ᐱᕙᓪᓕᐊᔪᐃᑦ ᓄᐃᑕᐅᓂᖏᑦ
ᑰᑦᔪᐊᖅ – ᐁᕆᓕ 2, 2026 – ᒪᑭᕝᕕᑯᑦ ᑕᑯᓐᓇᑐᕕᓃᑦ ᖃᒻᒥᓂᑕᕐᓂᒃ ᐱᕙᓪᓕᐊᔪᓂᒃ ᓄᐃᑕᐅᔪᕕᓂᕐᓂᒃ, ᐃᓚᒋᔭᐅᑎᓪᓗᒍ ᑐᓴᕐᑎᓯᐅᑎᖏᑦ Fifth Estate-ᑯᑦ, ᐱᑦᔪᑎᒋᑦᓱᒋᑦ ᒪᓂᔭᐅᒪᔪᖅ Strange Lake ᑕᑯᔭᐅᑲᓪᓚᖃᔭᖕᖏᑐᓂᒃ ᓄᓇᕐᔪᐊᒥ ᐱᓇᓱᐊᕐᑕᐅᒍᑎᖓᓂᒃ ᑑᕐᙰᑦ ᑭᑭᐊᑦᑯᓄᑦ.
Strange Lake ᐱᓇᓱᐊᕐᑕᐅᓂᖓ ᓄᓇᕕᒻᒦᑐᖅ ᓱᕐᕃᓂᖃᕐᓱᓂᓪᓗ ᓄᓇᓂᒃ ᐃᓕᖓᑎᑕᐅᔪᓂᒃ ᔦᒥᓯ ᐯ ᐊᒻᒪᓗ ᑯᐯᒃ ᑕᕐᕋᖓᑕ ᐊᖏᖃᑎᒌᒍᑎᖓᓄᑦ, ᐃᓚᐅᑎᓪᓗᒋᑦ ᐊᕕᑦᑐᓯᒪᔪᑦ III ᓄᓀᑦ ᐃᓄᐃᑦ ᐱᔪᓐᓇᐅᑎᖏᑦ ᐃᓕᑕᕆᔭᐅᓯᒪᓂᓖᑦ ᓴᐳᑎᔭᐅᑦᓱᑎᓪᓗ. ᒪᑭᕝᕕᑯᑦ ᑎᓕᔭᐅᒪᒍᑎᓖᑦ ᑭᒡᒐᑐᕐᓂᒥᒃ ᐃᓄᓐᓂᒃ ᓄᓇᕕᒻᒥᐅᓂᒃ ᐊᒻᒪᓗ ᓴᐳᑦᔨᓂᕐᒥᒃ ᖁᕝᕙᒋᐊᕆᖃᑦᑕᓂᕐᒥᓗ ᐃᓄᐃᑦ ᐱᔪᓐᓇᐅᑎᖏᓐᓂᒃ ᐱᒍᒪᔭᖏᓐᓂᓗ, ᐃᓚᒋᔭᐅᑎᓪᓗᒋᑦ ᐊᑦᑐᐊᓂᓖᑦ ᓄᓇᐅᑉ ᐊᑐᕐᑕᐅᓂᖓᓄᑦ, ᐱᑦᓴᑕᖃᕐᓂᖏᓐᓄᑦ, ᐱᕙᓪᓕᐊᔭᐅᓂᖏᓐᓄᓗ.
