ᑰᑦᔪᐊᖅ, ᑯᐯᒃ, ᓯᑎᒻᐱᕆ 10. 2014 – ᑲᑎᕕᒃ ᓄᓇᓕᓕᒫᑦ ᑲᕙᒪᖓ ᐊᒻᒪᓗ ᒪᑭᕝᕕᒃ ᑯᐊᐳᕇᓴᓐ ᐱᒻᒪᕆᐊᓗᒻᒥᒃ ᑐᓴᕐᑎᓯᐅᑎᖃᑫᓐᓇᑑᒃ ᐅᓪᓗᒥ ᑳᓴᓕᒥ ᐱᑦᔪᑎᓕᒻᒥᒃ. ᐅᒃᑑᐱᕆ 1, ᐱᒋᐅᕐᓗᓂ, ᑳᓴᓖᑉ ᐊᑭᑭᓪᓕᒋᐊᕈᑎᖓ ᐱᕙᓪᓕᖁᑎᑖᕐᑕᑐᓄᑦ ᔦᒥᔅ ᐯ ᑕᕐᕋᖓᑕ ᐊᖏᖃᑎᒌᓐᓂᒧᑦ ᑖᒃᑯᓄᖓᑐᐊᑎᖅ ᐃᓕᖓᓚᖓᓕᕐᑐᖅ, ᑖᒃᑯᐊᓗ ᓄᐃᑦᓯᖃᑦᑕᕆᐊᖃᓚᖓᑦᓱᑎᒃ ᓄᑖᒥ ᐱᕙᓪᓕᖁᑎᑖᕐᑕᑐᑦ ᐊᑭᑭᓪᓕᒋᐊᕈᑎᖓᓂᒃ ᐃᓚᐅᒍᑎᒥᒃ ᑲᓴᓖᕐᑖᕋᓱᐊᓕᕈᑎᒃ.
ᐱᕙᓪᓕᖁᑎᑖᕐᑕᑐᑦ ᐊᑭᑭᓪᓕᒋᐊᕈᑏᑦ ᐃᓪᓓᒍᑎᑦᓴᔦᑦ ᓄᓇᕕᒻᒥ ᐊᑭᑐᓗᐊᕐᓂᒧᑦ ᐃᓄᒐᓱᐊᕐᓂᒧᐊᖓᔪᒥᒃ ᐱᓕᐊᒍᓯᒪᓕᕐᑐᖅ ᔦᒥᔅ ᐯ ᑕᕐᕋᖓᑕ ᐊᖏᖃᑎᒌᓐᓂᒧᑦ ᐱᕙᓪᓕᖁᑎᑖᕐᑕᑐᓄᑦ ᖁᓕᓪᓗ ᐱᖓᓲᔪᕐᑐᓂᒃ ᐅᖓᑖᓄᓪᓗ ᐅᑭᐅᓕᓐᓄᑦ ᐊᑐᐃᓐᓇᐅᑎᑕᐅᓚᖓᑦᓱᓂ ᐁᔮᐅᒍᓐᓇᓛᕐᓱᓂ ᓯᑎᒻᐱᕆᐅᑉ ᐱᓇᓱᐊᕈᓯᖓᑕ ᑭᖑᓪᓕᐹᖓᓐᓂ ᓄᓇᓖᑦ ᑯᐊᐸᒃᑯᖏᓐᓂ ᓄᓇᓕᓕᒫᓂ. ᑖᒃᑯᐊ ᐃᓚᐅᒍᑏᑦ ᓄᓇᓕᓐᓂ ᑲᓴᓖᕐᑖᑎᑦᓯᔨᓂᒃ ᐊᑭᑭᓪᓖᒋᐊᕐᑎᓯᒍᓐᓇᖃᑦᑕᓚᖓᔪᑦ 40-ᓴᓐᓯᒧᑦ ᓖᑕᑕᒫᑦ ᓇᒻᒥᓂᖅ ᐊᑐᕋᑦᓴᒥᓂᒃ. ᑕᓐᓇ ᐊᑭᑭᓪᓕᒋᐊᕈᑎ ᐊᑐᕐᑕᐅᒍᓐᓇᑐᖅ, ᔦᒥᔅ ᐯ ᑕᕐᕋᖓᑕ ᐊᖏᖃᑎᒌᓐᓂᒧᑦ ᐱᕙᓪᓕᖁᑎᑖᕐᑕᑐᓄᑦ ᐁᑦᑐᐃᒍᑎᒃ ᐊᑭᑭᓪᓕᒋᐊᕈᑎᒥᒃ ᐃᓪᓓᒍᑎᑦᓴᔭᒥᒃ ᑳᓴᓖᕐᑖᕋᓱᐊᓕᕈᑎᒃ.
