ᑐᓴᕋᑦᓴᓂᐅᑎᑎᒍᑦ ᑐᓴᕐᑕᐅᑎᑦᓯᒍᑏᑦ
ᔫᓂ 17, 2020 – ᑰᒃᔪᐊᖅ, ᓄᓇᕕᒃ – ᒪᑭᕝᕕᒃ ᐱᓇᓱᒐᖃᕐᕕᒃ, ᐃᓄᑐᐃᓐᓀᑦ ᐱᔪᓐᓇᐅᑎᖃᕐᑎᑕᐅᒍᑎᖏᓐᓅᓕᖓᑦᓱᓂ ᐱᓇᓱᒐᖃᕐᕕᐅᔪᖅ ᐊᑕᕐᖑᓯᕐᕕᖃᓕᕐᐳᖅ ᑯᐯᒃ ᑲᕙᒪᖓᓂᒃ ᐃᓘᓐᓈᓂᒃ ᐃᕐᖃᑐᐃᕕᑎᒍᑦ ᓄᓇᕕᒻᒥᐅᓂᒃ ᐱᑦᔪᔨᒍᑎᒋᓲᒥᓐᓂᒃ ᐃᑐᑦᑎᓯᐊᓚᐅᑲᓪᓗᒍ ᐋᕐᕿᒋᐊᕆᖁᔨᓕᕐᓱᓂ, ᐃᓚᐅᖃᑕᐅᑎᓪᓗᒋᑦ ᐅᕕᒃᑲᓂᒃ ᓴᐳᑦᔨᓯᒪᓂᕐᓄᑦ ᐱᑦᔪᔨᒍᑎᐅᕙᑦᑐ, ᐊᒻᒪᓗ ᐳᓕᓰᓂᒃ ᓄᓇᕕᒻᒥ ᐱᑦᔪᔭᖃᕐᐸᑐᓂᒃ – ᑲᑎᕕᒃ ᓄᓇᓕᓕᒫᑦ ᐳᓖᓯᖏᓐᓂᒃ.
“ᓈᒻᒪᓴᖕᖏᓂᕐᒥᒃ ᐱᑦᔪᑎᖃᕐᓱᑎᒃ ᐊᒥᓱᐃᓄᑦ ᑲᑎᓂᐅᖃᑦᑕᑐᑦ ᓯᓚᕐᔪᐊᒥ ᓄᐃᑕᑎᑦᓯᓂᖃᕋᓱᑉᐳᑦ ᐱᓇᓱᒐᖃᕐᕕᖁᑎᑎᒍᑦ ᐃᓅᖃᑎᑦᓴᔭᕆᖕᖏᑕᒥᓐᓂᒃ ᐊᑭᕋᕐᑐᓂᐅᓲᓂᒃ ᐊᑑᑎᔭᐅᕙᑦᑐᓂᒃ ᐃᕐᖃᑐᐃᕕᓕᕆᒍᑎᓅᓕᖓᔪᑎᒍᑦ ᑕᒪᒃᑯᐊ ᐱᑕᖃᕐᒪᑕ ᐊᑑᑎᔭᐅᕙᑦᓱᑎᓪᓗ ᓄᓇᕕᒻᒥ ᐅᕙᓐᓄᑦ ᐋᓐᓂᓇᒻᒪᕆᑦᓱᑎᒃ,” ᐅᖃᕐᑐᖅ ᒪᑭᕝᕕᐅᑉ ᐊᖓᔪᕐᖄᒪᕆᖓ ᓵᓕ ᒍᐊᑦ. “ᐱᓇᓱᒐᖃᕐᕕᖁᑎᑎᒎᕐᑐᑦ ᐋᕐᕿᒋᐊᕆᓃᑦ ᐊᐅᓚᑕᐅᒍᑎᖏᓐᓂᒃ ᐃᕐᖃᑐᐃᕕᓕᕆᒍᑎᐅᓲᓄᓕᖓᔪᑦ ᐊᒻᒪᓗ ᐳᓕᓰᑦ ᐱᓂᐊᕐᓂᕆᕙᑦᑕᖏᑦ ᐊᑯᓂᐊᓗᒃ ᐋᕐᕿᒋᐊᕋᑦᓴᑐᖄᓗᓕᕐᒪᑕ. ᐊᒥᓱᐊᓘᓕᕐᑐᑦ ᑐᓴᕐᑎᓯᒍᑎᓕᐊᖑᕙᑦᑐᑦ ᑭᖑᓕᕇᑦᓱᑎᒃ ᐊᑕᓐᓂᐅᕈᑎᑕᖃᖃᑦᑕᓯᒪᓕᕐᖁᑦ ᐋᕐᕿᒋᐊᕆᒍᑎᖃᖁᔨᑦᓱᑎᒃ. ᑭᖑᓕᕇᑦ ᖃᐅᔨᓴᕐᓂᐅᖃᑦᑕᓯᒪᔪᑦ ᑕᑯᑦᓴᐅᑎᑦᓯᓯᐊᕐᑐᑦ ᓈᒻᒪᖏᑦᑐᓂᒃ ᑕᒪᖏᓐᓂ ᐱᑦᔪᔨᕖᓐᓂ ᐃᓄᑐᐃᓐᓀᑦ ᓯᕐᓕᕿᑎᑕᐅᒍᑎᖃᕐᐸᑐᑦ ᐱᑦᓯᐊᑕᐅᖕᖏᒍᑎᓂᒃ ᑕᒪᖏᓐᓂ ᐱᑦᔪᔨᒍᑎᓕᐊᖑᓯᒪᔫᓐᓂ ᐃᓗᓐᓈᒍᑦ ᐅᖁᒣᓪᓕᐅᑎᑕᐅᑦᓱᑎᒃ ᐃᓕᓐᓂᐊᓂᒃᑯᑦ ᑎᑭᑦᓱᑎᒃ ᐃᓗᓯᓕᕆᔭᐅᓂᕐᓄᑦ ᓄᓇᓖᓪᓗ ᐊᐅᓚᑕᐅᓂᖏᓐᓄᑦ. ᐅᕕᒃᑲᓂᒃ ᓴᐳᑦᔨᓯᒪᔨᐅᓂᐊᕐᑐᑦ ᓄᐃᑕᐅᓚᐅᕐᓯᒪᒻᒥᔪᑦ ᓴᐳᒻᒥᓂᐊᕐᓱᑎᒃ ᐃᓄᑐᐃᓐᓀᑦ ᕿᑐᕐᖓᖏᓐᓂᒃ ᑭᓯᐊᓂ ᐱᔭᖃᖔᕐᓯᒪᕗᑦ ᓯᖁᑦᑎᕆᒻᒪᕆᓐᓂᒥᒃ ᐃᓚᒌᓂᒃ ᓯᖁᒥᑦᓯᓱᑎᓪᓗ ᐱᔪᓐᓇᐅᑎᖏᓐᓂᒃ ᕿᑐᕐᖓᐅᔪᓪᓗ ᕿᑐᕐᖓᖃᕐᑐᓗ ᑌᒣᓘᓕᕐᑎᓗᒋᑦ ᑯᐯᒃ ᑲᕙᒪᖓ ᖃᐅᔨᒪᖕᖏᓯᕐᑐᑐᐃᓐᓇᓱᓂ ᑲᔪᓯᑎᑦᓯᑐᐃᓐᓇᑎᓪᓗᒍ ᑕᒪᒃᑯᓂᖓ ᐱᑦᓯᐊᖏᓐᓂᐊᓘᓕᕐᑐᓂᒃ.”
