ᖃᓄᖅ ᐃᓄᐃᑦ ᖃᐅᔨᒪᐅᓯᖓᑦ ᑕᓯᐅᔭᓗ ᑲᓇᑕᒥ ᐅᓕᑦᑕᓂᕐᒥᒃ ᑕᑯᑦᓴᐅᑎᑦᓯᒍᑎᖓᓂᒃ ᓄᓇᖕᖑᐊᒥᒃ ᑎᑎᕐᑐᐃᒋᐊᑦᓯᐊᕈᓐᓇᕋᔭᕐᒪᖔᑦ
ᑕᓯᐅᔭᒥ, ᐃᓄᐃᑦ ᖃᐅᔨᒪᕗᑦ ᑌᒪᖕᖓᓂᐊᓗᒃ ᐅᓕᓐᓂᖏᑦᑕ ᐳᕐᑐᔫᓂᖏᓐᓂᒃ. ᑕᑯᒍᓐᓇᑕᑎᑦ ᓱᑲᑦᑐᒥᒃ ᐃᓂᕐᕋᓂᕐᒥ ᑕᓯᐅᔭᐅᑉ ᓴᓂᐊᓂ ᖂᑭᓐᓂᖏᓐᓂ, ᐃᑦᔪᔪᓂᒃ ᑯᐊᓐᓂᓂ ᐅᔭᕋᕐᒦᑐᓂᑦ, ᖃᔭᕆᐊᑦ ᐃᓂᕐᕋᓂᖏᑎᒍᑦ ᐅᓕᓕᕐᒪᑦ ᑎᓂᓕᕐᒪᓗ. ᑎᓂᒻᒪᑦ, ᓄᐃᓲᖅ ᐃᕐᖃᖓ ᑖᕗᖓᓕᒫᕐᑑᔮᕐᓱᓂ, ᑕᕐᓴᖃᕐᓱᓂ ᐅᔭᕋᕐᓂᒃ. ᐅᓕᓕᕐᒪᓗ, ᓲᖑᔪᑦᓱᓂ ᐅᓕᑦᑐᖅ, ᐊᓯᑦᔩᓯᐊᕐᓱᓂ ᓄᓇᐅᑉ ᖃᓄᐃᓕᖓᓂᖓᓂᒃ.
ᐊᒥᓱᓄᑦ ᐅᑭᐅᕐᑕᑐᒥᐅᓄᑦ, ᑖᒃᑯᐊ ᐅᓕᑦᑕᓃᑦ ᐃᓅᓯᕐᒥ ᐃᓚᒋᔭᐅᑐᐃᓐᓇᖁᑦ. ᑭᓯᐊᓂ ᒫᓐᓇ, ᐃᓄᐃᑦ ᐊᕐᖃᐅᒪᔫᕐᑏᑦ ᖃᐅᔨᓴᕐᑏᓗ ᖃᐅᔨᒪᒍᓯᕐᓂᒃ ᑭᓯᑦᓯᒍᑎᖕᖑᑎᑦᓱᒋᑦ ᓄᐊᑦᓯᕗᑦ ᐊᒻᒪᓗ ᖃᐅᔨᒍᑎᕕᓃᑦ ᒫᓐᓇᖃᒻᒥᑯᑦ ᐊᓯᑦᔩᑐ ᐃᓐᓇᕆᐊᖃᕐᓱᑎᒃ ᑲᓇᑕᓕᒫᒥ ᓯᓈᖁᑎᑦᑎᓂᒃ ᑕᑯᓐᓈᕈᓯᖏᓐᓂᒃ.
ᑕᓯᐅᔭᕐᒥᐅᑦ ᐃᓚᖏᑦ ᑐᑭᓯᒐᓱᒍᑎᑦᓴᓂᒃ ᐳᑯᒍᓐᓇᓗᑯᓚᐅᔪᒻᒪᑕ, ᓱᕐᖁᐃᑕ-ᐅᓯᒪᓕᕐᑐᖅ ᑕᓯᐅᔭᐅᑉ ᓴᓂᐊᓂ ᐳᕐᑐᓂᕐᐹᒥᒃ ᓄᓇᕐᔪᐊᓕᒫᒥ ᐅᓕᓐᓂᖃᕆᐊᖓ, ᐳᕐᑐᓂᕐᓴᒋᐊᓪᓚᐅᓱᓂ ᖃᐅᔨᒪᔭᐅᔪᒥᒃ ᓄᓇᒥ Bay of Fundy, Nova Scotia-ᒥ. ᑕᒪᓐᓇ ᑐᑭᖃᓚᕿᒐᔭᕐᑐᖅ ᓄᓇᖕᖑᐊᓂ, ᐊᑐᐊᒐᕐᓂ, ᐊᒻᒪᓗ ᓂᐅᕐᕈᑐᓄᑦ ᖃᐅᔨᒪᒍᑎᓕᐊᓂᑦ ᑲᓇᑕᒥ ᓄᓇᐅᑉ ᑕᑯᒐᑦᓴᑕᖃᕐᓂᖏᓐᓂᒃ ᑐᑭᓯᓇᕐᑎᓯᒍᑎᐅᓲᑦ ᐊᓯᑦᔨᒪᕆᒐᔭᕐᓂᖏᓐᓂᒃ.
ᑭᓯᐊᓂ ᑖᒃᑯᓄᖓ ᑕᒪᑦᓱᒥᖓ ᐱᓇᓱᐊᕐᑐᓄᑦ, ᐃᓕᑕᕆᔭᐅᓂᕐᒧᑐᐃᓐᓇᐅᖏᓪᓚᖅ. ᐅᑎᕐᑎᓯᓂᕐᒨᓕᖓᔪᒪᓐᓇ ᖃᐅᔨᒪᒌᓚᐅᔪᔭᖓᓂᒃ ᐊᒻᒪᓗ ᐃᓄᐃᑦ ᖃᐅᔨᒪᐅᓯᖓᑦ ᓄᑭᖃᕐᓂᖓᓂᒃ ᑕᑯᑦᓴᐅᑎᑦᓯᓂᕐᒨᓕᖓᑦᓱᓂᓗ.