ᔦᒥᓯ ᐯ ᐊᒻᒪᓗ ᑯᐯᒃ ᑕᕐᕋᖓᑕ ᐊᖏᖃᑎᒌᒍᑎᖓ ᓄᕐᖃᒋᐊᕈᑎᓕᕕᓃᑦ ᑐᑭᑖᕆᓂᕐᓂᒃ ᓄᐃᓚᕿᔭᐅᓯᒪᔪᕕᓂᕐᓂᒃ ᐱᕙᓪᓕᐊᔭᐅᓂᖏᓐᓄᑦ ᑲᒪᒋᔭᐅᒍᑎᖏᓐᓄᑦ ᐃᓄᐃᑦ ᓄᓇᖏᑦ ᐃᓄᐃᑦ ᐃᓚᐅᑎᑕᐅᑎᓐᓇᒋᑦ. ᐋᕐᕿᓱᐃᓯᒪᔪᖅ ᑲᑎᖕᖓᔪᓂᒃ ᐱᔪᓐᓇᐅᑎᓂᒃ ᐊᒻᒪᓗ ᑐᖕᖓᕕᒻᒥᑦ ᐊᐅᓚᑦᓯᓂᖃᕐᑐᒥᒃ ᖃᓄᖅ ᐱᕙᓪᓕᐊᔭᐅᓂᓕᕆᓂᖓ ᐊᑑᑎᔭᐅᓚᖓᓂᖓᓂᒃ ᓄᓇᕕᒻᒥ. ᑌᒃᑯᐊ ᐱᔪᓐᓇᐅᑏᑦ ᐊᑐᕐᓂᓖᑦ ᑐᕃᓐᓇᑐᒥᒃ ᑖᑦᓱᒧᖓ ᐱᓇᓱᐊᒐᑦᓴᒧᑦ.
ᒪᑭᕝᕕᑯᑦ ᑲᑎᓯᓯᒪᓕᕐᑐᑦ ᓄᓇᓕᖓᓂᒃ ᑲᖏᕐᓱᐊᓗᑦᔪᐊᑉ ᑕᒐ ᑕᒪᒋᓐᓂᒃ ᑑᕐᙰᑦ ᑭᑭᐊᑦ (Torngat Metals) ᐊᒻᒪᓗ ᑲᕙᒪᐃᑦ ᐊᖓᔪᕐᖃᐅᑎᖁᑎᖏᓐᓂᒃ ᐱᑦᔪᑎᒋᓗᒍ ᐊᔪᒉᑦᑑᑉ ᑕᓯᖓᑕ ᐱᓇᓱᐊᕐᑕᐅᒍᑎᖓ. ᖃᓄᐃᓕᖓᓂᕆᔭᕗᑦ ᓂᑦᑕᕿᑦᓯᐊᑐᖅ ᑲᔪᓯᓂᖃᑦᓯᐊᓱᓂᓗ: ᐱᓇᓱᐊᕈᑕᐅᓂᖓ ᑲᔪᓯᕐᖃᔭᖕᖏᑐᖅ ᓱᓇᒥᑦᑐᒥ ᐃᓚᒋᔭᐅᖕᖏᑐᐊᕐᐸᑕ ᒪᑭᕝᕕᑯᑦ, ᐱᔭᕇᕐᑕᐅᓯᒪᖕᖏᐸᑕ ᐊᕙᑎᓕᕆᓂᕐᒨᓕᖓᔪᑦ ᐊᒻᒪᓗ ᐃᓅᖃᑎᒌᓄᑦ ᑲᒪᒋᔭᐅᒍᑎᐅᔪᑦ, ᐊᒻᒪᓗ ᓂᑦᑕᓯᐊᕐᑐᒥᒃ ᓴᐳᑎᔭᐅᓂᖃᕐᐸᑦ ᑲᖏᕐᓱᐊᓗᑦᔪᐊᖅ.
“ᐊᕐᖁᑎᑦᓴᖃᖕᖏᑐᖅ ᐱᕙᓪᓕᐊᓂᓕᕆᓂᕐᒧᑦ ᓄᓇᕕᒻᒥᑦ ᖄᖐᓐᓀᔪᓂᒃ ᐃᓄᐃᑦ ᐱᔪᓐᓇᐅᑎᖏᓐᓂᒃ ᐅᕝᕙᓗᓘᓐᓃᑦ ᐃᓄᐃᑦ ᑐᑭᑖᕆᒍᓐᓇᓂᖏᓐᓂᒃ. ᓄᕐᖃᖓᑎᑦᓯᑫᓐᓇᓂᕆᔭᖓ ᐅᔭᕋᓐᓂᐊᓃᑦ ᐱᕙᓪᓕᐊᔭᐅᓂᖏᓐᓄᑦ ᑲᒪᒋᔭᐅᓂᖃᓚᐅᕐᑐᖅ ᒪᑭᕝᕕᑯᓐᓄᑦ ᔪᓓ 2023-ᖑᑎᓪᓗᒍ ᐊᑕᑎᑕᐅᖏᓐᓈᑐᖅ, ᐊᒻᒪᓗ ᐱᓇᓱᐊᕈᑕᐅᔪᑦ ᑲᔪᓯᐅᑦᔭᐅᖃᔭᖕᖏᑐᑦ ᐊᑑᑎᔭᐅᒋᐊᓖᑦ ᐊᑑᑎᔭᐅᕋᑕᕐᑎᓇᒋᑦ, ‘’ᐅᖃᓚᐅᕐᑐᖅ ᐱᑕ ᐋᑕᒥ, ᐊᖓᔪᕐᖄᖓ ᒪᑭᕝᕕᑯᑦ.