ᒪᑭᕝᕕᒃ ᖃᐅᔨᒪᑦᓯᐊᖏᓐᓇᕋᓱᖃᑦᑕᓚᖓᕗᖅ ᑲᒪᓇᓱᖏᓐᓇᓗᓂᓗ ᑯᐯᒃ ᑲᕙᒪᒃᑯᑦ ᐊᖓᔪᕐᖄᖓᓂᒃ ᓗᑰᒥᒃ ᓴᕐᕿᑎᕐᖃᒥᓚᐅᕐᑕᖓᓂᓪᓗ ᐱᓇᓱᖃᑎᒌᕝᕕᐅᓚᖓᔪᒥᒃ ᑲᒪᒋᔭᖃᓚᖓᑦᓱᓂ ᐱᓇᓱᒐᖃᕐᕕᖁᑎᑎᒍᑦ ᐃᓅᖃᑎᑦᓴᔭᕆᖕᖏᑕᒥᓂᒃ ᐱᓗᑲᓐᓂᓂᐅᓲᓂᒃ ᑕᒫᓂ ᑯᐯᒃ ᓄᓇᓕᕐᓚᖓᓂ ᐱᓗᐊᕐᑐᒥ ᓄᓇᓕᑐᖃᑦᓴᔭᓂᒃ ᐃᓄᓐᓂᒃ ᑲᒪᒃᑭᓗᒍᑎᐅᓲᓂᒃ. ᑖᒃᑯᐊ ᐱᓇᓱᖃᑎᒌᒍᑎᖃᓚᖓᔪᑦ ᐱᒋᐊᕋᑕᕋᑎᓪᓗᓃᑦ ᐃᓱᐃᓪᓕᖓᓂᕐᑕᖃᓕᕇᕐᑐᑦ ᐱᑦᔪᑎᖃᕐᓱᑎᒃ ᐃᓄᑐᐃᓐᓀᑦ ᐃᓚᐅᑎᑕᐅᖕᖏᓂᒃᑯᑦ ᓂᐱᖃᕐᑎᑕᐅᖕᖏᓂᖓᓐᓂᒃ ᑖᒃᑯᓇᓂ ᐱᓇᓱᖃᑎᒌᒍᑎᖃᓯᔪᓂ.
ᓄᓇᕕᒃ ᐊᑐᐃᓐᓇᐅᓕᕐᑐᖅ ᐃᓄᑐᐃᓐᓇᒥᒃ ᓄᓇᕕᒻᒥᐅᔭᒥᒃ ᓯᕗᓕᕐᑎᖃᕐᓂᓴᒥᓄᑦ ᑲᑎᕕᒃ ᓄᓇᓕᓕᒫᑦ ᐳᓖᓯᖏᓐᓂ; ᓄᓇᕕᒃ ᑭᖕᖒᒪᑦᓯᔪᖅ ᐅᕕᒃᑲᓂᒃ ᓴᐳᑦᔨᓯᒪᓂᕐᒥᒃ ᐱᑦᔪᔨᒍᑎᖃᕐᓂᐊᑐᓂᒃ ᓄᐃᑕᑎᑦᓯᓂᖃᑦᓯᐊᓗᑎᒃ ᐃᓄᑐᐃᓐᓀᑦ ᐃᓪᓕᓇᕐᑐᖁᑎᖏᓐᓂᒃ, ᐃᓗᕐᖁᓯᖓᓂᒃ ᐊᒻᒪᓗ ᐅᖃᐅᓯᖓᓂᒃ ᐊᒻᒪᓗ ᐃᕐᖃᑐᐃᕕᓕᕆᓂᕐᓅᓕᖓᔪᓕᕆᓂᕐᒥᒃ ᐱᑦᔪᔨᒍᑎᑖᕐᓗᓂ ᐱᓇᓱᒍᑦᔨᓯᐊᕐᓂᐊᑐᒥᒃ ᑕᕐᕋᒥᐅᓂᒃ ᐱᔪᓐᓇᕕᖃᕐᕕᐅᓗᓂᓘᕐᓗᓂ ᐃᓄᑐᐃᓐᓇᓄᑦ ᐱᔪᓐᓇᐅᑎᖃᕐᑎᑕᐅᒍᑎᒥᓐᓂᒃ ᐊᑐᕈᓐᓇᓂᑦᓴᖏᓐᓂᒃ.