ᓯᑉᑎᒻᐱᕆ 2025ᒥ, ᒪᑭᕝᕕᒃ ᑐᓴᕋᑦᓴᑎᒍᑦ ᓄᐃᑦᓯᓚᐅᔪᕗᖅ ᑐᓴᕋᑦᓴᐅᓂᕋᕐᓱᒍ ᐃᒫᒃ: “ᑕᓯᐅᔭᐅᑉ ᐅᓕᓐᓂᖓᓂᒃ ᖃᐅᔨᓴᕐᓂᖅ ᓱᕐᖁᐃᓯᒍᑎᐅᒋᐊᓪᓚᖁᖅ ᓄᓇᕐᔪᐊᒥ ᐅᓕᑦᑕᓂᖓ ᐳᕐᑐᓂᕐᐸᐅᒋᐊᖓᑦ.” ᑐᓴᕐᑎᓯᒍᑎᖃᕐᓂᖁᑦ ᐊᕐᕌᒍᓕᒫᒥ ᖃᐅᔨᓴᕐᓂᖃᓚᐅᕐᑎᓗᒋᑦ ᑕᓯᐅᔭᒥ ᓄᐊᑦᓯᓱᑎᑦ ᓱᓕᑦᓯᐊᑐᒥᒃ ᐳᕐᑐᓂᖓᓂᒃ ᐅᓕᓐᓂᖓᓂᒃ ᑕᓯᐅᔭᐅᑉ ᓴᓂᐊᓂ. ᖃᐅᔨᒪᔭᐅᑎᑦᓯᓗᐊᕋᑎᒃ ᑐᓴᕋᑦᓴᓂᐊᕐᑎᓄᑦ, ᑭᓯᐊᓂ ᖃᐅᔨᒍᑎᐅᔪᑦ ᐳᕐᑐᔪᒻᒪᕆᕕᓃᑦ.
2024ᒥ, ᒪᑭᕝᕕᐅᑉ ᐱᒍᑦᔨᕕᖓ ᐆᒪᔪᓕᕆᓂᕐᒥ, ᐊᕙᑎᓕᕆᓂᕐᒥ ᖃᐅᔨᓴᕐᓂᒥᓗ (DEWR) ᓄᓇᓕᒻᒥ ᐊᕐᖃᐅᒪᔫᕐᑏᑦ ᐃᓕᓐᓂᐊᑎᑕᐅᓂᖓᓂᒃ ᐋᕐᕿᓱᐃᓚᐅᔪᕗᖅ, ᐃᓕᓯᑦᓱᑎᑦ ᐃᕐᖃᒦᓲᒥᒃ ᓱᑯᐃᔦᓂᒃᑯᑦ ᖃᐅᔨᓴᕈᑎᒥᒃ ᐊᕐᕌᒍᓗ ᓈᑐᐊᕐᒪᑦ ᑎᒍᒋᐊᓪᓚᒥᑦᓱᒍ. ᒪᕐᕉᓂᒃ ᖃᐅᔨᓴᕈᑏᓐᓂᒃ ᐃᓕᓯᔪᕕᓃᑦ ᐅᖓᓯᑦᑕᕇᑦᑎᓱᒋᒃ ᑕᓯᐅᔭᐅᑉ ᐹᖓᓂ. ᑖᒃᑯᐊ ᓱᕐᖄᑎᕆᒍᑎᕕᓃᒃ ᐃᒪᐅᑉ ᐅᓕᓐᓂᖓᓂᑕᒫᖅ ᑎᓂᓐᓂᖓᓂᑕᒫᕐᓗ ᐊᕐᕌᒍᓕᒫᒥ.
ᖃᐅᔨᓴᕈᑎᕕᓃᑦ ᓄᐊᑕᐅᑎᓪᓗᒋᑦ ᕿᒥᕐᕈᔭᐅᑦᓱᑎᓗ ᐊᐅᒡᒍᓯᐅᓚᐅᕐᑐᒥ, ᑭᓯᑦᓯᒍᑎᖏᑦ ᓄᐃᑦᓯᔪᕕᓃᑦ ᐳᕐᑐᓂᕐᐹᓕᓐᓂᒃ 16.81 ᒦᑕᓂᒃ ᒪᑭᑕᓪᓗᐊᑐᒥᒃ ᐊᑐᕐᓱᑎᑦ ᑭᓯᑕᐅᑎᓪᓗᒍ, ᐳᕐᑐᓂᕐᓴᐅᓱᓂ ᖃᐅᔨᒪᔭᐅᔪᒥᒃ ᐅᓕᓪᓗᐊᑕᕐᓂᖓᓂᒃ Burncoat Head-ᒥ Bay of Fundy-ᒥ. ᐃᓕᑕᕆᔭᐅᔪᖅ ᑲᓇᑕᒥ ᐃᒪᕐᒥᒃ ᓱᕐᖄᑎᕆᓂᕐᒥᒃ ᐱᒍᑦᔨᕕᖓ Burncoat Head-ᒥ 16.42 ᒦᑕᐅᕗᑦ. ᑖᓐᓇ ᓱᕐᖁᐃᓯᒍᑎᐅᔪᖅ ᐃᓄᑐᙯᑦ ᑕᓯᐅᔭᕐᒥ ᓄᓇᓕᓐᓂᓗ ᓴᓂᖏᓐᓃᑐᓂᒃ ᐅᖃᖃᑦᑕᓯᒪᔭᖏᓐᓂᒃ ᓯᕗᓪᓕᕕᓂᖏᑦᑕ: ᑖᒃᑯᐊ ᐅᑭᐅᕐᑕᑐᒥ ᐅᓕᓐᓂᖏᑦ ᐳᕐᑐᔪᓪᓚᕆᐊᓘᓂᖏᓐᓂᒃ.