ᖃᒻᒥᑯᑦ ᑐᓴᕐᑎᓯᐅᑏᑦ, ᐃᓚᐅᑎᓪᓗᒋᑦ ᑲᕙᒪᑐᖃᒃᑯᑦ ᖃᓄᐃᓕᖓᑎᑦᓯᓂᖏᑦ, ᓄᐃᑦᓯᓯᒪᔪᖅ ᐃᓱᒪᒍᓯᕐᒥᒃ ᑖᓐᓇ ᐱᓇᓱᐊᕐᑕᐅᔪᖅ ᐱᕙᓪᓕᐊᓕᕆᐊᖓᓂᒃ ᐅᖓᑖᓄᑦ. ᑖᑦᓱᒪᐅᑉ ᐃᓱᒪᒋᔭᐅᓂᖓ ᓈᒻᒪᓈᖕᖏᑐᖅ ᐊᒻᒪᓗ ᐱᓯᒪᑦᓱᓂ ᓈᒻᒪᓈᖕᖏᑐᓂᒃ ᖃᓄᐃᓕᖓᐅᓯᖃᕐᑎᓯᓂᕐᒥᒃ ᐱᓇᓱᐊᕐᑕᐅᒍᑎᐅᔪᒥᒃ ᑲᔪᓯᐅᑦᔭᐅᒋᐊᖓᓂᒃ ᑮᓇᐅᔭᖃᕐᑎᑕᐅᒍᑎᖓᒍᑦ, ᓄᓇᓕᐅᑉ ᐊᑐᕐᐸᑕᖏᑦ ᐱᕙᓪᓕᐊᔭᐅᒍᑎᖏᓐᓄᑦ, ᐊᒻᒪᓗ ᐃᓚᒋᔭᐅᑎᑦᓯᓂᒃᑯᑦ ᐊᑦᔨᒌᖕᖏᑐᓂᒃ ᐱᓇᓱᖃᑎᒌᑦᑐᓂᒃ. ᐱᓇᓱᐊᕐᑕᐅᓂᖓ ᓱᕐᕃᓯᒪᓂᕆᔭᖓ ᓄᓇᕕᒻᒥ ᓯᕗᒧᐊᕐᑎᑕᐅᕐᖃᔭᖕᖏᑐᖅ, ᓇᓪᓕᐊᒍᑐᐃᓐᓇᖅ ᑐᑭᖃᓕᕐᑎᑐᒃᑯᑦ, ᒪᑭᕝᕕᑯᑦ ᐃᓚᒋᔭᐅᑎᓐᓇᒋᑦ.
ᓄᓇᕕᒃ ᓄᓇᒋᔭᐅᖕᖏᑐᖅ ᑐᑭᑖᕈᑕᐅᔪᑦ ᐊᑕᐅᓯᑐᐃᓐᓇᒧᑦ ᑐᑭᑖᕐᑕᐅᖃᔭᕋᑎᑦ. ᐃᓄᐃᑦ ᑎᒍᒥᐊᕐᒪᑕ ᐃᓕᑕᕆᔭᐅᔪᓂᒃ ᐱᔪᓐᓇᐅᑎᓂᒃ ᐊᑦᑐᐊᓂᖃᕐᑐᓂᒃ ᓄᓇᒧᑦ ᐊᑐᕐᑕᐅᓂᕆᓲᖓᓄᓪᓗ, ᐊᒻᒪᓗ ᒪᑭᕝᕕᑯᑦ ᑭᒡᒐᑐᕐᓂᖃᕐᒪᑕ ᑖᒃᑯᓂᖓ ᐱᔪᓐᓇᐅᑎᒋᔭᐅᔪᓂᒃ. ᐅᔭᕋᓐᓂᐊᕕᒻᒥᑦ ᐱᖃᕐᓂᕋᕐᓂᒧᑦ, ᑮᓇᐅᔭᖃᕐᑎᓯᓃᑦ ᐱᒋᐊᕐᑎᓯᒍᑎᖏᓐᓄᑦ, ᐅᕝᕙᓘᓐᓃᑦ ᓯᓚᑖᒍᑦ ᐊᖏᖃᑎᒌᒍᑎᐅᔪᑦ ᖃᓪᓖᑐᐃᓐᓇᖃᔭᕋᑎᑦ.