“ᐸᕐᓇᓯᒪᐅᑎᒃ ᐊᕐᕕᑕᕈᑕᐅᑎᓪᓗᒍ ᓄᓇᓕᓕᒫᓂ ᐊᕐᕌᓂ, ᑐᓵᓚᐅᔪᔪᒍᑦ ᐃᓱᒫᓗᑎᒋᔭᐅᔪᓂᒃ ᐃᓄᓐᓄᑦ ᐃᓅᒐᓱᐊᕐᓂᕉᖅ ᐊᑭᑐᔪᐊᓘᓂᖓᓄᑦ. ᑖᓐᓇ ᐊᑭᑭᓪᓕᒋᐊᕈᑎᒃ ᐃᓪᓓᒍᑎᑦᓴᔭᖅ ᓄᐃᑕᔪᒃᑯᑦ ᐃᑲᔪᕐᓯᒍᑕᐅᔪᖅ ᐆᒪᔪᕐᓯᐅᓲᓄᑦ ᐃᓚᖏᓐᓄᓗ ᐊᐅᓪᓚᑫᓐᓇᕈᒪᒍᑎᒃ ᓄᓇᒧᑦ,” ᑐᑭᓯᑎᑦᓯᔪᖅ ᒪᑭᕝᕕᑯᑦ ᐊᖓᔪᕐᖄᖓ ᔫᐱ ᑕᕐᕿᐊᐱᒃ. “ᑖᓐᓇ ᐃᑲᔪᕐᓯᒍᑎᒃ ᐱᔭᕆᐊᑭᓪᓕᑎᕆᓚᖓᔪᖅ ᑲᔪᓯᑎᑦᓯᒋᐊᒥᒃ ᐃᓗᕐᖁᓯᑐᖃᑦᑎᓂᒃ.”
“ᑳᓴᓖᒥᒃ ᐊᑭᑭᓪᓕᒋᐊᕈᑎᒃ ᓄᐃᑕᔪᑎᒍᑦ ᐃᑲᔪᕐᓯᐅᑕᐅᕗᖅ ᐊᑭᑭᓪᓖᒋᐊᕈᑕᐅᑦᓱᓂ ᑳᓴᓖᒥᒃ ᐊᑭᑐᔪᐊᓘᓕᕐᒪᑦ ᓄᓇᕕᒻᒥ ᐊᒻᒪᓗ ᐃᓚᒌᓂᒃ ᑐᕃᓐᓇᑐᑯᑦ ᑮᓇᐅᔭᕐᑐᖏᓐᓂᓴᐅᒍᑕᐅᓚᖓᓗᓂ ᐊᓯᖏᓐᓄᓗ ᑮᓇᐅᔦᑦ ᑭᖕᖒᒪᓇᕐᑐᓄᑦ ᐊᑐᕐᑕᐅᓂᕐᓴᐅᓂᐊᕐᒪᑕ, ᐅᖃᕆᐊᓪᓚᓚᐅᕐᑐᖅ ᑲᑎᕕᒃ ᓄᓇᓕᓕᒫᑦ ᑲᕙᒪᒃᑯᑦ ᐊᖓᔪᕐᖄᖓ ᒫᑭ ᐃᒪᕐᓚᒃ.