ᑕᓯᐅᔭᒥ ᔦᒻᔅ ᒪᐃ ᐅᒥᐊᒥᒃ ᖃᐅᔨᓴᕈᑎᓂᒃ ᐃᓕᐅᕐᙯᒍᑎᐅᑦᓱᓂᓗ ᐁᑦᓯᒍᑎᒥᒃ ᐅᒥᐊᓕᑦᑕᕆᔭᐅᓚᐅᔪᕗᖅ. 2024ᖑᑎᓪᓗᒍ ᐃᒪᖓᓂᒃ ᐅᖃᐅᓯᖃᕐᓱᓂ, ᐅᖃᕐᑐᕕᓂᖅ ᑕᒪᓐᓇ ᓄᓇᓕᖓᓂᑦ ᑌᑯᖓ ᖃᐅᔨᓴᕈᑎᑕᑦᓯᕕᐅᓚᖓᔪᒧᑦ ᐃᒪᖓ ᓱᖏᐅᓯᒪᔭᖃᕐᓂᕋᕐᓱᓂ ᐊᑐᕐᓯᒪᔭᒥᓂᓗ ᖃᐅᔨᒪᓚᕿᒍᑎᖃᕐᓱᓂ ᑖᕙᓐᓇ ᐃᒪᖓ ᐃᖏᕐᕋᔪᒻᒪᕆᐅᒋᐊᖓ.
ᐃᖃᓪᓕᐊᑎᐅᑦᓱᓂ, ᑕᑯᓲᖅ ᐅᓕᓐᓂᐅᑉ ᑎᑭᐅᑎᓲᖏᓐᓂᒃ. “ᐊᑦᔨᐅᖏᑦᑐᖅ, ᑐᑭᓯᓇᕐᑎᒐᓱᓪᓗᒍ ᐱᔭᕆᐊᑐᔫᑦᓱᓂ. ᑭᓯᐊᓂ ᐆᒪᔪᐃᑦ ᐃᑉᐱᓇᓲᑦ ᐅᓕᓪᓗᐊᑕᕐᓂᖏᓐᓂᑦ ᓄᐃᓲᖑᒋᐊᖏᑦ. ᐅᕕᓗᐃᑦ, ᐊᒻᒨᒪᔪᐃᑦ, ᑯᐊᓐᓃᑦ, ᐃᓘᓐᓇᑎᒃ ᐃᓚᒋᔭᐅᒻᒪᑕ.”
ᐱᒻᒪᕆᐅᑎᕙᐅᒃ ᓄᓇᕐᔪᐊᒥ ᐃᓕᑕᕆᔭᐅᓂᕐᑖᑐᕕᓂᐅᑉᐸᑕ ᐅᓕᓐᓂᖏᑦ ᑕᒫᓂ? “ᐋᐊ, ᐃᓱᒪᒋᔭᕋ ᐱᒻᒪᕆᐅᓂᖓᓂᒃ ᐃᓕᑕᕆᔭᐅᓂᖓ, ᐅᖃᕐᑐᖅ. “ᓄᓇᕕᒃ ᐊᑦᔨᐅᖏᑦᑑᕗᖅ, ᐅᑭᐅᕐᑕᑐᓕᒫᑎᑐᑦ. ᐃᓄᐃᑦ ᐅᖄᖏᓐᓇᓕᒫᓱᖑᒻᒪᑕ ᓇᓄᕐᓂᒃ ᐅᒥᒻᒪᓂᓪᓘᓃᑦ, ᐳᓚᕋᕐᑐᓕᕆᓂᕐᒥ ᐅᖃᐅᓯᐅᓲᓂᒃ, ᑭᓯᐊᓂ ᐊᒥᓱᑦ ᑕᒪᐅᖕᖓᓲᖑᖕᖏᑐᑦ ᐅᓕᓐᓂᒥᒃ ᑕᑯᓂᐊᑐᐃᓐᓇᓱᑎᑦ. ᖃᐅᔨᒪᓪᓚᕆᕐᖂᖏᑦᑐᐃᑦ ᑎᑭᒋᐅᕐᑐᑦ ᑕᑯᓕᕐᒪᑕ ᐅᓕᓐᓂᓂᒃ ᑎᓂᓐᓂᓂᓗ ᐊᔪᒉᓪᓕᐅᑐᒻᒪᕆᐅᓲᖑᓂᖏᓐᓂᒃ.
ᑕᑯᖃᑦᑕᓯᒪᔪᖅ ᖃᓄᖅ ᓂᐅᕐᕈᓯᒪᔪᑦ ᐱᐅᓯᖃᓚᕿᖃᑦᑕᓯᒪᒻᒪᖔᑕ. “ᐊᒥᓱᑦ ᐃᓄᐃᑦ ᓂᕆᐅᒋᔭᖃᓲᖑᖕᖏᑐᑦ ᑌᒫᓪᓗᑐᖅ ᐊᓯᑦᔨᓂᐊᕐᓂᖓᓂᒃ. ᐅᓕᓐᓂᑐ ᐃᓐᓇᐅᖏᑦᑐᖅ ᑎᓂᓐᓂᑐᐃᓐᓇᐅᒐᓂᓗ. ᓯᑯᒃ, ᐅᓕᓐᓂᐅᑉ ᑎᓐᓂᓂᐅᑉ ᐃᖏᕐᕋᓂᖏᑦ, ᐅᓕᓐᓂᒥ ᓴᕐᕙᒐᓭᑦ.”
ᑭᓯᐊᓂ, ᐊᓯᐊᒍᑦ ᑐᑭᖃᕆᕗᖅ ᓱᕐᖄᑎᕐᑕᐅᓕᕐᒪᑦ, ᐊᓪᓚᑕᐅᑐᐊᕐᒪᑕ ᑕᑯᔭᐅᑎᑦᓱᒋᓗ ᓄᓇᕐᔪᐊᒥᐅᓄᑦ.