ᐃᓄᑐᐃᓐᓇᑎᒍᑦ ᖃᐅᔨᓴᕐᓂᒥᒃ ᐱᓇᓱᑦᓯᒪᒻᒥᔪᑦ ᑐᑭᓯᓂᐊᕐᓱᑎᒃ ᐃᕐᖃᑐᐃᕕᓕᕆᓂᕐᓅᓕᖓᔪᓕᕆᓂᕐᒥᒃ ᓄᓇᕕᒻᒥ ᑕᒪᓐᓇ ᐊᑑᑎᔭᐅᓚᐅᕐᓯᒪᔪᖅ ᐊᕐᕌᒍᐃᑦ 1990-ᓃᑦᑐᑦ ᐱᕙᓪᓕᐊᓯᕐᖃᒥᐅᑎᓪᓗᒋᑦ. ᐃᓄᐃᑦ ᐃᕐᖃᑐᐃᕕᓕᕆᓂᕐᓄᑦ ᑲᑎᒪᔨᖏᑦ ᓄᐃᑦᓯᒍᑎᖃᕐᓯᒪᒻᒥᔪᑦ ᑭᖑᓪᓕᐹᖏᓐᓂᒃ ᑐᓴᕐᑎᓯᒍᑎᒥ ᑐᓴᕐᑕᐅᑎᑦᓯᓱᑎᒃ ᓱᓇᓂᒃ ᖃᐅᔨᓐᓂᒪᖔᕐᒥᒃ 1993-ᖑᑎᓪᓗᒍ ᐊᑦᓯᕋᐅᑎᖃᓚᐅᕐᓯᒪᔪᓂᒃ ᐊᕐᖁᓯᐅᕐᓂᖅ ᓯᕗᓂᑦᓴᓯᐊᖑᓂᕐᓴᒧᑦ. ᑖᒃᑯᐊ ᑐᓴᕐᑎᓯᒍᑎᓕᐊᖏᑦ ᐃᓗᓕᖃᓚᐅᕐᓯᒪᔪᑦ 30-ᓂᒃ ᖃᓄᐃᓕᒋᐊᕈᑎᑦᓴᐅᖁᔭᐅᔪᓂᒃ ᐋᕐᕿᑕᐅᒪᓂᖃᕐᓱᑎᒃ ᓯᑕᒪᐅᔪᕐᑎᓂᒃ ᓲᕐᓗ ᐅᑯᓂᖓ ᐊᑦᓯᕋᐅᑎᖃᔪᕐᑐᓂᒃ: ᐱᓂᕐᓗᓂᖃᕐᑎᓯᑦᑌᓕᓂᕐᒥᒃ ᖃᓄᐃᓘᕈᑎᑦᓭᑦ; ᐃᓄᑐᐃᓐᓀᑦ ᐱᐅᓯᑐᖃᕐᒥᒍᑦ ᐱᖁᔭᖏᓪᓗ ᐱᐅᓯᑐᖃᖏᓪᓗ ᐃᓕᖓᔪᑦ ᐱᖁᔭᓕᕆᓂᕐᓅᓕᖓᑦᓱᑎᒃ ᐃᕐᖃᑐᐃᕕᓕᕆᓂᕐᓅᓕᖓᑦᓱᑎᓪᓘᑐᓄᑦ; ᐱᖁᔦᑦ ᒪᓕᑦᑕᐅᑎᑕᐅᓂᖏᑦ (ᐳᓕᓰᑦ); ᐱᖁᔭᑎᒎᕐᑐᓂᒃ ᑭᒡᒐᑐᕐᑕᐅᒍᑎᖃᕐᓃᑦ; ᐃᕐᖃᑐᐃᕖᑦ ᐱᑦᔪᔨᒍᑎᖏᑦ ᐊᒻᒪᓗ ᐊᓯᖏᑎᒍᑦ ᐹᕐᓯᖓᐅᑎᒍᑎᖃᓕᕐᑐᓂᒃ ᐋᕐᕿᒍᑎᑦᓴᓯᐅᕆᓃᑦ; ᐸᕐᓇᓀᕐᓯᕕᓐᓂᒃ ᐱᑦᔪᔨᖑᑎᖃᕐᓃᓗ ᐸᕐᓇᓀᕐᓯᕖᓪᓗ ᐃᓱᐊᖁᑎᖏᑦ; ᐸᕐᓇᓀᕐᑕᐅᓯᒪᓂᐅᑉ ᑭᖑᓂᐊᓂ ᐊᒻᒪᓗ ᐸᕐᓇᓀᕐᑕᐅᓯᒪᓂᐅ ᐊᓯᐊᒍᑦ ᐱᒐᓱᐊᕈᑎᐅᒍᓐᓇᑐᑦ.
