᓗᒋᑦ ᓄᑕᐅᓯᓕᑎᕆᕕᒻᒧᑦ ᑐᕌᕐᑎᓗᒋᑦ. ᓱᒃᑯᑎᕆᒍᓐᓇᑐᑦ ᐱᐅᒃᑯᑎᕕᓃᑦ ᐱᔭᐅᔪᑦ ᓄᓇᒃᑯᔫᕕᓂᕐᓂᒃ ᓴᓗᒻᒪᑎᕆᓂᕐᓂᑦ ᐴᕐᑐᑕᐅᓛᕐᑐᑦ, ᓱᓇᐅᓂᖏᓪᓗ ᓯᓚᑉᐱᐊᖏᓐᓂ ᐊᒃᓚᑕᐅᓗᑎᒃ, ᐊᐅᓪᓚᑎᑕᐅᓛᕐᑐᑦ ᓯᕿᓂᕐᒥᐅᓄᑦ ᐊᐅᓚᑕᐅᓂᖃᕆᐊᕐᑐᓕᕐᓗᑎᒃ.
ᐃᓘᓐᓇᑎᒃ ᐅᐃᒪᓇᕐᓱᑎᒃ ᐱᓇᓱᑦᑕᐅᔪᑦ ᐱᓇᓱᑦᑕᐅᓂᖃᓚᐅᔪᕗᑦ ᑲᖏᕐᓲᑉ ᐃᒋᑦᓯᕕᖓᓂ ᑌᒣᓕᖓᑎᓪᓗᒋᓪᓗ ᐱᓇᓱᑦᑕᐅᓂᖃᕆᐊᖃᓚᐅᔪᒋᕗᑦ ᓄᓇᓕᓐᓂ ᐱᑦᓴᐅᒍᓐᓀᓱᑎᒃ ᑭᑭᐊᑦᓴᔭᕕᓃᑦ ᓄᐊᑕᐅᓂᖏᑦ ᐊᐅᓪᓚᑐᑦᓴᓕᐊᖑᖃᑕᐅᓗᑎᒃ ᑕᒪᒃᑯᐊ ᐱᓇᓱᑦᑕᐅᓂᖏᓐᓂ. ᑕᒪᓐᓇ ᑲᖏᕐᓱᒥᐅᓄᑦ ᐱᕕᑦᓴᖃᕐᕕᐅᓚᐅᔪᔪᖅ ᐃᒡᓗᒥ ᓴᓂᐊᓃᑦᑐᓂᒃ ᑭᑭᐊᑦᓴᔭᕕᓂᕐᓂᒃ ᐱᒋᒍᒣᕐᓯᒪᓕᕐᑕᒥᓂᒃ ᐃᒋᑦᓯᒋᐊᕐᑐᓂᕐᒥᒃ.
ᑕᒪᒃᑯᐊ ᐱᓇᓱᑦᑕᐅᓂᖏᑕ ᑲᔪᓯᑦᓯᐊᓂᖏᑦ ᑐᑭᖃᓛᕐᐳᑦ ᐊᑦᔨᒐᓚᖏᓐᓂᒃ ᐱᓇᓱᑦᑕᐅᒐᔭᕐᑐᓂᒃ ᓄᓇᓕᓐᓂ ᑲᖏᕐᓲᑉ ᐊᓯᖏᓐᓂ ᑌᒣᓘᕐᓗᑎᒃ ᓄᓇᕕᐅᑉ ᓄᓇᓕᓕᒫᖏᑦ ᐱᕕᑦᓴᖃᓛᕐᒪᑕ ᐃᓚᐅᖃᑕᐅᓂᕐᒥᒃ ᑭᑭᐊᑦᓴᔭᕕᓂᕐᓂᒃ ᐱᓇᓱᒍᑎᖃᖃᑕᐅᓂᕐᓄᑦ. ᑐᑭᓯᒋᐊᒃᑲᓂᕈᒪᔪᑦ, ᖃᐅᔨᒋᐊᕐᕕᖃᕈᓐᓇᑐᑦ ᑲᑎᕕᒃ ᓄᓇᓕᓕᒫᑦ ᑲᕙᒪᖓᑕ ᐊᕙᑎᓕᕆᓂᕐᒥᒃ ᐱᓇᓱᖃᑎᒌᒍᑎᖃᕐᑐᖁᑎᖏᓐᓂᑦ ᐅᕙᖕᖓᑦ ᖃᐅᔨᒋᐊᓗᕐᑎᒃ: akouki@krg.ca ᐅᕝᕙᓘᓐᓃᑦ ᐅᖄᓚᓗᑎᒃ ᐅᕗᖓ 819 964-2961 ᓵᕐᒥᐅᑕᖓᑕ ᑭᓯᑦᔪᑎᖓ 2316.