ᑐᓴᕋᑦᓴᓕᕆᔨᓄᑦ ᑕᑯᓐᓇᑕᐅᖕᖏᑐᓂᒃ ᐱᓇᓱᐊᒻᒪᕆᑦᑐᕕᓃᑦ ᐃᓄᐃᑦ ᓄᓇᓕᒻᒥ. ᐅᓕᓐᓂᒥᒃ ᐃᑉᐱᒋᔭᖃᕐᓂᖅ ᐱᒋᐊᕐᓯᒪᖕᖏᓚᖅ ᐱᔭᕆᐊᑭᑦᑐᐊᐱᑐᐃᓐᓇᑎᒍᑦ. ᕿᓄᐃᓵᕆᐊᖃᕐᓇᓯᒪᔪᖅ, ᐃᓕᓐᓂᐊᑎᑕᐅᓂᖃᕐᓱᑎᑦ, ᑐᖓᓕᖓᓂ ᐆᑦᑐᕆᐊᓪᓚᒋᐊᖃᕐᓯᒪᑦᓱᑎᓗ.
ᓯᕗᓪᓕᖓᓂ ᐊᕐᕌᒍᒥ, ᒪᑭᕝᕕᑯᑦ ᐃᓕᓐᓂᐊᑎᑦᓯᔨᓂᒃ ᐱᐅᒡᒍᑎᓂᓗ ᑎᑭᑎᑦᓯᔪᕕᓃᑦᐃᓕᓐᓂᐊᑎᑦᓯᒋᐊᕐᑐᑎᑦᓱᒋᑦ ᑕᓯᐅᔭᕐᒥᐅᓂᒃ ᐊᕐᖃᐅᒪᔫᕐᑎᓂᒃ. ᑭᓯᐊᓂ ᖃᐅᔨᓴᕈᑎᒃ ᓄᑕᐅᓯᓕᕐᑕᐅᒋᐊᓕᕕᓂᐅᓚᐅᔪᒻᒪᑦ, ᐃᓕᓐᓂᐊᑎᑦᓯᓂᕐᓗ ᑲᔪᓯᑦᓯᐊᓂᕋᓂ. “ᐃᓱᐃᓪᓕᖓᒐᓚᑦᑐᕕᓂᖅ,” ᐅᖃᕐᑐᖅ ᐋᑕᒥ ᑎᓕᓪ-ᐊᓚᑯ, ᒪᑭᕝᕕᑯᑦ ᐊᖓᔪᕐᖄᖓᑕ ᑐᖓᓕᖓ ᐊᕙᑎᓕᕆᓂᕐᒥ, ᐆᒪᔪᓕᕆᓂᕐᒥ ᖃᐅᔨᓴᕐᓂᒥᓗ ᐱᒍᑦᔨᕕᖓᓂ. “ᑭᓯᐊᓂ ᖁᔭᓈᑐᐃᓐᓇᓯᒪᖕᖏᓚᒍᑦ.”
ᐃᒫᖔᕐᓕ ᐱᐅᓯᖃᕆᐊᓯᔪᕕᓃᑦ, ᓯᑕᒪᓂᒃ ᐃᓚᐅᔪᑦᓴᓂᒃ ᓄᕙ ᓯᑯᓯᐊᓕᐊᕐᑎᓯᑦᓱᑎᒃ 2025ᒥ ᐱᔭᕇᒋᐊᕐᑐᑎᑦᓱᒋᑦ ᐃᒪᕐᒥ ᓂᓪᓕᓇᕐᑐᒥᒃ ᐊᕐᖃᐅᒪᒋᐅᕐᓴᓂᕐᒥᒃ ᐃᓕᓐᓂᐊᕕᐅᑦᓯᐊᕈᓐᓇᓂᕐᓴᒦᑦᑎᓱᒋᑦ. ᐱᖓᓱᑦ ᑖᒃᑯᓇᓂ ᐱᔭᕇᕐᑐᕕᓃᑦ ᐃᓕᑕᕆᔭᐅᒍᑎᑖᕈᑎᓂᒃ, ᐃᓚᐅᑎᓪᓗᒋᑦ ᔦᒻᔅ ᒪᐃ, ᓵᓕ ᐊᕐᓇᑐᒃ ᐊᒻᒪᓗ ᓛᓴᕈᓯ ᐊᕐᓇᑐᒃ.
ᓛᔅ ᐊᕐᓇᑐᒃ ᐊᐅᓚᔨᔪᖅ ᓯᕗᓪᓕᐹᒥ ᐊᕐᖃᐅᒪᒋᐅᕐᓱᓂ ᑕᓯᐅᔭᕐᒥ 2024ᒥ. “ᓯᕗᓪᓕᐹᒥ ᐃᒪᕐᒦᓱᓂ ᒪᑭᑕᑦᓯᐊᕈᓐᓇᓇᕐᓯᒪᖕᖏᑐᖅ. ᐅᖁᒣᑦᑑᒪᑕ. ᑖᒃᑯᐊ ᐊᑐᕐᓱᒋᑦ ᐳᐃᑦᔪᕋᓕᓂᐅᖕᖏᓇᒪ, ᐅᕐᕈᓂᐅᔭᖃᑦᑕᓯᒪᕗᖓ, ᐊᔪᕆᓚᖓᒐᓗᐊᕐᒥᓱᖓ,” ᐅᖃᕐᑐᕕᓂᖅ. “ᐱᔭᕆᐊᑐᔫᓂᕐᐸᐅᓯᒪᔪᖅ ᐃᒪᕐᒥᒃ ᐲᕐᓯᒐᓱᒋᐊᒥᒃ ᐃᒡᒑᓗᐃᑦ ᐃᓗᐊᓃᑦᑐᒥᒃ ᐃᒪᖅ ᐊᓂᑎᒋᐊᖃᕐᓱᒍ ᓱᐴᕐᓗᑕ ᐃᒪᕐᒦᖏᓐᓇᓱᑕ ᐊᒻᒪᓗ ᐃᒪᖅ ᓱᕐᓘᓅᑲᓵᑦᑌᓇᕐᑎᓗᒍ.