ᖃᒻᒥᐅᓂᕐᓴᑯᑦ, ᓯᑉᑎᒻᐱᕆ 2019-ᖑᑎᓪᓗᒍ, ᐃᕐᖃᑐᐃᔨᕕᓂᖅ ᕕᐋᓐ ᑐᑭᓯᓂᐊᕐᓂᖃᓚᐅᔪᒻᒥᔪᖅ ᐃᓄᓕᒫᓄᓕᖓᔪᓂᒃ ᑐᓴᕐᑎᓯᒍᑎᒥ ᑭᖑᓪᓕᐹᖏᓐᓂᒃ ᐃᓕᖓᔪᓂᒃ ᑯᐯᒃ ᑲᕙᒪᒃᑯᑦ ᐃᓄᓕᒫᓂᒃ ᐱᑦᔪᔨᒍᑎᖏᓐᓄᑦ ᐊᒻᒪᓗ ᓄᓇᓕᑐᙯᑦ ᓄᓇᓕᖏᓐᓄᑦ ᑯᐯᒃᒥ. ᑖᒃᑯᐊ ᑐᑭᓯᓂᐊᕐᑐᑦ ᓯᕗᓕᕐᑕᐅᓚᐅᔪᕗᑦ ᔮᒃ ᕕᐋᓐᒧᑦ, ᑯᐯᒃᒥ ᐃᕐᖃᑐᐃᔨᐅᖃᑦᑕᓯᒪᔪᒧᑦ ᐊᕐᕌᒍᓂ ᐅᓄᕐᑐᓂ ᐊᑑᑎᓕᓂᐅᑦᓱᓂ ᓄᓇᕕᒻᒥ ᐃᕐᖃᑐᐃᕕᓕᕆᓂᕐᒥᒃ ᐱᑦᔪᔨᒍᑎᓂᒃ. ᑖᑦᓱᒪ ᐊᖑᑎᐅᑉ ᑐᓴᕐᑎᓯᒍᑎᓕᐊᖏᑦ ᑎᓕᐅᕆᒍᑎᑕᖃᓚᐅᔪᔪᑦ 142-ᓂᒃ, ᐃᓚᐅᑎᓪᓗᒋᑦ ᐃᓕᖓᓂᖃᓪᓗᑯᐊᐱᑦᑐᑦ ᐳᓖᓰᑦ ᐱᓇᓱᒍᓯᖏᓐᓄ ᐊᒻᒪᓗ ᐃᕐᖃᑐᐃᕕᑎᒎᕐᓂᓂᒃ ᐱᑦᔪᔨᒍᑎᐅᔪᑦ.
ᐅᐃᒍᖃᕐᒥᔪᑦ, ᐊᕐᕌᒍᓕᒫᑉ ᐅᖓᑖᓄᐊᐱᒃ ᐊᓂᒍᕐᓯᒪᓕᕐᒥᔪᖅ ᑯᐯᒃᒥ ᐱᖁᔭᓕᕆᔩᑦ ᑲᑐᑦᔨᖃᑎᒌᕝᕕᖓᑕ, ᒫᑦᔨ 2019-ᖑᑎᓪᓗᒍ ᐊᑕᓐᓂᐅᕈᑎᖃᕐᓂᕆᓚᐅᔪᔭᖓᑦ ᑯᐯᒃ ᑲᕙᒪᒃᑯᓂᒃ ᐱᓇᓱᐊᖁᔨᑦᓱᓂ ᐃᕐᖃᑐᐃᕕᓕᕆᐅᑎᑎᒍᑦ ᐱᓇᓱᒍᑎᐅᔪᑦ ᓈᒻᒪᓈᕐᓯᒪᓱᖑᖕᖏᓂᖏᓐᓂᒃ ᓄᓇᕕᒻᒥ.