ᒪᑭᕝᕕᑯᑦ ᓇᓗᓀᕐᓯᓯᒪᔪᑦ ᖃᒻᒥᓗᐊᕆᐊᖓᓂᒃ ᐊᕗᖓᐅᑦᔨᔭᐅᒐᔭᕐᓂᖓ ᐱᓇᓱᐊᕐᑕᐅᔫᑉ ᑕᑯᓐᓇᑕᖏᑦ ᑲᖏᕐᓱᐊᓗᑦᔪᐊᒥᐅᑦ ᖃᐅᔨᒪᔭᐅᑦᓯᐊᖏᓐᓂᓕᒫᖏᓐᓂᒃ ᓲᓱᒋᔭᐅᖕᖏᓂᓕᒫᖏᓐᓂᓗ. ᒪᑭᕝᕕᑯᑦ ᐃᑲᔪᕐᓯᒪᑕ ᐱᔪᓐᓇᐅᑎᖏᓐᓂᒃ ᓄᓇᓕᖓᑕ ᑲᖏᕐᓱᐊᓗᑦᔪᐊᑉ ᓱᕐᖁᐃᓯᓂᒃᑯᑦ ᑖᑦᓱᒪᐅᑉ ᐱᓇᓱᐊᕈᑕᐅᓂᖓ ᑲᔪᓯᔪᑦᓴᐅᒪᖔᑦ ᐊᒻᒪᓗ ᒪᓕᓚᖓᑦᓱᑎᑦ ᐃᒫᙰᖁᔨᒍᑎᖏᓐᓂᒃ ᓄᓇᓕᐅᑉ ᑕᒪᑦᓱᒧᖓᐅᓕᖓᔪᓂᒃ. ᐅᖃᐅᓯᕆᔭᐅᔪᑦ ᐊᔪᒉᑑᑉ ᑕᓯᐅᑉ ᐱᓇᓱᐊᕐᑕᐅᒍᑎᖓ ᑲᔪᓯᔪᑦᓴᐅᒋᐊᖓᓂᒃ ᑖᒃᑯᓂᖓ ᒪᓕᑦᑕᐅᖁᔭᐅᔪᓂᒃ ᒪᓕᖕᖏᑐᐊᕐᐸᑕ ᓄᐃᑕᑎᑦᓯᖏᒻᒪᑕ ᐱᖁᔭᕐᑎᒍᑦ ᐊᐅᓚᑦᓯᓂᕐᒪᕆᐅᓪᓗ ᑐᖕᖓᕕᖏᓐᓂᒃ ᐊᑐᕐᓂᖃᕐᑐᓂᒃ ᓄᓇᕕᒻᒥᑦ.
ᖃᓄᐃᓕᖓᐅᓯᖏᑦ ᐱᓚᖀᓯᒪᒧᑦ ᔦᒥᓯ ᐯ ᐊᒻᒪᓗ ᑯᐯᒃ ᑕᕐᕋᖓᑕ ᐊᖏᖃᑎᒌᒍᑎᖓ ᐊᑑᑎᔭᐅᒋᐊᓪᓚᖃᔭᖕᖏᑐᖅ. ᒪᑭᕝᕕᒃ ᑲᔪᓯᓚᖓᔪᑦ ᖃᓄᐃᓘᕐᑎᐅᓂᕐᒥᓂᒃ ᐊᒻᒪᓗ ᖃᓄᐃᓘᒋᐊᕈᓐᓇᓚᖓᑦᓱᑎᑦ ᐱᕕᑦᓴᖃᕐᑎᑕᐅᑦᓯᐊᖁᓗᒋᑦ ᑐᑭᑖᕈᑕᐅᔪᑦ ᓱᕐᕃᓯᒪᔪᑦ ᐃᓄᐃᑦ ᓄᓇᖏᓐᓂᒃ ᓄᓇᕕᒻᒥ ᑲᔪᓯᐅᑦᔭᐅᖃᔭᖕᖏᑐᑦ ᐃᓄᐃᑦ ᐃᓚᐅᑎᓐᓇᒋᑦ ᐊᖏᕐᓯᒪᑎᓐᓇᒋᓪᓗ.