ᑖᒃᑯᐊ ᐊᕐᖃᐅᒪᔫᕐᑏᑦ ᐱᓇᓱᑦᑎᒋᔭᐅᓯᓚᐅᔪᕗᑦ ᐁᑦᓯᓱᑎᑦ ᐱᒋᐊᕐᑎᓯᒋ-ᐊᓪᓚᓱᑎᓗ ᐅᓕᓐᓂᒥᒃ ᖃᐅᔨᓴᕈᑎᓂᒃ ᑲᒪᒋᔭᑦᓴᖃᕐᓂᐊᓱᑎᓗ ᓱᒃᑯᓯᒪᔪᕐᓂ-ᐊᑕᐅᓂᖏᓐᓂᒃ ᓯᕗᒧᐊᕐᐸᓕᐊᓂᕐᒥ. ᐊᑦᑕᓇᕐᑐᒦᒍᑎᐅᑐᐃᓐᓇᕆᐊᓕᒃ ᐱᓇᓱᑦᑕᐅᔪᖅ, ᑭᓯᐊᓂ ᐱᓇᓱᑦᑐᐃᑦ ᐱᒻᒪᕆᐅᑎᑦᓯᓯᐊᕐᑐᑦ. ᒪᑭᕝᕕᑯᑦ ᒫᓐᓇᐅᑎᓪᓗᒍ ᐱᓇᓱᐊᕐᑐᑦ ᐃᓕᓐᓂᐊᑎᑦᓯᒋᐊᓪᓚᓂᑦᓴᒥᓂᒃ ᐱᖓᓱᒋᐊᓪᓚᓂᒃ ᓄᓇᓕᒻᒥᐅᓂᒃ ᐃᓕᓐᓂᐊᕈᒪᓯᒪᔪᓂᒃ ᑲᔪᓯᑦᓯᐊᑐᕕᓂᐅᓚᐅᕐᑎᓗᒍ ᑖᓐᓇ ᐱᓇᓱᑦᑕᐅᓂᖓᑦ.
ᐃᓄᐃᑦ ᐅᖃᓕᒪᐅᑎᖃᕆᐅᖕᖏᓚᑦ ᐅᓕᑦᑕᓂᕆᓐᓂᐹᑦ ᓄᓇᕕᒻᒦᒋᐊᖏᑦ. ᐊᓪᓛᑦ, ᑕᒪᓐᓇ ᐃᓕᑕᕆᔭᐅᓯᒪᓚᐅᕐᓯᒪᒋᕗᖅ.
1953ᒥ, ᑲᓇᑕᐅᑉ ᑲᕙᒪᖓᑕ ᑐᓴᕐᑎᓯᒍᑎᓕᐊᕕᓂᖏᑦ ᐊᓪᓚᓯᒪᔪᕕᓃᑦ ᐅᓕᓐᓂᐅᑉ ᐳᕐᑐᓂᖓᓂᒃ 18 ᒦᑕᓂᒃ ᐳᕐᑐᓂᖃᕐᓂᕃᑦᓱᓂ ᑕᓯᐅᔭᒥ, Guinness Book of World Records ᒨᕐᑕᐅᓚᕿᑦᓱᓂ. ᑭᓯᐊᓂ ᑭᖑᓂᐊᒍᑦ, Bay of Fundy ᑐᓴᐅᒪᔭᐅᓂᕐᓴᕈᕐᓯᒪᔪᖅ, ᓂᐅᕐᕈᓯᓴᔪᓄᑦ ᑕᑯᓂᐊᕐᑕᐅᓂᕐᓴᐅᓱᓂ ᓱᕐᖄᑎᕐᑕᐅᓂᕐᓴᐅᓱᓂᓗ, ᑕᓯᐅᔭᒥᓕ ᑕᒫᓂᒥᐅᔭᐅᖕᖏᑐᓄᑦ ᖃᐅᔨᓴᕐᑎᓄᑦ ᐳᐃᒍᕐᑕᐅᕙᓪᓗᑎᓪᓗᒋᑦ.
ᔫᓂ 2001ᒥ, ᓄᓇᕕᒻᒥ ᓂᐅᕐᕈᑐᓕᕆᓂᕐᒥ ᑲᑐᑦᔨᖃᑎᒌᓐᓂᖓ, ᐱᓇᓱᑦᑎᖃᓚᐅᕐᑐᓱᑎ Dave DeWolfe-ᒥᒃ ᖃᐅᔨᓴᓯᔪᕕᓃᑦ ᐅᓕᓐᓂᓂᒃ ᖃᐅᔨᓴᕐᓱᑎᑦ ᓄᕗᑯᑖᑉ ᓴᓂᐊᓂ (Gauge Point), ᐅᖓᓯᑦᑑᓗᐊᖕᖏᑐᒥ ᑕᓯᐅᔭᒧᑦ, ᑕᒡᒐᓂᑦᓭᓇᖅ ᓄᓇᒥ ᓱᕐᖄᑎᕐᕕᐅᔪᕕᓂᕐᒥ Canadian Hydrographic Services-ᑯᓄᑦ 1953ᒥ.
ᐊᕐᕌᒍᓕᒫᖅ ᑭᖑᓂᐊᒍᑦ, ᒪᕐᕉᒃ ᖃᐅᔨᓴᕈᑏᒃ ᐁᔭᐅᓚᐅᔪᕘᒃ ᐊᒻᒪᓗ ᐅᓕᓐᓂᓂᒃ ᖃᐅᔨᓴᕈᑏᒃ ᓄᐊᑕᐅᑦᔪᑦ ᕿᒥᕐᕈᔭᐅᑦᓱᑎᒃ ᐊᑦᔨᒌᖕᖏᓂᖏᑦ ᑲᒪᒋᔭᐅᑦᓱᑎᑦ ᓱᕐᖄᑎᕆᓂᐅᓯᒪᔪᓄᑦ ᑕᓯᐅᔭᐅᑉ ᓴᓂᐊᓂ, ᐃᓚᐅᒻᒥᑎᓪᓗᒍ Bay of Fundy. ᐅᑦᑑᐱᕆ 2002ᒥ ᑐᓴᕐᑎᓯᒍᑎᒥ, ᓄᐃᑦᓯᔪᕕᓃᑦ ᐅᓕᓐᓂᖏᑦ ᑕᓯᐅᔭᒥ ᐊᒻᒪᓗ Bay of Fundy-ᒥ ᐊᑦᔨᒌᐸᓲᓂᕋᕐᑕᐅᒐᓗᐊᕐᑎᓗᒋᑦ ᒥᑭᔪᐊᐱᒻᒥᓂᒃ ᐊᑦᔨᒌᖕᖏᓂᖃᕐᒪᑕ ᖃᐅᔨᒍᑎᕕᓂᕐᓂ, ᑕᒐ ᐳᕐᑐᓂᕐᐹᖅ ᓱᕐᖄᑎᕐᑕᐅᔪᕕᓂᖅ ᐊᓪᓚᑕᐅᑦᓱᓂ ᑕᓯᐅᔭᒦᓐᓂᖓ ᒫᑦᔨ 31, 2002ᒥ, ᐳᕐᑐᓂᖃᕐᓱᓂ 16.1 ᒦᑕᓂᒃ.