“ᑯᐯᒃ ᑲᕙᒪᒃᑯᑦ ᐊᖓᔪᕐᖄᒪᕆᖓᑦ ᕙᕋᓐᓱᐊ ᓗᑰ ᑲᕙᒪᖁᑎᒥᓂᒃ ᐃᓛᓂᐅᖕᖏᑑᕐᑎᓯᓂᖃᓚᐅᔪᕗᖅ ᓄᓇᓕᑐᖃᑦᓴᔭᓄᑦ ᐃᓅᖃᑎᒌᑦᑐᓄᑦ ᑯᐯᒃᒥ ᐃᓚᐅᑎᓪᓗᒋᑦ ᐃᓄᑐᐃᓐᓀᑦ,” ᐅᖃᕐᑐᖅ ᓵᓕ ᒍᐊᑦ. “ᐊᕐᕌᓂ ᐅᖃᓚᐅᔪᔪᖅ ᑯᐯᒃ ᑲᕙᒪᒃᑯᑦ ᐅᖃᕐᕕᒪᕆᖓᓐᓂ ᐃᒣᓕᑦᓱᓂ, ‘ᑯᐯᒃ ᓄᓇᓕᕐᔪᐊᖓ ᐱᔭᖃᕐᓯᒪᖕᖏᓚᖅ ᐃᓕᑦᓯᓂᒃ ᐱᓇᓱᒍᑦᔨᒍᑎᒋᒋᐊᓕᒻᒥᓂᒃ,’ ᐅᕙᑦᑎᓄᓪᓗ ᐃᓄᑐᐃᓐᓇᓄᑦ ᐃᓱᒪᒋᔪᓐᓀᕕᐅᒍᒪᓚᐅᔪᕗᖅ. ᐊᖓᔪᖄᒪᕆᒃ ᓗᑰ ᐃᓘᓐᓇᑕ ᐅᖁᒣᑦᑐᑯᕐᓱᑕ ᐃᓅᕗᒍᑦ. ᖃᓂᒪᓐᓇᐅᑉ ᐃᕐᐸᓯᒪᓂᖓ, ᑌᒃᑯᐊᓗ ᐃᓄᒐᓴᑦᔪᐊᑦ ᐱᓱᖃᑎᒌᖃᑦᑕᑐᑦ ᐱᑦᔪᑎᖃᕐᓱᑎᒃ ᐱᓇᓱᒐᖃᕐᕕᖁᑎᑎᒍᑦ ᐃᓅᖃᑎᑦᓴᔭᕆᖕᖏᑕᒥᓐᓂᒃ ᐊᑭᕋᕐᑐᓂᐅᓲᓂᒃ ᐊᑑᑎᔭᐅᕙᑦᑐᓂᒃ ᐳᓖᓰᑦ ᐱᓇᓱᕝᕕᖏᓐᓂ ᑖᒃᑯᓱᑎᓗᐊᖕᖑᐊᖅ ᑕᒪᑐᒥᖓ ᐊᑭᕋᕐᑐᓂᕐᒥᒃ ᓴᕐᕿᑎᑦᓯᓚᕆᒻᒪᑕ, ᐃᓕᓐᓂᒃ ᐱᓇᓱᖃᑎᖃᕈᒪᕗᒍᑦ ᐳᓖᓰᑦ ᐱᓀᓗᑕᖏᓐᓂᒃ ᐃᕐᖃᑐᐃᕕᓕᕆᓂᕐᓅᓕᖓᔪᓂᓪᓗ ᓄᓇᕕᒻᒥ ᐱᓇᓱᖃᑎᒌᒍᑎᖃᕐᓗᑕ.”
ᑖᒃᑯᐊ ᐅᖃᖃᑎᒋᒍᑕᐅᓛᕐᑐᑦ ᑕᕐᕿᐅᓚᖓᔪᒥ ᒪᑭᕝᕕᐅᑉ ᐊᕐᕌᒍᑕᒫᕐᓯᐅᑎᒥᓂᒃ ᑲᑎᖕᖓᑎᑦᓯᓂᕆᓛᕐᑕᖓᓂ.