ᓯᑎᒻᐱᕆ ᓄᖕᖑᐊ ᑎᑭᕋᑕᕐᓗᒍ, ᐊᑭᖓ ᐊᑭᓕᕐᑕᐅᔪᖅ ᓄᓇᕕᒻᒥᐅᓄᑦ ᑲᓴᓖᕐᑖᕕᓐᓂ ᓄᓇᕕᒻᒥ ᑌᒣᑦᑐᓭᓐᓇᐅᓚᖓᔪᖅ. ᑳᓴᓖᒥᒃ ᐊᑭᑭᓪᓕᒋᐊᕈᑎ ᐊᑕᐅᓯᐅᕗᖅ ᐱᖓᓲᔪᕐᑑᒪᑕ ᓄᓇᓕᓕᒫᓂ ᐊᑭᑭᓪᓕᒋᐊᕈᑕᐅᓯᒪᔪᑦ ᐃᓅᒐᓱᐊᕐᓂᒧᐊᖓᑦᓱᑎᒃ ᑲᔪᓯᑎᑕᐅᓯᒪᑦᓱᑎᓪᓗ 2007-ᒍᓯᓚᐅᔪᒻᒪᑦ. ᐊᓯᖏᑦ ᐃᑲᔪᕐᓯᐅᑎᐅᒻᒥᔪᑦ ᓂᖀᑦ ᐊᓯᖏᓪᓗ ᑭᖕᖒᓇᕐᑑᓲᑦ, ᖃᖓᑦᑕᐅᑎᒧᑦ ᐊᑭᑭᓪᓕᒋᐊᕈᑏᑦ, ᐃᓪᓘᑉ ᐃᓗᐊᓂ ᐱᐅᓕᓂᐊᒉᑦ ᒪᙯᓯᐅᑏᓪᓗ, ᓂᕿᑐᐃᓐᓇᓂ ᓄᓇᓕᓐᓂ ᐃᑲᔪᕐᓯᒪᐅᑏᑦ, ᐊᒻᒪᓗ ᐃᓄᑐᖃᕐᓂᒃ ᐃᑲᔪᕐᓯᐅᑏᑦ. ᒪᓕᒉᑦ ᑖᒃᑯᓄᖔᖓᔪᑦ ᐊᑭᑭᓪᓕᒋᐊᕈᑎᓕᒫᓄᑦ ᐋᕐᕿᒋᐊᕐᑕᐅᒍᓐᓇᕕᖃᕐᒥᔪᑦ ᐅᕝᕙᓗᓐᓃᑦ ᓄᕐᖃᑎᑕᐅᓗᑎᒃ ᖃᖓᑐᐃᓐᓇᖅ. ᐊᕐᕌᒍᕐᓂ ᐊᓂᒍᕐᑐᓂ, ᐃᓗᓐᓇᑎᒃ ᐊᑭᑭᓪᓕᒋᐊᕈᑕᐅᓯᒪᔪᑦ ᐊᓕᐊᒋᔭᐅᕙᓪᓕᐊᑐᐃᓐᓇᓯᒪᔪᑦ ᓄᓇᕕᒻᒥᐅᓄᑦ.
ᖃᐅᔨᒋᐊᒃᑲᓂᕈᒪᒍᕕᑦ ᑲᓴᓖᒥ ᐃᑲᔪᕐᓯᐅᑎᒥᒃ ᐊᒻᒪᓗ ᓄᑖᒥ ᐱᕙᓪᓕᖁᑎᑖᕐᑕᑐᑦ ᐊᑭᑭᓪᓕᒋᐊᕈᑎᒥᒃ ᐃᓪᓓᒍᑎᑦᓴᔭᒥ, ᑕᑯᒐᓱᐊᕆ http://www.krg.ca/en/cost-of-living-program. ᓓᓇ ᑯᔩ ᒪᑭᕝᕕᒃ ᑯᐊᐳᕇᓴᓐᒦᑐᖅ ᖃᐅᔨᒐᓱᐊᕐᑕᐅᒍᓐᓇᑐᖅ ᑖᒃᑯᐊ ᐱᕙᓪᓕᖁᑎᑖᕐᑕᑐᑦ ᐊᑭᑭᓪᓕᒋᐊᕈᑏᑦ ᒥᑦᓵᓄᑦ (ᐱᔪᓐᓇᑐᑦ, ᐊᓯᐅᔨᔪᑦ ᑎᓪᓕᒐᐅᔨᐊᓖᑦ) lagrey@makivik.org ᐅᕝᕙᓗᓗᓐᓂᑦ 1-800-361-7052.