ᑭᓯᐊᓂ ᐃᓄᐃᑦ ᐊᑦᔨᒌᑦᑎᓯᖏᓐᓇᓂᕐᖁᑦ ᓯᓚᕐᔪᐊᒥ ᐳᕐᑐᓂᕐᐹᒥᒃ ᐅᓕᓐᓂᓂᒃ ᑕᓯᐅᔭᒥ Fundy-ᒥᓗ. ᑕᒪᓐᓇ ᐱᑦᔪᑎᒋᑦᓱᒍ 2024-2025ᒥ ᖃᐅᔨᒍᑎᕕᓃᑦ ᐱᒻᒪᕆᐅᕗᑦ. ᐃᓗᐃᑦᑑᓱᑎᑦ, ᓄᑖᖑᓂᕐᐹᓂᒃ ᐱᐅᒡᒍᑎᓂᒃ ᐊᑐᕐᓱᑎᑦ ᓄᐃᑦᓯᒍᑎᐅᓐᓂᒪᑦ, ᓄᐊᑕᕕᓂᐅᑦᓱᑎᓗ ᐃᑲᔪᕐᑎᓗᒋᑦ ᓄᓇᓕᒻᒥᐅᑦ ᐃᓄᐃᑦ.
“ᒫᓐᓇᓕ, ᓈᒻᒪᓈᑦᓯᐊᓂᕐᖁᒍᑦ,” ᐅᖃᕐᑐᕕᓂᖅ ᐅᒣᕐ ᐊᒥᑦ, ᒪᑭᕝᕕᑯᑦ ᐊᕙᑎᓕᕆᓂᕐᒥᒃ, ᐆᒪᔪᓕᕆᓂᕐᒥᒃ ᖃᐅᔨᓴᕐᓂᒥᓗ ᐱᒍᑦᔨᕕᖓᓂ ᑲᒪᒋᔭᓕᕕᓂᖅ ᑖᑦᓱᒥᖓ ᐱᓇᓱᑦᑕᐅᔪᒥᒃ, ᐱᓇᓱᑦᑎᖃᓚᐅᕐᑐᓱᑎᑦ Dave DeWolfe-ᒥᒃ. “ᓱᓇᓕᒫᑦ ᐊᑐᑦᓯᐊᓂᕐᖁᑦ. ᑭᓯᑕᐅᒪᒍᑎᖏᓗ ᓱᓕᑦᓯᐊᓱᑎᑦ.”
ᐅᖃᕐᑐᕕᓂᖅ ᐃᓘᓐᓇᓕᒫᖏᑦ ᓄᐊᑕᐅᔪᕕᓃᑦ Canadian Hydrographic Service-ᒨᕐᑕᐅᒪᓕᕐᑐᑦ, ᑖᓐᓇ ᑲᕙᒪᐅᑉ ᐱᒍᑦᔨᕕᖓ ᑲᒪᒋᔭᖃᓲᖅ ᐅᓕᓐᓂᓂᒃ ᐃᒪᕐᐱᐅᓗ ᖃᓄᐃᓕᖓᓂᖏᓐᓂᒃ. ᕿᒥᕐᕈᒋᐊᓪᓚᓂᐊᕐᑐᑦ ᓱᓕᑦᓯᐊᒪᖔᑕ ᓱᕐᖁᐃᓯᒍᑎᒥᒃ ᐅᖃᓚᐅᕋᑎᒃ ᐊᓪᓚᑕᐅᒪᒍᑎᖏᓐᓂᒃ.
ᐃᓚᖏᑦ ᑐᓴᕋᑦᓴᓕᕆᔩᑦ ᖃᓪᓗᓈᑦ ᓄᓇᖓᓂ ᖃᐅᔨᒌᕐᑐᕕᓃᑦ ᑕᒪᑦᓱᒥᖓ. ᓯᑦᑎᒻᐱᕆ 2025ᒥ, The Guardian ᐊᓪᓚᖑᕐᑎᓯᓚᐅᔪᕗᖅ ᑕᒪᑦᓱᒥᖓ ᑌᔭᐅᔪᒥᒃ: “ᓇᓪᓕᐊᓂ ᐅᓕᓐᓂᒃ ᐳᕐᑐᓂᕐᐸᐅᕙ? ᑲᓇᑕᒥ ᓄᓇᓕᐊᕈᖏᑦ ᐱᓕᐅᑎᕗᑦ Guiness World Record-ᒥ ᐳᕐᑐᓂᕐᐹᒥᒃ ᑌᔭᐅᒍᓯᖃᕐᓂᒥᒃ.”
Bay of Fundy ᓄᓇᕕᐅᓪᓗ ᐱᓕᐅᑎᓂᒋᑦᑕ ᖃᓄᐃᓕᖓᓂᖓᓂᒃ ᐊᓪᓚᒍᑎᖃᕐᓯᒪᔪᑦ. ᐃᓚᖏᑦ Nova Scotia-ᒥᐅᑦ ᓴᐳᒻᒥᔪᑦ ᐃᓕᑕᕆᔭᐅᒍᑎᒥᓂᒃ, ᐅᖃᕐᓱᑎᑦ ᐅᓕᓐᓂᖏᑦ ᐳᕐᑐᓂᕐᐅᖏᓐᓇᓂᖏᓐᓂ.