–30 –
ᖃᐅᔨᒋᐊᕐᕕᒃ:
ᑳᓱᕆᓐ ᒧᐊᕈᓪ
ᑲᒪᔨᒻᒪᕆᒃ ᑐᓴᐅᒪᖃᑎᒌᓐᓂᓕᕆᓂᕐᒥᒃ, ᒪᑭᕝᕕᒃ
kmorrill@makivvik.ca
www.makivvik.ca
ᒪᑭᕝᕕᒃ ᓄᓇᑖᕐᓯᒪᓂᕐᒧᑦ ᑎᒥᖁᑎᐅᕗᖅ ᑎᓕᔭᐅᒪᒍᑎᖃᕐᓱᓂ ᐊᐅᓚᑦᓯᓂᕐᒥᒃ ᐱᔭᐅᔪᕕᓂᕐᓂᒃ ᑮᓇᐅᔭᓂᒃ ᐃᓄᓐᓄᑦ ᓄᓇᕕᒻᒥᐅᓄᑦ ᐊᑐᐃᓐᓇᕈᕐᑕᐅᓯᒪᒧᑦ ᐊᑖᒎᕐᑎᓗᒋᑦ ᔦᒥᓯ ᐯ ᐊᒻᒪᓗ ᑯᐯᒃ ᑕᕐᕋᖓᑕ ᐊᖏᖃᑎᒌᒍᑎᖓᓄᑦ. ᒪᑭᕝᕕᑯᑦ ᖃᓄᐃᓘᕐᑎᐅᓂᖏᑦ ᐃᓚᖃᕐᑐᑦ ᐊᐅᓚᑦᓯᓂᓕᕆᓂᕐᒥᒃ ᐃᒻᒪᖃᐅᑎᓕᐅᕆᖃᑦᑕᓂᕐᒥᓗ ᑖᒃᑯᓂᖓ ᑮᓇᐅᔭᓂᒃ ᐊᒻᒪᓗ ᖁᕝᕙᒋᐊᕆᓂᕐᒥᒃ ᒪᑭᑉᐸᓕᐊᒐᓱᐊᕐᓂᒥᒃ ᐱᕈᕐᑎᓯᓂᕐᒥᒃ ᐊᑐᐃᓐᓇᐅᑎᑦᓯᓂᒃᑯᑦ ᐃᑲᔪᕐᓯᓂᕐᒥᒃ ᓄᐃᑕᐅᓯᒪᔪᓂᒃ ᐃᓄᓐᓄᑦ-ᐊᐅᓚᑕᐅᔪᓂᒃ ᖄᖏᕐᓂᑯᓕᐅᒐᓱᐊᕐᓂᕐᒥᒃ ᓄᓇᕕᒻᒥ. ᒪᑭᕝᕕᑯᑦ ᖁᕝᕙᒋᐊᕐᑎᓯᓯᒪᓂᖃᓲᑦ ᐃᓄᐃᑦ ᐃᓕᕐᖁᓯᖓᓂᒃ ᐅᖃᐅᓯᖓᓂᒃ ᐊᒻᒪᓗ ᐃᓗᓯᖏᓐᓂᒃ, ᖃᓄᐃᖕᖏᓯᐊᕆᐊᖃᕐᓂᖏᓐᓂᒃ, ᐃᑯᓪᓓᒋᐊᕆᓯᒪᓂᒃᑯᑦ ᐊᔪᕐᓴᓂᕐᒥᒃ, ᐊᒻᒪᓗ ᐃᓕᓐᓂᐊᓂᖏᓐᓂᒃ ᐃᓄᐃᑦ ᓄᓇᓕᒻᒥᐅᖑᔪᑦ.