-30-
ᑐᑭᓯᒋᐊᒃᑲᓂᕐᕕᓴᖅ:
ᑳᓴᓐ ᑕᒍᕐᓈᖅ
ᑐᓴᖃᑦᑕᐅᑎᒍᑎᓕᕆᕕᒻᒥ ᑐᑭᒧᐊᑦᑎᓯᔨ
ᒪᑭᕝᕕᒥ
www.makivik.org
ᒪᑭᕝᕕᒃ ᓄᓇᓂᒃ ᐃᓐᓄᐃᓯᒪᓇᓱᒍᑎᓄᑦ ᐱᓇᓱᕝᕕᖁᑎᐅᕗᖅ ᑎᓕᔭᐅᒪᒍᑎᖃᕐᓱᓂ ᑲᒪᔨᐅᓂᐊᕐᓂᒥᓂᒃ ᕿᒻᒪᖁᓯᐅᑎᐅᑦᓱᑎᒃ ᑮᓇᐅᔭᖁᑎᑖᕆᓯᒪᔭᖏᓐᓂᒃ ᓄᓇᕕᐅᑉ ᐃᓄᑐᐃᓐᓇᖏᑕ ᐱᑕᖃᕐᑎᑕᐅᒍᑎᖃᕐᓱᑎᒃ ᔦᒥᓯ ᐯ ᐊᒻᒪᓗ ᑯᐯᒃ ᑕᕐᕋᖓᑕ ᐊᖏᖃᑎᒌᒍᑎᖏᓐᓂᑦ. ᒪᑭᕝᕕᐅᑉ ᐱᔭᑦᓴᖁᑎᖏᑦ ᐃᓚᖃᕐᐳᑦ ᐊᐅᓚᑦᓯᔨᐅᓂᕐᒥᒃ ᑮᓇᐅᔭᓕᐅᕋᓱᒍᑎᖃᕐᓂᒥᓪᓗ ᑖᒃᑯᓂᖓ ᑮᓇᐅᔭᓂᒃ ᖁᕝᕙᑎᕆᔨᐅᑦᓱᓂᓗ ᑮᓇᐅᔭᑎᒍᑦ ᒪᑭᑕᒐᓱᒍᑎᓂᒃ ᐱᑕᖃᕐᑎᓯᔨᒋᔭᐅᑦᓱᓂ ᐃᑲᔪᕐᓯᒪᔨᐅᓂᕐᒥᒍᑦ ᓴᕐᕿᑎᑕᐅᓇᓱᓕᕐᒪᑕ ᐃᓄᑐᐃᓐᓇᓄᑦ ᐃᖏᕐᕋᑎᑕᐅᓚᖓᑦᓱᑎᒃ ᐱᓇᓱᒐᖁᑕᐅᔪᓂᒃ ᓄᓇᕕᖕᒥ. ᒪᑭᕝᕕᒃ ᖁᕝᕙᑎᕆᔨᐅᕗᖅ ᐊᓯᐅᑎᑦᓯᑌᓕᓂᕐᓄᑦ ᐃᓄᐃᑦ ᐃᓗᕐᖁᓯᖓᓐᓂᒃ ᐅᖃᐅᓯᖓᓐᓂᓗ ᐃᓚᐅᒻᒥᑎᓪᓗᒋᑦ ᐃᓗᓯᓕᕆᔭᐅᓂᑦᓴᖏᓪᓗ, ᐊᑦᓱᐃᓂᑦᓴᖏᓪᓗ, ᐊᔪᕐᓴᕈᓐᓀᓂᑦᓴᖏᓪᓗ, ᐊᒻᒪᓗ ᐃᓕᓐᓂᐊᑎᑕᐅᒋᐊᖃᕐᓂᖏᓐᓂᒃ ᐃᓄᑐᐃᓐᓀᑦ ᓄᓇᓕᒻᒥᓂ.