ᑎᓕᓪ-ᐊᓚᑯ ᐅᖃᕐᑐᖅ ᓂᕆᐅᓐᓇᑐᕕᓂᐅᓂᕋᕐᓱᒍ ᑕᒪᓐᓇ. “ᐅᖃᖃᑦᑕᓂᐊᕐᑐᐃᑦ ᑕᒪᓐᓇ ᓱᓕᖕᖏᓂᕋᕐᓗᒍ, ᓱᕐᖄᑎᕐᑕᐅᓯᐊᕐᓂᖏᑦᑐᖅ ᓚᓗᑎᓘᓐᓃᑦ,” ᐅᖃᕐᑐᕕᓂᖅ. ᐅᖃᕐᓱᓂ, ᐃᓚᐅᓐᓂᕋᒥ ᓄᓇᕕᒻᒥ ᓂᐅᕐᕈᑐᓕᕆᓂᕐᒥ ᑲᑐᑦᔨᖃᑎᒌᓐᓂᖓ New Brunswick-ᒦᑦᑎᓗᒋᑦ ᐅᑦᑑᐱᕆᒥ ᐅᓕᓪᓗᐊᑕᕐᓂᒥᒃ ᐊᓕᐊᓱᒍᑎᖃᕐᑎᓗᒋᑦ, ᑎᓕᓪ-ᐊᓚᑯ ᐅᖃᕐᑐᕕᓂᖅ ᓈᒻᒪᒋᐅᑎᒐᑎᒃ ᐅᖄᖃᑎᒌᓐᓂᖃᖃᑦᑕᓂᕐᒪᑕ ᐊᒥᓱᕕᑦᓱᑎᑦ ᐅᖄᒍᑎᖃᕐᓱᑎᑦ ᓄᓇᕐᔪᐊᒥ ᐳᕐᑐᓂᕐᐹᒥᒃ ᐅᓕᓐᓂᓕᕆᑦᓱᑎᑦ.
“ᐃᓚᖓᑦ ᐅᓯᑲᑦᑕᐅᑎᒥᒃ ᐱᓇᓱᑦᑎᒃ ᐅᖃᕐᑐᕕᓂᖅ, ‘ᑕᑯᖕᖏᓂᓕᒫᕋᓂ ᖃᐅᔨᓴᕈᑎᕕᓂᕐᓂᒃ ᓱᕐᖁᐃᓯᒍᑎᒥᓗ ᖁᔭᓈᕐᓂᐊᖏᓪᓚᖓ,’ ᑕᒐ, ᑕᑯᑎᓯᓚᐅᔭᖃ ᖃᐅᔨᓴᕈᑎᕕᓂᑦᑎᓂᒃ ᓄᐃᑕᐅᒪᔪᓂᒃ ᑌᒪ ᑭᐅᑦᓱᓂ, ᐋᐊ, ᑭᓯᐊᓂ ᑕᕐᕿᖃᕐᖁᒍᑦ!”
ᑐᖕᖓᕕᖃᕐᓱᑎᑦ ᓄᓇᓕᒻᒥᐅᑦ ᖃᐅᔨᒪᒍᓯᖏᓐᓂᒃ, ᖃᐅᔨᓴᕈᑏᑦ ᐃᓕᔭᐅᒋ ᐊᓪᓚᓂᕐᖁᑦ ᐊᓯ ᐊᓅᒋ ᐊᕐᑕᐅᓱᑎᒃ ᐊᐅᒡᒍᓯᐅᓚᐅᕐᑐᒥ, ᓱᕐᖄᑎᕆᒋ ᐊᓪᓚᒐᓱᑦᓱᑎᑦ ᐳᕐᑐᓂᕐᓴᒋ-ᐊᓪᓚᒥᒃ ᐅᓕᓐᓂᒥᒃ. ᒪᑭᕝᕕᑯᑦ ᓱᕐᖄᑎᕆᖏᓐᓇᓂ ᐊᕐᑐᑦ, ᐃᑲᔪᕐᓯᑎᓪᓗᒋᑦ ᓄᓇᓕᒻᒥᐅᑦ ᐊᕐᖃᐅᒪᔫᕐᑎᖏᑦ. ᐅᖄᒍ ᑎ ᐅᖃᑦᑕᒥᔪᖅ ᑕᕐᕋᓕᔮᓕᐅᕈᑎᒥᒃ ᐃᓕᓯᒋ ᐊᒥᒃ ᐊᑑᑎᓪᓗᑐᕐᑐᓂᒃ ᑕᑯᑦᓴᐅᑎᑦᓯᒐᔭᕐᑐᒥᒃ ᐅᓕᓐᓂᒥᒃ ᓄᓇᓕᖓᓂ, ᐃᓄᐃᑦ ᑕᑯᒍᓐᓇᓂᐊ ᕐᒪᑕ ᐃᒪᐅᑉ ᐳᕐᑐᓂᖓᓂᒃ ᐊᓯᑦᔨᑎᓪᓗᒍ ᐊᑑᑎᓪᓚᕆᑦᑎᓗᒍ, ᐳᓚᕋᕐᑏᓗ ᑐᑭᓯᒍᓐᓇᓂ-ᐊᕐᒪᑕ ᓄᓇᒥ ᑐᓪᓕᕌᕐᑕᖓᓂᑦ ᓱᔪᖃᕐᓂᖓᓂᒃ.
ᒪᑭᕝᕕᑯᑦ ᐊᖓᔪᕐᖄᖓ ᐱᑕ ᐋᑕᒥ ᐅᖃᕐᑐᕕᓂᖅ ᑖᓐᓇ ᐱᓇᓱᑦᑕᐅᔪᖅ ᑭᓯᑦᓯᒍᑎᓕᕆᓂᑐᐃᓐᓇᐅᖏᑦᑐᖅ, ᐅᑎᕐᑎᓯᕐᒨᓕᖓᔪᖅ ᖃᐅᔨᒪᒍᓯᕐᓂᒃ ᓄᐃᑎᕆᓂᕐᒨ-ᓕᖓᑦᓱᓂᓗ ᐱᕕᑦᓴᐅᒍᓐᓴᑐᓂᒃ.