ᖃᐅᔨᒋᐊᕐᕕᓵᒃ:
ᐊᓐᔨᓚ ᐱᐊᑐᕈ
ᑐᓴᕈᑎᓕᕆᓂᕐᒥ ᑲᒪᔨ
ᑲᑎᕕᒃ ᓄᓇᓕᓕᒫᑦ ᑲᕙᒪᖓ
ᐅᖃᓚᐅᑎᖓ: 819-964-2961 ᑐᑦᓯᕋᕐᓗᑎᑦ 2317
media@krg.ca
www.krg.ca
ᒍᐃᓕᐊᒻ ᑕᒍᓐᓈᖅ
ᐳᕐᑐᓂᕐᓴᖅ ᑐᓴᕈᑎᓕᕆᔨ
ᒪᑭᕝᕕ ᑯᐊᐳᕇᓴᓐ
ᐅᖃᓚᐅᑎᖓ: 819-964-2925
wtagoona@makivik.org
www.makivik.org
to download the PDF version of this Press Release
ᑲᑎᕕᒃ ᓄᓇᓕᓕᒫᑦ ᑲᕙᒪᖓ ᓇᐅᓕᒫᓂᒃ ᐊᑦᔨᒌᑎᓯᑦᓱᓂ ᑎᒥᐅᔫᕗᖅ ᓄᐃᑕᐅᓯᒪᔪᖅ 1978-ᒥ ᔦᒥᔅ ᐯ ᑯᐯᒃ ᑕᕐᕋᖓᑕᓗ ᐊᖏᖃᑎᒋᓐᓂᖓᓄᑦ. ᑎᒥᐅᔪᖅ ᐊᐅᓚᑦᓯᕗᖅ ᑯᐯᓕᒫᑲᓵᒥᒃ 55 ᖁᓛᓂ ᓇᓗᓀᒃᑯᑕᓕᐅᑉ ᒪᓂᓯᐹᓚᑎᓕᕆᓂᕐᓂ, ᐊᐅᓚᒍᑎᓂᒃ, ᐊᕙᑎᓕᕆᓂᕐᒥ, ᐳᓖᓯᖃᕐᓂᒥ, ᐱᓇᓱᒐᑦᓴᓂᒃ, ᐱᓇᓱᒋᐅᕐᓴᑎᑦᓯᓂᕐᒥᒃ, ᑮᓇᐅᑦᔭᓵᓂᒃ, ᐯᕆᑦᓯᕕᓐᓂᒃ, ᓄᑕᐅᓪᓕᑐᕈᓐᓇᑐᓂᒃ ᐱᑦᓴᓂᒃ, ᓄᓇᐅᑉ ᐊᑐᕐᑕᐅᓂᖏᑦᑕ ᐸᕐᓇᑕᐅᓂᖏᓐᓂᒃ, ᐃᓅᖃᑎᒌᑦ ᖃᓄᐃᖕᖏᓯᐊᕆᐊᖃᕐᓂᖏᓐᓂᒃ ᐊᒻᒪᓗ ᑮᓇᐅᔭᓕᕆᓂᑎᒍᑦ ᐱᕙᓪᓕᐊᑎᑦᓯᓂᕐᒥᒃ.
ᒪᑭᕝᕕᒃ ᖄᖏᕐᓂᑯᓕᐅᕐᑎᐅᖏᑦᓱᓂ ᑎᒥᐅᔫᕗᖅ ᑎᓕᔭᐅᒪᑦᓱᓂ ᓄᓇᕕᐅᑉ ᐃᓄᖏᑦᑕ ᑮᓇᐅᔭᖁᑎᖏᓐᓂᒃ ᐱᕕᖃᕐᑎᑕᐅᓯᒪᔪᓂᒃ ᔦᒥᔅ ᐯᒥᓗ ᑯᐯᒃ ᑕᕐᕋᖓᓂᓗ ᐊᖏᖃᑎᒋᓐᓂᖓᓄᑦ. ᒪᑭᕝᕕᑯᑦ ᐊᑑᑎᔭᐅᓂᖃᕐᐳᑦ ᐊᐅᓚᑦᓯᒋᐊᖃᕐᓂᒥᒃ ᐅᑎᕐᑐᓴᓕᐅᕆᐊᖃᕐᓂᒥᓪᓗ ᑕᒪᒃᑯᓂᖓ ᑮᓇᐅᔭᓂᒃ, ᐊᒻᒪᓗ ᑫᓪᓗᑐᐃᓂᕐᒥᒃ ᒪᑭᑕᒐᓱᐊᕐᓂᑯᑦ ᐱᕈᕐᐸᓕᐊᓂᕐᒥᒃ ᐃᑲᔪᕐᓯᓂᒃᑯᑦ ᐃᓄᓐᓄᑦ ᐊᐅᓚᑕᐅᔪᓂᒃ ᐱᔅᓇᓯᓂᒃ ᓄᓇᕕᒻᒥ. ᒪᑭᕝᕕᑯᑦ ᑫᓪᓗᑐᐃᓲᖑᕗᑦ ᐊᓯᐅᑎᑦᓯᑌᓕᒪᓂᕐᒥᒃ ᐃᓄᐃᑦ ᐃᓗᕐᕈᓯᖓᓂᒃ ᐅᖃᐅᓯᖓᓂᓪᓗ ᐊᒻᒪᓗᑦᑕᐅᖅ ᖃᓄᐃᖏᓯᐊᕐᓂᖏᓐᓂᒃ, ᑲᒪᒋᔭᐅᑦᓯᐊᓂᖏᓐᓂᓗ, ᐊᑦᓱᐃᑑᑎᑦᓯᑌᓕᓂᕐᒥᓗ ᐃᓕᓐᓂᐊᓂᖏᓐᓂᓗ ᐃᓄᐃᑦ ᓄᓇᕕᐅᑉ ᓄᓇᓕᖏᓐᓂ.