“ᑕᓯᐅᔭᐅᑉ ᓴᓂᐊᓂ ᐅᓕᓐᓂᒥᒃ ᖃᐅᔨᓴᕐᓂᖅ ᓱᕐᖁᐃᓯᒍᑎᐅᕗᖅ ᐃᓄᑐᙯ ᖃᐅᔨᒪᔭᑐᖃᖏᓐᓂᒃ: ᓄᓇᕕᒃ ᓄᓇᐅᑦᓱᓂ ᓄᓇᕐᔪᐊᒥ ᐅᓕᓪᓗᐊᑕᕐᓂᐹᖑᒋᐊᖓᓂᒃ,” ᐅᖃᕐᑐᕕᓂᖅ. “ᑖᓐᓇ ᖃᐅᔨᒪᒍᓯᖅ ᓲᖑᓯᐅᒥᑎᑦᓯᔪᖅ ᑕᐅᑐᕐᖂᑕᕗᓐᓂᒃ ᓯᕗᓂᕐᒥ: ᓴᐳᒻᒥᒍᑎᐅᑦᓱᓂ ᐊᕙᑎᑦᑎᓂᒃ ᐃᓅᒍᓯᑦᑎᓂᓗ, ᑖᒃᑯᐊ ᐊᑐᕐᓗᒋᑦ ᐊᔪᒉᑦᑐᐃᑦ ᓄᓀᑦ ᑐᑭᖃᑦᓯᐊᑐᒥᒃ ᐳᓚᕋᕐᑐᓕᕆᓂᕐᒥᒃ ᐱᕕᑦᓴᓯᐊᖑᑦᓱᑎᑦ, ᓄᐃᑕᑎᓗᒍ ᐊᑦᔨᐅᖏᑦᑐᖅ ᐃᓗᕐᕈᓯᕗᑦ, ᐊᒻᒪᓗ ᑖᕗᖓᐅᓕᒍᓐᓇᑐᒥᒃ ᑮᓇᐅᔭᑎᒍᑦ ᒪᑭᑕᒐᓱᐊᕐᓂᒥᒃ ᐱᕙᓪᓕᖁᑎᐅᓂᐊᕐᑐᓂᒃ ᓄᓇᓕᓐᓄᑦ ᓄᓇᕕᓕᒫᒥ.
ᒫᓐᓇᐅᑎᓪᓗᒍ, ᑕᐅᓴᓐᓕᕐᕿᑖᑦ ᐃᓄᐃᑦ Bay of Fundy ᓕᐊᓲᖑᕗᑦ ᐊᕐᕌᒍᑕᒫᑦ ᐱᓱᒋᐊᕐᑐᓱᑎᑦ ᑎᓂᖕᖓᔪᒥ ᓄᓇᒥ ᐊᑦᔨᓕᐅᕆᑦᓱᑎᓗ ᐅᓕᓪᓗᐊᑕᕐᓂᓂᒃ. ᓯᓚᕐᔪᐊᒥ ᐳᕐᑐᓂᕐᐹᑦ ᐅᓕᓐᓃᑦ ᑕᓯᐅᔭᕐᒦᒋᐊᖏᑦ ᐃᓕᑕᕆᔭᐅᓂᖃᕐᐸᑦ, ᓄᑖᓂᒃ ᐳᓚᕋᕐᑎᓂᒃ ᑎᑭᓚᖀᒍᓐᓇᑐᖅ, ᐱᓇᓱᒉᑦ ᓄᐃᓚᕿᒍᓐᓇᑐᑦ, ᑐᑭᓯᒪᔭᐅᑎᑦᓯᒍᑎᐅᓚᕿᓗᓂᓗ ᓄᓇᖁᑎᖓᓂᒃ.
ᑎᓕᓪ-ᐊᓚᑯ ᐅᖃᕐᑐᕕᓂᖅ ᐅᓕᓐᓃᑦ ᐃᓚᒋᔭᐅᒻᒥᒪᑕ ᓄᓇᕕᒻᒥ ᑕᑯᒍᒥᓇᕐᑐᓄᑦ ᐊᒥᓱᓄᑦ ᑕᒪᓐᓇ ᐅᐱᒍᓲ-ᑎᒋᒋᐊᓕᕗᑦ.
“ᑖᓐᓇ ᐃᓚᒋ ᐊᕆᒍᑎ ᐅᔪᖅ ᓱᓇ ᐅᓂᖏᓐᓂᒃ ᐊᓪᓚᓯ- ᒪᔪᓂᒃ ᑕᑯᑦᓴ ᐅᑎᒍᒪᔭᕗᓐᓂᒃ ᓄᓇᕐᔪ ᐊᒥ ᐅᓄᑦ,” ᐅᖃᕐᑐ- ᕕᓂᖅ. “ᐃᓂᖁᓇᕐᑐᓂᒃ ᐆᒪᔪᖁᑎᖃᕐᑐᒍᑦ, ᓄᓇᕐᔪ ᐊᒥ ᑕᑯᒥᓇᕐᑐᖑᐊᖁᑎᕗᓐᓂᒃ ᓄᓇᖃᕐᖁᒍᑦ, ᖃᕐᖃᖃᕐᑐᒍᑦ, ᒥᕐᖑ ᐃᓯᕐᕕᖁᑎᖃᕐᒥᓱᑕ. ᑖᓐᓇ ᐃᓚᒋ ᐊᕆᒍᑎᑐᐃᓐᓇᖅ ᐊᓪᓚᑕ ᐅᒪᔪᓂᒃ ᑕᑯᒍᒥᓇᕐᑐᓂᒃ ᑕᑯᔭ ᐅᒍᓐᓇᑐᓂᒃ ᖃ ᐅᔨᔭ-ᐅᒍᓐᓇᑐᓂᓗ ᓄᓇᕕᒻᒥ.
